RAKKOMANDAZZJONI dwar l-abbozz ta’ deċiżjoni tal-Kunsill dwar il-konklużjoni tal-Ftehim bejn l-Unjoni Ewropea u l-Ġappun dwar l-assistenza legali reċiproka f’materji kriminali

dwar l-abbozz ta’ deċiżjoni tal-Kunsill dwar il-konklużjoni tal-Ftehim bejn l-Unjoni Ewropea u l-Ġappun dwar l-assistenza legali reċiproka f’materji kriminali

(05308/2010 – C7‑0029/2010 – 2009/0188(NLE))

(Proċedura ta’ approvazzjoni)

Il-Parlament Ewropew,

–   wara li kkunsidra l-abbozz ta’ ftehim bejn l-Unjoni Ewropea u l-Ġappun dwar l-assistenza legali reċiproka f’materji kriminali (15915/2009),

–   wara li kkunsidra l-abbozz ta’ deċiżjoni tal-Kunsill (05308/2010),– wara li kkunsidra l-Artikolu 82(1), it-tieni subparagrafu, punt (d) u l-Artikoli 218(6) it-tieni subparagrafu, punt (a), tat-Trattat dwar il-Funzjonament tal-Unjoni Ewropea,

–   wara li kkunsidra l-Artikoli 81 u 90(8) tar-Regoli ta' Proċedura tiegħu,

–   wara li kkunsidra r-rakkomandazzjoni tal-Kumitat għal-Libertajiet Ċivili, il-Ġustizzja u l-Intern (A7-0209/2010),

1.  Jagħti l-approvazzjoni tiegħu għall-konklużjoni tal-ftehim;

2.  Jagħti istruzzjonijiet lill-President tiegħu biex jgħaddi l-pożizzjoni tal-Parlament lill-Kunsill, lill-Kummissjoni u lill-gvernijiet u l-parlamenti tal-Istati Membri u tal-Ġappun.

1. Il-kuntest tal-Ftehim.

Il-globalizzazzjoni li tikkaratterizza l-mument storiku li għaddejjin minnu qed tidher fis-setturi kollha tal-ħajja ta' kuljum, inkluż f'dak tal-kriminalità.

L-istatistiċi dwar il-proċeduri ta’ kooperazzjoni legali f’materji kriminali bejn l-Istati Membri individwali u l-Ġappun juru li minkejja n-nuqqas ta’ qafas legali, l-awtoritajiet legali Ewropej u Ġappuniżi jeħtiġilhom jikkooperaw flimkien.

Fi Frar 2009, b’kunsiderazzjoni tan-nuqqas ta’ trattati bilaterali bejn l-Istati Membri tal-Unjoni Ewropea u l-Ġappun u konxju mill-benefiċċji ta' qafas legali armonizzat u koerenti, il-Kunsill awtorizza l-ftuħ tan-negozjati għall-konklużjoni ta' Ftehim dwar l-assistenza legali f’materji kriminali bejn l-Unjoni Ewropea u l-Ġappun.

Il-Kunsill awtorizza l-iffirmar ta' dan il-Ftehim b'Deċiżjoni tat-30 ta' Novembru 2009, fuq il-bażi tal-Artikoli 24 u 38 tat-Trattat dwar l-Unjoni Ewropea. Wara d-dħul fis-seħħ tat-Trattat ta’ Lisbona, il-Parlament intalab jagħti l-approvazzjoni tiegħu kif stipulat fl-Artikolu 218 tat-Trattat dwar il-Funzjonament tal-Unjoni Ewropea.

2. L-ambitu tal-Ftehim.

Il-Ftehim issawwar skont ftehimiet ta’ kooperazzjoni legali oħrajn konklużi fil-passat u li ttrattaw, b’mod partikolari, il-kooperazzjoni fit-twettiq tal-inkjesti u l-ksib tal-provi, kif ukoll attivitajiet oħra bħan-notifika tal-komunikazzjonijiet fil-pajjiż rikjest.

Fost id-dispożizzjonijiet l-aktar importanti tal-ftehim hemm il-ġbir ta’ xhieda jew dikjarazzjonijiet, kif ukoll il-possibilità tal-użu tal-vidjokonferenza għal seduti ta' smigħ; il-ġbir ta’ reġistrazzjonijiet, dokumenti jew rendikonti bankarji jew ukoll is-sejbien jew l-identifikazzjoni ta' persuni, u t-turija ta' provi li jinsabu f’idejn l-awtoritajiet leġiżlattivi, amministrattivi jew ġudizzjarji tal-Istat Membru rikjest jew l-awtoritajiet lokali tiegħu.

Il-Ftehim jistipula wkoll il-proċeduri għan-notifka ta’ dokumenti u informazzjoni li jikkonċernaw it-taħrik fl-Istat rikjedenti u t-trasferiment temporanju ta’ persuna miżmuma għal raġunijiet ta’ depożizzjoni jew għal finijiet probatorji oħrajn.

Hemm ukoll dispożizzjonijiet partikolari li jittrattaw l-assistenza fi proċedimenti dwar l-iffriżar jew is-sekwestru u l-konfiska ta' rikavati jew mezzi strumentali.

Fl-aħħar nett, klawżola finali tippermetti lill-partijiet kollha jipprovdu lil xulxin kull tip ta’ assistenza permessa mil-leġiżlazzjoni tal-Istat rikjest u maqbula bejn Stat Membru u l-Ġappun.

L-assistenza legali tista’ tingħata permezz ta’ talba formali jew inkella permezz ta’ skambju ta’ informazzjoni spontanju. F’dan il-każ, jistgħu jiddaħħlu restrizzjonijiet għall-użu tal-informazzjoni trażmessa.

It-talba għal assistenza legali għandha sseħħ b'konformità mal-leġiżlazzjoni tal-Istat rikjest, għalkemm jistgħu jinqablu proċeduri speċifiċi. F’każ li l-eżekuzzjoni tat-talba joħloq problema prattika fl-Istat rikjest, hu previst li dan tal-aħħar ikun jista' jikkonsulta l-Istat rikjedenti biex tinstab soluzzjoni għal din il-kwistjoni. Fl-istess ħin jekk l-eżekuzzjoni ta’ talba tiddisturba xi proċedura nazzjonali, l-Istat rikjest ikun jista' jirrinvija l-eżekuzzjoni tagħha.

Rigward ir-raġunijiet ta’ rifjut, minbarra r-raġunijiet “klassiċi” ta’ rifjut, bħal reati politiċi, il-prinċipju ne bis in idem, il-manipulazzjoni ta’ talbiet għal finijiet diskriminatorji u talbiet li x’aktarx joħolqu preġudizzju għas-sovranità, is-sikurezza, l-ordni pubbliku jew l-interessi essenzjali tal-Istat rikjest, tajjeb li tiġi enfasizzata r-rilevanza tad-dispożizzjoni għall-protezzjoni tal-Istati Membri bl-użu possibbli tal-Ftehim f’każ ta’ proċedimenti għal atti kriminali li jistgħu jkunu sanzjonati bil-piena kapitali.

B’mod partikolari, bi qbil mal-pożizzjoni kemm-il darba dikjarata tal-Unjoni Ewropea li titlob l-abolizzjoni tal-piena kapitali jew tal-inqas għal moratorju fl-użu tagħha, il-Ftehim jistipula li l-Istat rikjest jista’ jikkunsidra li l-eżekuzzjoni ta' talba rigward att kriminali li jista' jkun sanzjonat bil-piena kapitali tista' tippreġudika l-interessi essenzjali tiegħu u għalhekk jista’ jirrifjutaha. Madankollu, l-Istat rikjest, jista’ dejjem jaċċetta talba ta’ kooperazzjoni f’każ li jirnexxilu jiftiehem mal-Istat rikjedenti dwar il-kundizzjonijiet li skonthom it-talba tkun tista’ tiġi eżegwita.

Fl-aħħar nett hemm provvediment għall-osservanza tal-prinċipju ta’ inkriminazzjoni doppja f’każijiet fejn ikunu meħtieġa miżuri ta' koerċizzjoni.

F'ġieħ il-kooperazzjoni leali, kull rifjut għandu jiġi preċedut minn konsultazzjonijiet bejn l-Istati interessati.

Fost il-ħafna garanziji li fih il-Ftehim hemm stipulazzjoni li mat-talbirt jeħyieġ li jkun hemm traduzzjoni tad-dokument f'lingwa li tinftiehem mid-destinatarju tagħha.

L-Artikolu 11(3) jistipula li ma tistax tiġi rrifjutata l-assistenza minħabba raġunijiet ta' segretezza bankarja. Ir-rapporteur jemmen li fil-futur ddan ir-rekwiżit jista’ jiġi estiż biex jinkludi s-segretezza professjonali, li tista' tiġi invokata mill-avukati jew mill-membri ta’ professjonijiet legali regolati. Madankollu r-rispett lejn is-segretezza professjonali m’għandux jinżamm jekk jgħatti attivitajiet kriminali evidenti.

Fir-rigward tal-ksib ta' informazzjoni dwar kontijiet bankarji, il-ġbir ta' depożizzjonijiet jew dikjarazzjonijiet u l-ġbir tal-provi, kull miżura ta' koerċizzjoni, inklużi l-perkwiżizzjoni u s-sekwestru, jistgħu jitwettqu mill-Istat rikjest jekk dawn jidhru li jkunu ġustifikati skont il-liġijiet ta’ dak l-Istat. Jidher li dawn id-dispożizzjonijiet huma sostnuti b’garanziji proċedurali sodisfaċenti.

Anke fir-rigward ta’ kwistjonijiet oħrajn, bħat-turija ta’ provi, it-trasferiment ta’ dokumenti, l-iffriżar, is-sekwestru u l-konfiska ta’ rikavati u mezzi strumentali, l-Istat rikjest għandu jagħmel ħiltu biex joffri assistenza lill-Istat rikjedenti sal-istess punt u skont l-istess kundizzjonijiet li jkunu disponibbli għall-awtoritajiet investigattivi tiegħu, u għalhekk sal-punt permess mil-liġijiet tiegħu. Għalhekk jidher li hemm salvagwardji adegwati għall-partijiet fil-Ftehim.

M'hemm xejn li jżomm lill-partijiet f'dan il-Ftehim milli jwettqu attivitajiet paralleli relatati mal-istess materja kriminali b’konformità ma’ ftehimiet internazzjonali oħrajn jew milli jikkonkludu ftehimiet li jikkonfermaw, jissupplimentaw, jestendu jew jamplifikaw id-dispożizzjonijiet ta' dan il-Ftehim speċifiku.

3. Konklużjonijiet

Id-dispożizzjonijiet li jiffurmaw is-suġġett tal-Ftehim għandhom l-għan li jwasslu għal assistenza legali li tkun kemm jista’ jkun effikaċi u kapaċi tittratta l-isfidi tal-lum, filwaqt li tiżgura salvagwardji adegwati.

Fl-aħħar nett, l-istandards ta’ protezzjoni previsti f’dan il-Ftehim jidhru li jisbqu dawk garantiti fi ftehimiet simili, inklużi wħud konklużi reċentement.

Fid-dawl ta’ dan kollu ta' hawn fuq, m’hemmx raġunijiet speċifiċi kontra l-adozzjoni tal-Ftehim.