Ardáin ar líne agus ríomhthráchtáil

Má d’úsáid tú inneall cuardaigh chun faisnéis a aimsiú, chun siopadóireacht a dhéanamh ar mhargadh ar líne, nó chun cumarsáid a dhéanamh trí na meáin shóisialta, d’úsáid tú ardán ar líne. 

Is cuid lárnach den domhan ar líne iad ardáin ar líne. Díolann os cionn 1 mhilliún gnólacht san Aontas earraí nó seirbhísí digiteacha trí ardáin ar líne. Agus, mar shaoránaigh Eorpacha, bainimid úsáid astu ar bhonn laethúil. 

Tá rialacha nua tugtha isteach ag an Aontas chun a chinntiú go gcothóidh na suíomhanna gréasáin sin timpeallacht ina mbeidh rath ar ghnólachtaí an Aontais agus ina gcaithfear go cothrom le húsáideoirí. Is mian linn a chinntiú gur féidir le gach duine ardáin ar líne a úsáid gan eagla roimh algartaim ionramhála nó earraí agus ábhar neamhdhleathach.   

Is féidir cur chuige an Aontais a shainiú le 3 réimse gníomhaíochta:   

1. deireadh a chur le bacainní ar líne, rud a fhágfaidh go mbeidh rochtain iomlán ar earraí agus ar sheirbhísí ar fud an Aontais; 
2. deireadh a chur le bacainní trasteorann nach bhfuil údar leo; 
3. é a dhéanamh níos éasca agus níos sábháilte siopadóireacht a dhéanamh ar líne is cuma cá bhfuil tú san Aontas. 

Chun an méid sin a bhaint amach, ghlac an tAontas an Gníomh um Sheirbhísí Digiteacha (DSA) agus an Gníomh um Margaí Digiteacha (DMA).  Is é is aidhm do na gníomhartha sin a chinntiú gur féidir le saoránaigh na hEorpa a bheith muiníneach as a sábháilteacht ar líne agus go mbeidh rath ar ghnólachtaí sa saol digiteach. Tá sé ag cinntiú freisin go bhfanfaidh rialacha ríomhthráchtála cothrom le dáta sa Deacáid Dhigiteach.