1.

Biex inwettqu strateġija ta' tkabbir soċjalment ġusta, inklużiva u sostenibbli, il-Patt Ekoloġiku Ewropew, u l-għan tiegħu ta' newtralità klimatika sal-2050, aħna ser immexxu 'l quddiem il-proposti diġà ppreżentati, b'mod partikolari l-pakkett "lesti għall-mira ta' 55". Dan ser jikkontribwixxi għat-tmexxija tal-UE fil-ġlieda globali kontra t-tibdil fil-klima. Ser nieħdu wkoll azzjoni biex nindirizzaw il-kriżi tal-bijodiversità u t-tniġġis tal-ilma u tal-arja, u biex niżguraw użu aktar sostenibbli tal-pestiċidi. Ser insaħħu d-dritt tal-konsumaturi li jsewwu l-prodotti sabiex nimxu 'l quddiem fit-tranżizzjoni lejn ekonomija ċirkolari. Ser naħdmu biex is-suq tal-enerġija tal-UE isir aktar reżiljenti, aktar sigur u kosteffettiv sabiex isostni t-tranżizzjoni lejn newtralità klimatika, u ser nindirizzaw l-impatt tal-prezzijiet tal-enerġija fuq iċ-ċittadini u n-negozji.

2.

Biex niksbu l-mira ta' Ewropa lesta għall-era diġitali, irridu niżguraw li dan id-deċennju jkun id-deċennju diġitali tal-Ewropa u nwittu t-triq globalment fl-iżvilupp ta' teknoloġija affidabbli, sigura u ċċentrata fuq il-bniedem. Ser nagħtu prijorità lill-ħidma fuq is-servizzi diġitali u s-swieq diġitali, kif ukoll lill-intelliġenza artifiċjali, id-data u l-komunikazzjoni spazjali sigura. Ser naħdmu wkoll biex intejbu r-reżiljenza ċibernetika. Bil-għan li nippromwovu ekonomija dinamika tad-data, ser inkomplu nsaħħu l-investiment tal-Ewropa fil-kapaċità innovattiva u teknoloġika, inkluż fil-qasam tas-semikondutturi. Ser immexxu 'l quddiem id-diskussjonijiet dwar strument ta' emerġenza biex jiġi evitat tfixkil futur fis-suq uniku tal-Unjoni. Ser insegwu wkoll il-komunikazzjoni tal-Kummissjoni dwar l-istrateġija industrijali, b'mod partikolari billi nindirizzaw id-dipendenzi f'oqsma strateġiċi ewlenin.

3.

Biex nipprovdu ekonomija għas-servizz tan-nies, ser ngħaqqdu l-isforzi tagħna biex nappoġġaw aktar lill-Istati Membri fit-tiswija tal-ħsara ekonomika u soċjali li ġabet magħha l-pandemija u niżguraw li l-foqra u dawk l-aktar vulnerabbli fis-soċjetajiet tagħna ma jitħallewx lura. Ser nagħtu prijorità lill-implimentazzjoni konkreta tal-Pilastru Ewropew tad-Drittijiet Soċjali u d-dikjarazzjoni tas-Summit ta' Porto, inkluż regoli biex il-ħaddiema jiġu protetti minn riskji relatati mal-esponiment għal sustanzi perikolużi, biex jittejbu l-kundizzjonijiet għall-ħaddiema tal-pjattaformi u biex titneħħa d-differenza bejn il-ġeneri fil-pagi. Ser nagħmlu ħilitna biex intejbu l-opportunitajiet għaż-żgħażagħ, inkluż permezz tal-attivitajiet tas-Sena Ewropea taż-Żgħażagħ. Ser nippromwovu l-inklużjoni soċjali u l-konverġenza, filwaqt li nirrispettaw għalkollox il-kompetenzi nazzjonali u l-varjetà tal-mudelli tas-suq tax-xogħol fl-Unjoni, b'mod partikolari billi niddefendu pagi ġusti u impjiegi deċenti. Ser naħdmu biex insaħħu l-ktajjen tal-provvista tagħna u nippromwovu politika kummerċjali robusta. Ser nippromwovu sistema kummerċjali bbażata fuq ir-regoli li tiżgura kondizzjonijiet ekwivalenti ta' kompetizzjoni u prattiki kummerċjali ġusti, kif ukoll ftehimiet kummerċjali ġodda. Ser naħdmu biex niffaċilitaw l-aċċess tal-intrapriżi żgħar u ta' daqs medju għal kapital u ser nistinkaw biex nikkompletaw l-unjoni bankarja. Wara l-ftehim internazzjonali storiku dwar ir-riforma tat-taxxa globali, nimpenjaw ruħna li niżguraw l-implimentazzjoni rapida u armonizzata tiegħu u li nibnu fuqu sabiex is-sistemi tat-taxxa korporattiva tagħna jaħdmu b'mod ġust u sod. Ser intejbu wkoll il-qafas regolatorju dwar il-governanza korporattiva sostenibbli u nindirizzaw il-ħasil tal-flus, il-frodi tat-taxxa, l-evażjoni tat-taxxa u forom oħra ta' kriminalità finanzjarja.

4.

Għal Ewropa aktar b'saħħitha fid-dinja, ser inkomplu nibnu sħubijiet ta' konnettività strateġiċi permezz tal-Portal Globali tal-UE. Sabiex tiġi żgurata l-implimentazzjoni tal-aġenda tas-sigurtà u d-difiża tal-Unjoni, ser napprovaw il-Boxxla Strateġika u nistennew b'interess il-pakkett li jmiss dwar id-Difiża, inkluż il-pjan direzzjonali dwar it-teknoloġiji kritiċi għas-sigurtà u d-difiża, u li nsaħħu l-protezzjoni tal-Unjoni tagħna kontra t-theddid ibridu. Ser naħdmu biex niskoraġġixxu s-sanzjonijiet extraterritorjali ta' pajjiżi terzi u nipproteġu aħjar lill-operaturi tal-UE minn dawn is-sanzjonijiet billi nsaħħu r-Regolament dwar l-istatut ta' mblukkar.

5.

Biexnippromwovu l-istil ta' ħajja Ewropew tagħna, ser inkomplu naħdmu biex nibnu Unjoni Ewropea tas-Saħħa soda biex insaħħu t-tħejjija u r-reżiljenza tal-UE fil-konfront ta' kriżijiet tas-saħħa futuri. Nibqgħu impenjati li niksbu progress fir-rigward tal-Patt il-ġdid dwar il-migrazzjoni u l-ażil bħala kwistjoni ta' urġenza. Ser naħdmu fuq ir-riforma taż-żona Schengen, inkluż permezz tat-tagħlim mislut mill-pandemija tal-COVID-19 u kriżijiet reċenti oħra, u niġġieldu kontra l-kriminalità organizzata u t-terroriżmu.

6.

Biex nipproteġu u nsaħħu d-demokrazija tagħna madwar l-Unjoni u niddefendu l-valuri komuni Ewropej tagħna, bl-użu tal-istrumenti kollha għad-dispożizzjoni tagħna, ser inkomplu niddefendu u nipproteġu l-istat tad-dritt, f'konformità mat-Trattati. L-Istat tad-dritt huwa valur ċentrali tal-UE u huwa indispensabbli għall-funzjonament effettiv tal-Unjoni tagħna u tal-ordni ġuridiku tagħha. Ser niġġieldu biex nissalvagwardjaw il-libertà u l-pluraliżmu tal-media u l-protezzjoni tal-ġurnalisti. Ser naħdmu biex intejbu l-ugwaljanza, inkluż billi naġixxu fuq ir-rwol u l-indipendenza tal-korpi tal-ugwaljanza, u biex nindirizzaw il-problema kontinwa tal-vjolenza kontra n-nisa.

—

li naħdmu biex neliminaw kull forma ta' diskriminazzjoni u nippromwovu drittijiet u opportunitajiet indaqs għal kulħadd;

—

lejn l-implimentazzjoni kontinwa tal-pjanijiet nazzjonali għall-irkupru u r-reżiljenza;

—

lejn l-implimentazzjoni tal-pjan direzzjonali vinkolanti lejn l-introduzzjoni ta' riżorsi proprji ġodda fi żmien debitu, kif maqbul fil-Ftehim Interistituzzjonali;

—

li ntejbu l-aċċess globali għall-vaċċini kontra l-COVID-19;

—

li nsaħħu r-rwol tal-UE bħala attur dinji fiż-żoni ġeografiċi kollha, kif ukoll sħubijiet bilaterali u multilaterali;

—

li nagħtu spinta ġdida lill-proċess ta' adeżjoni fl-interess strateġiku tal-Unjoni, f'konformità mal-metodoloġija msaħħa tat-tkabbir.