RAPPORT dwar l-impatt ambjentali tas-sistema tal-pajpijiet tal-gass ippjanata fil-Baħar Baltiku biex tgħaqqad ir-Russja mal-Ġermanja (Petizzjonijiet 0614/2007u 0952/2007)

dwar l-impatt ambjentali tas-sistema tal-pajpijiet tal-gass ippjanata fil-Baħar Baltiku biex tgħaqqad ir-Russja mal-Ġermanja (Petizzjonijiet 0614/2007u 0952/2007)

((2007/2118(INI))

Il-Parlament Ewropew,

–    wara li kkunsidra l-Petizzjoni 0614/2007, imressqa minn Radvile Morkunaite, u b’aktar minn 20,000 firma, il-Petizzjoni 952/2006 mressqa minn Krzysztof Mączkowski u l-petizzjonijiet l-oħra mressqa lilu dwar il-kwistjoni koperta f’din ir-riżoluzzjoni,

–    wara li kkunsidra t-Trattat ta’ Liżbona ffirmat mill-Istati Membri kollha fit-13 ta’ Diċembru 2007,

–    wara li kkunsidra l-Komunikazzjoni tal-Kummissjoni lill-Parlament Ewropew u lill-Kunsill rigward l-Istrateġija Tematika dwar il-Protezzjoni u l-Konservazzjoni ta' l-Ambjent ta' l-Ibħra (COM(2005)0504),

–    wara li kkunsidra s-Sitt Programm ta’ Azzjoni għall-Ambjent tal-Komunità Ewropea,

–    wara li kkunsidra d-Direttiva tal-Kunsill 97/11/KE li temenda d-Direttiva 85/337/KEE dwar l-istima ta' l-effetti ta' ċerti proġetti pubbliċi u privati fuq l-ambjent[1], u d-Direttivi tal-Kunsill 92/43/KEE[2] u 79/409/KEE[3], żewġ direttivi li jiffurmaw il-pakkett leġiżlattiv Natura 2000,

–    wara li kkunsidra r-riżoluzzjoni tiegħu ta' l-14 ta' Novembru 2006 dwar Strateġija Tematika dwar il-Protezzjoni u l-Konservazzjoni ta' l-Ambjent tal-Baħar[4],

–    wara li kkunsidra r-riżoluzzjoni tiegħu tas-16 ta' Novembru 2006 dwar Strateġija tal-Baħar Baltiku għad-Dimensjoni tat-Tramuntana[5],

–    wara li kkunsidra l-Konvenzjoni dwar il-Protezzjoni ta' l-Ambjent tal-Baħar taz-Zona tal-Baħar Baltiku (Konvenzjoni ta' Ħelsinki),

–    wara li kkunsidra r-rakkomandazzjonijiet tal-Kummissjoni ta' Ħelsinki (HELCOM), u b'mod partikulari r-Rakkomandazzjoni 17/3 tat-12 ta' Marzu 1996 li tiddeskrivi l-obbligu li wieħed jagħmel evalwazzjoni ta' l-impatt fuq l-ambjent u li jikkonsulta ma' stati li jistgħu jsofru l-impatt negattiv tal-proġett propost,

–    wara li kkunsidra l-Konvenzjoni dwar l-Istima ta' l-Impatt fuq l-Ambjent f'Kuntest li Jaqsam il-Fruntieri tal-25 ta' Frar 1991 (Konvenzjoni ta' Espoo),

–    wara li kkunsidra l-Konvenzjoni dwar l-Aċċess għall-Informazzjoni, il-Parteċipazzjoni Pubblika fit-Teħid ta' Deċiżjonijiet u l-Aċċess għall-Ġustizzja fi Kwistjonijiet Ambjentali tal-25 ta' Ġunju 1998 (Konvenzjoni ta' Århus),

–    wara li kkunsidra l-Konvenzjoni tan-Nazzjonijiet Uniti dwar il-Liġi tal-Baħar (UNCLOS),

–    wara li kkunsidra l-prinċipju ta' prekawzjoni, li huwa inkluż mill-każistika tal-Qorti Ewropea tal-Ġustizzja fost il-prinċipji ġenerali ta' l-acquis communautaire u li huwa wieħed mill-aspetti ta' l-iżvilupp sostenibbli skond il-liġi Ewropea u internazzjonali,

–    wara li kkunsidra l-prinċipju ta' governanza tajba, li jikkostitwixxi wieħed mill-prinċipji ġenerali tal-liġi Ewropea,

–    wara li kkunsidra l-attivitajiet ta' l-Intergrupp ta' l-Ewropa tal-Baltiku tal-Parlament Ewropew,

–    wara li kkunsidra l-proposti li ħarġu mis-smigħ pubbliku tad-29 ta' Jannar 2008,

–    wara li kkunsidra d-Deċiżjoni Nru 1364/2006/KE tal-Parlament Ewropew u tal-Kunsill tas-6 ta' Settembru 2006 li tistabbilixxi linji gwida għal netwerks ta' l-enerġija trans-Ewropej[6],

–    wara li kkunsidra l-Pjan ta' Azzjoni għall-Baħar Baltiku adottat fil-laqgħa tal-Ministri ta' l-Ambjent ta' l-Istati Baltiċi li saret fi Krakovja fil-15 ta' Novembru 2007,

–    wara li kkunsidra l-Artikolu 10 tat-Trattat li jistabbilixxi l-Komunità Ewropea, li jimponi fuq l-Istati Membri dover ta' lealtà lejn il-Komunità Ewropea,

–    wara li kkunsidra l-Artikolu 192(1) tar-Regoli ta' Proċedura tiegħu,

–    wara li kkunsidra r-rapport tal-Kumitat għall-Petizzjonijiet u l-opinjonijiet tal-Kumitat għall-Affarijiet Barranin u l-Kumitat għall-Industrija, ir-Riċerka u l-Enerġija (A6-0225/2008),

A.  billi l-Baħar Baltiku huwa baċin li miegħu għandhom fruntiera xejn inqas minn tmien Stati Membri ta' l-Unjoni Ewropea, u li 80% mill-linja tal-kosta tiegħu huwa territorju ta' l-Unjoni Ewropea, billi l-OAO Gazprom hi s-sid tal-maġġoranza ta’ l-ishma tan-Nord Stream,

B.   billi t-tħassib għall-ambjent tal-Baħar Baltiku huwa wieħed mill-aktar objettivi importanti tad-Dimensjoni tat-Tramuntana ta' l-Unjoni, kif ikkonfermat ripetutament mill-komunikazzjonijiet tal-Kummissjoni u r-riżoluzzjonijiet tal-Parlament,

C.  billi s-setturi tal-biedja u ta’ l-industrija ta’ l-Istati Membri li jmissu mal-Baħar Baltiku, flimkien mar-Russja huma l-aktar pajjiżi li jniġġsuh u li joħolqu l-akbar problemi għall-bilanċ ekoloġiku tiegħu,

D.  billi l-Unjoni Ewropea hija impenjata b'mod partikolari fil-ħarsien ta' l-ambjent, inkluż il-ħarsien ta' l-ambjent tal-baħar,

E.   billi fil-proċedimenti quddiem il-Qorti Ewropea tal-Ġustizzja, il-Kummissjoni kkonfermat ripetutament il-ħarsien ta' l-ambjent bħala wieħed mill-għanijiet ewlenin tal-Komunità, u l-Qorti rrikonoxxiet il-kompetenza tal-Komunità fil-qasam tal-ħarsien u l-konservazzjoni ta' l-ambjent tal-baħar,

F.   billi attwalment jeżistu pjanijiet għall-kostruzzjoni ta’ diversi proġetti infrastrutturali fil-Baħar Baltiku (in-Nord Stream, farms għall-enerġija mir-riħ, l-iScanled Baltic Pipe, is-sistema ta' pajpijiet tal-gass bejn il-Finlandja u l-Estonja, il-kejbils ta’ l-elettriku bejn l-Iżvezja u l-Litwanja, it-terminals ta’ l-LNG fi Świnoujścje, eċċ.),

G.  billi l-kontribut dejjem jikber tal-gass naturali għall-bilanċ ta’ l-enerġija fl-Ewropa kien, b’mod speċjali mill-1990 'l hawn, il-mezz ewlieni tat-tnaqqis fl-emissjonijiet tad-dijossidju tal-karbonju (CO₂),

H.  billi l-prinċipju ta' prekawzjoni stipulat fl-Artikolu 174(2) tat-Trattat KE jitlob li l-partijiet interessati kollha jagħmlu l-isforzi meħtieġa biex jevalwaw l-impatt ambjentali li jista’ jkollhom deċiżjonijiet ġodda jew il-bidu ta’ xogħlijiet, u li jieħdu azzjoni preventiva xierqa fejn hemm probabilità raġonevoli ta' theddida għall-ambjent,

I.    billi skond il-prinċipju li l-ħtiġijiet tal-protezzjoni ta’ l-ambjent iridu jkunu integrati f’politiki speċifiċi għas-setturi, dawn il-ħtiġijiet għandhom jitqiesu kif jixraq fit-twettiq ta’ l-attivitajiet kollha Komunitarji u fil-ħidma għall-ilħuq ta’ l-għanijiet kollha tal-Komunità,

J.    billi l-Artikolu 194 tat-Trattat futur dwar il-Funzjonament ta' l-Unjoni Ewropea, kif imdaħħal mit-Trattat ta' Liżbona, jgħid b’mod espliċitu li l-politika enerġetika ta’ l-UE għandha titwettaq fi spirtu ta’ solidarjetà bejn l-Istati Membri u b’kunsiderazzjoni għall-ħtieġa tal-konservazzjoni u t-titjib ta’ l-ambjent,

K.  billi l-vulnerabilità partikulari tal-Baħar Baltiku għat-theddid ambjentali kienet ikkonfermata mill-Organizzazzjoni Marittima Internazzjonali, li rrikonoxxietu bħala 'zona estremament vulnerabbli',

L.   billi l-Baħar Baltiku llum huwa waħda mill-aktar zoni marittimi mniġġsa fid-dinja, u billi, b'mod partikulari, il-konċentrazzjoni tas-sustanzi perikolużi kemm fl-ilmijiet tiegħu u kemm fl-organiżmi ħajjin tiegħu għadha għolja sa livell mhux naturali,

M.  billi l-Baħar Baltiku huwa baħar ġewwwieni tipiku u mhux fond u, flimkien mal-Baħar l-Iswed, għandu l-itwal ċiklu ta' skambju ta' l-ilma ma' l-oċean globali, ta' madwar 30 sena,

N.  billi pajp għat-trażmissjoni tal-gass huwa stmat li jservi għal 50 sena u li l-ammont tax-xogħol li tinvolvi d-dekommissjoni tas-sistema tal-pajpijiet ikun simili fl-iskala għal dak ta’ l-istallazzjoni ppjanata; billi dan l-aspett għandu jitqies fil-konfront taż-żmien meħtieġ biex il-flora u l-fawna terġa' lura kompletament għall-istat oriġinali tagħha meta wieħed jikkunsidra l-impatt ambjentali u ekonomiku tal-proġett,

O.  billi l-espożizzjoni għall-metalli tqal, sustanzi kontaminanti u sustanzi dannużi oħra joħloq riskji għas-saħħa u implikazzjoni għall-katina ta’ l-ikel li jeħtieġ jiġu eżaminati,

P.   billi numru ta' fatturi, inklużi l-perjodi twal ta' preservazzjoni ta' l-ilma, il-kolonna ta' l-ilma stratifikata, iz-zona fejn jinġabar l-ilma estensiva li hi industrijalizzata u l-intensifikazzjoni partikulari tal-biedja fiz-zona tal-Baħar Baltiku jagħmlu l-Baħar Baltiku partikolarment vulnerabbli f'termini ambjentali,

Q.  billi x-xogħlijiet fil-kundizzjonijiet speċjali fil-Baħar Baltiku se jirriżultaw f’żieda f’salt fil-popolazzjoni ta’ l-alki, b’riskju partikulari għall-Finlandja, l-Iżvezja u l-Ġermanja,

R.   billi fattur sinifikanti ieħor ta' riskju ambjentali hija l-eżistenza ta' madwar 80 000 tunnellata ta' munizzjon mormija f'qiegħ il-Baħar Baltiku wara t-Tieni Gwerra Dinjija, li fihom sustanzi tossiċi bħall-gass tal-mustarda, l-iprit tal-kubrit, l-iprit tan-nitroġenu, il-lewisit, Clark I, Clark II u l-adamsit, li jirrappreżentaw periklu kemm għall-ambjent tal-baħar Baltiku u kemm għall-ħajja u s-saħħa tal-bniedem,

S.   billi l-kontenituri tal-munizzjoni baqgħu jiġu mormija minn numru ta' stati mill-1945 sa lejn tmiem is-snin sittin,

T.  billi, barra minn hekk, il-kontenituri tal-munizzjon qegħdin f'kundizzjoni kritika, bil-korrużjoni tagħhom stmata li hi ta' 80%, u billi l-post eżatt fejn qegħdin mhux dejjem jista' jkun iddeterminat,

U.  billi, fl-istess ħin, il-Pjan ta' Azzjoni għall-Baħar Baltiku adottat fil-15 ta' Novembru 2007 fi Krakovja jirrikjedi li l-istati li għandhom fruntiera mal-Baħar Baltiku jiżguraw il-ħażna sikura ta' stokks qodma ta' sustanzi kimiċi u għodda li jkun fihom sustanzi perikolużi,

V.  b'kunsiderazzjoni għall-impatt potenzjali tas-sistema tal-pajpijiet tal-gass fuq l-ambjent tal-baħar tal-Baltiku u fuq l-istati li jmissu mal-Baltiku,

W. wara li kkunsidra ż-żieda fit-traffiku f'termini ta’ baħħara u tankers taż-żejt fil-Baħar Baltiku u r-riskju potenzjali ta' nirien fuq il-bastimenti, ir-riskju tat-telfien tal-kapaċità tal-bastimenti li jżommu f'wiċċ l-ilma u l-għarqien tagħhom minħabba ħsara fis-sistema ta' pajpijiet tal-gass waqt il-kostruzzjoni, l-istallazzjoni u l-operat tagħha, u l-impatt potenzjali uman, ekonomiku u ambjentali tagħha,

X.  billi l-bini tas-Sistema tal-Pajpijiet tal-Gass tat-Tramuntana ta' l-Ewropa se jkollu riperkussjonijiet teknoġenoġiċi fuq kurritur taħt l-ilma twil 1 200 km u wiesa' madwar 2 km, b'zona ta' 2 400 km², u b'hekk se jkun l-ikbar zona ta' kostruzzjoni taħt il-baħar fid-dinja,

Y. billi s-sajd, it-turiżmu u t-tbaħħir ser jkunu affettwati ħażin mill-kostruzzjoni, l-istallazzjoni u l-operat tal-proġett, u dan hu ta’ theddida sostanzjali għall-ekonomija tar-reġjuni tax-xatt,

Z.   billi l-Artikolu 123 tal-Konvenzjoni tan-Nazzjonijiet Uniti dwar il-Liġi tal-Baħar, li huwa parti integrali mill-acquis communautaire, jirrikjedi li l-istati li jmissu ma' ibħra parzjalment magħluqa jikkoperaw bejniethom fl-eżerċizzju tad-drittijiet u d-dmirijiet tagħhom u li jikkoordinaw l-implimentazzjoni tad-drittijiet u d-dmirijiet tagħhom rigward il-ħarsien u l-konservazzjoni ta' l-ambjent tal-baħar,

AA. billi l-Artikolu 2(1) tal-Konvenzjoni ta' Espoo jitlob li l-istati kontraenti, individwalment jew flimkien, jieħdu l-miżuri xierqa u effettivi kollha biex jevitaw, inaqqsu u jikkontrollaw impatt ta' ħsara fuq l-ambjent transkonfinali sinifikanti mill-attivitajiet proposti,

AB. billi skond l-Artikolu 5(a) tal-Konvenzjoni ta' Espoo , il-konsultazzjonijiet mal-partijiet esposti għall-effetti dannużi ta’ proġetti transkonfinali jistgħu jkopru alternattivi possibbli għal proġett propost, inkluża l-possibilità li l-proġett jiġi abbandunat,

AC. billi l-Artikolu 12 tal-Konvenzjoni ta' Ħelsinki jitlob li l-Istati Kontraenti jieħdu l-miżuri kollha sabiex jevitaw it-tniġġis ta' l-ambjent tal-baħar fiz-zona tal-Baħar Baltiku li jirriżulta mill-esplorazzjoni jew l-isfruttament ta' qiegħ il-baħar jew minn kwalunkwe attività assoċjata,

AD. billi r-rotta proposta għas-sistema tal-pajpijiet tal-gass tal-gass tat-Tramuntana ta' l-Ewropa se taqsam zoni li huma inklużi fil-programm Natura 2000 u li d-Direttiva 92/43/KEE tikklassifika bħala żoni speċjali ta’ konservazzjoni,

AE. billi l-Artikolu 6(2) tad-Direttiva 92/43/KEE jirrikjedi li l-Istati Membri biex jieħdu l-miżuri xierqa biex jevitaw id-deterjorament tal-ħabitat naturali u l-ħabitat ta’ l-ispeċi fiz-zoni speċjali ta’ konservazzjoni,

AF. billi l-Artikolu 6(3) tad-Direttiva 92/43/KEE jirrikjedi li l-Istati Membri jagħmlu evalwazzjoni xierqa ta’ l-implikazzjonijiet ta' kull pjan jew proġett li mhux marbut direttament ma’ jew li mhux meħtieġ għat-tmexxija ta' sit ta' konservazzjoni iżda li x’aktarx se jkollu effett sinifikanti fuqu, in vista ta’ l-għanjiet ta’ konservazzjoni tas-sit,

AG. billi skond l-Artikolu 6 (3) tad-Direttiva 92/43/KEE, fl-isfond tar-riżultati ta’ l-evalwazzjoni ta’ l-implikazzjonijiet għas-sit imsemmija hawn fuq, l-awtoritajiet nazzjonali kompetenti għandhom jaqblu dwar il-pjan jew il-proġett biss wara li jkunu żguraw li dan ma jaffettwax ħażin l-integrità tas-sit ikkonċernat u, jekk ikun xieraq, wara li jkunu raw x'inhi l-opinjoni tal-pubbliku ġenerali,

AH. billi s-sistema tal-pajpijiet tal-gass proposta se tkun l-itwal sistema tal-pajpijiet tal-gass taħt il-baħar b'żewġ tubi fid-dinja, minbarra li se tkun l-inqas waħda fil-fond, fatti li jagħmluha partikolarment vulnerabbli għall-ħsara potenzjali,

AI. billi d-Deċiżjoni 1364/2006/KE tinkludi s-sistema tal-pajpijiet tal-gass tat-Tramuntana ta' l-Ewropa fost il-proġetti ta' prijorità ta' interess Ewropew,

AJ. billi kull struttura ta' inġinerija fuq skala kbira mibnija fil-baħar trid, minħabba r-riskji assoċjati, tkun suġġetta għal analiżi partikolarment bir-reqqa u komprensiva u evalwazzjoni ta' l-impatt ambjentali li, jekk trid tipproduċi riżultati affidabbli, trid tkopri ta' l-inqas staġun sħiħ ta' tkabbir li fil-każ ta' xi speċi jista' jkun twil sa sentejn - perjodu li huwa ħafna itwal mill-perjodu ta' sitt xhur studju propost mill-investitur,

AK.    billi wara l-Konvenzjoni ta' Espoo, kull proġett ta' dan it-tip għandu jkun preċedut minn analiżi ta' l-alternattivi għalih, li tkopri b'mod partikolari l-ispejjeż ta' implimentazzjoni u s-sikurezza ambjentali, f'dan il-każ analiżi ta' rotot fuq l-art għas-sistema tal-pajpijiet tal-gass,

AL. billi l-Artikolu 1 tal-Konvenzjoni ta' Århus jirrikjedi li kull stat kontraenti jiggarantixxi d-drittijiet ta' l-aċċess għall-informazzjoni, il-parteċipazzjoni pubblika fit-teħid ta' deċiżjonijiet u l-aċċess għall-ġustizzja fi kwistjonijiet ambjentali,

AM.billi r-rekwiżiti legali marbuta mat-tħejjija ta' evalwazzjoni ta' l-impatt ambjentali preċiża jridu jkunu meqjusa u trid tingħata wkoll kunsiderazzjoni lill-perikli msemmija hawn fuq,

AN.    billi, barra minn hekk, hija meħtieġa l-analiżi tat-theddida terroristika u l-kapaċità ta' azzjoni effettiva kontriha,

1.   Huwa tal-fehma li n-Nord Stream huwa proġett infrastrutturali b'dimensjoni politika u strateġika wiesgħa kemm għall-UE u kif ukoll għar-Russja; jifhem it-tħassib espress mill-Istati Membri ta' l-UE fir-rigward tal-bini u l-manutenzjoni tas-sistema ta' pajpijiet; jenfasizza li l-abilità ta' stati żgħar li jmissu mal-Baħar Baltiku li jipprovdu sigurtà fir-reġjun ta' dan il-baħar ma tistax titqies b'mod iżolat mill-abilità ta' l-UE li taġixxi bħala entità magħquda u li titkellem b'vuċi waħda dwar il-kwistjonijiet ta' l-enerġija, u jfakkar fir-riżoluzzjoni tiegħu tas-26 ta' Settembru 2007 dwar politika barranija Ewropea komuni għall-enerġija[7]; jenfasizza li d-deċiżjoni 1364/2006/KE (li tinkorpora linji gwida għat-TEN-E) tirrikonoxxi n-Nord Stream bħala proġett ta' interess Ewropew li jista' jgħin biex jintlaħqu l-ħtiġijiet enerġetiċi ġejjiena ta’ l-UE; jenfasizza li dan il-proġett u sistemi ta' pajpijiet tal-gass oħra kumplementari, bħall-Yamal II u l-Amber, għandhom ikunu ppjanati fl-ispirtu ta' politika barranija Ewropea komuni għall-enerġija u għandhom iqisu bis-sħiħ l-impatt tagħhom fuq l-ambjent u fuq is-sigurtà ta' l-Istati Membri ta' l-UE;

2.   Itenni l-opinjoni tiegħu li, filwaqt li tiġi kkunsidrata d-dipendenza dejjem tikber ta' l-UE fuq numru limitat ta' sorsi, fornituri u rotot ta' trasport ta' l-enerġija, huwa essenzjali li jiġu appoġġati inizjattivi mmirati lejn id-diversifikazzjoni tagħhom, kemm ġeografikament u kemm billi jkunu żviluppati alternattivi sostenibbli; jiġbed l-attenzjoni b'mod partikolari għall-bżonn ta' appoġġ għall-iżvilupp ta' l-infrastruttura tal-portijiet użati fl-immaniġġjar tal-fjuwils; ifakkar li n-Nord Stream huwa biss wieħed minn numru ikbar ta' proġetti ta' infrastruttura marbuta mal-gass, bħas-sistemi ta' pajpijiet u l-faċilitajiet ta’ l-LNG, li se jkunu essenzjali biex ikunu sodisfatti l-ħtiġijiet tal-konsum tal-gass naturali tal-Komunità li, skond diversi studji, se jikbru b'mod sinifikanti tul is-snin li ġejjin u li fl-istess ħin se jippermettu li jkunu sostitwiti fjuwils fossili li jagħmlu iktar ħsara lill-ambjent; iqis li hu meħtieġ li jkun evalwat l-impatt fuq l-ambjent fuq perjodu ta' żmien twil mill-infrastruttura l-ġdida tal-gass, b'kunsiderazzjoni għall-importanza tal-garanzija ta' provvista stabbli tal-gass;

3.   Jappoġġa l-proposta, li hemm fir-riżoluzzjoni msemmija hawn fuq tal-Parlament Ewropew ta' l-14 ta' Novembru 2006, li l-istrateġija futura rigward il-baħar ta' l-UE trid tirriżulta f'obbligazzjonijiet supranazzjonali li jorbtu li jistgħu jinvolvu impenji komuni f'pajjiżi terzi;

4.   Jenfasizza l-fatt li s-sigurtà ta' l-enerġija trid titqies bħala komponent essenzjali tas-sigurtà ġenerali ta' l-Unjoni Ewropea, u li, konsegwentement, id-definizzjoni tas-sigurtà ta' l-enerġija m'għandhiex tkun limitata għan-nuqqas ta' produzzjoni interna fl-UE iżda għandha tqis ukoll l-aspetti ġeopolitiċi tad-dipendenza fuq l-importazzjonijiet u r-riskji potenzjali li din iġġib magħha ta' interruzzjonijiet motivati politikament; jemmen li t-Tielet Pakkett ta' l-Enerġija se jnaqqas id-dipendenza enerġetika ta' kull Stat Membru peress li ebda stat ma jista’ jinqata’ minn fornitur minn pajjiż terz f'suq ta' l-enerġija liberalizzat u integrat għalkollox;

5.   Jiddispjaċih dwar l-irwol marġinali li għandha l-UE f'dan il-proġett, b'mod partikulari l-Kummissjoni; jirrimarka li involviment akbar ta' l-UE inaqqas l-inċertezza li tinħass minn ħafna Stati Membri dwar il-proġett Nord Stream;

6.   Jinnota l-oppożizzjoni espressa minn certi Stati Membri għall-proġett tas-sistema ta' pajpijiet ippjanat għaz-zona tal-Baħar Baltiku, li huwa patrimonju komuni ta' l-istati li jmissu mal-Baħar Baltiku, u mhux kwistjoni ta' relazzjonijiet bilaterali bejn l-istati; iqis, għaldaqstant, li l-proġett għandu jitwettaq b’koperazzjoni ma’ kull wieħed mill-istati madwar il-Baħar Baltiku skond il-Konvenzjoni ta' Espoo, il-Konvenzjoni ta' Ħelsinki u strumenti legali pertinenti oħra;

7.   Jopponi, f’dan ir-rigward, it-twettiq ta' proġett fuq l-iskala proposta mingħajr ma nkiseb qabel il-kunsens mill-istati littorali kollha;

8.   Jesprimi l-konvinzjoni tiegħu li proġetti dwar l-enerġija li jinvolvu lill-Istati Membri ta' l-UE u lil pajjiżi terzi għandhom ikunu suġġett ta' interess Ewropew u ta' tħassib komuni għall-Unjoni Ewropea kollha u għaċ-ċittadini tagħha;

9.   Jirrikonoxxi li n-Nord Stream qiegħda twettaq l-evalwazzjoni ta' l-impatt ambjentali li għandha titressaq quddiem il-partijiet ta' l-oriġini kif definiti fil-Konvenzjoni ta' Espoo (ir-Russja, il-Finlandja, l-Iżvezja, id-Danimarka u l-Ġermanja) għall-approvazzjoni tagħhom; iħeġġeġ lill-kumpanija biex tressaq ir-riżultati ta' l-istudji u s-sett sħiħ tad-dejta tar-riċerka dwar is-sitwazzjoni ekoloġika tas-sit tal-proġett miġbura waqt l-istudji ambjentali, mhux biss quddiem dawk l-Istati, iżda wkoll quddiem il-HELCOM u l-partijiet interessati kollha;

10. Jenfasizza li s-soluzzjoni sostenibbli fuq perjodu ta' żmien twil tirrikjedi trasparenza totali għall-partijiet kollha matul il-fażijiet kemm ta' kostruzzjoni u kemm ta' operazzjoni, u li l-fiduċja f'dan il-proġett kbir se tikber jekk l-istati li jmissu mal-Baħar Baltiku jkunu jistgħu jimmonitorjaw ix-xogħol;

11. Iqis li minħabba l-isfida biex tiġi żgurata l-provvista ta' l-enerġija filwaqt li jkun irrispettat l-impenn għall-ħarsien ambjentali u l-iżvilupp sostenibbli ta' l-UE, huwa importanti ħafna li tkun implimentata politika Ewropea koerenti u koordinata dwar il-forniment tal-gass naturali bbażata fuq evalwazzjoni bir-reqqa fil-livell Ewropew ta’ l-aspetti ambjentali ta’ soluzzjonijiet alternattivi kif ukoll fuq is-solidarjetà reċiproka bejn l-Istati Membri;

12. Jistieden, għalhekk, lill-Kummissjoni u lill-Kunsill biex jimpenjaw ruħhom bis-sħiħ biex janalizzaw l-impatt ambjentali tal-kostruzzjoni tas-sistema tal-pajpijiet tal-gass tat-Tramuntana ta' l-Ewropa, b'mod partikolari f'sitwazzjonijiet li jinvolvu l-kunsiderazzjonijiet li jeħtieġu opinjoni tal-Kummissjoni, kif speċifikat fl-Artikolu 6(4) tad-Direttiva 92/43/KEE;

13. Jenfasizza li l-prinċipju tar-reċiproċità jrid ikun irrispettat għal kollox fir-rigward ta’ l-investiment jekk l-interdipendenza bejn l-UE u r-Russja għandha tiżviluppa fi sħubija; jinnota li pajjiżi terzi jibbenefikaw ħafna mis-suq miftuħ ta’ l-Ewropa, iżda jinnota wkoll li l-investituri Ewropej fir-Russja ma jingħatawx vantaġġi simili;

14. Jiddispjaċih li l-Kummissjoni naqset li taċċetta l-proposta inkluża fir-riżoluzzjoni tal-Parlament Ewropew tas-16 ta' Novembru 2006 dwar il-preparazzjoni ta' evalwazzjonijiet ta' l-impatt fuq l-ambjent oġġettivi tal-proġetti proposti mill-Kummissjoni, waqt li jtenni s-sejħa tiegħu għall-preparazzjoni ta' evalwazzjoni bħal din minn korp indipendenti li għandu jinħatar bl-approvazzjoni ta’ l-istati littorali kollha;

15. Jistieden lill-Kunsill u lill-Kummissjoni biex iwettqu evalwazzjoni bir-reqqa dwar jekk l-implimentazzjoni tal-proġett hijiex konformi mal-liġi Komunitarja u internazzjonali;

16. Jesprimi t-tħassib tiegħu dwar l-iskeda tal-proġett adottata min-Nord Stream, li l-implimentazzjoni tagħha se timpedixxi analiżi bir-reqqa tar-riżultati ta' l-evalwazzjoni ta' l-impatt ambjentali minn stati interessati, organizzazzjonijiet mhux governattivi u esperti tal-HELCOM;

17. Jirrimarka li ħidma ta' snin f'zona li tkopri sa 2 400 km², li tirrikjedi l-użu ta' numru kbir ta' bastimenti u tagħmir ieħor, tirrappreżenta theddida serja għall-bijodiversità u għan-numru ta' ħabitats, kif ukoll għas-sikurezza u l-operat bla xkiel tat-tbaħħir, fir-reġjun;

18. Jiddispjaċih li m'hemmx definizzjoni preċiża ta' kemm se jkun hemm indħil f'qiegħ il-baħar sabiex tindifen is-sistema tal-pajpijiet, li jista' jkollu impatt kritiku fuq l-ambjent tal-flora u l-fawna f'qiegħ il-baħar;

19. Jesprimi tħassib kbir fir-rigward tar-rapporti li, qabel iqiegħed għall-użu s-sistema tal-pajpijiet tal-gass, l-investitur bi ħsiebu juża prodott kompost tossiku ħafna magħruf bħala aldeide glutarika; jenfasizza li kull azzjoni li tirriżulta f'diżastru ambjentali gravi b'konsegwenzi irreversibbli għandha tkun evitata;

20. Jistieden lill-Kummissjoni biex twettaq studju ambjentali indipendenti u ta’ min joqgħod fuqu li jeżamina l-emissjonijiet agrikoli u industrijali li qed iniġġsu l-Baħar Baltiku u biex tevalwa s-sitwazzjoni skond it-theddidiet ambjentali possibbli kkaġunati mis-sistema tal-pajpijiet tal-gass li attwalment għaddejja mill-Baħar Baltiku; barra minn hekk, jistieden lill-Kummissjoni biex tevalwa l-impatt addizzjonali fuq il-Baħar Baltiku kkaġunat mill-proġett Nord Stream;

21. Jistieden lill-iżviluppatur biex jiżgura li l-kostruzzjoni u l-operazzjoni tas-sistema tal-pajpijiet tal-gass ma jipperikolawx il-ħafna speċijiet ta' ħut u għasafar kif ukoll l-eżistenza ta' popolazzjoni ta' foċeni li hija biss ta' 600, u li huma speċi unika għal dan ir-reġjun ġeografiku;

22. Iqis li l-ħarsien ta’ l-ambjent tal-Baħar Baltiku huwa parti mid-Dimensjoni tat-Tramuntana ta’ l-UE;

23. Jinnota li l-prosperità tar-reġjuni kostali u l-kompetittività ta’ l-ekonomiji tagħhom huma suxxettibbli ħafna għal, u pperikolati ħafna minn, zoni kostali mħassra u d-deterjorament ta’ l-ambjent tal-baħar; jiġbed l-attenzjoni li, minħabba l-fatt li r-reġjuni kostali huma affettwati ħafna minn attivitajiet u politiki marittimi, is-sostenibilità ambjentali fuq perjodu ta' żmien twil hija prekundizzjoni għall-ħarsien tal-prosperità ekonomika, soċjali u ambjentali tagħhom;

24. Jinnota l-assenza ta' kwalunkwe strateġija li tindirizza n-nuqqas strutturali u t-theddid estern għas-sikurezza tas-sistema tal-pajpijiet tal-gass; jenfasizza l-ħtieġa li jiġu definiti b'mod ċar l-aspetti kollha relatati mas-sikurezza u r-reazzjoni f'każ ta' l-emerġenza, inklużi r-riżorsi finanzjarji, il-partijiet ikkonċernati, l-irwoli u l-proċeduri;

25. Jenfasizza li minħabba r-riskji ambjentali serji u l-ispiża għolja għall-proġett propost, għandhom ikunu analizzati l-ewwel rotot alternattivi għas-sistema tal-pajpijiet tal-gass, b'mod li jqis kemm l-aspetti ambjentali u kemm dawk ekonomiċi, inkluża l-iskeda għal rotot bħal dawn; jinnota li hu possibbli jkun hemm rotot bħal dawn lejn il-fruntiera tar-Russja mill-art, u li jgħaddu biss minn Stati Membri ta' l-Unjoni Ewropea;  »26.  Jenfasizza li l-kwistjoni ta' kumpens ekonomiku għal kwalunkwe falliment jew ħsara, għandha tkun perfettament ċara qabel ikun biss jista' jinbeda x-xogħol;« jirrimarka li ħsara kbira fis-sistema ta' pajpijiet tal-gass tista' twassal għal kumplikazzjonijiet għall-istati li għandhom fruntiera mal-Baħar Baltiku u tkun devastanti għall-ambjent tal-baħar; iqis li n-Nord Stream għandha tieħu r-responsabilità sħiħa għall-kumpens;

27. Jistieden lill-Kummissjoni biex tagħmel analiżi bħal din fi djalogu mal-pajjiżi interessati, l-investitur u l-Kummissjoni ta' Ħelsinki, u bil-parteċipazzjoni ta' NGOs interessati;

28. Jistieden lill-Kummissjoni u lill-Istati Membri biex jagħmlu evalwazzjoni bir-reqqa ta' l-aspetti ekonomiċi, tal-baġit u dawk relatati mat-trasparenza fil-proġett tan-Nord Stream u tal-kumpaniji involuti fih;

29. Jilqa' b'sodisfazzjon id-deċiżjonijiet li ġejjin li ttieħdu mill-awtoritajiet ta' l-Istati Membri:

–  id-deċiżjoni tal-Gvern ta' l-Iżvezja tat-12 ta' Frar 2008 li tiċħad il-permess lill-Nord Stream biex tibni s-sistema ta' pajpijiet tal-gass minħabba nuqqasijiet proċedurali u sustantivi sinifikanti u, b'mod partikulari, in-nuqqas ta' analiżi ta' rotta alternattiva u tal-possibilità li jkun abbandunat il-bini tal-pajp tas-sistema ta' pajpijiet tal-gass;

–  il-pożizzjoni tal-Parlament tal-Litwanja tas-27 ta' Marzu 2007, li tiġbed l-attenzjoni għall-bżonn li tkun sospiża l-implimentazzjoni ta' proġetti infrastrutturali fuq skala kbira fil-Baħar Baltiku sakemm titwettaq analiżi dettaljata ta' soluzzjonijiet alternattivi flimkien ma' evalwazzjonijiet ta' l-impatt ambjentali indipendenti u komprensivi;

–  id-deċiżjoni tal-Gvern ta' l-Estonja tal-21 ta' Settembru 2007 li ma jagħtix permess li jsiru studji taħt il-baħar fiz-zona ekonomika esklussiva ta' l-Estonja, minħabba d-dubji dwar l-ambitu u l-kobor ta' dawn l-istudji;

30. Jiddispjaċih li l-Green Paper 'Lejn Politika Marittima ta' l-Unjoni għall-ġejjieni' ma tindirizzax il-problema ta' proġetti fuq skala kbira bħas-sistemi ta' pajpijiet taħt il-baħar;

31. Jitlob li tkun ikkummissjunata evalwazzjoni ta' l-impatt ambjentali verament indipendenti, bl-approvazzjoni ta' l-istati littorali kollha, u għar-rikonoxximent ta' l-evalwazzjoni ta' l-impatt ambjentali li saret minn Rambøll;

32. Jiddispjaċih li fi strumenti legali u komunikazzjonijiet dwar l-istrateġiji rigward il-baħar li tibda hi, il-Kummissjoni normalment tinjora l-problema ta' sistemi ta' pajpijiet taħt il-baħar, li hija kruċjali mill-perspettivi kemm tal-ħarsien ta' l-ambjent kif ukoll tas-sigurtà ta' l-enerġija ta' l-UE;

33. Jiġbed l-attenzjoni lejn l-importanza li titwettaq strateġija ta' komunikazzjoni trasparenti dwar il-passi li jikkonċernaw ir-riżultati ta' l-evalwazzjoni ta' l-impatt ambjentali, u li dawn ir-riżultati jiġu komunikati b'mod attiv lill-Istati Membri kollha ta' l-UE, speċjalment lill-istati Baltiċi li jmissu mal-baħar;

34. Itenni, għaldaqstant, is-sejħa li għamel fir-riżoluzzjoni tiegħu ta' l-14 ta' Novembru 2006 għall-proposta ta' mekkaniżmu obbligatorju għan-negozjazzjoni bejn l-Istati Membri u l-insistenza tiegħu li l-Kunsill jieħu azzjoni fil-livell internazzjonali biex ikunu żviluppati evalwazzjonijiet ta' l-impatt ambjentali obbligatorji fir-relazzjonijiet bejn l-UE u pajjiżi terzi;

35. Jinnota li l-assenjar ta' rotta għas-sistema tal-pajpijiet tal-gass tat-Tramuntana ta' l-Ewropa għandu jilħaq l-objettivi strateġiċi u ekonomiċi stipulati fid-Deċiżjoni 1364/2006/KE filwaqt li jevita li ssir ħsara ambjentali kbira;

36. Jistieden lill-Kunsill, lill-Kummissjoni u lill-Istati Membri biex jużaw il-mezzi legali kollha għad-dispożizzjoni tagħhom biex jimpedixxu l-bini tas-sistema tal-pajpijiet tal-gass tat-Tramuntana ta' l-Ewropa fid-daqs propost mill-investitur, jekk joħroġ biċ-ċar li hemm riskju ta' diżastru ambjentali fiz-zona tal-Baħar Baltiku;

37. Jistieden, b'mod partikulari, lill-Kummissjoni biex tiżgura l-konformità mad-dispożizzjonijiet tad-dokumenti msemmija hawn fuq, il-Konvenzjoni dwar il-Liġi tal-Baħar, il-Konvenzjoni ta' Ħelsinki, il-Konvenzjoni ta' Espoo, il-Konvenzjoni a' Århus, id-Direttivi 85/337/KEE, 97/11/KE, 92/43/KEE u 79/409/KEE, kif ukoll l-Artikolu 10 tat-Trattat KE u l-prinċipju ta' prekawzjoni u l-prinċipju ta' l-iżvilupp sostenibbli, u biex tibda proċedimenti skond l-Artikolu 226 tat-Trattat KE f'każ ta' nuqqas ta' konformità ma' l-obbligi msemmija hawn fuq;

38. Jistieden lill-Kummissjoni b'mod partikulari biex tieħu azzjoni soda skond il-prinċipju ta' governanza tajba, li jirrikonoxxi li korpi tat-teħid ta' deċiżjonijiet li għandhom setgħa ta' diskrezjoni kbira huma obbligati li jwettqu analiżi f'waqtha tas-sitwazzjoni attwali u, fejn ikun hemm bżonn, jiksbu opinjoni esperta sabiex ikun evitat li tittieħed deċiżjoni arbitrarja;

39. Jistieden lill-Kummissjoni sabiex, fl-ambitu tal-kompetenza tagħha, tevalwa s-sitwazzjoni tal-kompetizzjoni fis-suq riżultat tal-possibilità li titlesta s-sistema ta' pajpijiet tal-gass tan-Nord Stream, u jekk ikun meħtieġ, tieħu miżuri biex timpedixxi lill-Gazprom milli takkwista rwol dominanti fis-suq tal-gass ta' l-UE mingħajr ma tagħti garanzija reċiproka lill-kumpaniji ta' l-UE biex jidħlu fis-suq ta' l-enerġija Russu;

40. Jissuġġerixxi li tkun stabbilita sistema ta' superviżjoni komuni tas-sistema ta' pajpijiet tal-gass, li tinkludi l-pajjiżi kollha tar-reġjun tal-Baħar Baltiku; jissuġġerixxi wkoll li l-obbligu għall-ħlas ta' kumpens għal ħsara ambjentali għandha jkun biss tan-Nord Stream;

41. Jinnota n-nuqqas ta' strutturi istituzzjonali li jkunu jistgħu jirreaġixxu b'mod xieraq għall-kwistjonijiet tas-sigurtà ambjentali u ġeopolitika assoċjati ma' dan il-proġett; jissuġġerixxi, għaldaqstant, li l-Kummissjoni għandha toħloq kariga xierqa bir-responsabilità għall-proġetti attwali u futuri, li tkun taħt l-awtorità tar-Rappreżentant Għoli ta' l-Unjoni għall-Affarijiet Barranin u l-Politika tas-Sigurtà u l-Viċi-President tal-Kummissjoni;

42. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kummissjoni, lill-Kunsill, kif ukoll lill-gvernijiet ta' l-Istati Membri.

• [1]  ĠU L 73, 14.3.1997, p. 5.
• [2]  ĠU L 206, 22.7.1992, p. 7.
• [3]  ĠU L 103, 25.4.1979, p. 1.
• [4]  ĠU C 314 E, 21.12.2006, p. 131.
• [5]  ĠU C 314 E, 21.12.2006, p. 330.
• [6]  ĠU L 262, 22.9.2006, p. 1.
• [7]  Testi adottati, P6_TA(2007)0413.

Is-sena li għaddiet il-Parlament Ewropew irċieva petizzjonijiet appoġġati minn kważi 30 000 ċittadin ta' l-Unjoni Ewropew, l-aktar mill-Istati Baltiċi, li esprimew tħassib dwar il-proġett ta' kostruzzjoni ta' sistema ta' pajpijiet tal-gass mir-Russja sal-Ġermanja li tgħaddi taħt il-Baħar Baltiku. Huma jemmnu li l-proġett joħloq theddida għall-ambjent naturali u jista' jkun kontra l-liġi Ewropea.

B'rispett għan-numru kbir ta' petizzjonanti u l-iskala tal-problema, il-Kumitat għall-Petizzjonijiet, li jeżamina l-petizzjonijiet miċ-ċittadini marbuta ma' l-attivitajiet tal-Komunità f'isem il-Parlament Ewropew, iddeċieda unanimament li jfassal rapport dwar l-impatt tas-sistema ta' pajpijiet ippjanata fuq l-ambjent naturali tal-Baħar Baltiku.

Minħabba n-natura multidimensjonali tal-problema, li, flimkien mal-kwistjoni tal-ħarsien ambjentali, tikkonċerna wkoll is-sigurtà ta' l-enerġija ta' l-Unjoni u kwistjonijiet internazzjonali oħra, żewġ kumitati parlamentari kompetenti (il-Kumitat għall-Affarijiet Barranin u l-Kumitat għall-Industrija, ir-Riċerka u l-Enerġija) taw l-opinjonijiet tagħhom.

Il-livell mingħajr preċedenti ta' interess fil-proġett u l-impatt potenzjalment qawwi tiegħu fuq oqsma fundamentali ta' l-attività ta' l-UE, b'mod partikulari s-saħħa pubblika, il-ħarsien ta' l-ambjent u s-sigurtà ta' l-enerġija, kif ukoll żieda fil-prezzijiet tal-gass li fl-aħħar mill-aħħar taqa' fuq il-konsumaturi, ipprovdew inċentiv għall-eżami fid-dettall tal-problemi marbuta ma' dan il-proġett. B'dan il-għan, il-Parlament Ewropew għamel seduta ta' smigħ pubblika li fiha kienu preżenti u esprimew l-opinjonijiet tagħhom il-partijiet kollha u l-gruppi li jirrappreżentaw interessi.

Wara li eżamina l-fehmiet u l-evalwazzjonijiet varji u wara li sema' lill-parteċipanti fis-seduta ta' smigħ pubbliku, ir-rapporteur tagħkom huwa konvint li l-Unjoni Ewropea għanda tittratta dan il-proġett bl-ikbar kawtela u preokkupazzjoni, ladarba dan huwa ta' theddida diretta għall-ambjent tal-Baħar Baltiku kollu. Il-problema għanda dimensjoni Ewropea ġenwina minħabba li taffettwa serjament tmien pajjiżi ta' l-Unjoni Ewropea, jiġifieri l-Ġermanja, l-Iżvezja, il-Latvja, il-Litwanja, l-Estonja, id-Danimarka u l-Polonja. Ir-rapporteur għalhekk jitlob lill-Kunsill u lill-Kummissjoni biex jużaw il-mezzi legali disponibbli kollha biex jevitaw il-bini tas-sistema ta' pajpijiet tal-gass tat-Tramuntana ta' l-Ewropa fuq l-iskala proposta mill-investituri. Ir-rapporteur tagħkom għalhekk jemmen bis-sħiħ li billi tgħaddi mill-art mit-territorju ta' l-UE, is-sistema ta' pajpijiet tal-gass tat-Tramuntana ta' l-Ewropa tippermetti li jintlaħqu l-objettivi strateġiċi u ekonomiċi stipulati fid-Deċiżjoni 1364/2006/KE, waqt li fl-istess ħin tkun evitata theddida serja għall-ambjent u żieda fil-prezzijiet li jkunu jridu jagħmlu tajjeb għaliha l-konsumaturi.

Ir-rapporteur huwa serjament imħasseb mill-fatt li fix-xhur li għaddew, prattikament fil-pajjiżi Baltiċi kollha, aġenziji esperti, korpi governattivi responsabbli mill-ambjent u rappreżentanti ta' assoċjazzjonijiet ambjentali eżaminaw l-elementi fundamentali tal-proġett u kkonkludew li dan jippreżenta theddidiet serji għall-ambjent, li jinkludu:

1. Ħsara liz-zoni tan-Natura 2000;

2. Il-periklu li jkunu ddisturbati depożiti ta' armi kimiċi Ġermaniżi mit-Tieni Gwerra Dinjia, mini, bombi li ma splodewx u bastimenti mgħarrqa, b'mod partikulari fil-Golf tal-Finlandja u f'zoni tul ir-rotta ppjanata għas-sistema ta' pajpijiet;

3. Id-daqs mingħajr preċedenti taz-zona ta' kostruzzjoni (2400 km² - l-istess daqs tal-Gran Dukat tal-Lussemburgu), f'baħar bħalma hu l-Baltiku, li huwa relattivament żgħir u magħluq;

4. It-theddida ta' tniġġis fuq skala kbira mill-ħruġ fil-Baħar Baltiku ta' eluf ta' tunnellati ta' kimiċi (aldeidi) meħtieġa għat-tindif tal-pajpijiet qabel dawn jibdew jintużaw.

Ir-riskji ambjentali deskritti fid-dettall mill-varji esperti fis-seduta ta' smigħ pubblika huma kkonfermati mill-opinjonijiet u l-perspettivi ta' organizzazzjonijiet oħra li tkellmu mal-Membri tal-Parlament, inkluża l-fergħa nordika tal-Greenpeace, li bagħtet dikjarazzjoni li fiha tesprimi t-tħassib tagħha dwar u l-oppożizzjoni tagħha għall-proġett tas-sistema ta' pajpijiet tal-gass tan-Nord Stream u l-appoġġ tagħha għall-għażla ta' sistema ta' pajpijiet li tgħaddi fuq l-art.

Ir-rapporteur tagħkom ma jistax jaċċetta l-fehma li proġett li jaffettwa qiegħ il-baħar Baltiku huwa kwistjoni bilaterali bejn il-Ġermanja u r-Russja. Il-ħarsien ta' l-ambjent tal-Baħar Baltiku huwa wieħed mill-aktar ħidmiet importanti li jridu jkunu ffaċċjati fi ħdan l-hekk imsejħa dimensjoni tat-Tramuntana ta' l-UE, u hija kwistjoni li kienet indirizzata f'serje ta' riżoluzzjonijiet u strumenti legali tal-Komunità li jittrattaw din il-kwistjoni.

F'dan ir-rigward, l-Unjoni Ewropea għandha d-dover li tiddedika kura speċjali għall-ambjent tal-Baħar Baltiku, mingħajr ma tinsa l-bżonn tas-solidarjetà, tas-sigurtà ta' l-enerġija u tal-ħarsien tal-konsumatur. Kien hemm każijiet fejn l-istituzzjonijiet Ewropej irreaġixxew b'mod sod għall-proġetti bejn l-istati b'effetti dubbjużi fuq l-ambjent fejn dawn fl-aħħar mill-aħħar kienu jaffettwaw biss stat wieħed. Huwa diffiċli li wieħed jimmaġina li l-istituzzjonijiet Ewropej mhux se jagħtu piż lill-każ li fil-prattika jaffettwa terz ta' l-Istati Membri ta' l-Unjoni u l-uniku baħar magħluq tagħha.

Għandu jkun enfasizzat li l-investituri ma taw l-ebda każ tal-bżonn li l-ewwelnett ikunu eżaminati rotot alternattivi għas-sistema ta' pajpijiet tal-gass li ma jagħmlux ħsara lill-ambjent tal-baħar, u dan meta teżisti l-possibilità ta' rotta ta' l-art mill-fruntiera tar-Russja u li tgħaddi biss minn pajjiżi ta' l-Unjoni Ewropea. F'dan ir-rigward, ir-rapporteur tagħkom iħeġġeġ lill-Kummissjoni biex tagħmel tali analiżi, bħala parti mid-djalogu mal-pajjiżi kkonċernati, l-investituri u l-Kummissjoni ta' Ħelsinki u bil-parteċipazzjoni ta' NGOs interessati.

Ir-rapporteur tagħkom jappoġġa d-deċiżjoni tat-12 ta' Frar 2008 mill-Gvern tar-Renju ta' l-Iżvezja li tiċħad il-permess lill-kumpanija Nord Stream biex tibni s-sistema ta' pajpijiet minħabba nuqqasijiet sustantivi u proċedurali sinifikanti u, b'mod partikulari, in-nuqqas li tippreżenta kwalunkwe studju dwar rotot alternattivi jew il-possibilità li jkun abbandunat għal kollox il-bini tal-pajp tas-sistema ta' pajpijiet.

Ir-rapporteur tagħkom jappoġġa wkoll il-pożizzjoni adottata mill-Parlament tar-Repubblika tal-Litwanja fis-27 ta' Marzu 2007, li tiġbed l-attenzjoni għall-bżonn li jkunu sospiżi proġetti infrastrutturali fuq skala kbira fil-Baltiku sakemm studji dettaljati ta' għażliet alternattivi jkunu saru flimkien ma' evalwazzjonijiet ta' l-impatt ambjentali indipendenti u komprensivi.

Ir-rapporteur jinnota wkoll id-deċiżjoni tal-21 ta' Settembru 2007 mill-Gvern ta' l-Estonja li tirrifjuta l-permess lin-Nord Stream biex twettaq studji taħt l-ilma fiz-zona ekonomika esklussiva tagħha.

Ir-rapporteur jixtieq ukoll jiġbed l-attenzjoni għall-problema tal-ħlas ta' l-ispiża tal-ħsara ikkawżata tul il-kostruzzjoni u l-użu tas-sistema ta' pajpijiet tal-gass u l-ispiża biex din tiżżarma fi tmiem il-perjodu operattiv tagħha.

Barra mill-kunsiderazzjoni ta' kwistjonijiet ambjentali, hemm bżonn li nqisu wkoll l-opinjonijiet ta' l-esperti ewlenin u l-midja Ewropea, li tkellmu dwar żieda fl-ispiża għall-investiment li tista' titla' sa 20 biljun euro u jantiċipaw dewmien konsiderevoli fl-iskeda tal-bini ikkawżati mill-ħtieġa għal studji estensivi u konsultazzjonijiet fil-livell politiku u dak soċjali. Fl-opinjoni tagħhom, anke jekk il-proġett jitlesta f'numru ta' snin, wara li jkunu ttieħdu miżuri ta' sigurtà eċċezzjonali u tħallas kumpens għall-ħsara f'zoni protetti tan-Natura 2000, l-ispiża enormi żgur se taffettwa l-prezzijiet tal-gass Ewropej, u b'mod partikulari lill-konsumaturi Ġermaniżi u lill-kumpaniji li jibnu s-sistema ta' pajpijiet tal-gass. Dawn l-esperti jemmnu li l-ispiża involuta se tkun ħafna ikbar mill-ispiża li kieku ssir għall-alternattiva ta' pajp fl-art.

għall-Kumitat għall-Petizzjonijiet

dwar l-impatt ambjentali tas-sistema ta' pajpijiet tal-gass li hi ppjanata li ssir fil-Baħar Baltiku biex tgħaqqad flimkien lir-Russja u lill-Ġermanja
(2007/2118(INI))

Rapporteur għal opinjoni: Christopher Beazley

SUĠĠERIMENTI

Il-Kumitat għall-Affarijiet Barranin jistieden lill-Kumitat għall-Petizzjonijiet, bħala l-kumitat responsabbli, sabiex jinkorpora s-suġġerimenti li ġejjin fil-mozzjoni għal riżoluzzjoni li se jadotta:

1.   Itenni l-opinjoni tiegħu li, filwaqt li tiġi kkunsidrata d-dipendenza dejjem tikber ta' l-UE fuq numru limitat ta' sorsi, fornituri u rotot ta' trasport ta' enerġija, huwa essenzjali li jiġu appoġġjati inizjattivi mmirati lejn id-diversifikazzjoni tagħhom, kemm ġeografikament u kif ukoll billi jiġu żviluppati alternattivi sostenibbli; jiġbed l-attenzjoni b'mod partikolari dwar il-bżonn li jiġi appoġġjat l-iżvilupp ta' l-infrastruttura tal-portijiet li hi użata fl-immaniġġjar tal-fjuwils;

2. Jenfasizza l-fatt li s-sigurtà ta' l-enerġija trid titqies bħala komponent essenzjali tas-sigurtà ġenerali ta' l-Unjoni Ewropea, b'mod li d-definizzjoni tas-sigurtà ta' l-enerġija m'għandhiex tkunx sempliċement limitata għan-nuqqas ta' produzzjoni interna fl-UE iżda għandha tqis ukoll l-aspetti ġeopolitiċi tad-dipendenza fuq l-importazzjonijiet;

3.   Jenfasizza l-bżonn ta' djalogu msaħħaħ ma' pajjiżi ewlenin ta' produzzjoni, ta' tranżitu u ta' konsum; jirrikonoxxi l-fatt li s-solidarjetà Ewropea fil-qasam ta' l-enerġija tiddependi b'mod kritiku kemm fuq ftehimiet trasparenti u li jistgħu jiġu infurzati reċiprokament mal-pajjiżi produtturi u kif ukoll fuq l-eżistenza ta' suq ta' l-enerġija intern li jaħdem, u anke fuq infrastruttura ta' l-enerġija li tagħmel interkonnessjonijiet;

4.         Jikkunsidra li l-aspetti tas-solidarjetà fil-qasam ta' l-enerġija fl-Unjoni Ewropea għandhom jitqiesu mill-Istati Membri kollha fid-deċiżjonijiet tagħhom dwar proġetti għall-infrastruttura ta' l-enerġija; jiddispjaċih dwar in-nuqqas ta' progress lejn politika ta' l-enerġija komuni Ewropea u jinsab imħasseb dwar il-ftehimiet bilaterali ta' diversi Stati Membri, li jdgħajfu l-kapaċità ta' l-Unjoni Ewropea li tinnegozja b'leħen wieħed mal-pajjiżi fornituri ewlenin; jistieden għal darba oħra lill-Istati Membri biex iżommu lill-Kummissjoni u lil xulxin infurmati qabel ma jittieħdu deċiżjonijiet strateġiċi dwar ftehimiet bilaterali ewlenin dwar proġetti ta' l-enerġija, li jistgħu jeffettwaw l-interessi ta' Stati Membri oħrajn u l-UE kollha kemm hi, kif għandu jsir fir-rigward tal-kwistjonijiet kollha ta' politika barranija li huma ta' interess komuni;

5.   Huwa tal-fehma li n-Nord Stream huwa proġett infrastrutturali b'dimensjoni politika u strateġika wiesgħa kemm għall-UE u kif ukoll għar-Russja; jifhem it-tħassib espress mill-Istati Membri ta' l-UE fir-rigward tal-kostruzzjoni u l-manutenzjoni tas-sistema tal-pajpijiet tal-gass; jenfasizza li l-abilità ta' stati żgħar li jmissu mal-Baħar Baltiku li jkollhom rwol ta' sigurtà fir-reġjun ta' dan il-baħar ma tistax titqies b'mod iżolat mill-abilità ta' l-UE li taġixxi bħala entità magħquda u li titkellem b'vuċi waħda dwar il-kwistjonijiet ta' l-enerġija u jfakkar fir-riżoluzzjoni tiegħu tas-26 ta' Settembru 2007 dwar politika barranija Ewropea komuni għall-enerġija[1]; jenfasizza li l-proġett ġie ddikjarat bħala proġett ta' interess Ewropew fl-aħħar linji gwida dwar in-Netwerks Trans-Ewropej ta' l-Enerġija (TENE-E), adottati f'Settembru 2006, u li għandu jiġi ppjanat fl-ispirtu tal-politika barranija Ewropea komuni għall-enerġija;

6.   Jenfasizza l-importanza ta' evalwazzjoni bir-reqqa, indipendenti u oġġettiva ta' l-impatt ambjentali ta' Nord Stream, b'mod partikolari meta wieħed iqis il-fraġilità tal-qiegħ tal-Baħar Baltiku; hu tal-fehma li l-aspetti kollha rilevanti ta' l-ambjent u s-sikurezza għandhom jitqiesu b'mod sħiħ fit-tħejjija, fil-bini u fil-fażijiet operattivi ta' kwalunkwe sistema ta' pajpijiet tal-gass fil-Baħar Baltiku; jenfasizza li valutazzjoni finali ta' l-effetti ambjentali ta' Nord Stream tista' ssir biss wara t-tlestija ta' l-evalwazzjoni ta' l-impatt;

7.   Itenni l-importanza tas-sħubija ta' l-UE mar-Russja fil-qasam ta' l-enerġija u, għal darb'oħra, jiġbed l-attenzjoni għall-fatt li din is-sħubija strateġika tista' tkun ibbażata biss fuq il-prinċipju li ma jkunx hemm diskriminazzjoni u jkun hemm trattament ġust u fuq kundizzjonijiet indaqs għall-aċċess għas-suq; jistieden lill-Kunsill u lill-Kummissjoni biex jindirizzaw il-kwistjonijiet ambjentali u t-tħassib fir-rigward tas-sigurtà ta' l-enerġija fil-qafas tad-djalogu dwar l-enerġija li l-UE għandha mar-Russja, u jemmen li dan id-djalogu għandu jissaħħaħ fuq il-bażi tal-prinċipji li jinsabu fit-Trattat tal-Karta ta' l-Enerġija; ifakkar fl-opinjoni tiegħu li l-prinċipji u s-sustanza tat-Trattat tal-Karta ta' l-Enerġija u l-Protokoll tiegħu dwar it-Tranżitu jridu jkunu inklużi fi ftehimiet ta' koperazzjoni ma' pajjiżi terzi, inkluża l-Ftehima l-ġdida ta' Sħubija u Koperazzjoni mar-Russja, filwaqt li jenfasizza l-importanza li r-Russja tirratifika t-Trattat tal-Karta ta' l-Enerġija u l-Protokoll tiegħu dwar it-Tranżitu, minħabba li tali ratifikazzjoni se tnaqqas il-potenzjal għall-kunflitt fir-rigward ta' proġetti bħal Nord Stream;

8.   Jinnota li l-proġett Nord Stream, jekk ikun implimentat, jista' jikkawża diżastru ambjentali minħabba sediment industrijali estremament tossiku mormi, b'mod partikolari, fil-Golf tal-Finlandja, u anke minħabba volum sinifikanti ta' armi kimiċi ta' wara t-Tieni Gwerra Dinjija mxerrda f'imkejjen oħra tul il-qiegħ tal-Baħar Baltiku, jekk dawn ikunu affettwati mix-xogħol tal-bini, u jekk tiġi kkunsidrata wkoll iż-żieda probabbli fit-trasportazzjoni ta' prodotti ta' enerġija likwida fil-Baħar Baltiku; jistieden lil Nord Stream biex tieħu r-responsabilità finanzjarja li tagħti kumpens għal kwalunkwe ħsara li tista' ssir;

9.   Jiddispjaċih dwar l-irwol marġinali ta' l-UE f'dan il-proġett, b'mod partikolari dak tal-Kummissjoni; jirrimarka li kieku l-UE tkun involuta b'mod akbar, titnaqqas l-inċertezza li tinħass minn ħafna Stati Membri dwar il-proġett Nord Stream;

10. Għaldaqstant jitlob lill-Kummissjoni u lill-Istati Membri biex:

–    jevalwaw, fir-rigward tal-proġett Nord Stream, l-aspetti varji tat-trasparenza, l-aspetti ekonomiċi, regolatorji, legali u dawk relatati mal-baġit;

–    jagħmlu studju dwar il-kontribuzzjoni ta' Nord Stream għall-ħtiġijiet ta' l-enerġija ta' l-Ewropa inkluża l-kunsiderazzjoni ta' l-alternattivi kollha;

–    li jiżguraw li Nord Stream u l-kumpaniji affiljati tagħha jinvolvu ruħhom fi djalogu miftuħ u trasparenti u jikkoperaw mill-qrib mal-partijiet kollha kkonċernati dwar l-aspetti kollha matul l-istadji kollha qabel u wara l-bini tas-sistema ta' pajpijiet tal-gass Nord Stream;

–    jiżguraw li l-interessi ta' l-istati kollha li jmissu mal-Baħar Baltiku jiġu kkunsidrati b'mod xieraq fl-evalwazzjoni indipendenti ta' l-impatt ambjentali;

–    itennu s-sejħa tiegħu għar-ratifikazzjoni tal-Konvenzjoni ta' Espoo u tat-Trattat tal-Karta ta' l-Enerġija, inkluż il-Protokoll tiegħu dwar it-Tranżitu, u kif ukoll l-impenn għall-implimentazzjoni sħiħa tad-dispożizzjonijiet tagħhom, min-naħa tar-Russja;

11. Jitlob lill-Istati Membri u lill-Kummissjoni biex jiżguraw li jitwettqu evalwazzjonijiet kompleti u indipendenti ta' l-impatt ambjentali qabel ma jittieħdu deċiżjonijiet fuq l-investimenti ewlenin kollha ta' l-infrastruttura, inklużi proġetti ta' sistemi ta' pajpijiet tal-gass fil-baħar u fuq l-art; jesprimi l-konvinzjoni tiegħu li d-dibattitu attwali dwar il-ħtieġa ta' standards ambjentali aħjar għall-implimentazzjoni tas-sistema ta' pajpijiet tal-gass Nord Stream se jgħinu biex jiġu stabbiliti standards xierqa għal impriżi futuri; f'dan ir-rigward, jilqa' b'sodisfazzjon id-deċiżjoni reċenti ta' Nord Stream li tikkummissjona studju mill-Finlandja u l-Iżvezja dwar ir-riskji ambjentali li għandu l-munizzjon mormi f'qiegħ il-Baħar Baltiku wara t-Tieni Gwerra Dinjija, li fih sustanzi estremament tossiċi;

12. Jissuġġerixxi l-ħolqien ta' superviżjoni komuni tas-sistema ta' pajpijiet tal-gass li tinkludi l-pajjiżi kollha tar-reġjun tal-Baħar Baltiku; barra minn hekk, jikkunsidra li huwa essenzjali għall-Kummissjoni li tagħti attenzjoni mill-qrib lill-iskrutinju ta' l-aspett ambjentali tal-bini propost ta' sistema ta' pajpijiet tal-gass, billi tuża l-istrumenti legali kollha eżistenti li l-Kummissjoni għandha għad-dispożizzjoni tagħha, u, fuq talba ta' Stat Membru, permezz ta' l-involviment dirett ta' HELCOM (il-Kummissjoni Helsinki), u b'koperazzjoni mill-qrib magħha;

13.   Jinnota n-nuqqas ta' strutturi istituzzjonali xierqa li jkunu jistgħu jirreaġixxu b'mod adegwat għall-kwistjonijiet tas-sigurtà ambjentali u ġeopolitika li huma assoċjati ma' l-iżvilupp ta' infrastruttura ta' l-enerġija esterna, u għal darba oħra jistieden lill-Kunsill biex jikkunsidra l-proposta għall-ħolqien tal-kariga ta' Uffiċjal Għoli għall-Politika Barranija ta' l-Enerġija li, filwaqt li jkollu żewġ irwoli, jaġixxi taħt l-awtorità tar-Rappreżentant Għoli ta' l-Unjoni għall-Affarijiet Barranin u l-Politika tas-Sigurtà li għadu kif ġie maħluq u msaħħaħ, u li hu Viċi-President tal-Kummissjoni.

14. Jesprimi l-appoġġ qawwi tiegħu għall-tielet pakkett ta' liberalizzazzjoni ta' l-enerġija, inkluża l-klawsola dwar il-pajjiż terz, għaliex suq Ewropew ta' l-enerġija vibranti u liberalizzat biss, attrezzat bl-għodda meħtieġa biex jikkontrobatti mġiba monopolista, jista' jiggarantixxi s-sigurtà tal-provvista ta' l-enerġija;

15. Jesprimi t-tħassib tiegħu dwar proposti biex is-sistemi ta' pajpijiet tal-gass li huma ppjanati jiġu assigurati permezz ta' mezzi militari.

RIŻULTAT TAL-VOTAZZJONI FINALI FIL-KUMITAT

• [1]  Testi adottati, P6_TA(2007)0413.

għall-Kumitat għall-Petizzjonijiet

dwar l-impatt Ambjentali tal-pipeline tal-gass ippjanat fil-Baħar Baltiku biex jgħaqqad ir-Russja mal-Ġermanja
(207/2118(INI))

Rapporteur għal opinjoni: Andres Tarand

SUĠĠERIMENTI

Il-Kumitat għall-Industrija, ir-Riċerka u l-Enerġija jistieden lill-Kumitat għall-Petizzjonijiet, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Ifakkar fit-tnaqqis tal-produzzjoni tal-gass fl-UE u ż-żieda korrispondenti fit-talba ta’ importazzjonijiet ta’ gass tul is-snin li ġejjin kemm biex jintlaħqu l-ħtiġijiet tad-djar u dawk industrijali kif ukoll biex ikunu sostitwiti fjuwils fossili li jagħmlu ħsara lill-ambjent; iqis li hu meħtieġ li jiġi studjat l-impatt fit-tul li jsir fuq l-ambjent mill-infrastruttura tal-gass ġdid, fir-rigward tal-garanziji ta' provvista tal-gass stabbli;

2.  Ifakkar fil-Konklużjonijiet tal-Presidenza tal-Kunsill Ewropew tat-8 u d-9 ta’ Marzu 2007 li jaffermaw il-Pjan ta’ Azzjoni tal-Kunsill Ewropew (2007-2009) biex jintlaħqu l-objettivi tal-Politika ta’ l-Enerġija għall-Ewropa, fuq il-bażi tas-solidarjetà u d-diversifikazzjoni tal-provvista, biex tiġi ttrattata d-dipendenza dejjem akbar li għandha l-UE fuq il-provvista ta’ l-enerġija;

3.  Jiddispjaċih li, peress li t-taħlita ta’ l-enerġija taqa’ fil-kompetenza ta’ l-Istati Membri, xi wħud mid-deċiżjonijiet strateġiċi nazzjonali rigward ftehimiet bilaterali maġġuri ma’ pajjiżi terzi qed idgħajfu l-iżvilupp ta’ politika komuni ta’ l-enerġija li tkun waħda kredibbli, effettiva u konsistenti;

4.  Jistieden lill-Istati Membri biex jistabbilixxu b’mod trasparenti strateġija koordinata meta tkun żgurata provvista ta’ enerġija; jinnota d-Deċiżjoni Nru 1364/2006/KE tal-Parlament Ewropew u tal-Kunsill tas-6 ta’ Settembru 2006 li tistabbilixxi linjigwida għan-netwerks ta’ enerġija trans-Ewropej immirati lejn id-diversifikar ġeografiku ta’ rotot ta’ trasport għal u fornituri ta’ importazzjonijiet ta’ enerġija; ifakkar, f’dan il-kuntest, li l-pipeline Nord Stream huwa wieħed biss minn bosta rotot ta’ provvista tal-gass inklużi f’netwerks ta’ enerġija trans-Ewropej;

5.  Ifakkar li l-Baħar Baltiku ġie identifikat bħala ‘zona ta’ baħar partikolarment sensittiva’ mill-Organizzazzjoni Marittima Internazzjonali u li, minħabba l-ilmijiet relattivament baxxi u rata ta’ livell baxx ta’ sostituzzjoni ta’ l-ilma tal-Baħar Baltiku, l-ekosistemi tiegħu huma estremament vulnerabbli għall-inqas ċaqlieq u l-inqas tniġġis; għalhekk jirrakkomanda li tittieħed l-akbar kawtela possibbli meta jkun qed jiġi kkunsidrat il-proġett tal-pipeline tal-gass tan-Nord Stream;

6.  Ifakkar li, minkejja t-tqegħid ta’ pipelines sottomarini fil-qasma kontinentali huwa bi qbil mal-libertajiet ta’ l-ibħra miftuħa, l-Artikolu 79 tal-konvenzjoni tan-NU ta’ l-1982 dwar il-liġi tal-baħar jipprovdi li ‘ d-deskrizzjoni tal-proċess tat-tqegħid ta’ pipelines bħal dawn fil-qasma kontinentali hija suġġetta għall-kunsens ta’ l-Istat kostali’;

7.  Jistieden lill-Nord Stream AG, l-iżviluppatur tal-pipeline, biex jiġġustifika l-għażla tar-rotta attwali u janalizza bir-reqqa rotot alternattivi, inklużi rotot fl-art ‘il ġewwa, għall-pipeline bejn ir-Russja u l-Ġermanja; jistieden biex l-istudji integrati ambjentali, ekonomiċi u tekniċi jkunu annessi ma' l-analiżi ta' impatt ambjentali (EIA) li qed titwettaq;

8.  Jistieden lill-Nord Stream AG biex twettaq analiżi ta’ l-effetti negattivi potenzjali kumulattivi ta’ kemm it-tqegħid tal-pajp kif ukoll tal-fażijiet operattivi bħala parti mill-EIA aktar wiesgħa u biex tinkorpora fl-EIA analiżi ta' l-effetti potenzjali tal-proġett tal-pipeline tal-gass Nord Stream f'Zoni Protetti tal-Baħar Baltiku u siti ta' Natura 2000;

9.  Jistieden lill-Nord Stream AG biex tippubblika l-miżuri għal tnaqqis ta’ l-effetti negattivi fuq l-ambjent, jekk jitwettaq dan il-proġett; iħeġġeġ lill-Nord Stream AG biex tistabbilixxi l-pipeline fl-aktar żmien xieraq u biex tevita l-użu waqt l-istallazzjoni u manutenzjoni tal-pipeline ta’ glutaraldehyde ta’ ħsara potenzjali biex timminimizza l-effetti negattivi fuq ekosistemi;

10.  Iqis kemm il-vapuri tal-gwerra mgħerqa u l-armi kimiċi mormija matul is-snin erbgħin fil-qiegħ tal-Baħar Baltiku huma theddida possibbli għat-tqegħid b'suċċess tal-pipeline tal-gass u għalhekk jistieden lill-Nord Stream AG biex tfassal inventorju, biex jitqassam ma' l-awtoritajiet nazzjonali relevanti, tal-vapuri mgħerqa kollha u ta’ sustanzi splussivi jew kimiċi li jinsabu fi prossimità tar-rotta ta’ pipeline proposta, bħaż-żewġ “ċimiterji ta’ vapuri” ta’ bastimenti mgħerqa bl-armi tagħhom f'Awissu 1941 qrib il-gżira Hogland u nofs triq bejn Helsinki u l-Park Nazzjonali Lahemaa ta' l-Estonja; l-inventorju għandu jinkludi wkoll analiżi tar-riskji li jippreżentaw dawn il-vapuri mgħerqa u sustanzi;

11.  Iqis li t-tniġġis ikkawżat mill-attivitajiet tal-bażijiet militari Russi jista’ jkollu konsegwenzi ekoloġiċi ladarba l-proġett tan-Nord Stream ikun twettaq, u għalhekk jitlob li dan l-aspett ukoll jiġi evalwat;

12.  Jistieden lill-istati involuti direttament fil-proġett tal-pipline tal-gass Nord Stream biex jiċċaraw qabel tingħata l-awtorizzazzjoni finali għall-kostruzzjoni tal-pipeline, fejn tinsab ir-responsabilità legali għall-konsegwenzi possibbli ta’ inċidenti fl-ekoloġija tal-Baħar Baltiku u l-kosti, ċittadini tal-post u ekonomiji ta’ stati tal-Baħar Baltiku, anke meta bastimenti fiz-zoni ta’ navigazzjoni dojoq tal-Golf tal-Fillandja u tal-Baltiku proprju jikkawżaw ħsara lill-pipeline waqt għarqa.

13.  Ifakkar fit-terremoti reċenti bħal dak ta’ l-2004 fir-reġjun tal-Kaliningrad, u jistieden lill-iżviluppatur tal-proġett biex iressaq studji relevanti kif mitluba mill-EIA;

14.  Jagħraf li n-Nord Stream AG qed twettaq proċess fis-seħħ ta’ l-EIA, u għalhekk iħeġġeġ lill-kumpanija biex ir-riżultati ta’ studji u s-sett sħiħ ta’ dejta ta’ riċerka rigward is-sitwazzjoni ekoloġika tas-sit proġettat, miġbura waqt investigazzjonijiet ambjentali, ikunu disponibbli lill-HELCOM u lill-istati interessati kollha;

15.  Iħeġġeġ lill-Kummissjoni biex fir-rapport tagħha ta’ implimentazzjoni li jmiss rigward id-Deċiżjoni 1364/2006/KE tevalwa l-progress li jkun sar u biex tidentifika b'mod ċar kull ksur possibbli tal-liġi Komunitarja li jista' jkun kommess min-Nord Stream AG;

16.  Jistieden lill-Kummissjoni Ewropea biex tevalwa l-EIA tal-pipeline tal-gass immexxi mill-kumpanija Nord Stream, il-konformità tiegħu mal-leġiżlazzjoni ambjentali ta’ l-UE u l-eżattezza tiegħu, kemm hu komplet u kemm hu oġġettiv;

17.  Jistieden lill-Kummissjoni bħala firmatarja tal-HELCOM biex tfittex li timplimenta r-rakkomandazzjoni tal-HELCOM biex jiġu stabbiliti r-rekwiżiti standard rigward l-iskop ta' l-investigazzjonijiet meħtieġa għall-proċeduri ta' approvazzjoni għall-kejbils u għall-pipelines ta' taħt il-baħar fil-Baħar Baltiku;

18.  Filwaqt li jqis it-tielet pakkett leġiżlattiv dwar is-suq intern tal-gass, jistieden lin-Nord Stream AG biex tibqa’ żżomm aċċess faċli għall-pipeline tal-gass tan-Nord Stream għall-Istati Membri ġirien jekk ikunu jixtiequ li jkunu konnessi b'mod dirett mal-pipeline permezz ta' friegħi li joħorġu minnha.

RIŻULTAT TAL-VOTAZZJONI FINALI FIL-KUMITAT