An Painéal um Éifeachtúlacht Fuinnimh

Ag deireadh sheisiún deiridh an Phainéil, chuir na saoránaigh a moltaí faoi bhráid Maroš Šefčovič, Leas-Uachtarán Feidhmiúcháin an Choimisiúin Eorpaigh um an gComhaontú Glas don Eoraip.

Le linn trí dheireadh seachtaine, tháinig 150 saoránach a roghnaíodh go randamach ó na 27 mBallstát uile le chéile chun plé a dhéanamh ar na dúshláin agus na buntáistí is ábhartha dóibh a bhaineann le héifeachtúlacht fuinnimh.

I dteannta a chéile, tá liosta moltaí nithiúla curtha ar aghaidh acu a chuideoidh le dlíthe an Aontais amach anseo a mhúnlú agus a chuirfidh le tionscnaimh de chuid an Choimisiúin atá le teacht. Orthu sin tá an togra atá beartaithe ag an gCoimisiún le haghaidh Moladh maidir le ‘Céadphrionsabal na hÉifeachtúlachta Fuinnimh’.

Thug an Painéal Saoránach Eorpach maidir le hÉifeachtúlacht Fuinnimh 150 saoránach Eorpach le chéile chun plé a dhéanamh ar an gcaoi a n-úsáidtear fuinneamh san Aontas agus ar an gcaoi a bhféadfadh athrú teacht ar an gan córas fuinnimh amach anseo. Ba thráthúil an méid sin i bhfianaise na géarchéime fuinnimh le déanaí a dheimhnigh an gá atá le córas fuinnimh de chuid an Aontais atá níos glaine agus níos sláine.

Dhírigh na rannpháirtithe ar ghnéithe éagsúla den éifeachtúlacht fuinnimh a d’fhéadfadh a bheith romhainn sa bhaile, inár bpobail nó san ionad oibre. I measc na n-ábhar a bhí á bplé bhí ceisteanna ann a bhain leis an gcaoi a dtéitear ár bhfoirgnimh, na cineálacha fearas tí a cheannaímid, agus an cineál iompair a úsáidimid.