An ghéarchéim sa Mheánoirthear

Rinne an tAontas Eorpach cáineadh géar neamhbhalbh ar na hionsaithe sceimhlitheoireachta foréigneacha gan idirdhealú a rinne Hamas ar Iosrael an 7 Deireadh Fómhair 2023. Chuir sé a dhlúthpháirtíocht le hIosrael in iúl agus leag sé béim ar cheart na tíre í féin a chosaint i gcomhréir leis an dlí daonnúil idirnáisiúnta.

D’athdhearbhaigh sé freisin a thábhachtaí atá sé cinnte a dhéanamh de go ndéantar gach sibhialtach a chosaint i gcónaí i gcomhréir leis an dlí daonnúil idirnáisiúnta.

Tar éis na n-ionsaithe sin, tá staid dhaonnúil na bPalaistíneach i Stráice Gaza imithe in olcas go mór mar gheall ar an ngéarú leanúnach ar an gcogaíocht agus ar oibríocht mhíleata Iosraelach a d’eascair as sin, mar aon le himshuí Gaza. 

Breis agus 20 bliain de thacaíocht dhaonnúil agus forbraíochta ón Aontas Eorpach do mhuintir na Palaistíne

Bhí an tAontas Eorpach i gcónaí ar an deontóir idirnáisiúnta is mó do mhuintir na Palaistíne. Thairis sin, tá cúnamh daonnúil á chur ar fáil ag an Aontas do Phalaistínigh atá i ngátar ó 2000 i leith.

Trí Shásra an Aontais um Chosaint Shibhialta (UCPM), tacaíonn an tAontas freisin le Conair Mhuirí na Cipire le mol lóistíochta de chuid an Aontais sa Chipir lena n-éascaítear an chabhair a threorú ó na Ballstáit chuig Gaza. Oibrímid freisin leis an Eagraíocht Dhomhanda Sláinte (EDS) chun othair Phalaistíneacha a aslonnú ar bhonn leighis ó Gaza go dtí an Eoraip, trí chur chuige Team Europe. 

I mí Iúil 2024, d’fhógair an tAontas tacaíocht airgeadais éigeandála ghearrthéarmach d’Údarás na Palaistíne chun cabhrú le haghaidh a thabhairt ar na riachtanais airgeadais is práinní atá aige agus tacú lena chlár oibre athchóirithe. Is fiú €400 milliún i ndeontais agus iasachtaí an tacaíocht sin agus tá sí faoi réir dul chun cinn i gcur i bhfeidhm an chláir oibre athchóirithe. Réiteoidh an tacaíocht sin an bealach do Chlár Cuimsitheach do théarnamh agus athléimneacht na Palaistíne. Eisíocadh €272 mhilliún cheana féin

^{* an breisiú breise €45 mhilliún san áireamh, méid a d’fhógair an tUachtarán von der Leyen i mí Mheán Fómhair 2024, faoi réir fhormheas an Údaráis Buiséid.}

Tá an tAontas Eorpach tiomanta i gcónaí do shíocháin bhuan inbhuanaithe a bheidh bunaithe ar an réiteach dhá stát trí bhorradh a chur faoi na hiarrachtaí i bPróiseas Síochána an Mheánoirthir.

Tá an tAontas fós i dteagmháil leis na ceannairí réigiúnacha agus tá sé ag leanúint dá iarrachtaí taidhleoireachta, lena n-áirítear:

• Cosaint sibhialtach a iarraidh i gcomhréir leis an dlí daonnúil idirnáisiúnta
• A rannpháirtíocht dhaonnúil sa réigiún a threisiú
• Idirphlé a iarraidh idir Iosrael agus a chomharsana chun leanúint den chobhsaíocht agus den tsíocháin a choinneáil sa réigiún
• Réiteach fadtéarmach a lorg a fhágfaidh go mbeidh síocháin agus slándáil ag cách.

Tar éis na n-ionsaithe sceimhlitheoireachta a rinne Hamas ar Iosrael, agus i bhfianaise ábhar neamhdhleathach agus díobhálach a scaiptear ar na meáin shóisialta, tá an Coimisiún i dteagmháil leis na príomhardáin chun a chinntiú go n-urramóidh siad a n-oibleagáidí.

• An Ionstraim um Sheirbhísí Digiteacha: éilíonn sé sin ar na hardáin mhóra ar líne ábhar neamhdhleathach a bhaint anuas agus bearta a dhéanamh chun dul i ngleic leis na rioscaí don tslándáil phoiblí agus don dioscúrsa poiblí.
• An Rialachán maidir le hÁbhar Sceimhlitheoireachta ar Líne: cuireann sé sin ar chumas na mBallstát orduithe baint anuas a sheoladh chuig na hardáin chun ábhar sceimhlitheoireachta a bhaint anuas laistigh d’uair an chloig.

Tá dlús á chur ag an gCoimisiún freisin lena iarrachtaí an frithsheimíteachas agus an fuath frith-Mhoslamach de gach cineál a chomhrac, trí ghníomhaíochtaí a threisiú ar fud beartais éagsúla, lena n-áirítear an tslándáil, an réimse digiteach, an t-oideachas, an cultúr agus an spórt. San áireamh ann sin maoiniú breise chun ionaid adhartha a chosaint agus tacófar leis sin trí Thoscairí a ainmniú a mbeidh sainordú sainráite acu chun an leas is fearr is féidir a bhaint as beartais an Aontais chun an fuath a chomhrac.