Kuntratti ta’ impjieg
Meta ssib impjieg f’pajjiż tal-UE, l-impjegatur tiegħek għandu jagħtik kuntratt bil-miktub
jew dikjarazzjoni bil-miktub ekwivalenti li tikkonferma l-kundizzjonijiet tax-xogħol
tiegħek. Idealment l-impjegatur għandu jagħtik it-termini tal-impjieg tiegħek fil-jum li tibda taħdem jew qabel. Madankollu, l-iskadenzi jvarjaw skont it-tip ta’ informazzjoni.
Informazzjoni li l-impjegatur tiegħek għandu jipprovdilek
Fi żmien 7 ijiem tax-xogħol mill-ewwel jum tax-xogħol tiegħek:
- il-partijiet involuti: l-ismijiet kemm tal-impjegatur kif ukoll tal-impjegat
- il-post tax-xogħol:
- il-post fiss jew indikazzjoni li x-xogħol se jseħħ f’diversi postijiet
- l-indirizz tan-negozju rreġistrat tal-impjegatur
- it-titlu u r-rwol tal-impjieg: it-titlu, il-grad, il-kategorija tax-xogħol jew deskrizzjoni tax-xogħol / speċifikazzjoni qasira tal-kompiti
- id-data tal-bidu: meta jibda l-impjieg
- it-tul ta' żmien tal-kuntratt: it-tul ta’ żmien mistenni tax-xogħol jekk il-kuntratt hu temporanju
- is-salarju u r-remunerazzjoni: is-salarju bażiku inizjali, il-frekwenza tal-pagament, u kwalunkwe komponent ieħor ta’ remunerazzjoni
- l-iskeda tax-xogħol:
jekk l-iskeda tax-xogħol tiegħek hi regolari jew prevedibbli:
- it-tul tal-jum normali tax-xogħol jew tal-ġimgħa tax-xogħol (sigħat ta’ xogħol)
- is-sahra u l-kumpens tagħha
- l-arranġamenti għal bidliet fix-xift
...jew jekk l-iskeda tax-xogħol hi irregolari jew imprevedibbli:
- in-numru ta’ sigħat garantiti mħallsin u r-remunerazzjoni għal sigħat żejda
- is-sigħat ta’ referenza u l-jiem ta’ xogħol
- l-avviż qabel il-bidu ta’ assenjazzjoni u l-iskadenza għall-kanċellazzjoni tagħha.
Fi żmien xahar mill-ewwel jum tax-xogħol tiegħek:
- ħaddiema temporanji permezz ta’ aġenzija: l-identità tal-organizzazzjoni/entità fejn se taħdem
- it-taħriġ: id-dettalji ta’ kwalunkwe taħriġ ipprovdut
- il-vaganzi ta’ kull sena: in-numru ta’ vaganzi annwali mħallsa jew – jekk dan ma jistax jiġi indikat fil-bidu tal-kuntratt – il-proċeduri għad-determinazzjoni tiegħu
- il-ftehimiet kollettivi: ir-regoli ta’ kwalunkwe ftehim kollettiv li jirregola l-kundizzjonijiet tax-xogħol tiegħek
- is-sigurtà soċjali: l-identità tal-istituzzjonijiet tas-sigurtà soċjali li jirregolaw il-kontribuzzjonijiet soċjali (jekk hi r-responsabbiltà tal-impjegatur tiegħek).
Għall-vaganzi annwali, it-tul tal-perjodi ta’ avviż, il-ħin tax-xogħol u r-remunerazzjoni, għandek tirreferi għal kwalunkwe liġi nazzjonali/reġjonali u dispożizzjoni amministrattiva rilevanti.
Il-kundizzjonijiet minimi tax-xogħol
Il-perjodu ta’ prova
Jekk inti meħtieġ li sservi perjodu ta’ prova, dan m’għandux jaqbeż is-6 xhur. Fil-każ ta’ relazzjoni ta’ impjieg għal żmien determinat, il-perjodu ta’ prova jrid ikun proporzjonat mat-tul mistenni tal-kuntratt u t-tip ta’ xogħol. Jekk il-kuntratt tiegħek jiġġedded għall-istess funzjoni u kompiti, l-impjegatur tiegħek ma jistax jissuġġettah għal perjodu ta’ prova ġdid. Eċċezzjonalment, il-pajjiżi tal-UE jistgħu jistabbilixxu perjodi ta’ prova itwal fir-regolamentazzjoni nazzjonali jekk dan ikun fl-interess tal-ħaddiem jew iġġustifikat mit-tip ta’ impjieg.
Iż-żamma ta’ impjiegi multipli
L-impjegatur tiegħek ma jistax jipprojbik milli taħdem ma’ impjegaturi oħrajn, barra mill-ħin tax-xogħol stabbilit, u ma jistax jittrattak b’mod anqas favorevoli biex tagħmel dan. Il-pajjiżi tal-UE jistgħu jistabbilixxu kundizzjonijiet dwar l-inkompatibbiltà taż-żamma ta’ impjiegi multipli, abbażi ta’ raġunijiet oġġettivi bħas-saħħa u s-sikurezza, il-kunfidenzjalità tan-negozju, l-integrità tas-servizz pubbliku jew l-evitar ta’ kunflitt ta’ interess.
Prevedibbiltà minima tax-xogħol
Jekk għandek kuntratt bi skeda tax-xogħol irregolari, l-impjegatur tiegħek irid:
- jagħtik sigħat u jiem ta’ referenza predeterminati
- jinformak dwar inkarigu f’perjodu ta’ avviż raġonevoli stabbilit skont il-liġi, il-ftehimiet kollettivi jew il-prattika nazzjonali.
Jekk wieħed mir-rekwiżiti jew it-tnejn li huma ma jiġux sodisfatti, għandek id-dritt li tirrifjuta assenjazzjoni ta’ xogħol mingħajr konsegwenzi negattivi. Anki meta l-liġi nazzjonali tippermetti lill-impjegatur tiegħek jikkanċella inkarigu ta’ xogħol mingħajr kumpens, int intitolat għal kumpens skont il-liġi nazzjonali, il-ftehimiet kollettivi jew il-prattika, jekk l-impjegatur tiegħek jikkanċella inkarigu tax-xogħol miftiehem minn qabel wara skadenza raġonevoli speċifikata.
Kuntratti fuq talba
Jekk il-liġi nazzjonali tal-pajjiż tal-UE tiegħek tippermetti l-użu ta’ kuntratti ta’ impjieg fuq talba jew simili, u inti impjegat b’dan it-tip ta’ kuntratt, l-impjegatur tiegħek irid isegwi l-liġijiet nazzjonali stabbiliti biex jipprevjeni l-abbuż u l-użu ħażin tiegħu. Il-pajjiżi kollha tal-UE li jippermettu kuntratti bħal dawn irid ikollhom tali liġijiet nazzjonali, li jistgħu, pereżempju, jillimitaw l-użu u t-tul ta’ żmien ta’ kuntratti fuq talba u kuntratti simili jew jippreżumu li għandek kuntratt ta’ impjieg b’numru minimu ta’ sigħat imħallsin, abbażi tas-sigħat medji li ħdimt matul perjodu speċifiku.
Tranżizzjoni għal forma oħra ta’ impjieg
Wara mill-anqas 6 xhur ta’ servizz u perjodu ta’ prova komplut b’suċċess (jekk applikabbli), int tista’ titlob forma ta’ impjieg b’kundizzjonijiet tax-xogħol aktar prevedibbli u siguri, jekk disponibbli. L-impjegatur għandu jagħtik tweġiba motivata bil-miktub fi żmien xahar mit-talba. Il-pajjiżi tal-UE jistgħu jillimitaw il-frekwenza ta’ talbiet bħal dawn.
Jekk l-impjegatur tiegħek hu SME, jew persuna fiżika, f’xi pajjiżi tal-UE jista’ jkollhom sa 3 xhur u jistgħu jagħtuk tweġiba orali jekk titlobha aktar minn darba u l-ġustifikazzjoni tibqa’ l-istess.
Taħriġ obbligatorju
Jekk il-liġi tal-UE jew nazzjonali tirrikjedi li l-impjegatur tiegħek jipprovdi taħriġ għall-kompiti tiegħek, dan irid jipprovdih mingħajr ħlas. Barra minn hekk, it-taħriġ irid jingħadd bħala ħin tax-xogħol, u, jekk possibbli, isir matul il-ħinijiet tax-xogħol.
F’xi pajjiżi tal-UE ftehimiet kollettivi magħmulin f’konformità mal-liġi nazzjonali jistgħu jistabbilixxu miżuri differenti minn dawk imsemmijin hawn fuq, filwaqt li jirrispettaw il-protezzjoni ġenerali tal-ħaddiema.
Akkwista l-aċċess għall-informazzjoni tal-pajjiż hawn taħt:
Agħżel il-pajjiż
Ara wkoll
Awtorità Ewropea tax-Xogħol: Id-drittijiet tiegħek bħala ħaddiem staġonali mobbli fl-UE.