Baineann go leor daoine úsáid as ríomhairí corparáideacha le haghaidh cúraimí nach mbaineann leis an obair, cuir i gcás féachaint ar chuntais ríomhphoist phearsanta, ticéid eitleáin a chur in áirithe, coinní pearsanta a dhéanamh, an t-idirlíon a bhrabhsáil, etc. Ar an dóigh chéanna, d’fhéadfadh go leor iarrthóirí a bheith den bharúil go bhféadfaidís a ríomhairí corparáideacha a úsáid chun trialacha roghnúcháin ar líne EPSO a dhéanamh [1].

Ní mór do thríú páirtí – conraitheoir seachtrach – a bheith in ann do ríomhaire a rialú agus tú ag déanamh na trialach. I measc nithe eile, cuireann sé sin cosc ar iarrthóirí brabhsáil ar an idirlíon nó feidhmchláir eile a úsáid atá lasmuigh de shainchúram na dtrialacha.

I dtimpeallacht dhigiteach chliaint institiúideacha EPSO, tá iliomad sraitheanna slándála TF curtha i bhfeidhm ar ríomhairí corparáideacha, ríomhairí glúine san áireamh. Ar na srianta sin tá an méid seo a leanas, go príomha: ballaí dóiteáin gréasáin agus cineálacha eile srianta rochtana.

Chun go mbeifí in ann trialacha roghnúcháin ar líne a dhéanamh ar ríomhaire corparáideach – ina measc sin na ríomhairí a chuirtear ar fáil do bhaill foirne chliaint institiúideacha EPSO (e.g. an Coimisiún Eorpach, Parlaimint na hEorpa, Comhairle an Aontais Eorpaigh agus eile) – bheadh ar riarthóir údaraithe an iliomad rialuithe slándála a dhíchumasú, a mhaolú nó a athrú.

Ina measc sin, d’fhéadfadh sé gurbh éigean rialacha balla dóiteáin a athrú nó ceadanna logánta a athrú ar do ríomhaire corparáideach agus ar shocruithe chlárlann Windows ann.

D’fhéadfadh rioscaí aitheanta agus anaithnide do pháirtithe leasmhara corparáideacha a bheith i gceist leis na hathruithe sin go léir, agus d’fhéadfadh cuid acu a bheith tromchúiseach.