L-ECHA toffri prinċipalment żewġ tipi differenti ta' pożizzjonijiet: aġenti temporanji u aġenti kuntrattwali.

Aġenti temporanji

Il-postijiet għal aġenti temporanji huma kklassifikati f'żewġ gruppi ta' funzjoni skont in-natura u l-importanza tad-dmirijiet involuti.

• Grupp ta' funzjoni tal-amministraturi (AD) ikopri tnax-il grad minn AD 5 sa AD 16 u jikkorrispondi ma' dmirijiet tekniċi, amministrattivi, konsultattivi, lingwistiċi u xjentifiċi.
• Grupp ta' funzjoni tal-assistenti (AST) ikopri ħdax-il grad minn AST 1 sa AST 11 u jikkorrispondi ma' dmirijiet eżekuttivi, tekniċi u klerikali.

B'mod ġenerali, kuntratt ta' aġent temporanju għandu tul ta' ħames snin bil-possibiltà ta' tiġdid għal perjodu definit. Jekk jiġġedded għat-tieni darba, il-kuntratt se jkun għal perjodu indefinit.

Il-perjodu ta' prova ta' aġenti temporanji huwa ta' sitt xhur.

Aġenti kuntrattwali

Il-pożizzjonijiet ta' aġenti kuntrattwali huma kklassifikati f'erba' gruppi ta' funzjoni skont id-dmirijiet u r-responsabbiltajiet involuti.

• Grupp ta' funzjoni I jikkorrispondi ma' kompiti ta' servizz ta' appoġġ amministrattiv.
• Grupp ta' Funzjoni II jikkorrispondi ma' kompiti segretarjali u kompiti ta' ġestjoni tal-uffiċċju.
• Grupp ta' Funzjoni III jikkorrispondi ma' kompiti eżekuttivi abbozzar u kontabilità.
• Grupp ta' Funzjoni IV jikkorrispondi ma' kompiti amministrattivi, konsulenza u lingwistiċi.

It-tul tal-kuntratti għal aġenti kuntrattwali huwa ta' massimu ta' tliet snin bil-possibilità ta' tiġdid għal perjodu definit. Jekk jiġġedded għat-tieni darba, il-kuntratt isir għal perjodu indefinit.

Aġenti kuntrattwali reklutati għal aktar minn sena għandhom perjodu ta' prova ta' disa' xhur.