‘An difear a dhéanann Daonlathas an Aontais - Cuir do thuairim in iúl le huirlisí an Tionscnaimh Eorpaigh ó na Saoránaigh do scoileanna’
Cad a spreagann daoine óga chun beart a dhéanamh faoi shaincheist is cás leo? Cad iad na bearta is féidir leo a dhéanamh mar shaoránaigh de chuid an Aontais? Cad is féidir a bhaint amach nuair a oibrímid le chéile – agus thar theorainneacha – ar shaincheisteanna a bhfuil tábhacht leo?
Déan do dhaltaí a spreagadh leis na huirlisí nua do scoileanna darb ainm ‘An difear a dhéanann Daonlathas an Aontais - Cuir do thuairim in iúl leis an Tionscnamh Eorpach ó na Saoránaigh!’
Chun go mbeidh siad ina saoránaigh ghníomhacha, ní mór do dhaoine óga tuiscint a fháil ar an gcaoi a n-oibríonn an daonlathas agus ar na cearta atá acu agus ar na freagrachtaí atá orthu. Leis na huirlisí ‘An difear a dhéanann Daonlathas an Aontais’, cuirtear an Tionscnamh Eorpach ó na Saoránaigh i láthair daltaí, sin agus spreagann siad iad le ról gníomhach a ghlacadh i saincheisteanna Eorpacha. Tá siad dírithe ar dhaltaí meánscoile atá sa tsraith shinsearach.
Tríd an teagasc, an taighde, an díospóireacht, obair thionscadail agus rólimirt, foghlaimeoidh daltaí faoin gcaoi a ndéantar cinntí san Aontas, faoin gcaoi a bhfuil tionchar ag na cinntí sin ar an saol laethúil, agus ar an rud is tábhachtaí, faoin gcaoi a gcuireann an Tionscnamh Eorpach ó na Saoránaigh ar a gcumas dul i gcomhairle le daoine eile chun beartas an Aontais a mhúnlú i dtaca le saincheisteanna ar cás leo.
“Cheap mo chuid daltaí go raibh an modúl an-suimiúil. Mhúscail na tascanna spéis iontu agus bhain siad taitneamh astu, go háirithe nuair a rinne siad físeán dá dtionscnamh Eorpach ó na saoránaigh féin - is meascán maith é d’oideachas agus de shiamsaíocht.” - Małgorzata, múinteoir meánscoile ón bPolainn
Tá an cúrsa oiriúnach do ranganna saoránachta nó saoránaíochta; d’oibreodh sé freisin mar chuid de chúrsa tionscadalbhunaithe, rang teanga iasachta nó cúrsa FCÁT. Tá sé le fáil i ngach teanga oifigiúil de chuid an Aontais.
Na huirlisí a chur i láthair
Reáchtáladh seimineár gréasáin i mí na Bealtaine 2023 chun na huirlisí a chur i láthair oideoirí. Tá taifeadadh den seimineár gréasáin agus na sleamhnáin Powerpoint le fáil thíos (i mBéarla amháin).
Is féidir leat éisteacht freisin leis an eagrán ‘The ABCs of ‘EU Democracy in Action’ - presenting a European Citizens’ Initiative Toolkit’ (i mBéarla amháin) den phodchraoladh ‘CitizenCentral’.
Comórtas físeán ImagineEU agus buaiteoirí an chomórtais
Eagraíodh comórtas ImagineEU sa scoilbhliain 2023/2024 chun gabháil le seoladh na n-uirlisí oideachais do scoileanna darb ainm ‘An difear a dhéanann Daonlathas an Aontais Eorpaigh – Cuir do thuairim in iúl leis an Tionscnamh Eorpach ó na Saoránaigh’.
D’iarr an comórtas ar Eorpaigh óga atá sa dá bhliain dheireanacha den mheánscoil níos mó a fhoghlaim faoin dóigh le bheith ina saoránaigh ghníomhacha san Aontas Eorpach. Iarradh orthu machnamh a dhéanamh ar smaointe nithiúla a d’fhéadfadh áit chónaithe níos fearr fós a dhéanamh den Aontas Eorpach, agus a d’fhéadfadh dul chun tairbhe do shaoránaigh ar fud an Aontais Eorpaigh – ag tógáil ar choincheap an Tionscnaimh Eorpaigh ó na Saoránaigh (TES) ar uirlis thábhachtach de dhaonlathas rannpháirteach san Aontas é, lenar féidir le saoránaigh páirt ghníomhach a ghlacadh i gceapadh beartas an Aontais.
I ngrúpaí suas le seachtar comhdhaltaí, iarradh ar dhaltaí a gcuid smaointe cruthaitheacha a chur i láthair i bhfíseán gearr. Cuireadh níos mó ná 400 físeán isteach. Foilsíodh 388 bhfíseán a chomhlíon rialacha an chomórtais don vótáil phoiblí.
Mar chuid den chéim dheireanach, rinne giúiré meastóireacht ar an 50 físeán a bhfuil an líon is airde vótaí ón vótáil phoiblí acu chun na trí fhoireann bhuaiteacha a chinneadh.
FÉACH AR NA FÍSEÁIN BHUAITEACHA
Duais
Na trí fhoireann bhuaiteacha, bronnadh orthu turas staidéir chun na Bruiséile, croílár an Aontais Eorpaigh, ón 21-23 Márta 2024.
Le linn an turais bhí an deis ag na foirne casadh le hionadaithe ó na hInstitiúidí Eorpacha chun tuilleadh eolais a fháil faoin gcaoi a gceaptar beartais agus dlíthe an Aontais agus faoin gcaoi ar féidir le saoránaigh an Aontais páirt a ghlacadh sa Tionscnamh Eorpach ó na Saoránaigh.
Léigh an nuacht ón gCoimisiún (i bhFraincis) an 22 Márta 2024.
Critéir dhámhachtana
An 50 físeán a bhfuil an líon is airde vótaí ón vótáil phoiblí acu, rinne giúiré meastóireacht orthu, giúiré ar a bhfuil 15 ionadaí ó phobal an Tionscnaimh Eorpaigh ó na Saoránaigh, ó institiúidí an Aontais, ó údaráis náisiúnta agus ó eagraíochtaí na sochaí sibhialta, chomh maith le hoiliúnaithe óga ón gCoimisiún Eorpach. Rinne an giúiré na critéir seo a leanas a mheas:
- Ábharthacht don Tionscnamh Eorpach ó na Saoránaigh (0-25 phointe): An bhfuil an smaoineamh taobh thiar den fhíseán ábhartha mar théama do thionscnamh Eorpach ó na saoránaigh?
- Soiléireacht (0-50 pointe): An bhfuil an teachtaireacht soiléir agus gonta?
- Cruthaitheacht (0-25 phointe): An smaoineamh úrnua é? An dtugann an fhoireann aghaidh ar an smaoineamh ar bhealach suimiúil?
Is í Ardrúnaíocht an Choimisiúin Eorpaigh, SG.A.1 - an tAonad um Thosaíochtaí Beartais agus Clár Oibre, a d’eagraigh an comórtas.
