RAPPORT L-Innovazzjoni għal Tkabbir Sostenibbli: Bijoekonomija għall-Ewropa

L-Innovazzjoni għal Tkabbir Sostenibbli: Bijoekonomija għall-Ewropa

(2012/2295(INI))

Il-Parlament Ewropew,

-     wara li kkunsidra l-komunikazzjoni tal-Kummissjoni bit-titolu "Ninnovaw għal Tkabbir Sostenibbli: Bijoekonomija għall-Ewropa" (COM(2012)0060)",

-     wara li kkunsidra l-Komunikazzjoni tal-Kummissjoni bl-isem "EWROPA 2020: Strateġija għal tkabbir intelliġenti, sostenibbli u inklussiv' COM(2010)2020)",

-     wara li kkunsidra r-riżoluzzjoni tiegħu tal-24 ta' Mejju 2012 dwar Ewropa li tuża r-riżorsi b'effiċjenza[1],

-     wara li kkunsidra l-komunikazzjoni tal-Kummissjoni bit-titolu "Naffrontaw l-isfidi fis-swieq tal-prodotti bażiċi u dawk marbuta mal-materja prima" (COM(2011)0025) u r-riżoluzzjoni tiegħu dwar din il-komunikazzjoni[2],

-     wara li kkunsidra l-konklużjonijiet tal-presidenza tal-Kunsill tar-Renju Unit tal-2005 ("The Knowledge-Based Bio-Economy in Europe"), tal-Ġermanja fl-2007 ("En route to the Knowledge based Bio-Economy") u tal-Belġju fl-2010 ("The Knowledge Based Economy in Europe: achievements and challenges"),

-     wara li kkunsidra l-Artikolu 48 tar-Regoli ta' Proċedura tiegħu,

-     wara li kkunsidra r-rapport tal-Kumitat għall-Ambjent, is-Saħħa Pubblika u s-Sikurezza tal-Ikel kif ukoll l-opinjonijiet tal-Kumitat għall-Iżvilupp, tal-Kumitat għall-Industrija, ir-Riċerka u l-Enerġija, tal-Kumitat għall-Impjiegi u l-Affarijiet Soċjali u tal-Kumitat għall-Iżvilupp Reġjonali (A7-0201/2013),

A. billi l-popolazzjoni dinjija prevista li se tiżdied minn 7 biljun ruħ għal 9 biljun ruħ sal-2050, li se jwassal għal żieda ta' madwar 70 % fid-domanda għall-prodotti tal-ikel u tqiegħed pressjoni kbira fuq ir-riservi tal-ilma;

B.  billi l-iskarsezza tar-riservi naturali fid-dinja, il-pressjoni li qed tiżdied fuq il-materja prima rinnovabbli u l-effetti dinjin tat-tibdil fil-klima jitolbu minna li nużaw ir-riżorsi b'aktar effiċjenza;

C. billi approċċ fuq żmien fit-tul, innovattiv u effiċjenti jiggarantixxi mhux biss sostenibilità akbar iżda wkoll appoġġ għall-iżvilupp rurali u reġjonali, it-tnaqqis potenzjali tal-emissjonijiet ta' gassijiet b'effett ta' serra, sostenibilità akbar taċ-ċirku produttiv iżda wkoll it-tixrid tal-innovazzjoni industrijali ma' tul il-katina tal-valur kollha;

D. billi t-tranżizzjoni lejn ekonomija sostenibbli ssaħħaħ il-kompetittività tal-industrija u tal-qasam agrikolu Ewropej, iżżid it-tkabbir ekonomiku u, għaldaqstant, tippromwovi żieda sinifikanti fil-livelli tal-impjieg Ewropej;

E.  billi s-suċċess tal-bijoekonomija fl-Ewropa jiddependi fuq id-disponibilità ta' stokkijiet tal-ikel immaniġġjati u mkabbra b'mod sostenibbli (mill-biedja, mill-forestrija u mill-iskart bijodegradabbli);

F.  billi l-bijoekonomija tal-UE diġà għandha fatturat ta' kważi EUR 2 triljun, u huwa mistenni li jkun hemm tkabbir sinifikanti mill-produzzjoni primarja sostenibbli, l-ipproċessar tal-ikel, il-bijoteknoloġija industrijali u l-bijoraffineriji;

Kummenti ġenerali

1.  Jilqa' l-komunikazzjoni tal-Kummissjoni bit-titolu "L-Innovazzjoni għal Tkabbir Sostenibbli: Bijoekonomija għall-Ewropa" u l-pjan ta' azzjoni għall-implimentazzjoni tal-istrateġija dwar il-bijoekonomija li jinsab fiha;

2.  Iqis li l-bijoekonomija tippermetti l-produzzjoni ta' komoditajiet industrijali u tal-konsumatur bi spejjeż aktar baxxi, b'użu inqas tal-enerġija u toħloq anqas tniġġis ambjentali;

3.  Huwa wkoll tal-fehma li t-tranżizzjoni lejn bijoekonomija intelliġenti, sostenibbli u inklużiva għandha tkun ibbażata mhux biss fuq il-produzzjoni ta' riżorsi naturali rinnovabbli b'impatt ambjentali baxx, iżda wkoll fuq l-użu sostenibbli tagħhom mil-lat ekoloġiku, ekonomiku u soċjali, filwaqt li jinżamm l-użu tar-riżorsi bijotiċi fil-konfini tat-tiġdid ekosistemiku;

4.  Jenfasizza l-urġenza li tittieħed azzjoni immedjata biex jiġu appoġġati l-innovazzjoni u l-investiment f’tekniki ġodda u mudelli kummerċjali u li jinħolqu l-inċentivi li jwasslu għal benefiċċji fit-tul għall-ekonomija; jenfasizza r-rwol ewlieni tas-settur privat biex ikun hemm tkabbir ekonomiku sostenibbli;

5.  Huwa tal-fehma li l-bijoekonomija hija kundizzjoni essenzjali biex jinkisbu l-objettivi tal-istrateġija Ewropa 2020 u, aktar speċifikament, tal-inizjattivi "Unjoni ta' Innovazzjoni" u "Ewropa li tuża r-Riżorsi b'Effiċjenza";

6.  Jilqa' l-appoġġ tal-Kummissjoni għal bidla radikali fl-approċċ tal-UE għall-produzzjoni, il-konsum, l-ipproċessar, il-ħażna, ir-riċiklaġġ u r-rimi ta' riżorsi bijoloġiċi;

7.  Jirrimarka li filwaqt li 22 miljun persuna diġà huma impjegati fil-bijoekonomija, kwantità li tammonta għal 9 % tal-impjieg totali fl-UE, il-bijoekonomija għandha l-potenzjal li timpjega miljuni aktar;

8.  Jappoġġja l-proposta tal-Kummissjoni li toħloq task force u pjan direzzjonali dwar il-bijoindustriji li fih jiġi enfasizzat il-kontribut li r-riżorsi rinnovabbli u l-bijoteknoloġiji jistgħu joffru lill-iżvilupp sostenibbli u jħeġġeġ lir-reġjuni u lill-operaturi jiżviluppaw innovazzjonijiet ġodda għas-settur tal-bijoekonomija;

9.  Jistieden lill-Istati Membri jiżviluppaw pjanijiet ta' azzjoni nazzjonali u reġjonali dwar il-bijoekonomija u jitlob lill-Kummissjoni tippreżenta rapport darbtejn fis-sena lill-Parlament dwar l-implimentazzjoni ta' bijoekonomija;

10. Jenfasizza li l-UE hija mexxej dinji f'diversi oqsma tal-bijoxjenza u l-bijoteknoloġiji; huwa tal-fehma li t-tranżizzjoni lejn il-bijoekonomija tippermetti li l-Ewropa twettaq passi importanti 'l quddiem f'termini tal-ekonomija b'użu baxx tal-karbonju, ta' innovazzjoni u kompetittività u ssaħħaħ ir-rwol tagħha fix-xena internazzjonali;

11. Jenfasizza l-importanza u l-potenzjal enormi tal-effiċjenza tal-enerġija u tar-riżorsi; jenfasizza l-ħtieġa li "għandu jiġi prodott aktar b'anqas" ħalli l-bijoekonomija tibqa' sostenibbli;

12. Huwa tal-fehma li bijoekonomija għall-Ewropa m'għandhiex sempliċiment tissostitwixxi l-ekonomija attwali bbażata fuq il-fjuwils fossili jew tirrepeti l-imġiba ta' ħela u x-xejriet ta' konsum attwali iżda għandha tevolvi f'mudell aktar effiċjenti u sostenibbli li jqis il-ġestjoni soċjali u ambjentali ma' tul il-katini tal-valur kollha bbażati fuq il-bijoekonomija;

13. Jilqa' r-reviżjoni li għaddejja bħalissa tal-leġiżlazzjoni tal-Unjoni dwar il-bijofjuwils sabiex jitnaqqsu l-effetti negattivi tal-bidla indiretta fl-użu tal-art (Indirect Land Use Change - ILUC), u jitħeġġeġ is-suq għall-bijofjuwils aktar avvanzati, kif ukoll l-iżvilupp tagħhom, li permezz tagħhom jkun jista' jsir użu akbar ta' materja prima mhux tal-ikel, bħal pereżempju l-iskart, ir-residwi u l-materjali linjoċellulożiċi u ċellulożiċi;

14. Ifakkar li l-fatturi ILUC għall-bijokarburanti u l-bijolikwidi, kif ukoll il-kriterji ta' sostenibilità vinkolanti għall-użu ta' bijomases solidi u tal-gass, għandhom ikunu inklużi fid-Direttiva dwar l-Enerġija Rinnovabbli u fid-Direttiva dwar il-Kwalità tal-Karburanti; jistieden lill-Kummissjoni tipproponi Direttiva Qafas dwar il-Bijomassa li tkopri l-applikazzjonijiet kollha tal-bijomases (enerġija, karburanti, materjali u prodotti kimiċi) u l-introduzzjoni ta' ġerarkija tal-bijomases;

Investimenti fir-riċerka, l-innovazzjoni u l-ħiliet

15. Iħeġġeġ lill-Kummissjoni biex tkompli l-isforzi tagħha fir-riċerka u l-koordinazzjoni tal-iżvilupp mal-fruntieri tal-Istati Membri u mas-setturi varji, u jenfasizza b'mod partikolari, il-ħtieġa ta' riċerka fil-valutazzjoni ta' konfini ta' sostenibilità tar-riżorsi bijotiċi, filwaqt li jitqiesu l-funzjonijiet ekosistemiċi u l-katini naturali tal-ikel kif ukoll id-domanda tal-bniedem għall-ikel;

16. Jitlob għal aktar riċerka dettaljata biex jiġu stabbiliti l-opportunitajiet soċjali u ambjentali kif ukoll il-kostijiet potenzjali tal-bijoekonomija minħabba l-impatti potenzjali differenti u l-metodi żbaljati possibbli tal-isfruttament tal-bijoekonomija, fir-rigward tal-użu ta' riżorsi naturali skarsi, ir-riskju ta' ħsara għall-ambjentu t-telf tal-bijodiversità u l-opportunità għall-konservazzjoni;

17. Jappoġġja l-ħolqien ta' Panil tal-Bijoekonomija ta' esperti biex jgħin ħalli jiżdiedu s-sinerġiji u l-koerenza bejn il-politiki u l-inizjattivi, u Osservatorju tal-Bijoekonomija, sabiex jitħeġġeġ it-tagħlim reċiproku, billi jiġi żgurat skambju kontinwu ta' għarfien u tagħrif bejn istituti ta' riċerka, kumpaniji, istituzzjonijiet, universitajiet, operaturi reġjonali, bdiewa u ċittadini f'żoni rurali, u jitħaffef l-iżvilupp ta' qafas ġuridiku li jżid u jiffaċilita r-riċerka, l-applikazzjonijiet tagħha u l-kummerċjalizzazzjoni tal-innovazzjonijiet;

18. Ifakkar l-importanza tal-applikazzjoni tal-prinċipju prekawzjonarju fl-użu tal-bijoteknolioġiji, speċjalment fl-oqsma tal-manipulazzjoni ġenetika tal-organiżmi u l-bijoloġija sintetika;

19. Huwa tal-fehma li jeħtieġ li jinħolqu programmi ta' informazzjoni u taħriġ multidixxiplinarji u intersettorjali biex is-sejbiet tar-riċerka jitpoġġew għad-dispożizzjoni tal-partijiet interessati, inklużi l-konsumaturi, u jinħolqu l-opportunitajiet biex jiżdiedu l-kuxjenza u l-parteċipazzjoni;

20. Jappella għall-eliminazzjoni tal-ostakoli eżistenti għall-innovazzjoni ma' tul il-katina tal-valur, l-aktar bi proċeduri ta' approvazzjoni tal-UE li jkunu rapidi u bbażati fuq data xjentifika għall-prodotti bijoteknoloġiċi kif ukoll aċċess aktar rapidu għas-suq;

21. Jistieden lill-Kummissjoni tipproponi miżuri prattiċi ta' ambitu reġjonalment komprensiv biex tippromwovi l-produzzjoni u l-konsum ta' prodotti tal-bijoekonomija fil-livell reġjonali;

22. Jenfasizza li l-bijoekonomija teħtieġ li jiġu żviluppati aktar u/jew integrati ħiliet ġodda, għarfien ġdid u dixxiplini ġodda biex jindirizzaw bidliet soċjetali relatati mal-bijoekonomija kif ukoll biex jappoġġaw il-kompetittività, it-tkabbir u l-ħolqien tal-impjiegi, jissodisfaw il-ħtiġijiet tal-industrija u jiżguraw tlaqqigħ aħjar bejn il-ħiliet u l-impjiegi;

23. Jenfasizza li l-bijoekonomija teħtieġ għarfien tal-ogħla livell u forza tax-xogħol kompetenti; isostni li huwa neċessarju li jiġi previst taħriġ vokazzjonali u edukazzjoni superjuri fir-reġjuni tal-Unjoni Ewropea, filwaqt li jitqiesu l-karatteristiċi speċifiċi tar-reġjuni; jirrimarka li s-sistemi tal-edukazzjoni u t-taħriġ fuq firxa wiesgħa fir-reġjuni jistimulaw ukoll l-espansjoni tan-negozju;

24. Jilqa' l-baġit ta' EUR 4.5 biljun propost mill-Kummissjoni fil-Programm ta' Qafas għar-Riċerka (Orizzont 2020) tagħha u jittama li dan il-baġit ikun disponibbli għas-setturi u l-istrumenti kollha tal-bijoekonomija, u għall-finijiet tal-perfezzjoni ulterjuri tal-innovazzjonijiet, inkluża r-riċerka dwar il-limiti ekosistemiċi, l-użu mill-ġdid u r-riċiklaġġ tal-bijomaterjali;

25. Huwa tal-fehma li l-bijoraffineriji bbażati fuq bijomaterjali sostenibbli lokali li ma jkunux prodotti minflok ikel jew minflok ma jintużaw għal skopijiet aktar importanti, huma għodda importanti biex jiġu implimentati proċessi virtwużi tal-konverżjoni ta' impjanti li m'għadhomx jintużaw u biex terġa' tingħata ħajja lil inħawi milquta mill-kriżi permezz ta' proċessi innovattivi u investimenti maħsuba biex joħolqu ekonomija ċirkulari, filwaqt li jawgura li dan ir-rwol jibqa' jitħeġġeġ;

26. Jenfasizza li jeħtieġ li jkun hemm kwantitajiet suffiċjenti ta' materja prima sostenibbli sabiex il-bijoraffineriji fl-Ewropa jiffunzjonaw b'suċċess; jirrimarka li dan ikun jeħtieġ ukoll it-titjib tal-infrastrutturi għall-ħżin u t-trasport u l-iżvilupp tal-loġistiki meħtieġa;

27. Jirrimarka li hemm biss għadd limitat ta' faċilitajiet ta' dimostrazzjoni fl-Ewropa u li jinħtieġu investimenti akbar sabiex jinżamm ir-rwol mexxej tal-industriji Ewropej fis-settur tal-bijoraffineriji; jistieden lill-Kummissjoni u lill-Istati Membri biex jappoġġjaw attivitajiet pilota u ta' dimostrazzjoni biex jittejbu l-prodotti u l-proċessi;

28. Jenfasizza li l-politiki tal-bijoekonomija jridu jitfasslu aħjar biex jiżguraw użu kaskata tal-bijomassa; f'dan ir-rigward jitlob għall-iżvilupp ta' strument legali li jwitti t-triq għal użu aktar effiċjenti u sostenibbli ta' din ir-riżorsa prezzjuża; jenfasizza li tali strument għandu jistabbilixxi prinċipju ta' użu kaskata fil-"piramida tal-bijomassa", billi jqis il-partijiet differenti tagħha u jsaħħaħha fl-ogħla livelli tagħha; jinnota li tali approċċ iwassal għal użu ġerarkiku, intelliġenti u effiċjenti tal-bijomassa, għal applikazzjonijiet li jżidu l-valur u għall-appoġġ ta' miżuri bħal koordinazzjoni tar-riċerka mal-katina tal-valur sħiħa;

Interazzjoni msaħħa fost il-politiki u involviment akbar tal-partijiet interessati

29. Iqis li huwa neċessarju li jiġi żgurat approċċ integrat, koerenti, intersettorjali u multidixxiplinarji għall-bijoekonomija, u jitlob għall-armonizzazzjoni tal-politiki differenti tal-UE involuti u l-prinċipji ta' gwida relatati – bħall-prinċipju prekawzjonarju – fis-setturi varji (il-pjan direzzjonali tal-Effiċjenza tar-Riżorsi, l-Unjoni għall-Innovazzjoni, l-Inizjattiva dwar il-Materja Prima, Orizzont 2020, il-Programm ta' Azzjoni dwar l-Ambjent 2020, il-Koeżjoni, il-Politika Agrikola Komuni u l-Politika Komuni tas-Sajd, id-Direttiva dwar l-Enerġija Rinnovabbli, id-Direttiva Qafas dwar l-Ilma, id-Direttiva Qafas dwar l-Iskart u d-Direttiva dwar l-Imballaġġ, u miżuri speċifiċi dwar il-bijomassa); iqis ukoll li huwa neċessarju li jiġi stabbilit ambjent uniformi, fuq tul ta' żmien twil, stabbli u regolatorju, kemm fil-livell tal-UE kif ukoll nazzjonali, li jfittex li jippromwovi u jżid l-investimenti għall-bijoekonomija fl-Ewropa;

30. Jistieden lill-Kummissjoni biex tagħmel dispożizzjonijiet għal-strumenti finanzjarji ħalli tappoġġja investimenti prekummerċjali, tbiddel is-sejbiet tar-riċerka f'suċċessi kummerċjali u tippermetti lill-kumpaniji innovattivi, speċjalment l-SMEs, biex isibu strumenti finanzjarji u ta' appoġġ oħrajn li jħeġġu l-iżvilupp tal-bijoekonomija, per eżempju permezz tal-użu tal-Fondi Reġjonali u Strutturali u l-faċilitajiet tal-qsim tar-riskji tal-Bank Ewropew tal-Investiment, permezz ta' koerenza miżjuda bejn il-fondi ta' riċerka u innovazzjoni differenti tal-UE, u permezz tat-twaqqif ta' one-stop shop għal informazzjoni dwar l-inizjattivi kollha relatati mal-ekonomija u bbażati fuq il-bijo bil-għan li jintlaħaq l-akbar impatt possibbli; jirrikonoxxi d-diffikultà, u r-riskji finanzjarji, assoċjati mal-kummerċjalizzazzjoni tal-innovazzjonijiet tal-bijoekonomija u mat-tqegħid tagħhom fis-suq;

31. Jitlob li tiġi żviluppata l-infrastruttura industrijali u jiġu ottimizzati l-katini tal-provvista għall-prodotti bijoloġiċi f'żoni rurali u kostali bl-għan li jinħolqu impjiegi ġodda fl-agrikoltura, il-forestrija u l-akkwakultura; jitlob li l-finanzjament għall-iżvilupp rurali tal-UE jkun disponibbli għal dan l-għan u li dan isir b'tali mod li jnaqqas aktar milli jżid, id-dannu għall-ambjent u t-telf tal-bijodiversità;

32. Jappella għal azzjoni mmirata u konkreta sabiex jitnaqqsu l-kumplessità u t-tul tal-proċeduri burokratiċi ta' awtorizzazzjoni li jikkumplikaw il-proċessi ta' żvilupp tal-bijoraffineriji u li jistgħu jinkoraġġixxu t-trasferiment ta' teknoloġiji innovattivi u avvanzati barra l-UE;

33. Japprova l-użu tal-formula tas-Sħubija Pubblika Privata (PPP), filwaqt li jieħu tagħlimiet adegwati mill-problemi li ħarġu f'applikazzjonijiet preċedenti tal-istess formula f'setturi oħra, jistieden lill-Kummissjoni talloka riżorsi adegwati għall-iżvilupp u t-tkabbir ta' dawn is-sħubiji, fit-twemmin li dan huwa mezz ewlieni li jippermetti l-ħolqien ta' ktajjen ta' valur ġodda, billi jissaħħu l-ktajjen eżistenti u jiġi ffaċilitat l-investiment f'teknoloġiji u f'prototipi li jistgħu jittrasferixxu r-riżultati tar-riċerka fis-swieq;

34. Jaqbel mal-ħtieġa ta' approċċ f'diversi livelli, u jappella li tingħata attenzjoni dejjem akbar lid-dimensjoni reġjonali u lokali tal-bijoekonomija u lil inizjattivi minn isfel għal fuq; jilqa' t-twaqqif ta' pjattaformi tal-bijoekonomija, fil-livell reġjonali, nazzjonali u tal-UE, li se jkunu jistgħu jkejlu l-progress imwettaq f'settur partikolari u jippermettu li jseħħ skambju ta' għarfien u tal-aħjar prattiki, bil-għan li l-iżviluppi tal-bijoekonomija jseħħ b'mod ugwali fl-UE kollha; barra minn hekk jistieden lill-Kummissjoni tinvolvi wkoll esperti fil-qasam u fid-dixxiplini kollha interessati kif ukoll rappreżentanti tal-konsumaturi u taċ-ċittadini; jirrimarka li l-ekonomiji reġjonali għandhom rwol ċentrali fil-kisba ta' tkabbir intelliġenti, sostenibbli u inklużiv;

35. Jemmen li l-inizjattivi minn isfel għal fuq huma importanti fil-ħolqien ta' soċjetà bbażata fuq il-prodotti bijoloġiċi u li approċċ xprunat min-negozju u mid-domanda, flimkien ma' approċċ immexxi mill-gvern, huma kruċjali; iqis li għandhom jiġu pprovduti l-possibilitajiet adegwati għall-inizjattivi reġjonali; jistieden lill-Kummissjoni tappoġġja tali netwerks u clusters bil-ħsieb li tippromwovi l-iskambju ta' esperjenzi;

It-tisħiħ tas-swieq u tal-kompetittività

36. Jistieden lill-Kummissjoni tiffoka l-appoġġ finanzjarju fuq l-innovazzjoni b'konformità mal-Unjoni għall-Innovazzjoni, fosthom il-prijoritajiet ta' Orizzont 2020, filwaqt li tħeġġeġ is-sejbiet tar-riċerka għall-kummerċjalizzazzjoni, bil-għan li tagħlaq l-hekk imsejjaħ divarju tal-"wied tal-mewt" tas-settur tar-riċerka fl-Ewropa;

37. Iqis li hemm numru ta' għodod eċċellenti (akkwist pubbliku, standardizzazzjoni, inċentivi fiskali, sistemi ta' ċertifikazzjoni u ta' tikkettjar speċifiċi) li jistgħu jiggarantixxu provvista suffiċjenti ta' prodotti b'bażi bijoloġika li jkunu sostenibbli u ta' kwalità għolja kif ukoll jipprovdu sistemi ta' produzzjoni effiċjenti mil-lat ta' riżorsi; jemmen li jeħtieġ li jkun hemm riforma tal-leġiżlazzjoni attwali; jistieden lill-Kummissjoni tiżviluppa kriterji ta' sostenibilità għall-użu tal-bijomassa li fuqhom għandhom jiġu bbażati wkoll għodod li joħolqu s-suq;

38. Jagħmel enfasi fuq il-fatt li bijoekonomija dipendenti fuq l-isfruttament ta' riżorsi bijoloġiċi, minflok enerġija fossili, trid tkun iggwidata minn qafas politiku sod li jqis mhux biss il-vijabilità ekonomika, iżda wkoll fatturi ta' sostenibilità soċjali u ekoloġika;

39. Huwa tal-fehma li huwa essenzjali li l-konsumaturi jiġu involuti u mgħarrfa dwar l-għażla ta' prodotti u servizzi b'bażi bijoloġika; jittama, f'dan ir-rigward, li jkun hemm standardizzazzjoni ta' din il-produzzjoni fl-UE abbażi ta' biżżejjed kriterji ta' sostenibilità, u li din titqies bħala strument li jippromwovi suq Ewropew vantaġġuż ta' dawn il-prodotti;

40. Jemmen li t-tul tal-ħajja tal-prodotti bbażati fuq il-bijoloġija ma jistax jitnaqqas b'mod artifiċjali; il-prodott għandu jitfassal għall-itwal ħajja possibbli;

41. Jenfasizza li l-bijoekonomija se tagħti kontribut sinifikanti lill-iżvilupp tal-inħawi rurali u tax-xtut; huwa tal-fehma li s-sinerġija u kooperazzjoni mill-qrib ma' tul il-katina tal-valur, inkluż il-produtturi lokali ta' materja prima agrikola u tal-forestrija, u l-bijoraffineriji, jistgħu jikkontribwixxu għat-tisħiħ tal-kompetittività u għaż-żieda fil-profitabbiltà tar-reġjuni rurali; jisħaq fuq il-bżonn li tiġi żviluppata strateġija bijoekonomika fuq tul ta' żmien twil, li tqis kif inhu xieraq il-bżonn li tiġi żgurata s-sikurezza tal-ikel;

42. Jeħtieġ li l-proċessi bijoloġiċi u bijoteknoloġiċi li huma żviluppati jistgħu jiġu użati f'riżorsi rinnovabbli b'bażi bijoloġika mill-iskart u minn uċuħ tar-raba' mhux tal-ikel, u wkoll bħala komponenti fin-negozji agrikoli u bbażati fuq il-forestrija eżistenti;

43. Isostni li wieħed mill-prinċipji ta' gwida tal-bijoekonomija huwa li tissaħħaħ l-effiċjenza tar-riżorsi u titnaqqas id-dipendenza fuq materja prima, enerġija u riżorsi naturali mhux rinnovabbli importati; jiġbed l-attenzjoni għall-importanza tas-settur tal-foresti u industriji oħrajn ibbażati fuq il-bijoloġija u jsostni li r-riżorsi naturali rinnovabbli u l-materja prima newtri mill-karbonju, bħall-injam u l-fibra tal-injam, jistgħu jissostitwixxu l-materja prima fossila mhux rinnovabbli; jirrimarka li l-industrija tal-bijoekonomija tipproduċi ħafna prodotti ta' valur miżjud għoli, bħall-kimiċi, mediċini, plastiks, u materja prima innovattiva oħra, u li toħloq ukoll l-impjiegi; jenfasizza l-potenzjal tal-bijoteknoloġiji bbażati fuq riżorsi tal-baħar;

44. Jistieden lill-Kummissjoni tippromwovi miżuri biex iżżid il-potenzjali tal-materja prima tal-ikel b'mod sostenibbli, timmobilizza aħjar tali materja prima tal-ikel, tiġbor skart bijodegradabbli – billi tiġi evitata t-trasportazzjoni eċċessiva – u tiżgura li l-użu tal-bijomassa jibqa' fil-limiti ekoloġiċi u ma jnaqqasx il-funzjoni tal-assorbiment tal-karbonju; f'dan il-kuntest iqis urġenti li jiġu stabbiliti kriterji ta' sostenibilità għall-użu ta' enerġija tal-bijomassa sabiex tiġi żgurata d-disponibilità tal-bijomassa għal skopijiet aktar effiċjenti mil-lat ta' riżorsi, filwaqt li jiġi evitat li l-inċentivi għat-trasformazzjoni tal-bijomassa f'enerġija joħolqu distorsjonijiet fis-suq u jnaqqsu d-disponibbiltà tagħhom għall-produtturi;

45. Iqis li huwa importanti li wieħed jinvesti fil-ktajjen tal-provvista tal-bijoekonomija, sabiex ikun hemm garanzija tad-disponibilità tal-materja prima; isostni li l-istrateġiji tal-bijoekonomija għandhom jinkuraġġixxu mhux biss l-użu aktar effiċjenti tal-iskart tad-djar u muniċipali, iżda wkoll l-irkupru tal-flussi u l-fdalijiet tal-prodotti sekondarji agrikoli u tal-forestrija; jappella biex ikun hemm leġiżlazzjoni aħjar u li tippermetti ċ-ċertezza ġuridika u tipprovdi appoġġ b'saħħtu għall-użu sostenibbli tar-riżorsi tal-bijoekonomija u l-isfruttament tal-materja prima u sabiex il-politika tkun ibbażata, f’kull rigward, fuq approċċ flessibbli fit-tul u li tippromwovi l-investimenti;

46. Iqis li, skont l-istrateġija definita mill-politika industrijali Ewropea l-ġdida, il-bijoekonomija tista' tagħti kontribut importanti fil-ġlieda kontra l-proċess ta' deindustrijalizzazzjoni li llum qed jolqot lill-Ewropa, u tgħin biex treġġgħu lura permezz ta' strateġiji ġodda li jistimulaw is-suq u jniedu mill-ġdid il-kompetittività tas-sistema territorjali;

47. Iħeġġeġ bil-qawwa lill-Kummissjoni tiddefinixxi s-sussidji li jagħmlu ħsara lill-ambjent b'riżultat ta' "azzjoni tal-gvern li tikkonferixxi vantaġġ lil konsumaturi jew produtturi, sabiex jiġi ssupplimentat id-dħul tagħhom jew jitnaqqsu l-ispejjeż tagħhom iżda li, minħabba f'hekk, issir diskriminazzjoni fil-konfront ta' prattiki ambjentali tajba"[3]; jistieden lill-Kummissjoni u lill-Istati Membri jadottaw pjanijiet konkreti, mingħajr dewmien u sal-2014, ibbażati fuq din id-definizzjoni għat-tneħħija progressiva tas-sussidji li huma ta' ħsara għall-ambjent qabel l-2020, inklużi s-sussidji li jagħtu inċentiv għall-użu ineffiċjenti ta’ riżorsi rinovabbli u s-sussidji fuq il-fjuwils fossili, u jirrappurtaw dwar il-progress permezz tal-Programmi Nazzjonali ta' Riforma; f'dan il-kuntest, jinsab imħasseb li s-sussidji għall-użu tal-bijomaterjali għall-enerġija diġà qed idgħajfu l-objettivi tal-effiċjenza tar-riżorsi;

48. Jinnota bi tħassib li d-domanda li qed tiżdied għall-bijomassa, b'mod partikolari għall-injam, tista' tiskatta deforestrazzjoni ġenerali fil-pajjiżi fil-fażi ta' żvilupp, fejn l-emissjonijiet ta' gassijiet b'effett ta' serra mhumiex ikkunsidrati skont il-Protokoll ta' Kyoto; jirrimarka li filwaqt li dan jista' jkollu impatt fuq il-kwalità tal-ħamrija, iċ-ċikli tal-ilma u l-bijodiversità, iżid il-pressjoni fuq il-ftehimiet globali bħall-Konvenzjoni dwar id-Diversità Bijoloġika (CBD) u l-Programm ta' Kollaborazzjoni tan-Nazzjonijiet Uniti dwar it-Tnaqqis ta' Emissjonijiet mid-Deforestazzjoni u d-Degradazzjoni tal-Foresti fil-Pajjiżi li qed jiżviluppaw (REDD); jibża' wkoll li, meta jitqies li s-sistemi tal-governanza tal-art huma dgħajfa f'ħafna pajjiżi fil-fażi ta' żvilupp, id-domanda dejjem akbar għal prodotti tal-injam tista' tiskatta l-qtugħ illegali tas-siġar u ddgħajjef min-naħa tagħha l-ftehimiet volontarji ta' sħubija fl-ambitu tal-Pjan ta' Azzjoni tal-Infurzar tal-Liġi tal-Foresta, Governanza u Kummerċ (FLEGT);

49. Jenfasizza li t-tranżizzjoni lejn bijoekonomija se tikkontribwixxi għall-integrazzjoni ulterjuri tar-riżultati ta' Rio+20 fil-politiki tal-UE; jemmen li l-UE għandha tintensifika aktar il-kontribut tagħha għall-inizjattivi li jiffaċilitaw it-tranżizzjoni lejn ekonomija ħadra inklużiva fil-livell internazzjonali;

50. Jitlob li l-UE ssir ċentru ta' riċerka u innovazzjoni dinamiku fil-livell internazzjonali fil-qasam tar-riċerka dwar il-bijoekonomija; jiddikjara li prodotti, proċessi u servizzi ġodda bbażati fuq riżorsi rinnovabbli se jsaħħu l-kompetittività tal-industrija Ewropea u jpoġġuha fuq quddiem nett fil-livell internazzjonali;

51. Iqis li huwa fundamentali l-iżvilupp ta' standards internazzjonali ta' sostenibilità ġuridikament vinkolanti għas-setturi kollha tal-użu tal-bijomases, kif ukoll kriterji vinkolanti ta' ġestjoni forestali sostenibbli; iħeġġeġ lill-UE ssegwi l-adozzjoni ta' ftehimiet multilaterali u tforni, partikolarment għall-pajjiżi l-anqas żviluppati, sostenn istituzzjonali u tekniku relatat biex jiġi garantit l-użu sostenibbli tal-bijomases.

52. Huwa tal-fehma li l-mudell tal-bijoekonomija żviluppat fi ħdan din l-istrateġija se jsolvi l-kwistjonijiet kritiċi kontinġenti u, fuq żmien itwal, jista' jagħti bidu għal mudelli ta' produzzjoni, konsum, żvilupp u stili ta' ħajja aktar sostenibbli u effettivi, billi jattiva mill-ġdid il-proċess ta' tkabbir Ewropew bis-saħħa ta' sinteżi ġdida bejn l-ekonomija, l-ambjent u l-kwalità soċjali;

53. Jagħti struzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

• [1]  Testi adottati, P7_TA(2012)0223.
• [2]  Testi adottati, P7_TA(2011)0364.
• [3] ¹ Test adattat mill-OECD (1998 u 2005) f'IEEP et al. 2007, ara http://ec.europa.eu/environment/enveco/taxation/index.htm

Kuntest ġenerali

Fl-erbgħin sena li ġejjin, l-Ewropa se jkollha tħabbat wiċċha ma' ħafna sfidi soċjali. Iż-żieda kontinwa fil-popolazzjoni dinjija, it-tkabbir drastiku fid-domanda għall-ikel u l-enerġija u l-iskarsezza tar-riżorsi naturali mad-dinja kollha jeħtieġu li l-Ewropa tirrifletti dwar l-approċċ il-ġdid li għandha tieħu f'termini ta' produzzjoni u konsum, sabiex tindirizza dawn ir-rekwiżiti ġodda b'mod effiċjenti u sostenibbli.

Il-bijoekonomija tirrappreżenta opportunità importanti biex tingħata risposta għal dawn l-isfidi u tiggarantixxi mhux biss sostenibilità akbar iżda wkoll appoġġ għall-iżvilupp rurali, it-tnaqqis potenzjali tal-emissjonijiet ta' gassijiet b'effett ta' serra, sostenibilità akbar taċ-ċirku produttiv u t-tixrid tal-innovazzjoni industrijali ma' tul il-katina tal-valur kollha.

L-istrateġija għall-bijoekonomija tista' tkun is-soluzzjoni għad-dipendenza fuq il-fjuwils fossili u t-triq lejn tkabbir intelliġenti. B'ħarsa lejn il-ġejjieni, tista' tkun ukoll ir-risposta għas-sigurtà tal-ikel, għat-tkabbir ekonomiku u għal żieda fil-livelli ta' impjieg.

Il-pożizzjoni tar-Rapporteur

Ir-rapporteur jilqa' l-komunikazzjoni tal-Kummissjoni dwar bijoekonomija għall-Ewropa u l-pjan ta' azzjoni għall-implimentazzjoni tal-istrateġija li tinsab fiha, maqsuma fi tliet partijiet kumplimentari: il-promozzjoni tar-riċerka, l-innovazzjoni u l-ħiliet, sinerġija akbar bejn il-politiki differenti u t-tisħiħ tas-swieq u tal-kompetittività.

Għar-rapporteur, l-appoġġ għal dan is-settur huwa investiment għall-ġejjieni, u l-Ewropa tista' u għandu jkollha rwol ewlieni fil-kisba dan l-objettiv. Biex dan iseħħ, jeħtieġ li l-Ewropa toħloq il-bażi għal ambjent regolatorju ċar u stabbli u tiżgura l-armonizzazzjoni tal-politiki dwar l-agrikoltura, l-industrija, l-ambjent u l-innovazzjoni, li lkoll huma involuti fl-oqsma tal-bijoekonomija. Ir-rapporteur jaqbel mal-ħtieġa li jitħeġġeġ approċċ interdixxiplinari u intersettorjali u, fl-istess ħin, jiġi żgurat li jkun hemm skambju ta' għarfien fuq livell reġjonali, nazzjonali u Ewropew biex jitħeġġeġ l-iżvilupp uniformi tal-bijoekonomija fl-UE kollha.

Ir-rapporteur jemmen li jeħtieġ li jiġu ggarantiti u żviluppati programmi ta' riċerka u innovazzjoni li jkunu kkoordinati u koerenti, li jiġu pprovduti għodod li jappoġġjaw l-investimenti industrijali, li jiġu mobilitati riżorsi finanzjarji u jiġi żgurat li r-riżultati miksuba jkollhom l-akbar impatt fuq is-soċjetà u fis-suq. L-infrastruttura teknoloġika, l-eċċellenza xjentifika, l-impjanti u l-bijoindustriji kollha jistgħu verament jikkontribwixxu sabiex l-Ewropa twettaq passi kbar 'il quddiem f'termini ta' innovazzjoni u kompetittività u biex isaħħu r-rwol internazzjonali Ewropew.

F'dan il-kuntest, anki l-forom ġodda ta' sħubija li jistgħu jinvolvu l-kontribut konġunt tal-entitajiet pubbliċi u privati jistgħu jikkontribwixxu ħafna għall-iżvilupp ta' din l-istrateġija. Il-ħolqien ta' sħubija pubblika-privata dedikata għall-bijoindustriji jista' fil-fatt ikun ta' appoġġ għal proġetti ġodda, jippermetti l-iżvilupp ta' prodotti ġodda u jiżgura li dawn effettivament jitqiegħdu fis-suq, u jillimita r-riskju li kundizzjonijiet aktar favorevoli barra l-UE jħeġġu l-migrazzjoni tal-eċċellenza u ta' proġetti innovattivi barra mill-Ewropa.

Għal dawn ir-raġunijiet kollha, ir-rapporteur jemmen li sforzi dejjem akbar għandhom jiġu diretti biex jappoġġjaw il-progress ulterjuri f'din id-direzzjoni, sabiex jinħolqu mudelli tal-produzzjoni, konsum, żvilupp u stili ta' ħajja aktar sostenibbli u effettivi u – ukoll bis-saħħa ta' sinteżi ġdida bejn l-ekonomija, l-ambjent u l-kwalità soċjali – sabiex jiġi attivat mill-ġdid il-proċess Ewropew ta' tkabbir u reindustrijalizzazzjoni.

għall-Kumitat għall-Ambjent, is-Saħħa Pubblika u s-Sikurezza tal-Ikel

dwar l-Innovazzjoni għal Tkabbir Sostenibbli: Bijoekonomija għall-Ewropa
(2012/2295(INI))

Rapporteur għal opinjoni: Isabella Lövin

SUĠĠERIMENTI

Il-Kumitat għall-Iżvilupp jistieden lill-Kumitat għall-Ambjent, is-Saħħa Pubblika u s-Sikurezza tal-Ikel, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jagħmel enfasi fuq il-fatt li bijoekonomija dipendenti mill-isfruttament ta' riżorsi bijoloġiċi, minflok mill-enerġija fossili, trid tkun iggwidata minn qafas politiku sod li jqis mhux biss il-vijabilità ekonomika, iżda wkoll fatturi ta' sostenibilità soċjali u ekoloġika;

2.  Jenfasizza li l-bijodiversità u l-ekosistemi jagħtu benefiċċji kollettivi u għandhom jiġu kkunsidrati bħala beni komuni; ifakkar li meta l-bijodiversità tkun ġestita u rregolata tajjeb, il-beni bbażati fuq il-bijodiversità jistgħu jrendu benefiċċji ekonomiċi sinifikanti; jilmenta, madankollu, li ħafna minn dawk li jfasslu l-politika jaraw gwadann ekonomiku żgħir fil-konservazzjoni u l-investiment fil-bijodiversità; għalhekk jisħaq dwar il-valur tas-"servizzi tal-ekosistema" u l-kontribut tagħhom għall-iżvilupp ekonomiku u soċjali;

3.  Jenfasizza li l-ebda sistema għall-ġenerazzjoni tal-ġid ma tista' tkun sostenibbli jekk tiddegrada l-bażi tar-riżorsi; jissottolinja li, b'mod parallel għall-funzjonijiet orjentati lejn is-suq, il-bijoekonomija ssostni wkoll firxa wiesgħa ta' funzjonijiet ta' beni pubbliċi, li bħalissa ma jiġux remunerati mis-suq, u li għandhom jiġu preservati, bħall-pajsaġġi agrikoli u tal-foresti, il-bijodiversità tar-raba' u tal-foresti, il-kwalità u d-disponibilità tal-ilma, il-funzjonalità tal-ħamrija, l-istabilità tal-klima, il-kwalità tal-arja u r-reżistenza għall-għargħar u għan-nirien;

4.  Huwa tal-fehma li t-tranżizzjoni għal bijoekonomija sostenibbli se jkollha suċċess biss jekk l-effiċjenza tar-riżorsi ssir il-pilastru tal-ekonomija u jekk l-inġinerija ġenetika ma tintużax bħala xprun ta' din l-ekonomija;

5.  Jemmen li kull strateġija għal bijoekonomija għandha tadotta l-prinċipju gwida tal-ġerarkija tal-bijomassa u tappoġġa "użu kaskata" tal-bijomassa li tkun diretta l-ewwel lejn l-iżgurar ta' servizzi bażiċi mhux ippremjati mis-suq u mbagħad lejn applikazzjonijiet b'valur għoli bħal materjali (aktar milli l-bijoenerġija, li għandha valur aktar baxx);

6.  Jenfasizza li bijoekenomija sostenibbli għandha tinbena fuq trasport modali; b'mod partikolari, jenfasizza li sabiex jiġi vvalutat jekk bijoproċess jew bijoprodott speċifiku hux qed inaqqas l-emissjonijiet diretti jew indiretti ta' gassijiet b'effett ta' serra, għandhom jitqiesu l-istadji kollha mill-estrazzjoni tal-materja prima sal-istat ta' użu aħħari; jenfasizza li l-politiki tal-UE u dawk nazzjonali għandhom jippromwovu alternattivi nodfa għall-karburanti fossili, bħal vetturi li jaħdmu b'elettriku rinnovabbli kif ukoll enerġija solari jew tar-riħ, minflok ma jistimolaw il-bidla għall-bijomassa f'setturi fejn il-valur miżjud ikun inqas (bħal fil-produzzjoni tal-bijokarburanti jew bijoenerġija oħra);

7.  Josserva li l-kwantità ta' bijomassa sostenibbli minn sorsi tal-UE mhi se tkun qatt biżżejjed biex tissodisfa d-domandi attwali ta' enerġija u ż-żieda u l-użi alternattivi tal-bijomassa, u li l-UE se tkun għalhekk dejjem aktar dipendenti mill-importazzjonijiet mill-pajjiżi fil-fażi tal-iżvilupp, fejn l-isfruttament tal-bijomassa jirrappreżenta sfida kbira f'termini ta' governanza, bħal fil-każ tal-konservazzjoni tal-foresti, u li b'hekk jagħmilha diffiċli li jiġu ssodisfati l-kriterji ta' sostenibilità u l-miżuri tal-UE għall-bijomassa impurtata jew li tiġi kkontrollata l-implimentazzjoni tagħhom permezz tal-monitoraġġ u l-valutazzjoni; jenfasizza f'dan ir-rigward l-importanza ta' miżuri tal-effiċjenza u tal-iffrankar tal-enerġija biex jiġi żgurat li l-UE tagħmel iktar b'inqas riżorsi, u b'hekk tnaqqas id-domanda għall-bijomassa;

8.  Jinsisti li l-UE għandha d-dmir li tnaqqas id-dipendenza tagħha fuq il-ħut minn pajjiżi fil-fażi ta' żvilupp għal finijiet ta' ikel, kif ukoll għal finijiet ta' għalf għall-akkwakultura; jenfasizza li, fir-riforma attwali tal-PKS, għandha tingħata prijorità lill-miżuri li jsostnu ġestjoni ambjentalment sostenibbli tas-sajd u l-użu ta' speċijiet mhux karnivori fl-akkwakultura;

9.  Jinnota bi tħassib li d-domanda li qed tiżdied għall-bijomassa, b'mod partikolari għall-injam, tista' tiskatta deforestrazzjoni ġenerali fil-pajjiżi fil-fażi ta' żvilupp, fejn l-emissjonijiet ta' gassijiet b'effett ta' serra mhumiex ikkunsidrati skont il-Protokoll ta' Kyoto; jirrimarka li filwaqt li dan jista' jkollu impatt fuq il-kwalità tal-ħamrija, iċ-ċikli tal-ilma u l-bijodiversità, iżid il-pressjoni fuq il-ftehimiet globali, bħall-Konvenzjoni dwar id-Diversità Bijoloġika (CBD) u l-REDD tan-Nazzjonijiet Uniti; jibża' bl-istess mod li, fid-dawl tas-sistemi ta' governanza tal-artijiet huma dgħajfa f'ħafna pajjiżi fil-fażi tal-iżvilupp, id-domanda dejjem akbar għal prodotti tal-injam tista' tiskatta l-qtugħ illegali tas-siġar u konsegwentement ddgħajjef il-ftehimiet volontarji ta' sħubija fl-ambitu tal-FLEGT, iżda żżid ukoll il-pressjoni fuq ftehimiet globali bħall-Konvenzjoni dwar id-Diversità Bijoloġika (CBD) u l-REDD tan-Nazzjonijiet Uniti;

10. Jenfasizza l-importanza tal-mangrovji, tal-mergħat tal-ħaxix tal-baħar, tal-bwar salmastri u tal-foresti tal-Laminariales (kelp) bħala bwar tal-karbonju b'rendiment għoli; iwissi dwar il-qerda rapida ta' dawn l-ekosistemi kostali minħabba, fost affarijiet oħra, id-domanda li qed tiżdied għal frott tal-baħar mill-akkwakultura; jitlob li jkun hemm ekwivalenti marin tal-iskema REDD għas-salvagwardja tal-ekosistemi kostali u marini bħall-bwar tal-karbonju;

11. Jitlob li l-UE ssir ċentru ta' riċerka u innovazzjoni dinamiku fil-livell internazzjonali fil-qasam tar-riċerka dwar il-bijoekonomija; jiddikjara li prodotti, proċessi u servizzi ġodda bbażati fuq riżorsi rinnovabbli se jsaħħu l-kompetittività tal-industrija Ewropea u jpoġġuha fuq quddiem nett fil-livell internazzjonali;

12. Ifakkar li l-fatturi ILUC għall-bijokarburanti u l-bijolikwidi, kif ukoll il-kriterji ta' sostenibilità vinkolanti għall-użu ta' bijomases solidi u tal-gass, għandhom ikunu inklużi fid-Direttiva dwar l-Enerġija Rinnovabbli u fid-Direttiva dwar il-Kwalità tal-Karburanti; jistieden lill-Kummissjoni tipproponi Direttiva Qafas dwar il-Bijomassa li tkopri l-applikazzjonijiet kollha tal-bijomases (enerġija, karburanti, materjali, prodotti kimiċi) u l-introduzzjoni ta' ġerarkija tal-bijomases;

13. Ifakkar li l-protezzjoni tal-bijodiversità hija komponent ewlieni għall-ilħiq tal-Għanijiet ta' Żvilupp tal-Millenju (inkluż l-Għan 1 dwar il-Qerda tal-Faqar Estrem u l-Ġuħ u l-Għan 7 dwar l-Iżgurar tas-Sostenibilità Ambjentali); b'mod partikolari, jisħaq fuq l-importanza ta' bijodiversità u ekosistemi b'saħħithom għall-produzzjoni primarja bħall-agrikoltura, il-forestrija u s-sajd; għalhekk, iqis li l-produzzjoni tal-bijomases tiġi analizzata fir-rigward tal-impatt tagħha fuq is-servizzi tal-ekosistemi;

14. Jibża' li d-domanda dejjem akbar ta' bijomases taggrava l-insigurtà tal-ikel fil-pajjiżi fil-fażi tal-iżvilupp, permezz tad-devjazzjoni tal-għelejjel u tal-artijiet mill-produzzjoni tal-ikel, il-privazzjoni tad-drittijiet ta' użu tal-art u t-tfaqqir konsegwenza tal-akkapparrament tal-art u l-intensifikazzjoni tal-volatilità tal-prezzijiet tal-ikel; jirrimarka li d-domanda għal-bijokarburanti diġà hija waħda mill-ixprunijiet tal-akkwisti tal-art fil-pajjiżi fil-fażi ta' żvilupp, b'mod partikolari fl-Afrika sub-Saħarjana; ifakkar li minħabba dawn l-akkwisti tal-art, il-popli indiġeni jitilfu l-aċċess tagħhom għall-art, u b'hekk l-aċċess tagħhom għall-ikel u l-ilma; jenfasizza wkoll li filwaqt li l-MDGs jistabbilixxu objettiv ta' tnaqqis bin-nofs tan-numru ta' persuni mingħajr aċċess sikur għall-ilma sal-2015, l-attivitajiet tal-bijoekonomija li jikkonsmaw l-ilma jistgħu jaggravaw il-pressjoni fuq ir-riżorsi tal-ilma fil-pajjiżi fil-fażi ta' żvilupp u b'hekk jikkontribwixxu għal skarsezza ġenerali tal-ikel; iħeġġeġ lill-UE ssegwi r-rakkomandazzjoni tar-Rapporteur Speċjali tan-Nazzjonijiet Uniti dwar id-dritt għall-ikel fl-agroekoloġija biex tintlaħaq is-sigurtà tal-ikel, filwaqt li jiġi indirizzat it-tibdil fil-klima;

15. Iqis li huwa fundamentali l-iżvilupp ta' standards internazzjonali ta' sostenibilità ġuridikament vinkolanti għas-setturi kollha tal-użu tal-bijomases, kif ukoll kriterji vinkolanti ta' ġestjoni forestali sostenibbli; iħeġġeġ lill-UE ssegwi l-adozzjoni ta' ftehimiet multilaterali u tforni, partikolarment għall-pajjiżi l-anqas żviluppati, sostenn istituzzjonali u tekniku relatat biex jiġi garantit l-użu sostenibbli tal-bijomases.

RIŻULTAT TAL-VOTAZZJONI FINALI FIL-KUMITAT

għall-Kumitat għall-Ambjent, is-Saħħa Pubblika u s-Sikurezza fl-Ikel

dwar l-Innovazzjoni għal Tkabbir Sostenibbli: Bijoekonomija għall-Ewropa
(2012/2295(INI))

Rapporteur: Tamás Deutsch

SUĠĠERIMENTI

Il-Kumitat għall-Impjiegi u l-Affarijiet Soċjali jistieden lill-Kumitat għall-Ambjent, is-Saħħa Pubblika u s-Sikurezza tal-Ikel, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

–   wara li kkunsidra l-istrateġija Ewropa 2020, li titlob tkabbir intelliġenti u ekoloġiku u aktar opportunitajiet ta' impjiegi,

A. billi l-promozzjoni tal-bijoekonomija se twassal għal tkabbir ekonomiku u se toħloq numru sinifikanti ta' impjiegi f'żoni rurali, kostali u industrijali;

B.  billi l-bijoekonomija se tagħmilna anqas dipendenti fuq il-fjuwils fossili, li fil-parti l-kbira tagħhom huma importati;

C. billi l-bijoekonomija tal-UE diġà għandha fatturat ta' kważi EUR 2 triljun, u huwa mistenni li jkun hemm tkabbir sinifikanti mill-produzzjoni primarja sostenibbli, l-ipproċessar tal-ikel, il-bijoteknoloġija industrijali u l-bijoraffineriji;

D. billi l-Fondazzjoni Ewropea għat-Titjib tal-Kondizzjonijiet tal-Ħajja u tax-Xogħol tirrakkomanda l-antiċipazzjoni u l-ġestjoni tal-effetti tat-tħaddir tal-industriji fuq il-kwantità u l-kwalità tal-impjiegi;

E.  billi studju mill-Organizzazzjoni Internazzjonali tax-Xogħol[1] enfasizza l-ħtieġa li jiġu promossi s-saħħa u s-sigurtà fuq il-post tax-xogħol fl-ekonomija ekoloġika;

F.  billi studju miċ-Ċentru Ewropew għall-Iżvilupp tat-Taħriġ Vokazzjonali (Cedefop) dwar "Ħiliet ħodor u kuxjenza ambjentali fl-edukazzjoni u t-taħriġ vokazzjonali"[2] talab li ssir aktar riċerka biex tidentifika d-dinamika tal-bidla okkupazzjonali u interna fis-suq tax-xogħol fil-livell settorjali, sabiex tgħin fil-valutazzjoni tal-adegwatezza tal-provvista tal-ħaddiema u n-nuqqas ta' tlaqqigħ tal-ħiliet;

1.  Jitlob li tiġi żviluppata soċjetà aktar innovattiva, effiċjenti fir-riżorsi u kompetittiva li tista' tiżgura li s-sigurtà tal-ikel tmur id f'id mal-użu sostenibbli tar-riżorsi rinovabbli, u jenfasizza li l-fjuwil għandu jittieħed primarjament minn dawk il-prodotti sekondarji mill-katina tal-produzzjoni tal-ikel, u mill-ipproċessar tal-injam, li għalihom ma jeżisti l-ebda użu ieħor ta' valur skont il-ġerarkija tal-iskart u li, jekk jintużaw għelejjel li għandhom enerġija f'forma kkonċentrata ħafna u li jistgħu jiġu pproċessati wkoll fi prodotti tal-ikel, jeħtieġ li jinqdew il-ħtiġijiet tal-produzzjoni tal-ikel u jeħtieġ ukoll li jkunu ssodisfati kundizzjonijiet stretti rigward il-promozzjoni tal-konservazzjoni tan-natura u tal-bijodiversità;

2.  Jenfasizza li r-riċerka u l-innovazzjoni huma l-bażi għal bidla strutturali minn industrija bbażata fuq iż-żejt għall-bijoindustrija, bidla li toffri opportunitajiet kbar għal tkabbir u impjiegi, ħidma interdixxiplinarja u kooperazzjoni internazzjonali u fl-UE sabiex jiġi aċċellerat it-trasferiment għall-prattika biex b'hekk tiġi stabbilita ekonomija bbażata fuq l-għarfien;

3.  Jirrimarka li l-antiċipazzjoni tal-bidla, it-titjib tal-għarfien u l-ħiliet u t-tlaqqigħ aħjar tal-ħiliet u l-impjiegi b'mod soċjalment responsabbli huma essenzjali għas-suċċess tal-istrateġija tal-bijoekonomija fit-twettiq ta' tkabbir u ta' opportunitajiet ġodda ta' impjiegi fl-Ewropa;

4.  Jirrimarka li filwaqt li 22 miljun persuna diġà huma impjegati fil-bijoekonomija, kwantità li tammonta għal 9 % tal-impjieg totali fl-UE, il-bijoekonomija għandha l-potenzjal li timpjega miljuni aktar;

5.  Jistieden lill-Kummissjoni taġixxi proattivament, billi tuża l-fondi tal-UE, għarfien u skambji tal-aħjar prattiki fl-iżvilupp tas-settur tal-bijoekonomija – speċjalment lejn dawk l-Istati Membri tan-Nofsinhar tal-Ewropa li jiffaċċjaw diffikultajiet finanzjarji – biex b'hekk toħloq opportunitajiet tal-impjiegi għall-ġenerazzjoni żagħżugħa li tbati minn qgħad serju iżda li l-involviment tagħha hija essenzjali biex bidla lejn il-bijoekonomija tirnexxi; jenfasizza li l-iskemi ta' Garanziji għaż-Żgħażagħ jgħinu jippromwovu l-impjiegi, it-taħriġ u l-apprendistat ta' kwalità tajba għaż-żgħażagħ f'dan il-qasam strateġiku;

6.  Jenfasizza l-importanza tal-iżgurar ta' impjiegi diċenti fis-settur, skont l-istandards tal-ILO, speċjalment permezz ta' dimensjoni soċjali qawwija tal-istrateġija għal bijoekonomija li tinkludi l-involviment tal-ħaddiema;

7.  Jiġbed l-attenzjoni fuq il-fatt li l-bijoekonomija tista' tipprovdi dħul addizzjonali konsiderevoli għall-produtturi primarji fis-setturi tal-biedja, sajd u forestrija, partikolarment permezz tal-produzzjoni tal-bijomassa, materja prima għall-kompost u għelejjel bi żrieragħ taż-żejt speċjalizzati għall-industriji, u b'hekk toħloq opportunitajiet differenti ta' impjiegi f'diversi setturi relatati;

8.  Jiġbed l-attenzjoni fuq il-fatt li l-Kummissjoni bbażat l-istrateġija tagħha għal bijoekonomija għall-Ewropa fuq ix-xenarju[3], b’mod li jista' joħloq madwar 130 000 impjieg fil-bijoekonomija; iħeġġeġ lill-Istati Membri jsaħħu l-programmi tagħhom ta' assistenza għall-bijoekonomija; jenfasizza wkoll l-importanza tal-parteċipazzjoni tal-ħaddiema fl-attivitajiet tar-R&Ż, bħal pereżempju permezz ta' sħubija f'bordijiet;

9.  Ifakkar ir-riżoluzzjoni tiegħu tal-15 ta' Diċembru 2011 dwar ir-rieżami ta' nofs il-perjodu tal-Istrateġija Ewropea 2007-2012 dwar is-saħħa u s-sigurtà fuq il-post tax-xogħol[4], li titlob li ssir valutazzjoni tal-impatt tar-riskji potenzjali minn teknoloġiji ġodda, sustanzi dannużi u fatturi ta' riskju, inkluża l-organizzazzjoni tax-xogħol fuq il-post tax-xogħol, u jitlob ukoll azzjonijiet leġiżlattivi biex jiżguraw li n-nanomaterjali jkunu koperti bis-sħiħ mir-regolamenti attwali tal-UE dwar is-saħħa u s-sigurtà okkupazzjonali;

10. Jistieden lill-Kummissjoni tiżviluppa mudelli parteċipatorji li jistgħu jintużaw biex jiffurmaw rabtiet aktar mill-qrib bejn iċ-ċittadini, il-produtturi u l-utenti finali bl-għan li titrawwem relazzjoni aktar mill-qrib bejn ix-xjenza, is-soċjetà u l-politika, u tindika l-benefiċċji tal-bijoekonomija u l-importanza tagħha għas-soċjetà, it-tkabbir, l-impjiegi u l-innovazzjoni soċjali;

11. Jenfasizza l-importanza tad-djalogu soċjali fil-bijoekonomija biex jiġu żgurati d-disponibilità ta' xogħol ta' kwalità għolja u tranżizzjoni ġusta lejn il-bijoekonomija; jirrimarka d-djalogu soċjali settorjali Ewropew fl-industrija tal-ikel u x-xorb; jistieden lill-Kummissjoni tagħmel id-djalogu soċjali settorjali Ewropew il-pedament tal-istrateġija tagħha għall-iżvilupp tal-bijoekonomija;

12. Jitlob li ssir aktar riċerka dettaljata biex tistabbilixxi opportunitajiet soċjali u ambjentali, kif ukoll il-kostijiet potenzjali tal-bijoekonomija, minħabba l-impatti potenzjali differenti u l-metodi possibbilment ħżiena tal-isfruttar tal-bijoekonomija rigward: l-użu tar-riżorsi naturali skarsi; ir-riskju ta' dannu għall-ambjent u t-telf tal-bijodiversità; l-opportunità għall-konservazzjoni; u r-rwol tal-UE u l-fondi tal-Istati Membri, partikolarment rigward l-Politika Agrikola Komuni, li kollha kemm huma jistgħu jirriżultaw f'benefiċċji netti għall-impjiegi, il-bijodiversità u l-ambjent b'mod ġenerali jekk ikunu ġġestjonati fi ħdan qafas politiku responsabbli u olistiku;

13. Jenfasizza li l-bijoekonomija teħtieġ li jiġu żviluppati aktar u/jew integrati ħiliet ġodda, għarfien ġdid u dixxiplini ġodda biex jindirizzaw bidliet soċjetali relatati mal-bijoekonomija kif ukoll biex jappoġġaw il-kompetittività, it-tkabbir u l-ħolqien tal-impjiegi, il-ħtiġijiet tal-industrija, kif ukoll biex jiżguraw tlaqqigħ aħjar bejn il-ħiliet u l-impjiegi;

14. Jistieden lill-Istati Membri joffru korsijiet universitarji dwar il-bijoekonomija u jiżviluppaw programmi ta' taħriġ vokazzjonali biex jagħmluha possibbli li f’dan il-qasam l-UE tilħaq u tiżgura rwol pjunier, innovattiv u mexxej, f’kull rigward;

15. jinnota l-potenzjal għat-twettiq tal-apprendistati rurali fis-sħubijiet mal-fornituri tal-edukazzjoni lokali u l-użu tal-fondi bħal pereżempju l-Fond għall-Iżvilupp Rurali biex jiġu żviluppati ħiliet trasferibbli fost iż-żgħażagħ f'żoni rurali, biex b'hekk ikunu jistgħu jisfruttaw aħjar il-potenzjal ta' opportunitajiet ġodda ta' impjiegi li jinħolqu mill-innovazzjoni fis-settur tal-bijoekonomija u l-agrikoltura; jissottolinja r-rwol ewlieni li l-Fond Soċjali Ewropew (FSE) jista' jkollu biex jappoġġa t-tagħlim tul il-ħajja biex il-ħaddiema jtejbu ħiliethom u jiksbu ħiliet ġodda fil-bijoekonomija; ifakkar, għalhekk, il-pożizzjoni tiegħu favur sehem minimu ġenerali għall-FSE tal-25 % tal-baġit totali allokat għall-politika ta' koeżjoni;

16. Jitlob żieda sostanzjali fir-riċerka tal-bijoekonomija, u jenfasizza li l-UE jeħtiġilha tipprova ttejjeb il-kapaċità tagħha ta' innovazzjoni billi ssarraf ir-riżultati tar-riċerka f'suċċess kummerċjali, peress li bħalissa l-UE qed iddum wisq biex ir-riżultati tar-riċerka u l-innovazzjoni tittrasformahom fi prodotti kummerċjabbli;

17. Iqis li l-bijoekonomija tippermetti l-produzzjoni ta' komoditajiet industrijali u tal-konsumatur bi spejjeż aktar baxxi, b'użu inqas tal-enerġija u toħloq anqas tniġġis ambjentali;

18. Jitlob li tiġi żviluppata l-infrastruttura industrijali u jiġu ottimizzati l-katini tal-provvista għall-prodotti bijoloġiċi f'żoni rurali u kostali bl-għan li jinħolqu impjiegi ġodda fl-agrikoltura, il-forestrija u l-akkwakultura; jitlob li l-finanzjament għall-iżvilupp rurali tal-UE jkun disponibbli għal dan l-għan u li dan isir b'tali mod li jnaqqas aktar milli jżid, id-dannu għall-ambjent u t-telf tal-bijodiversità.

RIŻULTAT TAL-VOTAZZJONI FINALI FIL-KUMITAT

• [1]  ILO (Organizzazzjoni Internazzjonali tax-Xogħol), "Promoting safety and health in a green economy", l-Uffiċċju Internazzjonali tax-Xogħol, Ġinevra (2012).
• [2]  Ċentru Ewropew għall-Iżvilupp ta' Taħriġ Vokazzjonali, "Green skills and environmental awareness in vocational education and training", Dokument ta' riċerka Nru°24, 2012.
• [3]  il-Kummissjoni Ewropea, Dokument ta' ħidma tal-Persunal, "L-Innovazzjoni għal Tkabbir Sostenibbli: Bijoekonomija għall-Ewropa", SWD(2012) 11 finali, p 49.
• [4]  Testi adottati, P7_TA(2011)0589.

għall-Kumitat għall-Ambjent, is-Saħħa Pubblika u s-Sikurezza tal-Ikel

dwar l-Innovazzjoni għal Tkabbir Sostenibbli: Bijoekonomija għall-Ewropa
(2012/2295(INI))

Rapporteur għal opinjoni: Giles Chichester

SUĠĠERIMENTI

Il-Kumitat għall-Industrija, ir-Riċerka u l-Enerġija jistieden lill-Kumitat għall-Ambjent, is-Saħħa Pubblika u s-Sikurezza tal-Ikel, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

A. billi għandu jitfakkar li l-bijoekonomija hija settur importanti fis-suq intern li joffri benefiċċji sinifikanti rigward l-ekonomija b'użu baxx tal-karbonju, ir-reżiljenza għall-bidla fil-klima, is-sostenibilità, il-kompetittività, il-ħolqien tal-impjiegi u t-tnaqqis tad-dipendenza fuq l-importazzjoni ta' kemm l-enerġija kif ukoll tal-materja prima;

B.  billi l-bijoekonomija trid tlaħħaq ma' kunflitti eżistenti tal-miri, pereżempju fir-rigward tal-bijomassa, li hemm domanda għaliha simultanjament bħala sors ta' ikel, bħala materja prima, u bħala sors tal-enerġija, u l-aspettattivi mistennija minnha jeħtieġu, għalhekk, jibqgħu fi ħdan limiti realistiċi;

C. billi flimkien ma' riċerka bijoloġika avvanzata, il-bijoekonomija tista' wkoll tibbaża ruħha fuq għarfien u know-how tradizzjonali;

1.  Jilqa' l-appoġġ tal-Kummissjoni għal bidla radikali fl-approċċ tal-UE għall-produzzjoni, il-konsum, l-ipproċessar, il-ħażna, ir-riċiklaġġ u r-rimi ta' riżorsi bijoloġiċi; jemmen li ekonomija bbażata fuq il-prodotti bijoloġiċi fl-Ewropa tista' tikkontribwixxi għall-kompetittività tal-industrija Ewropea u tipprovdi impjiegi u opportunitajiet kummerċjali, b'mod partikolari għall-iżvilupp rurali u kostali, madankollu biss jekk l-attivitajiet tagħha jitwettqu fi ħdan il-parametri tal-effiċjenza u s-sostenibbiltà tar-riżorsi;

2.  Jemmen li nuqqas ta' koordinazzjoni llimita l-isfruttament ta' sinerġiji u ekonomiji ta' skala rigward il-bijoekonomija fl-Unjoni; jenfasizza li l-Unjoni tista' żżid il-valur billi tħeġġeġ u tiffaċilita l-kooperazzjoni permezz ta' netwerks u programmi ta' finanzjament; iqis li flimkien ma' miri speċifiċi biex jiżdied is-sehem tar-riżorsi naturali rinnovabbli użati fil-produzzjoni u l-konsum tal-prodotti, il-bijoekonomija se tiżviluppa permezz ta' approċċ integrat fil-livelli kollha, dawk lokali, tal-Istati Membri u tal-Unjoni;

3.  Iħeġġeġ lill-Kummissjoni tiżgura l-aċċettabilità tal-użu tal-bijomassa u d-disponibbiltà tal-bijomassa biex tiżgura l-kundizzjonijiet operazzjonali għall-industriji eżistenti bbażati fuq il-prodotti bijoloġiċi li huma l-pedament tal-bijoekonomija futura;

4.  Jilqa', f'dan ir-rigward, it-tħabbira riċenti tal-Kummissjoni dwar it-tnedija ta' osservatorju tal-bijoekonomija biex ifassal politiki reġjonali, nazzjonali u tal-UE f'dan il-qasam, kif ukoll it-twaqqif ta' bord permanenti ta' esperti fil-bijoekonomija biex itejjeb is-sinerġiji u l-koerenza bejn il-politiki, l-inizjattivi u s-setturi ekonomiċi marbuta mal-bijoekonomija fil-livell tal-UE, li jgħaqqadhom ma' mekkaniżmi eżistenti;

5.  Jemmen li fil-livell tal-Unjoni jeħtieġ li sinerġiji u komplimentarjetajiet akbar jiġu appoġġati minn oqsma politiċi oħra, bħal pereżempju dawk li jikkonċernaw il-materja prima, il-bijofjuwils u l-iskart, kif ukoll il-programmi, partikolarment l-Orizzont 2020, il-PAK u l-Fondi Strutturali jitlob lill-Kummissjoni tiżviluppa approċċ integrat għall-bijoekonomija biex b'hekk jikkontribwixxi għall-iżvilupp tal-istrateġiji fil-livelli reġjonali, nazzjonali u Ewropej; huwa tal-fehma li l-UE għandha wkoll tippromwovi l-bijoekonomija fix-xena internazzjonali, b'mod partikolari fil-proċessi Rio+20 u tal-UNFCCC;

6.  Jenfasizza l-importanza ta' żoni rurali u r-rwol li jista' jkollhom fl-iżvilupp ta' bijoekonomija sostenibbli, speċjalment rigward ir-residwi li jistgħu jintużaw fil-bijoraffineriji jew/u f'impjanti (tat-tip kaskata) li jbiddlu l-bijomassa f'gass; jissuġġerixxi, f'dan il-kuntest, li l-azzjonijiet tal-Unjoni kollha għandhom jiġu promossi biex ħamrija mniġġsa tiġi rimedjata, u dan jikkontribwixxi għall-produzzjoni ta' uċuħ tar-raba għall-produzzjoni tal-enerġija; ifakkar l-importanza ta' koordinament f'sistema għall-ġbir tal-iskart għal żoni rurali kif ukoll urbani;

7.  Jilqa' l-intenzjoni li jitnaqqas id-distakk bejn ir-riċerka u l-innovazzjoni fl-Orizzont 2020 u wkoll li jitnaqqsu l-ostakli għar-riċerka interdixxiplinarja u l-programmi konġunti, minħabba l-firxa wiesgħa ta' prodotti finali fil-bijoekonomija, jiġifieri l-prodotti tal-enerġija u industrijali u teknoloġiji ewlenin li għandhom jiġu mobilizzati;

8.  Iqis li sabiex is-sorsi tal-bijoenerġija jkunu ta' suċċess f'perjodu itwal ta' żmien jeħtieġ li jiġu prodotti u jintużaw b'mod sostenibbli u għandhom ikunu jistgħu jikkompetu rigward kemm il-prezz kif ukoll il-kwalità taħt kundizzjonijiet tas-suq normali; jilqa' r-reviżjoni li għaddejja bħalissa tal-leġiżlazzjoni tal-Unjoni dwar il-bijofjuwils sabiex jitnaqqsu l-effetti negattivi tal-Bidla Indiretta fl-Użu tal-Art (Indirect Land Use Change - ILUC), u jitħeġġeġ is-suq għall-bijofjuwils aktar avvanzati, kif ukoll l-iżvilupp tagħhom, li permezz tagħhom jkun jista' jsir użu akbar ta' materja prima mhux tal-ikel, bħal pereżempju l-iskart, ir-residwi u l-materjali linjoċellulożiċi u ċellulożiċi;

9.  Jenfasizza l-importanza u l-potenzjal enormi tal-effiċjenza tal-enerġija u tar-riżorsi; jenfasizza l-ħtieġa li "għandu jiġi prodott aktar b'anqas" ħalli l-bijoekonomija tibqa' sostenibbli;

10. Jistieden lill-industrija tmexxi l-iżvilupp ta' bijoekonomija sostenibbli fl-Unjoni; għalhekk jitlob li jinħoloq ambjent li jkun aktar favur l-impriżi, permezz ta' miżuri bħat-tnaqqis taż-żmien għall-kummerċjalizzazzjoni, l-allinjament tal-politiki tar-riċerka u l-innovazzjoni mal-ħtiġijiet ta' setturi speċifiċi, it-titjib tal-aċċess għall-finanzjament ta' riskju, speċjalment għal industriji u SMEs ibbażati fuq il-prodotti bijoloġiċi eżistenti u li qegħdin jiżviluppaw, u l-inkoraġġiment tal-intraprenditorija fis-settur;

11. Huwa konxju li l-iżvilupp ulterjuri tal-bijoekonomija se jinvolvi kompiti xjentifiċi ewlenin li jestendu lil hinn mill-konfini ta' kull qasam xjentifiku partikolari jew kwalunkwe pajjiż wieħed u se jirrikjedi forom ġodda ta' kooperazzjoni bejn ir-riċerkaturi u s-sħab industrijali biex titħaffef l-applikazzjoni fil-prattika;

12. Iqis li huwa kruċjali li titħares il-proprjetà intellettwali għall-prodotti u l-proċessi relatati mal-bijoekonomija jekk l-Ewropa tixtieq tiżgura l-kompetittività globali tagħha fis-suq internazzjonali;

13. Jemmen li l-finanzjament pubbliku għandu rwol li jattira l-kapital mis-settur privat biex jappoġġa l-kummerċjalizzazzjoni fis-settur tal-bijoteknoloġija. jappoġġa l-intenzjoni tal-Kummissjoni li tistabbilixxi skemi ta' sħubija pubblika-privata (PPP) għall-industriji b'bażi bijoloġika;

14. Jemmen li jeħtieġ li jiġi ffaċilitat aċċess aħjar għall-finanzi għall-SMEs permezz ta' investiment f'negozji ġodda, kapital ta' riskju u appoġġ għat-trasferiment tat-teknoloġija, u regolamenti anqas kumplessi u l-użu tal-għarfien fil-qasam tal-bijoekonomija; jissuġġerixxi li għandu jitwaqqaf bord tal-SMEs biex jikkonsulta l-Bord tal-Bijoekonomija u jiżgura approċċ xprunat min-negozju; jenfasizza aktar ir-rwol importanti tas-sħubiji pubbliċi-privati (PPPs) biex titħaffef it-tranżizzjoni lejn il-bijoekonomija; jemmen li l-SMEs għandhom rwol kruċjali fit-traduzzjoni tar-riċerka xjentifika f'applikazzjonijiet u fl-introduzzjoni fis-suq fil-forma ta' prodotti jew tekniki ġodda;

15. Jemmen li l-pjan ta' azzjoni stabbilit fil-Komunikazzjoni ma fihx miżuri u strumenti prattiċi biex bihom jiġu indirizzati ostakoli jew riskji potenzjali meta jsir qlib għal bijoekonomika; jenfasizza li attenzjoni partikolari għandha tingħata lil regolamenti doppji jew konfliġġenti u lid-disponibbiltà tal-kapital ta' riskju;

16. Jinnota li ftit kienu l-Istati Membri li wettqu attivitajiet biex jappoġġaw l-iżvilupp tal-bijoekonomija, u li l-istrateġiji huma fil-biċċa l-kbira żviluppati minn gvernijiet nazzjonali. Eżempju tajjeb ta' dan hija l-istrateġija transkonfinali tal-bijoekonomija reġjonali tal-Bio-based Delta Europe (tal-Lbiċ tal-Pajjiżi l-Baxxi u l-Fjandri); jemmen li jeħtieġ li nsaħħu l-inizjattivi lokali u reġjonali permezz tal-implimentazzjoni ta' strateġiji tal-bijoekonomija, fid-dawl ta' strateġiji ta' speċjalizzazzjoni intelliġenti, fil-livelli kollha tal-kooperazzjoni (UE, nazzjonali, reġjonali, lokali) u l-koordinazzjoni tal-attivitajiet transettorjali;

17. Jemmen li l-inizjattivi minn isfel għal fuq huma importanti fil-ħolqien ta' soċjetà bbażata fuq il-prodotti bijoloġiċi u li approċċ xprunat min-negozju u mid-domanda, flimkien ma' approċċ immexxi mill-gvern, huma kruċjali; iqis li possibbiltajiet adegwati għandhom jiġu pprovduti għal inizjattivi reġjonali bħal fir-reġjun ta' Ħelsinki (il-Finlandja), fil-Lbiċ tal-Pajjiżi l-Baxxi, fil-Majjistral ta' Franza, fit-Tramuntana tan-Nordrhein-Westfalen (il-Ġermanja), fl-Istirija (l-Awstrija), eċċ; jistieden lill-Kummissjoni tappoġġa tali netwerks u clusters bil-ħsieb li tippromwovi l-iskambju ta' esperjenzi;

RIŻULTAT TAL-VOTAZZJONI FINALI FIL-KUMITAT

għall-Kumitat għall-Ambjent, is-Saħħa Pubblika u s-Sikurezza tal-Ikel

L-Innovazzjoni għal Tkabbir Sostenibbli: Bijoekonomija għall-Ewropa
(2012/2295(INI))

Rapporteur għal opinjoni: Riikka Manner

SUĠĠERIMENTI

Il-Kumitat għall-Iżvilupp Reġjonali jistieden lill-Kumitat għall-Ambjent, is-Saħħa Pubblika u s-Sikurezza tal-Ikel, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jenfasizza li l-bijoekonomija, li għandha tkun ibbażata fuq approċċ koerenti, interdixxiplinari u intersettorjali fl-UE, hija element importanti għal tkabbir aħdar u intelliġenti fl-Ewropa u jenfasizza li l-politika tal-iżvilupp reġjonali għandha rwol ċentrali fl-implimentazzjoni tal-istrateġija Ewropa 2020; jinnota li, mill-ħdax-il objettiv ta’ politika reġjonali, seba’ għandhom x’jaqsmu direttament jew indirettament mal-bijoekonomija; jirrimarka li l-politika tal-iżvilupp reġjonali issa hija mezz aktar b’saħħtu minn qatt qabel biex tappoġġja t-tkabbir intelliġenti, sostenibbli u inklużiv, minħabba l-konċentrazzjoni tematika b’saħħitha tagħha; jirrimarka li l-bijoekonomija qed ikollha impatt sinifikanti fuq ir-reġjuni u qed tippromwovi t-tkabbir ekonomiku u toħloq l-impjiegi;

2.  Isostni li, fl-istrateġija u l-politika tal-bijoekonomija u fir-regolamenti u inċentivi li għandhom x’jaqsmu mal-bijoekonomija, il-linji gwida u l-grad ta’ konċentrazzjoni jeħtieġ li jkunu aktar ċari; jirrimarka dwar il-ħtieġa li tittejjeb il-koordinazzjoni, jinħolqu sinerġiji u rabtiet komplimentari mad-diversi politiki u fondi (Fondi Strutturali, PAK, PKS, id-Direttiva dwar l-Enerġija Rinnovabbli, id-Direttiva Qafas dwar l-Iskart u Orizzont 2020) u jinfetħu possibilitajiet għall-finanzjament trasversali; jirrimarka wkoll li t-tranżizzjoni lejn bijoekonomija hija proċess twil li teħtieġ perseveranza leġiżlattiva u strateġiji u investiment li jkopru medda twila ta’ żmien sabiex tinħoloq klima ta’ investiment stabbli għall-bijoekonomija u kundizzjonijiet ugwali;

3.  Jenfasizza li għandu jkun hemm fis-seħħ qafas ta’ politika b’saħħtu biex jiġi sfruttat b’mod sħiħ il-potenzjal tal-bijoekonomija u biex tiġi ffaċilitata t-tranżizzjoni minn ekonomija bbażata fuq il-fjuwils fossili lejn bijoekonomija li għandha tagħmel użu aħjar mir-riżorsi u l-kapaċitajiet lokali u reġjonali;

4.  ifakkar li r-reġjuni ultraperiferiċi Ewropej fihom bijodiversità eċċezzjonali u jibbenefikaw minn klima u karatteristiċi ġeomorfoloġiċi uniċi; jenfasizza li dawn ir-reġjuni joffru potenzjal enormi għar-riċerka u l-innovazzjoni fis-settur tal-bijoekonomija u dawn jista’ jkollhom rwol ċentrali fil-ħolqien ta’ tkabbir "aħdar" fil-livell Ewropew;

5.  Jenfasizza l-importanza tal-ħolqien ta’ Osservatorju u ta’ Kumitat ta’ esperti għall-bijoekonomija; jinsisti li għandhom jiġu organizzati konferenzi regolari li jlaqqgħu flimkien il-partijiet interessati ewlenin mis-settur pubbliku u minn dak privat, fuq livell reġjonali, nazzjonali u Ewropew; jitlob li jitfassal pjan direzzjonali li jiżgura monitoraġġ effettiv tal-inizjattivi tal-bijoekonomija u l-koordinazzjoni tajba tal-istrumenti u li jiffissa b'mod sistematiku objettivi konkreti, kif ukoll il-pubblikazzjoni ta’ rapporti dwar il-progress tal-ħidma li għandhom jiġu kkomunikati lill-Parlament Ewropew;

6.  Jirrimarka li l-ekonomiji reġjonali u lokali għandhom rwol ċentrali fil-kisba ta’ tkabbir intelliġenti, sostenibbli u inklużiv; isostni li r-reġjuni infushom għandhom l-għarfien u l-kompetenza meħtieġa biex jimmobilizzaw atturi skont il-karatteristiċi speċifiċi tagħhom u għandhom jiffokaw fuq il-qalba lejn soċjetà bijoloġika u ekonomija li tibdel dik ibbażata fuq iż-żejt, billi r-riċerka u l-innovazzjoni jintużaw bħala l-fatturi tal-bidla; itenni li huwa ferm importanti li l-pjanijiet ta’ innovazzjoni u ta’ sostenibilità jiġu integrati u kkoordinati aħjar fil-livell reġjonali, nazzjonali u Ewropew; għaldaqstant, iħeġġeġ lir-reġjuni u lill-awtoritajiet reġjonali, isiru involuti b'mod aktar attiv fl-iżvilupp ta' strateġiji reġjonali ta’ riċerka u innovazzjoni fil-bijoekonomija li jkunu b'saħħithom u li jieħdu kont tal-profil ta’ kull reġjun u li jkunu maħsuba għall-ispeċjalizzazzjoni intelliġenti; jistieden lill-Kummissjoni tappoġġja lill-bijoclusters reġjonali Ewropej u l-kooperazzjoni interreġjonali u jqis li tkabbir b'saħħtu f'dan il-qasam jista jinkiseb biss permezz ta' investiment pubbliku u privat sostanzjali; jilqa' l-proposta li jiġu stabbiliti skemi ta’ sħubija pubblika-privata għas-settur tal-bijoekonomija;

7.  Iqis li l-ekonomija soċjali u ta’ solidarjetà, li tibni fuq l-involviment attiv tan-nies, is-sjieda komuni, u s-solidarjetà, għandha titħalla jkollha rwol importanti fit-tfassil u l-implimentazzjoni ta’ strateġiji tal-bijoekonomija fuq il-livell reġjonali;

8.  Jiġbed l-attenzjoni għall-importanza li jiġu appoġġjati u li jissaħħu l-inizjattivi lokali u reġjonali billi jiġu implimentati strateġiji tal-bijoekonomija f’kull livell ta’ kooperazzjoni; jirrimarka li l-approċċi minn isfel għal fuq huma essenzjali sabiex jiġi sfruttat il-potenzjal tar-reġjuni kollha; jenfasizza r-rwol kruċjali tal-intrapriżi żgħar u ta’ daqs medju fil-bijoekonomija u jsostni li huwa ferm importanti li l-SMEs jingħataw opportunitajiet ta’ finanzjament li jkunu adattati għal-livell lokali; jenfasizza mill-ġdid il-ħtieġa li jitrawmu strateġiji ta’ riċerka u innovazzjoni maħsuba għal speċjalizzazzjoni intelliġenti permezz tal-promozzjoni ta’ strumenti ta’ finanzjament, u speċjalment l-opportunitajiet ta’ netwerking jew skambju ta' għarfien li dawn joffru;

9.  Isostni li wieħed mill-prinċipji ta' gwida tal-bijoekonomija huwa li tissaħħaħ l-effiċjenza tar-riżorsi u titnaqqas id-dipendenza fuq materja prima u enerġija impurtati u fuq riżorsi naturali mhux rinnovabbli; jiġbed l-attenzjoni għall-importanza tas-settur tal-foresti u industriji oħrajn ibbażati fuq il-bijoloġija u jsostni li r-riżorsi naturali rinnovabbli u l-materja prima newtri mill-karbonju, bħall-injam u l-fibra tal-injam, jistgħu jissostitwixxu l-materja prima fossila mhux rinnovabbli; jirrimarka li l-industrija tal-bijoekonomija tipproduċi ħafna prodotti ta' valur miżjud għoli, bħall-kimiċi, mediċini, plastiks, u materja prima innovattiva oħra, u li toħloq ukoll l-impjiegi; jenfasizza l-potenzjal tal-bijoteknoloġiji bbażati fuq riżorsi tal-baħar;

10. Jenfasizza li l-bijoekonomija teħtieġ għarfien tal-ogħla livell u forza tax-xogħol kompetenti; isostni li jeħtieġ li jiġi żgurat li jkun hemm taħriġ professjonali u edukazzjoni għolja fir-reġjuni, filwaqt li jitqiesu l-karatteristiċi speċifiċi tagħhom; jirrimarka li s-sistemi tal-edukazzjoni u t-taħriġ fuq firxa wiesgħa fir-reġjuni jistimulaw ukoll l-espansjoni sostenibbli tan-negozju; isostni li standard għoli ta’ għarfien fis-settur tal-bijoekonomija jikkostitwixxi riżorsa għall-Ewropa meta tikkompeti fuq livell globali u jippermetti lill-Ewropa li ssir il-mexxej fil-qasam tal-bijoekonomija; jirrimarka dwar l-importanza tal-mobilità transkonfinali msaħħa tar-riċerkaturi, bil-ħsieb tal-iskambju ta’ prattiki tajbin u t-trasferiment tal-għarfien fil-qasam tal-bijoekonomija;

11. Jikkunsidra li, biex tiġi żviluppata bijoekonomija li tkun effettiva u sostenibbli, kull tip ta' infrastruttura jeħtieġ li tibqa' tiġi mmodernizzata, u li l-inħawi rurali m'għandhomx ikunu esklużi minn din il-modernizzazzjoni;

12. Iqis li huwa importanti li wieħed jinvesti fil-ktajjen tal-provvista tal-bijoekonomija, sabiex ikun hemm garanzija tad-disponibilità tal-materja prima; isostni li l-istrateġiji tal-bijoekonomija għandhom jinkuraġġixxu mhux biss l-użu aktar effiċjenti tal-iskart tad-djar u muniċipali, iżda wkoll l-irkupru tal-flussi u l-fdalijiet tal-prodotti sekondarji agrikoli u tal-forestrija; jappella biex ikun hemm leġiżlazzjoni aħjar u li tippermetti ċ-ċertezza ġuridika u tipprovdi appoġġ b'saħħtu għall-użu sostenibbli tar-riżorsi tal-bijoekonomija u l-esplojtazzjoni tal-materja prima u sabiex il-politika tkun ibbażata, f’kull rigward, fuq approċċ flessibbli fit-tul u li tippromwovi l-investimenti;

13. Jiġbed l-attenzjoni għall-ħtieġa ta' objettivi speċifiċi biex jiżdied il-proporzjon ta' riżorsi naturali rinnovabbli użati fil-produzzjoni u l-konsum ta' prodotti; jistieden lill-Kummissjoni tipproponi miżuri prattiċi ta' ambitu reġjonali komprensiv biex tippromwovi l-produzzjoni u l-konsum ta' prodotti tal-bijoekonomija fil-livell reġjonali;

14. Jinnota li huwa importanti li l-konsumaturi jiġu sensibilizzati dwar il-kontenut tal-bijoekonomija u, għalhekk, iqis li dawn għandhom jiġu infurmati dwar il-benefiċċji tal-bijoekonomija u dwar l-għażliet aħjar f’termini ta’ konsum li hija toffri; iqis li għandhom jittieħdu passi li jippromwovi l-bijoekonomija billi tiżdied is-sensibilizzazzjoni tal-konsumaturi dwar is-sikurezza tal-ikel, il-konservazzjoni tar-riżorsi u l-isfidi ambjentali l-oħra li qed tħabbat wiċċha magħhom is-soċjetà, bħat-tibdil fil-klima u d-dipendenza fuq riżorsi mhux rinnovabbli ; għalhekk jitlob li jsiru studji fuq ix-xejriet tal-konsum fl-UE u biex jiġu ffissati approċċi bbażati fuq ix-xjenza, biex il-konsumaturi jiġu pprovduti b’informazzjoni dwar il-karatteristiċi tal-prodotti u jiġi promoss stil ta’ ħajja sostenibbli;

RIŻULTAT TAL-VOTAZZJONI FINALI FIL-KUMITAT