(1)

Fil-kuntest tar-rispons għall-kriżi tal-COVID-19, il-pakkett għall-irkupru tan-NextGenerationEU (“NGEU”) ġie adottat biex jiffinanzja inizjattivi ta’ rkupru, filwaqt li jiffaċilita t-tranżizzjoni ekoloġika u diġitali tal-ekonomija tal-Unjoni Ewropea. F’dan ir-rigward, il-programmi tal-NGEU huma dawk iffinanzjati skont l-Artikolu 2(2) tar-Regolament tal-Kunsill (UE) 2020/2094 (3), dment li jimplimentaw il-miżuri msemmija fl-Artikolu 1(2) ta’ dan ir-Regolament.

(2)

Skont l-Artikolu 5(1) tad-Deċiżjoni (UE, Euratom) 2020/2053, il-Kummissjoni għandha s-setgħa li tissellef fondi mis-swieq kapitali f’isem l-Unjoni, sa EUR 750 000 miljun fi prezzijiet tal-2018, li minnhom sa EUR 360 000 miljun fi prezzijiet tal-2018 jistgħu jintużaw għall-għoti ta’ self u sa EUR 390 000 miljun fi prezzijiet tal-2018 jistgħu jintużaw għan-nefqa.

(3)

Skont l-Artikolu 5(2) tad-Deċiżjoni (UE, Euratom) 2020/2053, il-ħlas lura tal-kapital tal-fondi missellef biex jintuża għan-nefqa u l-imgħax relatat dovut għandu jsir mill-baġit tal-Unjoni.

(4)

F’konformità mal-Artikolu 15(3) tar-Regolament (UE) 2021/241 u mal-Artikolu 220(5), il-punt (e) tar-Regolament (UE, Euratom) 2018/1046 tal-Parlament Ewropew u tal-Kunsill (4), il-kostijiet relatati mas-self ta’ fondi għas-self ipprovdut skont ir-Regolament (UE) 2021/241 jenħtieġ li jitħallsu mill-Istat Membru benefiċjarju.

(5)

Bl-implimentazzjoni tal-istrateġija ta’ finanzjament diversifikata tal-Kummissjoni għall-implimentazzjoni tal-operazzjonijiet mutwatarji tal-NGEU u l-operazzjonijiet tal-ġestjoni tad-dejn tal-NGEU, il-kapital ma għadux jinġabar abbażi tat-tranżazzjoni li tkun. Skont dan il-mudell, il-kostijiet tal-finanzjament kienu identifikabbli b’mod ċar u marbuta ma’ tranżazzjoni speċifika ta’ teħid ta’ self, u l-kostijiet relatati setgħu jiġu ttrasferiti lill-benefiċjarju tas-self flimkien mar-rikavat mit-tranżazzjoni ta’ teħid ta’ self. Min-naħa l-oħra, bl-istrateġija ta’ finanzjament diversifikata tal-NGEU, l-iżborżi permezz tal-NGUE għandhom jiġu ffinanzjati permezz ta’ rikors għal ġabra unika ta’ fondi, magħmula minn strumenti ta’ finanzjament ta’ terminu qasir u twil, li minnhom jittieħdu r-riżorsi meta jkun meħtieġ li jsiru żborżi favur il-benefiċjarji. L-istrateġija diversifikata ta’ finanzjament tiżgura l-aktar termini vantaġġużi meta jittieħed self ta’ ammonti sinifikanti ta’ fondi b’maturitajiet differenti. Għaldaqstant, huwa meħtieġ approċċ speċifiku biex jiġu kkalkulati u assenjati l-kostijiet kondiviżi marbuta ma’ kull żborż fuq bażi ġusta, ekwa u trasparenti.

(6)

Sabiex jiġi żgurat dan l-approċċ ġust, ekwu u trasparenti, jenħtieġ li l-Kummissjoni timplimenta metodoloġija komuni u unifikata għall-ispejjeż, applikabbli kemm għall-iżborżi relatati mas-self kif ukoll għal dawk relatati mad-dħul assenjat estern skont l-Artikolu 3(1) tar-Regolament (UE) 2020/2094.

(7)

Għandha tintuża metodoloġija ġdida għall-allokazzjoni tal-ispejjeż li tiżgura li ma jkun hemm l-ebda sussidju inkroċjat għall-kostijiet minn kategorija waħda ta’ benefiċjarji li jintuża minn kategorija oħra. Il-kostijiet tat-teħid b’self attribwiti għas-self jenħtieġ li jiġu imputati b’mod sħiħ lill-Istati Membri li jibbenefikaw minn self skont ir-Regolament (UE) 2021/241. Il-kostijiet tat-teħid b’self attribwiti għad-dħul assenjat estern skont l-Artikolu 3(1) tar-Regolament (UE) 2020/2094 għandhom jiġu attribwiti bis-sħiħ lill-baġit tal-Unjoni abbażi tal-ispejjeż reali mġarrba għall-ġbir u l-iżborż tas-sehem rispettiv tar-rikavati lill-benefiċjarji differenti. Il-metodoloġija jenħtieġ li tkopri l-kostijiet kollha mġarrba mill-Kummissjoni għas-self permezz tal-NGEU, inklużi l-ispejjeż amministrattivi kollha, u għandha tiżgura li kategoriji differenti ta’ kostijiet jiġu kkalkulati għal kull żborż.

(8)

Dan il-kalkolu tal-kostijiet u l-metodoloġija tal-allokazzjoni jenħtieġ li jiddistingwu bejn tliet kategoriji ta’ kostijiet. L-ewwel wieħed huwa l-kost tal-finanzjament li jirriżulta mill-imgħax u tariffi oħra li l-Kummissjoni trid tħallas fuq l-istrumenti differenti maħruġa biex tiffinanzja l-iżborżi inkwistjoni. It-tieni huma l-kostijiet tal-ġestjoni tal-likwidità li huma l-kostijiet imġarrba bħala riżultat tal-ammonti miżmuma temporanjament fil-kontijiet tal-likwidità bħala riżervi biex jiġu ssodisfati l-pagamenti li ġejjin. It-tielet huma l-ispejjeż amministrattivi tal-bini u ż-żamma tal-kapaċità teknika u operazzjonali biex tiġi implimentata strateġija diversifikata ta’ finanzjament.

(9)

Il-kalkolu tal-kost tal-finanzjament li jirriżulta minn tranżazzjonijiet ta’ teħid ta’ self fit-tul jenħtieġ li jkun abbażi tal-kostijiet li jirriżultaw mill-operazzjonijiet kollha ta’ teħid ta’ self imwettqa matul il-perjodu ta’ sitt xhur li matulu, bħala regola, ikun hemm id-data tal-iżborż. Din il-kompartimentalizzazzjoni f’perjodi ta’ sitt xhur hija ġustifikata mill-ħtieġa li jiġi żgurat li l-kostijiet ta’ finanzjament iddebitati għall-iżborż ikunu marbutin mill-qrib mar-rati prevalenti tas-suq fiż-żmien ta’ meta dan isir, u mhux abbażi tal-kostijiet ta’ finanzjament li jiġġarrbu f’xi perjodu ta’ żmien ’l bogħod. B’dan il-mod, l-istrumenti ta’ finanzjament, u l-kostijiet relatati, jiġu allokati lil kompartimenti rilevanti. Il-ġabra preċiża ta’ strumenti ta’ finanzjament hija stabbilita biss fl-għeluq tal-perjodu ta’ sitt xhur. Dan għandu jippermetti l-applikazzjoni tal-istess kost tal-finanzjament għal kwalunkwe żborż simultanju attribwit għall-istess perjodu ta’ żmien u għandu jiżgura b’mod partikolari approċċ ġust, ekwu u trasparenti bejn l-Istati Membri. L-Istati Membri u l-baġit tal-Unjoni għad-dħul assenjat estern skont l-Artikolu 3(1) tar-Regolament 2020/2094 jenħtieġ li jħallsu sehemhom. Dan jevita l-arbitrarjetà jew il-ħtif ta’ opportunità li kienu jikkaratterizzaw is-sistema tradizzjonali back-to-back fejn il-kostijiet għal xi benefiċjarju partikolari kienu t-termini li setgħu jinkisbu f’jum partikolari li fih jkun sar is-self. Minbarra l-ewwel perjodu ta’ żmien, li jenħtieġ li jkopri l-perjodu mill-1 ta’ Ġunju 2021 sal-31 ta’ Diċembru 2021, kull perjodu ta’ żmien jenħtieġ li jkopri perjodu ta’ sitt xhur li jibda mill-1 ta’ Jannar jew mill-1 ta’ Lulju. L-aħħar perjodu ta’ żmien attiv jenħtieġ li jintemm fil-31 ta’ Diċembru 2026, li jirriżulta fi ħdax-il perjodu ta’ żmien. Il-perjodi taż-żmien jenħtieġ li ma jibqgħux jeżistu ladarba jseħħ il-ħlas lura kollu tal-iżborżi ffinanzjati.

(10)

Filwaqt li r-rati tal-imgħax mitluba lill-benefiċjarji tas-self se jkunu stabbli, se jkun hemm ir-rikalkolu perjodiku u marġinali tar-rati meta l-istrumenti li jimmaturaw fil-finanzjament kollettiv jeħtieġ li jiġu sostitwiti. Il-Kummissjoni se tiżviluppa l-kapaċità tagħha li tuża derivattivi bħal swaps biex timmaniġġja kwalunkwe riskju tal-imgħax li jifdal u toffri l-opzjoni ta’ self b’rata tal-imgħax fissa lill-Istati Membri. Il-kostijiet ta’ din il-faċilità b’rata tal-imgħax fissa jenħtieġ li jiġġarrbu b’mod sħiħ u esklużiv mill-Istati Membri li jeżerċitaw din l-opzjoni.

(11)

L-ammonti ta’ żborżi f’perjodu ta’ żmien jenħtieġ li jkunu daqs l-ammont tal-istrumenti ta’ finanzjament fit-tul attribwiti għal dak il-perjodu ta’ żmien. Fil-biċċa l-kbira tal-każijiet, l-iżborżi tar-rikavati jseħħu u jiġu attribwiti għall-istess perjodu ta’ żmien tal-ħruġ tal-istrumenti ta’ finanzjament fit-tul użati biex jiġi ġġenerat id-dħul. Madankollu, dewmien mhux previst biex isiru l-iżborżi jista’ jirriżulta f’sitwazzjonijiet fejn id-dħul tal-finanzjament fit-tul jkun ġie ġġenerat, iżda ma jkunx jista’ jiġi żborżat kif skedat inizjalment. F’dan il-każ, l-iżborż jista’ jiġi ttardjat u jseħħ matul il-perjodu ta’ żmien ta’ wara. Madankollu, jekk il-fondi għal dawn il-ħtiġijiet ta’ finanzjament partikolari jkunu diġà nġabru u ġew attribwiti għal perjodu ta’ żmien preċedenti, dawn ma jistgħux jintużaw għal ħtiġijiet oħra f’dan il-perjodu ta’ żmien. F’dawn iċ-ċirkostanzi, jenħtieġ li jkun possibbli li jiġu attribwiti l-iżborżi relatati għall-perjodu ta’ żmien li għalih ikunu ġew attribwiti l-istrumenti ta’ finanzjament. Jenħtieġ li jkun ugwalment possibbli li l-istrumenti ta’ finanzjament fit-tul tal-perjodu ta’ żmien li jkun imiss jiġu attribwiti għall-perjodu ta’ żmien preċedenti f’każ li l-ammont ta’ strumenti ta’ finanzjament fit-tul ta’ dak il-perjodu ta’ żmien ma jkunx biżżejjed biex ikopri l-ammont ta’ żborżi.

(12)

Il-Kummissjoni se jkollha wkoll tantiċipa, fil-perjodi ta’ żmien preċedenti, il-ħtiġijiet tal-iżborżi li jinqalgħu kmieni fil-ħajja tal-perjodu ta’ żmien li jmiss. Sabiex ikunu koperti sitwazzjonijiet bħal dawn u jiġi żgurat li l-Kummissjoni jkollha r-riżorsi disponibbli b’termini vantaġġużi biex tagħmel l-iżborżi li jseħħu qrib it-tranżizzjoni bejn il-perjodi ta’ żmien, jenħtieġ li l-Kummissjoni jkollha l-possibbiltà li tattribwixxi l-istrumenti ta’ finanzjament fit-tul għall-perjodu ta’ żmien li jkun jmiss.

(13)

Il-kapaċità li tiġi ġestita l-likwidità tal-operazzjonijiet ta’ finanzjament permezz ta’ aċċess għal self għal terminu qasir u ż-żamma ta’ flus għal finijiet prudenzjali hija karatteristika ċentrali u li tiddefinixxi l-istrateġija diversifikata ta’ finanzjament. Din il-ġestjoni tal-likwidità se tippermetti lill-Kummissjoni biex tissodisfa l-ħtiġijiet kollha ta’ pagament u tadatta l-ħruġ għall-kundizzjonijiet tas-suq. Din il-kapaċità twassal għall-kostijiet ta’ ġbir ta’ rikavati permezz tal-ħruġ ta’ kambjala ta’ terminu qasir, u ż-żamma ta’ xi rikavati fuq bażi temporanja fuq kont tal-likwidità sabiex tiġi garantita l-kapaċità li jsiru l-pagamenti kollha meta jkun hemm talba. Din id-Deċiżjoni jenħtieġ li tistabbilixxi bażi għall-kalkolu ta’ dawn il-kostijiet ta’ likwidità u l-impożizzjoni tagħhom fuq bażi ġusta u ekwa fuq il-benefiċjarji rilevanti kollha tar-rikavati matul is-sena inkwistjoni.

(14)

Ħtiġijiet ta’ żborż ogħla mill-ammont ta’ strumenti ta’ finanzjament fit-tul allokati għall-perjodu ta’ żmien rispettiv jew għall-pagamenti tal-imgħax jistgħu jirriżultaw f’defiċit ta’ likwidità għall-perjodu ta’ żmien. Ħtiġijiet ta’ żborż aktar baxxi mill-ammont tal-istrumenti ta’ finanzjament fit-tul allokati għall-perjodu ta’ żmien rispettiv jew pagamenti ta’ tifdija riċevuti mill-NGEU fir-rigward tal-iżborżi pendenti allokati għall-perjodu jistgħu jirriżultaw f’surplus ta’ likwidità. Il-kumpens ta’ dawn is-surpluses jew defiċits tal-likwidità huwa rekwiżit inevitabbli tal-implimentazzjoni tal-istrateġija ta’ finanzjament tal-NGEU. Jenħtieġ li dawn il-kostijiet ma jiġġarrbux mill-kompartimenti tal-perjodi ta’ żmien rispettivi, iżda jenħtieġ li jiġu iżolati u ġestiti bħala parti minn kostijiet distinti tal-ġestjoni tal-likwidità. Huwa meħtieġ li jiġi stabbilit mekkaniżmu biex jitneħħew l-ispejjeż li jirriżultaw minn defiċits jew surpluses ta’ likwidità sabiex ikunu jistgħu jiġu assorbiti mill-programm ta’ finanzjament usa’ fil-forma ta’ kostijiet tal-ġestjoni ta’ likwidità. Jenħtieġ li l-Kummissjoni tuża l-kompartiment tal-ġestjoni tal-likwidità biex jiġi bbilanċjat kwalunkwe bilanċ ta’ flus pożittiv jew negattiv fil-perjodi ta’ żmien għall-ammont totali ta’ żborżi.

(15)

L-implimentazzjoni tal-istrateġija diversifikata ta’ finanzjament teħtieġ l-akkwist ta’ kapaċitajiet ġodda meħtieġa biex jinkiseb l-aktar aċċess vantaġġuż għas-swieq kapitali u biex tiġi żgurata l-manutenzjoni ta’ tali infrastruttura b’mod kontinwu u effettiv. Dan jinkludi l-kostijiet meħtieġa biex jinżammu l-kontijiet tal-likwidità, biex tinkiseb il-kapaċità biex isiru rkanti għall-kambjali u l-bonds tal-UE u biex jiġu implimentati kapaċitajiet interni ġodda għall-ipproċessar tad-data. Tali kostijiet li jirriżultaw direttament mill-implimentazzjoni tal-operazzjonijiet mutwatarji u ta’ żborż tal-NGEU jenħtieġ li jiġu ttrattati bħala spejjeż ġenerali li jiddistingwu l-kostijiet relatati mal-istabbiliment u l-manutenzjoni tal-infrastruttura ta’ self u pagament tal-NGEU. Dawn il-kostijiet għandhom jiġu koperti mill-kost tas-servizz għall-ispejjeż amministrattivi.

(16)

Il-kost tas-servizz għall-ispejjeż amministrattivi jiġbor fih l-ispejjeż amministrattivi kollha mġarrba direttament bl-implimentazzjoni tal-NGEU. Dawn il-kostijiet għandhom jiġġarrbu jew bħala kostijiet tal-istabbiliment, relatati ma’ kostijiet ta’ darba għall-bini ta’ ċerti kapaċitajiet operazzjonali jew bħala kostijiet rikorrenti li huma kostijiet inevitabbli direttament attribwibbli għall-operazzjonijiet tal-NGEU u li jseħħu maż-żmien.

(17)

Filwaqt li l-kostijiet rikorrenti jenħtieġ li jiffurmaw il-parti ewlenija tal-kostijiet annwali regolari ddebitati għall-iżborżi li jseħħu f’sena partikolari, il-kostijiet tal-istabbiliment jenħtieġ li jkunu tariffi ta’ darba.

(18)

L-ispejjeż amministrattivi inklużi fil-kost tas-servizz għall-ispejjeż amministrattivi jenħtieġ li jkunu limitati għal lista magħluqa ta’ kostijiet relatati direttament mal-NGEU. Il-kost aggregat tas-servizz għall-ispejjeż amministrattivi jirrappreżenta sehem limitat ħafna tal-kostijiet aggregati mill-operazzjonijiet tal-NGEU. Il-Kummissjoni għandha twettaq konsultazzjoni xierqa, inkluż mal-esperti tal-Istati Membri, qabel ma testendi l-lista tal-ispejjeż amministrattivi jekk tinqala’ xi ħtieġa ġustifikata fil-futur. Tali konsultazzjoni għandha wkoll ssir qabel il-modifika ta’ aspetti oħra ta’ din il-metodoloġija li jinfluwenzaw il-kostijiet li għandhom jitħallsu mill-baġit tal-Unjoni jew mill-Istati Membri.

(19)

Il-proċess ta’ fatturazzjoni ex post jenħtieġ li jitfassal b’tali mod li jiżgura li l-kostijiet jiġu rkuprati mill-2022 u sal-mument li l-ispejjeż ma jibqgħux jiġu ġġenerati minn operazzjonijiet mutwatarji u tal-ġestjoni tad-dejn tal-NGEU.

(20)

Il-Kummissjoni jenħtieġ li toħroġ avviż ta’ konferma fir-rigward ta’ kull żborż, kemm jekk għad-dħul assenjat estern skont l-Artikolu 3(1) tar-Regolament (UE) 2020/2094 kif ukoll għal self mogħti lill-Istati Membri skont ir-Regolament (UE) 2021/241 (“is-self permezz tal-RRF”).

(21)

Is-self skont ir-Regolament (UE) 2021/241 għandu jiġi implimentat fuq termini finanzjarji standard (il-profil ta’ maturità u ta’ ripagament) għal kull żborż li jsir lill-Istati Membri. Għall-iżborżi għal dħul assenjat esternament skont l-Artikolu 3(1) tar-Regolament (UE) 2020/2094, l-avviż ta’ konferma jenħtieġ li jkun l-element ewlieni ta’ appoġġ li jiddetermina dawn it-termini finanzjarji għall-Baġit tal-UE. L-avviż ta’ konferma għandu jiddetermina t-talba għall-kostijiet fuq il-bażi tat-termini finanzjarji tiegħu. Dawn it-termini jenħtieġ li jinkludu d-data tal-iżborż, l-ammont ta’ appoġġ finanzjarju, id-data tal-pagamenti tal-kost tal-finanzjament tad-dħul assenjat estern skont l-Artikolu 3(1) tar-Regolament (UE) 2020/2094.

(22)

Ir-referenzi xierqa fil-ftehimiet tas-self iffirmati mill-Istati Membri jispeċifikaw li l-kostijiet tal-iżborżi huma ddeterminati bl-applikazzjoni tal-metodoloġija stabbilita b’din id-Deċiżjoni.

(23)

Il-metodoloġija għall-allokazzjoni tal-kostijiet tiddetermina l-metodu tal-kalkolu tal-kostijiet tas-self imġarrba kemm mill-baġit f’konformità mal-ewwel subparagrafu tal-Artikolu 5(2) tad-Deċiżjoni (UE, Euratom) 2020/2053 kif ukoll mill-Istati Membri f’konformità mal-Artikolu 15(3) tar-Regolament (UE) 2021/241. Għaldaqstant, dan jikkostitwixxi arranġament għall-amministrazzjoni tal-operazzjonijiet ta’ għoti u teħid b’self skont it-tifsira tal-Artikolu 5(3) tad-Deċiżjoni (UE, Euratom) 2020/2053 u tal-Artikolu 15(4) tar-Regolament (UE) 2021/241.

(24)

Sabiex tiġi żgurata l-allokazzjoni uniformi tal-kostijiet fil-pakkett ta’ rkupru tal-NGEU, din id-Deċiżjoni jenħtieġ li tapplika mill-1 ta’ Ġunju 2021. Peress li din id-Deċiżjoni għandha tapplika għal tranżazzjonijiet ta’ teħid b’self u żborżi permezz tal-programm tal-NGEU li jkunu seħħew qabel id-dħul fis-seħħ tagħha, jenħtieġ li tidħol fis-seħħ fil-jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea. L-applikazzjoni ta’ din id-deċiżjoni għal self skont ir-Regolament (UE) 2021/241 lill-Istati Membri jenħtieġ li sseħħ mad-dħul fis-seħħ tal-ftehimiet ta’ self rilevanti,