In-Netwerk tal-Uffiċjali ta' Sigurtà (SON) twaqqaf fl-2007 bħala sottogrupp tal-Grupp ta' Ħidma preċedenti tal-Kummissjoni Ewropea dwar it-Tħejjijiet Prattiċi għal REACH.

SON huwa netwerk ta' esperti mill-Awtoritajiet Kompetenti tal-Istat Membru (MSCAs), Istituzzjonijiet Nazzjonali b'Mandat, il-Kummissjoni Ewropea u s-CEFIC. Dan jagħti pariri lill-ECHA dwar kwistjonijiet ta' sigurtà relatati mal-iskambju sigur ta' informazzjoni li tappartieni lir-Regolamenti ta' REACH u CLP, bejn ECHA, MSCAs, Istituzzjonijiet Nazzjonali b'Mandat u l-Kummissjoni Ewropea.

Il-Bord tat-Tmexxija tal-ECHA fada f'idejn is-SON il-kompitu formali li jirrevedi r-rekwiżiti tas-sigurtà, li jilħaq ftehim dwar kwalunkwe devjazzjoni u li jħejji linji gwida għall-verifiki relatati mas-sigurtà. Abbażi tal-esperjenza eżistenti fis-SON, jagħti wkoll pariri ġenerali dwar l-iskambju tal-informazzjoni taħt REACH u CLP, b'mod partikolari fuq kwistjonijiet ta' sigurtà relatati mal-għodod tal-ICT bħal REACH-IT, RIPE u CIRCA. Is-SON jaġixxi wkoll bħala pjattaforma għall-iskambju tal-aħjar prattiki u għat-tagħlim reċiproku.

Is-SON jiltaqa' darba jew darbtejn fis-sena. L-ECHA tfornilu s-Segretarjat u tikkoordina n-netwerk tiegħu. L-Uffiċjali tas-Sigurtà huma responsabbli li jinformaw lill-organizzazzjonijiet rispettivi tagħhom bid-diskussjonijiet li jsiru u bid-deċiżjonijiet li jittieħdu matul il-laqgħat tas-SON.