Inbhuanaitheacht i bParlaimint na hEorpa: conas a dhéanaimis ár lorg comhshaoil a laghdú? 

Tá gealltanas tugtha ag Parlaimint na hEorpa acmhainní a úsáid go freagrach agus a lorg comhshaoil a laghdú. Ó ídiú fuinnimh go hastaíochtaí carbóin, soghluaisteacht, uisce agus dramhaíl, tá dea-chleachtais bunaithe ag an bParlaimint chun a tionchar ar an gcomhshaol a laghdú agus chun cur le todhchaí níos inbhuanaithe.

Mar chuid den ghealltanas sin, tá an Pharlaimint cláraithe faoin Scéim um Bainistíocht agus Iniúchadh Comhshaoil (EMAS) ó 2007 i leith, agus é mar aidhm aici a torthaí comhshaoil a fheabhsú go leanúnach.

Léigh tuilleadh faoi ghealltanais inbhuanaitheachta na Parlaiminte ina Beartas Comhshaoil nó faigh tuilleadh eolais faoi dheimhniú EMAS.

Tá an-dul chun cinn déanta ag Parlaimint na hEorpa ó tugadh EMAS isteach ina trí ionad oibre.

Tá tuilleadh príomhuimhreacha agus mionanailíse ar fheidhmíocht na Parlaiminte le fáil sa Ráiteas Comhshaoil is déanaí.

Déanann Parlaimint na hEorpa a dícheall fuinneamh a úsáid ar an mbealach is éifeachtúla:

• Faightear 100 % den leictreachas a cheannaítear ó fhoinsí glasa deimhnithe.
• Is fuinneamh in-athnuaite é 473 MWh den fhuinneamh a úsáidtear, agus é á ghiniúint ar an láthair ó phainéil fhótavoltacha.

Tá roinnt beart curtha i bhfeidhm ag Parlaimint na hEorpa chun a hacmhainní a athúsáid ar bhealach inbhuanaithe:

Déantar trealamh TF úsáidte (amhail ríomhairí pearsanta, ríomhairí glúine, scáileáin) agus troscán a dheonú do charthanais lena n-athúsáid.

Laghdaíonn an Pharlaimint a cuid dramhaíola féin agus feabhsaíonn sí rátaí athchúrsála, trí bhoscaí bruscair cúig urrann dramhaíola a chur ar bun agus na sruthanna dramhaíola a chur in oiriúint do riachtanais náisiúnta éagsúla.

Tá bithghás á dhéanamh de bhithdhramhaíl na Parlaiminte ó 2013 i leith, ar féidir é a úsáid chun teas agus leictreachas a tháirgeadh.

In 2016, bhí an Pharlaimint ar an gcéad institiúid de chuid AE a chuir clár cuimsitheach um dheonú bia chun feidhme lena ndeonaítear barrachas bia do charthanais.

Is éard is soláthar poiblí ann an próiseas trína gceannaíonn an Pharlaimint earraí agus seirbhísí, ó sholáthairtí oifige a cheannach go conraitheoirí a fhostú.

Cuidíonn treoirlínte agus cúrsaí oiliúna le foireann na Parlaiminte táirgí agus seirbhísí a roghnú lena mbaineann tionchar íseal ar an gcomhshaol, dálaí córa saothair, foinsiú eiticiúil agus marthanacht fheabhsaithe.

I bParlaimint na hEorpa, spreagtar gach duine chun nósanna atá neamhdhíobhálach don chomhshaol a ghlacadh, amhail modhanna inbhuanaithe comaitéireachta.

In 2023, chuaigh 30 % den fhoireann chun na hoibre ar rothar nó shiúil siad ann agus tá níos mó ná 2 100 láthair pháirceála rothar ar fáil i dtrí ionad oibre Pharlaimint na hEorpa. Tá Parlaimint na hEorpa sa Bhruiséil deimhnithe mar fhostóir atá fabhrach don rothaíocht.

Níl an sprioc maidir le feidhmíocht chomhshaoil a fheabhsú teoranta do phríomhionaid oibre na Parlaiminte sa Bhruiséil, in Strasbourg agus i Lucsamburg. I ngach Ballstát, tá oifig idirchaidrimh de chuid Pharlaimint na hEorpa ann, a théann i rannpháirtíocht le heagraíochtaí agus le saoránaigh ar an leibhéal áitiúil.

Léigh tuilleadh faoin obair chun an tionchar a bhíonn ag oibríochtaí oifigí idirchaidrimh ar an gcomhshaol a laghdú i Ráiteas Comhshaoil Oifigí Idirchaidrimh Pharlaimint na hEorpa.

Chun tuilleadh eolais a fháil faoin gcaoi a gcuireann Parlaimint na hEorpa inbhuanaitheacht i bhfeidhm ina hionaid oibre, téigh i dteagmháil le hAonad EMAS agus Inbhuanaitheachta ag emas@europarl.europa.eu.