12.12.2008   

MT

Il-Ġurnal Uffiċjali ta’ l-Unjoni Ewropea

C 317/6

1.

Waqt li jsegwu l-linji gwida tal-Kunsill tas-16 ta' Ġunju 2006 dwar il-protezzjoni konsulari taċ-ċittadini tal-UE fil-pajjiżi terzi (nota f'qiegħ il-paġna: dokument 10109/2/06 rev 2) u tad-dokument 10715/07 approvat mill-KPS dwar il-protezzjoni konsulari taċ-ċittadini tal-UE fil-pajjiżi terzi, dawn il-linji gwida għandhom il-ħsieb li jimplimentaw il-konklużjonijiet tal-Kunsill Affarijiet Ġenerali u Relazzjonijiet Esterni tat-18 ta' Ġunju 2007 li għandhom l-objettiv li “isaħħu l-kooperazzjoni konsulari bejn l-Istati Membri tal-UE permezz tal-implimentazzjoni tal-kunċett tal-Istat Mexxej konsulari”. Dawn il-konklużjonijiet jipprevedu li “f'każ ta' kriżi kbira li jkollha riperkussjonijiet konsulari u mingħajr preġudizzju għall-fatt li l-ewwel nett hija responsabbiltà tal-Istati Membri li jassiguraw li ċ-ċittadini tagħhom ikunu protetti, l-Istat Mexxej irid isib mezz biex iċ-ċittadini kollha tal-Unjoni Ewropea jkunu mgħejjuna u għandu jikkoordina l-ħidma tal-Istati Membri fuq il-post”;

2.

Dawn il-linji gwida huma mfassla fil-qafas tal-implimentazzjoni tal-obbligu previst fl-Artikolu 20 tat-Trattat li jistabbilixxi l-Komunità Ewropea kif ukoll tal-kompiti ta' kooperazzjoni msemmija fl-Artikolu 20 tat-Trattat dwar l-Unjoni Ewropea. L-Istat Membru jerfa' r-responsabbiltà ta' Stat Mexxej fuq bażi volontarja, bil-parteċipazzjoni u l-appoġġ ħawtiel tal-Istati Membri. F'kull każ, l-Istati Membri l-oħra għandhom ikomplu jsegwu l-qagħda taċ-ċittadini tagħhom fuq il-post, jikkommunikawlhom l-informazzjoni u l-evalwazzjonijiet tagħhom tas-sitwazzjoni u jgħaddulhom rinforzi u riżorsi supplementari skont il-bżonn.

3.

F'konformità mad-dokument 10715/07 approvat mill-KPS, fl-aħħar tal-perijodu ta' esperimentazzjoni li qed issir, li għandu jservi prinċipalment biex ikunu organizzati eżerċizzji ġodda, u abbażi tal-esperjenzi konkreti, l-Istati Membri għandhom jeżaminaw il-possibbiltà li jifformalizzaw dan il-qafas permezz ta' deċiżjoni legali.

4.

Dawn il-linji gwida ma jipprojbixxux forom addizzjonali ta' inizjattivi ta' kooperazzjoni jew ta' koordinazzjoni, b'kont meħud tas-sitwazzjonijiet partikolari li jistgħu jinqalgħu f'każ ta' kriżi kbira b'riperkussjonijiet konsulari fl-Istati terzi;

5.

Il-linji gwida mhumiex legalment vinkolanti u huma indirizzati esklussivament lill-Istati Membri, lill-Kummissjoni Ewropea u lis-Segretarjat Ġenerali tal-Kunsill. Dawn il-linji gwida ġew ippublikati fil-Ġurnal Uffiċjali tal-Unjoni Ewropea.

1.1.

Stat Membru li jkun jixtieq jidħol għall-impenn ta' Stat Mexxej fi Stat terz għandu javżah permezz tal-COREU. Din ix-xewqa għandha tiġi mgħarrfa lill-missjonijiet u l-inkarigat akkreditat li jkun hemm fil-pajjiż terz, waqt laqgħa ta' koordinazzjoni lokali.

1.2.

Jekk ikun hemm żewġ Stati Membri li jkunu jixtiequ jidħlu konġuntament għall-impenn ta' Stat Mexxej fi Stat terz, huma għandhom javżawh konġuntament permezz tal-COREU. Jekk ikun hemm aktar minn Stat Mexxej wieħed, ir-responsabbiltajiet għandhom jinqasmu skont kif ikun jaqbel u l-modalitajiet tal-koordinament għandhom jiġu definiti b'mod ċar.

1.3.

Jekk ma jkunx hemm oġġezzjoni minn xi Stat Membru ieħor permezz tal-COREU fi skadenza ta' 30 ġurnata u sakemm dan ma jirrinunzjax permezz tal-COREU, l-Istat Membru jkun dikjarat Stat Mexxej fl-Istat terz ikkonċernat.

1.4.

Lista ta' pajjiżi terzi fejn xi Stat Membru għandu rwol ta' Stat Mexxej hija aġġornata mis-Segretarjat Ġenerali tal-Kunsill man-notifika ta' dikjarazzjoni ta' Stat Mexxej jew b'rinunzja ta' dan it-tip. Din il-lista hija ppubblikata fis-sit konsulari tas-SITCEN u mqassma b'mod regolari lill-Istati Memrbi.

1.5.

F'każ ta' kriżi kbira li jkollha riperkussjonijiet konsulari fi Stat terz fejn ebda Stat ma ddikkjara lilu nnifsu Stat Mexxej, wieħed jew aktar Stati Membri jistgħu b'mod immedjat jidħlu għal dan l-impenn jekk jgħarrfuh permezz tal-COREU jew b'mezzi oħra adatti. L-Istati Membri jistgħu jirrifjutaw l-offerta tal-Istat Mexxej f'konformità mal-punt 2.2.

2.1.

L-Istat Mexxej għandu dawn il-missjonijiet:

2.2.

Meta l-Istat Mexxej jidhirlu li jkun meħtieġ li ssir evakwazzjoni tal-benefiċjarji definiti fil-punt 3.1, huwa għandu jinforma lill-Istati Membri kkonċernati lokalment u fil-kapitali. L-Istati Membri kkonċernati min-naħa tagħhom għandhom jinformaw lill-Istat Mexxej dwar il-pożizzjoni nazzjonali tagħhom fir-rigward tal-evakwazzjoni, u dwar ir-rieda li jibbenefikaw jew le mill-għajnuna tal-Istat Mexxej fil-kwistjoni. Jekk jiġri li Stat Membru jirrifjuta din l-għajnuna, għandu jerfa' r-responsabbiltà hu stess tal-protezzjoni taċ-ċittadini tiegħu u ta' benefiċjarji oħra li eventwalment jistgħu jużaw l-għajnuna konsulari tiegħu. Iċ-ċittadini tiegħu u benefiċjarji oħra li eventwalment jistgħu jużaw l-għajnuna konsulari jibqgħu, skont il-prinċipju tan-non-diskriminazzjoni, f'qagħda li jirċievu l-assistenza tal-Istat Mexxej. L-Istat Mexxej ma jkunx soġġett għall-konsegwenzi eventwali tad-deċiżjoni tal-Istat Membru li jirrifjuta l-għajnuna tal-Istat Mexxej.

2.3.

Il-parteċipazzjoni tal-benefiċjarji fl-evakwazzjoni hija volontarja. F'każ ta' evakwazzjoni, ir-responsabbiltajiet tal-Istat Mexxej jintemmu meta l-persuni evakwati jaslu fil-post sigur magħżul mill-Istat Mexxej. It-teħid tal-persuni evakwati lejn post ieħor mill-post sigur magħżul mhux parti mill-missjoni tal-Istat Mexxej.

2.4.

Fil-każ li l-Istat Mexxej, b'differenza ta' Stati Membri oħra, jidhirlu li jkun għadu mhux opportun li ssir evakwazzjoni, huwa għandu, bil-mezzi kollha possibbli, jġib għajnuna u jikkoordina l-azzjonijiet ta' għajnuna implimentati mill-Istati Membri l-oħra.

3.1.

Il-persuni kollha f'qagħda li jirċievu l-assistenza konsulari tal-Istat Membru tagħhom jistgħu jitolbu l-għajnuna tal-Istat Mexxej.

4.1.

Biex l-Istat Mexxej ikun jista' jiżgura t-twettiq tajjeb tal-missjoni kif definita fil-punt 2.1, l-Istati Membri għandhom jgħaddu l-informazzjoni strettament meħtieġa (bżonn li tkun magħrufa) għall-eżerċizzju ta' din il-missjoni, kif definit b'mod partikolari fl-Annessi I, II u III tal-linji gwida tas-16 ta' Ġunju 2006.

4.2.

L-Istat Mexxej m'għandux juża din l-informazzjoni ħlief fil-qafas tal-missjonijiet li għandu fir-rwol ta' Stat Mexxej.

4.3.

Din l-informazzjoni titwassal lokalment permezz tal-kapijiet tal-missjoni jew mill-inkarigat akkreditat fil-pajjiżi terzi, lill-kap tal-missjoni jew lill-inkarigat akkreditat tal-Istat Mexxej, skont l-arranġamenti definiti konġuntament.

4.4

Fil-każ li Stat Membru ma jkunx ħatar kap tal-missjoni jew inkarigat akkreditat fil-pajjiż terz, huwa għandu jgħaddi l-informazzjoni meħtieġa lill-Istat Mexxej skont l-arranġamenti definiti konġuntament.

4.5.

In-nuqqas ta' informazzjoni jew informazzjoni mhux kompluta mogħtija minn Stat Membru lill-Istat Mexxej ikollha impatt negattiv fuq il-possibbiltà li l-Istat Mexxej jimplimenta l-missjoni tiegħu kif definita fil-punt 2.1. F'każ bħal dan, l-Istat Mexxej iwettaq missjoni ta' għajnuna fil-limiti tal-informazzjoni li jkollu.

5.1.

B'konsiderazzjoni għall-prinċipju ta' solidarjetà Ewropea u f'konformità mal-fatt li l-ewwel dmir biex tkun żgurata l-protezzjoni taċ-ċittadini huwa tal-Istati Membri, l-Istati Membri għandhom jikkontribwixxu għat-twettiq xieraq tal-missjoni tal-Istat Mexxej.

5.2.

Abbażi ta' dan, l-Istat Mexxej jista' jitlob lill-Istati Membri l-oħra biex b'mod volontarju jagħtuh mezzi ta' għajnuna loġistika u umana fi żmien ta' kriżi. Xi rappreżentanti tal-Istati Membri jistgħu, fil-qafas tat-timijiet nazzjonali għal rispons għal kriżi, iwasslu l-appoġġ tagħhom lill-Istat Mexxej lokalment. L-Istat Mexxej jista' wkoll juża strumenti bħalma huma l-mekkaniżmu Komunitarju għall-protezzjoni ċivili, l-istrutturi għall-ġestjoni ta' kriżi tas-Segretarjat Ġenerali tal-Kunsill, kif ukoll l-appoġġ loġistiku tad-delegazzjoni lokali fil-Kummissjoni Ewropea. L-Istat Mexxej u d-delegazzjoni tal-Kummissjoni kkonċernati jieħdu r-rwol tal-Kummissjoni fil-fażi ta' ppjanar. Il-persunal tal-Kummissjoni m'għandu jieħu l-ebda impenn konsulari.

5.3.

L-Istat Mexxej għandu jippreżenta lill-Istati Membri rapport finanzjarju tal-ispejjeż li jkun għamel u ta' dawk li jkunu saru mill-Istati kontributuri msemmija fil-punt 5.2.

5.4

L-Istat Mexxej jista' jitlob lill-Istati Membri rimborż tal-ispejjeż li jkun għamel minħabba l-missjoni tiegħu. F'każ li ssir talba għal rimborż, l-Istati Membri għandhom jikkontribwixxu għall-ispejjeż okkażjonati mill-missjoni tal-Istat Mexxej prorata tal-persuni mgħejjuna. Din il-kontribuzzjoni għandha tiġi stabbilita wara t-tnaqqis, jekk ikun il-każ, tal-ispejjeż imsemmija fil-punt 5.2. L-Istati Membri jistgħu jieħdu rimborż għall-ispejjeż mill-persuni mgħejjuna abbażi tal-impenji ta' rimborż miġbura skont x'ikun possibbli li jsir mill-Istat Mexxej fil-waqt tal-operazzjoni tal-assistenza, f'konformità mad-Deċiżjoni 95/553/KE rigward il-protezzjoni ta' ċittadini tal-Unjoni Ewropea min rappreżentazzjonijiet diplomatiċi u konsulari.

5.5.

Jekk min jibbenefika minn assistenza mill-Istat Mexxej jitlob kumpens għal danni li jkun ġarrab waqt missjoni ta' għajuna lill-Istat Mexxej, l-Istat Mexxej u l-Istat Membru tal-benefiċjarju għandhom jikkonsultaw lil xulxin u jaħsbu għal azzjonijiet supplimentari, f'konformità mad-drittijiet tagħhom u mal-proċeduri interni kif ukoll mal-liġi internazzjonali.

6.1

L-Istati Membri għandhom jieħdu l-miżuri meħtieġa sabiex dawn il-linji gwida jsiru magħrufa minn kull persuna li tista' tirċievi l-għajnuna konsulari tagħhom, b'mod partikolari permezz ta' siti fejn jingħataw pariri lil min jivvjaġġa.