|
15.1.2020 |
MT |
Il-Ġurnal Uffiċjali tal-Unjoni Ewropea |
C 14/87 |
Opinjoni tal-Kumitat Ekonomiku u Soċjali Ewropew dwar “Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni - It-teħid ta' deċiżjonijiet aktar effiċjenti fil-politika soċjali: L-identifikazzjoni tal-oqsma għal bidla msaħħa għall-votazzjoni b'maġġoranza kwalifikata”
[COM(2019) 186 final]
(2020/C 14/13)
Relatur: Christian BÄUMLER
|
Konsultazzjoni |
Kummissjoni Ewropea, 3.6.2019 |
|
Bażi legali |
L-Artikolu 304 tat-Trattat dwar il-Funzjonament tal-Unjoni Ewropea |
|
Sezzjoni kompetenti |
Sezzjoni għax-Xogħol, l-Affarijiet Soċjali u ċ-Ċittadinanza |
|
Adottata fis-sezzjoni |
10.9.2019 |
|
Adottata fil-plenarja |
25.9.2019 |
|
Sessjoni plenarja Nru |
546 |
|
Riżultat tal-votazzjoni (favur/kontra/astensjonijiet) |
83/32/1 |
1. Konklużjonijiet u rakkomandazzjonijiet
|
1.1 |
Il-Kumitat Ekonomiku u Soċjali Ewropew (KESE) jenfasizza li fi żminijiet ta' bidla mgħaġġla, huwa essenzjali li l-UE flimkien mal-Istati Membri tagħha tkun tista' tadotta miżuri ta' politika rapidi u effettivi fl-oqsma ta' politika kollha rilevanti f’konformità mal-kompetenzi rikonoxxuti. Dan l-approċċ għandu jinkludi diskussjoni adatta dwar il-ħtieġa għal azzjoni fil-livell Ewropew, filwaqt li jiġi kkunsidrat kif dovut il-prinċipju tas-sussidjarjetà. |
|
1.2 |
Il-KESE jemmen li l-involviment tal-Parlament Ewropew f’livell għoli, f’konformità mad-dispożizzjonijiet tat-Trattat, huwa importanti fil-proċess leġislattiv, inkluż b’mod partikolari fil-qasam tal-politika soċjali, peress li l-kwistjonijiet ta’ politika soċjali jaffettwaw il-koeżjoni soċjali u ekonomija tas-suq soċjali kompetittiva ħafna, f’konformità mal-objettivi stabbiliti fit-Trattat (l-Artikolu 3 tat-TUE). |
|
1.3 |
Fid-dawl tal-fatt li, f'Opinjonijiet preċedenti (1), il-KESE diġà sostna li għandu jsir rieżami tar-rekwiżiti dwar l-unanimità fil-leġislazzjoni tal-UE, u dan l-aħħar tenna dan b’mod partikolari fil-qasam tal-politika tat-tassazzjoni, (2) huwa jilqa’ l-fatt li l-Kummissjoni qed tippromovi diskussjoni dwar l-ostakli regolatorji eżistenti u f'din il-Komunikazzjoni fetħet dibattitu dwar il-possibilitajiet li tiġi estiża l-votazzjoni b’maġġoranza kwalifikata fil-qasam tal-politika soċjali. Fl-istess ħin, il-KESE jenfasizza li r-rwol ibbażat fuq it-Trattat tal-UE fil-qasam tal-politika soċjali huwa li jappoġġja u jikkumplimenta l-attivitajiet tal-Istati Membri f’oqsma definiti mill-Artikolu 153(1) tat-TFUE). Dan jirrifletti d-diversità tas-sistemi soċjali u t-tradizzjonijiet nazzjonali u jimplika r-rwol mexxej tal-Istati Membri fit-tfassil u l-implimentazzjoni tal-azzjonijiet tagħhom fil-qasam tal-politika soċjali u s-swieq tax-xogħol. Il-proċedura ta' maġġoranza kwalifikata hija bbażata fuq kultura ta' kompromess. |
|
1.4 |
Il-KESE jaħseb huwa konvint li huwa essenzjali li l-UE għandha tibqa' impenjata lejn il-prinċipju tas-sussidjarjetà anke meta tuża l-istrument ta' votazzjoni b'maġġoranza kwalifikata u fl-oqsma li ma jaqgħux taħt il-kompetenza esklużiva tagħha għandha tiffoka fuq l-oqsma fejn l-għanijiet komuni ma jistgħux jintlaħqu b'mod aktar effettiv fil-livell nazzjonali, reġjonali jew lokali. L-istess japplika għall-prinċipju tal-proporzjonalità, skont liema l-kontenut u l-forma tal-azzjoni tal-UE m'għandhomx imorru lil hinn mill-għanijiet tat-Trattati. |
|
1.5 |
L-Artikolu 151 tat-TFUE jistabbilixxi l-objettiv tal-politika soċjali bħala “il-promozzjoni tal-impjieg, it-titjib tal-kondizzjonijiet tal-ħajja u tax-xogħol” permezz tal-progress. Il-KESE jenfasizza li, b'konformità mal-Artikolu 153(2) tat-TFUE, dan l-għan għandu jintlaħaq permezz ta' direttivi dwar ir-regoli minimi, filwaqt li jiġu kkunsidrati l-kundizzjonijiet nazzjonali u li dawn m'għandhomx ixekklu l-ħolqien u l-iżvilupp tal-intrapriżi ż-żgħar u ta' daqs medju. Huwa jenfasizza wkoll li, skont l-Artikolu 153(4) tat-TFUE, id-dritt tal-Istati Membri li jikkonformaw ma’ livell nazzjonali ogħla ta' protezzjoni, kif ukoll is-setgħa tal-Istati Membri li jistabbilixxu l-prinċipji tas-sistema tas-sigurtà soċjali tagħhom, irrispettivament mill-metodu tal-votazzjoni, ma għandhomx jiġu kompromessi. |
|
1.6 |
Il-KESE jenfasizza li l-ftehimiet tal-imsieħba soċjali li ġew implimentati fil-livell tal-UE jagħtu kontribut importanti għall-iżvilupp tal-leġislazzjoni tal-UE fil-qasam tal-politika soċjali. Fid-dawl tad-dibattitu dwar it-tranżizzjoni potenzjali mill-proċedura tal-unanimità għall-proċedura ta' votazzjoni b'maġġoranza kwalifikata, huwa jitlob li jkun hemm garanziji li l-imsieħba soċjali jibqgħu jiġu involuti b'mod sħiħ fil-qasam tat-tfassil tal-politika, inkluż it-tfassil tal-politika soċjali, u li tiġi rispettata l-awtonomija tagħhom fl-implimentazzjoni u r-reviżjoni potenzjali tal-ftehimiet awtonomi tagħhom. |
|
1.7 |
Il-KESE josserva li bħalissa qed isiru votazzjonijiet b'unanimità jew b'maġġoranza kwalifikata fl-istess qasam ta' politika. Dan iwassal għal inugwaljanza fl-iżvilupp ta' standards soċjali u nuqqasijiet fil-protezzjoni soċjali. Għaldaqstant, il-KESE jappoġġja fi kwalunkwe każ it-tranżizzjoni sħiħa lejn votazzjoni b'maġġoranza kwalifikata fir-rigward tal-leġislazzjoni dwar in-nondiskriminazzjoni kif ukoll ir-rakkomandazzjonijiet dwar is-sigurtà soċjali u l-protezzjoni tal-ħaddiema. |
|
1.8 |
Il-KESE jinnota wkoll li l-UE żviluppat miżuri biex tipproteġi ħaddiema vulnerabbli malli jintemm l-impjieg, pereżempju n-nisa tqal jew il-ħaddiema part-time. Dan jitlob li jkun garantit standard minimu ta’ drittijiet proċedurali u ta' protezzjoni madwar l-Ewropa kollha u li ssir tranżizzjoni lejn maġġoranza kwalifikata. |
|
1.9 |
Il-KESE jenfasizza li r-rappreżentanza u l-ħarsien ġenerali tal-interessi tal-impjegaturi u tal-impjegati huma kruċjali għall-koeżjoni soċjali, iż-żamma u l-ħolqien ta’ impjiegi diċenti u l-kompetittività tan-negozji tal-UE. Kif inhu meħtieġ b'mod oġġettiv, l-UE għandha tivverifika anke f'dan ir-rigward il-punt sa fejn il-votazzjoni b'maġġoranza kwalifikata tista’ tagħti spinta lill-opportunitajiet għall-iżvilupp tas-sħubija soċjali b'mod li tkun orjentata lejn il-futur. |
|
1.10 |
Il-KESE jirrakkomanda t-tranżizzjoni għal votazzjoni b’maġġoranza kwalifikata f’termini ta’ kundizzjonijiet ta’ impjieg għal ċittadini ta’ pajjiżi terzi li jgħixu legalment fl-UE sabiex jiġi evitat trattament inugwali kif ukoll tissaħħaħ il-koeżjoni soċjali. |
|
1.11 |
Fil-kuntest tad-dibattitu li għaddej dwar it-tranżizzjoni għal votazzjoni b’maġġoranza kwalifikata, il-KESE jaqbel mal-kunsiderazzjonijiet tal-Kummissjoni fir-rigward tal-għażla li tapprova l-klawsola "passerelle" ġenerali fl-Artikolu 48 (7) tat-TUE f’każijiet fejn tiġi applikatagħat-tranżizzjoni lejn l-votazzjoni b’maġġoranza kwalifikata, peress li dan l-approċċ jeħtieġ kemm id-deċiżjoni unanima tal-Kunsill Ewropew kif ukoll l-appoġġ tal-parlamenti nazzjonali kollha u l-kunsens tal-Parlament Ewropew, u b'hekk jipprovdi leġittimità demokratika wiesgħa. |
2. Kummenti ġenerali
|
2.1 |
Il-KESE jaqbel mal-Kummissjoni dwar il-fatt li l-UE u l-Istati Membri kollha tagħha jiffaċċjaw sfidi komuni li jirriżultaw mill-impatt ta' teknoloġiji ġodda, iż-żieda fil-pressjoni kompetittiva fl-ekonomija globalizzata, il-forom ġodda ta' xogħol u x-xejriet demografiċi. Sabiex il-mudell soċjali Ewropew jiġi ppreservat u żviluppat għal ġenerazzjonijiet futuri, jinħtieġu miżuri fil-livell Ewropew u nazzjonali f'firxa wiesgħa ta' oqsma ta' politika, skont il-kompetenzi rikonoxxuti. Il-miżuri għat-tisħiħ tal-koeżjoni soċjali u l-inklużjoni soċjali, kif ukoll għall-ġlieda kontra d-diskriminazzjoni huma importanti f’dan l-ambitu. |
|
2.2 |
Il-KESE jenfasizza li fi żminijiet ta' bidla mgħaġġla, huwa essenzjali li l-UE flimkien mal-Istati Membri tagħha tkun tista' tadotta miżuri ta' politika effiċjenti u effettivi. Dan għandu jinkludi riflessjoni adatta dwar jekk hemmx bżonn ta’ azzjoni u, jekk iva, f'liema livell, filwaqt li jiġu kkunsidrati l-prinċipju tas-sussidjarjetà, l-għażla tal-istrumenti adatti, u proċessi effiċjenti għat-teħid ta’ deċiżjonijiet li permezz tagħhom l-UE tkun tista’ tappoġġja u tikkomplementa l-politiki nazzjonali. L-għan huwa li jiġi analizzat fid-dettall l-impatt fuq l-ekonomija, il-finanzi pubbliċi u r-rwol tal-imsieħba soċjali f’kull Stat Membru. L-Istati Membri kollha għandu dejjem ikollhom biżżejjed opportunitajiet biex jipparteċipaw fil-proċess tat-teħid tad-deċiżjonijiet. L-għan komuni għandu jkun li jinkisbu riżultati tajbin kemm fil-livell tal-UE kif ukoll fl-Istati Membri individwali. |
|
2.3 |
Il-KESE jenfasizza li l-UE teħtieġ proċess tat-teħid tad-deċiżjonijiet effiċjenti u flessibbli biex tiżgura li l-leġislazzjoni u l-istrumenti mhux vinkolanti, bħall-oqfsa ta' koordinazzjoni u r-rakkomandazzjonijiet, ikunu jistgħu jlaħħqu mal-iżviluppi ekonomiċi u soċjali. Fid-dawl tal-fatt li, f'Opinjonijiet preċedenti, il-KESE diġà sostna li għandu jsir rieżami tar-rekwiżiti dwar l-unanimità fil-leġislazzjoni tal-UE (3), huwa jilqa' l-fatt li l-Kummissjoni qed tmexxi 'l quddiem id-dibattitu dwar l-ostakli li jeżistu fit-tfassil tal-politika u li, f'din il-Komunikazzjoni, nediet ukoll id-dibattitu dwar modi kif il-votazzjoni b'maġġoranza kwalifikata tista' tiġi estiża għall-qasam tal-politika soċjali. Fl-istess ħin, il-KESE jenfasizza li r-rwol ibbażat fuq it-Trattat tal-UE fil-qasam tal-politika soċjali huwa li jappoġġja u jikkumplimenta l-attivitajiet tal-Istati Membri f’oqsma definiti mill-Artikolu 153(1) tat-TFUE). Dan jirrifletti d-diversità tas-sistemi soċjali u t-tradizzjonijiet nazzjonali u jimplika r-rwol mexxej tal-Istati Membri fit-tfassil u l-implimentazzjoni tal-azzjonijiet tagħhom fil-qasam tal-politika soċjali u s-swieq tax-xogħol. |
|
2.4 |
Il-KESE jemmen li r-rwol tal-UE stabbilit fit-Trattati huwa li tappoġġja l-attivitajiet tal-Istati Membri tal-UE u tissupplimentahom fl-oqsma ddefiniti fihom (l-Artikolu 153(1) tat-TFUE). Dan jirrifletti d-diversità tas-sistemi u t-tradizzjonijiet nazzjonali soċjali u jimplika wkoll ir-rwol ta' tmexxija u l-livell għoli tas-sovranità tal-Istati Membri fil-kooperazzjoni Ewropea, fir-rigward tat-tfassil u l-implimentazzjoni ta' miżuri fl-oqsma tal-politika soċjali u s-swieq tax-xogħol. |
|
2.5 |
Il-KESE jenfasizza li l-parti l-kbira tal-leġislazzjoni tal-UE dwar il-politika soċjali ġiet adottata permezz ta' votazzjoni b'maġġoranza kwalifikata u skont il-proċedura leġislattiva ordinarja. |
|
2.6 |
Madankollu, il-KESE jirrimarka li, b’kuntrast ma’ dan, skont it-Trattat dwar l-Unjoni Ewropea, ċertu numru ta’ oqsma ta’ politika soċjali għadhom jeħtieġu l-unanimità fil-Kunsill: in-nondiskriminazzjoni (l-Artikolu 19(1) tat-TFUE); is-sigurtà soċjali u l-protezzjoni soċjali tal-ħaddiema (għajr għall-fini tal-moviment liberu tal-ħaddiema) (l-Artikolu 153(1)(c) tat-TFUE); il-protezzjoni tal-ħaddiema f'każ ta' terminazzjoni tal-kuntratt tal-impjieg tagħhom (l-Artikolu 153(1)(d) tat-TFUE); ir-rappreżentanza u d-difiża kollettiva tal-interessi tal-ħaddiema u tal-impjegaturi (l-Artikolu 153(1)(f) tat-TFUE) u l-kondizzjonijiet tal-impjieg ta' ċittadini ta’ pajjiżi terzi li huma residenti legali fit-territorju tal-Unjoni (l-Artikolu 153(1)(g) tat-TFUE). Filwaqt li l-Artikolu 19 tat-TFUE jipprevedi l-kunsens tal-Parlament Ewropew, dan mhuwiex il-każ għall-Artikolu 153(1)(c), (d), (f) u (g). |
|
2.7 |
Il-KESE jemmen li l-involviment tal-Parlament Ewropew f’livell għoli, f’konformità mad-dispożizzjonijiet tat-Trattat, huwa importanti fil-proċess leġislattiv b’mod partikolari fil-qasam tal-politika soċjali, peress li l-kwistjonijiet ta’ politika soċjali jinvolvu deċiżjonijiet li għandhom impatt dirett fuq in-nies ordinarji u jaffettwaw il-koeżjoni soċjali u ekonomija tas-suq soċjali kompetittiva ħafna, f’konformità mal-objettivi stabbiliti fit-Trattat (l-Artikolu 3 tat-TUE). |
|
2.8 |
Il-KESE jilqa' l-fatt li, f'din il-komunikazzjoni, il-Kummissjoni nediet ukoll id-diskussjoni dwar l-estensjoni tat-teħidtad-deċiżjonijiet permezz tal-votazzjoni b'maġġoranza kwalifikata fil-qasam tal-politika soċjali (4). Il-proċedura ta' maġġoranza kwalifikata hija bbażata fuq kultura ta' kompromess. Din tippresupponi dibattitu u tippermetti l-kisba ta' riżultati pragmatiċi li jqisu l-interessi tal-Unjoni kollha kemm hi. Il-prospett ta' votazzjoni b'maġġoranza kwalifikata jaġixxi bħala xprun biex tinstab soluzzjoni li hija aċċettabbli għall-partijiet kollha, billi jiġu involuti l-partijiet interessati kollha biex jintlaħaq kompromess. |
|
2.9 |
Il-KESE jindika li fl-Aġenda Strateġika l-ġdida tagħha għall-2019-2024, l-UE appoġġjat l-implimentazzjoni tal-Pilastru tad-Drittijiet Soċjali fil-livell tal-UE u tal-Istati Membri. F'dan ir-rigward, il-kompetenzi rispettivi għandhom jiġu kkunsidrati kif xieraq. |
|
2.10 |
Għall-KESE huwa essenzjali li l-UE għandha tibqa' impenjata lejn il-prinċipju tas-sussidjarjetà anke meta tuża l-istrument ta' votazzjoni b'maġġoranza kwalifikata u, fl-oqsma li mhumiex fil-kompetenza esklużiva tagħha, għandha tiffoka fuq l-oqsma fejn l-għanijiet komuni ma jistgħux jintlaħqu b'mod aktar effettiv fil-livell nazzjonali, reġjonali jew lokali. L-istess japplika għall-prinċipju tal-proporzjonalità, skont liema l-kontenut u l-forma tal-azzjoni tal-UE m'għandhomx imorru lil hinn mill-għanijiet tat-Trattati. Dawn il-prinċipji għandhom jiġu ċċarati meta tiġi diskussa l-votazzjoni b'maġġoranza kwalifikata. |
|
2.11 |
L-Artikolu 151 tat-TFUE jistabbilixxi l-objettiv tal-politika soċjali bħala “il-promozzjoni tal-impjieg, it-titjib tal-kondizzjonijiet tal-ħajja u tax-xogħol” permezz tal-progress. Il-KESE jenfasizza li l-Artikolu 153(2) tat-TFUE jistabbilixxi kriterji li għandhom jiġu ssodisfati mill-azzjonijiet rilevanti tal-UE fil-qasam tal-politika soċjali. Pereżempju, id-direttivi jinkludu l-iżjed ir-regoli minimi li jqisu l-kundizzjonijiet nazzjonali, u m'għandhomx jipprekludu l-ħolqien u l-iżvilupp tal-intrapriżi ż-żgħar u ta' daqs medju. l-KESE jenfasizza li d-dritt tal-Istati Membri li jikkonformaw ma’ livell nazzjonali ogħla ta' protezzjoni, kif ukoll id-dritt tal-Istati Membri li jistabbilixxu l-prinċipji tas-sistema tas-sigurtà soċjali tagħhom, irrispettivament mill-metodu tal-votazzjoni, ma għandhomx jiġu kompromessi. |
|
2.12 |
Il-KESE jinnota wkoll li fil-punt 17 tal-preambolu tal-Pilastru Ewropew tad-Drittijiet Soċjali, il-Kummissjoni, il-PE u l-Kunsill affermaw ir-rispett għad-diversità tas-sistemi nazzjonali, inkluż ir-rwol tal-imsieħba soċjali, u fil-punt 19 affermaw ir-rispett għall-identità nazzjonali tal-Istati Membri kif ukoll is-sovranità tagħhom biex jistabbilixxu b'mod legali l-pedamenti tas-sistemi tas-sigurtà soċjali. |
|
2.13 |
Il-KESE jenfasizza li l-ftehimiet tal-imsieħba soċjali li ġew implimentati fil-livell tal-UE skont l-Artikolu 155 TFUE jagħtu kontribut importanti għall-iżvilupp tal-leġislazzjoni tal-UE fil-qasam tal-politika soċjali. Huwa jilqa’ l-fatt li, skont il-Komunikazzjoni, l-eżiti tad-djalogu soċjali u d-direttivi jgawdu minn trattament ugwali f’termini ta’ adozzjoni. Rigward it-tranżizzjoni potenzjali mill-proċedura tal-unanimità għall-proċedura ta' votazzjoni b'maġġoranza kwalifikata, huwa jitlob garanziji li l-imsieħba soċjali jibqgħu jiġu involuti b'mod sħiħ fil-qasam tat-tfassil tal-politika, inkluża l-politika soċjali, u li tiġi rispettata l-awtonomija tagħhom fl-implimentazzjoni u r-reviżjoni potenzjali tal-ftehimiet awtonomi tagħhom. Id-djalogu soċjali għandu rwol importanti fil-protezzjoni soċjali. Dan jiżgura wkoll progress soċjali fl-UE bis-saħħa ta' leġislazzjoni awtonoma. |
|
2.14 |
Il-KESE jaqbel mal-fehma tal-Kummissjoni u jemmen li l-istrument ta' kooperazzjoni msaħħa ma jipprovdix alternattiva għall-votazzjoni b'maġġoranza kwalifikata. L-istrument ta' kooperazzjoni msaħħa jista' jwassal għal frammentazzjoni tas-suq uniku u għal trattament mhux indaqs taċ-ċittadini tal-UE, skont f'liema Stat Membru jgħixu, speċjalment fir-rigward ta' kwistjonijiet ta' politika soċjali. |
|
2.15 |
Min-naħa l-oħra, il-KESE jemmen li s-Semestru Ewropew huwa strument ieħor effettiv u utli biex tinkiseb aktar konverġenza u konverġenza aħjar u biex isir progress fir-riformi nazzjonali, bl-appoġġ u l-gwida tal-Istati Membri u l-imsieħba soċjali, mhux l-inqas permezz tat-"tagħlim komuni". Dan jirrispetta wkoll il-kontenut u l-ispirtu tal-Artikolu 156 tat-TFUE. Il-KESE jenfasizza l-isforzi biex jiġu żviluppati, fil-qafas tas-Semestru Ewropew, metodi mtejba għall-koordinazzjoni tal-politika u r-riformi politiki nazzjonali relatati mal-impjieg u l-protezzjoni soċjali, filwaqt li jiġu involuti b'mod sinifikattiv l-imsieħba soċjali nazzjonali fil-ħidma tal-UE. Għaldaqstant, il-Pilastru Ewropew tad-Drittijiet Soċjali, li jservi bħala gwida għar-riformi, jgħin biex jiġi żviluppat pjan direzzjonali għal konverġenza aħjar u koeżjoni msaħħa bejn l-Istati Membri. |
3. Kummenti speċifiċi
|
3.1 |
Il-KESE josserva li bħalissa qed isiru votazzjonijiet b'unanimità jew b'maġġoranza kwalifikata fl-istess qasam ta' politika. Dan iwassal għal inugwaljanza fl-iżvilupp ta' standards soċjali u lakuni fil-protezzjoni soċjali. |
|
3.2 |
Il-KESE jinnota li teżisti leġislazzjoni estensiva tal-UE biex jiġi implimentat il-prinċipju tal-ugwaljanza bejn in-nisa u l-irġiel kif ukoll tat-trattament indaqs fuq il-bażi ta’ razza jew oriġini etnika, fost affarijiet oħra. Dan huwa suċċess kbir għall-UE, li tistabbilixxi wkoll standards internazzjonali f'dan il-qasam. Madankollu, id-dritt tal-Unjoni jassigura biss it-trattament indaqs fuq il-bażi tar-reliġjon, it-twemmin, id-diżabilità, l-età jew l-orjentazzjoni sesswali fil-kuntest tal-impjiegi u x-xogħol. Direttiva li tipprojbixxi għalkollox id-diskriminazzjoni fl-Unjoni hija kumplessa ħafna u għalhekk ftit li xejn tista' tiġi realizzata b'votazzjoni unanima. Madankollu, l-UE impenjat ruħha li twettaq dan fl-Aġenda tal-2030 għall-Iżvilupp Sostenibbli. Dan l-objettiv ġie affermat mill-Aġenda Strateġika l-ġdida għall-2019-2024. Il-KESE jirrakkomanda li ssir it-tranżizzjoni sħiħa lejn votazzjoni b'maġġoranza kwalifikata fir-rigward tal-leġislazzjoni dwar in-nondiskriminazzjoni. |
|
3.3 |
Il-KESE jinnota li, skont l-Artikolu 48 tat-TFUE, l-UE tista' tadotta l-miżuri meħtieġa fil-qasam tas-sigurtà soċjali għall-finijiet tal-moviment liberu tal-ħaddiema b'maġġoranza kwalifikata. Għall-kuntrarju ta' dan, ir-rakkomandazzjonijiet dwar is-sigurtà soċjali u l-protezzjoni tal-ħaddiema għandhom ikunu unanimi. Tranżizzjoni lejn votazzjoni b'maġġoranza kwalifikata tkun loġika u adatta. Tqum il-kwistjoni wkoll dwar ir-raġuni għaliex f'dan ir-rigward qed issir biss enfasi fuq ir-rakkomandazzjonijiet u ma ġewx ikkunsidrati aktar strumenti legali mill-Kummissjoni. |
|
3.4 |
Il-KESE jirrikonoxxi l-fatt li l-protezzjoni tal-ħaddiema fil-każ ta' sensji dejjem kienet fil-qalba tal-liġi nazzjonali tax-xogħol. Madankollu, il-KESE jinnota wkoll li l-UE issa żviluppat miżuri biex tipproteġi ħaddiema vulnerabbli, pereżempju n-nisa tqal u l-ħaddiema part-time. Dan jirrikjedi garanzija ta' minimu ta' drittijiet proċedurali u ta' protezzjoni madwar l-Ewropa, sabiex dawn il-mekkaniżmi ta' protezzjoni ma jispiċċawx fix-xejn. Il-Pilastru Ewropew tad-Drittijiet Soċjali jipprevedi drittijiet ta' informazzjoni fil-konfront tal-ħaddiema ssensjati kif ukoll aċċess għal soluzzjoni effettiva u imparzjali ta' tilwim, rimedju u, fejn xieraq, kumpens. Dan jirrikjedi li ssir tranżizzjoni lejn votazzjoni b'maġġoranza kwalifikata sabiex tkun tista' tiġi implimentata direttiva bħal din. |
|
3.5 |
Il-KESE jenfasizza li qafas legali sod għar-rappreżentanza u d-difiża kollettiva tal-interessi tal-impejgaturi u tal-ħaddiema huwa kruċjali, fost l-oħrajn, għall-koeżjoni soċjali, il-ħolqien ta' impjiegi ta' kwalità u l-kompetittività tan-negozji fl-UE. L-intrapriżi fis-suq intern qed jaħdmu dejjem aktar mill-qrib bejn il-fruntieri. L-intrapriżi u l-gruppi ta' intrapriżi fl-UE huma soġġetti għad-Direttiva dwar l-istabbiliment ta' Kunsill tax-Xogħlijiet Ewropew, li ġiet adottata bil-proċedura leġislattiva ordinarja. Madankollu, f'oqsma oħra tal-leġislazzjoni tal-UE dwar il-parteċipazzjoni tal-impjegati, għadha tapplika l-unanimità. Kif inhu meħtieġ b'mod oġġettiv, l-UE għandha tivverifika anke f'dan ir-rigward il-punt sa fejn il-votazzjoni b'maġġoranza kwalifikata se tiftaħ opportunitajiet ġodda għal sħubija soċjali orjentata lejn il-futur. |
|
3.6 |
Il-KESE jirrakkomanda t-tranżizzjoni għal votazzjoni b’maġġoranza kwalifikata għall-kundizzjonijiet tal-impjieg ta’ ċittadini ta’ pajjiżi terzi residenti legalment fl-UE. Il-kundizzjonijiet tal-impjieg taċ-ċittadini tal-UE u taċ-ċittadini mhux tal-UE għandhom ikunu konsistenti biex il-koeżjoni soċjali ma tiġix kompromessa. |
|
3.7 |
Fil-kuntest tad-dibattitu li għaddej bħalissa dwar it-tranżizzjoni lejn votazzjoni b’maġġoranza kwalifikata, il-KESE jaqbel mal-kunsiderazzjonijiet tal-Kummissjoni fir-rigward li tintgħażel il-klawsola "passerelle" ġenerali fl-Artikolu 48 (7) tat-TUE, fil-każijiet fejn tiġi applikata l-votazzjoni b'maġġoranza kwalifikata, peress li dan l-approċċ jeħtieġ kemm id-deċiżjoni unanima tal-Kunsill Ewropew kif ukoll l-appoġġ tal-parlamenti nazzjonali kollha u l-kunsens tal-Parlament Ewropew. Dan jipprovdi leġittimità demokratika wiesgħa u huwa konformi mar-rekwiżiti kostituzzjonali fil-livell nazzjonali. Dan ma jkunx il-każ fir-rigward tat-tranżizzjoni permezz tal-Artikolu 153 tat-TFUE. |
|
3.8 |
Il-KESE jinnota li kwistjoni fil-Komunikazzjoni tal-Kummissjoni għadha ma ġietx imwieġba. Mhuwiex ċar jekk id-deċiżjoni ta’ trasferiment ta’ ċerta bażi legali mill-unanimità għal votazzjoni b’maġġoranza kwalifikata tittieħed darba għal dejjem jew fuq bażi ta’ każ b’każ. Il-KESE jistieden lill-Kummissjoni biex tiċċara jekk l-użu tal-klawsola "passerelle" fl-Artikolu 48(7) tat-TUE għandux ikun tranżizzjoni ġenerali għal votazzjoni b’maġġoranza kwalifikata jew għal deċiżjonijiet individwali. Fil-fehma tal-KESE, fi kwalunkwe każ għandu jiġi żgurat li l-użu tal-klawsola "passerelle" jirriżulta f’teħid ta’ deċiżjonijiet u teħid ta’ deċiżjonijiet aktar effiċjenti, u ma joħloq l-ebda ostaklu ieħor. |
Brussell, il-25 ta’ Settembru 2019.
Il-President
tal-Kumitat Ekonomiku u Soċjali Ewropew
Luca JAHIER
(1) Ara l-Opinjonijiet tal-KESE li ġejjin: ĠU C 230, 14.7.2015, p. 24; ĠU C 434, 15.12.2017, p. 18; ĠU C 271, 19.9.2013, p. 23; ĠU C 332, 8.10.2015, p. 8.
(2) Opinjoni tal-KESE dwar "Tassazzjoni – votazzjoni b’maġġoranza kwalifikata", ĠU C 353, 18.10.2019, p. 90.
(3) Ara n-nota 2 f’qiegħ il-paġna.
(4) Ara n-nota nru 1 f'qiegħ il-paġna.
APPENDIĊI
L-emendi li ġejjin inċaħdu waqt id-diskussjoni iżda rċevew aktar minn kwart tal-voti (Artikolu 59(3) tar-Regoli ta’ Proċedura):
1. Punt 2.8
Ibdel it-test kif ġej:
Il-KESE jilqa' l-fatt li, f'din il-komunikazzjoni, il-Kummissjoni ħadet l-inizjattiva li tiftaħ id-dibattitu u tispjega kif bidla lejn nediet ukoll id-diskussjoni dwar l-estensjoni ta it-teħid tad-deċiżjonijiet permezz tal-votazzjoni b'maġġoranza kwalifikata fil-qasam tal-politika soċjali tista’ tidher mingħajr proposti mgħaġġla (1). Il-proċedura ta' maġġoranza kwalifikata hija bbażata fuq kultura ta' kompromess. Din tippresupponi dibattitu u tippermetti l-kisba ta' riżultati pragmatiċi li jqisu l-interessi tal-Unjoni kollha kemm hi. Il-prospett ta' votazzjoni b'maġġoranza kwalifikata jaġixxi bħala katalist biex tinstab soluzzjoni li hija aċċettabbli għall-partijiet kollha, permezz ta' kompromess u impenn min-naħa tal-partijiet interessati kollha.
Riżultat tal-votazzjoni
|
Favur |
: |
36 |
|
Kontra |
: |
74 |
|
Astensjonijiet |
: |
2 |
2. Żid punt ġdid wara punt 2.8
Żid punt ġdid wara punt 2.8
Min-naħa l-oħra, ir-raġuni għal unanimità fit-teħid ta’ deċiżjonijiet hija bbażata fuq il-ħtieġa li jiġi ppreservat il-kontroll nazzjonali tad-dispożizzjonijiet rilevanti tal-politika soċjali fit-Trattat tal-UE u li tiġi evitata l-intrużjoni f’elementi ewlenin ta’ sistemi soċjali nazzjonali li għalihom l-Istati Membri flimkien mal-imsieħba soċjali huma responsabbli fl-ewwel istanza.
Riżultat tal-votazzjoni
|
Favur |
: |
31 |
|
Kontra |
: |
82 |
|
Astensjonijiet |
: |
3 |
3. Punt 3.1
Ibdel it-test kif ġej:
Il-KESE josserva li bħalissa qed isiru votazzjonijiet b'unanimità jew b'maġġoranza kwalifikata fl-istess qasam ta' politika. Il-KESE jqis li t-tqassim bejn votazzjoni b’maġġoranza kwalifikata u l-unanimità stabbilit fil-kapitolu soċjali tat-Trattat dwar l-UE għadu rilevanti peress li jirrifletti d-diversità u l-eteroġeneità tas-sistemi soċjali nazzjonali tal-Istati Membri, pereżempju, fil-protezzjoni soċjali, fir-rigward tar-rwol tal-imsieħba soċjali u fir-rigward tar-rwol tal-liġi tax-xogħol u l-ftehimiet kollettivi. Dan iwassal għal inugwaljanza fl-iżvilupp ta' standards soċjali u nuqqasijiet fil-protezzjoni soċjali.
Riżultat tal-votazzjoni
|
Favur |
: |
32 |
|
Kontra |
: |
74 |
|
Astensjonijiet |
: |
3 |
4. Punt 3.2
Ibdel it-test kif ġej:
Il-KESE jinnota li teżisti leġislazzjoni estensiva tal-UE biex jiġi implimentat il-prinċipju tal-ugwaljanza bejn in-nisa u l-irġiel kif ukoll tat-trattament indaqs fuq il-bażi ta’ razza jew oriġini etnika, fost affarijiet oħra. Dan huwa suċċess kbir għall-UE, li tistabbilixxi wkoll standards internazzjonali f'dan il-qasam. Madankollu, id-dritt tal-Unjoni jassigura biss it-trattament indaqs fuq il-bażi tar-reliġjon, it-twemmin, id-diżabilità, l-età jew l-orjentazzjoni sesswali fil-kuntest tal-impjiegi u x-xogħol. Dawn id-direttivi ġew adottati unanimament. Direttiva li tipprojbixxi għalkollox id-diskriminazzjoni fl-Unjoni hija kumplessa ħafna u dan jispjega l-proċedura mtawla u għalfejn progress qed isir bil-mod għalhekk ftit li xejn tista' tiġi realizzata b'votazzjoni unanima. Madankollu, l-UE impenjat ruħha li twettaq dan fl-Aġenda tal-2030 għall-Iżvilupp Sostenibbli. Dan l-objettiv ġie affermat mill-Aġenda Strateġika l-ġdida għall-2019-2024. Il-KESE jirrakkomanda li ssir it-tranżizzjoni sħiħa lejn votazzjoni b'maġġoranza kwalifikata fir-rigward tal-leġislazzjoni dwar in-nondiskriminazzjoni.
Riżultat tal-votazzjoni
|
Favur |
: |
31 |
|
Kontra |
: |
78 |
|
Astensjonijiet |
: |
2 |
5. Punt 3.4
Ħassar kif ġej:
Il-KESE jirrikonoxxi l-fatt li l-protezzjoni tal-ħaddiema fil-każ ta' sensji dejjem kienet fil-qalba tal-liġi nazzjonali tax-xogħol. Madankollu, il-KESE jinnota wkoll li l-UE issa żviluppat miżuri biex tipproteġi ħaddiema vulnerabbli, bħal pereżempju n-nisa tqal jew il-ħaddiema part-time. Dan jirrikjedi garanzija ta' minimu ta' drittijiet proċedurali uniformi madwar l-Ewropa, sabiex dawn il-mekkaniżmi ta' protezzjoni ma jispiċċawx fix-xejn. Il-Pilastru Ewropew tad-Drittijiet Soċjali jipprevedi drittijiet ta' informazzjoni fil-konfront tal-impjegati li jkunu ġew imkeċċija kif ukoll aċċess għal soluzzjoni effettiva u imparzjali ta' tilwim, rimedju u, fejn xieraq, kumpens. Dan jirrikjedi li ssir tranżizzjoni lejn votazzjoni b'maġġoranza kwalifikata sabiex tkun tista' titfassal direttiva xierqa ta' implimentazzjoni.
Riżultat tal-votazzjoni
|
Favur |
: |
35 |
|
Kontra |
: |
77 |
|
Astensjonijiet |
: |
2 |
6. Punt 3.5
Ibdel it-test kif ġej:
Il-KESE jenfasizza li qafas legali sod għar-rappreżentanza u d-difiża kollettiva tal-interessi tal-impejgaturi u tal-ħaddiema huwa kruċjali, fost l-oħrajn, għall-koeżjoni soċjali, il-ħolqien ta' impjiegi ta' kwalità u l-kompetittività tan-negozji fl-UE. L-intrapriżi fis-suq intern qed jaħdmu dejjem aktar mill-qrib bejn il-fruntieri. L-intrapriżi u l-gruppi ta' intrapriżi fl-UE huma soġġetti għad-Direttiva dwar il-Kunsilli Ewropej tax-Xogħlijiet, li ġiet adottata bil-proċedura leġislattiva ordinarja. Madankollu, f'oqsma oħra tal-leġislazzjoni tal-UE dwar il-parteċipazzjoni tal-ħaddiema, tibqa' tapplika l-unanimità. Kif inhu meħtieġ b'mod oġġettiv, l-UE għandha tivverifika anke f'dan ir-rigward il-punt sa fejn il-votazzjoni b'maġġoranza kwalifikata se tiftaħ opportunitajiet ġodda għal sħubija soċjali orjentata lejn il-futur.
Riżultat tal-votazzjoni
|
Favur |
: |
34 |
|
Kontra |
: |
84 |
|
Astensjonijiet |
: |
2 |
7. Punt 3.6
Ħassar kif ġej:
Il-KESE jirrakkomanda t-tranżizzjoni għal votazzjoni b’maġġoranza kwalifikata għall-kundizzjonijiet tal-impjieg ta’ ċittadini ta’ pajjiżi terzi residenti legalment fl-UE. Il-kundizzjonijiet tal-impjieg taċ-ċittadini tal-UE u taċ-ċittadini mhux tal-UE għandhom ikunu konsistenti biex il-koeżjoni soċjali ma tiġix kompromessa.
Riżultat tal-votazzjoni
|
Favur |
: |
30 |
|
Kontra |
: |
85 |
|
Astensjonijiet |
: |
1 |
8. Punt 1.7
Ibdel it-test kif ġej:
Il-KESE josserva li bħalissa qed isiru votazzjonijiet b'unanimità jew b'maġġoranza kwalifikata fl-istess qasam ta' politika. Dan iwassal għal inugwaljanza fl-iżvilupp ta' standards soċjali u nuqqasijiet fil-protezzjoni soċjali. Għaldaqstant, il-KESE jappoġġja fi kwalunkwe każ it-tranżizzjoni sħiħa lejn votazzjoni b'maġġoranza kwalifikata fir-rigward tal-leġislazzjoni dwar in-nondiskriminazzjoni kif ukoll ir-rakkomandazzjonijiet dwar is-sigurtà soċjali u l-protezzjoni tal-ħaddiema. Il-KESE jqis li t-tqassim bejn votazzjoni b’maġġoranza kwalifikata u l-unanimità stabbilit fil-kapitolu soċjali tat-Trattat dwar l-UE għadu rilevanti peress li jirrifletti d-diversità u l-eteroġeneità tas-sistemi soċjali nazzjonali tal-Istati Membri, pereżempju, fil-protezzjoni soċjali, fir-rigward tar-rwol tal-imsieħba soċjali u fir-rigward tar-rwol tal-liġi tax-xogħol u l-ftehimiet kollettivi.
Riżultat tal-votazzjoni
|
Favur |
: |
32 |
|
Kontra |
: |
74 |
|
Astensjonijiet |
: |
3 |
9. Punt 1.8
Ħassar kif ġej:
Madankollu, il-KESE jinnota li l-UE żviluppat miżuri biex tipproteġi ħaddiema vulnerabbli malli jintemm l-impjieg bħal pereżempju n-nisa tqal jew il-ħaddiema part-time. Dan jitlob li jkun garantit standard minimu ta’ drittijiet proċedurali uniformi madwar l-Ewropa kollha u li ssir tranżizzjoni lejn maġġoranza kwalifikata.
Riżultat tal-votazzjoni
|
Favur |
: |
36 |
|
Kontra |
: |
81 |
|
Astensjonijiet |
: |
1 |
10. Punt 1.10
Ħassar kif ġej:
Il-KESE jirrakkomanda t-tranżizzjoni għal votazzjoni b’maġġoranza kwalifikata f’termini ta’ kundizzjonijiet ta’ impjieg għal ċittadini ta’ pajjiżi terzi li jgħixu legalment fl-UE sabiex jiġi evitat trattament inugwali kif ukoll tissaħħaħ il-koeżjoni soċjali.
Riżultat tal-votazzjoni
|
Favur |
: |
30 |
|
Kontra |
: |
85 |
|
Astensjonijiet |
: |
1 |
(1) Ara n-nota ta’ qiegħ il-paġna 1.