Rialacha ríomhthráchtála san Aontas Eorpach

A bhuí leis an Aontas Eorpach, tá sé níos éasca agus níos sábháilte do thomhaltóirí na hEorpa siopadóireacht a dhéanamh ar líne is cuma cá bhfuil siad san Aontas. Chun acmhainneacht iomlán na ríomhthráchtála a bhaint amach, d’oibrigh an tAontas ar na nithe seo a leanas:

• an Treoir athbhreithnithe maidir le Seirbhísí Íocaíochta agus rialacha nua maidir le seirbhísí beartseachadta trasteorann atá i bhfeidhm cheana féin;
• rialacha nua chun deireadh a chur le geobhlocáil nach bhfuil údar léi;
• rialacha athbhreithnithe maidir le cosaint tomhaltóirí;
• rialacha nua CBL maidir le hearraí agus seirbhísí a dhíol ar líne.

Rialacha nua chun deireadh a chur le geobhlocáil nach bhfuil údar léi san Aontas

Cuireann geobhlocáil cosc orainn ceannach ó shuíomh gréasáin atá lonnaithe i mBallstát eile den Aontas. Cruthaíonn sé sin bacainní do thomhaltóirí sa tsiopadóireacht trasteorann.

Cad atá á dhéanamh ag an gCoimisiún faoi?

Tá rialacha uile-Aontais fógartha ag an gCoimisiún chun deireadh a chur le hidirdhealú ar líne ar bhonn náisiúntachta nó áit chónaithe. Tá rialacha á dtabhairt isteach aige freisin chun a chinntiú nach mbeidh bacainní gan údar os ár gcomhair a thuilleadh, amhail a bheith atreoraithe ar ais chuig suíomhanna gréasáin a bhaineann go sonrach le tír ar leith, nó a bheith orainn íoc le cártaí dochair nó creidmheasa ó thír ar leith.

Cuideoidh na rialacha sin lena chinntiú go gcaithfidh díoltóirí ar líne go cothrom le tomhaltóirí uile an Aontais gan beann ar an áit a roghnaíonn siad siopadóireacht a dhéanamh.

Faigh tuilleadh eolais faoin ngeobhlocáil trí léamh tríd an A&C, atá ar fáil sna teangacha seo a leanas: 

BG, CS, DA, DE, EL, EN, ES, ET, FI, FR, HR, HU, IT, LT, LV, MT, NL, PL, PT, RO, SK, SL, SV

Seachadtaí beartán trasteorann a dhéanamh níos saoire

Tá praghsanna beartseachadta trasteorann 3 go 5 huaire níos airde ar an meán ná praghsanna seachadta intíre do gach táirge. Aithníonn thart ar 62 faoin gcéad de na cuideachtaí ar mian leo díol ar líne costais seachadta arda mar fhadhb. Is bacainn é sin ar fhorbairt na ríomhthráchtála trasteorann.

A bhuí le rialacha nua maidir le seirbhísí beartseachadta trasteorann ar líne, is fusa teacht ar an mbealach is saoire chun beartán a sheoladh ó Bhallstát amháin go Ballstát eile.

Cad a athróidh na rialacha nua?

Níl aon teorainn ar phraghsanna seachadta, ach anois caithfidh gnóthais a gcuid praghsanna a nochtadh go soiléir, ionas gur féidir leis an tomhaltóir roghanna a chur i gcomparáid go héasca. Is féidir le tomhaltóirí praghsanna beartseachadta a cheadú ar leathanach gréasáin tiomnaithe ar shuíomh gréasáin an Choimisiúin Eorpaigh.

Baileoidh na húdaráis náisiúnta faisnéis gach bliain ó chuideachtaí beartseachadta. I gcás ina bhfuil beartseachadadh faoi réir oibleagáid seirbhíse uilechoitinne, beidh sé de cheangal ar na húdaráis rialála náisiúnta measúnú a dhéanamh i gcás ina bhfuil na taraifí míréasúnta ard.

Do chearta mar thomhaltóir ar líne a chosaint

A bhuí le rialacha uile-Aontais, is fusa do na Ballstáit tomhaltóirí a chosaint ar líne. These rules enable the removal of sites or social media accounts where scams have been identified. Fágann siad freisin gur féidir faisnéis a iarraidh ó sholáthraithe seirbhísí idirlín nó ó bhainc, chun céannacht trádálaithe bradacha ar líne a rianú.

Tá rialacha nua molta ag an gCoimisiún maidir le conarthaí digiteacha, a mbeidh feidhm acu ag deireadh 2021. Cruthóidh na rialacha cearta níos soiléire do thomhaltóirí agus rochtain á fáil acu ar ábhar digiteach agus ar sheirbhísí digiteacha.

Mar shampla, mura bhfuil an t-ábhar digiteach a fhaigheann úsáideoirí mar a comhaontaíodh nó mar a bhíothas ag súil leis le réasún, tá cearta conarthacha sonracha acu. Tá feidhm ag na cearta sin freisin nuair a chuireann an tomhaltóir sonraí pearsanta ar fáil don trádálaí gan praghas a íoc.

Mhol an Coimisiún margadh nua do thomhaltóirí in 2018 chun cearta tomhaltóirí ar líne a neartú a thuilleadh. Moltar an méid seo a leanas sa chomhaontú nua: 

• beidh ar mhargaí ar líne tomhaltóirí a chur ar an eolas faoi cé acu ó thrádálaí nó ó dhuine príobháideach atá siad ag ceannach, ionas go mbeidh siad ar an eolas faoina gcearta má théann rud éigin mícheart;
• nuair a dhéanann tomhaltóirí cuardach ar líne, cuirfear ar an eolas go soiléir iad nuair atá trádálaí ag íoc as toradh cuardaigh agus beidh ar mhargaí ar líne eolas a thabhairt faoi na príomhpharaiméadair lena gcinntear rangú na dtorthaí;
• nuair a íocann tomhaltóirí as seirbhís dhigiteach, bainfidh siad tairbhe as cearta faisnéise áirithe laistigh de 14 lá chun an conradh a chur ar ceal.

Tá tuilleadh eolais faoi chearta tomhaltóirí agus sonraí faoi chearta mar shaoránach den Aontas ar fáil i ngach ceann de theangacha oifigiúla an Aontais.

Rochtain ar sheirbhísí closamhairc a éascú

Is féidir le muintir na hEorpa a síntiúis ar líne le scannáin, imeachtaí spóirt, ríomhleabhair, físchluichí nó ceol a úsáid agus iad ag taisteal san Aontas. Tá an Coimisiún ag obair chun creat nua-aimseartha cóipchirt a chruthú san Aontas lena gceadófar rochtain trasteorann níos mó ar ábhar ar líne trí cheadúnú le haghaidh tarchuir ar líne a dhéanamh níos simplí.

Comhaontaíodh rialacha nua de chuid an Aontais maidir leis na meáin chlosamhairc, cuireadh na rialacha atá ann cheana in oiriúint don ré dhigiteach agus cuireadh saothair Eorpacha chun cinn agus caomhnaíodh an éagsúlacht chultúrtha. Níl na rialacha seo i bhfeidhm fós.

An Gníomh um Sheirbhísí Digiteacha 

Ghlac an Coimisiún togra le haghaidh Gníomh um Sheirbhísí Digiteacha (DSA). In éineacht le Gníomh um Margaí Digiteacha, cruthóidh an togra seo spás digiteach níos sábháilte agus níos oscailte do gach úsáideoir agus cinnteoidh sé cothrom iomaíochta do ghnólachtaí.

Tá trí sprioc shonracha ag an nGníomh um Sheirbhísí Digiteacha: 

• cosaint níos éifeachtaí a thabhairt do thomhaltóirí agus dá gcearta bunúsacha ar líne;
• creat cumhachtach trédhearcachta agus cuntasachta a bhunú d’ardáin ar líne;
• nuálaíocht, fás agus iomaíochas a chothú laistigh den mhargadh aonair.

Cé go bhfuil an Treoir maidir le Ríomhthráchtáil fós mar bhunchloch na rialála digití, tá athrú mór tagtha uirthi ó glacadh í 20 bliain ó shin. Tabharfaidh an Gníomh um Sheirbhísí Digiteacha aghaidh ar na hathruithe sin agus ar na dúshláin a tháinig leo, go háirithe maidir le hidirghabhálaithe ar líne.