RAPPORT dwar il-finanzjament u l-funzjonament tal-Fond Ewropew ta' Aġġustament għall-Globalizzazzjoni

dwar il-finanzjament u l-funzjonament tal-Fond Ewropew ta' Aġġustament għall-Globalizzazzjoni

(2010/2072(INI))

Il-Parlament Ewropew,

–   wara li kkunsidra l-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja tajba[1] (l-FII tas-17 ta’ Mejju 2006), u b'mod partikulari l-punt 28 tiegħu,

–   wara li kkunsidra r-Regolament (KE) Nru 1927/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-Fond Ewropew ta' Aġġustament għall-Globalizzazzjoni[2] (ir-Regolament FEAG),

–   wara li kkunsidra r-Regolament (KE) Nru 546/2009 tal-Parlament Ewropew u tal-Kunsill tat-18 ta’ Ġunju 2009 li jemenda r-Regolament (KE) Nru 1927/2006 dwar l-istabbiliment tal-Fond Ewropew ta’ Aġġustament għall-Globalizzazzjoni[3],

–   wara li kkunsidra r-riżoluzzjonijiet tiegħu dwar il-proposti għal deċiżjoni tal-Parlament Ewropew u tal-Kunsill dwar il-mobilizzazzjoni tal-Fond Ewropew ta' Aġġustament għall-Globalizzazzjoni, b'konformità mal-punt 28 tal-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja tajba, adottati mit-23 ta’ Ottubru 2007 sal-lum[4],

–   wara li kkunsidra l-Komunikazzjonijiet tal-Kummissjoni lill-Parlament Ewropew u lill-Kunsill tat-2 ta’ Lulju 2008(COM(2008)0421) u tat-28 ta’ Lulju 2009(COM(2009)0394) dwar l-attivitajiet tal-Fond Ewropew ta’ Aġġustament għall-Globalizzazzjoni fl-2007 u l-2008,

–   wara li kkunsidra l-Artikolu 48 u l-Artikolu 119(2) tar-Regoli ta’ Proċedura tiegħu,

–   wara li kkunsidra r-rapport tal-Kumitat għall-Baġits u l-opinjonijiet tal-Kumitat għall-Impjiegi u l-Affarijiet Soċjali u tal-Kumitat għall-Affarijiet Ekonomiċi u Monetarji (A7‑0236/2010),

A.  billi, sabiex jittaffew il-konsegwenzi negattivi tal-globalizzazzjoni għall-ħaddiema vittmi ta’ tkeċċijiet kollettivi u sabiex turi s-solidarjetà tagħha ma’ dawn il-ħaddiema, l-Unjoni Ewropea ħolqot Fond Ewropew ta’ Aġġustament għall-Globalizzazzjoni (minn hawn ’il quddiem “FEAG”) biex jingħata appoġġ finanzjarju għall-programmi personalizzati għall-inseriment mill-ġdid fid-dinja tax-xogħol; billi l-FEAG għandu għad-dispożizzjoni tiegħu ammont massimu ta’ EUR 500 miljun kull sena, li jiġu kemm mill-marġini eżistenti taħt il-limitu massimu globali tal-ispejjeż tas-sena ta’ qabel u kemm mill-approprjazzjonijiet ta’ impenn imħassrin waqt iż-żewġ snin finanzjarji ta’ qabel, bl-eċċezzjoni ta’ dawk relatati mal-Intestatura 1b tal-Qafas Finanzjarju; u billi l-FEAG jiġi mobilizzat każ b’każ sal-limitu deċiż mill-awtorità baġitarja fuq rakkomandazzjoni tal-Kummissjoni,

B.   billi, bil-għan li tirreaġixxi għaż-żieda fil-qgħad li rriżultat mill-kriżi ekonomika u finanzjarja u biex jinsiltu tagħlimiet mill-esperjenza miksuba fl-2007 u fl-2008, l-Unjoni Ewropea emendat ir-regoli dwar l-użu tal-FEAG f’Ġunju 2000; u billi din l-emenda wasslet biex twessa’, b’mod temporanju, il-kamp ta’ applikazzjoni tal-FEAG, biex ġew illaxkati u ppreċiżati l-kriterji ta’ intervent tiegħu, biex żdiedu, b’mod temporanju, r-rati tiegħu ta’ kofinanzjament u biex ittawwal il-perjodu għall-Istati Membri biex jużaw il-kontribuzzjoni finanzjarja tiegħu,

C.  billi l-valutazzjoni tal-approprjazzjonijiet mobilizzati taħt il-FEAG bejn l-2007 u l-aħħar tal-ewwel semestru tal-2009 kixfet xi nuqqasijiet fir-regolament inizjali, peress li, fuq EUR 1.5 biljun li fit-teorija kienu disponibbli, ġew mobilizzati biss EUR 80 miljun, għal 18-il talba, għall-benefiċċju ta’ 24 431 ħaddiem, u ta’ 8 Stati Membri; u billi dawn in-nuqqasijiet jidhru wkoll fl-inugwaljanza enormi nnotata bejn il-livell tal-ammonti inizjalment allokati u dawk finalment użati, peress li, fl-ewwel 11‑il każ, ġew rimborżati a posteriori EUR 24.8 miljun, jiġifieri 39.4 % tal-ammonti mobilizzati[5],

D.  billi, allavolja għadu mhux possibbli li jiġi evalwat il-funzjonament tal-FEAG fir-rigward tar-regolament rivedut, peress li t-talbiet imressqa minn Mejju 2009 qegħdin jistennew deċiżjoni jew qegħdin fil-proċess li jitwettqu, diġà wieħed jista’ jinnota aċċelerazzjoni netta fir-rikors li qed isir għall-FEAG, li tikkonferma r-relevanza tal-emendi introdotti; billi wkoll, bejn Mejju 2009 u April 2010, in-numru ta' talbiet imressqa tela' minn 18 għal 42, il-kontribuzzjonijiet mitluba telgħu minn EUR 80 miljun għal EUR 197 miljun, in-numru ta’ Stati applikanti tela' minn 8 għal 17, in-numru ta’ ħaddiema li għandhom bżonn l-għajnuna kważi rdoppja (36 712‑il ħaddiem supplimentari), u s-setturi ekonomiċi kkonċernati ġew ddiversifikati ħafna,

E.   billi madankollu 10 Stati Membri għadhom ma rrikorrewx għall-FEAG; billi l-ammonti mobilizzati għadhom ferm anqas mill-ammonti disponibbli u billi l-maġġoranza tat-talbiet jikkonċernaw reġjuni li għandhom PDG għal kull abitant ogħla mill-medja tal-Unjoni Ewropea u li r-rata ta’ qgħad tagħhom għadha moderata; u billi, minn dan jista’ jiġi konkluż li, anke jekk it-titjib li sar għar-regolament inizjali kien sinifikanti, dan għadu wieħed modest meta mqabbel maż-żieda fin-numru ta’ tkeċċijiet kollettivi osservata f’dawn l-aħħar snin,

F.   billi ż-żieda tal-limitu minimu ta’ kofinanzjament minn 50% sa 65%, fl-okkażjoni tar-reviżjoni ta’ Ġunju 2009 hi wieħed mill-fatturi li jispjegaw iż-żieda fin-numru ta’ talbiet li jikkonċernaw ir-reġjuni li jaqgħu taħt l-objettiv Kompetittività; billi, madankollu, din il-bidla ma effett multiplikatur simili fir-reġjuni li jaqgħu taħt l-objettiv Konverġenza;

G. billi l-użu dgħajjef ħafna tal-FEAĠ fir-reġjuni l-aktar fqar tal-UE hu marbut kemm ma’ strateġiji nazzjonali ddivrenzjati konnessi mar-rati ta’ kofinanzjament disponibbli skont l-FSE u l-FEAG, kemm ma’ diffikultajiet involuti biex isir progress fil-konkretizzazzjoni tal-kandidaturi ta’ benefiċjarji potenzjali qabel ma tittieħed deċiżjoni f’livell Ewropew,

H.  billi, minkejja d-dikjarazzjoni konġunta tal-Parlament Ewropew, tal-Kunsill u tal-Kummissjoni tas-17 ta' Lulju 2008 li talbet appoġġ finanzjarju mill-FEAG l-iktar rapidu u effikaċi possibbli, it-tul tal-proċedura bejn il-mument tat-tkeċċija kollettiva u d-data tal-intervent tal-FEAG b’appoġġ għall-Istat Membru applikanti għadu ta’ madwar 12 sa 17‑il xahar; u billi dan it-tul ta’ żmien jispjega parzjalment id-differenza bejn in-numru ta’ ħaddiema li għalihom hu mitlub l-intervent tal-FEAG u n-numru ta’ ħaddiema megħjuna,

I.    billi l-abbozz ta’ Ftehim Interistituzzjonali bejn il-Parlament Ewropew, il-Kunsill u l-Kummissjoni dwar il-kooperazzjoni fil-qasam baġitarju[6] jemenda biss marġinalment il-proċedura ta’ mobilizzazzjoni tal-FEAG peress li jagħmel il-proċedura ta’ trilogu waħda fakultattiva, b’mod konformi mal-prattika; u billi din l-emenda mhijiex se tirranġa l-fatt li l-proċedura hi tqila u tieħu ħafna żmien,

J.    billi, skont ir-rapport ta' valutazzjoni tal-funzjonament f’nofs it-terminu tal-FII[7] tal-Kummissjoni, il-ħtieġa li tittieħed deċiżjoni speċifika miż-żewġ fergħat tal-awtorità baġitarja biex jiġi mobilizzat il-FEAG hi wieħed mill-fatturi għalfejn il-proċedura tieħu ħafna żmien,

K.  billi s-27 deċiżjoni li ttieħdu bejn l-2007 u April 2010 kollha kienu pożittivi u konformi, fl-ammonti tagħhom, mal-proposti tal-Kummissjoni, allavolja l-Parlament Ewropew wera d-dubji tiegħu dwar ir-relevanza tagħhom[8],

L.   billi, apparti d-dimensjoni temporanja marbuta mal-kriżi ekonomika u finanzjarja attwali, id-diffikultajiet li qed jaffrontaw is-swieq tax-xogħol tal-biċċa l-kbira tal-Istati Membri għandhom natura strutturali li l-pjanijiet ta’ rkupru Ewropej u nazzjonali qed jindirizzaw biss parzjalment; filwaqt li jinnota, konsegwentemtn, li t-tendenza għaż-żieda fin-numru ta’ talbiet ta’ rikors għall-FEAG għandha karattru sostenibbli,

1.   Iqis li l-valur miżjud tal-FEAG, bħala strument tal-politika soċjali tal-Unjoni Ewropea, qiegħed fin-natura speċifika u puntwali tal-appoġġ finanzjarju li jipprovdi lil programmi personalizzati ta’ kwalifika mill-ġdid u ta’ inseriment mill-ġdid fid-dinja tax-xogħol għall-ħaddiema vittmi ta’ tkeċċijiet kollettivi fis-setturi jew fir-reġjuni li qed ibatu minn taqlib ekonomiku u soċjali gravi;

2.   Jikkunsidra li ż-żieda stabbli tan-numru tat-talbiet għal intervent tal-FEAG u d-diffikultajiet biex tiġi applikata l-proċedura tiegħu ta’ mobilizzazzjoni u ta’ implimentazzjoni jirrikjedu modifiki rapidi tad-dispożizzjonijiet proċedurali u baġitarji tiegħu; jitlob għaldaqstant lill-Kummissjoni biex tantiċipa l-preżentazzjoni tal-valutazzjoni tagħha ta’ nofs it-terminu għat-30 ta’ Ġunju 2011 u biex tehmeż magħha proposta għal reviżjoni tar-Regolament dwar il-FEAG, sabiex jiġu indirizzati n-nuqqasijiet l-iktar evidenti tal-Fond qabel it-tmiem tal-perspettivi finanzjarji attwali;

3.   Jistieden lill-Kummissjoni tevalwa l-kontribuzzjonijiet mogħtija, b’mod partikolari fir-rigward tal-aspetti li ġejjin: l-inseriment mill-ġdid tal-benefiċjarji fid-dinja tax-xogħol; id-differenza nnotata bejn in-numru ta’ kandidati li għandhom bżonn l-għajnuna u n-numru ta’ ħaddiema li effettivament ġew megħjuna; id-differenzi eżistenti f’termini ta’ sforz finanzjarju għal kull ħaddiem skont l-Istati Membri u l-ġustifikazzjoni ta’ dawn id-differenzi; ir-rispett tal-obbligu tan-nondiskriminazzjoni skont is-sitwazzjonijiet kuntrattwali tal-ħaddiema mkeċċija ir-rispett tal-kriterji ta’ komplementarjetà, ta’ konformità u ta’ koordinament, , , il-proċeduri ta’ kontroll tal-użu tal-kontribuzzjonijiet u tar-rimborżi mitluba lill-Istati Membri; jistieden lill-Kummissjoni tirrifletti r-riżultati ta' din il-valutazzjoni fil-proposta tagħha għal reviżjoni tar-regolament;

4. Iqis li r-reviżjoni tar-regolament għandu jkollha bħala għan ewlieni s-simplifikazzjoni tal-proċedura ta' mobilizzazzjoni tal-FEAG, sabiex it-tul ta’ żmien li tieħu jitnaqqas bin-nofs, u li diversi miżuri li ma jirrikjedux ir-reviżjoni tar-regolament jistgħu jnaqqsu immedjatament dan it-tul ta’ żmien;

5.   Jikkunsidra f’dan ir-rigward li t-talbiet għal mobilizzazzjoni tal-FEAG għandhom jitħejjew mill-Istati Membri minn meta titħabbar l-intenzjoni ta’ tkeċċija kollettiva u mhux wara li tiġi kkonkretizzata, bil-għan li jitnaqqas iż-żmien ta’ 10 ġimgħat li għandhom għad-dispożizzjoni tagħhom biex jittrażmettu t-talba tagħhom ladarba jkunu ssodisfati l-kriterji għal intervent, li l-Istati Membri għandhom jittrażmettu t-talba tagħhom fil-lingwa proprja tagħhom u f’lingwa ta’ ħidma tal-istituzzjonijiet Ewropej, sabiex is-servizz responsabbli għall-evalwazzjoni tat-talba fi ħdan il-Kummissjoni jkun jista’ jipproċedi bla dewmien, li l-Kummissjoni għandha ssaħħaħ ir-riżorsi umani allokati għall-eżami tat-talbiet imressqa mill-Istati Membri, u li trid tirrispetta b’mod strett l-iskadenza ta’ 15‑il ġurnata bejn meta tiġi adottata deċiżjoni ta’ mobilizzazzjoni u meta tinħareġ il-kontribuzzjoni finanzjarja lill-Istat Membru;

6.   Jimpenja ruħu biex min-naħa tiegħu jissimplifika l-proċess deċiżjonali tiegħu, billi jipprevedi li għall-proposti tal-Kummissjoni ppreżentati qabel tmiem ix-xahar, u jekk ma jkunx hemm oġġezzjonijiet mill-Kumitat għall-Baġits jew mill-Kumitat għall-Impjiegi u l-Affarijiet Soċjali, tittieħed deċiżjoni waqt is-sessjoni plenarja ta' wara, jekk ikun hemm bżonn miġburin flimkien, kif previst espliċitament mir-Regolament li jistabbilixxi l-FEAG;

7. Jikkunsidra li dawn il-miżuri immedjati biex il-proċedura ta' mobilizzazzjoni tal-FEAG tiġi ssimplifikata u llaxkata jistgħu jiġu introdotti fir-regolament waqt li jkun qed jiġi rivedut, sakemm l-esperjenza miksuba sa dik id-data tiġġustifikahom;

8.   Iqis li, apparti t-titjib tal-proċedura, hemm bżonn li d-deroga introdotta f'Ġunju 2009 biex jiġu megħjuna l-ħaddiema li jitilfu xogħolhom minħabba l-kriżi ekonomika u finanzjarja tiġi estiża sa tmiem il-qafas finanzjarju multiannwali attwali, kif ukoll li r-rata ta’ kofinanzjament titla’ minn 50% għal 65%, peress li l-kawżi li ġġustifikaw l-approvazzjoni tagħha għad fadlilhom biex jgħejbu, u jqis ukoll li hemm bżonn li tiġi applikata rata ta’ kofinanzjament tal-FEAG ta’ 75% għar-reġjuni li jaqgħu taħt l-objettiv Konverġenza tal-FSE sabiex titrażżan it-tendenza eżistenti favur l-FSE;

9.  Jixtieq li, mill-perspettivi finanzjarji li jmiss, il-FEAG jitqies bħala fond permanenti, dotat minn approprjazzjonijiet kemm għall-impenji u kemm għall-ħlasijiet, minflok ma jkollu jiddependi minn approprjazzjonijiet li jew ma jkunux intużaw jew li kienu sottoutilizzati minn snin finanzjarji preċedenti;

10. Jenfasizza li t-trasformazzjoni tal-FEAG fi strument permanenti ta’ appoġġ għal miżuri attivi għat-tiftix ta’ impjiegi tindika rieda politika li jinbena pilastru soċjali Ewropew li jikkumplementa l-politiki soċjali tal-Istati Membri u li jkun kapaċi jġedded l-approċċ Ewropew fil-qasam tat-taħriġ professjonali; f’dan il-kuntest, l-indipendenza tal-FEAG fir-rigward tal-FSE u tal-programmi Ewropej ta’ taħriġ tul il-ħajja għandha tinżamm, peress li l-FEAG hu ffukat fuq it-tisħiħ tal-kapaċitajiet ta’ kull ħaddiem megħjun u mhux fuq ir-rispons għat-tħassib tal-intrapriżi jew il-forniment ta’ servizzi orizzontali lis-stabbilimenti tat-taħriġ;

11. Jitlob lill-Kummissjoni biex tagħti rendikont aħjar tal-utilizzazzjoni tal-FEAG billi tagħti aktar sustanza lill-komunikazzjonijiet annwali tagħha u biex tittrażmetti regolarment lill-Parlament Ewropew tagħrif dwar l-użu tal-kontribuzzjonijiet finanzjarji tal-Istati Membri; jitlob barra minn hekk li, fil-każ li l-proċedura deċiżjonali tiġi ddelegata lill-Kummissjoni, fil-qafas tal-perspettivi finanzjarji li jmiss, ir-rapport annwali tagħha dwar l-implimentazzjoni tal-FEAG isir wieħed semestrali;

12. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

• [1]  ĠU C 139, 14.6.2006, p. 1.
• [2]  ĠU L 406, 30.12.2006, p. 1.
• [3]  ĠU L 167, 29.6.2009, p. 26.
• [4]  Testi adottati ta’ dawn id-dati: 25.3.2010 (P7_TA-PROV(2010)0071 u P7_TA-PROV(2010)0070), 9.3.2010 (P7_TA-PROV(2010)0044, P7_TA-PROV(2010)0043 u P7_TA-PROV(2010)0042), 16.12.2009 (P7_TA-PROV(2009)0107), 25.11.2009 (P7_TA-PROV(2009)0087), 20.10.2009 (P7_TA(2009)0049), 15.09.2009 (P7_TA(2009)0009), 5.5.2009 (P6_TA(2009)0339), 18.11.2008 (ĠU C 16E, 22.1.2010, p.84), 21.10.2008 (ĠU C 15E, 21.1.2010, p.117), 10.4.2008 (ĠU C 247E, 15.10.2009, p.75), 12.12.2007 (ĠU C 323E, 18.12.2008, p.260) u 23.10.2007 (ĠU C 263E, 16.10.2008,p.155)
• [5]  Data disponibbli sat-30 ta’ April 2010.
• [6]  COM(2010)0073 tat-3 ta’ Marzu 2010.
• [7]  COM(2010)0185 tas-27 ta’ April 2010.
• [8]  Cf. EGF/2009/008 - DELL.

           Dan ir-rapport ta’ inizjattiva jasal wara li l-FEAG ilu jintuża għal aktar minn tliet snin, taħt ir-Regolament tal-20 ta’ Diċembru 2006[1], li ġie emendat sostanzjalment mir-Regolament tat-18 ta’ Ġunju 2009[2]. Ir-rapport, fuq il-bażi tal-esperjenza miksuba waqt dan il-perjodu u tal-opinjonijiet tal-esperti nazzjonali li nstemgħu nhar it-28 ta’ April 2009, jagħmel valutazzjoni tal-finanzjament u tal-funzjonament tal-fond, qabel u wara r-reviżjoni tal-bażi legali tiegħu. Waqt li jinnota ż-żieda strutturali fil-qgħad u t-tkattir tal-każi ta’ tkeċċijiet kollettivi fl-Unjoni Ewropea, jirrakkomanda li, mill-perspettivi finanzjarji li jmiss, il-fond jiġi ttrasformat fi strument perenni ta’ solidarjetà għall-ħaddiema vittmi ta’ tkeċċijiet kollettivi. ,Qed jipproponi li, fuq żmien iqsar, isiru emendi inqas estensivi biex jitranġaw in-nuqqasijiet l-aktar evidenti tiegħu. Uħud minn dawn il-proposti ta’ emenda jistgħu jiġu applikati immedjatament. Oħrajn għandhom isiru f’reviżjoni tar-Regolament dwar il-FEAG, wara l-valutazzjoni ta’ nofs it-terminu tiegħu. Għaldaqstant, il-Kummissjoni qed tintalab tantiċipa d-data ta’ din il-valutazzjoni għall-31 ta’ Lulju 2011.

           L-approċċ spjegat hawn fuq hu bbażat fuq analiżi dettaljata tal-kundizzjonijiet legali tal-mobilizzazzjoni tal-FEAG (1) u tal-mobilizzazzjoni effettiva tiegħu bejn l-2007 u April 2010 (2).

I. KUNDIZZJONIJIET TA’ MOBILIZZAZZJONI TAL-FEAG

· Kundizzjonijiet sustantivi

           Peress li, inizjalment il-FEAG kellu l-għan waħdieni li jtaffi l-konsegwenzi negattivi tal-globalizzazzjoni għall-ħaddiema l-aktar vulnerabbli u l-anqas kwalifikati ta’ ċerti setturi, li jkunu tilfu xogħolhom minħabba l-modifiki kbar tal-kummerċ dinji li wasslu għal taqlib ekonomiku gravi. Minn Ġunju 2009, l-ambitu ta' intervent tiegħu ġie estiż għall-ħaddiema li jitilfu xogħolhom direttament minħabba l-kriżi ekonomika u finanzjarja, għat-talbiet preżentati bejn l-1 ta’ Mejju 2009 u l-31 ta’ Diċembru 2011.

L-Istati Membri jistgħu jitolbu kontribuzzjoni mill-FEAG sakemm jiġi ssodisfat wieħed minn dawn it-tliet kriterji għal intervent:

– it-tkeċċija ta’ tal-anqas 500 impjegat (1 000 qabel l-2009) minn intrapriża ta’ Stat Membru fuq perjodu ta’ 4 xhur, waqt li n-numru ta’ impjegati kkonċernati jista’ jinkludi lil dawk tal-fornituri u l-ħaddiema downstream (Artikolu 2(a)[3]);

– it-tkeċċija, fuq perjodu ta’ 9 xhur, ta’ tal-anqas 500 impjegat (1 000 qabel l-2009), b’mod partikulari, minn intrapriżi ta' daqs żgħir u medju, f'settur NACE 2 f'reġjun wieħed jew f’żewġ reġjuni bi fruntieri komuni fil-livell NUTS II (Artikolu 2(b));

– tkeċċijiet li jkollhom inċidenza gravi fuq l-impjiegi u l-ekonomija lokali, anke jekk il-kriterji preċedenti ma jkunux issodisfati, fis-swieq tax-xogħol ta’ daqs żgħir jew f’ċirkostanzi eċċezzjonali ġġustifikati kif suppost (Artikolu 2(c)).

           Il-FEAG jikkontribwixxi għall-finanzjament ta’ miżuri attivi tas-suq tax-xogħol li huma inklużi f'ġabra kkoordinata ta’ servizzi personalizzati intenzjonati għall-inseriment mill-ġdid fid-dinja tax-xogħol tal-ħaddiema li jkunu tilfu xogħolhom. Dawn il-miżuri attivi jikkonsistu, pereżempju, f’għajnuna għat-tfittxija ta’ impjieg, taħriġ, allokazzjonijiet ta’ mobilità jew anke miżuri li jħeġġu lill-ħaddiema żvantaġġati jew anzjani biex jibqgħu jew jerġgħu jidħlu fis-suq tax-xogħol. Min-naħa l-oħra, il-miżuri passivi ta’ ħarsien soċjali ma jiġux iffinanzjati mill-FEAG.

           Il-kontribuzzjoni tal-FEAG għandu jikkumplementa l-azzjonijiet mnedijin mill-Istati Membri u mhux jissostitwixxihom. Dan l-obbligu ta’ kumplementarjetà jgħaddi minn rata ta’ kofinanzjament massima stabbilita għal 50% tal-ispejjeż tal-miżuri previsti, rata li, fl-2009, telgħet għal 65% għat-talbiet imressqa qabel il-31 ta’ Diċembru 2011.

           Barra minn hekk, l-azzjoni tal-FEAG għandha tiġi kkoordinata ma’ dik tal-politiki l-oħra tal-Unjoni Ewropea. Dan l-obbligu ta’ koordinament ifisser li kull kofinanzjament tal-ispejjeż tal-miżuri previsti minn strumenti finanzjariji Komunitarji oħra hu pprojbit. F’dan ir-rigward, hu importanti li l-Istati Membri jgħassu b’mod partikulari li l-miżuri li jirċievu appoġġ mill-FEAG ma jgawdux ukoll minn finanzjament tal-FSE, peress li waħda mil-linji gwida tal-FSE hi li “tittejjeb l-adattabbiltà tal-ħaddiema u tal-intrapriżi u [tiżdied] il-flessibbiltà tas-swieq tax-xogħol”[4].

· Kundizzjonijiet proċedurali

           Il-FEAG għandu għad-dispożizzjoni tiegħu ammont annwali massimu ta’ EUR 500 miljun, li jiġu kemm mill-marġini eżistenti taħt il-limitu massimu globali tal-ispejjeż tas-sena ta’ qabel u kemm mill-approprjazzjonijiet ta’ impenn imħassrin waqt iż-żewġ snin finanzjarji ta’ qabel, bl-eċċezzjoni ta’ dawk relatati mal-Intestatura 1b tal-Qafas Finanzjarju.

           L-approprjazzjonijiet għall-impenji huma inklużi fil-baġit ġenerali tal-Unjoni Ewropea bħala dispożizzjoni (linja 40 02 43) permezz tal-proċedura baġitarja normali mill-mument meta l-Kummissjoni tkun iddeterminat il-marġini u/jew l-impenji mħassrin bħala suffiċjenti. L-approprjazzjonijiet għall-ħlasijiet korrispondenti jistgħu jiġu inklużi fir-riżerva, jinsiltu minn partiti baġitarji li ma jkunux intużaw biżżejjed jew jiġu inklużi fil-linja tal-FEAG (04 05 01).

Il-proċedura għall-mobilizzazzjoni tal-FEAG tinkludi 4 fażijiet:

– it-tressiq mill-Istat Membru ta’ talba għal kontribuzzjoni mill-FEAG lill-Kummissjoni fi żmien 10 ġimgħat li jibdew jgħoddu mid-data meta jiġu ssodisfati l-kundizzjonijiet għal intervent tal-FEAG, u din it-talba tista’ titlesta’ aktar ’il quddiem;

– l-eżami tat-talba mill-Kummissjoni b’konsultazzjoni mal-Istat Membru, segwit, skont il-każ, bit-tnedija tal-proċedura baġitarja permezz ta’ proposta għal deċiżjoni ta’ mobilizzazzjoni tal-FEAG li tistabbilixxi l-ammont tal-kontribuzzjoni finanzjarja li għandu jingħata, kif ukoll talba għat-trasferiment tal-ammont ta' dan il-kontribuzzjoni;

– l-eżami tal-proposta għal deċiżjoni ta’ mobilizzazzjoni tal-FEAG u tat-talba għat-trasferiment miż-żewġ fergħat tal-awtorità baġitarja, segwit, skont il-każ, bl-adozzjoni tagħhom b’emendi jew mingħajr emendi;

– it-trasferiment, bħala prinċipju fi żmien 15‑il ġurnata wara l-adozzjoni tad-deċiżjoni ta’ mobilizzazzjoni tal-FEAG mill-awtorità baġitarja, tal-kontribuzzjoni finanzjarja mogħtija lill-Istat Membru fi ħlas wieħed ta’ darba.

Il-proċedura biex jintuża l-FEAG tista’ tinqasam fi 3 fażijiet:

– l-użu, min-naħa tal-Istat Membru, tal-kontribuzzjoni finanzjarja fi żmien l-24 xahar wara d-data tat-talba jew id-data tal-bidu tal-miżuri appoġġjati sakem dawn ikunu nbdew fi żmien it-3 xhur wara d-data tat-talba (qabel l-2009, fi żmien 12‑il xahar mid-data tat-talba);

– il-preżentazzjoni, min-naħa tal-Istat Membru, ta’ rapport dwar l-implimentazzjoni tal-kontribuzzjoni finanzjarja fi żmien is-6 xhur wara l-iskadenza għall-utilizzazzjoni;

– l-għeluq, min-naħa tal-Kummissjoni, tal-kontribuzzjoni finanzjarja fi żmien is-6 xhur wara li tirċievi r-rapport dwar l-implimentazzjoni.

II. MOBILIZZAZZJONI TAL-FEAG BEJN L-2007 U APRIL 2010

· Analiżi tad-deċiżjonijiet u t-talbiet għal mobilizzazzjoni tal-FEAG

In-numru ta’ talbiet u l-kontribuzzjonijiet mitluba huma kkonċentrati f’numru limitat ta’ Stati Membri, mingħajr korrelazzjoni mad-differenzi fil-ġid u fir-rati tal-qgħad:

           Bejn l-2007 u April 2010, ġew adottati 27 deċiżjoni għall-mobilizzazzjoni tal-FEAG u tressqu u ġew ammessi 58 talba. Dawn id-deċiżjonijiet u t-talbiet jikkonċernaw rispettivament 13 u 17‑il Stat Membru. Għaldaqstant, sa issa 10 Stati Membri għadhom ma xtaqux jew ma setgħux jirrikorru għall-Fond.

           Il-5 Stati Membri li ressqu t-talbiet għall-ogħla kontribuzzjonijiet (Franza, l-Italja, Spanja, l-Irlanda u l-Ġermanja) talbu madwar 70% tat-total tal-approprjazzjonijiet mitluba, waqt li l-5 Stati Membri li ressqu t-talbiet għall-anqas kontribuzzjonijiet (ir-Repubblika Ċeka, il-Polonja, Malta, il-Finlandja u l-Litwanja) talbu madwar 2% ta’ dan it-total.

           Id-deċiżjonijiet għall-mobilizzazzjoni tal-FEAG ikkonċernaw reġjuni fil-livell NUTS II fejn il-medja tad-Dħul Nazzjonali Gross għal kull abitant tilħaq il-109.3% tal-medja tal-Unjoni Ewropea u fejn il-medja tar-rata tal-qgħad hi biss ta’ 5.9%[5].

In-numru ta’ talbiet u l-kontribuzzjonijiet mitluba huma l-oġġett ta’ mobilizzazzjoni dejjem tikber imma li tibqa’ limitata fir-rigward tal-approprjazzjonijiet disponibbli:

           16‑il deċiżjoni biss ġew adottati qabel ir-reviżjoni ta’ Ġunju 2009, li minnhom ibbenefikaw 8 Stati Membri u li ammontaw għal total mobilizzat ta’ EUR 80 miljun.

Jekk wieħed iqabbel is-snin finanzjarji differenti jista’ jara madankollu żieda fir-rata ta’ utilizzazzjoni, marbuta partikolarment mal-fatt li fl-2009 ġew illaxkati l-modalitajiet biex wieħed jirrikorri għall-FEAG u mal-kriżi ekonomika u finanzjarja. Ir-rata tal-utilizzazzjoni tal-approprjazzjonijiet għaddiet minn 3.7% fl-2007 (EUR 18.6 miljun) għal 9.8% fl-2008 (EUR 49 miljun) u 10.5% fl-2009 (EUR 52 miljun). Jidher li din it-tendenza se tkompli fl-2010. Bejn Ġunju 2009 u April 2010, ġew adottati, eżaminati jew depożitati 42 talba, li kkonċernaw 36 712‑il ħaddiem ġdid u 9 Stati Membri supplimentari, għal ammont globali ta’ EUR 197 miljun.

Il-kontribuzzjoni mitluba għal kull ħaddiem tvarja ħafna minn Stat Membru għal ieħor:

Id-deċiżjonijiet adottati jikkonċernaw 29 292 ħaddiem imkeċċi u t-talbiet imressqa identifikaw 54 867 ħaddiem li jeħtieġ l-għajnuna.

Il-kontribuzzjoni mitluba tirrappreżenta medja ta’ EUR 5 253 għal kull ħaddiem. Jeżisti rapport ta’ madwar 1 għal kull 40 bejn l-anqas kontribuzzjoni mitluba għal kull ħaddiem (EUR 511)[6] u l-aktar wieħed għoli (EUR 22 031)[7].

It-talbiet għall-mobilizzazzjoni tal-FEAG huma bbażati fuq l-assjem tal-kriterji ta’ intervent imma fi proporzjonijiet żbilanċjati:

L-Istati Membri jużaw bħala ġustifikazzjoni l-kriterju ta’ intervent tal-Artikolu 2(b) tar-Regolament dwar il-FEAG f’57.7% tal-każi, il-kriterju tal-Artikolu 2(a) f’36.5% tal-każi u l-kriterju tal-Artikolu 2(c) f’5.8% tal-każi. Stat Membru wieħed biss (il-Litwanja) irrikorra għal kull wieħed mit-3 kriterji ta’ intervent f’tal-anqas waħda mit-talbiet tiegħu.

Minn Ġunju 2009, il-kriterju ta' intervent tal-Artikolu 2(b) intuża aktar bħala ġustifikazzjoni milli fil-perjodu preċedenti (sa 60% tat-talbiet magħmula kontra 50%).

Il-kontribuzzjoni tal-FEAG tikkonċerna biss ftit mis-setturi ekonomiċi allavolja hemm tendenza li dawn jiġu ddiversifikati:

Waqt li s-16‑il deċiżjoni li ttieħdu taħt ir-regolament oriġinali kellhom x’jaqsmu esklussivament mas-setturi tat-tessuti (50%), tal-karozzi (31%) u tat-telefonija mobbli (19%), it-talbiet imressqa taħt ir-regolament emendat infetħu għal setturi ġodda bħal dawk tal-mekkanika, tal-elettronika, tal-istampar u tal-bini.

· Analiżi tal-proċedura ta’ mobilizzazzjoni u ta’ eżekuzzjoni tal-FEAG

Jekk il-FEAG sa issa għad ma kellux għad-dispożizzjoni tiegħu approprjazzjonijiet ta’ ħlas proprji, is-sitwazzjoni tista’ tevolvi mill-2011 ’il quddiem:

L-approprjazzjonijiet għall-ħlasijiet mobilizzati kollha biex jiġu onorati l-impenji ttieħdu mill- partiti baġitarji li kienu previsti li kienu se jkunu sottoutilizzati. Il-bżonnijiet ġew koperti sa 97.6% mil-linji baġitarji marbuta mal-FSE, l-approprjazzjonijiet li kien fadal ittieħdu mil-linja baġitarja Ġustizzja kriminali u ġustizzja ċivili. Jekk il-possibilità li approprjazzjonijiet ta’ ħlas jiġu inklużi fir-riżerva maġenb l-approprjazzjonijiet ta' impenn għadha ma ġietx utilizzata, l-abbozz ta’ baġit għall-2011 jipprevedi li, għall-ewwel darba, il-linja tal-FEAG tiġi dotata b’ammont li jitla’ sa EUR 50 miljun f’approprjazzjonijiet għall-ħlasijiet.

It-tul tal-proċedura għall-mobilizzazzjoni tal-FEAG hu twil wisq, u dan jagħmel ħsara għall-effikaċità tiegħu u għall-interess tiegħu għall-Istati Membri:

It-tul ta’ żmien bejn it-tressiq ta’ talba għal kontribuzzjoni tal-FEAG u t-trasferiment tal-kontribuzzjoni finanzjarja mogħtija jaqbeż id-9 xhur bħala medja.

Dan iż-żmien jista' jitqassam kif ġej:

– 6 xhur bejn it-tressiq tat-talba mill-Istat Membru u l-adozzjoni tal-proposta għal deċiżjoni ta' mobilizzazzjoni tal-FEAG min-naħa tal-Kummissjoni;

– xahrejn bejn l-adozzjoni tal-proposta għal deċiżjoni ta’ mobilizzazzjoni tal-FEAG min-naħa tal-Kummissjoni u l-adozzjoni tagħha mill-awtorità baġitarja;

– xahar u ġimgħa bejn l-adozzjoni tal-proposta għal deċiżjoni ta’ mobilizzazzjoni tal-FEAG mill-awtorità baġitarja u t-trasferiment tal-kontribuzzjoni finanzjarja min-naħa tal-Kummissjoni[8].

Dan kollu hu ta’ ħsara għall-attrattiva li l-FEAG għandu għall-Istati Membri, peress li dawn ikollhom jipprovdu l-prefinanzjament tal-miżuri attivi tas-suq tax-xogħol mingħajr ma jkunu jafu r-riżultat tal-proċedura. Dan jispjega parzjalment id-differenzi osservati bejn in-numru ta’ ħaddiema li għalihom intalbet kontribuzzjoni tal-FEAG u n-numru ta’ ħaddiema megħjuna, peress li waqt dan il-perjodu l-ħaddiema mkeċċija jistgħu jiddeċiedu li jirtiraw mis-suq tax-xogħol jew li jsibu xogħol ieħor. L-agħar li jista’ jiġri hu li, minħabba dawn id-differenzi, l-Istati Membri jistgħu jkunu obbligati jirrimborżaw kompletament il-kontribuzzjonijiet mogħtija, jekk il-kriterju tan-numru ta’ ħaddiema ma jibqax issodisfat a posteriori.

• [1]     Regolament (KE) Nru 1927/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-Fond Ewropew ta' Aġġustament għall-Globalizzazzjoni.
• [2]    Regolament (KE) Nru 546/2009 tal-Parlament Ewropew u tal-Kunsill tat-18 ta’ Ġunju 2009 li jemenda r-Regolament (KE) Nru 1927/2006 dwar l-istabbiliment tal-Fond Ewropew ta’ Aġġustament għall-Globalizzazzjoni.
• [3]    L-artikoli li qed issir referenza għalihom huma dawk tar-Regolament Nru 1927/2006.
• [4]    Deċiżjoni 2006/702/KE tal-Kunsill tal-Unjoni Ewropea tas-6 ta' Ottubru 2006 dwar il-linji gwida strateġiċi Komunitarji dwar il-koeżjoni.
• [5]    Sors : Eurostat, data tal-2007 għad-DNG għal kull abitant u tal-2008 għar-rati tal-qgħad.
• [6]          EGF/2010/010, Unilever (Repubblika Ċeka).
• [7]          EGF/2010/007, Steiermark-Niederoesterreich (Awstrija).
• [8]    It-tul ta' żmien globali u t-tul ta’ żmien tat-trasferiment tal-kontribuzzjoni mogħtija jirreferu biss għall-ewwel 15‑il deċiżjoni ta’ mobilizzazzjoni tal-FEAG peress li ma hemmx informazzjoni dwar id-deċiżjonijiet l-oħra. It-tul taż-żmien taż-żewġ fażijiet l-oħra hu kkalkulat fuq il-bażi tad-deċiżjonijiet adottati kollha.

għall-Kumitat għall-Baġits

dwar il-finanzjament u l-funzjonament tal-Fond Ewropew ta' Aġġustament għall-Globalizzazzjoni
(2010/2072(INI))

Rapporteur(*): Elisabeth Morin-Chartier

(*) Proċedura b’kumitati assoċjati: Artikolu 50 tar-Regoli ta’ Proċedura

SUĠĠERIMENTI

Il-Kumitat għall-Impjiegi u l-Affarijiet Soċjali jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni tiegħu għal riżoluzzjoni:

A. billi l-Fond Ewropew ta' Aġġustament għall-Globalizzazzjoni (FEAG) ma jimponix miżuri attivi tas-suq tax-xogħol fuq Stat Membru li jridu jiġu implimentati fil-qafas ta’ applikazzjoni għall-fond iżda jirrikjedi t-twaqqif ta' pakkett ikkoordinat ta’ servizzi personalizzati mfassla biex il-ħaddiema jerġgħu jidħlu fis-suq tax-xogħol skont l-Artikolu 3 tar-Regolament tal-FEAG [1] li jippreserva totalment il-flessibilità tal-Istati Membri li jadattaw il-miżuri maħsuba għall-ħaddiema li tilfu x-xogħol għall-ħtiġijiet lokali u individwali ta’ kull applikazzjoni,

1.  Jinnota li l-politiki soċjali u tal-impjieg huma kompetenzi nazzjonali kkoordinati bil-metodu miftuħ ta' koordinazzjoni u jużaw is-sinerġiji kollha possibbli sabiex jiżguraw żvilupp pożittiv tal-Unjoni meta ffaċjata bil-globalizzazzjoni u biex jilqgħu l-isfida tar-riintegrazzjoni soċjali u professjonali fl-Istati Membri u bejn l-Istati Membri; ifakkar ukoll li l-Fond Ewropew ta’ Aġġustament għall-Globalizzazzjoni (FEAG) huwa strument stabbilit bħala appoġġ għal dan l-għan u sabiex jgħin lill-ħaddiema fil-każijiet ta’ sensji fuq skala kbira;

2.  Jitlob biex fil-ġejjieni, il-FEAG jinżamm u biex, fir-reviżjoni tiegħu tal-2009, jiġi kkoordinat b'mod ċar mar-reviżjoni tal-FSE lil hinn mill-qafas finanzjarju ta' nofs it-terminu biex ikun jista' jintuża bħala għodda ta' emerġenza f'sitwazzjonijiet ta' kriżi;

3.  Jitlob lill-Kummissjoni Ewropea biex tipproponi bidliet għar-regolament tal-FEAG sabiex titħaffef kemm jista’ jkun il-proċedura ta’ applikazzjoni fuq żmien qasir, filwaqt li taħdem biex jintlaħaq l-objettiv li l-fondi jkunu disponibbli 6 xhur wara s-sensja, fost l-oħrajn billi jiġu studjati l-possibilitajiet li l-proċedura ta’ applikazzjoni tinbeda hekk kif titħabbar is-sensja minflok meta din isseħħ, u billi t-teħid ta’ deċiżjonijiet tal-Kummissjoni Ewropea jiġi ssemplifikat kemm jista’ jkun u l-proċeduri jiġu standardizzati; barra minn hekk jistieden lill-Kummissjoni Ewropea biex tiżviluppa ideat għall-qafas finanzjarju li jmiss sabiex jinkisbu l-objettivi li, minn banda, ikun hemm kooperazzjoni mal-Istati Membri sabiex jiġu ffaċilitati bidliet fundamentali orjentati lejn il-ġejjieni għal ekonomija sostenibbli u għas-suq tax-xogħol u, mill-banda l-oħra, sabiex ikun aktar faċli li tingħata għajnuna rapida u flessibbli lill-ħaddiema li jkunu tilfu xogħolhom minħabba x-xokkijiet mhux mistennija għall-ekonomija;

4.  Ifakkar lill-Istati Membri dwar l-importanza li jittieħdu miżuri immedjati ta’ intervenzjoni fis-suq tax-xogħol li jkunu paralleli mal-applikazzjoni tagħhom għall-FEAG;

5.  Jitlob lill-Kummissjoni biex tipprovdi lill-Istati Membri b'għadd ta' linji gwida għat-tfassil u l-implimentazzjoni tal-applikazzjonijiet għal finanzjament tal-FEAG bl-għan li tinstab proċedura ta' applikazzjoni mgħaġġla u kunsens wiesa' tal-partijiet interessati rigward l-istrateġija li għandha tiġi applikata u l-miżuri li għandhom jiġu stabbiliti għal riintegrazzjoni effettiva tal-ħaddiema fis-suq tax-xogħol; jitlob lill-Istati Membri biex jaċċelleraw il-proċedura billi jipprefinanzjaw il-miżuri li għandhom jinbdew minn jum l-applikazzjoni, sabiex jintuża bis-sħiħ il-perjodu ta' implimentazzjoni tal-FEAG għall-benefiċċju tal-ħaddiema kkonċernati;

6.  Ifakkar lill-Istati Membri li huma jinsabu obbligati, minn banda, sabiex mill-bidu tat-tħejjija għall-applikazzjonijiet jinvolvu lis-sħab soċjali skont l-Artikolu 5 tar-Regolament FEAG u, mill-banda l-oħra, biex jikkonformaw mal-Artikolu 9 ta’ dan ir-regolament li jitlob li l-Istati Membri jipprovdu informazzjoni dwar l-azzjonijiet iffinanzjati, kif ukoll jippubbliċizzawhom, u li din l-informazzjoni trid tingħata wkoll lill-ħaddiema kkonċernati, lill-awtoritajiet lokali u reġjonali u lis-sħab soċjali, u sabiex il-proċeduri jiġu standardizzati; jitlob lill-Istati Membri biex jiżguraw li kunsilli tax-xogħlijiet jiġu involuti qabel jinbeda kwalunkwe programm, sabiex jiġi garantit li s-sħab soċjali jgħinu tassew biex jiġu mfassla pjanijiet ta' konversjoni li jissodisfaw il-bżonnijiet tal-impjegati u mhux tal-intrapriżi;

7.  Iħeġġeġ lill-Kummissjoni biex tinforza b’mod korrett id-Direttiva 2002/14/KE dwar l-informazzjoni u l-konsultazzjoni tal-impjegati u d-Direttiva 94/45/KE dwar il-Kunsill Ewropew tax-Xogħlijiet sabiex is-sħab soċjali jingħataw l-għodod kollha biex janalizzaw il-pjan propost ta’ sensji u ta’ ristrutturazzjoni qabel ma dan jitħabbar u għaldaqstant biex dawn ikunu jistgħu jwettqu r-rwol sħiħ tagħhom;

8.  Jistieden lill-Kummissjoni Ewropea biex fir-Regolament FEAG tipproponi li jiżdied l-obbligu li l-Istati Membri jappoġġaw il-parteċipazzjoni ta’ assoċjazzjoni tal-ħaddiema waqt il-fażi ta’ implimentazzjoni; jistieden lill-Kummissjoni Ewropea biex torganizza l-iskambju ta’ esperjenzi u ta' prattiki tajba li jikkonċernaw l-involviment tal-ħaddiema fl-implimentazzjoni tal-FEAG, sabiex il-ħaddiema f’każijiet eżistenti u ġodda jkunu jistgħu jibbenefikaw mill-għarfien espert miksub mill-każijiet preċedenti;

9.  Jistieden lill-Istati Membri sabiex jistabbilixxu struttura ta’ komunikazzjoni u ta’ amministrazzjoni għall-FEAG fil-livell nazzjonali, f'konsultazzjoni mal-partijiet interessati kollha, partikolarment mas-sħab soċjali, u biex jagħmlu skambju tal-aħjar prattiki fil-livell Ewropew, li jippermetti li jkun hemm intervent rapidu u effiċjenti mill-FEAG f'każijiet ta’ sensji fuq skala kbira;

10. Jirrimarka li r-Regolament (KE) Nru 1927/2006 jippermetti lill-pajjiżi li jissottomettu applikazzjonijiet konġunti għal assistenza mill-FEAG meta l-ħaddiema milquta f'reġjun ġeografiku jew f’settur partikulari ma jkunux ikkonċentrati fi Stat Membru wieħed;

11. Jitlob lill-Kummissjoni biex tippreżenta proposta dwar kif ir-Regolament FEAG għandu jiġi emendat sabiex ikunu jistgħu jiġu inklużi l-ħaddiema kollha li jisfaw bla xogħol minħabba l-istess kwistjoni, għas-setturi u r-reġjuni kollha;

12. Jistieden lill-Kummissjoni Ewropea sabiex tistudja soluzzjonijiet possibbli biex tegħleb is-segregazzjoni bejn il-ħaddiema li sfaw bla xogħol li huma eliġibbli għal miżuri fl-ambitu ta’ applikazzjoni tal-FEAG u ħaddiema oħra bla xogħol fl-istess żona;

13. Jitlob lill-Istati Membri li jibbenefikaw mill-FEAG sabiex itejbu l-effikaċja tal-implimentazzjoni u jadottaw approċċ personalizzat u soċjali biex jgħinu lill-ħaddiema li jisfaw bla xogħol, u biex jippromwovu ulterjorment it-taħriġ u t-taħriġ mill-ġdid, partikolarment f'każijiet ta' sensji fuq skala kbira, sabiex itejbu l-opportunitajiet tal-ħaddiema f'suq tax-xogħol li għaddej minn ristrutturazzjoni profonda; jitlob biex wieħed jara li r-regolamenti għall-implimentazzjoni nazzjonali ma jagħmlux l-applikazzjoni tal-fond iktar ristrettiva; jistieden lill-Istati Membri u lill-awtoritajiet lokali biex jagħmlu dak kollu possibbli biex jerġgħu jagħtu ħajja liż-żoni li sofrew l-effetti tar-rilokazzjoni sabiex tinżamm l-attività ekonomika f’dik iż-żona, filwaqt li jitqies li l-FEAG huwa orjentat biss għall-impjegati; jirrakkomanda, għal dan il-għan, li l-Istati Membri jintensifikaw l-iskambju tal-prattika tajba, speċjalment billi jagħmlu użu minn Progress, u b'mod partikolari mill-istrument il-ġdid ta' mikrofinanzjament;

14. Jilqa’ b’sodisfazzjoni il-konklużjonijiet tal-Kunsill dwar Kompetenzi Ġodda għal Impjiegi Ġodda u jenfasizza li l-FEAG jagħti lill-Istati Membri finanzjament addizzjonali għat-taħriġ ta’ ħaddiema bla xogħol għal xogħlijiet orjentati lejn il-ġejjieni u għal iktar mobilità;

15. Iħeġġeġ lill-Istati Membri biex jużaw il-FEAG biex jimplimentaw il-miri Ewropej, biex jippromwovu kompetenzi ġodda għal impjiegi ġodda, dejjiema, li ma jagħmlux ħsara lill-ambjent u ta' kwalità għolja f'reġjun partikolari, u jiffavorixxu l-intraprenditorija u t-tagħlim tul il-ħajja, bil-għan li l-ħaddiema jkunu jistgħu jiżviluppaw il-karrieri personali tagħhom u jikkontribwixxu biex titjieb il-kompetittività tal-UE fil-kuntest tal-globalizzazzjoni;

16. Jistieden lill-Istati Membri biex jużaw il-FEAG biex joħolqu sinerġiji bejn il-FEAG, l-FSE u l-mikrofinanza biex jiġu identifikati l-iktar miżuri adegwati għall-każijiet individwali;

17. Iħeġġeġ lill-Istati Membri biex jieħdu miżuri f'konformità mar-Regolament FEAG għall-promozzjoni tal-mobilità tal-ħaddiema jekk il-prospetti ta' impjieg fir-reġjun ikunu sfavorevoli;

18. Jirrimarka li, fil-kuntest tal-globalizzazzjoni, il-kompetittività futura tal-UE tista' tiġi garantita biss jekk isiru sforzi mmirati biex tinħoloq l-ikbar massa possibbli ta' kapaċitajiet fost il-ħaddiema fiż-żona tal-UE; iqis li l-FEAG għandu għalhekk jgħin biex il-perjodi ta' qgħad jintużaw b'mod kostruttiv permezz ta' taħriġ ulterjuri intensiv u miżuri ta' taħriġ mill-ġdid;

19. Ifakkar lill-intrapriżi dwar ir-responsabilità tagħhom li jagħmlu dak kollu possibbli biex jiżguraw li l-ħaddiema, qabel jibda ż-żmien tagħhom ta' qgħad, ikunu jistgħu jivvalidaw l-esperjenza u t-taħriġ tagħhom, sabiex jiġi żgurat li t-taħriġ mill-ġdid tagħhom ikun l-aktar preċiż u rapidu possibbli, u sabiex isibu impjieg ġdid, ''tajjeb'' u stabbli, mimli prospettivi f'settur li se jibqa' vijabbli;

20. Jinnota d-disparità qawwija bejn il-każijiet, minħabba d-diversità tas-sitwazzjonijiet f'kull Stat Membru; jistieden għalhekk lill-Kummissjoni biex tfassal proposta bil-għan li jkun hemm flessibilità akbar fil-kriterji ta’ intervent skont l-Istat Membru, biex ikunu adattati aħjar għall-ispeċifiċitajiet ekonomiċi nazzjonali, filwaqt li tiġi studjata l-possibilità li l-perjodu ta' referenza u r-raġġ tal-istabbilimenti jiġu estiżi, filwaqt li tiġi evitata kull inugwaljanza fl-aċċess għal dan l-istrument bejn l-Istati Membri;

21. Jitlob biex, fl-implimentazzjoni tal-FEAG, l-Istati Membri jintalbu jieħdu miżuri biex jiżguraw li l-persuni fost dawk eliġibbli għall-finanzjament li ma jkunux ċittadini jkollhom il-possibilità li jagħmlu użu minn dawn il-fondi wkoll;

22. Jitlob lill-Kummissjoni biex tipprovdi assistenza wkoll lill-Istati Membri, lis-sħab soċjali u lill-assoċjazzjonijiet tal-ħaddiema matul il-proċess tal-implimentazzjoni tal-miżuri;

23. Jitlob lill-Kummissjoni biex tevita li toħloq tgħawwiġ tal-kompetizzjoni, filwaqt li tinkoraġġixxi l-ħolqien ta' sett omoġenju ta' obbligi tal-intrapriżi f’dak li għandu x’jaqsam mas-sensji fl-Unjoni Ewropea;

24. Jenfasizza b'mod partikolari li l-Kummissjoni Ewropea u l-Istati Membri għandhom jikkollaboraw mill-qrib biex jissorveljaw b'mod effikaċi l-appoġġ mogħti lil kumpaniji multinazzjonali u biex jistabbilixxu investiment sod fil-ħolqien tal-impjiegi bi drittijiet, sabiex jiġi evitat id-dumping soċjali;

25. Jitlob lill-Kummissjoni biex tiżgura li l-politiki u l-istrumenti tagħha jkunu koerenti, sabiex tiġi evitata l-possibilità li t-tkabbir u l-objettivi relatati mal-kompetittività jmorru kontra l-objettivi relatati mal-impjieg, il-koeżjoni u l-inklużjoni soċjali;

26. Jistieden lill-Kummissjoni sabiex, fir-rapport annwali tagħha, tippreżenta statistika dwar l-effikaċja tal-FEAG u tal-istrateġiji ta’ taħriġ li jikkonċernaw id-dħul lura fl-impjieg, billi tanalizza l-impatt tal-istruttura tas-suq tax-xogħol fuq din l-effikaċja;

27. Jenfasizza l-bżonn li l-Kummissjoni, fi żminijiet ta' skarsità ta' riżorsi finanzjarji, tevalwa l-effikaċja u s-sostenibilità ta' miżuri ffinanzjati permezz tal-FEAG, b'kooperazzjoni mal-Istati Membri; jinnota li għandhom jiġu żviluppati kriterji standardizzati għal dan l-għan, pereżempju t-tlestija ta' miżuri ta' żvilupp tal-kapaċitajiet, is-suċċess fit-tiftix ta' impjieg ġdid u fid-dewmien tal-kuntratt tax-xogħol il-ġdid;

28. Jitlob lill-Kummissjoni biex minnufih tressaq rapport dwar l-użu li sar s'issa tal-Fond ta' Aġġustament għall-Globalizzazzjoni, li b'mod partikolari juri fid-dettall kif intużaw l-approprojazzjonijiet u kemm kien kbir il-proporzjon tal-finanzjament ġenerali li dawn koprew meta mqabbel ma' miżuri oħra ta' appoġġ nazzjonali u kummerċjali; jistieden lill-Kummissjoni biex tislet konklużjonjiet inizjali minn dan ir-rapport u tressaq bil-ħeffa proposti għat-titjib tal-fond.

RIŻULTAT TAL-VOTAZZJONI FINALI FIL-KUMITAT

• [1]  Regolament (KE) Nru 1927/2006 tal-Parlament Ewropew u tal-Kunsill tal-20 ta’ Diċembru 2009 li jistabbilixxi l-Fond Ewropew ta’ Aġġustament għall-Globalizzazzjoni kif emendat mir-Regolament (KE) Nru 546/2009 tal-Parlament Ewropew u tal-Kunsill tat-18 ta’ Ġunju 2009.

għall-Kumitat għall-Baġits

dwar il-finanzjament u l-funzjonament tal-Fond Ewropew ta' Adattament għall-Globalizzazzjoni
(2010/2070(INI))

Rapporteur: Sharon Bowles

SUĠĠERIMENTI

Il-Kumitat għall-Affarijiet Ekonomiċi u Monetarji jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jitlob lill-Kummissjoni biex minnufih tressaq rapport dwar l-użu sal-lum tal-Fond għal-Globalizzazzjoni, li b'mod partikolari juri bid-dettall kif intużaw il-mezzi u x'relazzjoni kien hemm bejn il-mezzi użati u miżuri oħra ta' appoġġ nazzjonali u kummerċjali; jistieden lill-Kummissjoni biex tislet konklużjonjiet minn dan ir-rapport u tressaq bil-ħeffa suġġerimenti għal titjib tal-Fond;

2.  Jitlob lill-Kummissjoni biex minnufih tressaq proposti li, lill-azjendi li jkunu qatgħu il-postijiet tax-xogħol u fil-perjodu ta' rappurtar preċedenti jkunu rreġistraw profitt, jassoċjawhom kif jixraq fl-ispejjeż tal-konsegwenzi soċjali tar-rilokazzjoni tal-azjendi u tat-telf tal-impjiegi, kif ukoll jiżguraw rifinanzjament tal-Fond Ewropew ta' Adattament għall-Globalizzazzjoni (FEG);

3.  Jitlob lill-Kummissjoni biex fiż-żmien medju tissostitwixxi l-FEG permezz ta' Fond ta' Ristrutturar, li għandu jkun iffinanzjat minn imposta fuq ir-rilokazzjoni tal-azjendi fl-UE kolha kemm hi u li tinvolvi lill-azjendi b'mod xieraq fil-ħolqien ta' postjiet tax-xogħol alternattivi;

4.  Jitlob lill-Kumissjoni biex tintroduċi kriterji li s-sostenn permezz tal-FEG bi prijorità jmur għal miżuri ta' ristrutturazzjoni li jiżguraw jew joħolqu l-impjiegi kif ukoll iġibu żvilupp ekoloġikament sostenibbli u soċjalment ibbilanċjat fir-reġjuni kkonċernati;

5.  Jitlob lill-Kummissjoni biex fit-teħid ta' deċiżjonijiet dwar l-għoti ta' appoġġ permezz tal-FEG tinvolvi obbligatorjament lis-sħab soċjali;

6.  Jitlob lill-Kummissjoni biex testendi l-kriterji għall-utilizzazzjoni tal-FEG bil-kundizzjonijiet imsemmija hawn fuq ħalli jkopru r-rilokazzjoni ta' azjendi fi ħdan l-Ewropa u biex tissimplifika apprezzabilment il-proċedura ta' applikazzjoni;

7.  Jitlob lill-Kummissjoni biex iżżid b'mod sinifikanti l-qafas finanzjarju tal-FEG fl-isfond tal-kriżi ekonomika u finanzjarja kurrenti u tal-kompiti mwessgħa u biex tagħti lill-FEG intestatura proprja fil-baġit.

RIŻULTAT TAL-VOTAZZJONI FINALI FIL-KUMITAT