Is é ról ginearálta na riarthóirí tacú le cinnteoirí chun misean a n-institiúide nó a gcomhlachta á chomhlíonadh. Is minic gurb é AD 5 an grád ag a dtosaíonn céimithe a ngairmréim mar riarthóirí in institiúidí an Aontais Eorpaigh. Na riarthóirí a earcaítear ar an ngrád sin, is féidir leo trí chineal oibre a dhéanamh go príomha sna hinstitiuidí, ach maoirseacht a dhéanamh orthu: ceapadh beartas, seachadadh oibríochtúil agus bainistiú acmhainní.

Tá liosta na bpríomhdhualgas san Fhógra Comórtais, dualgais is féidir a bheith ó institiúid dá chéile.

Lena chois sin, is féidir féachaint ar ár suíomh gréasáin chun teacht ar eolas úsáideach faoi oifigigh bhuana.

Is gnách go mbíonn ról feidhmiúcháin agus teicniúil (riarachán, airgeadas, cumarsáid, taighde, forbairt agus cur chun feidhme beartas srl.) ag cúntóirí. Tá ról tábhachtach acu i mbainistíocht inmheánach na n-institiúidí go háirithe i ngnóthaí buiséid agus airgeadais, acmhainní daonna, ríomhaireacht, bainistiú doiciméad agus obair saotharlainne.

• Baineann gairm an chúntóra leis na gráid AST 1 go AST 11.
• Is ag grád AST 1 nó AST 3 is gnách d'fhostaithe nua dul i gceann oibre.
• Ba cheart d'iarrthóirí ar AST 1 oideachas meánscoile, agus taithí ábhartha, nó gairmcháilíocht chuí a bheith acu.
• Ar bhonn ginearálta ba cheart d'iarrthóirí ar ghrád AST 3 oideachas meánscoile, gairmcháilíocht chuí agus/nó roinnt blianta de thaithí ábhartha a bheith acu.

Is gnách go mbíonn ról bainistíochta oifige agus tacaíochta riaracháin ag Rúnaithe/Cléirigh. Lena chois sin, d'fhéadfadh fairsinge cúraimí eile a bheith orthu amhail comhaid a ullmhú, tacú le heagrú agus comhordú ghníomhaíochtaí na roinne, doiciméid a bhainistiú agus mórán eile nach iad i dtaca le cuidiú le foirne, le bainisteoirí, agus le seirbhísí eile in institiúidí an Aontais Eorpaigh.

• Baineann gairmréim an rúnaí/chléirigh le grád AST/SC1 go grád AST/SC6.
• Is ag grád AST/SC 1 nó AST/SC 2 is gnách d'fhostaithe nua dul i gceann oibre.
• Ní mór d’iarrthóirí ar ghrád AST/SC1 oideachas meánscoile agus taithí oibre ábhartha a bheith acu, é sin nó gairmcháilíocht ábhartha.
• In amanna bíonn grád AST/SC2 ar fáil d'iarrthóirí a bhfuil níos mó taithí acu.

Is trí chomórtais oscailte a roghnaíonn institiúidí an Aontais Eorpaigh iarrthóirí do bhuanchonarthaí. Bíonn tástálacha agus cleachtaí measúnaithe ann atá ceaptha do scileanna gairmiúla agus príomhinniúlachtaí ar leith a thomhas. I ngeall ar an líon mór iarrthóirí a chláraíonn do na comórtais, is é seo an próiséas roghnúcháin is cothroime agus is trédhearcaí dá bhfuil ann. Ní ghlactar le hiarratais spontáineacha, dá bhrí sin.

Is trí chomórtais oscailte a eagrú a roghnaíonn institiúidí an Aontais Eorpaigh iarrthóirí ar chonarthaí buana. Fógraítear gach ceann de na comórtais sin trí fhógra comórtais a fhoilsiú in Iris Oifigiúil an Aontais Eorpaigh, agus ar shuíomh gréasáin EPSO. San fhógra comórtais, tá cur síos iomlán ar an bpróifíl atá á lorg, ar na bunriachtanais oideachais, (agus in amanna an taithí oibre) agus tá léiriú ann ar na trialacha agus ar na cleachtaí measúnaithe (atá ceaptha chun d’inniúlachtaí gairmiúla agus príomhinniúlachtaí áirithe a mheas) a bheidh ar siúl le linn an chomórtais. Tá eolas agus treoracha san fhógra comórtais freisin faoi conas iarratas a dhéanamh ar an gcomórtas oscailte. De ghnáth, foilsítear an fógra comórtais ar an gcéad lá den tréimhse iarratais.

I ngeall ar an líon mór iarrthóirí a chuireann isteach ar na comórtais, measann EPSO gurb é sin an dóigh is cothroime agus is trédhearcaí dá bhfuil ann le hiarrthóirí a roghnú. Ní chuirfear iarratais gan choinne san áireamh mar sin.

Bíonn bord roghnúcháin dá chuid féin ag gach próiseas roghnúcháin (comórtas) d’oifigigh bhuana an Aontais. Oifigigh ó institiúidí agus ó chomhlachtaí an Aontais Eorpaigh a ndéanann EPSO fónamh dóibh a bhíonn ar gach bord roghnúcháin. Tagann oifigigh isteach sa bhord roghnúcháin ar bhonn deonach, tar éis glao tiomnaithe ar léiriú spéise. Ainmníonn a n-eagraíocht tionscnaimh comhaltaí an bhoird roghnúcháin go foirmiúil. Ní mór dóibh gan aon choinbhleacht leasa a bheith acu maidir lena gcomórtas chun go ndeimhneofar gur comhaltaí den bhord roghnúcháin iad.

I gcás comórtais a fhoilseofar go dtí an 31 Nollaig 2022, is comhaltaí buana agus comhaltaí neamhbhuana, de ghnáth, a bhíonn ar na boird roghnúcháin. Is é is comhalta buan ann oifigeach de chuid an Aontais Eorpaigh a thugtar ar iasacht do EPSO óna eagraíocht tionscnaimh ar feadh tréimhse 2 nó 4 bliana de ghnáth. Is é is comhalta neamhbhuan ann oifigeach de chuid an Aontais Eorpaigh a gceapann a eagraíocht tionscnaimh é chuig comórtas ar leith mar gheall ar a shaineolas teicniúil nó teanga, mar shampla. I gcás comórtais a fhoilseofar tar éis an 1 Eanáir 2023, ní bheidh comhaltaí buana ar bhoird roghnúcháin ar bhonn córasach a thuilleadh. De réir a chéile, ní bheidh ach comhaltaí neamhbhuana ar na boird roghnúcháin.

Cuirtear oiliúint ar chomhaltaí ainmnithe an bhoird roghnúcháin maidir le modheolaíochtaí roghnúcháin agus measúnaithe sula dtéann siad i mbun a ndualgas agus leanann siad de bheith ag fáil oiliúint agus treoir shonrach ó fhoireann síceolaithe EPSO le linn chéimeanna éagsúla a gcomórtais.

Is iad na boird roghnúcháin a chinneann deacracht na dtrialacha comórtais agus a fhaomhann a n-ábhar. Measann siad cé acu a chomhlíonann nó nach na gcomhlíonann na hiarrthóirí na critéir incháilitheachta shonracha, cuireann siad buanna na n-iarrthóirí i gcomparáid le chéile agus roghnaíonn siad na hiarrthóirí is fearr i bhfianaise na gceanglas atá leagtha amach san fhógra comórtais. Tá imeachtaí na boid roghnúcháin faoi rún agus éascaíonn EPSO a gcuid oibre.

Scála idir grád AD 5 agus grád AD 16 a bhíonn i gceist i ngairmréim an riarthóra. 

Is iondúil gur AD 5 an grád iontrála do chéimithe ollscoile.  Den chuid is mó, ní bhíonn taithí ghairmiúil de dhíth.

Uaireanta, i gcás poist speisialaithe, earcaítear daoine ag grád AD 6 nó AD 7. Beidh roinnt blianta de thaithí ábhartha ag teastáil sna róil sin. 

Gráid mheánbhainistíochta is ea na gráid AD 9 / AD 12. Ní féidir duine a roghnú/a earcú ag an ngrád sin mura bhfuil taithí bainistíochta aige cheana.