Na meáin agus an cultúr digiteach

Thug an t-aistriú go digiteach bealaí nua leis chun taithí a fháil ar an domhan timpeall orainn. Is féidir linn rochtain a fháil ar nuacht cibé áit a bhfuil muid ó rogha leathan foinsí agus ardán. Tá réimse leathan scannán éagsúil, seónna teilifíse agus raidió a tháirgtear san Eoraip ar fáil anois do lucht féachana atá ag éirí níos leithne.

Mar sin féin, tá dúshláin nua ag baint leis an ré seo. Scaipeann an bhréagaisnéis níos tapúla ar líne ná mar a scaip sí riamh sa domhan as líne, agus d’fhéadfadh iarmhairtí díobhálacha a bheith aici agus bíonn bacainní éagsúla roimh iriseoirí agus eagraíochtaí meán i roinnt tíortha. D’fhéadfadh sé go mbainfeadh ardáin an-mhór ar líne a n-ábhar go héagórach de sholáthraithe seirbhíse meán nó nach mbeadh rochtain éasca air i gcomhéadain úsáideora. 

Le blianta beaga anuas, tá dlús curtha ag an Aontas lena chuid oibre sa réimse sin chun aghaidh a thabhairt ar go leor de na dúshláin sin trí ghníomhaíochtaí amhail: 

• Leis an Treoir nuashonraithe maidir le Seirbhísí Meán Closamhairc, déantar maoirseacht ar chomhordú na reachtaíochta náisiúnta ar fud an Aontais maidir leis na meáin chlosamhairc uile, agus cinntítear go gcaomhnaítear luachanna amhail an éagsúlacht, an cuimsiú agus an chothroime.
• Is sraith rialacha é an Gníomh Eorpach um Shaoirse na Meán chun iolrachas agus neamhspleáchas na meán a chosaint san Aontas, agus claochlú digiteach spás na meán á chur san áireamh.
• Is é is aidhm don Mholadh maidir le cosaint, sábháilteacht agus cumhachtú iriseoirí dálaí oibre níos sábháilte a chinntiú do gach gairmí sna meáin. 
• Is é is aidhm don Phlean Gníomhaíochta Eorpach um na Meáin Chumarsáide agus Closamhairc borradh a chur faoi na meáin Eorpacha agus cuidiú le neamhspleáchas cultúrtha agus teicneolaíochta na hEorpa a choinneáil sa Deacáid Dhigiteach.
• Bunaíodh Cód Cleachtais 2022 maidir le Bréagaisnéis mar uirlis chun teorainn a chur le scaipeadh na bréagaisnéise ar líne agus chun freagairt go tapa do ghéarchéimeanna.
• Is í an Fhaireachlann Eorpach um na Meáin Dhigiteacha an líonra idirdhisciplíneach is mó de chuid an Aontais, lena dtugtar le chéile seiceálaithe fíricí, saineolaithe ar litearthacht sna meáin, agus lucht acadúil chun cur i gcoinne na bréagaisnéise.
• Is uirlis eolaíoch é an Monatóir ar Iolrachas sna Meáin atá ceaptha chun rioscaí a d’fhéadfadh a bheith ann d’iolrachas na meán a shainaithint.
• is ardán é Fóram Scannánaíochta na hEorpa lenar féidir dea-chleachtais a mhalartú idir lucht ceaptha beartas agus páirtithe leasmhara san earnáil chlosamhairc.
• Is éEuropeana ardán cultúrtha digiteach na hEorpa a dhíríonn ar thurasóireacht áitiúil, inbhuanaithe, inrochtana agus nuálach chun éagsúlacht shaibhir chultúrtha agus nádúrtha na hEorpa a chur chun cinn.