Deċennju Diġitali tal-Ewropa: miri diġitali għall-2030

Il-programm ta’ politika tad-Deċennju Diġitali, b’miri u objettivi konkreti għall-2030, jiggwida t-trasformazzjoni diġitali tal-Ewropa:

Il-programm ta’ politika tad-Deċennju Diġitali 2030 jistabbilixxi ċiklu ta’ kooperazzjoni annwali biex jintlaħqu l-objettivi u l-miri komuni. Dan il-qafas ta’ governanza hu bbażat fuq mekkaniżmu ta’ kooperazzjoni annwali li jinvolvi lill-Kummissjoni u lill-Istati Membri.

Il-mekkaniżmu ta’ kooperazzjoni jikkonsisti minn

• sistema ta’ monitoraġġ strutturata, trasparenti u xxerjata bbażata fuq l-Indiċi tal-Ekonomija u s-Soċjetà Diġitali (DESI) biex jitkejjel il-progress lejn kull waħda mill-miri tal-2030
• rapport annwali li fih il-Kummissjoni tevalwa l-progress u tipprovdi rakkomandazzjonijiet għal azzjonijiet. It-tieni “Rapport dwar l-istat tad-Deċennju Diġitali” ġie ppubblikat f’Lulju 2024
• kull sentejn, Pjanijiet direzzjonali strateġiċi aġġustati għad-Deċennju Diġitali li fihom l-Istati Membri jiddeskrivu l-azzjonijiet adottati jew ippjanati biex jintlaħqu l-miri tal-2030
• mekkaniżmu li jappoġġja l-implimentazzjoni ta’ proġetti multinazzjonali, il-Konsorzju għall-Infrastruttura Diġitali Ewropea

Il-Kummissjoni żviluppat trajettorji fil-livell tal-UE. It-trajettorji tal-linja bażi jiddeskrivu kif l-UE se tagħmel progress skont ix-xejriet attwali, u t-trajettorji proġettati jiddeskrivu l-perkors li l-progress annwali jenħtieġ li jsegwi biex jintlaħqu l-miri sal-2030. Id-differenza bejn ix-xejriet stmati u l-perkors ideali se tippermetti lill-Kummissjoni timmonitorja d-distakk fl-isforz meħtieġ.

Il-Kummissjoni għandha tirrevedi l-miri sal-2026 biex tieħu kont tal-iżviluppi teknoloġiċi, ekonomiċi u soċjetali li jkunu saru.

Biex jintlaħqu l-miri u l-objettivi diġitali, il-Kummissjoni Ewropea se taċċellera u tiffaċilita t-tnedija ta’ proġetti multinazzjonali, proġetti fuq skala kbira li ebda Stat Membru ma jista’ jiżviluppa waħdu.

Dawn il-proġetti jistgħu:

• jikkombinaw investimenti mill-baġit tal-UE, inklużi mill-Faċilità għall-Irkupru u r-Reżiljenza, mill-Istati Membri, u mis-settur privat
• jindirizzaw il-lakuni fil-kapaċitajiet kritiċi identifikati tal-UE
• jappoġġjaw Suq Uniku Diġitali interkonness, interoperabbli u sigur

Il-Kummissjoni identifikat lista inizjali ta’ proġetti multinazzjonali. Din il-lista tinkludi oqsma għall-investiment bħall-infrastruttura tad-data, il-proċessuri b'konsum baxx tal-enerġija, il-komunikazzjoni 5G, il-computing ta’ prestazzjoni għolja, il-komunikazzjoni tal-kwantum sigura, l-amministrazzjoni pubblika, il-blockchain, iċ-ċentri tal-innovazzjoni diġitali, il-ħiliet diġitali u ċ-ċibersigurtà.

It-tieni rapport dwar l-istatus tal-proġetti multinazzjonali ġie ppubblikat f’Lulju 2024.

Fil-15 ta’ Diċembru 2022, il-President tal-Kummissjoni Ewropea Ursula von der Leyen iffirmat id-Dikjarazzjoni Ewropea dwar id-Drittijiet u l-Prinċipji Diġitali, flimkien mal-President tal-Parlament Ewropew Roberta Metsola, u l-Prim Ministru Ċek Petr Fiala għall-presidenza b’rotazzjoni tal-Kunsill.

Id-Dikjarazzjoni, imressqa mill-Kummissjoni f’Jannar 2022, tippreżenta l-impenn tal-UE għat-trasformazzjoni diġitali sigura, sikura u sostenibbli li tiffoka fuq in-nies, f’konformità mal-valuri ewlenin u d-drittijiet fundamentali tal-UE.

Id-drittijiet u l-prinċipji diġitali deskritti fid-Dikjarazzjoni se jikkomplementaw id-drittijiet eżistenti, bħal dawk li għandhom l-għeruq tagħhom fil-Karta tad-Drittijiet Fundamentali tal-UE, u l-leġiżlazzjoni dwar il-protezzjoni tad-data u l-privatezza. Dawn se jipprovdu qafas ta’ referenza għaċ-ċittadini dwar id-drittijiet diġitali tagħhom, kif ukoll gwida għall-Istati Membri tal-UE u għall-kumpaniji meta jittrattaw teknoloġiji ġodda. Dawn huma maħsuba biex jgħinu lil kulħadd fl-UE jikseb l-aħjar użu mit-trasformazzjoni diġitali.

It-tieni valutazzjoni tal-implimentazzjoni tal-prinċipji diġitali hija pprovduta fir-rapport tal-2024 dwar l-Istat tad-Deċennju Diġitali.

Il-Kummissjoni qed twettaq ukoll stħarriġ annwali tal-Ewrobarometru biex timmonitorja l-miżuri ta’ segwitu fl-Istati Membri. It-tieni stħarriġ tal-Ewrobarometru ta’ dan it-tip ġie ppubblikat f’Lulju 2024.