L_2010333MT.01000601.xml

li jemenda r-Regolament (KE) Nru 1794/2006 li jistabbilixxi skema komuni ta’ imposti għas-servizzi tan-navigazzjoni bl-ajru

Wara li kkunsidrat ir-Regolament (KE) Nru 550/2004 tal-Parlament Ewropew u tal-Kunsill tal-10 ta’ Marzu 2004 dwar il-forniment ta’ servizzi ta’ navigazzjoni tal-ajru fl-ajru uniku Ewropew (ir-Regolament tal-forniment ta’ servizz) (1), u b’mod partikolari l-Artikolu 15(4) tiegħu,

Wara li kkunsidrat ir-Regolament (KE) Nru 549/2004 tal-Parlament Ewropew u tal-Kunsill tal-10 ta’ Marzu 2004 li jippreskrivi l-qafas għall-ħolqien tal-Ajru Uniku Ewropew (ir-Regolament qafas) (2), u b’mod partikolari l-Artikolu 5(3) tiegħu,

Dawk l-Istati Membri li r-regolamenti nazzjonali tagħhom li kienu jeżistu qabel it-8 ta’ Lulju 2010 jistabbilixxu tnaqqis fir-rata għal kull unità li huwa akbar mill-miri stabbiliti għall-Unjoni kollha skont ir-Regolament (UE) Nru 691/2010 jistgħu jeżentaw lill-fornituri tas-servizzi tan-navigazzjoni bl-ajru tagħhom mill-Artikolu 11a(3) tar-Regolament (KE) Nru 1794/2006. Dik l-eżenzjoni għandha tapplika għall-perjodu meta r-regolamenti nazzjonali jnaqqsu r-rata għal kull unità, iżda ma għandhiex testendi lil hinn mit-tmiem tal-ewwel perjodu ta’ referenza fl-2014. L-Istati Membri għandhom jinformaw lill-Kummissjoni u lill-Eurocontrol bl-eżenzjonijiet.

L-Istati Membri jistgħu jiddeċiedu li ma japplikawx dan id-dispożizzjonijiet tar-Regolament (KE) Nru 1794/2006 kif emendati b’dan ir-Regolament għall-imposti tat-terminal sal-31 ta’ Diċembru 2014. Huma għandhom jinnotifikaw lill-Kummissjoni b’dan. Fejn l-Istati Membri jeżentaw l-imposti tat-terminal mid-dispożizzjonijiet ta’ dak ir-Regolament, l-ispejjeż kollha tal-forniment tas-servizzi tan-navigazzjoni bl-ajru tat-terminal jistgħu jiġu rkuprati sal-31 ta’ Diċembru 2014.

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu jibda japplika għall-ispejjeż, għall-imposti u għar-rati għal kull unità marbuta mas-servizzi tan-navigazzjoni bl-ajru mill-2012.

ANNESS

L-Annessi I sa VI huma emendati kif ġej:

Fl-Anness 1, għandu jiżdied il-punt 5 li ġej:

“5.	F’każ li jkun hemm iktar minn 150 000 moviment kummerċjali fis-sena, il-valutazzjoni msemmija fil-punti 1 sa 4 għandha ssir fil-livell ta’ kull ajruport individwali.”.

L-Anness II huwa sostitwit b’dan li ġej:

“ANNESS II

It-trasparenza tal-ispejjeż

1. IT-TABELLA TA’ RRAPPURTAR

L-Istati Membri kif ukoll il-fornituri tas-servizzi tan-navigazzjoni bl-ajru għandhom jimlew it-tabella ta’ rrappurtar li ġejja għal kull żona tal-imposti taħt ir-responsabbiltà tagħhom u għal kull perjodu ta’ referenza. L-Istati Membri għandhom jipprovdu wkoll tabella ta’ rrappurtar ikkonsolidata għal kull żona tal-imposti taħt ir-responsabbiltà tagħhom.

Għandha timtela tabella kkonsolidata għall-ajruporti kollha li huma suġġetti għad-dispożizzjonijiet ta’ dan ir-Regolament.

Meta żona tal-imposti tkun testendi fuq l-ispazju tal-ajru ta’ aktar minn Stat Membru wieħed, dawk l-Istati Membri għandhom jimlew it-tabella b’mod konġunt skont l-arranġamenti msemmija fl-Artikolu 4(4).

L-ispejjeż attwali għandhom jiġu stabbiliti fuq il-bażi tal-kontijiet iċċertifikati. L-ispejjeż għandhom jiġu stabbiliti skont il-pjan tan-negozju meħtieġ miċ-ċertifikat u għandhom jiġu rrappurtati fil-munita li fiha jkunu stabbiliti skont ir-raba’ subparagrafu tal-Artikolu 6(1).

Sabiex jiġi ffaċilitat l-istabbiliment mill-Kummissjoni ta’ miri tal-prestazzjoni għall-Unjoni kollha, u bla ħsara għall-pjanijiet ta’ prestazzjoni li għandhom jiġu adottati fil-livell nazzjonali jew tal-blokok tal-ispazju tal-ajru funzjonali, l-Istati Membri kif ukoll il-fornituri tas-servizzi tan-navigazzjoni bl-ajru għandhom jimlew tali tabella ta’ rrappurtar b’ċifri tat-tbassir inizjali tmintax-il xahar qabel ma jibda l-perjodu ta’ referenza.

2. INFORMAZZJONI ADDIZZJONALI

Barra minn hekk, l-Istati Membri kif ukoll il-fornituri tas-servizzi tan-navigazzjoni bl-ajru għandhom jipprovdu mill-inqas l-informazzjoni li ġejja:

—

Deskrizzjoni tal-metodoloġija użata biex jiġu allokati l-ispejjeż tal-faċilitajiet jew tas-servizzi bejn is-servizzi differenti tan-navigazzjoni bl-ajru abbażi tal-lista tal-faċilitajiet u s-servizzi mniżżlin fil-Pjan Reġjonali tan-Navigazzjoni bl-Ajru tal-ICAO għar-Reġjun Ewropew (id-Dokument 7754) u deskrizzjoni tal-metodoloġija użata biex jiġu allokati dawk l-ispejjeż bejn iż-żoni tal-imposti differenti;

—	Deskrizzjoni u spjegazzjoni tal-metodu adottat biex jiġu kkalkulati l-ispejjeż tad-deprezzament: l-ispejjeż storiċi jew l-ispejjeż attwali. Meta tiġi adottata l-kontabbiltà attwali tal-ispejjeż, l-għoti ta’ dejta komparabbli dwar l-ispejjeż storiċi;

—	Ġustifikazzjoni tal-ispiża tal-kapital, inklużi l-komponenti tal-bażi tal-assi, l-aġġustamenti tal-assi totali li jista’ jkun hemm u d-dħul fuq il-kapital;

—

Deskrizzjoni tal-ispejjeż determinati kollha għal kull ajruport li huwa suġġett għad-dispożizzjonijiet ta’ dan ir-Regolament għal kull żona tal-imposti tat-terminal; għall-ajruporti b’inqas minn 20 000 moviment ta’ trasport bl-ajru kummerċjali fis-sena kkalkulat bħala l-medja fuq it-tliet snin ta’ qabel, l-ispejjeż jistgħu jiġu ppreżentati b’mod aggregat;

—	Definizzjoni tal-kriterji użati biex l-ispejjeż jiġu allokati bejn is-servizzi tat-terminal u s-servizzi en route għal kull ajruport irregolat;

—

It-tqassim tal-ispejjeż meteoroloġiċi bejn l-ispejjeż diretti u ‘l-ispejjeż prinċipali tal-MET’, iddefiniti bħala l-ispejjeż biex jingħata appoġġ lill-faċilitajiet u s-servizzi meteoroloġiċi li jservu wkoll għar-rekwiżiti meteoroloġiċi b’mod ġenerali. Dawn jinkludu l-analiżi ġenerali u t-tbassir, in-netwerks tal-osservazzjoni ta’ wiċċ l-art u tal-ajru ta’ fuq, is-sistemi ta’ komunikazzjoni meteoroloġiċi, iċ-ċentri tal-ipproċessar tad-dejta u r-riċerka, it-taħriġ u l-amministrazzjoni prinċipali li jappoġġawhom;

—	Deskrizzjoni tal-metodoloġija użata biex jiġu allokati l-ispejjeż kollha tal-MET u l-ispejjeż prinċipali tal-MET għall-avjazzjoni ċivili u bejn iż-żoni tal-imposti;

—	Kif mitlub fil-punt 1, tmintax-il xahar qabel jibda perjodu ta’ referenza, deskrizzjoni tal-ispejjeż u tat-traffiku mbassra rrappurtati;

—	Għal kull sena tal-perjodu ta’ referenza, deskrizzjoni tal-ispejjeż attwali rrappurtati u d-differenza bejn dawn l-ispejjeż u l-ispejjeż determinati.”.

Fl-Anness III, il-punt 1.2 huwa sostitwit b’dan li ġej:

“1.2. Informazzjoni addizzjonali

Barra minn hekk, il-fornituri tas-servizzi tan-navigazzjoni bl-ajru għandhom jipprovdu mill-inqas l-informazzjoni li ġejja:

—	Deskrizzjoni tal-kriterji użati biex jiġu allokati l-ispejjeż tal-faċilitajiet jew tas-servizzi bejn is-servizzi differenti tan-navigazzjoni bl-ajru abbażi tal-lista tal-faċilitajiet u s-servizzi mniżżlin fil-Pjan Reġjonali tan-Navigazzjoni bl-Ajru tal-ICAO għar-Reġjun Ewropew (id-Dokument 7754);

—	Deskrizzjoni u spjegazzjoni tad-differenzi bejn iċ-ċifri mhux kunfidenzjali ppjanati u attwali għas-sena (n-1);

—	Deskrizzjoni u spjegazzjoni tal-ispejjeż u tal-investimenti mhux kunfidenzjali ppjanati fuq ħames snin b’rabta mat-traffiku mistenni;

—	Deskrizzjoni u spjegazzjoni tal-metodu adottat biex jiġu kkalkulati l-ispejjeż tad-deprezzament: l-ispejjeż storiċi jew l-ispejjeż attwali;

—	Ġustifikazzjoni tal-ispiża tal-kapital, inklużi l-komponenti tal-bażi tal-assi, l-aġġustamenti tal-assi totali li jista’ jkun hemm u d-dħul fuq il-kapital.”.

L-Anness IV huwa sostitwit b’dan li ġej:

“ANNESS IV

Il-kalkolu tal-unitajiet tas-servizzi en route u tar-rati għal kull unità en route

1. Il-kalkolu tal-unitajiet tas-servizzi en route

1.1

L-unità tas-servizz en route għandha tiġi kkalkulata billi jiġu mmultiplikati l-fattur tad-distanza u l-fattur tal-piż għall-ajruplan ikkonċernat.

1.2

Il-fattur tad-distanza għandu jinkiseb billi ssir diviżjoni b’mija tan-numru ta’ kilometri ta’ titjira fid-distanza taċ-ċirku l-kbir bejn il-punt tad-dħul u l-punt tal-ħruġ taż-żoni tal-imposti, skont l-aħħar pjan tat-titjira magħruf li jkun ingħata mill-ajruplan ikkonċernat għall-finijiet tal-flussi tat-traffiku tal-ajru.

1.3

Jekk il-punt tal-ħruġ u tad-dħul ta’ titjira waħda jkunu identiċi f’żona tal-imposti, il-fattur tad-distanza għandu jkun daqs id-distanza fid-distanza taċ-ċirku l-kbir bejn dawn il-punti u l-punt l-aktar imbiegħed tal-pjan tat-titjira mmultiplikat bi tnejn.

1.4

Id-distanza li għandha titqies għandha titnaqqas b’20 kilometru għal kull tlugħ mit-territorju ta’ Stat Membru u għal kull inżul fih.

1.5

Il-fattur tal-piż, espress bħala ċifra b’żewġ punti deċimali, għandu jkun l-għerq kwadrat tal-kwozjent miksub billi jiġi diviż b’ħamsin in-numru ta’ tunnellati metriċi fil-piż massimu ċċertifikat tat-tlugħ tal-ajruplan mogħti fiċ-ċertifikat tal-ajrunavigabbiltà jew f’xi dokument uffiċjali ekwivalenti pprovdut mill-operatur tal-ajruplan. Fejn dan il-piż ma jkunx magħruf, għandu jintuża l-piż tal-itqal ajruplan tal-istess tip li huwa magħruf li jeżisti. F’każ fejn ajruplan ikollu aktar minn piż tat-tlugħ massimu wieħed iċċertifikat, għandu jintuża l-akbar wieħed. Fejn operatur ta’ ajruplan jopera żewġ ajruplani jew aktar li jkunu verżjonijiet differenti tal-istess tip ta’ ajruplan, għal kull ajruplan ta’ dak it-tip għandha tintuża l-medja tal-piżijiet tat-tlugħ massimi tal-ajruplani kollha tiegħu ta’ dak it-tip. Il-kalkolu tal-fattur tal-piż għal kull tip ta’ ajruplan u għal kull operatur għandha ssir mill-inqas darba fis-sena.

2. Il-kalkolu tar-rati għal kull unità en route

2.1

Ir-rata għal kull unità en route għandha tiġi kkalkulata qabel il-bidu ta’ kull sena tal-perjodu ta’ referenza.

2.2

Hija għandha tiġi kkalkulata billi s-somma alġebrajka tal-elementi li ġejjin tiġi diviża bl-għadd totali mistenni ta’ unitajiet tas-servizzi en route għas-sena rilevanti:

i)	l-ispejjeż determinati tas-sena rilevanti,

ii)	l-applikazzjoni tad-differenza bejn l-inflazzjoni mbassra u dik attwali msemmija fl-Artikolu 6(1),

iii)	l-ammonti miġjuba ’l quddiem li jirriżultaw mill-implimentazzjoni tal-qsim tar-riskju tat-traffiku msemmi fl-Artikolu 11a(2) sa (7),

iv)	l-ammonti miġjuba ’l quddiem mill-perjodu ta’ referenza ta’ qabel li jirriżultaw mill-implimentazzjoni tal-qsim tar-riskju tal-ispiża msemmi fl-Artikolu 11a(8),

v)	il-bonusijiet u l-penali li jirriżultaw mill-inċentivi finanzjarji msemmija fl-Artikolu 12(2),

vi)	għall-ewwel żewġ perjodi ta’ referenza, l-irkupru żejjed jew nieqes imġarrab mill-Istati Membri sas-sena 2011, l-2011 inkluża,

vii)	tnaqqis tal-ispejjeż tat-titjiriet tal-VFR identifikati fl-Artikolu 7(4).”.

L-Anness V huwa sostitwit b’dan li ġej:

“ANNESS V

IL-Kalkolu tal-unitajiet tas-servizzi tat-terminal u tar-rati għal kull unità

1. Il-kalkolu tal-unitajiet tas-servizzi tat-terminal

1.1

L-unità tas-servizzi tat-terminal għandha tkun daqs il-fattur tal-piż għall-ajruplan ikkonċernat.

1.2

Il-fattur tal-piż, espress bħala ċifra b’żewġ punti deċimali, għandu jkun il-kwozjent miksub billi jiġi diviż b’ħamsin in-numru ta’ tunnellati metriċi fl-ogħla piż massimu ċċertifikat tat-tlugħ tal-ajruplan, imsemmi fil-punt 1.5 tal-Anness IV, għall-poter ta’ 0.7. Madankollu, f’perjodu tranżitorju ta’ ħames snin wara l-kalkolu tal-ewwel rata għal kull unità tat-terminal skont dan ir-Regolament, dan l-esponent għandu jkun ta’ bejn 0.5 u 0.9.

2. Il-kalkolu tar-rati għal kull unità tat-terminal

2.1

Ir-rata għal kull unità tat-terminal għandha tiġi kkalkulata qabel il-bidu ta’ kull sena tal-perjodu ta’ referenza.

2.2

Hija għandha tiġi kkalkulata billi s-somma alġebrajka tal-elementi li ġejjin tiġi diviża bl-għadd totali mistenni ta’ unitajiet tas-servizzi tat-terminal għas-sena rilevanti:

i)	l-ispejjeż determinati tas-sena rilevanti,

ii)	l-applikazzjoni tad-differenza bejn l-inflazzjoni mbassra u dik attwali msemmija fl-Artikolu 6(1),

iii)	l-ammonti miġjuba ’l quddiem li jirriżultaw mill-implimentazzjoni tal-qsim tar-riskju tat-traffiku msemmi fl-Artikolu 11a(2) sa (7),

iv)	l-ammonti miġjuba ’l quddiem mill-perjodu ta’ referenza ta’ qabel li jirriżultaw mill-implimentazzjoni tal-qsim tar-riskju tal-ispiża msemmi fl-Artikolu 11a(8),

v)	il-bonusijiet u l-penali li jirriżultaw mill-inċentivi finanzjarji msemmija fl-Artikolu 12(2),

vi)	għall-ewwel żewġ perjodi ta’ referenza, l-irkupru żejjed jew nieqes imġarrab mill-Istati Membri sas-sena ta’ qabel ma jibda japplika dan ir-Regolament għall-imposti tat-terminal,

vii)	tnaqqis tal-ispejjeż tat-titjiriet tal-VFR identifikati fl-Artikolu 7(4).”.

L-Anness VI huwa sostitwit b’dan li ġej:

“ANNEX VI

Il-mekkaniżmu tal-imposti

1. IT-TABELLA TA’ RRAPPURTAR

L-Istati Membri kif ukoll il-fornituri tas-servizzi tan-navigazzjoni bl-ajru għandhom jimlew it-tabella ta’ rrappurtar li ġejja għal kull żona tal-imposti taħt ir-responsabbiltà tagħhom u għal kull perjodu ta’ referenza. L-Istati Membri għandhom jipprovdu wkoll tabella kkonsolidata għal kull żona tal-imposti taħt ir-responsabbiltà tagħhom.

2. INFORMAZZJONI ADDIZZJONALI

Barra minn hekk, l-Istati Membri kkonċernati għandhom jiġbru u jipprovdu mill-inqas l-informazzjoni li ġejja:

—	Deskrizzjoni tal-istabbiliment taż-żoni tal-imposti differenti u r-raġuni għal dan l-istabbiliment, b’mod partikolari fir-rigward taż-żoni tal-imposti tat-terminal u tas-sussidji inkroċjati li jista’ jkun hemm bejn l-ajruporti;

—	Deskrizzjoni u spjegazzjoni tal-kalkolu tal-unitajiet tas-servizzi mbassra li fuqhom jista’ jkun hemm l-imposti;

—	Deskrizzjoni tal-politika dwar l-eżenzjonijiet u deskrizzjoni tal-mezzi ta’ finanzjament biex jiġu koperti l-ispejjeż relatati;

—	Deskrizzjoni tal-ammonti miġjuba ’l quddiem tal-irkupru żejjed jew nieqes imġarrab mill-Istati Membri sas-sena 2011 għall-imposti en route u sas-sena ta’ qabel jibda japplika dan ir-Regolament għall-imposti tat-terminal;

—	Deskrizzjoni tal-ammonti tal-irkupru nieqes miġjuba ’l quddiem skont it-tieni subparagrafu tal-Artikolu 11a(4);

—	Deskrizzjoni skont il-fatturi tal-ammonti miġjuba ’l quddiem mill-perjodu ta’ referenza ta’ qabel skont l-Artikolu 11a(8)(c);

—	Deskrizzjoni tad-dħul ieħor, meta jkun hemm;

—	Deskrizzjoni tal-formola użata biex jiġu kkalkulati l-imposti tat-terminal;

—	Deskrizzjoni u spjegazzjoni tal-inċentivi applikati għall-utenti tas-servizzi tan-navigazzjoni bl-ajru.”.