RAPPORT li tinkludi r-rakkomandazzjonijiet tal-Parlament Ewropew lill-Kummissjoni Ewropea dwar in-negozjati għas-Sħubija Trans-Atlantika ta' Kummerċ u ta' Investiment (TTIP)

li tinkludi r-rakkomandazzjonijiet tal-Parlament Ewropew lill-Kummissjoni Ewropea dwar in-negozjati għas-Sħubija Trans-Atlantika ta' Kummerċ u ta' Investiment (TTIP)

(2014/2228(INI))

Il-Parlament Ewropew,

–       wara li kkunsidra d-direttivi tal-UE għan-negozjar dwar is-Sħubija Trans-Atlantika għall-Kummerċ u l-Investiment (TTIP) bejn l-UE u l-Istati Uniti adottati b'mod unanimu mill-Kunsill fl-14 ta' Ġunju 2013[1] u li ġew iddeklassifikati u tqiegħdu għad-dispożizzjoni tal-pubbliku mill-Kunsill fid-9 ta' Ottubru 2014,

–       wara li kkunsidra l-Artikoli 168 sa 191 tat-Trattat dwar il-Funzjonament tal-Unjoni Ewropea, u b'mod partikolari l-prinċipju ta' prekawzjoni mnaqqax fl-Artikolu 191(2),

–       wara li kkunsidra d-Dikjarazzjoni Konġunta tas-Summit bejn l-UE u l-Istati Uniti tas-26 ta' Marzu 2014[2],

–       wara li kkunsidra d-dikjarazzjoni konġunta tal-20 ta' Marzu mill-Kummissarju Cecilia Malmström u r-Rappreżentant tal-Istati Uniti fil-qasam tal-Kummerċ, Michael Froman, fir-rigward tal-esklużjoni tas-servizzi pubbliċi fil-ftehimiet kummerċjali bejn l-UE u l-Istati Uniti;

–       wara li kkunsidra l-Konklużjonijiet tal-Kunsill dwar it-TTIP tal-20 ta' Marzu 2015,

–       wara li kkunsidra l-konklużjonijiet tal-Kunsill dwar it-TTIP tal-21 ta' Novembru 2014[3],

–       wara li kkunsidra d-dikjarazzjoni konġunta tas-16 ta' Novembru 2014 mill-President tal-Istati Uniti Barack Obama, il-President tal-Kummissjoni Jean-Claude Juncker, il-President tal-Kunsill Ewropew Herman Van Rompuy, il-Prim Ministru tar-Renju Unit David Cameron, il-Kanċillier Ġermaniż Angela Merkel, il-President Franċiż François Hollande, il-Prim Ministru Taljan Matteo Renzi u l-Prim Ministru Spanjol Mariano Rajoy, b'segwitu għal-laqgħa tagħhom fil-marġini tas-Summit tal-G20 fi Brisbane, l-Awstralja[4],

–       wara li kkunsidra l-konklużjonijiet tal-Kunsill Ewropew tas-26 u s-27 ta' Ġunju 2014[5],

–       wara li kkunsidra l-linji gwida politiċi tal-President Juncker tal-15 ta' Lulju 2014 indirizzati lill-Kummissjoni li jmiss u intitolati "Bidu ġdid għall-Ewropa: L-Aġenda Tiegħi għall-Impjiegi, it-Tkabbir, il-Ġustizzja u t-Tibdil Demokratiku[6]",

–       wara li kkunsidra l-komunikazzjoni tal-Kummissjoni lill-Kulleġġ tal-Kummissjoni tal-25 ta' Novembru 2014 dwar it-trasparenza fin-negozjati tat-TTIP (C(2014)9052)[7], u d-deċiżjonijiet tal-Kummissjoni tal-25 ta' Novembru 2014 dwar il-pubblikazzjoni ta' informazzjoni dwar laqgħat li saru bejn Membri tal-Kummissjoni u organizzazzjonijiet jew individwi li jaħdmu għal rashom (C(2014)9051) u dwar il-pubblikazzjoni ta' informazzjoni dwar laqgħat li jsiru bejn id-Direttorati Ġenerali tal-Kummissjoni u organizzazzjonijiet jew persuni li jaħdmu għal rashom (C(2014)9048), is-sentenzi u l-opinjonijiet tal-Qorti tal-Ġustizzja tal-Unjoni Ewropea (C-350/12 P, 2/13 (2), 1/09 (3))) dwar aċċess għal dokumenti tal-istituzzjonijiet u d-deċiżjoni tal-Ombudsman Ewropew tas-6 ta' Jannar 2015 li tagħlaq l-inkjesta fuq inizjattiva proprja tagħha (OI/10/2014/RA) fir-rigward tal-Kummissjoni Ewropea dwar kif għandha tittratta t-talbiet għal informazzjoni u aċċess għal dokumenti (Trasparenza),

–       wara li kkunsidra d-dikjarazzjoni konġunta tat-3 ta' Diċembru 2014 mill-Kunsill tal-Enerġija bejn l-UE u l-Istati Uniti[8],

–       wara li kkunsidra l-approċċ integrat tal-UE fir-rigward tas-sikurezza fl-ikel ("mill-farm sal-furketta"), stabbilit fl-2004[9],

–       wara li kkunsidra r-rapport tal-Kummissjoni tat-13 ta' Jannar 2015 dwar il-konsultazzjoni pubblika fuq l-internet rigward il-protezzjoni tal-investiment u s-soluzzjoni ta' tilwim bejn investituri u stati (ISDS) fit-TTIP (SWD(2015)0003),

–       wara li kkunsidra l-proposti testwali tal-UE mqiegħda fuq il-mejda għal diskussjoni mal-Istati Uniti fiċ-ċikli tan-negozjati dwar it-TTIP, b'mod partikolari dawk li ġew deklassifikati u mqiegħda għad-dispożizzjoni tal-pubbliku mill-Kummissjoni, inter alia d-dokumenti ta' pożizzjoni tal-UE intitolati "Kwistjonijiet regolatorji tat-TTIP - l-industriji tal-inġinerija"[10], "Każ li jservi ta' test rigward l-ekwivalenza funzjonali: metodoloġija proposta għal ekwivalenza regolatorja awtomobilistika"[11], u "Kapitolu dwar il-kummerċ u l-iżvilupp sostenibbli/xogħol u ambjent: dokument tal-UE li jiddeskrivi l-kwistjonijiet u l-elementi ewlenin għad-dispożizzjonijiet fit-TTIP"[12], u l-proposti testwali dwar l-ostakli tekniċi għall-kummerċ (OTK)[13], il-miżuri sanitarji u fitosanitarji (SPS)[14], id-dwani u l-faċilitazzjoni kummerċjali[15], l-impriżi żgħar u ta' daqs medju (SMEs)[16], id-dispożizzjonijiet possibbli rigward il-kompetizzjoni[17], id-dispożizzjonijiet possibbli rigward l-impriżi statali u l-impriżi li jingħataw drittijiet jew privileġġi speċjali jew esklużivi[18], id-dispożizzjonijiet possibbli rigward is-sussidji[19], is-soluzzjoni ta' tilwim[20], u d-dispożizzjonijiet inizjali rigward il-kooperazzjoni regolatorja[21],

–       wara li kkunsidra l-opinjoni dwar "Is-Sħubija Trans-Atlantika ta' Kummerċ u ta' Investiment (TTIP)" tal-Kumitat tar-Reġjuni (ECOS-V-063) adottata matul il-110 sessjoni plenarja (11-13 ta' Frar 2015), u l-opinjoni tal-4 ta' Ġunju 2014 tal-Kumitat Ekonomiku u Soċjali Ewropew dwar "Ir-relazzjonijiet trans-Atlantiċi kummerċjali u l-fehma tal-KESE dwar kooperazzjoni mtejba u ftehim ta' kummerċ ħieles eventwali bejn l-UE u l-Istati Uniti",

–       wara li kkunsidra r-Rapport Inizjali Finali tat-28 ta' April 2014 minn ECORYS għall-Kummissjoni, intitolat "Valutazzjoni tal-Impatt fuq is-Sostenibilità tal-Kummerċ (VIS Kummerċ) b'appoġġ għan-negozjati rigward ftehim komprensiv dwar il-kummerċ u l-investiment bejn l-Unjoni Ewropea u l-Istati Uniti tal-Amerika"[22],

–       wara li kkunsidra r-rapport tal-Kummissjoni tal-2015 dwar l-Ostakli għall-Kummerċ u l-Investiment[23],

–       wara li kkunsidra l-"Evalwazzjoni Dettaljata tal-Valutazzjoni tal-Impatt tal-Kummissjoni Ewropea dwar is-Sħubija Trans-Atlantika ta' Kummerċ u ta' Investiment" ippubblikata f'April 2014 minn CEPS għall-Parlament,

–       wara li kkunsidra r-riżoluzzjonijiet preċedenti tiegħu, b'mod partikolari dik tat-23 ta' Ottubru 2012 dwar ir-relazzjonijiet ekonomiċi u kummerċjali mal-Istati Uniti[24], dik tat-23 ta' Mejju 2013 dwar in-negozjati dwar il-ftehim UE-Stati Uniti dwar il-kummerċ u l-investiment[25], u dik tal-15 ta' Jannar 2015 dwar ir-rapport annwali li jikkonċerna l-attivitajiet tal-Ombudsman Ewropew fis-sena 2013[26],

–       wara li kkunsidra l-Artikoli 108(4) u 52 tar-Regoli ta' Proċedura tiegħu,

–       wara li kkunsidra r-rapport tal-Kumitat għall-Kummerċ Internazzjonali u l-opinjonijiet tal-Kumitat għall-Affarijiet Barranin, il-Kumitat għall-Iżvilupp, il-Kumitat għall-Affarijiet Ekonomiċi u Monetarji, il-Kumitat għall-Impjiegi u l-Affarijiet Soċjali, il-Kumitat għall-Ambjent, is-Saħħa Pubblika u s-Sikurezza tal-Ikel, il-Kumitat għall-Industrija, ir-Riċerka u l-Enerġija, il-Kumitat għas-Suq Intern u l-Ħarsien tal-Konsumatur, il-Kumitat għall-Agrikoltura u l-Iżvilupp Rurali, il-Kumitat għall-Kultura u l-Edukazzjoni, il-Kumitat għall-Affarijiet Legali, il-Kumitat għal-Libertajiet Ċivili, il-Ġustizzja u l-Intern, il-Kumitat għall-Affarijiet Kostituzzjonali u l-Kumitat għall-Petizzjonijiet (A8-0175/2015),

A.     billi l-esportazzjonijiet permezz tal-kummerċ u t-tkabbir permezz ta' investimenti huma muturi kruċjali għall-impjiegi u t-tkabbir ekonomiku li ma jirrikjedux investimenti min-naħa tal-gvern;

B.     billi l-PDG tal-UE hu dipendenti ħafna mill-kummerċ u mill-esportazzjonijiet u jibbenefika minn kummerċ u investiment ibbażati fuq ir-regoli u billi ftehim ambizzjuż u bbilanċjat mal-Istati Uniti għandu jkun ta' appoġġ għall-industrijalizzazzjoni mill-ġdid tal-Ewropa u jgħin biex jintlaħaq l-objettiv għall-2020 ta' żieda fil-PDG tal-UE ġġenerat mill-industrija minn 15 % għal 20 % billi jsaħħaħ il-kummerċ trans-Atlantiku kemm fil-prodotti, kif ukoll fis-servizzi; billi dan għandu l-potenzjal li joħloq opportunitajiet, speċjalment għall-SMEs, il-mikroimpriżi (bi qbil mad-definizzjoni tar-Rakkomandazzjoni COM 2003/361/KE), ir-raggruppamenti u n-netwerks ta' impriżi li jsofru sproporzjonalment aktar minn ostakli nontariffarji (ONT) minn kumpaniji li jkunu akbar, peress li dawn tal-aħħar ikollhom ekonomiji ta' skala li jippermettulhom aċċess aktar faċli għas-swieq fuq iż-żewġ naħat tal-Atlantiku; billi ftehim bejn l-akbar żewġ blokok ekonomiċi fid-dinja għandu l-potenzjal li joħloq standards, normi u regoli li se jiġu adottati fuq livell globali, li kieku jservu wkoll bħala vantaġġ għall-pajjiżi terzi u li kieku jipprevjenu frammentazzjoni ulterjuri tal-kummerċ dinji; billi, jekk ifallu n-negozjati għal ftehim, pajjiżi terzi oħra bi standards u valuri differenti minflok ikunu jistgħu jassumu dan ir-rwol;

C.     billi disa' Stati Membri tal-Unjoni Ewropea diġà ffirmaw ftehim bilaterali mal-Istati Uniti, u minħabba f'hekk it-TTIP tista' tiġi ispirata minn prattika tajba u tippermetti li jiġu megħluba l-ostakli li ltaqgħu magħhom dawn l-Istati Membri;

D.     billi l-kriżijiet reċenti fil-fruntieri tal-UE u l-iżviluppi madwar id-dinja juru l-ħtieġa li jsir investiment fil-governanza globali u sistema bbażata fuq regoli u valuri;

E.     billi, minħabba ż-żieda fl-interkonnettività tas-swieq globali - massimu ta' 40 % tal-prodotti industrijali Ewropej jiġi mmanifatturat minn prodotti upstream importati - huwa ta' importanza kruċjali li dawk li jfasslu l-politika jsawru u jippromwovu l-interazzjoni tas-swieq; billi, peress li l-produzzjoni industrijali se sseħħ dejjem iżjed f'katini ta' valur globali u billi regoli kummerċjali xierqa u t-tneħħija tal-ostakli mhux meħtieġa huma fundamentali biex jinħoloq valur miżjud waqt li tinżamm u tiġi żviluppata bażi industrijali b'saħħitha, kompetittiva u diversifikata fl-Ewropa;

F.     billi t-tentattivi tal-UE li tindirizza l-isfidi tat-tibdil fil-klima, il-ħarsien tal-ambjent u s-sikurezza tal-konsumatur rriżultaw fi spejjeż regolatorji għoljin għall-impriżi tal-UE, flimkien ma' prezzijiet għoljin tal-materja prima għall-enerġija u tal-elettriku, li - jekk jibqgħu mhux indirizzati fit-TTIP - jistgħu jħaffu l-proċessi ta' delokalizzazzjoni, deindustrijalizzazzjoni u telf ta' impjiegi u b'hekk jheddu ir-riindustrijalizzazzjoni tal-UE u l-objettivi tagħha fil-qasam tal-impjiegi, u dan se jegħleb ukoll dawk l-objettivi politiki li r-regolamenti tal-UE qed ifittxu speċifikament li jilħqu;

G.     billi ftehim kummerċjali ddisinjat tajjeb jista' jikkontribwixxi biex jiġu utilizzati l-opportunitajiet tal-globalizzazzjoni;billi ftehim kummerċjali b'saħħtu u ambizzjuż m'għandux jiffoka biss fuq it-tnaqqis tat-tariffi u l-ONT, iżda għandu jkun ukoll għodda għall-protezzjoni tal-ħaddiema, tal-konsumaturi u tal-ambjent; billi ftehim kummerċjali b'saħħtu u ambizzjuż jikkostitwixxi opportunità għall-ħolqien ta' qafas billi jsaħħaħ ir-regolamentazzjoni biex tilħaq l-ogħla standards, bi qbil mal-valuri kondiviżi tagħna, biex b'hekk jipprevjeni d-dumping soċjali u ambjentali u jiżgura livell għoli ta' ħarsien tal-konsumatur fid-dawl tal-objettiv kondiviż ta' kompetizzjoni miftuħa fejn il-kundizzjonijiet ikunu l-istess għal kulħadd;

H.     billi, minkejja l-fatt li standards għolja komuni huma fl-interess tal-konsumaturi, għandu jiġi rikonoxxut li l-konverġenza tagħmel sens ukoll għall-impriżi, peress li l-ispejjeż ogħla li joriġinaw minn standards ogħla jistgħu jiġu kkumpensati aħjar minn żieda fl-ekonomiji ta' skala f'suq potenzjali ta' 850 miljun konsumatur;

I.      billi l-ftehimiet kummerċjali preċedenti wrew benefiċċji sinifikanti għall-ekonomija Ewropea, huwa diffiċli li jiġi vvalutat l-impatt reali tat-TTIP kemm fuq l-ekonomija tal-UE kif ukoll fuq dik tal-Istati Uniti u li jsiru previżjonijiet waqt li n-negozjati jkunu għadhom għaddejjin u l-istudji juru riżultati kontradittorji; billi t-TTIP waħedha mhux se ssolvi l-problemi ekonomiċi strutturali li ilhom jeżistu u l-kawżi sottostanti tagħhom fl-UE, iżda għandha titqies bħala element fi strateġija Ewropea aktar estensiva għall-ħolqien tal-impjiegi u t-tkabbir, u l-aspettattivi għat-TTIP għandhom ikunu proporzjonati għal-livell ta' ambizzjoni li se jintlaħaq fin-negozjati;

J.      billi l-konsegwenzi tal-embargo Russu wrew b'mod ċar ir-rilevanza ġeopolitika kontinwa tal-agrikoltura, l-importanza li jkun hemm aċċess għal firxa ta' swieq agrikoli differenti u l-ħtieġa għal sħubiji kummerċjali b'saħħithom u strateġiċi ma' sħab kummerċjali affidabbli;

K      billi huwa importanti għall-agrikoltura Ewropea li jiġi żgurat ftehim kummerċjali ta' benefiċċju reċiproku mal-Istati Uniti b'mod li jsir progress fir-rigward tal-pożizzjoni tal-Ewropa bħala attur fundamentali fis-suq globali mingħajr ma jiġu pperikolati l-istandards ta' kwalità attwali tal-prodotti agrikoli Ewropej u t-titjib ta' dawk l-istandards fil-ġejjieni, filwaqt li jiġi ppreżervat il-mudell agrikolu Ewropew u tiġi żgurata l-vijabbiltà ekonomika u soċjali tiegħu;

L.     billi l-flussi tal-kummerċ u tal-investiment mhumiex fini fihom infushom u l-benessri taċ-ċittadini ordinarji, tal-ħaddiema u tal-konsumaturi, kif ukoll aktar opportunitajiet għall-impriżi bħala l-muturi tat-tkabbir u l-impjiegi, huma l-parametri referenzjarji għal ftehim kummerċjali; billi t-TTIP għandu jiġi kkunsidrat bħala mudell għal ftehim kummerċjali tajjeb li jwieġeb għal dawn ir-rekwiżiti sabiex iservi bħala eżempju għan-negozjati tagħna fil-ġejjieni ma' sħab kummerċjali oħra;

M.    billi ċertu grad ta' kunfidenzjalità hu rikjest fin-negozjati sabiex jinkiseb eżitu ta' kwalità għolja, u l-livell limitat ta' trasparenza li fih twettqu in-negozjati fil-passat wassal għal nuqqasijiet f'termini ta' kontroll demokratiku tal-proċess ta' negozjar;

N.     billi l-President Juncker tenna b'mod ċar fil-Linji Gwida politiċi tiegħu li huwa jixtieq ftehim kummerċjali bbilanċjat u raġonevoli mal-Istati Uniti u li - waqt li l-UE u l-Istati Uniti jistgħu jagħmlu pass 'il quddiem sinifikanti fir-rikonoxximent reċiproku tal-istandards tal-prodotti ta' xulxin u fil-ħidma lejn standards trans-Atlantiċi - l-UE mhux se tissagrifika l-istandards tagħha fl-oqsma tas-sigurtà (alimentari), tas-saħħa, tas-saħħa tal-annimali, soċjali, ambjentali u tal-protezzjoni tad-data u d-diversità kulturali tagħha; filwaqt li jfakkar li s-sigurtà tal-ikel li nieklu u l-protezzjoni tad-data personali tal-Ewropej u s-servizzi tagħha ta' interess ġenerali ma jistgħux jiġu nnegozjati sakemm l-għan ma jkunx il-ksib ta' livell ogħla ta' protezzjoni;

O.     billi hu importanti li tiġi żgurata konklużjoni sodisfaċenti tan-negozjati dwar il-Ftehim dwar Safe Harbour u l-Ftehim Qafas dwar il-Protezzjoni tad-Data;

P.     billi l-President Juncker diġà ddikjara b'mod ċar fil-linji gwida politiċi tiegħu li mhux se jaċċetta li l-ġurisdizzjoni tal-qrati fl-Istati Membri tiġi limitata minn reġimi speċjali għal tilwim rigward investimenti; billi issa li r-riżultati tal-konsultazzjoni pubblika dwar il-protezzjoni tal-investimenti u l-ISDS fit-TTIP huma disponibbli, attwalment għaddej proċess ta' riflessjoni - waqt li jitqiesu l-kontribuzzjonijiet - fi ħdan u bejn it-tliet istituzzjonijiet, waqt li jsiru skambji mas-soċjetà ċivili u s-settur kummerċjali, dwar l-aħjar mod kif għandhom jintlaħqu l-protezzjoni tal-investimenti u t-trattament ugwali tal-investituri waqt li jiġi żgurat id-dritt tal-istati li jirregolamentaw;

Q.     billi l-Parlament jappoġġa bis-sħiħ kemm id-deċiżjoni tal-Kunsill li jiddeklassifika d-direttivi għan-negozjar kif ukoll l-inizjattiva ta' trasparenza tal-Kummissjoni; billi d-dibattitu pubbliku mqanqal li sar fl-Ewropa kollha fir-rigward tat-TTIP wera l-ħtieġa biex in-negozjati għat-TTIP jiġu konklużi b'mod aktar trasparenti u inklużiv waqt li jqisu t-tħassib espress miċ-ċittadini Ewropej u jikkomunikaw ir-riżultati tan-negozjati lill-pubbliku ġenerali;

R.     billi t-taħditiet bejn l-Istati Uniti u l-UE ilhom għaddejjin minn Lulju 2013, iżda s'issa ma ntlaħaq l-ebda ftehim dwar test komuni;

S.     billi hu mistenni li t-TTIP ikun ftehim imħallat li jirrikjedi r-ratifika mill-Parlament Ewropew u t-28 Stat Membru tal-UE kollha kemm huma;

1.      Jindirizza, fil-kuntest tan-negozjati dwar it-TTIP li għaddejjin attwalment, dawn ir-rakkomandazzjonijiet lill-Kummissjoni:

(a)    rigward il-kamp ta' applikazzjoni u l-kuntest fuq livell usa':

(i)          li tiżgura li n-negozjati trasparenti dwar it-TTIP iwasslu għal ftehim dwar il-kummerċ u l-investiment ambizzjuż, komprensiv, ibbilanċjat u ta' standard għoli li kieku jippromwovi t-tkabbir sostenibbli, b'benefiċċji kondiviżi bejn l-Istati Membri, b'benefiċċji għal xulxin u reċiproċi bejn is-sħab, iżid il-kompetittività internazzjonali, u jiftaħ opportunitajiet ġodda għall-kumpaniji tal-UE, b' mod partikolari l-SMEs, jappoġġa l-ħolqien ta' impjiegi ta' kwalità għolja għaċ-ċittadini Ewropej, ikun ta' benefiċċju dirett għall-konsumaturi Ewropej; il-kontenut u l-implimentazzjoni tal-ftehim huma aktar importanti mill-ħeffa li biha jitwettqu n-negozjati; li tisħaq fuq il-fatt li s-Sħubija Trans-Atlantika ta' Kummerċ u ta' Investiment (TTIP) hija l-aktar proġett sinifikanti ta' dan l-aħħar bejn l-UE u l-Istati Uniti u għandha tagħti enerġija ġdida lis-sħubija trans-Atlantika kollha kemm hi, lil hinn mill-aspetti kummerċjali tagħha; li tenfasizza li l-konklużjoni b'suċċess tagħha tkun ta' importanza ġeopolitika kbira;

(ii)          li tenfasizza li waqt li n-negozjati dwar it-TTIP jikkonsistu minn negozjati dwar tliet oqsma ewlenin - it-titjib ambizzjuż tal-aċċess reċiproku għas-suq (għall-prodotti, is-servizzi, l-investiment u l-akkwist pubbliku fil-livelli kollha tal-gvern), it-tnaqqis tal-ONT u t-titjib tal-kompatibbiltà tar-reġimi regolatorji, u l-iżvilupp ta' regoli komuni biex jiġu indirizzati l-isfidi u l-opportunitajiet kondiviżi dwar il-kummerċ globali – dawn l-oqsma kollha għandhom l-istess importanza u jeħtieġ li jiġu inklużi f'pakkett komprensiv; it-TTIP għandha tkun ambizzjuża u vinkolanti fil-livelli kollha tal-gvern fuq iż-żewġ naħat tal-Atlantiku, il-ftehim għandu jwassal għal aċċess miftuħ ġenwin u dejjiemi tas-suq fuq bażi reċiproka u l-faċilitazzjoni kummerċjali fuq il-post, u għandu jagħti attenzjoni partikolari lill-miżuri strutturali biex tinkiseb kooperazzjoni trans-Atlantika akbar waqt li jitħarsu l-istandards regolatorji u l-protezzjoni tal-konsumatur u jiġi pprevenut id-dumping soċjali, fiskali u ambjentali;

(iii)         li tibqa' tikkunsidra l-importanza strateġika tar-relazzjoni ekonomika bejn l-UE u l-Istati Uniti b'mod ġenerali u tat-TTIP b'mod partikolari, fost oħrajn bħala opportunità biex jiġu promossi l-prinċipji u l-valuri, b'għeruq f'qafas ibbażat fuq regoli, li l-UE u l-Istati Uniti jikkondividu u jħaddnu u li tfassal approċċ u viżjoni komuni għall-kummerċ globali, l-investiment u l-kwistjonijiet marbuta mal-kummerċ bħal standards għoljin, normi u regolamenti, sabiex tiġi żviluppata viżjoni trans-Atlantika aktar estensiva u grupp komuni ta' għanijiet strateġiċi; li żżomm f'moħħha l-fatt li minħabba d-daqs tas-suq trans-Atlantiku, it-TTIP hija opportunità biex jissawwar u jiġi regolat l-ordni tal-kummerċ internazzjonali bil-għan li jiġi żgurat li ż-żewġ blokok jiffjorixxu f'dinja interkonnessa;

(iv)         li tiżgura, b'mod speċjali minħabba l-iżviluppi pożittivi reċenti fl-Organizzazzjoni Dinjija tal-Kummerċ (WTO), li ftehim mal-Istati Uniti se jservi bħala tarġa għal negozjati kummerċjali aktar estensivi u mhux b'mod preventiv jew b'oppożizzjoni għall-proċess fid-WTO; il-ftehimiet kummerċjali bilaterali u plurilaterali għandhom ġeneralment jiġu kkunsidrati bħala t-tieni l-aqwa għażla u m'għandhomx jipprevjenu li jsiru sforzi b'mod li jintlaħaq titjib sinifikanti fuq il-livell multilaterali; it-TTIP trid tiżgura sinerġiji mal-ftehimiet kummerċjali l-oħra li attwalment qed jiġu negozjati;

(v)         li żżomm f'moħħha li t-TFUE jiddefinixxi l-politika kummerċjali tal-UE bħala parti integrali mill-azzjoni esterna kumplessiva tal-Unjoni u li, għalhekk, tevalwa l-implikazzjonijiet tal-ftehim finali, filwaqt li tirrikonoxxi l-opportunitajiet, bħal aċċess għas-suq aktar faċli dovut għal standards trans-Atlantiċi komuni, u r-riskji, bħal pereżempju devjazzjoni tat-traffiku kummerċjali mill-pajjiżi li qed jiżviluppaw minħabba l-erożjoni tal-preferenzi tariffarji;

(vi)         li tiżgura li l-ftehim jiggarantixxi rispett sħiħ tal-istandards tal-UE fil-qasam tad-drittijiet fundamentali permezz tal-inklużjoni ta' klawsola legalment vinkolanti u sospensiva dwar id-drittijiet tal-bniedem bħala parti standard mill-ftehimiet kummerċjali tal-UE ma' pajjiżi terzi;

(b)    rigward l-aċċess għas-suq:

(i)          li tiżgura li l-offerti ta' aċċess għas-suq fl-oqsma differenti jkunu reċiproċi, ambizzjużi bl-istess mod u jirriflettu l-aspettattivi taż-żewġ partijiet, jissottolinja li l-proposti differenti għal dawn l-oqsma jridu jkunu bbilanċjati;

(ii)          li jkollha l-għan li telimina d-dazji tariffarji kollha, waqt li tirrispetta l-fatt li hemm għadd ta' prodotti industrijali u agrikoli sensittivi fuq iż-żewġ naħat li se jkollu jintlaħaq ftehim fir-rigward ta' listi eżawrjenti tagħhom matul il-proċess tan-negozjar; waqt li jinnota li s-CETA jista' jkun punt ta' riferiment tajjeb f'dan ir-rigward biex jiġu previsti perjodi ta' tranżizzjoni u kwoti xierqa għall-aktar prodotti sensittivi u, fi ftit każijiet, l-esklużjoni tagħhom;

(iii)         li tagħmel kull sforz sabiex klawżola ta' salvagwardja tiġi inkorporata fil-ftehim, kif inhu stabbilit b'mod ċar fil-mandat ta' negozjar, li kieku tiġi invokata fejn żieda fl-importazzjonijiet ta’ prodott partikolari thedded li tikkawża ħsara serja għall-produzzjoni domestika tal-ikel;

(iv)         li tibqa' tikkunsidra li, peress li l-UE hija l-akbar blokk kummerċjali fid-dinja, jeżistu interessi offensivi importanti għall-UE fis-settur tas-servizzi speċjalizzati ħafna, pereżempju fl-oqsma tal-inġinerija u servizzi professjonali oħra, tat-telekomunikazzjonijiet u tas-servizzi finanzjarji jew tat-trasport;

(v)         li żżid l-aċċess għas-suq għas-servizzi skont approċċ ibbażat fuq "lista ibrida", li fir-rigward tal-aċċess għas-suq juża "listi pożittivi", li permezz tagħhom is-servizzi li għandhom jinfetħu għall-kumpaniji barranin jissemmew b'mod espliċitu u s-servizzi ġodda jiġu esklużi waqt li jiġi żgurat li l-klawżoli possibbli ta' sospensjoni ("stand-still") u ta' aġġustament predefinit ("ratchet") japplikaw biss għad-dispożizzjonijiet nondiskriminatorji u jippermettu biżżejjed flessibbiltà sabiex is-servizzi ta' interess ekonomiku ġenerali jitqiegħdu mill-ġdid fil-kontroll pubbliku kif ukoll sabiex jitqies il-feġġien ta' servizzi ġodda u innovattivi, u li fir-rigward tat-trattament nazzjonali juża approċċ ibbażat fuq "listi negattivi";

(vi)         in-negozjati għandhom jindirizzaw b'mod sinifikanti u jneħħu r-restrizzjonijiet attwali tal-Istati Uniti fuq is-servizzi tat-trasport marittimu u bl-ajru li huma l-proprjetà ta' negozji Ewropej bħala riżultat tal-leġiżlazzjoni tal-Istati Uniti, bħal pereżempju l-Jones Act, il-Foreign Dredging Act, il-Federal Aviation Act u l-Air Cabotage law tal-Istati Uniti, u fir-rigward tar-restrizzjonijiet ta' kapital fuq is-sjieda tal-linji tal-ajru minn barranin, li jxekklu serjament l-aċċess għas-suq għall-kumpaniji tal-UE kif ukoll l-innovazzjoni fl-Istati Uniti nnifisha;

(vii)        li tibni fuq id-dikjarazzjoni konġunta li tirrifletti l-impenn ċar tan-negozjaturi li jeskludu lis-Servizzi ta' Interess Ġenerali attwali u futuri, kif ukoll lis-Servizzi ta' Interess Ekonomiku Ġenerali mill-kamp ta' applikazzjoni tat-TTIP, (inklużi, iżda mhux biss, l-ilma, is-saħħa, is-servizzi soċjali, is-sistemi tas-sigurtà soċjali u l-edukazzjoni), biex tiżgura li l-awtoritajiet nazzjonali u, jekk ikun applikabbli, dawk lokali jżommu d-dritt sħiħ li jintroduċu, jadottaw, iżommu jew jirrevokaw kwalunkwe miżura fir-rigward tal-ikkummissjonar, l-organizzazzjoni, il-finanzjament u l-provvista ta' servizzi pubbliċi kif dispost fit-Trattati kif ukoll fil-mandat ta' negozjar tal-UE; din l-esklużjoni għandha tapplika irrispettivament minn kif jiġu pprovduti u ffinanzjati s-servizzi;

(viii)       li tirsisti ħafna biex tiżgura r-rikonoxximent reċiproku tal-kwalifiki professjonali, b'mod speċifiku permezz tal-ħolqien ta' qafas ġuridiku mal-istati federali li jkollhom setgħat regolatorji f'dan il-qasam, b'mod li l-professjonisti mill-UE u l-Istati Uniti jitħallew jipprattikaw fuq iż-żewġ naħat tal-Atlantiku u li tiġi ffaċilitata l-mobbiltà tal-investituri, il-professjonisti, il-ħaddiema b'kapaċitajiet għoljin ħafna u t-tekniċi bejn l-UE u l-Istati Uniti fis-setturi koperti mit-TTIP;

(ix)         li żżomm f'moħħha li l-faċilitazzjoni tal-viżi għall-fornituri ta' servizzi u prodotti Ewropej hija element kruċjali biex jiġi sfruttat il-ftehim u biex tiżdied, fil-kuntest tan-negozjati, il-pressjoni politika fuq l-Istati Uniti biex tiggarantixxi reċiproċità sħiħa tal-viżi u trattament ugwali għaċ-ċittadini kollha tal-Istati Membri tal-UE mingħajr diskriminazzjoni fir-rigward tal-aċċess tagħhom għall-Istati Uniti;

(x)         li tikkombina negozjati dwar l-aċċess għas-suq fir-rigward tas-servizzi finanzjarji mal-konverġenza fir-regolamentazzjoni finanzjarja fl-ogħla livell, sabiex tappoġġa l-introduzzjoni u l-kompatibbiltà ta' regolamentazzjoni meħtieġa b'mod li tissaħħaħ l-istabbiltà finanzjarja, tiġi żgurata protezzjoni xierqa għall-konsumaturi ta' prodotti u servizzi finanzjarji u jiġu appoġġati l-isforzi ta' kooperazzjoni kontinwa f'forums internazzjonali oħrajn, bħall-Kumitat ta' Basel dwar is-Superviżjoni Bankarja u l-Bord għall-Istabbiltà Finanzjarja; li tiżgura li dawn l-isforzi ta' kooperazzjoni ma jillimitawx is-sovranità regolatorja u superviżorja tal-UE u l-Istati Membri, inkluża l-kapaċità tagħhom li jipprojbixxu ċerti prodotti u attivitajiet finanzjarji;

(xi)         li tistabbilixxi kooperazzjoni msaħħa bejn l-UE, l-Istati Membri u l-Istati Uniti, inklużi mekkaniżmi għal kooperazzjoni internazzjonali aktar effiċjenti bil-għan li jiġu stabbiliti standards globali ta' livell ogħla kontra l-kriminalità u l-korruzzjoni finanzjarji u fiskali;

(xii)        li tiżgura li l-acquis tal-UE dwar il-privatezza tad-data ma jiġix kompromess permezz tal-liberalizzazzjoni tal-flussi ta' data, b'mod partikolari fil-qasam tal-kummerċ elettroniku u s-servizzi finanzjarji, filwaqt li tirrikonoxxi r-rilevanza tal-flussi ta' data bħala s-sinsla tal-kummerċ trans-Atlantiku u tal-ekonomija diġitali; li tinkorpora, bħala punt fundamentali, dispożizzjoni orizzontali komprensiva, mhux ambigwa u awtonoma, ibbażata fuq l-Artikolu XIV tal-Ftehim Ġenerali dwar il-Kummerċ fis-Servizzi (GATS), li teżenta għalkollox il-qafas ġuridiku eżistenti u futur tal-UE għall-protezzjoni tad-data personali mill-ftehim, mingħajr ebda kondizzjoni li jrid ikun konsistenti ma' partijiet oħra tat-TTIP; li tinnegozja dispożizzjonijiet li jirrigwardaw il-fluss ta' data personali biss jekk tkun garantita u rispettata l-applikazzjoni sħiħa tar-regoli dwar il-protezzjoni tad-data fuq iż-żewġ naħat tal-Atlantiku, u li tikkoopera mal-Istati Uniti b'mod li l-pajjiżi terzi jitħeġġu jadottaw standards dwar il-protezzjoni tad-data ta' livell għoli simili madwar id-dinja;

(xiii)       li tibqa' tikkunsidra li l-approvazzjoni mogħtija mill-Parlament Ewropew għall-Ftehim TTIP finali tista' tiġi pperikolata sakemm l-attivitajiet ta' sorveljanza tal-massa ġenerali tal-Istati Uniti ma jiġux abbandunati għalkollox u tinstab soluzzjoni adegwata għad-drittijiet għall-privatezza tad-data, inklużi r-rimedju amministrattiv u r-rimedju ġudizzjarju, kif stabbilit fil-paragrafu 74 tar-riżoluzzjoni tal-Parlament tat-12 ta' Marzu 2014;

(xiv)       li tiżgura li l-fiduċja bejn l-UE u l-Istati Uniti, li saritilha ħsara mill-iskandli ta' sorveljanza tal-massa, titreġġa' lura għal li kienet malajr u kompletament;   

(xv)        li tinkludi kapitolu ambizzjuż rigward il-kompetizzjoni biex tiżgura li l-liġi dwar il-kompetizzjoni Ewropea tiġi rrispettata kif xieraq, b'mod partikolari fid-dinja diġitali; li tiżgura li l-kumpaniji privati jkunu jistgħu jikkompetu b'mod ġust mal-kumpaniji taħt sjieda jew kontroll tal-istat; li tiżgura li s-sussidji mill-istat lill-kumpaniji privati għandhom ikunu regolati u soġġetti għal sistema ta' kontroll trasparenti;

(xvi)        li tappella għal kompetizzjoni miftuħa fl-ekonomija diġitali u għall-iżvilupp ta' din l-ekonomija, li min-natura tagħha hi globali imma li għandha l-bażijiet ewlenin tagħha fl-UE u fl-Istati Uniti; li tenfasizza fin-negozjati li l-ekonomija diġitali trid tkun ċentrali għas-suq trans-Atlantiku, b'influwenza fl-ekonomija globali u fit-tiftiħ ulterjuri tas-swieq globali;

(xvii)      li tibqa' tikkunsidra, fir-rigward tas-servizzi tas-soċjetà tal-informazzjoni u s-servizzi tat-telekomunikazzjoni, li hu ta' importanza partikolari li t-TTIP tiżgura kundizzjonijiet ekwivalenti flimkien ma' aċċess ugwali u trasparenti bbażat fuq ir-reċiproċità għall-kumpaniji ta' servizzi tal-UE fir-rigward tas-suq tal-Istati Uniti u b'obbligu fuq il-fornituri ta' servizzi tal-Istati Uniti biex jirrispettaw u jikkonformaw mal-istandards tal-industrija u fil-qasam tas-sikurezza tal-prodotti u mad-drittijiet tal-konsumaturi rilevanti kollha, meta jkunu qed jipprovdu servizzi fl-Ewropa jew lil klijenti Ewropej;

(xviii)     li tiżgura fil-ftehim, f'konformità sħiħa mal-Konvenzjoni tal-UNESCO dwar il-Protezzjoni u l-Promozzjoni tad-Diversità tal-Espressjonijiet Kulturali, li l-partijiet jirriżervaw id-dritt tagħhom li jadottaw jew iżommu kwalunkwe miżura (b'mod partikolari dawk ta' natura regolatorja u/jew finanzjarja) fir-rigward tal-protezzjoni jew il-promozzjoni tad-diversità kulturali u lingwistika, bi qbil mal-Artikoli rilevanti kif stabbiliti fit-Trattat dwar il-Funzjonament tal-Unjoni Ewropea, kif ukoll il-libertà u l-pluraliżmu medjatiċi, irrispettivament mit-teknoloġija jew il-pjattaforma ta' distribuzzjoni użati u waqt li jibqa' jiġi kkunsidrat il-fatt li l-mandat mogħti lill-Kummissjoni Ewropea mill-Istati Membri jeskludi b'mod espliċitu s-servizzi awdjoviżivi;

(xix)       li tispeċifika li fil-ftehim m'hemm xejn li jaffettwa l-ħila tal-UE jew tal-Istati Membri tagħha li jissussidjaw u jipprovdu appoġġ finanzjarju lill-industriji kulturali, kif ukoll lis-servizzi kulturali, edukattivi, awdjoviżivi u tal-istampa;

(xx)        li tikkonferma li s-sistemi ta' prezzijiet fissi għall-kotba u l-iffissar tal-prezzijiet għall-gazzetti u r-rivisti mhumiex se jiġu kkontestati mill-obbligi taħt il-ftehim dwar it-TTIP;

(xxi)       li, minħabba l-interess enormi min-naħa tal-kumpaniji Ewropej, b'mod speċifiku l-SMEs, fil-ksib ta' aċċess mhux diskriminatorju għall-kuntratti pubbliċi fl-Istati Uniti, kemm fil-livell federali kif ukoll fil-livell subfederali, pereżempju għas-servizzi tal-bini, l-inġinerija ċivili, l-infrastruttura tat-trasport u l-enerġija, u l-prodotti u s-servizzi, ikollha approċċ ambizzjuż għall-kapitolu rigward l-akkwist pubbliku, filwaqt li tirrispetta l-konformità tal-kapitolu mad-direttivi l-ġodda tal-UE dwar l-akkwist pubbliku u dwar il-konċessjonijiet, bl-intenzjoni li titranġa, bi qbil mal-prinċipju ta' reċiproċità, id-diskrepanza kbira li teżisti attwalment fil-grad ta' ftuħ taż-żewġt iswieq tal-akkwist pubbliku fuq iż-żewġ naħat tal-Atlantiku, billi jinfetaħ b'mod sinifikanti s-suq tal-Istati Uniti (li għadu regolat mill-Buy American Act tal-1933) kemm fil-livell federali u kemm f'dak subfederali, abbażi tal-impenji li saru fil-Ftehim dwar l-Akkwisti Pubbliċi u billi jitneħħew ir-restrizzjonijiet li japplikaw attwalment bl-istess mod fil-livelli federali, statali u lokali fl-Istati Uniti; u li tistabbilixxi l-mekkaniżmi li jiggarantixxu li l-impenji li saru mill-awtoritajiet federali tal-Istati Uniti se jiġu onorati f'kull livell politiku u amministrattiv;

(xxii)      li tiżgura, bil-għan li toħloq rekwiżiti proċedurali miftuħin, mhux diskriminatorji u prevedibbli li jiżguraw aċċess ugwali għall-kumpaniji tal-UE u tal-Istati Uniti, speċjalment l-SMEs, meta jkunu qed iressqu offerti għal kuntratti pubbliċi, li l-Istati Uniti żżid it-trasparenza fil-proċess ta' aġġudikazzjoni fis-seħħ fit-territorju tagħha;

(xxiii)     li tippromwovi l-kooperazzjoni bejn l-UE u l-Istati Uniti fil-livell internazzjonali sabiex jiġu promossi l-istandards ta' sostenibbiltà komuni għall-akkwist pubbliku fil-livell federali u subfederali kollha tal-gvern, fost oħrajn fl-implimentazzjoni tal-Ftehim dwar l-Akkwisti Pubbliċi li ġie rivedut dan l-aħħar; u fl-adozzjoni u fir-rispett tal-istandards fil-qasam tar-responsabbiltà soċjali mill-impriżi abbażi tal-Linji Gwida għal Impriżi Multinazzjonali tal-Organizzazzjoni għall-Kooperazzjoni u l-Iżvilupp Ekonomiċi (OECD);

(xxiv)     li tiżgura li l-istati tal-Istati Uniti jiġu inklużi fil-proċess ta' negozjar b'mod li jinkisbu riżultati sinifikanti fit-tiftiħ tal-kuntratti għal akkwist pubbliku fl-Istati Uniti għall-kumpaniji tal-UE;

(xxv)      li tkun konxja, fir-rigward tal-akkwist pubbliku, tan-natura sensittiva tal-oqsma tad-difiża u s-sigurtà u li tqis l-objettivi stabbiliti mill-Kapijiet ta' Stati u Gvernijiet matul il-Kunsill dwar id-Difiża tal-2013 biex jiġi promoss l-istabbiliment ta' suq Ewropew fl-oqsma tas-sigurtà u d-difiża u ta' bażi industrijali u teknoloġika tad-difiża Ewropea (EDTIB);

(xxvi)     li tiżgura li n-negozjati dwar ir-regoli tal-oriġini jkollhom l-għan li jirrikonċiljaw l-approċċi tal-UE u tal-Istati Uniti u li jistabbilixxu regoli tal-oriġini effikaċi, biex b'hekk jiġi evitat li r-regoli tal-oriġini jiddgħajfu minn ftehimiet oħrajn u li tikkunsidra lin-negozjati bħala opportunità biex isir progress lejn standards komuni għal immarkar obbligatorju tal-oriġini ta' prodotti; minħabba l-konklużjoni tan-negozjati tal-Ftehim Ekonomiku u Kummerċjali Komprensiv (CETA) bejn l-UE u l-Kanada u l-ammeljorament potenzjali tal-ftehim ta' kummerċ ħieles UE-Messiku, se jkun hemm bżonn li jiġu kkunsidrati l-possibbiltà u l-ambitu ta' akkumulazzjoni; li tibqa' tikkunsidra madankollu li l-għan tat-TTIP hu li tiffaċilita l-kummerċ fil-prodotti li jkunu ġew immanifatturati ġenwinament fl-Istati Uniti u fl-UE b’mod ġenwin u li ma tippermettix l-importazzjoni minn pajjiżi terzi, u għalhekk se jkun hemm bżonn li l-esklużjonijiet ta' ċerti prodotti jiġu kkunsidrati speċifikament għal kull każ individwali u għandhom jingħataw esklużjonijiet minn kull tip ta' akkumulazzjoni għas-setturi sensittivi;

(xxvii)    li tiżgura li t-TTIP ikun ftehim miftuħ, u li tfittex modi kif is-sħab importanti, li jkollhom interess fin-negozjati dwar it-TTIP minħabba ftehimiet dwar Unjoni Doganali mal-UE jew mal-Istati Uniti, jistgħu jinżammu informati b'mod aktar attiv rigward l-iżviluppi;

(c) rigward il-kooperazzjoni regolatorja u l-pilastru għall-koerenza u l-ONT:

(i)          li tiżgura li l-kapitolu tal-kooperazzjoni regolatorja jippromwovi ambjent ekonomiku trasparenti, effikaċi u prokompetittiv permezz tal-identifikazzjoni u l-prevenzjoni tal-ostakli nontariffarji potenzjali għall-kummerċ fil-ġejjieni, li jolqtu lill-SMEs b'mod sproporzjonat, u tal-faċilitazzjoni tal-kummerċ u l-investiment waqt li jiġu żviluppati u garantiti l-ogħla livelli ta' protezzjoni tas-saħħa u s-sigurtà bi qbil mal-prinċipju ta' prekawzjoni stabbilit fl-Artikolu 191 TFUE, u tal-leġiżlazzjoni tal-konsumatur, tax-xogħol, ambjentali u tal-benessri tal-annimali u tad-diversità kulturali li teżisti fi ħdan l-UE; li tappoġġa, filwaqt li tirrispetta kompletament l-awtonomija regolatorja, l-istabbiliment ta' djalogu strutturat u kooperazzjoni bejn ir-regolaturi bl-iktar mod trasparenti possibbli u bl-involviment tal-partijiet interessati; li tinkludi dixxiplini trasversali dwar il-koerenza u t-trasparenza regolatorji għall-iżvilupp u l-implimentazzjoni ta' regolamenti effiċjenti, kosteffettivi, u aktar kompatibbli għall-prodotti u s-servizzi; jeħtieġ li n-negozjaturi fuq iż-żewġ naħat jidentifikaw u jkunu ċari ħafna dwar liema proċeduri u standards tekniċi huma fundamentali u ma jistgħux jiġu kompromessi, liema jistgħu jkunu s-suġġett ta' approċċ komuni, liema huma l-oqsma fejn ir-rikonoxximent reċiproku bbażat fuq standard għoli komuni u sistema b'saħħitha ta' sorveljanza tas-suq huma mixtieqa u liema huma dawk fejn sempliċiment huwa possibbli titjib fl-iskambju ta' informazzjoni, abbażi tal-esperjenza ta' diversi snin ta' diskussjonijiet f'diversi fora fosthom il-Kunsill Ekonomiku Trans-Atlantiku u l-Forum ta' Kooperazzjoni Regolatorja ta' Livell Għoli biex jiġi żgurat bl-istess mod li mhux se jaffettwa l-istandards li għad iridu jiġu stabbiliti f'oqsma fejn il-leġiżlazzjoni jew l-istandards huma differenti ħafna fl-Istati Uniti meta mqabbla mal-UE, bħal, pereżempju, fl-implimentazzjoni tal-leġiżlazzjoni (qafas) eżistenti (pereżempju, REACH), jew l-adozzjoni ta' liġijiet ġodda (pereżempju, il-klonazzjoni), jew definizzjonijiet futuri li jaffettwaw il-livell ta' protezzjoni (pereżempju, il-kimiċi li jinterferixxu mas-sistema endokrinali); li tiżgura li kwalunkwe dispożizzjoni dwar kooperazzjoni regolatorja fit-TTIP ma tistabbilixxix rekwiżit proċedurali għall-adozzjoni tal-atti tal-Unjoni kkonċernati minnha u lanqas ma tagħti lok għal drittijiet infurzabbli f'dak ir-rigward;

(ii)          li tibbaża n-negozjati dwar il-miżuri tal-SPS u l-OTK fuq il-prinċipji ewlenin tal-ftehimiet multilaterali SPS u OTK u li tipproteġi l-istandards u l-proċeduri SPS Ewropej; li, l-ewwel nett, timmira lejn l-eliminazzjoni jew it-tnaqqis sinifikanti tal-miżuri SPS eċċessivament iebsa, inklużi l-proċeduri ta' importazzjoni relatati; li tiżgura b'mod partikolari li l-approvazzjonijiet minn qabel, il-protokolli obbligatorji jew l-ispezzjonijiet ta' qabel l-approvazzjoni doganali ma jiġux applikati bħala miżura ta' importazzjoni permanenti; li tikseb aktar trasparenza u ftuħ, rikonoxximent reċiproku ta' standards ekwivalenti, skambji tal-aħjar prattiki, it-tisħiħ tad-djalogu bejn ir-regolaturi u l-partijiet interessati u t-tisħiħ tal-kooperazzjoni bejn il-korpi li jistabbilixxu l-istandards internazzjonali; li tiżgura fin-negozjati dwar il-miżuri tal-SPS u l-OTK, li l-istandards għoljin li jkunu ġew implimentati sabiex jiżguraw is-sikurezza tal-ikel, il-ħajja jew is-saħħa tal-bnedmin, l-annimali jew il-pjanti fl-UE ma jiġu kompromessi bl-ebda mod;

(iii)         li tinkoraġġixxi lill-Istati Uniti tneħħi l-projbizzjoni fuq l-importazzjonijiet taċ-ċanga mill-UE;

(iv)         rigward il-kapitolu dwar il-kooperazzjoni regolatorja orizzontali, li trawwem il-kooperazzjoni regolatorja bilaterali sabiex tevita d-diverġenza mhux meħtieġa, b'mod partikolari fir-rigward tat-teknoloġiji u s-servizzi ġodda, għall-benefiċċju tal-kompetittività u l-għażla tal-konsumatur tal-Ewropa u l-Istati Uniti; li dan tiksbu permezz ta' titjib tal-iskambju tal-informazzjoni u li tippromwovi l-adozzjoni, u l-implimentazzjoni tal-istrumenti internazzjonali, waqt li tirrispetta l-prinċipju tas-sussidjarjetà, abbażi ta' preċedenti ta' suċċess bħal, pereżempju, l-istandards ISO jew taħt il-Forum Dinji għall-Armonizzazzjoni tar-Regolamenti dwar il-Vetturi (WP.29) tal-Kummissjoni Ekonomika għall-Ewropa tan-Nazzjonijiet Uniti (UNECE); li tiftakar li r-rikonoxximent tal-ekwivalenza tal-akbar numru possibbli ta' regolamenti dwar is-sikurezza tal-vetturi abbażi ta' livell ekwivalenti vverifikat ta' protezzjoni jkun wieħed mis-suċċessi l-aktar importanti tal-ftehim; li tiżgura li l-valutazzjoni tal-impatt preċedenti għal kull att regolatorju għandha tkejjel l-impatt tiegħu fuq il-konsumaturi u l-ambjent flimkien mal-impatt tiegħu fuq il-kummerċ u l-investiment; li tippromwovi l-kompatibbiltà regolatorja mingħajr ma tikkomprometti l-objettivi regolatorji u tal-politika leġittimi u l-kompetenzi tal-leġiżlaturi tal-UE u tal-Istati Uniti;

(v)         li timmira li tkompli tiggarantixxi livell għoli ta' sikurezza tal-prodotti fi ħdan l-Unjoni filwaqt li tiġi eliminata d-duplikazzjoni żejda tal-ittestjar li tikkawża ħela ta' riżorsi, b'mod partikolari fir-rigward tal-prodotti b'riskju baxx;

(vi)         li tindirizza kwistjonijiet doganali li jmorru lil hinn mir-regoli tal-Ftehim tal-Faċilitazzjoni tal-Kummerċ tad-WTO u tenfasizza li, sabiex tinkiseb it-tneħħija reali tal-piż amministrattiv, hemm bżonn li ssir ħidma lejn livell massimu ta' allinjament regolatorju fir-rigward tal-politiki u l-prattiki doganali u dawk relatati mal-fruntieri;

(vii)        li tiddefinixxi b'mod ċar, fil-kuntest tal-kooperazzjoni regolatorja futura, liema miżuri jikkonċernaw l-OTK u l-piżijiet u l-formalitajiet amministrattivi duplikati jew obsoleti u liema huma marbuta ma' standards u regolamenti fundamentali, jew ma' proċeduri li jaqdu objettiv ta' politika pubblika;

(viii)       li tirrispetta bis-sħiħ is-sistemi regolatorji stabbiliti fuq iż-żewġ naħat tal-Atlantiku, kif ukoll ir-rwol tal-Parlament Ewropew fi ħdan il-proċess ta' teħid ta' deċiżjonijiet tal-UE u l-iskrutinju demokratiku tiegħu fuq il-proċessi regolatorji tal-UE fil-ħolqien tal-qafas għal kooperazzjoni futura waqt li, fl-istess ħin, tiżgura l-ogħla trasparenza u tibqa' tissorvelja l-involviment ibbilanċjat tal-partijiet interessati fi ħdan il-konsultazzjonijiet inklużi fl-iżvilupp ta' proposta regolatorja u mhux li jiddewwem il-proċess leġiżlattiv Ewropew; li tispeċifika r-rwol, il-kompożizzjoni u l-istatus ġuridiku tal-Korp ta' Kooperazzjoni Regolatorja, waqt li tqis il-fatt li kwalunkwe applikazzjoni diretta u mandatorja tar-rakkomandazzjonijiet tiegħu tkun timplika ksur tal-proċeduri ta' leġiferazzjoni stabbiliti fit-Trattati; li timmonitorja wkoll li tinżamm kompletament preżervata l-kapaċità tal-awtoritajiet nazzjonali, reġjonali u lokali li jilleġiżlaw il-politiki tagħhom stess, b'mod partikolari l-politiki soċjali u ambjentali;

(d)    rigward ir-regoli:

(i)          li tgħaqqad in-negozjati dwar l-aċċess għas-suq u l-kooperazzjoni regolatorja mal-istabbiliment ta' regoli u prinċipji ambizzjużi, waqt li tibqa' tikkunsidra li kull pilastru għandu sensittivitajiet speċifiċi, rigward kwistjonijiet bħal, iżda mhux biss, l-iżvilupp sostenibbli, l-enerġija, l-SMEs, l-investiment u l-impriżi b'sjieda statali;

(ii)          li tiżgura li l-kapitolu dwar l-iżvilupp sostenibbli jkun vinkolanti u infurzabbli u jkollu l-għan li jilħaq ir-ratifika, l-implimentazzjoni u l-infurzar sħaħ u effettivi tat-tmien konvenzjonijiet fundamentali tal-Organizzazzjoni Internazzjonali tax-Xogħol (ILO) u l-kontenut tagħhom, l-Aġenda tax-Xogħol Deċenti tal-ILO kif ukoll il-ftehimiet ambjentali internazzjonali ewlenin; id-dispożizzjonijiet iridu jkunu mmirati biex itejbu ulterjorment il-livelli ta' protezzjoni tal-istandards fil-qasam tax-xogħol u f'dak ambjentali; kapitolu dwar il-kummerċ u l-iżvilupp sostenibbli ambizzjuż jeħtieġ jinkludi wkoll regoli dwar ir-responsabbiltà soċjali korporattiva abbażi tal-Linji Gwida tal-OECD għall-Impriżi Multinazzjonali u djalogu mas-soċjetà ċivili strutturat b'mod ċar;

(iii)         li tiżgura li l-istandards fil-qasam tax-xogħol u f'dak ambjentali ma jkunux limitati għall-kapitolu rigward il-kummerċ u l-iżvilupp sostenibbli iżda bl-istess mod jiġu inklużi f'oqsma oħra tal-ftehim, bħall-investiment, in-negozju fis-servizzi, il-kooperazzjoni regolatorja u l-akkwist pubbliku;

(iv)         li tiżgura li l-istandards fil-qasam tax-xogħol u f'dak ambjentali jkunu infurzabbli, billi tibni fuq l-esperjenza tajba tal-ftehimiet ta' kummerċ ħieles eżistenti mill-UE u l-Istati Uniti u tal-leġiżlazzjoni nazzjonali; li tiżgura li l-implimentazzjoni tad-dispożizzjonijiet dwar ix-xogħol u l-konformità magħhom ikunu suġġetti għal proċess effikaċi ta' monitoraġġ, li jinvolvi lis-sħab soċjali u r-rappreżentanti tas-soċjetà ċivili u għas-soluzzjoni ġenerali ta' tilwim li tapplika għall-ftehim kollu;

(v)         li tiżgura, b'rispett sħiħ tal-leġiżlazzjoni nazzjonali, li l-impjegati tal-kumpaniji trans-Atlantiċi, reġistrati taħt il-liġi tal-Istati Membri tal-UE, ikollhom aċċess għall-informazzjoni u l-konsultazzjoni f'konformità mad-direttiva Ewropea dwar il-kunsill tax-xogħlijiet;

(vi)         li tiżgura li l-impatt fuq l-ekonomija, l-impjiegi, is-soċjetà u l-ambjent tat-TTIP jiġi eżaminat ukoll permezz ta' valutazzjoni tal-impatt fuq is-sostenibbiltà (VIS) ex-ante komprensiva u oġġettiva b'rispett sħiħ tad-Direttiva tal-UE dwar il-VIS, b'involviment ċar u strutturat mill-partijiet interessati rilevanti kollha, inkluża s-soċjetà ċivili; jitlob lill-Kummissjoni twettaq studji tal-impatt fil-fond komparattivi għal kull Stat Membru u evalwazzjoni tal-kompetittività tas-setturi tal-UE u l-kontropartijiet tagħhom fl-Istati Uniti bil-għan li tagħmel previżjonijiet dwar telf ta' impjiegi u qligħ fis-setturi milquta f'kull Stat Membru, fejn l-ispejjeż ta' aġġustament jistgħu jiġu koperti parzjalment permezz ta' finanzjament tal-UE u tal-Istati Membri;

(vii)        li żżomm l-objettiv li tiddedika kapitolu speċifiku għall-enerġija, inkluża l-materja prima industrijali; li tiżgura li matul in-negozjati, iż-żewġ naħat jeżaminaw modi biex jiffaċilitaw l-esportazzjonijiet tal-enerġija, biex b'hekk it-TTIP tkun tista' tabolixxi kwalunkwe restrizzjoni jew impediment eżistenti ta' esportazzjoni fuq il-fjuwils, inkluż l-LNG u ż-żejt mhux raffinat, bejn iż-żewġ sħab kummerċjali, bil-għan li joħolqu suq tal-enerġija kompetittiv, trasparenti u nondiskriminatorju u b'hekk jappoġġaw id-diversifikazzjoni tas-sorsi tal-enerġija, li tikkontribwixxi għas-sigurtà ta' provvista u twassal għal prezzijiet tal-enerġija aktar baxxi; jenfasizza li jeħtieġ li dan il-kapitolu għall-enerġija jintegra garanziji ċari li l-istandards ambjentali tal-UE u l-miri tagħha fil-qasam tal-azzjoni klimatika m'għandhomx jiddgħajfu;  li tinkoraġġixxi l-kooperazzjoni bejn l-UE u l-Istati Uniti biex jintemmu l-eżenzjonijiet mit-taxxa fuq il-fjuwil għall-avjazzjoni kummerċjali skont l-impenji tal-G20 biex is-sussidji għall-fjuwils fossili jitneħħew gradwalment;

(viii)       li tiżgura li d-dritt ta' kull sieħeb li jirregola l-esplorazzjoni, l-isfruttament u l-produzzjoni tas-sorsi ta' enerġija għandu jibqa' mhux mimsus minn kwalunkwe ftehim, iżda għandu jiġi applikat il-prinċipju tan-nondiskriminazzjoni ladarba jiġi deċiż l-isfruttament; li tibqa' tikkunsidra li xejn fil-ftehim m'għandu jdgħajjef deċiżjonijiet demokratiċi leġittimi nondiskriminatorji fir-rigward tal-produzzjoni tal-enerġija, f'konformità mal-prinċipju ta' prekawzjoni; li tiżgura li l-aċċess għall-materja prima kif ukoll għall-enerġija għandu jingħata wkoll fuq bażi nondiskriminatorja għall-kumpaniji mill-UE jew mill-Istati Uniti u l-istandards tal-kwalità għall-prodotti tal-enerġija jridu jiġu rrispettati, inklużi dawk għal prodotti tal-enerġija relatati mal-impatt tagħhom fuq l-emissjonijiet ta' CO₂ bħal dak stabbilit fid-Direttiva dwar il-Kwalità tal-Fjuwil;

(ix)         li tiżgura li t-TTIP tappoġġa l-użu u l-promozzjoni ta' prodotti u servizzi ekoloġiċi, inkluż billi jiġi ffaċilitat l-iżvilupp tagħhom, u tissimplifika l-esportazzjonijiet u l-importazzjonijiet tagħhom biex b'hekk tisfrutta l-potenzjal konsiderevoli għal kisbiet ambjentali u ekonomiċi li toffri l-ekonomija trans-Atlantika u tikkomplementa n-negozjati plurilaterali li għaddejjin fuq il-Ftehim dwar il-Prodotti Ekoloġiċi bil-għan li tikkontribwixxi għall-ġlieda kontra t-tisħin globali u għall-ħolqien ta' impjiegi ġodda fl-"ekonomija ekoloġika";

(x)         li tiżgura li t-TTIP sservi bħala forum għall-iżvilupp ta' standards ta' sostenibbiltà komuni ambizzjużi u vinkolanti għall-produzzjoni tal-enerġija u l-effiċjenza fl-użu tal-enerġija, filwaqt li dejjem jitqiesu l-istandards eżistenti u jiġu applikati fuq iż-żewġ naħat, standards bħad-direttivi tal-UE dwar it-tikkettar tal-enerġija u l-ekodisinn u li tesplora modi biex issaħħaħ il-kooperazzjoni dwar ir-riċerka rigward l-enerġija, l-iżvilupp u l-innovazzjoni u l-promozzjoni ta' teknoloġiji b'livell baxx ta' emissjonijiet tal-karbonju u li jirrispettaw l-ambjent;

(xi)         li tiżgura li t-TTIP tikkontribwixxi għall-ġestjoni sostenibbli tar-riżorsi tas-sajd, b'mod partikolari permezz ta' kooperazzjoni bejn il-partijiet fil-ġlieda kontra s-sajd illegali, mhux rappurtat u mhux regolat (IUU);

(xii)        li tiżgura li t-TTIP tinkludi kapitolu speċifiku dwar l-SMEs abbażi tal-impenn konġunt taż-żewġ partijiet fin-negozjati u li jkollha l-għan li toħloq opportunitajiet ġodda fl-Istati Uniti għall-SMEs Ewropej (inklużi l-mikroimpriżi), fuq il-bażi tal-esperjenza reali rrappurtata mill-esportaturi SMEs, pereżempju bl-eliminazzjoni tar-rekwiżiti ta' ċertifikazzjoni doppja, bl-istabbiliment ta' sistema ta' informazzjoni bbażata fuq l-internet dwar ir-regolamenti differenti u l-aħjar prattiki, bl-iffaċilitar tal-aċċess għal skemi ta' appoġġ għall-SMEs, bl-introduzzjoni ta' proċeduri "preferenzjali" fil-fruntieri jew bl-eliminazzjoni tat-tariffi speċifiċi li, għal raġunijiet ta' protezzjoni, ikunu relattivament għoljin meta mqabbla ma' tariffi oħra ('tariff peaks') u li għadhom jeżistu; għandha tistabbilixxi mekkaniżmi għaż-żewġ naħat biex jaħdmu flimkien sabiex tiġi faċilitata l-parteċipazzjoni tal-SMEs fil-kummerċ u l-investiment trans-Atlantiċi, pereżempju permezz ta' "punt uniku ta' servizz" komuni għall-SMEs bil-partijiet interessati fil-qasam tal-SMEs jiżvolġu rwol ewlieni fl-istabbiliment tiegħu, li kieku jkun jipprovdi l-informazzjoni speċifika li jeħtieġu biex jesportaw lejn, jimportaw minn u jinvestu fl-Istati Uniti, inkluż dwar dazji doganali, taxxi, regolamenti, proċeduri doganali u opportunitajiet tas-suq;

(xiii)       li tiżgura li t-TTIP tinkludi kapitolu komprensiv dwar l-investiment li jinkludi dispożizzjonijiet kemm dwar l-aċċess għas-suq kif ukoll dwar il-protezzjoni tal-investiment, filwaqt li tirrikonoxxi li l-aċċess għall-kapital jista' jistimula l-impjiegi u t-tkabbir; il-kapitolu dwar l-investiment għandu jkollu l-għan li jiżgura trattament nondiskriminatorju għall-kumpaniji mill-Ewropa u mill-Istati Uniti li jkunu jridu jistabbilixxu ruħhom fit-territorji ta' xulxin, waqt li titqies in-natura sensittiva ta' xi setturi speċifiċi; dawn għandhom ifittxu li jsaħħu l-Ewropa bħala destinazzjoni għall-investiment, iżidu l-fiduċja għall-investiment mill-UE fl-Istati Uniti u jindirizzaw ukoll l-obbligi u r-responsabbiltajiet tal-investituri billi jirreferu, inter alia, għall-prinċipji tal-OECD għall-impriżi multinazzjonali u l-prinċipji tan-NU dwar in-negozju u d-drittijiet tal-bniedem bħala l-parametri referenzjarji;

(xiv)       li tiżgura li d-dispożizzjonijiet dwar il-protezzjoni tal-investiment ikunu limitati għad-dispożizzjonijiet ta' wara l-istabbiliment u jiffukaw fuq it-trattament nazzjonali, l-aktar nazzjon favorit, it-trattament ġust u ekwu u l-protezzjoni kontra l-esproprjazzjoni diretta u indiretta, inkluż id-dritt għal kumpens fil-pront, adegwat u effikaċi; l-istandards ta' protezzjoni u d-definizzjonijiet ta' investitur u ta' investiment għandhom jitfasslu b'mod ġuridiku preċiż biex jipproteġu d-dritt għal regolamentazzjoni fl-interess pubbliku, jiċċaraw it-tifsira ta' esproprjazzjoni indiretta u jipprevjenu t-talbiet bla bażi u frivoli; it-trasferiment liberu tal-kapital għandu jkun konformi mad-dispożizzjonijiet tat-trattati tal-UE u għandu jinkludi konċessjoni prudenzjali mhux limitata biż-żmien fil-każ ta' kriżijiet finanzjarji;

(xv)        li tiżgura l-applikabbiltà tal-ftehimiet internazzjonali, biex jintemm it-trattament mhux ugwali tal-investituri Ewropej fl-Istati Uniti minħabba l-ftehimiet eżistenti tal-Istati Membri; li tiżgura li l-investituri barranin jiġu trattati b'mod nondiskriminatorju u jkollhom opportunità ġusta li jfittxu u jiksbu rimedju għall-ilmenti filwaqt li ma jibbenefikawx minn aktar drittijiet mill-investituri domestiċi;

–         li tibni fuq id-dokument kunċettwali ippreżentat reċentement mill-Kummissarju Malmström lill-Kumitat INTA, fis-7 ta' Mejju u d-diskussjonijiet li għaddejjin fi ħdan il-Kunsill tal-Ministri tal-Kummerċ u tużahom bħala bażi għal negozjati dwar sistema ġdida u effikaċi għall-protezzjoni tal-investiment, peress li dawn jipprovdu proposti mistennija ħafna għal riforma u titjib,

–         li, filwaqt li tqis is-sistemi ġuridiċi żviluppati tal-UE u tal-Istati Uniti, tafda lill-qrati tal-UE u tal-Istati Membri kif ukoll dawk tal-Istati Uniti biex jipprovdu protezzjoni legali effikaċi abbażi tal-prinċipju ta' leġittimità demokratika, b'mod effiċjenti u kosteffettiv,

–         li tipproponi soluzzjoni permanenti għar-riżoluzzjoni ta' tilwim bejn investituri u stati, li tkun soġġetta għall-prinċipji u l-iskrutinju demokratiċi, fejn il-każijiet potenzjali jiġu trattati b'mod trasparenti minn imħallfin professjonali indipendenti maħtura pubblikament f'seduti pubbliċi u li tkun tinkludi mekkaniżmu ta' appell, fejn il-konsistenza tad-deċiżjonijiet ġudizzjarji tkun żgurata u l-ġurisdizzjoni tal-qrati tal-UE u tal-Istati Membri tiġi rispettata,

–         f'terminu medju, Qorti Internazzjonali tal-Investiment pubblika tista' tkun l-aktar mod xieraq biex jiġi indirizzat tilwim dwar investimenti;

(xvi)       li tiżgura li t-TTIP tinkludi kapitolu ambizzjuż, bilanċjat u modern dwar oqsma definiti b'mod preċiż tad-drittijiet tal-proprjetà intellettwali, inklużi r-rikonoxximent u l-protezzjoni mtejba tal-indikazzjonijiet ġeografiċi, u tirrifletti livell ta' protezzjoni ġust u effiċjenti, mingħajr ma tfixkel il-ħtieġa tal-UE li tirriforma s-sistema tagħha tad-drittijiet tal-awtur u filwaqt li tiżgura bilanċ ġust bejn id-drittijiet tal-proprjetà intellettwali u l-interess pubbliku, b'mod partikolari l-ħtieġa li tippreżerva l-aċċess għal mediċini bi prezz raġonevoli billi tkompli tappoġġa l-flessibilitajiet tat-TRIPS;

(xvii)      li tqis li huwa importanti ħafna li l-UE u l-Istati Uniti jibqgħu impenjati u involuti fid-diskussjonijiet globali u multilaterali dwar l-armonizzazzjoni tal-privattivi permezz tal-entitajiet internazzjonali eżistenti, u għaldaqstant iwissi kontra t-tentattivi biex jiġu introdotti dispożizzjonijiet fir-rigward tad-dritt sostantiv dwar il-privattivi, b'mod partikolari b'rabta ma' kwistjonijiet relatati mal-ammissibilità għar-reġistrazzjoni ta' privattiva u l-perjodi ta' grazzja, fit-TTIP;

(xviii)     li tiżgura li l-kapitolu dwar id-drittijiet tal-proprjetà intellettwali ma jinkludix dispożizzjonijiet dwar ir-responsabbiltà ta' intermedjarji fuq l-internet jew dwar sanzjonijiet kriminali bħala għodda għall-infurzar, billi dawn ġew miċħuda preċedentement mill-Parlament, inkluż it-trattat propost tal-ACTA;

(xix)       li tiżgura rikonoxximent sħiħ u protezzjoni ġuridika b'saħħitha tal-indikazzjonijiet ġeografiċi tal-UE u miżuri li jindirizzaw l-użu mhux xieraq u informazzjoni u prattiċi qarrieqa; li tiggarantixxi t-tikkettar, it-traċċabbiltà u l-oriġini ġenwina ta' dawn il-prodotti għall-konsumaturi u l-protezzjoni tal-għarfien tal-produtturi bħala parti essenzjali minn ftehim ibbilanċjat;

(e) rigward it-trasparenza, l-involviment tas-soċjetà ċivili, il-komunikazzjoni fil-livell pubbliku u dak politiku:

(i)     li tissokta fl-isforzi li għaddejjin biex tiżdied it-trasparenza fin-negozjati billi tagħmel aktar proposti ta' negozjati disponibbli għall-pubbliku ġenerali, li timplimenta r-rakkomandazzjonijiet tal-Ombudsman Ewropew, b'mod partikolari fir-rigward tar-regoli dwar l-aċċess pubbliku għad-dokumenti;

(ii)          li tittraduċi dawn l-isforzi għal trasparenza f'riżultati prattiċi sinifikanti, inter alia billi tilħaq arranġamenti man-naħa tal-Istati Uniti biex tittejjeb it-trasparenza, inkluż l-aċċess għad-dokumenti kollha tan-negozjati għall-Membri tal-Parlament Ewropew, inklużi t-testi konsolidati, filwaqt li fl-istess ħin tinżamm il-kunfidenzjalità xierqa, sabiex il-Membri tal-Parlament u l-Istati Membri jkunu jistgħu jiżviluppaw diskussjonijiet kostruttivi mal-partijiet interessati u l-pubbliku; li tiżgura li ż-żewġ partijiet fin-negozjati għandhom jiġġustifikaw kull rifjut li jiżvelaw proposta ta' negozjar;

(iii)         li tippromwovi involviment dejjem eqreb mal-Istati Membri, li kienu responsabbli għall-mandat ta' negozjar li wassal biex il-Kummissjoni Ewropea tiftaħ negozjati mal-Istati Uniti, bl-għan li jitrawwem l-involviment attiv tagħhom fit-titjib tal-komunikazzjoni tal-kamp ta' applikazzjoni u l-benefiċċji possibbli tal-ftehim għaċ-ċittadini Ewropej, skont l-impenn li ttieħed fil-Konklużjonijiet tal-Kunsill adottati fl-20 ta' Marzu 2015, sabiex jiġi żgurat dibattitu pubbliku wiesa' u bbażat fuq il-fatti dwar it-TTIP fl-Ewropa bl-għan li jiġi esplorat it-tħassib ġenwin madwar il-ftehim;

(iv)         li ssaħħaħ l-involviment kontinwu u trasparenti tagħha ma' firxa wiesgħa ta' partijiet interessati matul il-proċess tan-negozjati; jinkoraġġixxi lill-partijiet interessati kollha jipparteċipaw b'mod attiv u jressqu inizjattivi u informazzjoni rilevanti għan-negozjati;

(v)         li tħeġġeġ lill-Istati Membri biex jinvolvu lill-parlamenti nazzjonali b'konformità mal-obbligi kostituzzjonali rispettivi tagħhom, li tipprovdi l-appoġġ kollu meħtieġ għall-Istati Membri biex iwettqu dan il-kompitu u li ssaħħaħ l-komunikazzjoni lill-parlamenti nazzjonali, bil-għan li l-parlamenti nazzjonali jinżammu infurmati b'mod adegwat dwar in-negozjati li għaddejjin;

(vi)         li tibni fuq l-involviment mill-qrib mal-Parlament u tfittex djalogu strutturat u saħansitra eqreb, li se jkompli jissorvelja mill-qrib il-proċess ta' negozjati u se jinvolvi ruħu flimkien mal-Kummissjoni, l-Istati Membri, il-Kungress u l-Amministrazzjoni tal-Istati Uniti, kif ukoll mal-partijiet interessati fuq iż-żewġ naħat tal-Atlantiku sabiex jiżgura eżitu li jkun ta' benefiċċju għaċ-ċittadini fl-UE, fl-Istati Uniti u lil hinn minnhom;

(vii)        li tiżgura li t-TTIP u l-implimentazzjoni futura tagħha jkunu akkumpanjati minn approfondiment tal-kooperazzjoni parlamentari trans-Atlantika, fuq il-bażi u bl-użu tal-esperjenza tad-Djalogu Trans-Atlantiku tal-Leġiżlaturi, biex fil-futur ikun hemm qafas politiku usa' u mtejjeb sabiex jiġu żviluppati approċċi komuni, tissaħħaħ is-sħubija strateġika u titjieb il-kooperazzjoni globali bejn l-UE u l-Istati Uniti;

2.      Jagħti istruzzjonijiet lill-President tiegħu biex jgħaddi din ir-riżoluzzjoni li tinkludi r-rakkomandazzjonijiet tal-Parlament Ewropew lill-Kummissjoni u, għall-informazzjoni, lill-Kunsill, lill-gvernijiet u l-parlamenti tal-Istati Membri, u lill-Amministrazzjoni u l-Kungress tal-Istati Uniti.

NOTA SPJEGATTIVA

Meta l-UE tinnegozja ftehim internazzjonali, bħat-TTIP, il-Parlament Ewropew huwa intitolat li jesprimi l-pożizzjoni tiegħu dwar il-ftehim fi kwalunkwe stadju tan-negozjati, abbażi tal-Artikolu 108 (4) tar-Regoli ta' Proċedura. Ir-Rapporteur jixtieq juża din l-opportunità biex jivvaluta r-riżultati ewlenin tan-negozjati wara aktar minn sena u nofs ta' diskussjonijiet u biex jesprimi l-fehmiet tal-Parlament dwar l-oqsma ewlenin ta' ftehim potenzjali għal TTIP. Ir-rapport tal-Parlament għandu jikkontribwixxi għal bidu ġdid tan-negozjati, issa li l-Kummissjoni l-ġdida hija stabbilita u wara l-elezzjonijiet ta' nofs il-leġiżlatura fl-Istati Uniti.

Dan ir-rapport huwa segwitu għar-riżoluzzjonijiet adottati fil-leġiżlatura preċedenti dwar in-negozjati marbuta mal-kummerċ u l-investiment mal-Istati Uniti f'Ottubru 2012 u Mejju 2013. L-għan tar-Rapporteur kien li jkun komprensiv kemm jista' jkun possibbli u li jippermetti li l-Membri ta' kumitati differenti fi ħdan il-Parlament jagħmlu kontribut maħsub għall-proċess. Il-Parlament għandu l-aħħar kelma fir-ratifika tal-ftehimiet kummerċjali bejn l-UE u pajjiżi terzi: Ftehim jista' jidħol fis-seħħ bil-kunsens tal-Parlament biss. Iċ-ċaħda tal-ftehim ACTA (il-protezzjoni tal-proprjetà intellettwali, fost oħrajn fil-qasam diġitali) uriet li l-Parlament jieħu r-rwol tiegħu fil-politika kummerċjali b'serjetà kbira.

Minħabba l-għadd kbir ta' ilħna kritiċi min-naħa tal-pubbliku Ewropew u fid-dawl tal-aċċettazzjoni pubblika fqira tal-ftehim li qed jiġi nnegozjat, il-Parlament se jkompli jinsisti għall-ogħla livell possibbli ta' trasparenza u se jiggarantixxi li jgħaddi biss ftehim tajjeb, ftehim li jirrispetta l-valuri Ewropej, jistimula t-tkabbir sostenibbli u jikkontribwixxi għall-benessri taċ-ċittadini kollha.

RIŻULTAT TAL-VOTAZZJONI FINALI FIL-KUMITAT

1.4.2015

OPINJONI TAL-KUMITAT GĦALL-AFFARIJIET BARRANIN

għall-Kumitat għall-Kummerċ Internazzjonali

dwar rakkomandazzjonijiet lill-Kummissjoni Ewropea dwar in-negozjati għas-Sħubija Trans-Atlantika ta' Kummerċ u ta' Investiment (TTIP)

(2014/2228(INI))

Rapporteur għal opinjoni: Francisco José Millán Mon

SUĠĠERIMENTI

Il-Kumitat għall-Affarijiet Barranin jistieden lill-Kumitat għall-Kummerċ Internazzjonali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jemmen li l-UE u l-Istati Uniti huma sħab strateġiċi ewlenin; jisħaq fuq il-fatt li s-Sħubija Trans-Atlantika ta' Kummerċ u ta' Investiment (TTIP) hija l-aktar proġett sinifikanti ta' dan l-aħħar bejn l-UE u l-Istati Uniti u għandha terġa' tqawwi s-sħubija trans-Atlantika kollha, lil hinn mill-aspetti kummerċjali tagħha; jenfasizza li l-konklużjoni tagħha b'suċċess hija ta' importanza ġeopolitika għolja f'mument meta l-Istati Uniti qegħdin idawru ħarsithom lejn l-Asja u jikkonkludu s-Sħubija Trans-Paċifika; jissottolinja li t-TTIP mistennija tħalli impatt pożittiv fuq l-impjiegi, it-tkabbir u l-kompetittività għaż-żewġ ekonomiji, li t-tnejn li huma ntlaqtu mill-kriżi; jissottolinja li dawn in-negozjati għandhom isiru bl-aktar mod trasparenti u miftuħa possibbli;

2.  Jenfasizza li l-politika kummerċjali hija parti essenzjali mill-azzjoni esterna tal-UE u bħala tali għandha tkun ifformulata b'mod li jkun konformi ma' politiki barranin u strumenti ta' politika oħra; iħeġġeġ għaldaqstant interazzjoni mill-qrib bejn Kummissarji rilevanti, Direttorati Ġenerali, is-Servizz Ewropew għall-Azzjoni Esterna u l-Istati Membri;

3.  Jinnota l-importanza strateġika tat-TTIP fit-tisħiħ u t-tiswir tal-kummerċ globali bbażat fuq ir-regoli u tal-governanza ekonomika msejsa fuq il-valuri kondiviżi mill-UE u mill-Istati Uniti, partikolarment f'dinja li qed issir aktar multipolari; jinnota li l-impatt tagħha jmur lil hinn mill-implikazzjonijiet bilaterali billi jiffaċilita l-istabbiliment ta' regolamenti, regoli u standards komuni li jistgħu jiġu adottati aktar tard f'livell globali; jenfasizza f'dan ir-rigward li n-negozjati bilaterali li l-UE tmexxi m'għandhomx ikunu sostituti iżda pjuttost xprun għal aktar liberalizzazzjoni tal-kummerċ fi ħdan id-WTO;

4.  Jenfasizza li t-TTIP m'għandhiex tbaxxi l-istandards, speċjalment dwar kwistjonijiet importanti bħall-protezzjoni tal-konsumatur, is-saħħa, id-drittijiet tax-xogħol jew l-ambjent, iżda pjuttost tqis id-differenzi bejn is-sistemi regolatorji tal-UE u tal-Istati Uniti u tfittex li tilħaq standards komuni ogħla bħala mudell għad-dinja, peress li dan isaħħaħ il-pożizzjoni ekonomika globali tal-UE, filwaqt li jġib 'il quddiem il-valuri tagħna; jenfasizza li l-ebda dispożizzjoni fil-kapitolu dwar il-protezzjoni tal-investiment m'għandu jinftiehem li jimmina d-dritt tal-UE u tal-Istati Membri li jirregolaw, b'konformità mal-kompetenzi rispettivi tagħhom, huma u jaħdmu biex jilħqu objettivi leġittimi ta' politika pubblika;

5.  Jenfasizza li ż-żewġ partijiet tat-TTIP jeħtiġilhom jimpenjaw ruħhom sabiex jinkoraġġixxu lill-kumpaniji jirrispettaw il-linji gwida tal-OECD dwar l-Impriżi Multinazzjonali (MNEs); jinnota li l-partijiet għandhom jaħdmu ma' unions biex jimmonitorjaw l-aderenza tal-impriżi multinazzjonali ma' dawn il-linji gwida;

6.  Jitlob lill-Kummissjoni, fir-rigward tal-akkwist pubbliku, tkun konxja tan-natura sensittiva tal-oqsma tad-difiża u s-sigurtà u tqis l-objettivi stabbiliti mill-Kapijiet ta' Stati u Gvernijiet matul il-Kunsill tad-Difiża għall-2013 li jippromwovu l-istabbiliment ta' suq Ewropew tas-sigurtà u d-difiża u ta' bażi industrijali u teknoloġika tad-difiża Ewropea (EDTIB);

7.  Jenfasizza li l-konklużjoni tat-TTIP toħloq il-prospettiva ta' spazju ekonomiku wiesa', li jkun jinkludi pajjiżi terzi li magħhom l-UE u l-Istati Uniti għandhom relazzjonijiet kummerċjali u ekonomiċi stretti; jitlob lill-Kummissjoni tiżgura li kwalunkwe ftehim finali jista' jiġi estiż biex jippermetti kooperazzjoni mill-qrib ma' pajjiżi li magħhom l-UE u l-Istati Uniti jkollhom ftehimiet ta' kummerċ ħieles, u li tikkonsulta fil-proċess, b'mod partikolari ma' dawk li se jintlaqtu mit-TTIP, bħall-Messiku u l-Kanada, minħabba l-Ftehim Nord-Amerikan għall-Kummerċ Ħieles, it-Turkija, minħabba l-Unjoni Doganali tagħha mal-UE, u l-pajjiżi taż-ŻEE; jinnota li studji juru li t-TTIP se jkollha impatt pożittiv fuq l-ekonomiji ta' pajjiżi terzi, inklużi opportunitajiet ġodda għall-pajjiżi li qed jiżviluppaw;

8.  Jenfasizza li l-provvista tal-enerġija tal-UE tiddependi ħafna minn sorsi barranin, u għalhekk jitlob lill-Kummissjoni tiżgura li jiġi inkluż fit-TTIP kapitolu qawwi dwar l-enerġija; jenfasizza l-potenzjal tat-TTIP li tiddiversifika l-provvista tal-idrokarburi tal-UE u li tikkontribwixxi għas-sigurtà tal-enerġija tagħha; iħeġġeġ lill-Kummissjoni tesplora modi li bihom dan il-potenzjal jista' jiġi sfruttat b'konformità ma' standards ambjentali għoljin, it-tranżizzjoni lejn ekonomiji b'emissjonijiet baxxi u l-miri ambizzjużi tal-UE dwar il-ġlieda kontra t-tibdil fil-klima; jissottolinja li l-ftehim m'għandux ikollu impatt fuq id-drittijiet ta' kull parti li tikkontrolla l-esplorazzjoni u l-isfruttament tar-riżorsi tal-enerġija tagħha;

9.  Jemmen li dan il-ftehim għandu jkun akkumpanjat minn kooperazzjoni parlamentari trans-Atlantika aktar profonda u li t-tisħiħ tar-rabtiet tal-kummerċ u tal-investiment permezz tat-TTIP għandu jwassal għal qafas politiku usa' u msaħħaħ fil-ġejjieni biex jiġu żviluppati approċċi komuni, tissaħħaħ is-sħubija strateġika, u titjieb il-kooperazzjoni globali bejn l-UE u l-Istati Uniti; jenfasizza li kwalunkwe strumenti maħluqa biex isaħħu l-kooperazzjoni regolatorja m'għandhomx jaffettwaw il-proċeduri leġiżlattivi Ewropej jew tal-Istati Uniti u li jeħteġ li l-leġiżlaturi jkunu dejjem involuti b'mod xieraq, fir-rispett tad-drittijiet parlamentari korrispondenti tagħhom, fi kwalunkwe korp li jista' jinħoloq għall-fini ta' kooperazzjoni regolatorja; jissottolinja l-ħtieġa li jkunu involuti wkoll il-partijiet interessati rilevanti kollha;

10. Ifakkar lill-Kummissjoni li l-abolizzjoni mill-Istati Uniti tar-reġim tal-viża għal ħames Stati Membri tal-UE għadha pendenti;

11. Jieħu nota tal-fatt li l-Kummissjoni qiegħda tieħu passi bil-għan li ttejjeb it-trasparenza tan-negozjati; jirrikonoxxi li diġà sar progress; jitlob lill-Kummissjoni tkompli tagħmel sforzi, anke fil-konfront tal-awtoritajiet tal-Istati Uniti, favur aktar trasparenza parlamentari tan-negozjati, inkluż aċċess f'waqtu għal aktar dokumenti ta' negozjar; jenfasizza li komunikazzjoni tajba mas-soċjetà ċivili hija essenzjali biex is-suċċess tal-ftehim jiġi żgurat, u jistieden lill-Kummissjoni u lill-Istati Membri jkattru l-attivitajiet ta' komunikazzjoni tagħhom; jispera li approċċ aktar trasparenti tal-Kummissjoni se japplika wkoll għal negozjati oħra ta' kummerċ.

RIŻULTAT TAL-VOTAZZJONI FINALI FIL-KUMITAT

24.2.2015

OPINJONI TAL-KUMITAT GĦALL-IŻVILUPP

għall-Kumitat għall-Kummerċ Internazzjonali

dwar rakkomandazzjonijiet lill-Kummissjoni Ewropea dwar in-negozjati għas-Sħubija Trans-Atlantika ta’ Kummerċ u ta’ Investiment (TTIP)

(2014/2228(INI))

Rapporteur għal opinjoni: Arne Lietz

SUĠĠERIMENTI

Il-Kumitat għall-Iżvilupp jistieden lill-Kumitat għall-Kummerċ Internazzjonali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jitlob lill-Kummissjoni biex fir-relazzjonijiet kummerċjali tirrispetta l-Artikolu 208 tat-Trattat ta' Lisbona u tinkludi fis-Sħubija Trans-Atlantika ta’ Kummerċ u ta’ Investiment (TTIP) referenza espliċita għall-politika għall-iżvilupp bħala wieħed mill-objettivi leġittimi tal-politika pubblika, kif ukoll għall-prinċipju ta' politika koerenti għall-iżvilupp, li jirrikjedi li l-objettivi tal-kooperazzjoni għall-iżvilupp jitqiesu fil-politiki li probabbli jaffettwaw il-pajjiżi li qed jiżviluppaw;

2.  Jitlob lill-Kummissjoni żżomm f'moħħha li, meta jitqiesu d-daqs u l-kamp ta' applikazzjoni tal-ekonomija Trans-Atlantika, l-implikazzjonijiet tat-TTIP se jmorru sew lil hinn mir-relazzjonijiet bilaterali u bla dubju se jħallu impatt fuq il-pajjiżi li qed jiżviluppaw, billi dan il-ftehim kummerċjali enormi probabbli se jifforma r-regoli kummerċjali globali u jistabbilixxi standards ġodda; jitlob lill-Kummissjoni biex tikkumissjona studju indipendenti dwar l-impatt tat-TTIP fuq il-pajjiżi li qed jiżviluppaw u dwar l-għanijiet ta' żvilupp sostenibbli futuri, ladarba d-dispożizzjonijiet tat-TTIP ikunu aktar ċari, billi t-test tal-mandat ta' negozjar tant huwa ġenerali li l-effetti konsegwenzjali possibbli fuq il-pajjiżi li qed jiżviluppaw għadu diffiċli biex jiġi previst;

3.  Jitlob lill-Kummissjoni biex tqis li l-effett tat-TTIP fuq il-pajjiżi li qed jiżviluppaw se jvarja skont l-istruttura ekonomika u r-relazzjonijiet kummerċjali attwali tagħhom; jitlob ukoll lill-Kummissjoni tqis il-fatt li l-biċċa l-kbira tal-pajjiżi li qed jiżviluppaw jibbenefikaw minn xi grad ta’ preferenzi tariffarji mill-UE u mill-Istati Uniti; jistieden lill-Kummissjoni biex tintensifika d-djalogu mal-pajjiżi li qed jiżviluppaw sabiex tivvaluta l-impatt tat-TTIP u tikkunsidra r-riskju probabbli tal-erożjoni preferenzjali u d-devjazzjoni tal-kummerċ u tal-investiment li se ġġib magħha għal xi pajjiżi li qed jiżviluppaw;

4.  Jitlob lill-Kummissjoni biex fid-djalogu tagħha mal-pajjiżi li qed jiżviluppaw tenfasizza l-potenzjal tat-TTIP biex toħloq opportunitajiet ġodda għall-pajjiżi li qed jiżviluppaw fil-kummerċ globali, li jirriżulta minn żieda fit-tkabbir u fit-talba għal prodotti ta' esportazzjoni kemm fl-UE kif ukoll fl-Istati Uniti u t-tnaqqis tal-kostijiet kummerċjali li joriġina mill-bżonn li jkun hemm adattament għal sett uniku ta' regoli u standards sabiex ikun hemm aċċess għaż-żewġt iswieq; jirrakkomanda lill-Kummissjoni li topera biex tnaqqas il-kost tal-konformità (speċjalment għall-SMEs) u tappoġġja inizjattivi biex tkattar l-inklużjoni tal-pajjiżi li qed jiżviluppaw f'katini ta' valur globali permezz ta' strumenti ta' żvilupp xierqa;

5.  Jitlob lill-Kummissjoni biex tipprovdi lill-pajjiżi li qed jiżviluppaw b'appoġġ politiku u assistenza teknika fit-tfittxija ta' integrazzjoni reġjonali u żoni kumerċjali aktar b'saħħithom, u biex tqarreb lejn approċċ aktar ġust fin-negozjati tagħha tal-Ftehimiet ta' Sħubija Ekonomika (FSE) li għandhom l-għan li jistabbilixxu qafas sigur għall-fluss tal-kummerċ u l-investiment bejn l-UE u l-pajjiżi tal-AKP;

6.  Iħeġġeġ lill-Kummissjoni biex tiżgura li TTIP ma tnaqqasx l-importanza tad-WTO u tikkontribwixxi għal sistema dinjija tal-kummerċ ekwa u sostenibbli filwaqt li ma twarrabx kwistjonijiet importanti għall-pajjiżi li qed jiżviluppaw bħas-sigurtà tal-ikel, is-sussidji agrikoli u l-mitigazzjoni tat-tibdil fil-klima, billi żżid l-isforzi sabiex tavvanza fil-fora multilaterali demokratiċi, primarjament id-WTO, bħala l-għażla preferenzjali tal-UE, u biex tikkonkludi b'suċċess in-negozjati tar-Rawnd ta' Doha, peress li dan huwa l-aħjar mod biex tinkiseb sistema ta' kummerċ inklussiva u li topera għall-benefiċċju ta' kulħadd; jitlob ukoll lill-Kummissjoni biex tiżgura li t-tielet pilastru tat-TTIP jirrispetta r-regoli multilaterali li bihom id-WTO tipprevedi eċċezzjonijiet għall-pajjiżi li qed jiżviluppaw, speċjalment fir-rigward tal-possibbiltà ta' restrizzjonijiet fuq l-esportazzjoni fil-qasam tal-enerġija u l-aċċess għall-materja prima;

7.  Jitlob lill-Kummissjoni biex fi ħdan in-negozjati tippromwovi l-ogħla standards globali dwar id-drittijiet tal-bniedem, l-istandards tal-ILO, l-impjiegi deċenti, il-protezzjoni ambjentali, l-aċċess universali għal servizzi pubbliċi ta' kwalità, il-protezzjoni soċjali u l-kopertura tas-saħħa universali, l-aċċess universali għall-mediċini u s-sigurtà tal-ikel u tal-prodotti; iħeġġeġ lill-UE biex tpoġġi lilha nnifisha bħala difensur tal-interessi tal-pajjiżi li qed jiżviluppaw;

8.  Jistieden lill-Kummissjoni u lill-Istati Membri biex iżidu t-trasparenza u n-natura demokratika tan-negozjati permezz tat-tisħiħ tad-djalogu mas-soċjetà ċivili u partijiet interessati oħra.

RIŻULTAT TAL-VOTAZZJONI FINALI FIL-KUMITAT

27.3.2015

OPINJONI TAL-KUMITAT GĦALL-AFFARIJIET EKONOMIĊI U MONETARJI

għall-Kumitat għall-Kummerċ Internazzjonali

dwar ir-rakkomandazzjonijiet lill-Kummissjoni Ewropea dwar in-negozjatigħas-Sħubija Trans-Atlantika ta' Kummerċ u ta' Investiment (TTIP)

(2014/2228(INI))

Rapporteur: Jeppe Kofod

SUĠĠERIMENTI

Il-Kumitat għall-Affarijiet Ekonomiċi u Monetarji jistieden lill-Kumitat għall-Kummerċ Internazzjonali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jindirizza r-rakkomandazzjonijiet li ġejjin lill-Kummissjoni:

a.  tiżgura li jintlaħaq ftehim komprensiv u ambizzjuż dwar it-TTIP li jsaħħaħ il-kompetizzjoni ġusta fuq iż-żewġ naħat tal-Atlantiku, filwaqt li jqis il-valuri tal-ekonomija soċjali tas-suq Ewropea, jiżgura benefiċċji għall-konsumaturi, l-industrija u l-investituri, isaħħaħ it-tkabbir u l-ħolqien ta' impjiegi ta' kwalità, jiżgura li l-kooperazzjoni regolatorja b'ebda mod ma tfixkel il-kontroll demokratiku fuq iż-żewġ naħat tal-Atlantiku u jfittex ukoll tranżizzjoni għal soċjetà aktar sostenibbli;

b.  tieħu azzjoni immedjata biex tiżgura li l-kummerċ u l-investiment min-naħa ta' atturi finanzjarji fuq iż-żewġ naħat tal-Atlantiku, kif ukoll l-aċċess ugwali għas-suq għall-fornituri tas-servizzi kollha fl-Istati Uniti u fl-Ewropa, ikunu regolati abbażi tal-ogħla standards filwaqt li ssir ħidma għal livelli għolja ta' protezzjoni, speċjalment f'oqsma bħas-saħħa u s-sikurezza, il-ħarsien tal-konsumatur, ix-xogħol, id-drittijiet soċjali, ir-regolamentazzjoni tas-servizzi finanzjarji, il-leġiżlazzjoni ambjentali, is-sikurezza tal-ikel u l-protezzjoni tad-data; tiżgura li l-ebda dispożizzjoni ma tipprekludi b'xi mod it-tisħiħ ta' tali standards fil-futur, la sostantivament u lanqas permezz ta' effett dissważiv regolatorju; u tiżgura li l-ftehim tat-TTIP jinkludi kapitolu speċifiku dwar l-SMEs;

c.  tadotta l-pożizzjoni li ftehim tajjeb dwar l-istandards regolatorji jista' jaġixxi bħala preċedent globali għall-ftehimiet futuri dwar il-kummerċ u l-investiment, b'inqas spejjeż għall-kumpaniji, b'mod partikolari l-SMEs, mad-dinja kollha;

d.  tirrikonoxxi li l-benefiċjarji ewlenin tat-TTIP jistgħu jkunu l-SMEs, peress li l-korporazzjonijiet il-kbar għandhom ekonomiji ta' skala li jippermettulhom jiksbu aċċess għas-swieq fuq iż-żewġ naħat tal-Atlantiku faċilment, u li l-SMEs m'għandhomx ir-riżorsi finanzjarji u legali jew riżorsi oħra biex ilaħħqu ma' differenzi regolatorji u ostakli oħra għall-kummerċ;

e.  tiżgura aktar trasparenza u skambju ta' informazzjoni fil-qafas tar-regoli dwar l-għajnuna mill-Istat u l-allokazzjoni ta' għajnuna mill-Istat, filwaqt li tiżgura l-forniment ta' servizzi ta' interess ekonomiku ġenerali, kif ukoll kooperazzjoni aktar mill-qrib bejn l-awtoritajiet tal-kompetizzjoni fl-oqsma tal-fużjonijiet, l-antitrust, l-intrapriżi tal-Istat u s-sussidji; tieħu azzjoni immedjata biex tiżgura l-inklużjoni ta' kapitolu dwar il-kompetizzjoni f'dan il-ftehim;

f.   tieħu azzjoni immedjata biex tiżgura li n-negozjati dwar l-aċċess għas-suq fil-qasam tas-servizzi finanzjarji jkunu kkombinati ma' rikonoxximent reċiproku u konverġenza 'l fuq fir-regolamentazzjoni finanzjarja, li jimplika l-promozzjoni ta' standards ogħla u l-interess ġenerali bħala objettiv prinċipali; tappoġġa standards internazzjonali dejjem ogħla fl-isforzi ta' kooperazzjoni li għaddejjin f'fora internazzjonali oħrajn, inklużi r-regoli ta' Basel III, mingħajr ħsara għall-abilità tal-UE u tal-awtoritajiet tal-Istati Membri li jirregolaw u jissorveljaw il-prodotti u l-prattiki finanzjarji fil-qadi tad-dmirijiet regolatorji u superviżorji tagħhom;

g.  tagħmel kull sforz possibbli biex tiġi sfruttata bis-sħiħ l-opportunità mogħtija min-negozjati dwar it-TTIP biex b'mod pożittiv u kostruttiv isiru passi 'l quddiem flimkien fir-rigward tas-servizzi finanzjarji, filwaqt li jiġu kkunsidrati r-riżultati li diġà ntlaħqu miż-żewġ naħat dwar il-kwistjoni; is-suġġetti tad-diskussjoni jistgħu jinkludu konsultazzjonijiet bilaterali qabel l-introduzzjoni ta' liġijiet ġodda, it-trasparenza fil-konfront tal-partijiet ikkonċernati fil-mument tad-diskussjonijiet bilaterali dwar kwistjonijiet finanzjarji, u aktar responsabbiltà għall-korpi eletti;

h.  toqgħod lura minn impenji addizzjonali rigward l-aċċess għas-suq għas-servizzi finanzjarji billi l-interkonnettività, il-kumplessità u l-kobor eċċessiv tal-entitajiet jiġġeneraw u jifirxu r-riskji sistemiċi u jirrappreżentaw theddida għall-istabbiltà finanzjarja;

i.   tressaq direttiva b'miżuri kontra l-BEPS (l-erożjoni tal-bażi u t-trasferiment tal-profitt), sabiex tintemm il-kompetizzjoni dannuża min-naħa ta' impriżi, b'mod partikolari multinazzjonali, li jorganizzaw il-qagħda tat-taxxa globali tagħhom, ħafna drabi minn naħa għal oħra tal-Atlantiku, b'mod li jippermetti t-trasferiment tal-profitti lejn ġurisdizzjonijiet fejn iħallsu inqas taxxa, filwaqt li titqies il-ħidma tal-OECD; tiżgura li l-fondi offshore li l-maniġers tagħhom joperaw fuq iż-żewġ naħat tal-Atlantiku jkunu obbligati jistabbilixxu l-kwartieri ġenerali tagħhom fuq l-art; tieħu azzjoni immedjata sabiex tiżgura l-iskambju awtomatiku ta' informazzjoni u rapportar pajjiż b'pajjiż dwar kwistjonijiet ta' taxxa, bl-esklużjoni tal-SMEs; tistabbilixxi definizzjoni u lista ta' rifuġji fiskali fil-livell tal-UE, filwaqt li titqies il-ħidma tal-OECD;

j.   tieħu azzjoni immedjata biex fi ħdan it-TTIP jiddaħħlu miżuri legali kontra l-ippjanar aggressiv tat-taxxa permezz tal-moviment sistematiku ta' kapital minn naħa għal oħra tal-Atlantiku, u tiżgura li, minflok, dan tal-aħħar ikun ibbażat fuq l-attività ekonomika u ma jfittixx l-evitar tal-ħlas tat-taxxa fil-pajjiż tal-produzzjoni; tiżgura trasparenza u granularità akbar fir-rigward tal-istatistika dwar il-bilanċ tal-pagamenti minn naħa għal oħra tal-Atlantiku;

k.  tieħu azzjoni immedjata biex tiżgura kompetizzjoni ġusta u aċċess ugwali għas-suq għall-kumpaniji Ewropej, inklużi l-SMEs, għall-kuntratti pubbliċi u l-akkwist pubbliku fl-Istati Uniti u tiggarantixxi li dawn tal-aħħar jinkludu l-obbligu tar-rispett tal-kriterji ambjentali, soċjali u etiċi; tirrikonoxxi li l-iżbilanċ attwali fl-aċċess għas-suq tal-kuntratti pubbliċi u l-akkwist pubbliku fl-Istati Uniti, meta mqabbel ma' dak fl-UE, jikkostitwixxi kompetizzjoni inġusta; tirrikonoxxi li 85 % tal-offerti tal-akkwist pubbliku fl-UE diġà huma miftuħa għall-fornituri Amerikani, filwaqt li 32 % biss tal-offerti tal-Istati Uniti huma miftuħa għall-fornituri Ewropej; tiżgura li r-regoli tal-UE adottati dan l-aħħar fir-rigward tal-akkwist pubbliku jkomplu jiġu rispettati;

l.   tiżgura li r-regoli tal-UE li ġew adottati dan l-aħħar fil-qasam tal-akkwist pubbliku jiġu protetti u appoġġati fil-qafas tan-negozjati, b'mod partikolari fir-rigward tal-aċċess tal-SMEs għall-kuntratti ta' akkwist pubbliku, il-kriterji ta' eliġibbiltà bbażati fuq l-aħjar proporzjon bejn il-prezz u l-kwalità minflok l-aktar prezz baxx, swieq riżervati allokati lill-impriżi tal-ekonomija soċjali, il-possibbiltà li l-awtoritajiet kuntrattwali jrawmu kooperazzjoni interkomunitarja, u l-preservazzjoni tal-limiti massimi għall-esklużjoni mill-proċess ta' offerti mill-UE u r-regoli internazzjonali; tiggarantixxi li ma ssirx diskriminazzjoni kontra l-impriżi tal-UE meta japplikaw għal kuntratti ta' akkwist pubbliku fl-Istati Uniti u li jibbenefikaw minn aċċess trasparenti ekwivalenti għal dak applikat għall-impriżi tal-Istati Uniti fl-Ewropa skont ir-regoli dwar l-akkwist pubbliku fl-UE;

m. tieħu miżuri proattivi immedjati kontra l-protezzjoniżmu, u tindirizza l-leġiżlazzjoni li xxekkel l-aċċess tas-suq Ewropew għall-Istati Uniti;

n.  tiżgura li kwalunkwe u kull mekkaniżmu għas-soluzzjoni ta' tilwim stabbilit fi ħdan il-qafas tat-TTIP jirrispetta t-trasparenza sħiħa, ikun soġġett għall-prinċipji u l-iskrutinju ta' natura demokratika, u ma jfixkilx id-dritt tal-gvernijiet li jirregolaw;

o.  tieħu azzjoni immedjata biex tiżgura li jintgħażel "approċċ ta' lista pożittiva", biex is-servizzi pubbliċi kollha koperti mit-TTIP jkunu elenkati espliċitament b'mod pożittiv fil-ftehim, u li fil-ftehim ma jkunu inklużi ebda klawżoli ta' sospensjoni jew ta' ratchet;

p.  tirrikonoxxi u tenfasizza l-importanza li l-intrapriżi tal-istat u forom oħra ta' sjieda pubblika għad għandhom fir-rigward ta' servizzi pubbliċi importanti u servizzi ta' interess ġenerali u titlob l-esklużjoni tagħhom mill-ftehim; tiżgura li l-ġestjoni tas-servizzi pubbliċi ma tkunx affettwata mit-TTIP, f'konformità mal-mandat mogħti lill-Kummissjoni mill-Istati Membri;

q.  tirrikonoxxi li t-TTIP se jkun aktar ta' benefiċċju għall-SMEs milli għan-negozji l-kbar; tieħu nota tal-fatt li t-tneħħija ta' tariffi, is-simplifikazzjoni tal-proċeduri doganali u l-konverġenza tal-istandards tal-prodotti se jiffaċilitaw b'mod partikolari l-parteċipazzjoni tal-SMEs fil-kummerċ transatlantiku u li t-TTIP se jkun l-ewwel ftehim ta' kummerċ ħieles li se jkollu kapitolu apposta dwar l-SMEs; taħdem lejn il-konsolidazzjoni tal-kooperazzjoni eżistenti bejn l-Istati Uniti u l-UE dwar l-SMEs; taħdem għall-ħolqien ta' siti elettroniċi fejn l-SMEs fl-Ewropa u fl-Istati Uniti jistgħu jiksbu tagħrif dwar it-tariffi, il-proċeduri doganali u r-regolamenti applikabbli kollha tal-prodotti f'livell federali u statali fl-Istati Uniti, u fil-livell tal-Unjoni u tal-Istati Membri fl-UE;

r.   tiżgura li l-leġiżlazzjoni Ewropea dwar il-kompetizzjoni tiġi rispettata kif xieraq fl-oqsma kollha, b'attenzjoni partikolari għas-swieq diġitali;

s.   tiżgura li d-drittijiet u l-protezzjoni tal-ħaddiema jkunu rispettati bis-sħiħ fil-ftehim u ma jiddgħajfux b'aċċess akbar għas-suq u b'aktar kompetizzjoni;

t.   tkun konxja tal-fatt li dan il-ftehim għandu sinifikat politiku, minbarra ekonomiku, peress li huwa sottoskritt bejn iż-żewġ naħat tal-Atlantiku, żona kkaratterizzata mill-kondiviżjoni tas-sigurtà kif ukoll tal-valuri tal-libertà, l-ugwaljanza, id-demokrazija, id-drittijiet tal-bniedem u l-ekonomija soċjali tas-suq;

u.  tkun konxja tal-inċertezzi li jeżistu fir-rigward tan-negozjati dwar it-TTIP, u, sabiex teliminahom, tagħmel in-negozjati trasparenti kemm jista' jkun u tniedi kampanja ta' informazzjoni fil-livell Ewropew;

v.  tieħu azzjoni addizzjonali biex tiżdied it-trasparenza tan-negozjati, b'mod partikolari fir-rigward tal-aċċess dirett għall-informazzjoni fil-livelli reġjonali u lokali;

w. tiżgura trasparenza fin-negozjati tul il-proċess kollu skont l-obbligu tal-Kummissjoni, skont l-Artikolu 218(10) tat-TFUE, li n-natura statutorja tiegħu ġiet ikkonfermata mill-Qorti tal-Ġustizzja tal-Unjoni Ewropea f'sentenza reċenti, li żżomm lill-Parlament infurmat b'mod sħiħ fuq bażi immedjata fl-istadji kollha tan-negozjati; taħdem lejn ftehim mal-Amministrazzjoni tal-Istati Uniti rigward l-aċċess tal-Membri Parlamentari kollha għat-testi konsolidati tan-negozjati; tiżgura l-aċċess tal-pubbliku għad-dokumenti rilevanti tan-negozjati mill-partijiet kollha, bl-eċċezzjoni ta' dawk li għandhom jiġu kklassifikati b'ġustifikazzjoni ċara abbażi ta' każ b'każ, f'konformità mar-Regolament (KE) Nru 1049/2001 tal-Parlament Ewropew u tal-Kunsill tat-30 ta' Mejju 2001 dwar l-aċċess pubbliku għad-dokumenti tal-Parlament Ewropew, tal-Kunsill u tal-Kummissjoni;

x.  tipproponi inizjattivi lill-SMEs dwar kif jiksbu aċċess għas-suq u jagħtu bidu għal investimenti minn naħa għal oħra tal-Atlantiku;

y.  tiżgura li l-Parlament Ewropew ikollu rwol xieraq fid-deċiżjonijiet dwar il-konverġenza regolatorja li għandhom jittieħdu wara r-ratifika tal-ftehim.

RIŻULTAT TAL-VOTAZZJONI FINALI FIL-KUMITAT

1.4.2015

OPINJONI TAL-KUMITAT GĦALL-IMPJIEGI U L-AFFARIJIET SOĊJALI

għall-Kumitat għall-Kummerċ Internazzjonali

dwar ir-rakkomandazzjonijiet lill-Kummissjoni Ewropea dwar in-negozjatigħas-Sħubija Trans-Atlantika ta’ Kummerċ u ta’ Investiment (TTIP)

(2014/2228(INI))

Rapporteur għal opinjoni: Marian Harkin

SUĠĠERIMENTI

Il-Kumitat għall-Impjiegi u l-Affarijiet Soċjali jistieden lill-Kumitat għall-Kummerċ Internazzjonali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

–   wara li kkunsidra r-rapport dwar il-valutazzjoni tal-impatt tal-Kummissjoni dwar il-futur tar-relazzjonijiet kummerċjali bejn l-UE u l-Istati Uniti, ippubblikat fit-12 ta’ Marzu 2013,

1.  Jindirizza, fil-kuntest tan-negozjati li għaddejjin bħalissa dwar it-TTIP, ir-rakkomandazzjonijiet li ġejjin lill-Kummissjoni:

     (i)         li jiġi żgurat li t-TTIP tissalvagwardja l-impjiegi eżistenti kif ukoll tagħmel kontribuzzjoni tanġibbli u pożittiva għas-salvagwardjar u l-ġenerazzjoni ta’ tkabbir b’saħħtu u sostenibbli ħalli jiġi massimizzat il-potenzjal tal-ħolqien ta’ impjiegi b’ħiliet ta’ livell ogħla biex jintlaħqu l-bżonnijiet ġodda tas-suq tax-xogħol flimkien ma’ impjiegi aħjar u sostenibbli fl-UE ħalli jgħinu tintlaħaq il-mira tal-2020 ta’ 75 % tal-impjiegi, bil-ħsieb li l-kummerċ mhuwiex għan fih innifsu imma mezz ta’ kif jitjieb il-benessri; li jiġu rispettati u protetti bis-sħiħ l-istandards globali tax-xogħol; li jiġi garantit li standards, b’mod partikolari l-istandards soċjali, ambjentali, u tas-saħħa u s-sikurezza fuq il-post tax-xogħol, huma protetti u li tali standards jistgħu jitjiebu;

     (ii)        li l-Parlament jiġi pprovdut bi stimi aġġornati tal-impatt tat-TTIP dwar l-impjiegi u t-tkabbir fl-UE, b’referenza partikolari għall-konsegwenzi għall-Istati Membri mill-Ewropa Ċentrali u tax-Xlokk;

     (iii)       li jiġi żgurat li jittieħdu passi għall-immodenizzar tas-sistemi ta’ taħriġ ħalli jiġi ffaċilitat l-iżvilupp ta’ ħiliet ġodda u ħaddiema aktar kwalifikati, fejn għaldaqstant jitjieb l-aċċess għas-suq tax-xogħol;

     (iv)       li jiġi żgurat li l-impatti soċjali u ambjentali ta’ ftehim potenzjali jiġu vvalutati bir-reqqa permezz ta’ dibattitu miftuħ;

     (v)        li jitkejjel ir-riskju li d-definizzjoni tal-istandards ta’ protezzjoni soċjali u ambjentali komuni mal-Istati Uniti se ddgħajjef il-preferenzi kollettivi Ewropej u taggrava d-diverġenzi ekonomiċi u soċjali bejn l-Istati Membri tal-UE;

     (vi)       li jiġi żgurat, matul il-kapitoli kollha tal-ftehim TTIP, li taħt l-ebda ċirkustanza ma jwassal għad-dgħjufija, iċ-ċirkomvenzjoni jew l-invalidazzjoni tal-istandards tal-Istati Membri u l-UE fl-oqsma li ġejjin: id-drittijiet tal-ħaddiema, il-kundizzjonijiet tax-xogħol, is-sigurtà soċjali, l-inklużjoni soċjali u l-protezzjoni soċjali, is-saħħa u s-sikurezza fuq il-post tax-xogħol, it-taħriġ professjonali, il-kwalifiki professjonali, il-moviment liberu tal-ħaddiema u l-pensjonanti, id-djalogu soċjali, in-nondiskriminazzjoni fuq il-post tax-xogħol u fis-suq tax-xogħol; barra minn hekk, li jiġi garantit li t-TTIP tinkludi dispożizzjonijiet komprensivi u vinkolanti dwar il-liġijiet u l-politiki tax-xogħol fil-livelli kollha ta’ gvern li huma konformi mal-Konvenzjonijiet Ewlenin tal-Organizzazzjoni Internazzjonali tax-Xogħol (ILO) u l-Aġenda tax-Xogħol Deċenti; li jiġi żgurat li l-kummerċ jew l-investiment ma jiġux imħeġġa billi jiddgħajfu l-liġijiet dwar ix-xogħol; meta jinqala’ tilwim, id-dispożizzjonijiet tax-xogħol iridu jkunu soġġetti għal mekkaniżmu ta’ soluzzjoni tat-tilwim, inkluża l-possibbiltà ta’ sanzjonijiet; f’dan ir-rigward, il-korpi superviżorji tal-ILO jistgħu jieħdu dan ir-rwol;

     (vii)      jekk elementi finali tal-ftehim tat-TTIP jipperikolaw jew ixekklu l-istandards f’dawn l-oqsma, il-kumitat responsabbli fil-Parlament, jiġifieri l-Kumitat għall-Impjiegi u l-Affarijiet Soċjali, jiġi infurmat dwar dan b’mod immedjat ħalli tkun tista’ ssir konsultazzjoni u jittieħdu deċiżjonijiet;

     (viii)      li jiġi miċħud kwalunkwe ftehim li jista’ joħloq theddida għall-istandards tax-xogħol fl-Ewropa u jwassal għad-dumping soċjali;

     (ix)       li jiġi żgurat li d-dimensjonijiet tad-dispożizzjonijiet tax-xogħol u soċjali jkunu rikonoxxuti, difiżi u integrati kompletament fil-partijiet operazzjonali kollha tal-ftehim biex jiġi żgurat approċċ koerenti u komprensiv għall-iżvilupp sostenibbli fil-ftehimiet kummerċjali;

     (x)        li jiġi żgurat li fil-marġni tan-negozjati dwar it-TTIP, jintlaħaq l-arranġament tal-pakkett tal-mobilità li huwa ta’ benefiċċju b’mod reċiproku, b’kunsiderazzjoni li l-faċilitazzjoni tal-viża għall-fornituri Ewropej tas-servizzi u l-prodotti, kif ukoll li l-professjonisti jitħallew jaħdmu fl-Istati Uniti tal-Amerika billi l-kwalifiki tagħhom jiġu rikonoxxuti, hi waħda mill-elementi ewlenin meta jittieħed vantaġġ sħiħ mill-ftehim TTIP;

     (xi)       li jiġi żgurat li s-soċjetà ċivili tkun tista’ tagħti kontribut sinifikanti għall-implimentazzjoni tad-dispożizzjonijiet tat-TTIP rilevanti; f’dan il-kuntest, l-implimentazzjoni u l-konformità mad-dispożizzjonijiet tax-xogħol għandhom ikunu soġġetti ma’ proċess ta’ monitoraġġ li jinvolvi s-sħab soċjali u s-soċjetà ċivili fi proċess ta’ djalogu soċjali li jinvolvi l-kumitati konsultattivi, filwaqt li tittieħed kunsiderazzjoni tad-dimensjoni usa’ tal-Artikolu 17(1) tat-TUE; li jiġi żgurat li s-soċjetà ċivili u l-pubbliku kkonċernat huma infurmati u għandhom aċċess għat-testi tan-negozjati kollha rilevanti u li l-Parlament u l-Kunsill għandhom aċċess għal test tan-negozjati kkonsolidat immedjatament wara li dawn it-testi jkunu ġew diskussi fiċ-ċiklu tan-negozjati;

     (xii)      li jittieħdu passi immedjati biex jiġi garantit id-dritt tal-Istati Membri li jilleġiżlaw, jiffinanzjaw, jorganizzaw, jistabbilixxu standards ta’ kwalità u sikurezza, jimmaniġġjaw u jirregolaw is-servizzi pubbliċi kollha, inklużi l-edukazzjoni, is-sigurtà soċjali, is-servizzi tas-saħħa, il-provvista tal-ilma, ir-rimi tad-dranaġġ, ir-rimi tal-iskart, is-sigurtà soċjali, il-ferroviji u t-trasport pubbliku, l-enerġija, is-servizzi kulturali u awdjoviżivi, eċċ. u li tiġi żgurata l-esklużjoni tas-servizzi pubbliċi (inklużi l-ilma, is-saħħa, is-sistemi tas-sigurtà soċjali u l-edukazzjoni) mill-kamp ta’ applikazzjoni tat-Trattat;

     (xiii)      li tiġi żgurata esklużjoni espliċita tas-servizzi pubbliċi kif imsemmi fl-Artikolu 14 tat-TFUE mill-kamp ta’ applikazzjoni tat-TTIP, sabiex jiġi żgurat li l-awtoritajiet nazzjonali u lokali jkollhom il-libertà li jintroduċu, jadottaw, iżommu jew iħassru kwalunkwe miżura rigward il-kummissjonar, l-organizzazzjoni, il-finanzjament u l-għoti ta’ servizzi pubbliċi, kif previst fl-Artikolu 168 tat-TFUE (is-saħħa pubblika) u fil-Protokoll 26 (Servizzi ta’ Interess Ġenerali) għalih; din l-esklużjoni għandha tapplika jekk is-servizzi inkwistjoni huma organizzati bħala monopolju, joperaw taħt drittijiet esklużivi jew mod ieħor, u jekk ikunu ffinanzjati u/jew ipprovduti b’mod pubbliku jew privat; tali servizzi jinkludu s-servizzi tal-kura tas-saħħa u soċjali, is-sistemi tas-sigurtà soċjali, l-edukazzjoni ffinanzjata b’mod pubbliku, it-trasport ferrovjarju u pubbliku, u s-servizzi tal-ilma, tal-gass, u tal-elettriku;

     (xiv)     li jiġi żgurat li l-klawżoli ta’ lieva u ta’ sospensjoni ma japplikaw għall-ebda servizz pubbliku u soċjali; il-kamp ta’ applikazzjoni sħiħ tan-nazzjonalizzazzjoni u l-muniċipalizzazzjoni mill-ġdid tas-servizzi jrid jiġi ssalvagwardjat.

     (xv)      li jiġi żgurat li l-isfidi speċifiċi li jiffaċċjaw l-SMEs u mikrokumpaniji, bħalma huma l-effetti tal-ostakoli kummerċjali mhux tariffarji, il-burokrazija u d-devjazzjoni tat-traffiku jiġu kkunsidrati bis-sħiħ; li jiġi żgurat li l-SMEs jibbenefikaw b’mod sħiħ minn suq miftuħ billi joħolqu qafas ekonomiku li jinkoraġġixxi l-esportazzjonijiet u ambjent ta’ negozju favorevoli, kompetittiv u sostenibbli; li jiġi żgurat li l-isfidi speċifiċi li jiffaċċjaw 87 % tal-SMEs kollha fl-UE li mhumiex involuti fl-esportazzjoni iżda jiddependu fuq id-domanda domestika, jiġu kkunsidrati bis-sħiħ;

     (xvi)     li jiġu ssimplifikati l-proċeduri u jiġu kkunsidrati mekkaniżmi ġodda biex jgħinu lill-SMEs jibbenefikaw mit-TTIP;

     (xvii)     li jinħolqu inċentivi u jiġi promoss it-teħid tar-responsabbiltà soċjali korporattiva (CSR), li trid tikkumplimenta u fl-ebda ċirkostanza ma tissostitwixxi l-liġijiet tax-xogħol u dawk ambjentali;

     (xviii)    li jiġi garantit li ftehim dwar kwalunkwe mekkaniżmu għas-soluzzjoni tat-tilwim li jirrigwardja l-protezzjoni tal-investiment jrid jieħu kont tar-riżultati tal-konsultazzjoni pubblika dwar soluzzjoni tat-tilwim bejn l-investituri u l-Istat (ISDS), jkun kompletament trasparenti u responsabbli demokratikament, li b’mod espliċitu jiddikjara d-dritt tal-Istati Membri li jirregolaw u taħt l-ebda ċirkostanza jirrestrinġu jew ixekklu l-leġiżlaturi milli jgħaddu liġijiet kemm fil-qasam tal-impjiegi u fil-qasam tal-politika soċjali għall-pajjiżi tagħhom; sistema għas-soluzzjoni tat-tilwim bejn stat u ieħor bejn l-UE u l-Istati Uniti - fejn it-tnejn li huma għandhom sistemi legali funzjonali b’mod sħiħ u livell suffiċjenti ta’ protezzjoni tal-investiment biex jiggarantixxi s-sigurtà legali - hi għodda oħra xierqa għall-indirizzar tat-tilwim dwar investiment; l-inklużjoni ta’ kwalunkwe forma ta’ qrati ta’ arbitraġġ privat fit-TTIP għandhom jiġu esklużi;

     (xix)     li jittieħdu passi biex jinżamm approċċ ta’ “elenkar pożittiv” fil-ftehim fir-rigward tal-kapitolu dwar il-kummerċ fis-servizzi u t-twaqqif fejn is-servizzi li se jinfetħu għall-kumpaniji barranin huma speċifikati b’mod espliċitu;

     (xx)      minħabba fil-konferma tal-Kummissjoni fir-rapport tal-Valutazzjoni tal-Impatt tagħha li jista’ jkun hemm spejjeż ta’ aġġustament imtawwla u sostanzjali fis-suq tax-xogħol tal-UE, li jiġi żgurat li hemm projezzjonijiet statistiċi reali dwar it-telf/ħolqien ta’ impjiegi fis-setturi affettwati u f’kull Stat Membru u li dawn huma kostantament aġġornati u ppubblikati ħalli jkun jista’ jsir intervent f’waqtu mill-Kummissjoni biex tappoġġja s-setturi affettwati, ir-reġjuni jew l-Istati Membri; li jittieħed kont tal-impatti esterni u jiġu antiċipati x-xenarji ta’ kriżi fil-projezzjonijiet tagħha; dan l-appoġġ jista’ jinkiseb permezz tal-fondi tal-UE, inkluż Fond Ewropew ta’ Aġġustament għall-Globalizzazzjoni adattat b’baġit adegwat;

     (xi)       li jiġi żgurat li l-kundizzjonijiet ta’ skambju huma soġġetti għar-reċiproċità stretta sabiex tissaħħaħ in-nisġa industrijali tal-UE, jiġu protetti l-SMEs, jinħolqu impjiegi u tiġi evitata l-kompetizzjoni inġusta kollha, b’mod partikolari fir-rigward tal-istandards soċjali;

     (xxii)     li jittieħdu passi biex jiġi żgurat li l-kooperazzjoni regolatorja ma tirrestrinġix id-dritt tal-gvernijiet u tal-Parlament Ewropew li jilleġiżlaw fl-interess tal-pubbliku; iridu jittieħdu passi biex jiġi żgurat li l-kooperazzjoni regolatorja ma twassalx biex jiddgħajfu l-istandards tax-xogħol, inklużi l-istandards dwar is-saħħa u s-sikurezza; irid jiġi żgurat li l-istandards tax-xogħol u dawk soċjali ma jiġux trattati bħala ostakli nontariffarji jew ostakli tekniċi għall-kummerċ; il-partijiet interessati, inklużi s-sħab soċjali, għandhom jiġu inklużi fil-proċess tal-kooperazzjoni regolatorja f’rappreżentazzjoni bbilanċjata;

     (xxiii)    li jiġi żgurat li r-regoli ġodda tal-UE adottati permezz tar-reviżjoni tad-Direttivi dwar l-akkwist pubbliku jibqgħu ppreservati u jiġu promossi fil-qafas tan-negozjati għaddejja bħalissa, b’mod partikolari f’termini tal-aċċess għas-suq pubbliku għall-SMEs, il-kriterji tal-għotja bbażati fuq l-aqwa valur pjuttost milli fuq il-prezz l-aktar baxx, is-swieq għall-atturi fl-ekonomija soċjali, il-possibbiltà li jiġu kkuntrattati awtoritajiet biex jikkooperaw u jiffurmaw interkomunalitajiet, u l-limiti li taħthom l-akkwist ma jkunx soġġett għal regoli tal-UE jew internazzjonali;

     (xxiv)    li jiġi żgurat, biex jiġi ssalvagwardjat il-mudell soċjali Ewropew minn kompetizzjoni mill-kapitaliżmu Anglo-Sassonu Amerikan, u li s-servizzi pubblici ffinanzjati b’mod kollettivi u s-sistemi ta’ sigurtà soċjali ma jiġux issagrifikati; it-TTIP ma tistax iżżid il-pressjoni fuq l-Istati Membri biex inaqqsu l-infiq pubbliku bħala mod faċli biex isiru ekonomikament kompetittivi u jipprovdu lill-investituri bi klima ta’ negozju attraenti;

     (xxv)    li jiġi żgurat li l-gvernijiet għandhom l-opportunità li jadottaw politiki dwar l-akkwist responsabbli mil-lat soċjali u ambjentali; id-dispożizzjonijiet dwar l-akkwist ma għandhomx iżommu lill-gvernijiet milli jindirizzaw il-bżonnijiet tas-soċjetà u dawk ambjentali u l-ftehim ma għandux jillimita l-abbiltà li jsiru talbiet soċjali, kif iddikjarat fid-Direttivi l-ġodda tal-UE dwar l-akkwist pubbliku; barra minn dan, il-politiki dwar l-akkwist pubbliku għandhom ikunu konformi mal-Konvenzjoni 94 tal-ILO dwar il-klawżoli tax-xogħol fil-kuntratti pubbliċi;

     (xxvi)    li jittieħdu passi immedjati li jiżguraw li l-kwistjoni tal-ippjanar aggressiv tat-taxxa hi regolata, bħaċ-ċaqliq tal-uffiċċji prinċipali tal-kumpaniji min-naħa l-oħra tal-Atlantiku biex jittieħed benefiċċju mill-kundizzjonijiet li jaffettwaw il-kompetizzjoni u li għandhom impatt ħażin fuq ix-xogħol.

RIŻULTAT TAL-VOTAZZJONI FINALI FIL-KUMITAT

16.4.2015

OPINJONI TAL-KUMITAT GĦALL-AMBJENT, IS-SAĦĦA PUBBLIKA U S-SIKUREZZA TAL-IKEL

għall-Kumitat għall-Kummerċ Internazzjonali

dwar rakkomandazzjonijiet lill-Kummissjoni Ewropea dwar in-negozjati għas-Sħubija Trans-Atlantika ta’ Kummerċ u ta’ Investiment (TTIP)

(2014/2228(INI))

Rapporteur għal opinjoni: Bart Staes

SUĠĠERIMENTI

Il-Kumitat għall-Ambjent, is-Saħħa Pubblika u s-Sikurezza tal-Ikel jistieden lill-Kumitat għall-Kummerċ Internazzjonali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

–   wara li kkunsidra d-Dikjarazzjoni Konġunta tad-13 ta’ Frar 2013 mill-President tal-Istati Uniti Barack Obama, il-President tal-Kummissjoni Ewropea José Manuel Barroso u l-President tal-Kunsill Ewropew Herman Van Rompuy[27],

–   wara li kkunsidra r-riżoluzzjoni tiegħu dwar in-negozjati dwar il-ftehim UE-Stati Uniti dwar il-kummerċ u l-investiment tat-23 ta’ Mejju 2013[28],

–   wara li kkunsidra d-direttivi għan-negozjar dwar is-Sħubija Transatlantika għall-Kummerċ u l-Investiment bejn l-Unjoni Ewropea u l-Istati Uniti tal-Amerika tal-14 ta’ Ġunju 2013[29],

–   wara li kkunsidra r-Rapporti 2013 u 2014 dwar Miżuri Sanitarji u Fitosanitarji mir-Rappreżentant tal-Kummerċ tal-Istati Uniti[30],

–   wara li kkunsidra r-Rapporti 2013 u 2014 dwar l-Ostakli Tekniċi għall-Kummerċ mir-Rappreżentant tal-Kummerċ tal-Istati Uniti[31],

–   wara li kkunsidra l-istudji mwettqa mid-Direttorat Ġenerali għall-politiki interni tiegħu intitolati "Legal implications of the EU-US trade and investment partnership (TTIP) for the Acquis Communautaire and the ENVI relevant sectors that could be addressed during negotiations" ta' Ottubru 2013[32] u "ENVI relevant legislative Areas of the EU-US Trade and Investment Partnership Negotiations (TTIP)" ta' Novembru 2014[33],

–   wara li kkunsidra n-nota ta' informazzjoni dwar riżoluzzjoni ta' tilwim bejn l-investituri u l-istati (ISDS) fl-Istati Uniti u l-Unjoni Ewropea ta' Ġunju 2014 mill-Konferenza tan-NU dwar il-Kummerċ u l-Iżvilupp (UNCTAD)[34],

–   wara li kkunsidra l-Artikoli 168 u 191 tat-Trattat dwar il-Funzjonament tal-Unjoni Ewropea, u b'mod partikolari l-prinċipju ta' prekawzjoni fl-Artikolu 191(2),

–   wara li kkunsidra l-approċċ integrat tal-UE fir-rigward tas-sikurezza fl-ikel (approċċ li japplika għall-katina kollha) stabbilit fl-2004[35],

–   wara li kkunsidra r-riżultati tal-Ewrobarometru ta' Novembru 2014 dwar il-ftehim ta' kummerċ transatlantiku u ta' investiment,

–   wara li kkunsidra d-Direttiva 2001/81/KE dwar il-Livelli Nazzjonali Massimi tal-Emissjonijiet bħala parti mill-implimentazzjoni tal-Istrateġija Tematika dwar it-Tniġġis tal-Arja, u wara li qies il-leġiżlazzjoni għall-kategoriji ta' sorsi speċifiċi bħall-Euro 5/6 u l-EURO VI, li għandhom l-għan li jnaqqsu t-tniġġis fl-arja li jikkawża 400 000 mewt prematura fl-Ewropa,

A. billi l-kummerċ kien ġeneratur għat-tkabbir, l-impjieg u l-prosperità għal ġenerazzjonijiet fl-Ewropa; billi, madankollu, il-kummerċ u l-investiment mhumiex miri fihom infushom iżda għandhom jikkostitwixxu mod biex jgħollu l-istandards tal-għajxien, itejbu l-benessri, jipproteġu u jippromwovu s-saħħa pubblika u jikkontribwixxu biex jiġi żgurat impjieg sħiħ u użu sostenibbli tar-riżorsi tad-dinja bl-objettiv tal-iżvilupp sostenibbli, li jfittxu kemm li jipproteġu kif ukoll jikkonservaw l-ambjent;

B.  billi, skont l-istħarriġ tal-Ewrobarometru ta' Novembru 2014, f'25 Stat Membru minn 28, il-maġġoranza taċ-ċittadini Ewropej huma favur ftehim ta' kummerċ transatlantiku u ta' investiment;

C. billi l-Ewropa, bħala kontinent b'popolazzjoni li qed tixjieħ, materja prima skarsa, rati tat-twelid baxxi u mudell soċjali bbażat fuq infiq soċjali kbir bħala proporzjon tal-PDG, se tiġi tiddependi dejjem iktar fuq it-tkabbir barra mill-UE, sabiex tgħin biex tiġġenera domestikament il-prosperità ħalli tappoġġja s-sistemi soċjali tagħha li se jkunu taħt pressjoni severa, prinċipalment bħala riżultat ta' żieda fl-istennija tal-għomor akkoppjata ma' popolazzjoni li qed tonqsilha l-età tax-xogħol;

D. billi skont id-Direttivi tal-Kunsill għan-negozjar tat-TTIP[36], l-objettiv tal-Ftehim hu li jiżdied il-kummerċ u l-investiment bejn l-UE u l-Istati Uniti biex jiġġeneraw opportunitajiet ekonomiċi ġodda għall-ħolqien tal-impjiegi u t-tkabbir permezz ta' iktar aċċess għas-suq u iktar kompatibbiltà regolatorja, billi jeliminaw ostakli regolatorji bla bżonn għall-kummerċ u jistabbilixxu l-perkors għal standards globali, filwaqt li jirrikonoxxu li l-iżvilupp sostenibbli hu objettiv predominanti tal-Partijiet, u li l-Partijiet mhumiex se jinkoraġġixxu kummerċ jew investiment dirett barrani billi jbaxxu l-istandards u l-leġiżlazzjoni domestiċi ambjentali, tas-saħħa u tas-sikurezza; billi l-Kummissjoni Ewropea[37] u l-President Obama[38] fil-pubbliku u f'diversi okkażjonijiet iddikjaraw li l-istandards mhux se jitbaxxew fuq l-ebda naħa tal-Atlantiku;

E.  billi l-Istati Uniti diġà kkonkludew diversi ftehimiet ta' sħubija ta' kummerċ u ta' investiment oħrajn ma' atturi globali oħrajn;

F.  billi n-negozjati tat-TTIP jinkludu tliet pilastri prinċipali, li jkopru a) l-aċċess għas-suq, b) kwistjonijiet regolatorji u ostakli nontariffarji (ONT) u c) regoli;

G. billi t-TTIP jipprovdi opportunità biex jiġi stabbilit perkors għal standards għolja f'ċerti oqsma tal-protezzjoni tas-saħħa pubblika, is-saħħa tal-annimali u l-ambjent f'livell globali;

H. billi madankollu hemm tħassib li l-għan tat-TTIP li jnaqqas u jelimina ostakli nontarriffarji eżistenti[39] jista' jwassal għall-ftehim li jista' jitfa f'periklu l-livell ta' protezzjoni tal-UE dwar is-saħħa pubblika, inkluż is-sikurezza tal-ikel, is-saħħa tal-annimali u l-ambjent;

I.   billi hemm differenzi bejn is-sistemi regolatorji tal-UE u l-Istati Uniti, anke f'termini ta' protezzjoni għas-saħħa pubblika u l-ambjent, inkluża s-sikurezza alimentari, l-informazzjoni tal-konsumatur u s-saħħa tal-annimali, minħabba kulturi legali u politiċi differenti li jirriflettu tħassib u approċċi differenti, bħal prinċipji differenti (eż. il-prinċipju ta' prekawzjoni), il-valur tal-ġudizzji, l-objettivi u l-metodi tal-politika tal-analiżi tar-riskju;

J.   billi l-UE u l-Istati Uniti jikkunsidraw ċerti standards f'dawn l-oqsma bħala ostakli għall-kummerċ[40];

K. billi hemm tħassib li l-intenzjoni li jiġi adottat it-TTIP u ftehimiet ta' kummerċ simili diġà affettwaw proposti tal-Kummissjoni u azzjonijiet relatati, pereżempju, mas-sikurezza alimentari u l-protezzjoni tal-klima (eż. it-trattament għat-tnaqqis ta' patoġenu, it-tikkettar ta' laħam minn annimali kklonati u d-dixxendenti tagħhom, u l-implimentazzjoni tad-Direttiva dwar il-kwalità tal-fjuwil);

L.  billi hemm tħassib li l-abbozz tad-dispożizzjonijiet dwar il-kooperazzjoni regolatorja dwar atti li għandhom jew li possibbilment ikollhom impatt sinifikanti fuq il-kummerċ u l-investiment bejn l-UE u l-Istati Uniti: 

     - jagħtu d-drittijiet formali lill-Istati Uniti fir-rigward tal-atti tal-implimentazzjoni li għandhom jiġu adottati skont l-Artikolu 291 tat-TFUE, filwaqt li l-Parlament Ewropew ma għandu l-ebda dritt għal xi skrutinju fir-rigward ta' atti ta' implimentazzjoni,

     - jagħtu d-dritt lill-Istati Uniti li jidħlu fi skambji regolatorji dwar l-adozzjoni tal-leġiżlazzjoni nazzjonali mill-Istati Membri, inkluż l-eżami konġunt tal-mezzi possibbli biex jippromwovu kompatibbiltà regolatorja,

     - jistgħu de facto jagħmluwha iktar diffiċli għall-UE biex tmur lil hinn mill-iktar denominatur komuni baxx tal-istrumenti internazzjonali minħabba l-impenji li għamlet dwar il-kooperazzjoni regolatorja internazzjonali u l-implimentazzjoni tal-istrumenti internazzjonali;

M. billi prerekwiżit biex tinkiseb aktar kompatibilità regolatorja mingħajr ma jitpoġġew f'periklu l-istandards eżistenti u futuri tas-saħħa u ambjentali tal-UE hu li ssir distinzjoni ċara bejn dawn l-oqsma fejn l-objettivi u l-livelli ta' protezzjoni huma simili u dawk fejn huma diverġenti; billi f'oqsma fejn l-objettivi u l-livelli ta' protezzjoni huma simili, approċċi komuni jew rikonoxximent reċiproku jistgħu jiġu eżerċitati; billi f'oqsma fejn il-livelli ta' protezzjoni huma diverġenti b'mod ċar, il-kooperazzjoni għandha tiffoka fuq l-iskambju ta' informazzjoni jew l-armonizzazzjoni 'l fuq;

N. billi l-leġiżlaturi tal-UE u l-Istati Uniti ħadu approċċi differenti ħafna fir-rigward ta' regolamentazzjoni dwar is-sikurezza alimentari u tal-għalf, speċifikament fir-rigward tal-awtorizzazzjoni, it-tikkettar u l-kontrolli fil-katina alimentari u tal-għalf għall-OĠM, it-traċċabilità tal-laħam, it-trattamenti patoġeni, il-pestiċidi u l-annimali kklonati; billi r-Regolamenti tal-UE dwar is-sikurezza ambjentali u alimentari huma bbażati fuq il-prinċipju ta' prekawzjoni u l-approċċ "mir-razzett sal-furketta" li jistabbilixxu aktar regoli stretti tal-UE u għandhom, għaldaqstant, jinżammu;

O. billi l-impatt ta' TTIP futura fuq l-acquis ambjentali, tas-saħħa u s-sikurezza alimentari tal-UE, se jiddependi bis-sħiħ fuq id-dispożizzjonijiet preċiżi tal-ftehim; billi, taħt l-ebda ċirkostanza, ftehim ta' kummerċ ma jista' jimmodifika leġiżlazzjoni eżistenti fil-pajjiżi kontraenti; billi l-implimentazzjoni tal-leġiżlazzjoni eżistenti kif ukoll l-adozzjoni tal-leġiżlazzjoni futura trid tibqa' f'idejn il-korpi eletti demokratikament fejn jiġu rispettati l-proċeduri stabbiliti;

P.  billi l-UE bħalissa għandha aċċess limitat għas-suq tal-Istati Uniti fis-settur marittimu, u, jekk jitwettaq kif suppost, it-TTIP jista' jwassal għal kooperazzjoni aħjar, konverġenza ikbar u benefiċċju ekonomiku għan-negozji Ewropej;

Q. billi, għall-kuntrarju ta' iktar minn 150 pajjiż madwar id-dinja, l-Istati Uniti għadhom ma rratifikax konvenzjonijiet internazzjonali ewlenin dwar is-sustanzi kimiċi (eż. il-Konvenzjoni ta' Stokkolma dwar is-Sustanzi Niġġiesa Organiċi Persistenti u l-Konvenzjoni ta' Rotterdam dwar il-kummerċjalizzazzjoni ta' ċerti sustanzi kimiċi perikolużi), li turi li l-Istati Uniti huma iżolati fil-politika internazzjonali tal-kimiċi; billi, barra minn hekk, l-Istati Uniti jirrifjutaw li jimplimentaw il-parti ambjentali tas-sistema armonizzata globalment tan-NU għall-klassifikazzjoni u t-tikkettar tal-kimiċi, li juri li fejn jirrigwardja l-kimiċi, hemm nuqqas ta' ftehim bejn l-Istati Uniti u l-UE fl-iktar livell bażiku;

R.  billi skont ir-rapport tal-Istati Uniti dwar l-Ostakli Tekniċi għall-Kummerċ tal-2014, l-Istati Uniti qajmu tħassib dwar ir-REACH f'kull Laqgħa tal-Kumitat tal-Ftehim dwar l-Ostakli Tekniċi għall-Kummerċ (OTK) tal-Organizzazzjoni Dinjija tal-Kummerċ (WTO) sa mill-2003, fejn intervjenew "bi tħassib li aspetti tar-REACH huma diskriminatorji, jonqoshom raġuni leġittima u joħolqu ostakli mhux meħtieġa għall-kummerċ", li jindika oppożizzjoni pjuttost fundamentali għar-REACH mill-Istati Uniti;

S.  billi n-natura fundamentalment differenti tal-Att tal-Istati Uniti dwar il-Kontroll tas-Sustanzi Tossiċi (TSCA), adottat fl-1976, meta mqabbel mar-REACH, adottat fl-2006, huwa aċċettat b'mod komuni; billi għal dik ir-raġuni, in-negozjati dwar it-TTIP ma għandhomx l-intenzjoni li jarmonizzaw iż-żewġ sistemi; billi, madankollu, in-negozjati jikkonċernaw kooperazzjoni futura dwar l-implimentazzjoni tar-REACH; billi, minħabba l-opinjonijiet wisq diverġenti dwar il-governanza tar-riskju tal-kimiċi u l-oppożizzjoni fundamentali u sostnuta tal-Istati Uniti għar-REACH, ma jeżistu l-ebda benefiċċji fil-kooperazzjoni dwar l-implimentazzjoni ta' dawn il-liġijiet diverġenti, iktar u iktar peress li l-implimentazzjoni hija 'l bogħod milli tkun eżerċizzju sempliċiment tekniku jew mhux kontroversjali;

T.  billi hemm differenzi kbar fis-sistemi regolatorji tal-Istati Uniti u l-UE rigward il-prodotti għall-protezzjoni tal-pjanti:

     - 82 sustanza attiva hija pprojbita fl-UE, iżda permessa fl-Istati Uniti,

     - l-UE deliberatament adottat kriterji tat-tneħħija bbażati fuq il-periklu biex tneħħi l-użu ta' sustanzi attivi li huma karċinoġeniċi, mutaġeniċi, tossiċi għar-riproduzzjoni, persistenti u tossiċi u bijoakkumulattivi, jew interferenti endokrinali fir-Regolament (KE) Nru 1107/2009; l-Istati Uniti jinsistu fuq approċċ ibbażat fuq ir-riskju, abbażi ta' diversi suppożizzjonijiet u estrapolazzjonijiet, fejn b'hekk jiġi tollerat l-użu ta' dawn is-sustanzi ta' tħassib serju ħafna,

     - hemm mudell ġenerali ta' ammonti iktar baxxi ta' residwi ta' pestiċidi permessi fl-ikel fl-UE meta mqabbel mal-Istati Uniti;

U. billi l-abbozz tat-test tan-negozjati tal-UE dwar il-Miżuri Sanitarji u Fitosanitarji mressaq għar-rawnd tad-29 ta' Settembru - 3 ta' Ottubru 2014 jissuġġerixxi jobbliga lill-Partijiet japplikaw livelli ta' residwi massimi u tolleranzi stabbiliti mill-Kummissjoni tal-Codex Alimentarius fi żmien 12-il xahar wara l-adozzjoni tagħhom, sakemm il-Parti importatriċi tkun issenjalat riżerva fil-laqgħa tal-Kummissjoni tal-Codex Alimentarius; billi hemm mudell ġenerali ta' ammonti iktar baxxi ta' residwi ta' pestiċidi permessi fl-ikel fl-UE, kif imqabbel mal-Kummissjoni tal-Codex Alimentarius; billi tul dawn l-aħħar erba' snin, l-Aġenzija Ewropea dwar is-Sigurtà fl-Ikel (EFSA) ressqet riżerva f'31-57 % tal-każijiet kollha, li tenfasizza l-grad għoli ta' nuqqas ta' ftehim mill-EFSA mal-istandards tal-Codex; billi bħalissa l-EFSA tħossha libera li tesprimi r-riżervi tagħha, fil-limiti possibbli; billi ladarba tiġi adottata t-TTIP, madankollu, huwa ferm dubjuż jekk l-EFSA se tkunx politikament permessa biex tkompli tagħmel hekk, peress li l-abbozz tat-test għandu l-intenzjoni jikkommetti lill-UE u lill-Istati Membri biex jikkollaboraw fil-korpi tal-istabbiliment tal-istandards internazzjonali "bi ħsieb li jintlaħqu riżultati reċiprokament sodisfaċenti", li jista' jiskoraġġixxi l-EFSA milli tressaq riżervi lill-Kummissjoni tal-Codex Alimentarius fil-futur u għalhekk twassal għal standards iktar dgħajfa fl-UE;

V. billi l-importazzjoni fl-UE tal-laħam tat-tjur trattat b'soluzzjonijiet antimikrobiċi li fih ipoklorit tas-sodju għandha titwaqqaf;

W. billi l-Ftehim Ekonomiku u Kummerċjali Komprensiv (CETA), li jinsab kważi rratifikat, diġà wera l-opportunitajiet għall-kummerċ f'oqsma agrikoli sensittivi bħal-laħam taċ-ċanga, filwaqt li jaderixxi b'mod strett mal-istandards u l-metodi sanitarji u fitosanitarji (SPS) Ewropej[41];

X. billi r-rapport tal-OTK tal-Istati Uniti tal-2014 jirreferi għat-tħassib tal-industrija tal-protezzjoni tal-kimiċi u l-għelejjel tal-Istati Uniti fir-rigward tal-kriterji tat-tneħħija bbażati fuq il-periklu biex jiġu żviluppati għall-interferenti endokrinali, u ddikjara li l-Istati Uniti qajmu tħassib bilaterlament dwar il-proposta tad-DĠ Ambjent kif ukoll waqt il-laqgħat tal-Kumitati tal-OTK tad-WTO u tal-SPS; billi l-Kummissjoni ddeċidiet li tagħti bidu għall-valutazzjoni tal-impatt fuq l-iżvilupp tal-kriterji għall-interferenti endokrinali f'Lulju 2013; billi din id-deċiżjoni hija r-raġuni prinċipali għan-nuqqas tal-Kummissjoni li tadotta kriterji sal-iskadenza ta' erba' snin ta' Diċembru 2013; billi, filwaqt li l-Istati Uniti laqgħu d-deċiżjoni tal-Kummissjoni, kemm il-Kunsill u l-Parlament Ewropew iddeċidew li jappoġġjaw lill-Isvezja fl-azzjoni tal-qorti tagħha biex tikkontesta n-nuqqas tal-Kummissjoni, billi turi opinjonijiet fundamentalment differenti bħat-tip ta' dispożizzjonijiet regolatorji fid-dritt tal-UE;

Y. billi hemm rabtiet bejn ikel ħażin għas-saħħa u mard li ma jitteħidx li għandu x'jaqsam mad-dieta (NCDs); billi skont ir-Rapporteur Speċjali tan-NU dwar id-dritt ta' kulħadd għat-tgawdija tal-ogħla standard possibbli ta' saħħa fiżika u mentali, kummerċ globali, żieda fl-investiment dirett barrani (IDB) fis-settur alimentari u l-kummerċjalizzazzjoni mifruxa tal-ikel ħażin għas-saħħa żiedu l-konsum tal-ikel ħażin għas-saħħa[42]; billi r-Rapporteur Speċjali kkonkluda r-rapport tiegħu b'sett ta' rakkomandazzjonijiet, immirati għall-Istati Uniti u l-industrija tal-ikel, biex jieħdu passi konkreti ħalli jnaqqsu l-produzzjoni u l-konsum tal-ikel ħażin għas-saħħa u jżidu d-disponibbiltà u l-affordabbiltà ta' alternattivi ta' ikel iktar tajjeb għas-saħħa;

Z.  billi skont il-pjan ta' azzjoni globali tal-Organizzazzjoni Dinjija tas-Saħħa (WHO) għall-prevenzjoni u l-kontroll tal-mard li ma jitteħidx 2013-2020[43], it-telf tal-ħruġ kumulattiv minħabba l-ikbar erba' mardiet li ma jitteħdux flimkien mad-disturbi mentali hu stmat li li jlaħħaq USD 47 triljun; billi skont id-WHO, dan it-telf jirrappreżenta 75 % tal-PDG globali fl-2010 (USD 63 triljun); billi skont id-WHO, li kollox jibqa' għaddej bħas-soltu fir-rigward ta' mard li ma jitteħidx se jirriżulta fi tnaqqis ta' produttività u żieda fl-ispejjeż għall-kura tas-saħħa fil-pajjiżi kollha;

AA.     billi d-Direttur Ġenerali tad-WHO fit-8 Konferenza Globali dwar il-Promozzjoni tas-Saħħa f'Ġunju tal-2013 qal li "l-isforzi biex jiġi evitat mard li ma jitteħidx imorru kontra l-interessi tan-negozju ta' operaturi ekonomiċi b'saħħithom"[44];

AB.     billi t-TTIP, bħall-Ftehim ta' Sħubija Trans-Paċifika, jista' jirrestrinġi l-abbiltà tal-UE u l-Istati Membri biex jipproteġu l-politika tan-nutrizzjoni mill-influwenza ta' interessi personali, inaqqas il-firxa ta' interventi disponibbli biex jiskoraġġixxi b'mod attiv il-konsum ta' ikel inqas tajjeb għas-saħħa (u jippromwovi ikel tajjeb għas-saħħa), inkluż permezz ta' politiki pubbliċi ta' akkwist, u jillimita l-kapaċità tal-UE u l-Istati Membri biex jimplimentaw dawn l-interventi[45];

AC.     billi l-liġi federali tal-Istati Uniti dwar il-benessri tal-annimali hija ferm taħt il-livell tar-Regolament tal-UE, inkluż in-nuqqas ta' leġiżlazzjoni dwar l-istandards tal-benessri għall-annimali mrobbija qabel jiġu maqtula; billi, sfortunatament, il-benessri tal-annimali mhux ikkunsidrat mill-Kummissjoni bħala tħassib għall-kummerċ, bl-istess mod bħas-sikurezza alimentari jew is-saħħa tal-annimali għall-iskopijiet tar-rekwiżiti tal-importazzjoni;

AD.     billi l-UE u l-Istati Uniti għandhom differenzi kbar fl-approċċ regolatorju, il-punt tat-tluq tal-emissjoni medja u l-livell ta' ambizzjoni rigward it-tnaqqis tal-emissjonijiet ta' gass b'effett ta' serra medji ta' vetturi tax-xogħol ħafif; billi dan il-qasam għalhekk ma għandux ikun soġġett għar-rikonoxximent reċiproku;

AE.     billi l-leġiżlaturi u r-regolaturi tal-UE u tal-Istati Uniti ħadu approċċ differenti ħafna biex jindirizzaw l-emissjonijiet ta' gass b'effett ta' serra u jindirizzaw il-bidla fil-klima; billi l-ġlieda kontra t-theddid sinifikanti maħluq mill-bidla fil-klima u ż-żamma tal-integrità ta’ politika tal-klima adottata għandhom jieħdu prijorità fuq il-promozzjoni tal-kummerċ;

AF.     billi huwa essenzjali għat-TTIP li jinternalizza l-klima esterna, l-ispejjeż tas-saħħa u ambjentali tal-avjazzjoni, it-trasport tal-merkanzija bil-baħar u fuq l-art sabiex tiġi żgurata s-sostenibbiltà tal-kummerċ globali tal-oġġetti; billi fin-nuqqas ta' azzjoni internazzjonali effikaċi biex jiġu internalizzati dawn l-ispejjeż, l-UE għandha tintroduċi u timplimenta miżuri reġjonali mhux diskriminatorji biex tindirizza dawn l-esternalitajiet;

AG.     billi l-għan tad-dispożizzjonijiet tal-iżvilupp sostenibbli fit-TTIP għandhom ikunu biex jiżguraw li l-politiki tal-kummerċ u ambjentali jkunu ta' appoġġ reċiproku, biex jippromwovu l-użu ottimali tar-riżorsi f'konformità mal-objettiv tal-iżvilupp sostenibbli, u biex isaħħu l-kooperazzjoni u l-kollaborazzjoni ambjentali;

AH.     billi f'ħafna oqsma, bħall-politiki ta' kontroll tal-klima u l-emissjonijiet, l-Istati Uniti għandhom standards regolatorji iktar baxxi milli fl-UE, li jirriżultaw fi spejjeż ogħla ta' produzzjoni u ta' konformità regolatorja fl-UE milli fl-Istati Uniti u għalhekk ir-riskju ta' rilokazzjoni tal-karbonju u l-emissjonijiet;

AI. billi tnaqqis tat-tariffi fuq dawk il-prodotti sensittivi għall-enerġija fejn l-ispiża tal-konformità regolatorja, ambjentali u tal-klima tal-UE hija ogħla minn dik fl-Istati Uniti jista' jirriżulta fi tnaqqis tal-kompetittività tal-produzzjoni tal-UE meta mqabbel mal-importazzjonijiet tal-Istati Uniti li ma jġarrbux dawn l-ispejjeż;

AJ. billi s-sistemi tas-saħħa universali huma parti mill-mudell soċjali Ewropew u l-Istati Membri għandhom il-kompetenza għall-ġestjoni u l-organizzazzjoni tas-servizzi tas-saħħa u l-kura medika;

AK.    billi r-Regolament (UE) Nru 536/2014 tal-Parlament Ewropew u tal-Kunsill dwar il-provi kliniċi fuq prodotti mediċinali għall-użu mill-bniedem jeħtieġ sommarju tar-riżultati tal-provi kliniċi kollha li għandu jiġi ppubblikat f'database aċċessibbli pubblikament sena wara li tkun tlestiet il-prova u meta rapport sħiħ ta' studju kliniku biex jiġi ppubblikat ladarba jkun tlesta l-proċess ta' awtorizzazzjoni jew l-applikant ikun irtira t-talba għall-awtorizzazzjoni tal-kummerċjalizzazzjoni; billi l-liġi tal-Istati Uniti ma teħtiġx l-istess livell ta' trasparenza;

AL.     billi huwa stmat li l-ispejjeż farmaċewtiċi jirrappreżentaw 1.5 % tal-PDG Ewropew, għalhekk kwalunkwe żieda fil-protezzjoni tal-proprjetà intellettwali li tirriżulta mit-TTIP jista' jkollha impatt negattiv fuq l-ispejjeż tal-kura tas-saħħa;

AM.    billi, skont il-UNCTAD, il-miżuri ambjentali u tas-saħħa huma fost il-miżuri governattivi li ġew ikkontestati l-aktar fil-każijiet tal-ISDS;

AN.    billi l-Kummissjoni, fil-25 ta' Novembru 2014, iddeċiedet li żżid it-trasparenza tan-negozjati tat-TTIP[46]; billi l-Parlament jilqa' din id-deċiżjoni; billi fis-7 ta' Jannar 2015, l-Ombudsman Ewropew laqgħet ukoll il-progress li sar mill-Kummissjoni dwar il-fatt li n-negozjati tat-TTIP jkunu aktar trasparenti - madankollu, hija għamlet ukoll diversi rakkomandazzjonijiet għal titjib ulterjuri[47]; billi l-aċċess għat-test tal-proposti tal-Istati Uniti se jżid ukoll it-trasparenza;

1.  Jistieden lill-Kummissjoni ssegwi l-prinċipji u l-objettivi ġenerali tad-Direttivi tal-Kunsill għan-negozjati dwar it-TTIP;

2.  Jistieden lill-Kummissjoni tiżgura li l-politiki u l-prinċipji tal-UE dwar il-protezzjoni u t-titjib tal-kwalità tas-saħħa pubblika, is-saħħa tal-annimali u l-ambjent jinżammu tul in-negozjati, kemm de jure u kemm de facto, u jiġu riflessi bis-sħiħ fil-ftehim finali tat-TTIP;

3.  Jistieden lill-Kummissjoni tiggarantixxi li t-TTIP jkun mingħajr ħsara għad-dritt, l-abbiltajiet u l-proċeduri leġiżlattivi tal-UE u l-Istati Membri biex jadottaw, jimplimentaw u jinfurzaw, skont il-kompetenza rispettiva tagħhom, miżuri eżistenti u futuri meħtieġa biex isegwu objettivi leġittimi ta' politika pubblika bħas-saħħa pubblika, is-saħħa tal-annimali u l-protezzjoni ambjentali b'mod mhux diskriminatorju;

4.  Jistieden lill-Kummissjoni tiżgura li kwalunkwe ftehim, kemm permezz tal-Kapitolu orizzontali dwar il-kooperazzjoni regolatorja jew kwalunkwe dispożizzjoni settorjali, ma jwassalx għal tnaqqis fl-istandards eżistenti ambjentali, tas-saħħa u tas-sikurezza alimentari, u jiżgura b'mod simili li ma jaffettwax standards li għad irid jiġu stabbiliti f'oqsma fejn il-leġiżlazzjoni jew l-istandards huma differenti ħafna fl-Istati Uniti meta mqabbla ma' tal-UE, bħal, pereżempju, l-implimentazzjoni tal-leġiżlazzjoni (qafas) eżistenti (eż. ir-REACH), jew l-adozzjoni ta' liġijiet ġodda (eż. l-ikklonjar), jew definizzjonijiet futuri li jaffetwaw il-livell ta' protezzjoni (eż. kimiċi li jinterferixxu mal-endokrinali);

5.  Jistieden lill-Kummissjoni tillimita l-kooperazzjoni regolatorja għall-żoni settorjali speċifikati b'mod ċar fejn l-Istati Uniti u l-UE għandhom livelli simili ta' protezzjoni, jew fejn hemm bażi raġonevoli li, minkejja livelli diverġenti ta' protezzjoni, l-armonizzazzjoni 'il fuq tista' tinkiseb, jew li għall-inqas jistħoqqilha tentattiv; jistieden lill-Kummissjoni tiżgura li kwalunkwe dispożizzjoni dwar kooperazzjoni regolatorja fit-TTIP ma tistabbilixxix rekwiżiti proċedurali għall-adozzjoni tal-atti tal-Unjoni li jikkonċernawha u lanqas ma tagħti lok għall-drittijiet infurzabbli f'dak ir-rigward;

6.  Jistieden lill-Kummissjoni tiżgura li l-leġiżlaturi u l-partijiet interessati kollha kkonċernati bil-kooperazzjoni regolatorja jkunu involuti fi kwalunkwe korp li jista' jinħoloq biex jesploraw kooperazzjoni regolatorja futura;

7.  Jistieden lill-Kummissjoni tiżgura li ma jkunx hemm kompromessi bejn l-għanijiet ekonomiċi u s-saħħa pubblika, is-sikurezza alimentari, il-benessri tal-annimali u l-ambjent[48]; jistieden lill-Kummissjoni tirrikonoxxi li fejn l-UE u l-Istati Uniti għandhom regoli differenti ħafna, ma jsirx ftehim, bħal pereżempju fis-servizzi tal-kura tas-saħħa pubblika, l-OĠM, l-użu ta' ormoni fis-settur bovin, ir-REACH u l-implimentazzjoni tiegħu, u l-ikklonjar ta' annimali għall-iskopijiet ta' trobbija, u għaldaqstant ma tinnegozjax fuq dawn il-kwistjonijiet;

8.  Jistieden lill-Kummissjoni tikkunsidra l-miżuri jew standards regolatorji li ġejjin bħala fundamentali u li ma għandhomx jiġu kompromessi:

     - in-nonapprovazzjonijiet ta' sustanzi attivi u livelli massimi ta' residwu ta' pestiċidi tal-UE,

     - il-miżuri regolatorji fir-rigward ta' interferenti endokrinali,

     - l-awtonomija organizattiva fil-qasam tal-provvista tal-ilma u s-sanità,

     - l-approċċ integrat tal-UE fir-rigward tas-sikurezza alimentari, inklużi d-dispożizzjonijiet dwar il-benessri tal-annimali,

     - l-applikazzjoni tal-leġiżlazzjoni tal-UE dwar informazzjoni dwar l-ikel lill-konsumaturi,

     - l-implementazzjoni tar-Regolament (UE) Nru 536/2014 tal-Parlament Ewropew u tal-Kunsill dwar il-provi kliniċi fuq prodotti mediċinali għall-użu mill-bniedem, u b'mod partikolari l-ħtieġa għal rapporti dwar provi kliniċi sħaħ tal-provi kliniċi kollha li jiġu ppublikati fuq database aċċessibbli pubblikament ladarba l-proċess ta' awtorizzazzjoni jkun tlesta;

     - il-kompetenza tal-Istati Membri fir-rigward tal-organizzazzjoni tas-sistemi tas-saħħa, inkluż l-ipprezzar u r-rimbors tal-prodotti mediċinali kif ukoll l-aċċess għall-mediċini;

     - ir-restrizzjonijiet tal-ingredjenti fi prodotti kosmetiċi u l-projbizzjoni tal-ittestjar fuq l-annimali fir-rigward ta' ingredjenti kosmetiċi u prodotti finali,

     - il-politiki tal-UE fl-enerġija rinnovabbli, fit-teknoloġija ambjentali, u fil-kisba tal-miri klimatiċi u enerġetiċi tal-UE,

     - il-miżuri biex titnaqqas id-dipendenza fuq il-fjuwils fossili, u proċessi internazzjonali u/jew tal-UE li jwasslu għad-dekarbonizzazzjoni tat-trasport,

     - ir-rekwiżiti ekodisinn għall-prodotti li jużaw l-enerġija;

9.  Jistieden lill-Kummissjoni teskludi s-servizzi pubbliċi u soċjali mid-dispożizzjonijiet kollha tal-ftehim; jinsisti, barra minn hekk, li ma għandu jkun hemm l-ebda listi negattivi, approċċi mħallta jew "klawżoli ta' aġġustament";

10. Jistieden lill-Kummissjoni tiżgura li approċċ komuni, kooperazzjoni regolatorja jew rikonoxximent reċiproku, kif xieraq, jintlaħqu fl-oqsma li ġejjin, sakemm il-livell tal-istandards tal-UE ma jkunx kompromess:

     - ir-rikonoxximent u l-protezzjoni tad-denominazzjonijiet ta' oriġini protetti Ewropej kollha (DOP) u l-oriġini ġeografiċi protetti (PGOs) mill-Istati Uniti, u jitwaqqaf l-użu qarrieqi tal-indikazzjonijiet ġeografiċi (IĠ) fl-Istati Uniti,

     - l-immaniġġjar integrat tal-organiżmi qerrieda sabiex jiġu evitati organiżmi qerrieda li jaffettwaw l-annimali u l-pjanti,

     - it-tnaqqis fl-użu ta' antibijotiċi fit-trobbija tal-bhejjem, li jiżgura l-effikaċja tal-antibijotiċi kemm għall-bnedmin u l-annimali,

     - is-sistemi ta' identifikazzjoni tal-annimali, u dispożizzjonijiet kompatibbli tat-traċċabilità biex jiġi żgurat li ikel ipproċessat u mhux ipproċessat li fih prodotti li joriġinaw mill-annimali jistgħu jiġu traċatti fil-katina alimentari kollha,

     - il-metodi alternattivi tal-ittestjar tal-annimali,

     - l-ispezzjonijiet relatati mal-produzzjoni tal-prodotti farmaċewtiċi u l-apparati mediċi,

     - il-miżuri biex tiġi miġġielda l-obeżità, b'mod partikolari fit-tfal,

     - l-awkkist pubbliku ekoloġiku,

     - l-implimentazzjoni armonizzata tal-Ftehim UNECE tal-1958 dwar l-Adozzjoni ta' Preskrizzjonijiet Tekniċi Uniformi u l-Ftehim tal-1998 dwar Regolamenti Tekniċi Globali tan-NU;

     - l-introduzzjoni uniformi ta' ċiklu tat-test imtejjeb kemm fl-UE u fl-Istati Uniti, ibbażat fuq il-Proċeduri Armonizzati għall-Ittestjar Dinji għall-Vetturi Ħfief; is-sorveljanza tas-suq, il-konformità taċ-ċertifikazzjoni tal-produzzjoni u t-testijiet ta' konformità fl-użu, u trasparenza tar-riżultati,

     - l-introduzzjoni ta' sistema ta' klassifikazzjoni globali tal-vetturi għall-vetturi tax-xogħol ħafif u heavy duty,

     - is-sostituzzjoni ta' ċjanur fil-qasam tal-minijeri;

11. Jistieden lill-Kummissjoni ssegwi l-integrazzjoni tas-sistemi eżistenti ta' twissija bikrija tal-UE u l-Istati Uniti fis-settur alimentari u t-titjib tat-traċċabilità tal-prodotti fil-katina tal-kummerċ transatlantiku biex tkun tista' tittieħed azzjoni b'aktar ħeffa għal-protezzjoni tas-saħħa fil-każ ta' theddida fl-ikel;

12. Jistieden lill-Kummissjoni tiżgura li l-Kapitolu tal-OTK fit-TTIP ma jirrestrinġix l-għażliet tal-UE u l-Istati Membri tagħha li jadottaw miżuri bil-għan li jnaqqsu l-konsum ta' ċerti prodotti bħat-tabakk, l-ikel b'ħafna xaħam, il-melħ u z-zokkor u l-użu detrimentali tal-alkoħol;

13. Jistieden lill-Kummissjoni tinkoraġġixxi lin-naħa tal-Istati Uniti tneħħi l-projbizzjoni fuq l-importazzjonijiet taċ-ċanga mill-UE;

14. Jistieden lill-Kummissjoni tistabbilixxi djalogu formali dwar il-benessri tal-annimali mar-regolaturi tal-Istati Uniti; jistieden lill-Kummissjoni tiddefendi d-dispożizzjonijiet dwar il-benessri tal-annimali ħalli tikseb armonizzazzjoni fl-ogħla livell, megħjuna mill-mekkaniżmi meħtieġa ta' infurzar;

15. Jistieden lill-Kummissjoni fil-kuntest tal-Kapitolu dwar il-kummerċ u l-iżvilupp sostenibbli biex titlob mill-Istati Uniti konformità sħiħa mal-ftehimiet ambjentali multilaterali, bħal, inter alia, il-Protokoll ta' Montreal (Ożonu), il-Konvenzjoni ta' Basilea (vjeġġi transkonfinali ta' skart perikoluż), il-Konvenzjoni ta' Stokkolma (sustanzi niġġiesa organiċi persistenti), il-Konvenzjoni ta' Rotterdam (kummerċ ta' kimiċi u pestiċidi perikolużi), il-Konvenzjoni dwar il-Kummerċ Internazzjonali fl-Ispeċijiet ta' Fawna u Flora Selvaġġi fil-Periklu, il-Konvenzjoni dwar id-Diversità Bijoloġika, u l-Protokoll ta' Kyoto, qabel ma taqbel dwar kooperazzjoni regolatorja dwar dawn il-kwistjonijiet;

16. Jistieden lill-Kummissjoni tevita ambigwitajiet biex tipprevjeni interpretazzjoni wiesgħa minn tribunali tal-arbitraġġ, billi jiġi żgurat li t-termini essenzjali użati fil-ftehim ikunu definiti b'mod ċar;

17. Jistieden lill-Kummissjoni topponi l-inklużjoni tal-ISDS fit-TTIP peress li, minn naħa, dan il-mekkaniżmu jista' jdgħajjef fundamentalment id-drittijiet sovrani tal-UE, tal-Istati Membri tagħha u tal-awtoritajiet reġjonali u lokali li jadottaw regolamenti dwar is-saħħa pubblika, is-sikurezza alimentari u l-ambjent, u, min-naħa l-oħra, huma l-qrati tal-UE u/jew tal-Istati Membri li jipprovdu protezzjoni legali effikaċi bbażata fuq leġittimità demokratika biex jiddeċiedu b'mod kompetenti, effiċjenti u b'mod ekonomiku l-każijiet kollha ta' disputi mistennija;

18. Jistieden lill-Kummissjoni, fi ħdan in-negozjati tat-TTIP, ittemm l-eżenzjonijiet tat-taxxi fuq il-fjuwils għall-avjazzjoni kummerċjali skont l-impenji G20 biex b'mod gradwali jitneħħew is-sussidji fuq il-fjuwils fossili;

19. Jistieden lill-Kummissjoni tiżgura li l-Parlament jinżamm infurmat bis-sħiħ bil-proċess tan-negozjar;

20. Jistieden lill-Kummissjoni tkompli żżid it-trasparenza fin-negozjati, f'konformità mar-rakkomandazzjonijiet tal-Ombudsman Ewropew tas-7 ta' Jannar 2015;

21. Jistieden lill-Kummissjoni tħeġġeġ lill-Istati Uniti jirriflettu l-azzjoni tal-UE biex iżid it-trasparenza;

22. Jistieden lill-Kummissjoni tiżgura li l-Valutazzjoni tal-Impatt għas-Sostenibbiltà (VIS) tal-Kummerċ dwar l-ftehim tat-TTIP ikun komprensiv, u aġġornat minn meta t-test ikun konsolidat u qabel jiġi finalizzat, b'involviment ċar tal-partijiet interessati u s-soċjetà ċivili; jikkunsidra li l-VIS għandha wkoll tagħmel eżami u tivvaluta bir-reqqa kwalunkwe dispożizzjoni proposta bil-ħsieb tal-impatt potenzjali tagħhom fuq l-acquis regolatorju u l-libertà tal-UE li tfittex objettivi leġittimi ta' politika pubblika fil-futur, u jekk l-għan maħsub jistax jinkiseb b'mod tajjeb ugwalment permezz ta' modi oħrajn.

RIŻULTAT TAL-VOTAZZJONI FINALI FIL-KUMITAT

25.3.2015

OPINJONI TAL-KUMITAT GĦALL-INDUSTRIJA, IR-RIĊERKA U L-ENERĠIJA

għall-Kumitat għall-Kummerċ Internazzjonali

dwar rakkomandazzjonijiet lill-Kummissjoni Ewropea dwar in-negozjati għas-Sħubija Trans-Atlantika ta' Kummerċ u ta' Investiment (TTIP)

(2014/2228(INI))

Rapporteur għal opinjoni: Jerzy Buzek

SUĠĠERIMENTI

Il-Kumitat għall-Industrija, ir-Riċerka u l-Enerġija jistieden lill-Kumitat għall-Kummerċ Internazzjonali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jenfasizza l-importanza ta' suq transatlantiku għaċ-ċittadini u l-industriji tal-UE u tal-Istati Uniti tal-Amerika; jenfasizza li r-riżultat ewlieni tan-negozjati għandu jwassal għal ftehim profond, komprensiv, ambizzjuż, bi standard għoli ta’ kummerċ ħieles u ta' investiment, li jirrispetta u jippromwovi l-valuri Ewropej, jistimola t-tkabbir sostenibbli, il-kooperazzjoni xjentifika, l-innovazzjoni u l-ħolqien ta’ impjiegi ta’ kwalità għolja u jikkontribwixxi għall-benesseri taċ-ċittadini Ewropej billi jqiegħed l-interessi tagħhom fil-qalba tan-negozjati kummerċjali tat-TTIP; jinnota li t-TTIP għandha l-għan li telimina t-tariffi, id-dazji u l-kwoti, iżda wkoll li toħloq kooperazzjoni regolatorja u twaqqaf standards għolja konġunti fis-suq globali; jinnota li l-isforzi dwar l-eliminazzjoni tat-tariffi u l-armonizzazzjoni regolatorja jridu jkunu bilanċjati; jistieden lill-Kummissjoni ssaħħaħ il-proċess li bih tikkomunika maċ-ċittadini u mal-partijiet interessati kollha bl-għan li takkomoda l-opinjonijiet tagħhom fejn possibbli, biex tmexxi n-negozjati bl-iktar mod trasparenti possibbli u biex tippubblika t-testi u d-dokumenti kollha possibli dwar in-negozjati, inkluż dokumenti relatati ma' kapitlu possibbli dwar l-enerġija u l-SMEs, b'hekk tipprovdi livelli massimi ta' trasparenza għaċ-ċittadini Ewropej;

2.  Jistieden lill-Kummissjoni biex iżżomm l-objettiv li tiddedika kapitlu speċifiku għall-enerġija li jinkludi l-materja prima industrijali fit-TTIP bl-għan li toħloq suq kompetittiv, trasparenti u nondiskriminatorju, li jista' jżid b'mod sinifikanti s-sigurtà tal-enerġija tal-UE, itejjeb id-diversifikazzjoni tas-sorsi tal-enerġija u jwassal biex jonqsu l-prezzijiet tal-enerġija; jenfasizza f’dan ir-rigward l-importanza tas-sorsi ta’ enerġija rinnovabbli u l-effiċjenza fl-użu tal-enerġija biex tiżdied is-sigurtà tal-enerġija; jenfasizza li dan il-kapitlu speċifiku jrid jintegra garanziji ċari li l-istandards ambjentali u l-għanijiet ta' azzjoni dwar il-klima tal-UE ma jiddgħajfux u li l-UE żżomm il-libertà li taġixxi b'mod indipendenti fit-twaqqif ta' standards u ta' għanijiet futuri;

3.  Ifakkar li l-Parlament Ewropew jrid jagħti l-approvazzjoni tiegħu għal ftehim TTIP, li mingħajrha dan ma jkunx jista’ jidħol fis-seħħ;

4.  Jenfasizza l-ħtieġa għall-UE li tistabbilixxi sorsi ta' provvista tal-enerġija differenti u affidabbli; jitlob, f'dan ir-rigward li l-Kummissjoni tiżgura politika ta' kummerċ ħieles u tippromovi investiment fir-rigward tal-fjuwils, inkluż LNG u żejt mhux maħdum, filwaqt li żżomm id-dritt tal-UE li tikkategorizza l-fjuwils skont l-impatt tas-CO₂ tagħhom tul iċ-ċiklu tal-ħajja u tibqa' tikkunsidra l-għanijiet tal-UE dwar il-klima;

5.  Jistieden lill-Kummissjoni biex tħares lil hinn mil-limitazzjonijiet tal-esportazzjoni u taħdem fejn xieraq dwar l-armonizzazzjoni u l-approssimazzjoni transatlantika ta' istandards u regolamenti ta' livell għoli u reċiproċi li jiddefinixxu l-prinċipji ta’ appoġġ pubbliku għal sorsi differenti ta’ enerġija, sabiex jiġu ċirkonskritti r-riskji ta’ distorsjoni tal-kompetizzjoni, bħal pereżempju d-definizzjoni ta' koġenerazzjoni bl-użu tal-bijomassa; jinkoraġġixxi lill-Kummissjoni tesplora modi li bihom issaħħaħ il-kooperazzjoni dwar ir-riċerka fl-enerġija, fl-iżvilupp u fl-innovazzjonijiet u sabiex tippromovi teknoloġija aktar nadifa;

6.  Jirreferi għad-differenzi attwali bejn l-Istati Uniti tal-Amerika u l-UE mhux biss fuq prezzijiet tal-enerġija u aċċess għall-materja prima, iżda wkoll fl-emissjonijiet tas-CO₂ per capita, li jwasslu għal kundizzjonijiet mhux ugwali f'termini ta' kompetittività u protezzjoni tal-ambjent; jistieden lill-Kummissjoni, għalhekk, biex tinkludi klawsola ta' salvagwardja bilaterali biex tipprovdi setturi intensivi fl-użu ta’ enerġija u r-rilokazzjoni tal-emissjonijiet ta’ karbonju fl-UE, inkluża l-industrija tas-sustanzi kimiċi, tal-materja prima u tal-azzar, b’miżuri xierqa li jżommu r-rati tariffarji doganali attwali matul perjodu ta' tranżizzjoni xieraq stabbilit wara d-dħul fis-seħħ tat-TTIP bi klawsola mandatorja ta' reviżjoni; jemmen li kemm il-kumpaniji tal-Istati Uniti tal-Amerika kif ukoll dawk tal-UE għandhom ikunu nkoraġġiti jżidu l-effiċjenza tar-riżorsi u tal-enerġija tagħhom; jistieden lill-Kummissjoni biex tqis kif xieraq il-promozzjoni tal-industrija tal-manifattura bħala dik li tagħti spinta lir-riindustrijalizzazzjoni Ewropea;

7.  Jistieden lill-Kummissjoni tinkludi l-hekk imsejħa "servizzi ekoloġiċi," bħall-kostruzzjoni, l-installazzjoni, it-tiswija u l-ġestjoni ta’ prodotti ambjentali, fin-negozjati li għaddejjin mas-sħab transatlantiċi tagħna; jinnota li l-Unjoni Ewropea hija mexxej dinji fl-importazzjoni u l-esportazzjoni ta’ prodotti u servizzi ekoloġiċi, minkejja li għadhom jeżistu bosta ostakli għall-fornituri Ewropej tas-servizzi ekoloġiċi; jinnota li s-settur għandu potenzjal ekonomiku konsiderevoli għall-Unjoni Ewropea;

8.  Jenfasizza l-proċess u t-twaqqif tal-istandards skont it-tikkettar enerġetiku tal-UE u d-direttivi dwar l-eko-disinn, li dwarhom m’għandux ikun hemm kompromessi;

9.  Jenfasizza l-benefiċċji potenzjali konsiderevoli tat-TTIP għall-SMEs; jistieden lill-Kummissjoni biex tiżgura li l-prijoritajiet u t-tħassib tal-SMEs jiġu kkunsidrati bis-sħiħ fin-negozjati TTIP bi qbil mal-prinċipju 'Aħseb l-Ewwel fiż-Żgħir', pereżempju permezz ta' valutazzjonijiet tal-impatt komprensivi, ta' konsultazzjonijiet pubbliċi mmirati u l-involviment tar-rappreżentanti tal-SMEs Ewropej; jirrakomanda li l-Kummissjoni tfittex it-twaqqif ta' sistemi unika ta' informazzjoni għall-SMEs u tiddedika kapitlu speċifiku għall-SMEs li fih it-tnaqqis tal-piżijiet amministrattivi għandhom ikunu meqjusa f'konformità mal-oqsfa regolatorji relevanti; jitlob lill-Kummissjoni tipprovdi għall-protezzjoni u t-titjib tal-politiki pro-SMEs u skemi ta’ appoġġ;

10. Jistieden lill-Kummissjoni tipprovdi għal regoli tal-oriġini faċli għall-utent (RoO) li jkunu jistgħu jiġu applikati b’mod faċli mill-esportaturi tal-UE u timminimizza l-ostakli żejda għall-kummerċ u l-burokrazija maħluqa mir-RoO, b’mod speċjali għall-SMEs;

11. Ifakkar li meta mqabbel mas-suq tal-Akkwist Pubbliku tal-UE, is-suq tal-Istati Uniti jibqa' estremament magħluq għal kumpaniji barranin; jitlob li l-Kummissjoni tiffaċilita r-reċiproċità u l-parteċipazzjoni aktar attiva tal-intrapriżi tal-UE, inklużi l-SMEs, fl-akkwist pubbliku tal-Istati Uniti fil-livelli kollha tal-gvern, billi dan jista’ jikkontribwixxi biex jistimula l-innovazzjoni tas-settur privat u biex jinħolqu kumpaniji innovattivi u setturi ġodda b’rata għolja ta’ tkabbir; jenfasizza li din il-possibbiltà m’għandhiex iddgħajjef il-kapaċità għall-gvernijiet Ewropej li jżommu s-servizzi pubbliċi tagħhom;

12. Jinnota li l-approċċi regolatorji differenti fl-Unjoni Ewropea u l-Istati Uniti jinvolvu spiża għolja għall-industriji fuq iż-żewġ naħat tal-Atlantiku; jemmen li jistgħu jiġu sfruttati kisbiet sinifikanti fl-effiċjenza bl-allinjament ta’ dawn l-approċċi waqt li l-awtoritajiet fl-Unjoni Ewropea u fl-Istati Uniti jitħallew iżommu u jiksbu standards ta’ kwalità u sigurtà għolja għaċ-ċittadini tagħhom;

13. Jistenna li fin-negozjati l-Kummissjoni tindirizza l-kwistjoni tal-Att dwar “ixtri prodotti Amerikani”, "Jones" u “kontenut domestiku” li fil-prattika jxekklu sew il-kumpaniji tal-UE biex jaċċessaw is-suq tal-Istati Uniti, b’mod speċjali fis-settur tat-tħammil u l-inġinerija;

14. Ifakkar lill-Kummissjoni dwar l-importanza li żżomm il-livelli attwali għolja ta' sikurezza, sigurtà, protezzjoni tad-data personali u l-ftuħ tal-internet, in-newtralità u l-indipendenza, filwaqt li tilqa' l-benefiċċji potenzjali ta' aċċess għas-suq, ta' allinjament regolatorju u ta' rikonoxximent reċiproku, inkluż it-twaqqif ta' prinċipji globali komuni fi standards u speċfikazzjonijiet tekniċi fil-qasam tal-ICT;

15. Jitlob għal kompetizzjoni miftuħa fl-iżvilupp tal-ekonomija diġitali, li min-natura tagħha hi globali imma li għandha l-bażijiet ewlenin tagħha fl-UE u l-Istati Uniti tal-Amerika; jenfasizza li l-ekonomija diġitali trid tkun ċentrali għas-suq transatlantiku, b'lieva fl-ekonomija globali u fil-ftuħ aktar ta' swieq globali;

16. Ifakkar lill-Kummissjoni, fir-rigward ta' servizzi tas-soċjetà tal-informazzjoni u t-telekomunikazzjonijiet, li huwa ta’ importanza partikolari li t-TTIP tiżgura kundizzjonijiet ekwi flimkien ma’ aċċess ugwali u trasparenti abbażi tar-reċiproċità għall-kumpaniji tas-servizzi tal-UE lejn is-suq tal-Istati Uniti u b’obbligu fuq il-fornituri tas-servizzi tal-Istati Uniti biex jirrispettaw u jikkonformaw mal-istandards tal-industrija relevanti kollha u tas-sikurezza tal-prodott u tad-drittijiet tal-konsumaturi, meta jipprovdu servizzi fl-Ewropa jew lill-klijenti Ewropej.

17. Jistieden lill-Kummissjoni, bil-ħsieb li tiġi evitata r-rilokazzjoni bl-ingrossa tas-setturi tal-manifattura tal-UE u t-telf massiv ta’ impjiegi fl-Istati Membri, twettaq analiżi komparattiva tal-kompetittività tas-setturi tal-manifattura tal-UE u tal-kontropartijiet tagħhom fl-Istati Uniti;

18. Jitlob li l-kapitolu rigward id-drittijiet tal-proprjetà intellettwali jiddisponi wkoll għal protezzjoni u rikonoxximent msaħħa tal-Indikazzjonijiet Ġeografiċi Ewropej;

19. Jistieden lill-Kummissjoni tiggarantixxi l-validità tal-Indikaturi Ġeografiċi (GI) kollha bħala parti mill-ftehim TTIP, inklużi l-prodotti mhux agrikoli; ifakkar lill-Kummissjoni fil-valur ekonomikament vitali u ogħla li jġib miegħu l-istatus ta’ GI.

RIŻULTAT TAL-VOTAZZJONI FINALI FIL-KUMITAT

25.3.2015

OPINJONI TAL-KUMITAT GĦAS-SUQ INTERN U L-ĦARSIEN TAL-KONSUMATUR

għall-Kumitat għall-Kummerċ Internazzjonali

dwar ir-rakkomandazzjonijiet lill-Kummissjoni Ewropea dwar in-negozjati għas-Sħubija Trans-Atlantika ta' Kummerċ u ta' Investiment (TTIP)

(2014/2228(INI))

Rapporteur għal opinjoni: Dita Charanzová

SUĠĠERIMENTI

Il-Kumitat għas-Suq Intern u l-Ħarsien tal-Konsumatur jistieden lill-Kumitat għall-Kummerċ Internazzjonali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

Jindirizza, fil-kuntest tan-negozjati li għaddejjin dwar it-TTIP, ir-rakkomandazzjonijiet li ġejjin lill-Kummissjoni:

(a) rigward il-prijoritajiet ta' politika

i.   biex jiġi żgurat li l-eżitu prinċipali tan-negozjati jkun ftehim ambizzjuż u komprensiv, li joħloq opportunitajiet ġodda sinifikanti ta’ aċċess għas-suq għall-kumpaniji tal-UE, b’mod partikolari l-SMEs, u benefiċċji għaċ-ċittadini, il-konsumaturi u l-ħaddiema filwaqt li jinżamm il-mudell Ewropew ta’ ekonomija tas-suq soċjali kompetittiva ħafna;

ii.   biex jiġi żgurat li l-Ftehim mhux biss ineħħi l-ostakli iżda jkollu wkoll l-għan li jippromwovi u jissalvagwardja l-livell għoli Ewropew ta’ ħarsien tal-konsumatur imħaddan fit-TFUE, b’mod partikolari fir-rigward tal-informazzjoni, u sabiex wieħed iżomm f’moħħu li f’ħafna setturi l-istandards tal-UE u dawk tal-Istati Uniti u l-ambjenti regolatorji tagħhom jiżguraw dan il-livell għoli; biex jitqies, għalhekk, li l-approssimazzjoni tar-regolamenti tagħna għandha sservi biex jiġu stabbiliti liġijiet u standards ta’ kwalità għolja li jistgħu jiffurmaw punt ta’ riferiment globali ġdid u standards internazzjonali de facto;

iii.  biex jinżamm l-ogħla livell possibbli ta’ trasparenza tan-negozjati, inkluż l-aċċess għat-testi tan-negozjati, u konsultazzjoni mas-soċjetà ċivili tul il-proċess kollu;

(b) rigward aċċess sħiħ u trasparenti għall-fornituri tas-servizzi tal-UE – ebda xkiel għall-mobbiltà tal-professjonisti

i.   sabiex issir insistenza, filwaqt li tiġi rispettata l-libertà tal-Istati Membri li jipprovdu, jikkummissjonaw u jiffinanzjaw is-servizzi pubbliċi b'konformità mat-Trattati, li l-fornituri tas-servizzi tal-UE għandu jkollhom aċċess sħiħ għas-suq għas-servizzi liberalizzati fl-Istati Uniti, skont regoli trasparenti, reċiproċi u ġusti kemm fil-livelli federali kif ukoll f’dawk subfederali u fuq l-istess livell tal-fornituri tas-servizzi lokali;

ii.   biex jiġi żgurat li l-Ftehim ma jipperikolax il-kwalità għolja tas-servizzi pubbliċi tal-UE u biex jintużaw l-istess miżuri ta’ salvagwardja u definizzjonijiet li jinsabu fi ftehimiet ta’ kummerċ ħieles (FTAs) oħrajn, bħas-CETA, biex ikunu protetti, b’mod partikolari fil-każ tas-servizzi tas-saħħa, tal-edukazzjoni u soċjali, il-produzzjoni, id-distribuzzjoni u t-trattament tal-ilma u miżuri ta’ gvernijiet lokali u awdjoviżivi ffinanzjati b’mod pubbliku;

iii.  biex jiġi żgurat ir-rikonoxximent reċiproku tal-kwalifiki professjonali bejn il-Partijiet, b'mod partikolari permezz tal-ħolqien ta’ qafas ġuridiku bi stati federali li jkollhom setgħat regolatorji f’dan il-qasam, u biex tiġi promossa l-mobbiltà min naħa għall-oħra tal-Atlantiku permezz tal-faċilitazzjoni tal-viża għall-professjonisti mill-Istati Membri kollha tal-UE fis-setturi koperti bil-Ftehim;

iv.  biex jiġi promoss, b’mod parallel man-negozjati, li l-Partijiet jidħlu f’diskussjonijiet lejn ftehim addizzjonali li jneħħi r-rekwiżiti tal-permess tax-xogħol, sabiex tinħoloq il-mobbiltà massima tal-professjonisti bejn il-Partijiet;

(c) rigward l-akkwist ġust u trasparenti fil-livelli kollha

i.   biex jittieħed approċċ ambizzjuż fir-rigward tal-kapitolu dwar l-akkwist pubbliku u biex jiġi żgurat li l-operaturi ekonomiċi Ewropej, b’mod partikolari l-SMEs, ikunu jistgħu jipparteċipaw, fis-suq tal-Istati Uniti fuq bażi mhux diskriminatorja fi kwalunkwe livell tal-gvern; biex jiġi żgurat aċċess reċiproku u trasparenti bi tpattija għas-sitwazzjoni asimmetrika eżistenti u biex tiġi eżaminata l-possibbiltà li l-kumpaniji tal-UE jingħataw eżenzjonijiet minn klawżoli ta’ xiri nazzjonali u lokali fil-liġi federali, u fejn possibbli, f'dik tal-istat;

     biex jiġi żgurat li d-direttivi l-ġodda tal-akkwist pubbliku u l-konċessjonijiet jiġu osservati fin-negozjati, b’mod partikolari rigward id-definizzjoni tal-kooperazzjoni pubblika-pubblika, l-esklużjonijiet, l-aċċess tal-SMEs u l-użu tal-kriterji tal-aktar offerta ekonomikament vantaġġuża (MEAT);

iii.  biex jiġi ċċarat li d-dritt tal-għażla dwar il-forma tal-provvista tas-servizzi mhux se jintmess u li l-"klawżola-ratchet" stabbilita fil-kapitolu dwar is-servizzi, għalhekk, ma tistax tiġi applikata għal servizzi mogħtija mill-awtorità kontraenti lil parti terza privata permezz ta’ kuntratt pubbliku u pprovduti wara l-iskadenza tal-kuntratt minn dik l-awtorità bħala tranżazzjonijiet interni jew għan-nom proprju;

iv.  biex isir progress fuq l-eżitu tal-Ftehim dwar l-Akkwisti Pubbliċi (GPA) f’termini ta’ kopertura, regoli u dixxiplini u li l-proċeduri jiġu ssimplifika filwaqt li jsir provvediment għal aktar trasparenza;

v.  fir-rigward tal-fatt li l-akkwist pubbliku jirrappreżenta parti sostanzjali tal-ekonomiji tal-UE u ta’ sħab kummerċjali oħra u għalhekk huwa interess ekonomiku prinċipali għall-UE, li jiġi enfasizzat li għandu jkun parti minn kwalunkwe ftehim finali komprensiv;

(d) rigward l-istandards transatlantiċi bħala standards globali

i.   biex jiġi enfasizzat li, filwaqt li jissalvagwardja l-protezzjoni miksuba bl-istandards u r-regolamenti tekniċi tal-UE, il-Ftehim għandu jmur lil hinn mill-Ftehim dwar l-Ostakli Tekniċi għall-Kummerċ tad-WTO, f’oqsma bħalma huma l-evalwazzjoni tal-konformità, l-istandards jew ir-rekwiżiti tekniċi, u għandu jipprovdi wkoll għal trasparenza ikbar fil-preparazzjoni, l-adozzjoni u l-applikazzjoni tar-regolamenti u l-istandards tekniċi;

ii.   għal dan l-għan, sabiex jiġi żgurat li l-kumpaniji Ewropej ikunu kapaċi jikkonsultaw punt ta’ informazzjoni wieħed tal-Istati Uniti li jkun jista’ jipprovdi informazzjoni dwar l-istandards fis-setturi kollha; biex titħares bis-sħiħ il-ħidma tal-UE fl-istandardizzazzjoni u biex jiġu promossi l-prinċipji tagħha, jiġifieri l-koerenza, it-trasparenza, lil-ftuħ, il-kunsens, l-applikazzjoni volontarja, l-indipendenza minn interessi speċjali u l-effiċjenza;

iii.  biex jitwaqqaf mekkaniżmu ta’ kooperazzjoni u djalogu ambizzjuż u effikaċi bl-għan li jinħolqu standards komuni fejn ikun possibbli, u biex jiġi żgurat li ma jkun hemm l-ebda diverġenza mhux intenzjonata fi standards futuri f’setturi ewlenin koperti bil-Ftehim bil-fehma li tali standards, speċjalment f'oqsma innovattivi, għandhom jiġu maqbula u promossi fil-fora internazzjonali kollha; biex jitqiesu l-isfidi li jirriżultaw mill-allinjament tas-sistema ta’ standardizzazzjoni, motivata u strutturata diversament, tal-Istati Uniti mal-mekkaniżmu Ewropew;

iv.  biex jiġi enfasizzat li l-istandards tal-ISO u l-IEC maqbula internazzjonalment, meta dawn ikunu jeżistu u jkunu aġġornati, għandhom jiġu adottati mill-Istati Uniti u l-UE, pereżempju fis-settur tat-tagħmir elettroniku;

(e) rigward it-tneħħija darba għal dejjem tal-ostakli tekniċi għall-kummerċ transatlantiku

i.   bl-għan li jkompli jiġi garantit livell għoli ta’ sikurezza tal-prodotti fi ħdan l-Unjoni filwaqt li tiġi eliminata d-duplikazzjoni żejda tal-ittestjar li tikkawża ħela ta’ riżorsi, b’mod partikolari fir-rigward tal-prodotti b’riskju baxx; biex jiġi żgurat ir-rikonoxximent mill-Istati Uniti tal-awtodikjarazzjoni tal-konformità fuq il-prodotti, fejn dan huwa permess mil-liġi tal-UE;

ii.   biex jiġu appoġġati, b’rispett sħiħ għall-awtonomija regolatorja, l-istabbiliment ta’ djalogu strutturali obbligatorju, il-kondiviżjoni tal-aħjar prattiki regolatorji u l-kooperazzjoni bejn ir-regolaturi fis-setturi koperti bil-Ftehim; biex jiġi enfasizzat li dan għandu jinvolvi mekkaniżmi ta’ twissija bikrija u skambju fiż-żmien ta’ tħejjija tar-regolamenti; biex tiġi mħeġġa l-kooperazzjoni regolatorja aħjar f’setturi oħra u biex tiġi promossa s-sistema ta’ sorveljanza tas-suq tal-UE bil-ħsieb li jiġu żgurati standards għolja ta’ protezzjoni tal-konsumatur;

iii.  biex isir sforz ħalli jiġi żgurat li l-koperazzjoni regolatorja ma żżidx il-piż amministrattiv filwaqt li wieħed iżomm f’moħħu li d-diverġenzi regolatorji huma ostakolu non-tariffarji (ONT) għall-kummerċ, b’mod partikolari fis-settur tal-inġinerija, li jinkludi l-makkinarju elettriku u mekkaniku, apparat u tagħmir, u li r-regolaturi għandhom jesploraw modi biex jippromwovu l-kompatibbiltà u s-simetrija regolatorja, bħar-rikonoxximent reċiproku, l-armonizzazzjoni jew l-allinjament tar-rekwiżiti;

iv.  biex issir insistenza dwar il-fatt li l-Ftehim irid ikun bla preġudizzju għad-dritt li ssir regolamentazzjoni skont il-livell li kull parti tqis li jkun f'loku rigward il-protezzjoni tas-saħħa, is-sikurezza, il-konsumaturi, il-ħaddiema, l-ambjent kif ukoll id-diversità kulturali; f’dan il-kuntest, biex ikun hemm insistenza dwar l-importanza tal-prinċipju ta’ prekawzjoni kif stabbilit fl-Artikolu 191 tat-TFUE; biex jiġi enfasizzat li l-kooperazzjoni regolatorja għandha tkun trasparenti u li l-Parlament Ewropew għandu jikkontribwixxi għall-ħidma tal-istituzzjonijiet futuri;

v.  biex jitfakkar li r-rikonoxximent tal-ekwivalenza tal-akbar għadd possibbli ta’ regolamenti dwar is-sikurezza tal-vettura huwa waħda mill-kisbiet l-aktar importanti tal-Ftehim u li dan se jirrikjedi li jiġi vverifikat li r-regolamenti tal-UE u tal-Istati Uniti jipprovdu għal livell simili ta’ protezzjoni mingħajr ma jonqos il-livell ta’ protezzjoni fl-UE; biex jiġi enfasizzat li dan għandu jkun pass lejn konverġenza regolatorja sħiħa fis-settur; biex jiġi nnutat li, minkejja dan, speċjalment fil-qasam tas-sikurezza tal-karozzi, hemm ħafna differenzi bejn il-prodotti tal-Istati Uniti u dawk tal-UE, u biex jitħeġġeġ it-tisħiħ tal-koperazzjoni bejn l-UE u l-Istati Uniti fil-qafas tal-Kummissjoni Ekonomika għall-Ewropa tan-Nazzjonijiet Uniti (UNECE), speċjalment fir-rigward ta' teknoloġiji ġodda, kif ukoll f’fora internazzjonali oħrajn fejn jiġu ffissati l-istandards;

(f) rigward il-faċilitazzjoni doganali u kummerċjali, b’mod partikolari għall-SMEs

i.   minħabba li l-SMEs huma affettwati b’mod sproporzjonat mill-ONT, li l-Ftehim għandu jfittex li jnaqqashom jew jeliminahom kompletament, biex jitħeġġeġ l-istabbiliment ta' qafas koerenti, bl-inklużjoni ta' kapitolu speċifiku li jippermetti li l-SMEs iqajmu l-kwistjonijiet tal-ONT mal-awtoritajiet xierqa;

ii.   biex jiġi żgurat li l-Ftehim jagħmilha aktar faċli biex l-SMEs jipparteċipaw fil-kummerċ transatlantiku u jnaqqsu l-ispejjeż, permezz tal-modernizzazzjoni, id-diġitalizzazzjoni u s-simplifikazzjoni tal-proċeduri, bl-eliminazzjoni tar-rekwiżiti ta' ċertifikazzjoni doppja u biż-żieda tal-livell limitu de minimis għad-dazji doganali u l-kontrolli mhux aleatorji;

iii.  biex tiġi appoġġata bis-sħiħ l-idea tal-ħolqien, fuq l-istess linji ta' dik li teżisti fl-UE, helpdesk onlajn tal-Istati Uniti għall-SMEs fejn id-ditti ta' daqs iżgħar ikunu jistgħu jsibu l-informazzjoni kollha li jeħtieġu biex jesportaw lejn, jimpurtaw minn jew jinvestu fl-Istati Uniti, inkluż dwar id-dazji doganali, dwar it-taxxi, dwar ir-regolamenti, dwar il-proċeduri doganali u dwar l-opportunitajiet tas-suq;

iv.  biex jiġu indirizzati kwistjonijiet doganali li jmorru lil hinn mir-regoli tal-Ftehim tal-Faċilitazzjoni tal-Kummerċ (TFA) tal-WTO u jiġi enfasizzat li, sabiex tinkiseb it-tneħħija reali tal-piż amministrattiv, hemm bżonn li ssir ħidma lejn livell minimu ta’ allinjament regolatorju dwar il-politiki u l-prattiki doganali u dawk relatati mal-fruntieri;

(g) rigward regoli ta’ oriġini ċari

i.   biex jiġu stabbliti regoli komuni għad-definizzjoni tal-oriġini tal-prodotti, li għandhom ikunu ċari u faċilment applikabbli għan-negożju, u biex jitqiesu t-tendenzi attwali u futuri fil-produzzjoni, kif ukoll kumulazzjoni possibbli futura ma’ pajjiżi li l-Partijiet għandhom ftehim ta’ kummerċ ħieles magħhom.

ii.   biex jiġi garantit li l-Ftehim jinkludi dispożizzjonijiet li jwaqqfu l-użu illegali tad-denominazzjonijiet tal-UE tal-indikazzjonijiet ġeografiċi, li jiżgwida lill-konsumaturi, u għas-salvagwardja ta’ dawn l-iskemi, li kkontribwixxew b’mod sostanzjali għall-protezzjoni tal-konsumatur u l-għoti ta’ informazzjoni ċara u konċiża dwar l-oriġini tal-prodott; biex in-negozjat jitqiesu bħala opportunità biex isir progress lejn standards komuni għolja fir-rigward tal-indikazzjoni obbligatorja tal-oriġini tal-prodotti li tagħti garanziji ġenwini lill-konsumaturi u toħloq sitwazzjoni ta’ kundizzjonijiet ekwi għall-operaturi ekonomiċi fir-rigward tal-aċċess għaż-żewġt iswieq.

RIŻULTAT TAL-VOTAZZJONI FINALI FIL-KUMITAT

16.4.2015

OPINJONI TAL-KUMITAT GĦALL-AGRIKOLTURA U L-IŻVILUPP RURALI

għall-Kumitat għall-Kummerċ Internazzjonali

dwar Rakkomandazzjonijiet lill-Kummissjoni Ewropea dwar in-negozjati għas-Sħubija Trans-Atlantika ta' Kummerċ u ta' Investiment

(2014/2228(INI))

Rapporteur għal opinjoni: Paolo De Castro, James Nicholson

SUĠĠERIMENTI

Il-Kumitat għall-Agrikoltura u l-Iżvilupp Rurali jistieden lill-Kumitat għall-Affarijiet Barranin, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

A. billi s-settur agrikolu tal-UE huwa sensittiv ħafna u parti essenzjali min-negozjati tat-TTIP u se jibbenefikaw minn opportunitajiet ta’ aċċess għas-suq ġdid jew miżjud;

B.  billi ostakolu kbir għall-kummerċ agroalimentari bejn l-UE u l-Istati Uniti, u wieħed li jagħmel il-kummerċ f’ċerti oġġetti impossibbli, huwa n-nuqqas ta’ standards komuni f’dan il-qasam;

C. billi l-konsegwenzi tal-embargo Russu wera b’mod ċar ir-relevanza ġeopolitika kontinwa tal-agrikoltura, l-importanza li jingħata aċċess għal firxa ta’ swieq agrikoli differenti u l-ħtieġa ta' sħubiji kummerċjali strateġiċi u b'saħħithom ma’ sħab kummerċjali affidabbli;

D. billi negozjati kummerċjali mal-Istati Uniti huma opportunità kbira biex jitjieb l-aċċess tal-Istati Uniti għal ċerti prodotti ta’ esportazzjoni tal-UE, bħal frott u ħaxix, inbid, u ċerti prodotti b’valur miżjud għoli;

E.  billi t-TTIP hija opportunità biex jittaffew il-piżijiet regolatorji reċiproċi li jxekklu bla bżonn il-kummerċ, billi tipprovdi aktar informazzjoni trasparenti bħad-dettalji li għandhom jiġu inklużi fuq it-tikketta, biex jiġu ċċarati l-proċeduri amministrattivi u doganali u biex tallinja reġimi u tissimplifika reġimi regolatorji fejn dan ikun fattibbli;

F.  billi huwa importanti għall-agrikoltura Ewropea li jiġi żgurat ftehim kummerċjali ta’ benefiċċju reċiproku mal-Istati Uniti sabiex tavvanza l-pożizzjoni tal-Ewropa bħala attur ewlieni fis-suq globali mingħajr ma jipperikola l-istandards ta’ kwalità attwali tal-prodotti agrikoli Ewropej u t-titjib futur ta’ dawk l-istandards, filwaqt li jippreserva l-mudell agrikolu Ewropew u tiġi żgurata l-vijabbiltà ekonomika u soċjali tiegħu;

G. billi t-TTIP hija opportunità biex jiġu stabbiliti standards globalment għoljin u biex jiġu ssupplimentati standards fiż-żewġ kontinenti, speċjalment fi żminijiet fejn atturi ekonomiċi ġodda li m’għandhomx l-istess impenn tal-UE jew tal-Istati Uniti għal kummerċ ibbażat fuq ir-regoli, livelli għolja ta’ protezzjoni tal-konsumaturi, standards ambjentali u benessri tal-annimali qed jiżdiedu fl-iskala;

H. billi l-Kummissjoni tat assigurazzjonijiet li r-rispett, għas-sigurtà tal-ikel, is-saħħa tal-bnedmin, tal-pjanti u tal-annimali, il-benesseri tal-annimali, u l-istandards ta’ protezzjoni ambjentali u tal-konsumaturi se jkunu prinċipju fundamentali u bla kompromessi tan-negozjati għall-agrikoltura Ewropea u se jikkonfermaw u jsaħħu l-istandards tal-UE fi ħdan sistema politika miftuħa, ġusta, moderna u globali;

I.   billi l-ostakoli ewlenin għall-kummerċ bejn l-UE u l-Istati Uniti fi prodotti agrikoli u tal-ikel huma kwistjonijiet ta’ wara l-fruntieri ta’ regolamentazzjoni interna u ostakoli mhux tariffarji;

J.   billi n-negozjati TTIP għandhom jagħtu prijorità lill-interessi tal-konsumatur;

K. billi l-armonizzazzjoni ta’ regoli tal-UE u l-Istati Uniti m’għandha, taħt l-ebda ċirkustanza, tipperikola s-saħħa tal-konsumatur jew tnaqqas l-istandards ta’ kwalità li għandhom jiġu ssodisfati minn prodotti tal-Istati Uniti mqiegħda fis-suq Ewropew;

L.  billi l-indikazzjonijiet ġeografiċi huma drittijiet ta’ proprjetà intellettwali indipendenti u mhux xi speċi ta’ ditta;

M. billi, grazzi għal avvanzi fir-riċerka, l-iżvilupp ta’ valutazzjonijiet ex-ante ta’ riskji relatati mal-ħsara tal-ikel jista’ jiġi appoġġjat bl-użu ta’ metodi tal-komputazzjoni avvanzati bbażati fuq l-analiżi ta’ volumi kbar ta’ dejta u appoġġjati minn strutturi tal-informatika bi prestazzjoni għolja li jkunu kapaċi jtejbu l-applikazzjoni tal-prinċipju ta’ prekawzjoni;

1.  Jistieden lill-Kummissjoni biex:

a. tiżgura li kull ftehim milħuq ikun globali u bbilanċjat u jkopri s-setturi kollha li jaqgħu taħt it-TTIP, filwaqt li wieħed iżomm f’moħħu li l-agrikoltura m’għandhiex tintuża bħala pedina fin-negozjati għal sforzi biex jiġi żgurat l-aċċess għas-suq tal-Istati Uniti għal setturi oħra u li l-agrikoltura tkun kwistjoni politika li tkun ferm strateġika, li fuqha jiddependu s-sigurtà tal-ikel u l-istil ta’ ħajja tal-Ewropej kollha;

b. tipprijoritizza riżultat ambizzjuż u bbilanċjat tan-negozjati għall-agrikoltura, settur li l-komponenti ewlenin (l-aċċess għas-suq, l-indikazzjonijiet ġeografiċi u l-miżuri sanitarji u fitosanitarji) għandhom jiġu ttrattati kmieni, fuq il-bażi ta’ mappa dettaljata tal-ostakoli rilevanti kollha tal-Istati Uniti, u b’mod parallel fil-proċess tan-negozjati, filwaqt li żżomm standards tas-sikurezza tal-ikel u l-protezzjoni tal-konsumatur, sabiex il-Parlament jingħata biżżejjed żmien u ċarezza biex jiddiskuti u jevalwa dan il-kapitolu mal-partijiet interessati, maċ-ċittadini Ewropej, mas-soċjetà ċivili u mas-sħab soċjali, b'attenzjoni mogħtija b’mod partikolari lill-bdiewa u l-azjendi ż-żgħar ġestiti minn familji;

c. tistabbilixxi mekkaniżmu ta' Soluzzjoni tat-Tilwim bejn l-Investitur u l-Istat (ISDS) moderna u mtejba fit-TTIP, li m’għandhiex iddgħajjef id-drittijiet sovrani tal-UE, l-Istati Membri, u l-awtoritajiet reġjonali u lokali, iżda tipprovdi opportunità ġusta għal investituri barranin biex tfittex u tikseb rimedju għall-ilmenti;

d. timpenja ruħha bis-sod għall-preservazzjoni stretta ta’ standards attwali u futuri dwar is-sikurezza alimentari u s-saħħa tal-bniedem, is-saħħa tal-pjanti u tal-uċuħ tar-raba’ u l-protezzjoni ambjentali, il-protezzjoni tal-konsumatur u s-saħħa u l-benessri tal-annimali, kif definit skont il-leġiżlazzjoni tal-UE; tiżgura li t-titjib ta’ dawn l-istandards ma jkun bl-ebda mod imfixkel fil-futur, li l-valuri fundamentali tal-UE, bħalma hu l-prinċipju ta' prekawzjoni u l-biedja sostenibbli ma jiġux mhedda, u li ċ-ċittadini tal-UE jkunu jistgħu jkomplu b'fiduċja fit-traċċabilità u t-tikkettar ta’ prodotti fis-suq tal-UE; u tiddefinixxi miżuri speċifiċi li jirrispettaw il-prinċipju ta’ prekawzjoni fin-negozjati;

e. tiżgura, għalhekk, li l-awtoritajiet kompetenti tal-UE jkunu involuti fil-kontroll u l-verifika tal-istabbilimenti, faċilitajiet u prodotti eliġibbli għall-esportazzjonijiet lejn l-UE fir-rigward tar-rekwiżiti sanitarji jew fitosanitarji applikabbli fl-Istati Uniti, u jesprimi tħassib dwar il-proposta testwali tal-Kummissjoni lill-Istati Uniti f’dan ir-rigward, filwaqt li wieħed iżomm f’moħħu li, fi ftehimiet kummerċjali preċedenti tal-UE, l-UE żammet il-kapaċità li tawditja u tivverifika l-programm ta’ kontroll ta’ partijiet oħra tal-ftehimiet, u jappella lill-Kummissjoni biex iżżomm dan l-approċċ;

f.  tagħmel kull sforz biex l-importazzjonijiet agrikoli jitħallew jidħlu fl-UE biss jekk dawn ikunu ġew prodotti b'mod konsistenti mal-istandards Ewropej dwar il-ħarsien tal-konsumatur, tal-benessri tal-annimali u tal-ambjent u l-istandards soċjali minimi;

g. iżżomm f’moħħha li n-negozjati tat-TTIP ma jistgħux, fihom infushom, ibiddlu l-implimentazzjoni tal-leġiżlazzjoni jew il-proposti għaliha fi kwalunkwe qasam, inkluż is-sikurezza tal-ikel Ewropea, l-istandards SPS, miżuri dwar il-benessri tal-annimali u dawk ambjentali;

h. tiżgura eżitu finali pożittiv u ambizzjuż tan-negozjati għall-agrikoltura, b’mod li jirrifletti kemm l-interessi offensivi u difensivi tas-settur agrikolu tal-UE dwar it-tneħħija jew it-tnaqqis tal-ostakli tariffarji u dawk non-tariffarji, inkluż b’mod partikolari l-istandards sanitarji u fitosanitarji u l-proċeduri, l-iżgurar ta’ pożizzjoni b’saħħitha għal prodotti Ewropej ta’ kwalità għolja sabiex il-produtturi tal-UE jagħmlu qligħ reali f’termini ta’ aċċess għas-suq tal-Istati Uniti, u jikkunsidraw li l-miżuri għall-protezzjoni tal-konsumaturi u s-saħħa tagħhom jew għaż-żamma tas-sikurezza tal-ikel m’għandhomx jitqiesu bħala ostakoli mhux tariffarji;

i.  tinkoraġġixxi l-iskambju ta’ għarfien bejn iż-żewġ naħat rigward is-sikurezza u s-sigurtà tal-ikel;

j.  tinnegozja skema flessibbli għal kontrolli tas-saħħa tal-pjanti għall-esportazzjonijiet Ewropej li tkun tirrispetta l-istandards ta’ sikurezza mingħajr ma ssir ħsara lill-esportazzjonijiet Ewropej lejn is-suq tal-Istati Uniti u b’hekk għal żieda fl-esportazzjonijiet għall-Istati Uniti;

k. tiggarantixxi kundizzjonijiet ekwi, billi tħeġġeġ politiki fiskali ġusti u prattiki tal-kummerċ għall-prodotti tal-ikel u billi tittratta bħala sensittivi dawk il-prodotti jew setturi li għalihom il-kompetizzjoni diretta u indiretta tesponi lill-produtturi agrikoli tal-UE, inkluż il-bdiewa fuq skala żgħira, kemm fl-UE kollha kemm hi kif ukoll f’reġjuni individwali tagħha, għal pressjoni eċċessiva jew kompetizzjoni inġusta, pereżempju f’każijiet fejn il-kundizzjonijiet regolatorji u l-ispejjeż relatati ta’ produzzjoni fl-UE, bħal rekwiżiti ta’ akkomodazzjoni tal-annimali, jvarjaw minn dawk fl-Istati Uniti, u jikkunsidraw l-għażliet kollha possibbli għal trattament tal-prodotti sensittivi kollha, inkluż tnaqqis tariffarju u l-kwoti tar-rati tariffarji limitati;

l.  tagħmel kull sforz sabiex ikollhom klawżola ta’ salvagwardja inkorporata fil-ftehim, kif huwa stabbilit b’mod ċar fil-mandat tan-negozjar, li tista' tiġi invokata fejn żieda fl-importazzjonijiet ta’ prodott partikolari thedded li tikkawża ħsara serja għall-produzzjoni tal-ikel domestiku;

m. tippreżenta, kif diġà mitlub minn diversi Stati Membri, sommarju ta’ konċessjonijiet mogħtija fi ftehimiet kummerċjali li diġà ġew konklużi u f’dawk li qed jiġu nnegozjati, b’tali mod li tkun tista' tinkiseb ħarsa ġenerali ta’ dawn il-konċessjonijiet għal kull prodott, li mingħajrhom huwa impossibbli li tinnegozja dwar prodotti sensittivi;

n. tinforma lill-Parlament u lill-pubbliku malajr kemm jista’ jkun dwar lista potenzjali ta’ prodotti sensittivi sabiex il-partijiet interessati kollha jkollhom biżżejjed żmien biex jikkunsidraw u jevalwaw il-proposti mill-aktar fis possibbli u qabel it-tmiem tan-negozjati;

o. tiżgura protezzjoni legali xierqa fis-suq tal-Istati Uniti għal indikazzjonijiet ġeografiċi tal-UE u l-kwalità tal-prodotti agrikoli tal-UE, u miżuri li jittrattaw l-użu mhux xieraq u l-informazzjoni u l-prattiki qarrieqa, u tiżgura protezzjoni fir-rigward tat-tikkettar, it-traċċabbiltà u l-oriġini ġenwina tal-prodotti agrikoli bħala element essenzjali ta’ ftehim ibbilanċjat;

p. tinkludi fit-TTIP il-ftehim dwar prodotti organiċi, estiżi għal dawk li mhumiex diġà koperti (inbid);

q. tinkorpora l-ftehim tal-inbid tal-2006 bejn l-UE u l-Istati Uniti fit-TTIP, filwaqt li tħassar is-17-il isem semi-ġeneriċi li jinsabu f’dak il-ftehim settorjali;

r.  tqis il-fatt li l-appoġġ għad-dħul tal-farms tal-Istati Uniti fi żminijiet ta’ volatilità tal-prezzijiet globali jista’ jpoġġi lill-bdiewa tal-UE fi żvantaġġ kompetittiv u li l-miżuri għall-ġestjoni tal-kriżi tal-UE għandhom jiġu evalwati mill-ġdid sabiex jirriflettu kundizzjonijiet tas-suq li qed jinbidlu;

s.  toħloq kumitat ta’ ħidma konġunt bilaterali għad-diskussjonijiet dwar il-kummerċ permanenti dwar l-agrikoltura sabiex jantiċipa u jelimina l-ostakoli kummerċjali permezz ta’ sistema ta’ twissija bikrija f’każ ta’ żviluppi regolatorji u jippromwovi konverġenza regolatorja;

t.  timpenja ruħha b’mod kompletament trasparenti, f’waqtu u b’mod komprensiv mal-Parlament Ewropew, il-parlamenti nazzjonali kollha u l-partijiet interessati fl-agrikoltura dwar l-aspetti kollha tan-negozjati, u tiżgura l-konformità mal-leġiżlazzjoni kollha li fuqhom huwa bbażat il-mudell agrikolu u soċjali Ewropew tagħna;

u. tiżgura li titneħħa l-projbizzjoni tal-Istati Uniti fuq l-importazzjonijiet taċ-ċanga mill-UE;

v. tiżgura kundizzjonijiet ekwi billi tintroduċi rekwiżit ta’ tikkettar għal prodotti importati li huma manifatturati b'metodi li ma jikkonformawx mal-istandards tal-UE dwar il-benessri tal-annimali, is-sikurezza tal-ikel, u s-saħħa tal-bnedmin u tal-annimali;

w. tippreżenta mingħajr dewmien studju ċar u oġġettiv dwar l-impatt tat-TTIP fuq l-agrikoltura Ewropea, settur b’settur, b’mod partikolari l-impatt tagħha fuq farms żgħar immexxija mill-familji, u timpenja ruħha b’mod trasparenti u f’waqtu mal-istituzzjonijiet ta’ riċerka, kemm pubbliċi kif ukoll privati, li jaħdmu fil-qasam tas-sikurezza tal-ikel u li jistgħu jipprovdu input konsiderevoli fl-aspetti kollha tan-negozjati.

RIŻULTAT TAL-VOTAZZJONI FINALI FIL-KUMITAT

17.4.2015

OPINJONI TAL-KUMITAT GĦALL-KULTURA U L-EDUKAZZJONI

għall-Kumitat għall-Kummerċ Internazzjonali

dwar rakkomandazzjonijiet lill-Kummissjoni Ewropea dwar in-negozjati għas-Sħubija Trans-Atlantika ta' Kummerċ u ta' Investiment (TTIP)

(2014/2228(INI))

Rapporteur għal opinjoni: Helga Trüpel

SUĠĠERIMENTI

Il-Kumitat għall-Kultura u l-Edukazzjoni jistieden lill-Kumitat għall-Kummerċ Internazzjonali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

–   wara li kkunsidra l-Artikolu 167 tat-Trattat dwar il-Funzjonament tal-Unjoni Ewropea (TFUE),

–   wara li kkunsidra d-Direttivi tal-UE għan-negozjar fuq Sħubija Trans-Atlantika ta’ Kummerċ u ta’ Investiment bejn l-UE u l-Istati Uniti adottati mill-Kunsill fl-14 ta’ Ġunju 2013, li saru pubbliċi mill-Kunsill fid-9 ta’ Ottubru 2014,

A. jirrikonoxxi l-impenn legali tal-UE għall-Konvenzjoni tal-UNESCO dwar il-Ħarsien u l-Promozzjoni tad-Diversità tal-Espressjonijiet Kulturali tal-2005;

B.  filwaqt li jfakkar li, skont l-Artikolu 167 tat-TFUE, l-Unjoni għandha tqis fl-azzjoni tagħha l-aspetti kulturali skont dispożizzjonijiet oħra tat-Trattati, sabiex tiġi rrispettata u promossa d-diversità tal-kulturi; filwaqt li jfakkar li dawn id-dispożizzjonijiet l-oħra jinkludu l-politika kummerċjali komuni kif definita fl-Artikolu 207 tat-TFUE;

C.  filwaqt li jafferma mill-ġdid li d-dispożizzjonijiet u l-politiki eżistenti u futuri b’appoġġ tas-settur kulturali, b’mod partikolari fid-dinja diġitali huma barra mill-kamp ta’ applikazzjoni tan-negozjati tat-TTIP;

D.  filwaqt li jirrikonoxxi r-rwol speċjali tas-servizzi ta' interess ġenerali – b'mod partikolari fl-edukazzjoni – kif definit fl-Artikolu 14 tat-TFUE u fil-Protokoll Nru.26 mehmuż mat-TFUE;

E.  filwaqt li jirrikonoxxi li d-diversità kulturali hija karatteristika tal-UE minħabba l-istorja tal-Ewropa, il-varjetà rikka tagħha ta’ tradizzjonijiet u industriji kulturali u kreattivi b’saħħithom, u li l-promozzjoni tad-diversità kulturali se tibqa’ prinċipju ta’ gwida, eżatt kif kienet fi ftehimiet ta’ kummerċ oħrajn tal-UE;

F.  filwaqt li jfakkar li l-industriji kulturali u kreattivi jikkontribwixxu madwar 2.6 % tal-PDG tal-UE b’rata ta’ tkabbir ogħla mill-bqija tal-ekonomija; filwaqt li jenfasizza l-fatt li l-iżvilupp tal-kummerċ fil-prodotti u s-servizzi kulturali u kreattivi tal-industrija se jikkostitwixxi mutur importanti tat-tkabbir ekonomiku u l-ħolqien ta’ impjiegi fl-Ewropa;

G. filwaqt li jfakkar li hija prattika standard li jiġu esklużi s-sussidji, b'mod partikolari għas-setturi kulturali u edukattivi, minn ftehimiet tal-kummerċ tal-UE;

1.  Jindirizza r-rakkomandazzjonijiet li ġejjin lill-Kummissjoni:

     (a) jiġi żgurat, permezz ta’ klawżola ġenerali legalment vinkolanti applikabbli għall-Ftehim kollu kemm hu, b'konformità mal-GATS u l-Konvenzjoni tal-UNESCO dwar il-Protezzjoni u l-Promozzjoni tad-Diversità tal-Espressjonijiet Kulturali u filwaqt li jiġu għal kollox irrispettati l-prattiki tal-Istati Membri, li l-partijiet fil-ftehim jirriżervaw id-dritt li jadottaw jew iżommu kwalunkwe miżura (b’mod partikolari ta’ natura regolatorja u/jew finanzjarja) f’dak li għandu x’jaqsam mal-ħarsien jew il-promozzjoni tad-diversità kulturali u lingwistika, tal-pluraliżmu tal-midja u l-libertà tal-midja, u biex jinżammu jew jiġu żviluppati, f’konformità mal-prinċipju tan-newtralità teknoloġika, sistema għal servizzi awdjoviżivi, kemm onlajn kif ukoll offlajn, skont il-ħtiġijiet demokratiċi, soċjali u kulturali;

     (b) jiġi żgurat li l-eċċezzjoni għas-servizzi awdjoviżivi, inklużi s-servizzi onlajn, titħares għall-futur u ma għandhiex tkun tista’ tiġi ddubitata minn xi dispożizzjoni tal-ftehim futur, bħal dawk dwar l-investiment, lanqas imfixkla minn żviluppi teknoloġiċi, per eżempju l-konverġenza ta’ servizzi awdjoviżivi, tat-telekomunikazzjonijiet u tal-kummerċ elettroniku;

     (c) jitkomplew l-isforzi attwali biex tiżdied it-trasparenza, jitħeġġeġ impenn aktar mill-qrib mal-Parlament, kif ukoll l-involviment sħiħ tas-soċjetà ċivili u s-sħab soċjali minħabba l-impatt potenzjali li jkollha t-TTIP fuq il-ħajja taċ-ċittadini Ewropej;

     (d) jiġi żgurat li s-servizzi b’komponent kulturali b’saħħtu, bħal-libreriji, l-arkivji jew il-mużewijiet, ma jiġux ikkontestati mill-ftehim TTIP lill hinn mill-impenji tal-UE fi ftehimiet eżistenti;

     (e) jiġi kkonfermat li s-sistemi ta’ prezzijiet fissi tal-kotba u l-iffissar ta’ prezzijiet għall-gazzetti u r-rivisti mhux se jiġu kkontestati mill-obbligi fil-Ftehim TTIP;

     (f)  jiġi żgurat, bi klawżola ġenerali, id-dritt tal-Istati Membri tal-UE li tiġi adottata jew tinżamm kwalunkwe miżura fir-rigward tal-forniment tas-servizzi edukattivi u kulturali kollha li jaħdmu mingħajr skop ta’ qligħ u/jew jirċievu finanzjament pubbliku fi kwalunkwe grad jew appoġġ mill-Istat fi kwalunkwe forma u jiġi żgurat li l-fornituri barranin iffinanzjati privatament jilħqu l-istess kwalità u rekwiżiti ta’ akkreditament tal-fornituri domestiċi;

     (g) jiġi speċifikat li fil-Ftehim, ma hemm xejn li jaffettwa l-kapaċità tal-UE jew tal-Istati Membri tal-UE li jissussidjaw u jipprovdu appoġġ finanzjarju lill-industriji kulturali kif ukoll lis-servizzi kulturali, edukattivi, awdjoviżivi u tal-istampa;

     (h) jiġi żgurat li l-artisti tal-plastik tal-UE jirċievu perċentwal tal-prezz tal-bejgħ tax-xogħlijiet ta’ arti tagħhom meta dawn jerġgħu jinbiegħu minn professjonisti tas-suq tal-arti u b’hekk l-artisti Ewropej jiġu mħeġġa jikkummerċjalizzaw ix-xogħlijiet tagħhom fl-Istati Uniti;

RIŻULTAT TAL-VOTAZZJONI FINALI FIL-KUMITAT

4.5.2015

OPINJONI TAL-KUMITAT GĦALL-AFFARIJIET LEGALI

għall-Kumitat għall-Kummerċ Internazzjonali

dwar rakkomandazzjonijiet lill-Kummissjoni Ewropea dwar in-negozjati għas-Sħubija Trans-Atlantika ta' Kummerċ u ta' Investiment (TTIP)

(2014/2228(INI))

Rapporteur għal opinjoni: Dietmar Köster

SUĠĠERIMENTI

Il-Kumitat għall-Affarijiet Legali jistieden lill-Kumitat għall-Kummerċ Internazzjonali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

A. billi, minħabba li s-sistemi ġudizzjarji kemm fl-Unjoni Ewropea kif ukoll fl-Istati Uniti tal-Amerika jiffunzjonaw b'mod effikaċi, f'dan il-ftehim mhumiex meħtieġa mekkaniżmi għas-soluzzjoni tat-tilwim bejn l-investituri privati u l-istat (ISDS);

B.  billi l-Unjoni Ewropea u l-Istati Uniti għandhom oqfsa legali nazzjonali effiċjenti u huma rregolati mill-istat tad-dritt;

C. billi l-ftehimiet tal-kummerċ u tal-investiment internazzjonali konklużi mill-istituzzjonijiet tal-UE huma soġġetti għad-drittijiet iggarantiti mill-UE u l-prinċipji bażiċi tal-protezzjoni ta' dawk id-drittijiet fl-UE, bħalma hu l-prinċipju ta' prekawzjoni li japplika għall-protezzjoni ambjentali, tas-saħħa u tal-konsumatur;

D. billi disa' Stati Membri tal-UE kkonkludew ftehimiet bilaterali għall-ħarsien tal-investimenti mal-Istati Uniti, li jagħtu d-dritt lill-impriżi tal-Istati Uniti jfittxu bil-qorti lil dawk l-Istati Membri, u billi bosta ftehimiet bilaterali bejn l-Istati Membri tal-UE jinkludu fihom xi klawsoli dwar l-ISDS, iżda r-Regolament Nru 912/2014 jistabbilixxi li l-kuntratti ta' investiment bilaterali eżistenti, li għalihom huma partijiet l-Istati Membri, għandhom ikunu sostitwiti permezz tal-inklużjoni ta' kapitolu dwar l-investiment fit-TTIP, anki mingħajr ISDS;

E.  billi n-negozjati kkonċernati huma maħsuba biex jirriżultaw fi ftehim ambizzjuż li jipproteġi l-mudell Ewropew tal-ekonomija soċjali tas-suq, kif previst mit-Trattati tal-Unjoni Ewropea li se jkun akkumpanjat minn titjib sinifikanti għall-pubbliku, l-impjegati u l-konsumaturi kif ukoll minn ftuħ tas-suq għal impriżi bbażati fl-Unjoni Ewropea, inklużi l-SMEs;

F.  billi l-ftehmiet internazzjonali jikkostitwixxu bażi għaċ-ċertezza ġuridika u l-prevedibbiltà, u billi kien hemm bosta każijiet fejn l-UE u Stati oħra ressqu azzjoni legali kontra l-Istati Uniti taħt l-awspiċju tal-WTO minħabba li kien maħsub li l-Istati Uniti naqsu milli jaderixxu mal-obbligi internazzjonali tagħhom;

G. billi l-Artikolu 1 tat-Trattat dwar l-Unjoni Ewropea jiddikjara li: "deċiżjonijiet jittieħdu b'mod kemm jista' jkun qrib iċ-ċittadin"; billi l-Artikolu 10(3) tat-TUE jipprevedi li: "Id-deċiżjonijiet għandhom jittieħdu b'mod kemm jista' jkun miftuħ u qrib iċ-ċittadin"; billi, skont l-Artikolu 218(10) tat-Trattat dwar il-Funzjonament tal-Unjoni Ewropea, il-Parlament għandu d-dritt li "jinżamm informat immedjatament u kompletament fl-istadji kollha tal-proċedura" tul in-negozjati u mal-konklużjoni ta' ftehimiet bejn l-Unjoni u pajjiżi terzi; u billi, fid-deċiżjoni ta' għeluq tal-inkjesta fuq inizjattiva proprja tal-Ombudsman Ewropew OI/10/2014/RA, dn tal-aħħar enfasizzat il-ħtieġa għat-trasparenza fin-negozjati tat-TTIP u tal-aċċess għall-pubbliku għad-dokumenti tat-TTIP;

1.  Jindirizza r-rakkomandazzjonijiet li ġejjin lill-Kummissjoni:

     a.  Josserva li r-riżervi tal-pubbliku għandhom jiġu riflessi fin-negozjati dwar il-ftehimiet kummerċjali u ta' investiment;

     b.  Josserva li t-trattament ekwu tal-investituri lokali u barranin mhux possibbli taħt ir-riformi inkorporati fis-CETA għall-mekkaniżmi għar-riżoluzzjoni tat-tilwim bejn l-Istati u l-investituri;

     c.  Josserva li l-garanzija li l-investituri barranin jiġu trattati b'mod nondiskriminatorju u jkollhom opportunità ġusta li jfittxu u jiksbu rimedju għall-ilmenti tista' tinkiseb mingħajr l-inklużjoni fit-TTIP ta' standards dwar il-protezzjoni tal-investimenti u mekkaniżmu ta' ISDS; hu tal-fehma li ebda ftehim tat-TTIP m'għandu jinkludi standards dwar il-protezzjoni tal-investimenti u mekkaniżmu ta' ISDS għax il-livell eżistentita' protezzjoni tal-investimenti fl-UE u fl-Istati Uniti huwa suffiċjenti għalkollox biex jiggarantixxi s-sigurtà ġuridika;

     d.  Iħeġġeġ lill-Kummissjoni tagħmel aċċessibbli għall-pubbliku l-verżjonijiet tat-test ikkonsolidat li jikkombinaw il-pożizzjonijiet tal-UE u tal-Istati Uniti fir-rigward tal-abbozz ta' kapitoli u b'hekk ikun żgurat l-aċċess ugwali għall-informazzjoni għall-partijiet ikkonċernati matul l-istadji kollha tan-negozjati;

     e.  Jindika li l-mekkaniżmi eżistenti għar-riżoluzzjoni tat-tilwim għandhom lakuni serji kemm mil-lat proċedurali kif ukoll fejn tidħol is-sostanza;

     f.   Jitlob lill-Kummissjoni topponi l-inklużjoni ta' mekkaniżmu ta' ISDS fit-TTIP, fid-dawl tas-sistemi ġuridiċi żviluppati tal-UE u tal-Istati Uniti u tal-fatt li sistema għas-soluzzjoni tat-tilwim bejn stat u ieħor u l-użu tas-sistemi ġuridiċi u ġudizzjarji nazzjonali huma l-aktar għodod adegwati biex jiġi indirizzat it-tilwim dwar investiment;

     g.  Jisħaq fuq il-fatt li l-leġittimità demokratika tal-politika tal-kummerċ tal-UE jeħtieġ li tissaħħaħ; jistieden lill-Kummissjoni tqis ir-risposti għall-konsultazzjoni pubblika li wettqet, speċjalment is-97 % tar-risposti li jopponu ISDS;

     h.  Iħeġġeġ lill-Kummissjoni tiżgura li l-investituri barranin jiġu trattati b'mod nondiskriminatorju u li jkollhom opportunità ġusta li jfittxu u jiksbu rimedju għall-ilmenti, filwaqt li ma jibbenefikawx minn aktar drittijiet mill-investituri domestiċi, u jħeġġiġha wkoll topponi l-inklużjoni ta' ISDS fit-TTIP, peress li jeżistu għażliet oħra għall-infurzar tal-protezzjoni tal-investiment, bħalma huma r-rimedji domestiċi;

     i.   Jistieden lill-Kummissjoni biex, jekk jiġi adottat mekkaniżmu għas-soluzzjoni tat-tilwim, tiżgura li d-deċiżjonijiet li jkunu ttieħdu f'każijiet individwali ma jissostitwixxux id-dritt nazzjonali tal-partijiet kontraenti li jkun qiegħed fis-seħħ jew iċaħħduh mill-effikaċja tiegħu, u li l-emendi introdotti mil-leġiżlazzjoni futura - dejjem jekk din ma tkunx retroattiva - ma jkunux jistgħu jsiru kkontestati taħt tali mekkaniżmu għas-soluzzjoni tat-tilwim.

     j.   Jistieden lill-Kummissjoni tiggarantixxi li s-sistemi regolatorji stabbiliti fiż-żewġ naħat tal-Atlantiku u r-rwol tal-Parlament Ewropew fil-proċedura tat-teħid ta' deċiżjonijiet tal-UE u d-dritt tiegħu ta' skrutinju tal-proċessi regolatorji tal-UE jiġu rispettati għalkollox fil-ħolqien tal-qafas għall-kooperazzjoni futura;

     k.  Jistieden lill-Kummissjoni tagħmel ċar lis-sieħeb fin-negozjati li l-prinċipju ta' prekawzjoni huwa wieħed mill-prinċipji fundamentali tal-politika Ewropea dwar l-ambjent, is-saħħa u l-protezzjoni tal-konsumaturi u li huwa l-bażi għal negozjati immedjati u proattivi, sabiex ikunu evitati perikli għas-saħħa tal-bniedem, l-annimali u l-pjanti jew ħsarat ambjentali, u sabiex jiġi żgurat li n-negozjati ma jdgħajfux il-prinċipju ta' prekawzjoni li jopera fl-UE, b'mod partikolari fl-oqsma tal-ambjent, is-saħħa, l-ikel u l-protezzjoni tal-konsumaturi;

     l.   Jistieden lill-Kummissjoni tiżgura li l-adozzjoni tal-leġiżlazzjoni nazzjonali tkompli titwettaq esklużivament mill-entitajiet leġiżlattivi leġittimi tal-UE, li jippromwovu l-ogħla standards għall-protezzjoni taċ-ċittadini, fosthom fl-oqsma tas-saħħa, is-sikurezza, l-ambjent, id-drittijiet tal-konsumaturi u tal-ħaddiema, u s-servizzi pubbliċi ta' interess ġenerali; iqis li huwa vitali li jitħares id-dritt sovran tal-Istati Membri li jitolbu deroga għas-servizzi pubbliċi u kollettivi, bħalma huma l-ilma, is-saħħa, l-edukazzjoni, is-sigurtà soċjali, l-affarijiet kulturali, il-kwistjonijiet medjatiċi, il-kwalità tal-prodotti u d-dritt għall-awtonomija tal-awtoritajiet muniċipali u kokali, mill-ambitu tan-negozjati tat-TTIP; iħeġġeġ lill-Kummissjoni tiżgura li kwalunkwe proċedura fil-kuntest tal-kooperazjoni regolatorja tirrispetta għalkollox il-kompetenzi leġiżlattivi tal-Parlament Ewropew u tal-Kunsill f'konformità stretta mat-Trattati tal-UE u ma ddewwimx, direttament jew indirettament, il-proċess leġiżlattiv Ewropew;

     m. Jisħaq li, filwaqt li la l-Istati Membri tal-Unjoni Ewropea u lanqas l-Unjoni Ewropea ma adottaw deċiżjoni dwar armonizzazzjoni komprensiva tad-dritt għall-proprjetà intellettwali, inklużi d-drittijiet tal-awtur, il-marki kummerċjali u l-privattivi, il-Kummissjoni m'għandhiex tinnegozja dwar dawn il-kwistjonijiet fis-CETA jew it-TTIP;

     n.  Iqis li huwa importanti ħafna li l-UE u l-Istati Uniti jibqgħu impenjati u involuti fid-diskussjonijiet globali u multilaterali dwar l-armonizzazzjoni tal-privattivi permezz tal-entitajiet internazzjonali eżistenti, u għaldaqstant iwissi kontra t-tentattivi biex jiġu introdotti dispożizzjonijiet fir-rigward tad-dritt sostantiv dwar il-privattivi, b'mod partikolari b'rabta ma' kwistjonijiet relatati mal-possibilità ta' privattiva u l-perjodi ta' grazzja, fit-TTIP;

     o.  Jistieden lill-Kummissjoni tiżgura li n-negozjati TTIP jindirizzaw ukoll il-ħtieġa għal rikonoxximent imtejjeb, u li tkun ippreservata l-protezzjoni ta' ċerti prodotti li l-oriġini tagħhom hija ta' importanza kbira; jindika, għaldaqstant, li garanzija effikaċi tal-applikazzjoni tal-indikaturi ġeografiċi hija essenzjali sabiex ikunu jistgħu jiġu infurzati dawk ir-regoli; jistieden lill-Kummissjoni, b'rabta ma' dan, biex tiżgura li r-regoli ta' eċċezzjoni kulturali jibqgħu jiġu esklużi mill-mandat ta' nnegozjar;

     p.  Jistieden lill-Kummissjoni biex fir-rigward tal-aċċess għas-suq tiżgura li jkun hemm dispożizzjonijiet adegwati biex is-servizzi sensittivi, bħas-servizzi pubbliċi u l-utilitajiet pubbliċi (fost l-oħrajn l-ilma, is-saħħa, is-sistemi tas-sigurtà soċjali u l-edukazzjoni) jiġu esklużi, biex b'hekk iħallu biżżejjed spazju lill-awtoritajiet nazzjonali u lokali sabiex jadottaw liġijiet fl-interess pubbliku; josserva li, għal dawn is-servizzi, jeħtieġ tiġi inkorporata fil-ftehim eċċezzjoni espliċita, abbażi tal-Artikolu 14 TFUE flimkien mal-Protokoll 26, irrispettivament minn min jipprovdihom, il- forma li jiġu pprovduti fiha u kif huma ffinanzjati; jinnota li dikjarazzjoni konġunta li tirrifletti l-impenn ċar tan-negozjaturi li jeskludu dawn is-setturi min-negozjati tkun utli ħafna f'dan ir-rigward;

     q.  Jistieden lill-Kummissjoni biex, b'mod partikolari, tiżgura li fir-regoli relatati mal-eċċezzjoni kulturali jiġu inklużi l-kwistjonijiet kollha li jibbenefikaw minnhom l-artisti u l-produtturi Ewropej;

     r.   Iħeġġeġ lill-Kummissjoni tipprovdi garanziji dwar l-inklużjoni tas-settur tal-pubblikazzjoni fl-eċċezzjoni kulturali;

     s.   Jindika li fil-qasam tal-akkwist pubbliku, il-kriterji tal-akkwist soċjali u ekoloġiku u l-estensjoni possibbli tagħhom m'għandhomx ikunu kkontestati;

     t.   Jistieden lill-Kummissjoni tiżgura li ż-żewġ partijiet kontraenti jimpenjaw ruħhom biex b'mod partikolari jirrispettaw u jimplimentaw l-istandards fundamentali tax-xogħol tal-ILO u l-Linji Gwida tal-OECD għall-Intrapriżi Multinazzjonali; iqis li l-konformità mal-istandards tax-xogħol u l-istandards soċjali għandha tiġi ggarantita b'mod effikaċi f'każ ta' kunflitt;

     u.  Jisħaq fuq il-fatt li d-dritt tal-kodeterminazzjoni, il-kostituzzjoni tal-impjiegi, l-awtonomija fin-negozjar kollettiv jew drittijiet oħra li jipproteġu l-ħaddiema, l-ambjent u l-konsumaturi fl-ebda każ m'għandhom jiġu interpretati bħala "ostakoli kummerċjali nontariffarji";

     v.  Josserva, barra minn hekk, li d-definizzjonijiet ambigwi ta' termini legali fis-CETA u t-TTIP bħal "trattament ġust u xieraq" jew "esproprjazzjoni indiretta" iridu jiġu rrifjutati;

RIŻULTAT TAL-VOTAZZJONI FINALI FIL-KUMITAT

7.4.2015

OPINJONI TAL-KUMITAT GĦAL-LIBERTAJIET ĊIVILI, IL-ĠUSTIZZJA U L-INTERN

għall-Kumitat għall-Kummerċ Internazzjonali

dwar rakkomandazzjonijiet lill-Kummissjoni Ewropea dwar in-negozjati għas-Sħubija Trans-Atlantika ta' Kummerċ u ta' Investiment (TTIP)

(2014/2228(INI))

Rapporteur għal opinjoni: Jan Philipp Albrecht

SUĠĠERIMENTI

Il-Kumitat għal-Libertajiet Ċivili, il-Ġustizzja u l-Intern jistieden lill-Kumitat għall-Kummerċ Internazzjonali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

–   wara li kkunsidra d-direttivi ta' negozjati tal-Kunsill dwar is-Sħubija Trans-Atlantika ta' Kummerċ u ta' Investiment bejn l-Unjoni Ewropea u l-Istati Uniti tal-Amerika,

–   wara li kkunsidra r-riżoluzzjoni tiegħu tat-23 ta' Mejju 2013 dwar in-negozjati dwar il-ftehim UE-Stati Uniti dwar il-kummerċ u l-investiment[49], b'mod partikolari l-paragrafu 13 tiegħu,

–   wara li kkunsidra r-riżoluzzjoni tiegħu tat-12 ta' Marzu 2014 dwar il-programm ta' sorveljanza tal-NSA tal-Istati Uniti, il-korpi ta' sorveljanza f'diversi Stati Membri u l-impatt tagħhom fuq id-drittijiet fundamentali taċ-ċittadini tal-UE u dwar il-kooperazzjoni transatlantika fil-Ġustizzja u l-Intern[50],

A. billi l-Unjoni hija marbuta mill-Karta tad-Drittijiet Fundamentali tal-Unjoni Ewropea (il-Karta), inkluż l-Artikolu 8 tagħha dwar id-dritt tal-protezzjoni ta' data personali, u l-Artikolu 16 tat-Trattat dwar il-Funzjonament tal-Unjoni Ewropea (TFUE) dwar l-istess dritt fundamentali, bħala pilastru ewlieni tad-dritt primarju tal-UE li jrid jiġi rrispettat bis-sħiħ mill-ftehimiet internazzjonali kollha;

B.  billi l-Unjoni hija marbuta mill-Artikolu 2 tat-Trattat dwar l-Unjoni Ewropea (TUE), fost oħrajn, li jonoraw il-valuri tad-demokrazija u l-istat tad-dritt;

C. billi l-Unjoni hija marbuta mill-Artikoli 20 u 21 tal-Karta li tonora l-prinċipji ta' ugwaljanza quddiem il-liġi u l-libertà mid-diskriminazzjoni;

D. billi kemm l-Artikolu 1 kif ukoll l-Artikolu 10(3) tat-TUE jistipulaw li "d-deċiżjonijiet għandhom jittieħdu b'mod kemm jista' jkun miftuħ u qrib iċ-ċittadin"; billi t-trasparenza u d-djalogu miftuħ bejn is-sħab, inklużi ċ-ċittadini, huma tal-akbar importanza matul in-negozjati kif ukoll waqt il-fażi ta' implimentazzjoni; billi l-Parlament jappoġġa l-appell tal-Ombudsman għal approċċ trasparenti;

E.  billi n-negozjati li għaddejjin bħalissa dwar ftehimiet kummerċjali internazzjonali, inkluża s-Sħubija Trans-Atlantika ta' Kummerċ u ta' Investiment (TTIP), kif ukoll il-Ftehim dwar il-Kummerċ fis-Servizzi (TiSA), jirrigwardaw ukoll il-flussi ta' data internazzjonali, filwaqt li jeskludu b'mod sħiħ il-privatezza u l-protezzjoni tad-data, li se jiġu diskussi b'mod parallel fil-kuntest tal-Isfera ta' Sikurezza bejn l-UE u l-Istati Uniti u l-Ftehim Qafas dwar il-Protezzjoni tad-Data bejn l-UE u l-Istati Uniti;

F.  billi, waqt is-seba' ċiklu ta' negozjati għat-TTIP, in-negozjaturi tal-Istati Uniti pproponew abbozz ta' kapitlu dwar il-kummerċ elettroniku; billi dan l-abbozz ma jinsabx disponibbli għall-Membri tal-Parlament Ewropew; billi l-abbozz ta' test imfassal mill-Istati Uniti għat-TiSA jimmina r-regoli u s-salvagwardji tal-UE għat-trasferiment ta' data personali lil pajjiżi terzi; billi l-Parlament jirriserva d-dritt li jesprimi l-opinjoni tiegħu wara li jikkonsulta kwalunke proposta u abbozz ta' testi futuri tal-ftehim TTIP;

G. billi, ċ-ċittadini ta' stat li huwa parti kontraenti f'żona ta' kummerċ ħieles għandhom igawdu minn aċċess faċli għaż-żona kollha;

H. billi l-biċċa l-kbira tal-Istati Membri tal-UE u l-Istati Uniti rratifikaw il-Konvenzjoni tal-OECD dwar il-Ġlieda kontra t-Tixħim ta' Uffiċjali Pubbliċi Barranin fit-Tranżazzjonijiet Kummerċjali Internazzjonli; billi bosta Stati Membri tal-UE u l-Istati Uniti rratifikaw il-Konvenzjoni tan-NU kontra l-Korruzzjoni; billi diversi Stati Membri tal-UE u l-Istati Uniti huma membri tat-Task Force ta' Azzjoni Finanzjarja kontra l-Ħasil tal-Flus;

1.  Jindirizza r-rakkomandazzjonijiet li ġejjin lill-Kummissjoni:

     (a) li tiżgura li l-ftehim jiggarantixxi rispett sħiħ tal-istandards tad-drittijiet fundamentali tal-UE permezz tal-inklużjoni ta' klawsola legalment vinkolanti u sospensiva dwar id-drittijiet tal-bniedem bħala parti standard mill-ftehimiet kummerċjali tal-UE ma' pajjiżi terzi;

     (b) li żżomm f'moħħha li l-approvazzjoni mogħtija mill-Parlament Ewropew għall-Ftehim TTIP finali tista' tiġi pperikolata sakemm l-attivitajiet ta' sorveljanza tal-massa ġenerali ma jiġux abbandunati għalkollox u tinstab soluzzjoni adegwata għad-drittijiet għall-privatezza tad-data, inklużi r-rimedju amministrattiv u r-rimedju ġudizzjarju, kif stabbilit fil-paragrafu 74 tar-riżoluzzjoni tal-Parlament tat-12 ta' Marzu 2014 li ssemmiet aktar 'il fuq;

     (c)  li tieħu miżuri immedjati sabiex tiżgura, b'mod partikolari, li jiġu implimentati r-rakkomandazzjonijiet li saru fir-riżoluzzjoni tal-Parlament tat-12 ta' Marzu 2014 li ssemmiet aktar 'il fuq dwar l-iżvilupp ta' strateġija Ewropea għall-indipendenza informatika u s-strateġija ċibernetika tal-UE;

     (d) li tinkorpora, bħala prijorità ewlenija, dispożizzjoni indipendenti u orizzonatali li hija wkoll komprensiva u li ma tikkostitwixxi ebda ambigwità, abbażi tal-Artikolu XIV tal-Ftehim Ġenerali dwar il-Kummerċ fis-Servizzi (GATS), li teżenta għalkollox il-qafas ġuridiku eżistenti u futur tal-UE għall-protezzjoni tad-data personali mill-ftehim, mingħajr ebda kundizzjoni li dan għandu jkun konsistenti ma' partijiet oħra tat-TTIP, u tiżgura li l-ftehim ma' jipprekludix l-applikazzjoni ta' eċċezzjonijiet għall-forniment ta' servizzi li huma ġustifikabbli skont ir-regoli relevanti tal-Organizzazzjoni Dinjija tal-Kummerċ (l-Artikoli XIV u XIVbis tal-GATS);

     (e) li tiżgura li d-data personali tista' tiġi trasferita 'l barra mill-Unjoni biss jekk jiġu rispettati d-dispożizzjonijiet dwar it-trasferimenti f'pajjiżi terzi li jinsabu fil-liġijiet rigward il-protezzjoni tad-data tal-UE; li tinnegozja dwar dispożizzjonijiet li jirrigwardaw il-fluss ta' data personali, dejjem jekk tkun garantita u osservata l-applikazzjoni sħiħa tar-regoli tal-UE dwar il-protezzjoni tad-data;

     (f)  li tiżgura li l-abbozz ta' kapitlu dwar il-kummerċ elettroniku propost min-negozjaturi tal-Istati Uniti matul is-seba' ċiklu ta' negozjar tat-TTIP ma jiġix aċċettat bħala bażi għan-negozjati jekk dan ikun jikkontjeni kundizzjonijiet simili għal dawk stabbiliti fl-abbozz ta' kapitlu dwar il-kummerċ elettroniku għan-negozjati TiSA; li topponi l-abbozz ta' kapitlu TiSA dwar il-kummerċ elettroniku mfassal mill-Istati Uniti fir-rigward tad-data personali; li tiżgura konklużjoni sodisfaċenti tan-negozjati dwar l-Isfera ta' Sikurezza u l-Ftehim Qafas dwar il-Protezzjoni tad-Data;

     (g) li żżomm f'moħħha li r-regoli tal-UE dwar it-trasferiment tad-data personali jistgħu jipprojbixxu l-ipproċessar ta' din id-data f'pajjiżi terzi jekk dawn ma jilħqux l-istandard ta' adegwatezza tal-UE; li tinsisti li kwalunkwe rekwiżit għal-lokalizzazzjoni tat-tagħmir u l-istabbilimenti użati fl-ipproċessar tad-data jkun konformi mar-regoli tal-UE fir-rigward tat-trasferimenti tad-data; li tikkoopera mal-Istati Uniti u pajjiżi terzi oħra fl-ambitu tas-sedi adegwati bil-għan li tadotta standards għoljin f'dak li jikkonċerna l-protezzjoni tad-data fid-dinja, b'mod partikolari fil-kuntest tal-Isfera ta' Sikurezza u l-Ftehim Qafas dwar il-Protezzjoni tad-Data;

     (h) li tiżgura li d-deċiżjonijiet rigward il-kunflitti legali dwar id-drittijiet fundamentali jsiru biss mill-qrati ordinarji kompetenti; li tiżgura li d-dispożizzjonijiet possibbli rigward is-soluzzjonijiet għat-tilwim bejn l-investitur u l-istat (ISDS) ma jipprevjenux l-aċċess ugwali għall-ġustizzja jew jimminaw id-demokrazija;

     (i)   li turi rispett sħiħ lejn il-ħtieġa għat-trasparenza u r-responsabilità fin-negozjati tul il-proċess sħiħ, u twettaq l-obbligu tagħha skont l-Artikolu 218(10) TFUE, li n-natura statutorja tiegħu ġiet ikkonfermata f'deċiżjoni reċenti tal-Qorti tal-Ġustizzja[51], li żżomm lill-Parlament informat sew fuq bażi immedjata fl-istadji kollha tan-negozjati; li tiżgura l-aċċess tal-pubbliku għad-dokumenti tan-negozjati relevanti mill-partijiet kollha, bl-eċċezzjoni ta' dawk li għandhom jiġu kklassifikati b'ġustifikazzjoni ċara fuq bażi ta' każ b'każ, b'ġustifikazzjoni pubblika ta' kemm l-aċċess għall-partijiet mhux żvelati tad-dokument ikkonċernat x'aktarx jimmina b'mod speċifiku u reali l-interessi protetti mill-eċċezzjonijiet, f'konformità mar-Regolament (KE) Nru 1049/2001 tal-Parlament Ewropew u tal-Kunsill tat-30 ta' Mejju 2001 dwar l-aċċess pubbliku għad-dokumenti tal-Parlament Ewropew, tal-Kunsill u tal-Kummissjoni[52]; li tiżgura li l-ftehim bl-ebda mod m'għandu jdgħajjef il-liġijiet tal-UE jew tal-Istati Membri tagħha fir-rigward tal-aċċess pubbliku għal dokumenti uffiċjali;

     (j)  li żżid, fil-kuntest tan-negozjati, pressjoni politika fuq l-Istati Uniti biex jiggarantixxu reċiproċità sħiħa tal-viżi u trattament ugwali għaċ-ċittadini kollha tal-Istati Membri tal-UE mingħajr diskriminazzjoni fir-rigward tal-aċċess tagħhom fl-Istati Uniti;

     (k) li tinkludi, fil-ftehim, klawsola dwar il-korruzzjoni, il-frodi tat-taxxa, l-evażjoni tat-taxxa u l-ħasil tal-flus bil-għan li tistabbillixxi kooperazzjoni msaħħa bejn l-Istati Membri u l-Istati Uniti, inklużi mekkaniżmi għal kooperazzjoni internazzjonali aktar effiċjenti, assistenza legali reċiproka, irkupru ta' assi, assistenza teknika, skambju ta' informazzjoni u implimentazzjoni ta' rakkomandazzjonijiet u standards internazzjonali.

RIŻULTAT TAL-VOTAZZJONI FINALI FIL-KUMITAT

16.4.2015

OPINJONI TAL-KUMITAT GĦALL-AFFARIJIET KOSTITUZZJONALI

għall-Kumitat għall-Kummerċ Internazzjonali

dwar Rakkomandazzjonijiet lill-Kummissjoni Ewropea dwar in-negozjati għas-Sħubija Trans-Atlantika ta' Kummerċ u ta' Investiment (TTIP)

(2014/2228(INI))

Rapporteur għal opinjoni: Esteban González Pons

SUĠĠERIMENTI

Il-Kumitat għall-Affarijiet Kostituzzjonali jistieden lill-Kumitat għall-Kummerċ Internazzjonali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

–       wara li kkunsidra l-ġurisprudenza tal-Qorti tal-Ġustizzja tal-Unjoni Ewropea, b'mod partikolari l-Kawża[53] C-350/12 u l-Opinjonijiet 2/13[54] u 1/09[55],

A.     billi t-Trattat ta' Lisbona jestendi l-kamp ta' applikazzjoni tal-Politika Kummerċjali Komuni biex tinkludi l-investiment barrani dirett, u billi dan iżid b'mod sinifikanti s-setgħat tal-Parlament fil-qasam tal-ftehimiet kummerċjali internazzjonali billi jsaħħaħ id-dritt tiegħu li jiġi informat b'mod regolari, u billi jtejjeb il-kompetenza deċiżjonali tiegħu billi jesiġi l-kunsens tiegħu fi tmiem in-negozjati, u b'hekk jipprovdi rappreżentanza diretta taċ-ċittadini fl-adozzjoni ta' ftehimiet kummerċjali internazzjonali;

B.     billi fl-Opinjoni 2/13 tagħha l-Qorti tal-Ġustizzja tal-Unjoni Ewropea ddikjarat li "il-kompetenza tal-UE fil-qasam tar-relazzjonijiet internazzjonali u l-kapaċità tagħha biex tikkonkludi ftehimiet internazzjonali neċessarjament jinvolvu s-setgħa ta' sottomissjoni għad-deċiżjonijiet ta' qorti li tinħoloq jew tinħatar bi ftehim bħal dan fir-rigward tal-interpretazzjoni u l-applikazzjoni tad-dispożizzjonijiet tiegħu". billi, madankollu, il-Qorti ddikjarat ukoll li ftehim internazzjonali jista' jaffettwa s-setgħat tiegħu biss jekk il-kundizzjonijiet indispensabbli għas-salvagwardja tal-karattru essenzjali ta' dawk is-setgħat jiġu sodisfatti u li, bħala konsegwenza, ma jkun hemm l-ebda effett negattiv fuq l-awtonomija tal-ordni legali tal-UE:

1.      Jindirizza, fil-kuntest tan-negozjati attwali għat-TTIP, dawn ir-rakkomandazzjonijiet lill-Kummissjoni:

(d)    rigward ir-regoli:

(i)     li tevalwa l-implikazzjonijiet tat-TTIP biex tiżgura l-koerenza politika, jiġifieri fir-rigward tal-konsistenza bejn l-oqsma differenti tal-azzjoni esterna tal-UE u bejn dawn u l-politiki l-oħra tagħha;

(ii)     li tispeċifika r-rwol u s-setgħat tar-Regulatory Cooperation Council (Kunsill ta' Kooperazzjoni fi Kwistjonijiet Regolatorji), kif ukoll il-kwalità legali tal-istudji tagħha, filwaqt li tqis li l-kooperazzjoni fir-regolazzjoni għandha tirrispetta l-qafas kostituzzjonali u istituzzjonali attwali tal-UE kif ukoll il-kompetenza tal-awtoritajiet nazzjonali u lokali biex jifformulaw il-politiki tagħhom stess, b'mod partikolari il-politiki soċjali u ambjentali, u li kwalunkwe applikazzjoni diretta tar-rakkomandazzjonijiet tagħha għall-każijiet relevanti tal-UE timplika ksur tal-proċeduri stabbiliti fit-Trattati rigward il-leġiżlazzjoni, u għaldaqstant timmina l-proċess demokratiku kif ukoll l-interess pubbliku Ewropew;

(iii)    li tiżgura li l-ebda standard ma jitbaxxa fil-qafas legali Ewropew;

(iv)    peress li t-TTIP huwa mistenni li jkun "ftehim ħaj", li miegħu jistgħu jiżdiedu annessi settorjali addizzjonali fil-futur, li tiżgura li dan il-mekkaniżmu jiggarantixxi l-possibilità ta' sorveljanza parlamentari b'tali mod li l-Parlament u l-Kungress tal-Istati Uniti jinżammu infurmati u jkunu jistgħu jibdew, isawru u jikkontrollaw id-djalogu regolatorju previst mit-TTIP, filwaqt li jirrispettaw id-drittijiet parlamentari leġiżlattivi;

(v)    tqis il-livell għoli ħafna ta' miżuri ta' protezzjoni u standards li jeżistu fl-UE, u li ġew miftiehma permezz ta' proċessi demokratiċi, li jkun kisba denja ta' protezzjoni sal-ogħla grad, u jitlob li l-istandards legali li jeżistu fl-UE u fl-Istati Membri tagħha, bħal pereżempju fir-rigward tas-sikurezza tal-prodotti, tas-saħħa, tal-isfera soċjali, tal-ambjent, tal-klima, tal-oġġetti tal-ikel u tal-ħarsien tal-annimali, u d-drittijiet tal-konsumatur u l-protezzjoni tad-data, bl-ebda mod ma jkunu jistgħu jitbaxxew;

(vi)    topponi l-inklużjoni ta' mekkaniżmu ISDS fit-TTIP, minħabba s-sistemi legali żviluppati tal-UE u l-Istati Uniti, u minħabba l-fatt li s-sistema ta' soluzzjoni tat-tilwim bejn stat u stat u l-użu ta' qrati nazzjonali huma għodod l-aktar adegwati biex jiġi indirizzat it-tilwim dwar l-investiment;

(vii)   meta jitqies il-fatt li l-ġuriżdizzjonijiet tal-Istati Uniti u tal-UE mhumiex f'riskju ta' interferenza politika fil-ġudikatura jew li jiċħdu ġustizzja lil investituri barranin, soluzzjoni ta' tilwim bejn l-investitur u l-istat, ibbażata fuq arbitraġġ privat, tista' timmina d-dritt ta' regolazzjoni fl-interess pubbliku tal-Unjoni Ewropea u tal-awtoritajiet nazzjonali, reġjonali u lokali tal-Istati Membri, b'mod partikolari fir-rigward ta' politiki soċjali u ambjentali, u għalhekk ma tkunx qed tirrispetta l-qafas kostituzzjonali tal-UE; li tipproponi soluzzjoni permanenti għar-riżoluzzjoni ta' tilwim bejn l-investituri u l-istati, fejn każijiet potenzjali huma ttrattati b'mod trasparenti minn imħallfin professjonali fi proċessi pubbliċi li b'segwitu għalihom jista' jsir appell wieħed;

(e)    rigward it-trasparenza, l-involviment tas-soċjetà ċivili u l-kuntatt mal-pubbliku:

(iii)    filwaqt li ċertu livell ta' kunfidenzjalità huwa ammissibbli u komprensibbli matul in-negozjati għal-ftehim ta' kummerċ ta' tali importanza ekonomika u politika, li tkompli sejra bl-isforzi tagħha u ssaħħaħhom biex tagħmel in-negozjati għat-TTIP aktar trasparenti u aċċessibbli għall-pubbliku, inter alia billi tippubblika t-testi ta' negozjar kollha tal-UE li l-Kummissjoni diġà taqsam mal-Istati Membri u l-Parlament, peress li l-istituzzjonijiet Ewropej għandhom ikunu minn ta' quddiem fil-promozzjoni tat-trasparenza;

(iv)    li immedjatament u bis-sħiħ tinforma lill-Parlament bil-passi kollha tal-proċedura, f'konformità mas-sentenza tal-Qorti tal-Ġustizzja tal-Unjoni Ewropea fil-kawża C-358/11; li tiżgura li l-MPE kollha jkollhom aċċess għad-dokumenti ristretti kollha u li tinkludi t-testi konsolidati fil-lista ta' dokumenti li jistgħu jiġu kkonsultati mill-MPE;

(v)    li timplimenta r-rakkomandazzjonijiet tal-Ombudsman Ewropew mis-6 ta' Jannar 2015 biex tkompli ssaħħaħ il-leġittimità u t-trasparenza tal-proċess ta' negozjar b'konformità sħiħa, b'mod proattiv u komprensiv, mar-regoli dwar l-aċċess pubbliku għal dokumenti fil-lingwi uffiċjali kollha tal-UE fuq is-sit elettroniku tagħha, u billi tiżgura parteċipazzjoni pubblika bbilanċjata u trasparenti mill-parlamenti tal-Istati Membri;

(vi)    għalhekk, jistieden lill-Kummissjoni tappoġġja u tkompli n-negozjati mal-Kunsill biex tiżblokka l-emenda għar-Regolament (KE) Nru 1049/2001 dwar l-aċċess pubbliku għad-dokumenti;

(vii)   li tikkontrolla l-implikazzjonijiet legali ta' ftehim ta' tip imħallat; li tinvolvi bis-sħiħ il-parlamenti nazzjonali fid-dibattitu dwar l-ispeċifiċitajiet ta' TTIP u żżommhom informati regolarment dwar in-negozjati, filwaqt li tagħti attenzjoni partikolari lill-feedback tagħhom, speċjalment peress li dan il-ftehim x'aktarx li jispiċċa bħala ftehim ta' "tip imħallat", li jkun jeħtieġ ratifika mill-parlamenti nazzjonali;

(viii)  li toħloq mingħajr dewmien reġistru obbligatorju ta' trasparenza li għandu jintuża mill-istituzzjonijiet kollha Ewropej sabiex tiġi żgurata viżjoni wiesgħa fuq l-attivitajiet ta' lobbying assoċjati man-negozjati għat-TTIP.

RIŻULTAT TAL-VOTAZZJONI FINALI FIL-KUMITAT

30.4.2015

OPINJONI KUMITAT GĦALL-PETIZZJONIJIET

għall-Kumitat għall-Kummerċ Internazzjonali

dwar ir-Rakkomandazzjonijiet lill-Kummissjoni Ewropea dwar in-negozjati għas-Sħubija Trans-Atlantika ta' Kummerċ u ta' Investiment (TTIP)

(2014/2228(INI))

Rapporteur għal opinjoni: Jarosław Wałęsa

SUĠĠERIMENTI

Il-Kumitat għall-Petizzjonijiet jistieden lill-Kumitat għall-Kummerċ Internazzjonali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

–   wara li kkunsidra d-direttivi għan-negozjar dwar is-Sħubija Trans-Atlantika ta’ Kummerċ u ta’ Investiment (TTIP) bejn l-Unjoni Ewropea u l-Istati Uniti tal-Amerika tal-14 ta' Ġunju 2013,

–   wara li kkunsidra l-Artikoli 206 u 207 tat-Trattat dwar il-Funzjonament tal-Unjoni Ewropea,

–   wara li kkunsidra r-riżoluzzjonijiet aktar bikrija tiegħu tat-23 ta’ Ottubru 2012 dwar ir-relazzjonijiet kummerċjali u ekonomiċi mal-Istati Uniti[56], tat-23 ta’ Mejju 2013 dwar in-negozjati dwar il-kummerċ u l-investiment mal-Istati Uniti tal-Amerika[57], u tat-12 ta’ Marzu 2014 dwar il-programm ta’ sorveljanza tal-NSA tal-Istati Uniti, il-korpi ta’ sorveljanza f’diversi Stati Membri u l-impatt tagħhom fuq id-drittijiet fundamentali taċ-ċittadini tal-UE u dwar il-kooperazzjoni transatlantika fil-Ġustizzja u l-Intern[58],

–   wara li kkunsidra r-riżoluzzjoni tiegħu tal-15 ta’ Jannar 2015 dwar ir-rapport annwali dwar l-attivitajiet tal-Ombudsman Ewropew tal-2013,

–   wara li kkunsidra l-petizzjonijiet 1221-13, 1635-13, 1960-13, 2694-13, 2721-13, 2859-13, 0149-14, 0184-14, 0195-14, 0242-14, 0589-14, 0706-14, 0722-14, 0738-14, 0783-14, 0949-14, 0973-14,1032-14,1122-14,1336-14,1575-14, 1649-14, 2062-14, 2143-14, 2268-14, 2314-14, 2328-14, 264714 u 0033-15,

–   wara li kkunsidra l-investigazzjoni tal-Ombudsman Ewropew dwar it-trasparenza tan-negozjati dwar is-Sħubija Trans-Atlantika ta’ Kummerċ u ta’ Investiment, u dwar il-parteċipazzjoni tal-pubbliku fin-negozjati (OI/10/2014/RA),

–   wara li kkunsidra l-eżitu tal-konsultazzjoni pubblika varata mill-Kummissjoni dwar il-protezzjoni tal-investiment u s-Soluzzjoni tat-Tilwim bejn l-Istati (ISDS) fit-TTIP,

–   wara li kkunsidra l-ittra tal-5 ta’ Ġunju 2014 mingħand il-Kap Negozjatur tan-NU, Ignacio García-Bercero, lill-kontroparti Amerikana tiegħu, Daniel mullany, li fiha huwa ddikjara li “id-dokumenti kollha relatati man-negozjati ser jibqgħu magħluqa għall-pubbliku għal sa 30 sena”,

A. billi l-Kummissjoni attwalment qed tinnegozja f’isem l-Unjoni Ewropea ftehim ta’ sħubija profond, komprensiv u bi standards għolja ta’ kummerċ u investiment mal-Istati Uniti (is-Sħubija Trans-Atlantika ta’ Kummerċ u ta’Iinvestiment jew TTIP) li għandu l-għan li jrawwem u jiffaċilita l-iskambju kummerċjali ta’ oġġetti u servizzi u t-tisħiħ tal-investiment, inter alia permezz tat-tneħħija tal-ostakoli għall-kummerċ; billi għadd sinifikanti ta’ ċittadini Ewropej esprimew tħassib leġittimu li dan il-ftehim ikun jhedded ir-regolamenti fundamentali tal-UE, b’mod partikolari fl-oqsma tad-drittijiet tax-xogħol, il-protezzjoni ambjentali u l-istandards tal-ikel u tas-sikurezza;

B.  billi l-President Juncker kien stieden lil kull membru tal-Kummissjoni li kienet se tieħu l-kariga biex “nippubblikaw il-kuntatti u l-laqgħat kollha li jkollna mal-organizzazzjonijiet professjonali jew ma’ individwi li jaħdmu għal rashom dwar kwalunkwe kwistjoni relatata mat-tfassil tal-politika tal-UE u l-implimentazzjoni fir-rigward tal-ftehim ta’ sħubija ta' kummerċ u investiment mal-Istati Uniti li għandu kamp ta' applikazzjoni wiesa' li l-Kummissjoni bħalissa qiegħda tinnegozja f’isem l-UE, filwaqt li l-uniku mod effettiv li bih jistghu jiġu evitati l-konfużjoni u n-nuqqas ta’ fehim hu permezz ta’ aktar trasparenza u sforz akbar biex id-dibattitu pubbliku jiġi infurmat b’mod proattiv;

C. billi l-objettiv tat-TTIP huwa li jiżdiedu l-kummerċ u l-investiment bejn l-UE u l-Istati Uniti mingħajr ma jkollhom effett fuq il-prinċipji stabbiliti fl-acquis communautaire jew fuq it-tkabbir ekonomiku sostenibbli, il-ħolqien ta’ impjiegi diċenti jew il-promozzjoni tal-mudell soċjali Ewropew;

D. billi n-negozjati ġibdu l-interess tal-pubbliku bħal qatt qabel, fid-dawl tal-implikazzjonijiet potenzjali tat-TTIP mil-lat ekonomiku, soċjali u politiku u l-mod sigriet li bih saru n-negozjati;

E.  billi l-eks-President tal-Kummissjoni José Manuel Barroso stieden lis-soċjetà ċivili biex twettaq parti kostruttiva u impenjattiva fin-negozjati tat-TTIP;

F.  billi s-soċjetà ċivili esprimiet tħassib dwar it-TTIP;

G. billi fl-10 ta’ Settembru 2014 il-Kummissjoni rrifjutat li tirreġistra l-inizjattiva taċ-ċittadini Ewropej (IĊE) “Stop TTIP” (“Inwaqqfu t-TTIP”), billi qieset li din kienet taqa’ ’l barra mill-qafas tas-setgħat tal-Kummissjoni li tressaq proposta għal att legali tal-Unjoni għall-fini li jiġu implimentati t-Trattati; billi minn dak iż-żmien ’il hawn ġiet varata inizjattiva "Stop TTIP" barra mill-proċedura stabbilita mir-Regolament 211/2011 u diġà ġabret iżjed minn miljun firma; billi l-Kumitat għall-Petizzjonijiet irċieva għadd ta’ petizzjonijiet li qajmu tħassib dwar it-TTIP; billi preokkupazzjonijiet ewlenin tal-petizzjonanti huma relatati mar-riskji rigward is-sikurezza u l-kwalità tal-importazzjonijiet tal-ikel, it-trasferiment tad-data mill-UE lill-Istati Uniti, b’mod partikolari l-informazzjoni miġbura mill-Istati Uniti rigward persuni fiżiċi u ġuridiċi (id-dritt taċ-ċittadini tal-UE ta' “awtodeterminazzjoni diġitali”), in-nuqqas ta’ trasparenza tan-negozjati, l-impatt ekonomiku negattiv potenzjali tat-TTIP, b’mod partikolari f’dawk li huma impjiegi u pagi, u t-trasferiment tad-dritt tal-awtoritajiet pubbliċi li jirregolaw lill-korporazzjonijiet permezz tal-mekkaniżmu ISDS;

H. billi d-dritt taċ-ċittadini tal-UE li jgawdu minn aċċess pubbliku għad-dokumenti miżmuma mill-istituzzjonijiet tal-UE huwa dritt fundamentali mmirat biex jiżgura li huma jkunu jistgħu jipparteċipaw fit-teħid tad-deċiżjonijiet tal-UE u jżommu responsabbli lill-UE u lill-istituzzjonijiet tagħha, u b’hekk tissaħħaħ in-natura demokratika tal-Unjoni;

I.   billi l-petizzjonijiet kollha riċevuti minn ċittadini tal-UE, li jiġbru għaxriet ta’ eluf ta’ firem ta’ ċittadini tal-UE, għandhom pożizzjoni ċarament kritika lejn in-negozjati tat-TTIP u jwissu dwar it-theddida li ftehim bħal dan ikun joħloq għall-istil ta’ ħajja Ewropew, speċjalment fil-qasam soċjali, dak ekonomiċi, dak ambjentali u dak demokratiku;

J.   billi l-investigazzjoni tal-Ombudsman Ewropew ta’ Lulju tal-2014 rigward it-trasparenza tat-TTIP skrutinizzat iż-żamma ta’ dokumenti ewlenin u l-allegat għoti ta’ aċċess privileġġjat lil ċerti partijiet ikkonċernati; billi l-Ombudsman irċieva aktar minn 6 000 email bi tweġiba għall-konsultazzjonijiet pubbliċi tiegħu dwar it-TTIP;

K.  billi fil-qasam soċjali d-diversi petizzjonijiet jesprimu tħassib serju dwar l-impatt negattiv potenzjali tal-ftehim fuq is-saħħa pubblika, is-sistemi tas-saħħa fl-UE u s-servizzi pubbliċi b’mod ġenerali, kif ukoll l-iskemi tal-pensjoni; billi qed jitfaċċaw biżgħat dwar id-deterjorament tal-kondizzjonijiet tax-xogħol, minħabba n-nuqqas ta’ regolamentazzjoni tar-relazzjonijiet tax-xogħol u n-nuqqas għalkollox ta’ kultura ta’ ftehimiet kollettivi fl-Istati Uniti;

L.  billi, wara riċerka, l-Ombudsman Ewropew esprimiet it-tħassib tagħha dwar in-nuqqas ta’ trasparenza u parteċipazzjoni tal-pubbliku f’in-negozjati għat-TTIP;

M. billi l-biċċa l-kbira tal-petizzjonijiet li waslu talbu b’mod espliċitu għall-waqfien tan-negozjati li għandu jiġi determinat mill-Kummissjoni jew għar-rifjut aħħari tal-ftehim mill-Parlament Ewropew;

1.  Jenfasizza l-importanza li jiġu żviluppati relazzjonijiet kummerċjali u ta’ investiment ibbilanċjati bejn l-Unjoni Ewropea u l-Istati Uniti tal-Amerika b’salvagwardji adegwati biex jiġu pprovduti l-ogħla standards tax-xogħol, dawk soċjali, dawk tas-saħħa u dawk ambjentali fuq livell globali sabiex jgħinu, u bil-għan li jgħinu, it-tkabbir u l-impjiegi kif ukoll li jiġġeneraw opportunitajiet ekonomiċi ġodda u jirregolaw il-globalizzazzjoni sabiex id-dumping soċjali u ambjentali jiġi eskluż;

2.  Jilqa’ l-objettiv li jitneħħew l-ostakli tekniċi għall-kummerċ u jitnaqqsu l-inkompatibbiltajiet regolatorji mhux meħtieġa bejn l-UE u l-Istati Uniti li mhumiex ġustifikati minn approċċi differenti għall-protezzjoni u l-ġestjoni tar-riskju, bħalma huma d-duplikazzjoni ta’ proċeduri, inkonsistenzi fir-rekwiżiti tal-prodotti u l-ittestjar doppju;

3.  Jistieden lill-Kummissjoni topponi l-inklużjoni tal-ISDS fit-TTIP jekk ikomplu għaddejjin in-negozjati, peress li hemm disponibbli għażliet oħra għall-infurzar tal-investimenti, bħalma huma r-rimedji domestiċi;

4.  Jinnota li l-kompatibbiltà regolatorja għandha tkun mingħajr preġudizzju għas-servizzi pubbliċi jew għad-dritt sovran ġenerali tar-regolamentazzjoni skont il-prinċipju ta’ prekawzjoni fl-oqsma tas-saħħa, l-aċċess għall-mediċini, is-sikurezza tal-protezzjoni tad-data, id-drittijiet tal-konsumatur, id-drittijiet tal-ħaddiema, il-ħarsien ambjentali, il-benesseri tal-annimali, ² tal-ħarsien ta’ prekawzjoni tal-konsumatur u d-diversità kulturali, kif meqjus xieraq mill-awtoritajiet pubbliċi ta’ kull naħa;

5.  Jistieden lill-Kummissjoni tiżgura li l-istandards ambjentali tal-UE jibqgħu fil-livelli attwali;

6.  Jenfasizza li s-servizzi u l-prodotti kulturali għandhom jiġu kkunsidrati, u għalhekk jiġu ttrattati, b’mod differenti minn servizzi u prodotti kummerċjali oħra, kif hemm ipprovdut skont l-hekk imsejħa eċċezzjoni kulturali;

7.  Jenfasizza l-importanza tal-pakkett ta’ mobilità u tal-istabbiliment tar-reċiproċità tal-viża għaċ-ċittadini tal-Istati Membri kollha tal-UE, filwaqt li jfakkar li l-faċilitazzjoni tal-viża għall-fornituri Ewropej ta’ servizzi u oġġetti hija wieħed mill-elementi ewlenin biex jittieħed vantaġġ sħiħ tal-ftehim tat-TTIP;

8.  Jenfasizza li l-Istati Uniti ma rratifikatx il-konvenzjonijiet tal-Organizzazzjoni Internazzjonali tax-Xogħol (ILO) dwar standards ċentrali tax-xogħol li jkopru tali drittijiet bħalma huma n-negozjar kollettiv, il-libertà ta’ assoċjazzjoni u d-dritt għall-organizzazzjoni;

9.  Jenfasizza li t-teħid demokratiku tad-deċiżjonijiet fil-post tax-xogħol jirriskja li jiddgħajjef jekk il-protezzjoni tal-ħaddiema titqies bħala ostaklu għall-kummerċ;

10. Jinnota l-fatt li l-Kummissjoni għamlet sforzi reali biex tqawwi t-trasparenza tal-proċess tan-negozjar tat-TTIP, speċjalment fid-dawl tal-pubblikazzjoni tad-direttivi Ewropej għan-negozjati dwar it-TTIP (1103/13 CL 1); jiddispjaċih li dan id-dokument essenzjali ġie żvelat biss fid-9 ta’ Ottubru tal-2014 filwaqt li n-negozjati kienu bdew f’Ġunju tal-2013; ifakkar li l-Kummissjoni hija fiċ-ċirkostanzi kollha ġuridikament obbligata li tirrispetta r-regoli dwar l-aċċess pubbliku għad-dokumenti stabbiliti fir-Regolament 1049/2001; jiddispjaċih li l-aċċess mogħti lill-Membri tal-Parlament Ewropew għat-testi ta’ negozjar tat-TTIP sal-ġurnata tal-lum kien wieħed estremament limitat; jenfasizza li d-dokumenti disponibbli fil-kamra tal-qari sekurizzata tal-PE ma fihom l-ebda materjal konsolidat jew xi test imressaq mill-Istati Uniti; jenfasizza l-ħtieġa li tiġi żgurata t-trasparenza permezz ta’ djalogu dirett u miftuħ fis-sura ta’ konsultazzjonijiet pubbliċi mal-partijiet ikkonċernati kollha;

11. Jilqa’ l-inkjesta tal-Ombudsman Ewropew dwar il-ħtieġa ta’ żvelar aktar proattiv tad-dokumenti; iħeġġeġ lill-Kummissjoni biex b’mod rapidu timplimenta r-rakkomandazzjonijiet tal-Ombudsman relatati mal-aċċess tal-pubbliku għat-testi tan-negozjar konsolidati, żvelar aktar proattiva tad-dokumenti tat-TTIP u trasparenza akbar fir-rigward tal-laqgħat li jsiru mill-uffiċjali tal-Kummissjoni dwar it-TTIP ma’ organizzazzjonijiet tan-negozji, gruppi ta’ interess jew l-NGOs; Jemmen li approċċ aktar proattiv lejn it-trasparenza min-naħa tal-Kummissjoni tista’ tagħmel il-proċess tan-negozjar aktar demokratiċi u leġittimi f’għajnejn iċ-ċittadini, u għalhekk iħeġġeġ lill-Kummissjoni tippubblika d-dokumenti tan-negozjar kollha, inklużi l-offerti tal-Istati Uniti lill-UE, skont il-prattika għan-negozjati kummerċjali internazzjonali kollha mwettqa fil-qafas tal-Organizzazzjoni Dinjija tal-Kummerċ, u tippromwovi iktar parteċipazzjoni komprensiva u l-involviment tad-diversi partijiet ikkonċernati fil-proċess ta’ negozjar, u b’mod partikolari tas-soċjetà ċivili u l-organizzazzjonijiet tal-konsumaturi;

12. Jistieden lill-Kummissjoni tiżgura li l-lista tad-dokumenti tat-TTIP disponibbli fuq il-websajt tagħha ddedikat lill-politika tal-kummerċ hija aċċessibbli, komprensiva, eżawrjenti u bir-reqqa, u jistedinha tiffaċilita l-aċċess għal din l-informazzjoni billi torganizza laqgħat regolari mal-unions, l-NGOs u l-organizzazzjonijiet tas-soċjetà ċivili; jenfasizza li l-aktar dokumenti importanti, speċjalment dwar il-pożizzjonijiet tal-UE fin-negozjati, għandhom ikunu disponibbli bil-lingwi uffiċjali kollha tal-UE, u b’hekk jiġi żgurat li ċ-ċittadini kollha tal-UE jkollhom aċċess ġenwin għad-dokumenti u jifhmuhom għalkollox;13.  Jitlob lill-Kummissjoni tinforma lill-Parlament immedjatament u b’mod sħiħ bl-istadji kollha tal-proċedura, skont is-sentenza tal-Qorti tal-Ġustizzja Ewropea fil-Kawża  C-358/11; jitlob, barra minn hekk, li tiżgura li l-Membri tal-Parlament Ewropew (MPE) kollha jkollhom aċċess għad-dokumenti ristretti kollha u li tinkludi t-testi konsolidati fil-lista tad-dokumenti li jistgħu jiġu kkonsultati mill-MPE;

14. Jiddispjaċih li l-petizzjoni ppreżentata minn aktar minn miljun u nofs Ewropej ma ġietx ikklassifikat mill-Kummissjoni bħala “Inizjattiva taċ-Ċittadini Ewropej”, minħabba l-limitazzjonijiet tal-qafas leġiżlattiv tal-IĊE; jiddispjaċih li fil-fatt dawn il-limitazzjonijiet jinvolvu li kwalunkwe IĊE fuq kwistjonijiet kummerċjali tista’ tkun ammissibbli biss wara d-dħul fis-seħħ ta’ ftehim kummerċjali, u li l-IĊE immirati biex jinfluwenzaw negozjati kummerċjali li jkunu għaddejjin mhumiex permessi fil-qafas attwali;

15. Iqis li fl-interess pubbliku, il-protezzjoni tad-data m’għandhiex tintuża bħala ostaklu awtomatiku għall-iskrutinju pubbliku ta’ attivitajiet ta’ lobbying fil-kuntest tat-TTIP u li huwa possibbli li wieħed jittratta l-preokkupazzjonijiet dwar il-protezzjoni tad-data billi jinforma lill-parteċipanti meta jiġu mistiedna għall-laqgħat dwar l-intenzjoni li isimhom jiġi żvelat u filwaqt li jagħmilha ċara li t-TTIP m’għandhiex iddgħajjef la d-dritt taċ-ċittadini tal-UE għall-awtodeterminazzjoni diġitali u l-anqas il-konformità mal-leġiżlazzjoni Ewropea dwar il-protezzjoni tad-data u, b’mod partikolari, wieħed għandu jqis is-sentenza tal-Qorti tal-Ġustizzja tal-Unjoni Ewropea (C-132/12) dwar id- “dritt li jkun minsi” u r-Regolament Ġenerali dwar il-Protezzjoni tad-Data li hu propost; jitlob lill-Kummissjoni tiżgura li l-protezzjoni tad-data ma tiġix inkluża fin-negozjati, sabiex jiġu rispettati l-Artikoli 7 u 8 tal-Karta tad-Drittijiet Fundamentali tal-Unjoni Ewropea;

16. Jenfasizza s-sensittività ta’ ċerti oqsma tan-negozjati li fihom ma jistgħu jiġu aċċettati kompromessi, bħalma huma s-settur agrikolu, fejn il-perċezzjonijiet fir-rigward tal-organiżmi ġenetikament modifikati (OĠM), it-tikkettar tar-rekwiżiti ta’ informazzjoni, il-klonazzjoni, ir-rekwiżiti ambjentali u l-istandards l-oħra kollha tal-konsumaturi u tas-saħħa tal-annimali huma diverġenti bejn l-UE u l-Istati Uniti; iħeġġeġ lill-Kummissjoni tadotta, f’dan ir-rigward, “approċċ ta’ lista pożittiva”, bħala kundizzjoni meħtieġa minn qabel biex il-kwistjoni tiġi ċċarata għall-partijiet ikkonċernati kollha; għalhekk jitlob li dawn l-oqsma ma jiġux soġġetti għall-kooperazzjoni regolatorja jew għal kwalunkwe regola addizzjonali dwar l-Istandards Sanitarji u Fitosanitarji u Ostakoli Tekniċi għall-Kummerċ; jitlob, fil-każ ta’ oqsma li fihom kummerċ f’setturi sensittivi diġà qed iseħħ, ngħidu aħna l-OĠM, għall-istabbiliment ta’ regoli ċari dwar l-ittikkettar li jkunu jsaħħu l-għażla tal-konsumatur;

17. Jenfasizza l-livelli għolja ta’ skrutinju pubbliku mogħti lill-ftehim permezz tal-petizzjonijiet, li qajmu tħassib qawwi dwar it-trasparenza tan-negozjati u l-effetti avversi fuq id-drittijiet tal-ħaddiema u s-servizzi pubbliċi, inklużi l-kura tas-saħħa, is-servizzi soċjali, l-edukazzjoni, l-ilma u s-sanità;

18. Jistieden lill-Kummissjoni biex timpenja ruħha bis-sħiħ għall-preservazzjoni stretta tal-istandards tas-sikurezza tal-ikel, tas-saħħa tal-bniedem u tal-annimali u tal-benessri tal-annimali, kif definiti skont il-leġiżlazzjoni tal-UE, u tiżgura li l-valuri fundamentali tal-UE bħalma huma l-prinċipju ta’ prekawzjoni, ir-rikonoxximent tal-annimali bħala ħlejjaq sensibbli kif stipulat fl-Artikolu 13 tat-TFUE, u l-Karta tad-Drittijiet Fundamentali tal-Unjoni Ewropea ma jiġux imminati u se jiġu rispettati;

19. Jistieden lill-Kummissjoni biex tipprevjenu l-prodotti li ma jkunux ġew prodotti b’konformità mal-istandards tal-UE dwar is-sikurezza tal-ikel, is-saħħa tal-bniedem u tal-annimali u l-benesseri tal-annimali milli jidħlu fis-suq tal-UE;

20. Jistieden lill-Kummissjoni Ewropea tiżgura li prodotti bħalma huma l-OĠM jew prodotti ġejjin minn annimali kklonati u d-dixxendenti tagħhom, u b’sustanzi li huma pprojbiti fl-UE, ma jidħlux fis-suq tal-UE jew li jispiċċaw fil-katina alimentari tal-UE;

21. Jenfasizza li l-ħarsien tal-konsumatur u l-konformità ma’ standards Ewropej ta’ kwalità u sikurezza ogħla għall-ikel u l-prodotti, l-ogħla standards ta’ ħarsien ambjentali u kontrolli mill-aktar stretti fuq l-emissjonijiet industrijali fl-UE u l-Istati Uniti, kif ukoll salvagwardji xierqa biex tiġi protetta d-dejta taċ-ċittadini, għandhom ikunu fil-qalba tan-negozjati tat-TTIP, b’mod partikolari billi jirriżultaw fi:

     - trasparenza sħiħa u aċċessibbiltà pubblika tad-data klinika mill-provi kliniċi għall-farmaċewtiċi;

     - trasparenza sħiħa u aċċessibbiltà pubblika tad-data klinika mill-investigazzjonijiet kliniċi għall-apparat mediku;

     - protezzjoni tal-ħajja jew tas-saħħa umana, tal-annimali jew tal-pjanti permezz tar-rispett u l-ħarsien tas-sensittivitajiet u l-valuri fundamentali taż-żewġ naħat, bħalma hu l-prinċipju ta’ prekawzjoni tal-UE;

     u jenfasizza li n-negozjaturi ma għandhom jikkunsidraw l-ebda impenn dwar il-protezzjoni tad-data fil-qafas ta’ TTIP sakemm tiġi konkluża l-ħidma leġislattiva li tkun għaddejja f’dan il-qasam fl-UE u fl-Istati Uniti;

22. Jenfasizza li r-rispett għas-sovranità ta’ kull stat u għas-sovranità tal-Unjoni Ewropea nnifisha biex jgħaddu l-leġiżlazzjoni u jirregolaw l-ekonomija għandha tkun fil-qalba tan-negozjati tat-TTIP;

23. Jistieden lill-Kummissjoni tindika kif u meta se timplimenta kull waħda mill-miżuri li ġew suġġeriti u kif se tagħti segwitu għall-petizzjonijiet imsemmija hawn fuq; iqis li peress li n-negozjati għadhom għaddejjin, ikun ta’ għajnuna jekk il-Kummissjoni tkun tista’ twettaq is-segwitu fi żmien xahrejn, jiġifieri sal-31 ta’ Mejju 2015;

24. Jinnota li l-Kummissjoni Ewropea rċeviet total ta’ kważi 150,000 risposti għall-konsultazzjoni pubblika tagħha dwar il-protezzjoni tal-investiment u s-Soluzzjoni ta’ Tilwim bejn Investitur u Stat fis-Sħubija Trans-Atlantika ta’ Kummerċ u ta’ Investiment, li 97 % minnhom ċaħdu l-inklużjoni tal-ISDS fit-TTIP; jenfasizza li l-kompatibbiltà ta’ kwalunkwe ISDS mal-UE fis-sistema ġudizzjarja, u b’mod partikolari l-kwistjoni tar-rispett għall-ġurisdizzjoni tal-Qorti tal-Ġustizzja tal-Unjoni Ewropea u d-dritt tal-gvernijiet għar-regolamentazzjoni, huma preokkupazzjonijiet kondiviżi b’mod mifrux fost dawk li wieġbu; jinnota li, eċċezzjonalment, ħafna sottomissjonijiet ġew minn parteċipanti individwali, ħaġa li tenfasizza l-iskala tal-mobilizzazzjoni pubblika dwar it-TTIP, u li xi wħud minn dawk li wieġbu, bħal trade unions jew organizzazzjonijiet tas-soċjetà ċivili kbar, jirrappreżentaw għadd kbir ta’ membri individwali ferm akbar mill-għadd totali ta’ tweġibiet li rċeviet il-Kummissjoni; jenfasizza li d-dispożizzjonijiet dwar il-protezzjoni tal-investiment għandhom jiggarantixxu l-kapaċità tal-Istati biex jirregolaw, u jemmen li f’dan ir-rigward il-Qorti tal-Ġustizzja tal-Unjoni Ewropea għandha żżomm ġurisdizzjoni esklussiva fuq l-interpretazzjoni definittiva tad-dritt tal-Unjoni Ewropea.

RIŻULTAT TAL-VOTAZZJONI FINALI FIL-KUMITAT

RIŻULTAT TAL-VOTAZZJONI FINALI FIL-KUMITAT

• [1]           http://data.consilium.europa.eu/doc/document/ST-11103-2013-DCL-1/mt/pdf
• [2]           http://www.consilium.europa.eu/uedocs/cms_Data/docs/pressdata/en/ec/141920.pdf
• [3]           http://www.consilium.europa.eu/uedocs/cms_data/docs/pressdata/EN/foraff/145906.pdf
• [4]           http://europa.eu/rapid/press-release_STATEMENT-14-1820_en.htm
• [5]           http://data.consilium.europa.eu/doc/document/ST-79-2014-INIT/mt/pdf
• [6]           http://ec.europa.eu/priorities/docs/pg_mt.pdf
• [7]           http://ec.europa.eu/news/2014/docs/c_2014_9052_en.pdf
• [8]           http://europa.eu/rapid/press-release_IP-14-2341_en.htm
• [9]           http://ec.europa.eu/dgs/health_consumer/information_sources/docs/from_farm_to_fork_2004_en.pdf
• [10]          http://trade.ec.europa.eu/doclib/docs/2015/january/tradoc_153022.pdf
• [11]          http://trade.ec.europa.eu/doclib/docs/2015/january/tradoc_153023.pdf
• [12]          http://trade.ec.europa.eu/doclib/docs/2015/january/tradoc_153024.pdf
• [13]          http://trade.ec.europa.eu/doclib/docs/2015/january/tradoc_153025.pdf
• [14]          http://trade.ec.europa.eu/doclib/docs/2015/january/tradoc_153026.pdf
• [15]          http://trade.ec.europa.eu/doclib/docs/2015/january/tradoc_153027.pdf
• [16]          http://trade.ec.europa.eu/doclib/docs/2015/january/tradoc_153028.pdf
• [17]          http://trade.ec.europa.eu/doclib/docs/2015/january/tradoc_153029.pdf
• [18]          http://trade.ec.europa.eu/doclib/docs/2015/january/tradoc_153030.pdf
• [19]          http://trade.ec.europa.eu/doclib/docs/2015/january/tradoc_153031.pdf
• [20]          http://trade.ec.europa.eu/doclib/docs/2015/january/tradoc_153032.pdf
• [21]          http://trade.ec.europa.eu/doclib/docs/2015/february/tradoc_153120.pdf
• [22]          http://trade.ec.europa.eu/doclib/docs/2014/may/tradoc_152512.pdf
• [23]          http://trade.ec.europa.eu/doclib/docs/2015/march/tradoc_153259.pdf
• [24]          ĠU C 68E, 7.3.2014, p. 53.
• [25]          Testi adottati, P7_TA(2013)0227.
• [26]          Testi adottati, P8_TA(2015)0009.
• [27]      http://europa.eu/rapid/press-release_MEMO-13-94_en.htm
• [28]             Testi adottati, P7_TA(2013)0227.
• [29]             http://data.consilium.europa.eu/doc/document/ST-11103-2013-DCL-1/mt/pdf
• [30]             http://www.ustr.gov/sites/default/files/2013%20SPS.pdf
  http://www.ustr.gov/sites/default/files/FINAL-2014-SPS-Report-Compiled_0.pdf
• [31]             http://www.ustr.gov/sites/default/files/2013%20TBT.pdf
  http://www.ustr.gov/sites/default/files/2014%20TBT%20Report.pdf
• [32]             http://www.europarl.europa.eu/RegData/etudes/etudes/join/2013/507492/IPOL-ENVI_ET(2013)507492_EN.pdf
• [33]             http://www.europarl.europa.eu/RegData/etudes/STUD/2014/536293/IPOL_STU(2014)536293_EN.pdf
• [34]             http://unctad.org/en/PublicationsLibrary/webdiaepcb2014d4_en.pdf
• [35]             http://ec.europa.eu/dgs/health_consumer/information_sources/docs/from_farm_to_fork_2004_en.pdf
• [36]             http://data.consilium.europa.eu/doc/document/ST-11103-2013-DCL-1/mt/pdf
• [37]             http://europa.eu/rapid/press-release_STATEMENT-14-12_en.htm
• [38]             http://www.whitehouse.gov/the-press-office/2014/03/26/press-conference-president-obama-european-council-president-van-rompuy-a
• [39]             Ara r-Rapport 2014 dwar l-Ostakli Tekniċi għall-Kummerċ mir-Rappreżentant tal-Kummerċ tal-Istati Uniti, p. 45.
• [40]             Għall-Istati Uniti, ara r-Rapporti tal-2013 u l-2014 dwar l-Ostakli Tekniċi għall-Kummerċ mir-Rappreżentant tal-Kummerċ tal-Istati Uniti.
• [41]              http://www.globalmeatnews.com/Industry-Markets/Canada-to-develop-hormone-free-beef-for-EU
• [42]             http://www.unscn.org/files/Announcements/Other_announcements/A-HRC-26-31_en.pdf
• [43]             http://apps.who.int/iris/bitstream/10665/94384/1/9789241506236_eng.pdf?ua=1
• [44]             http://www.who.int/dg/speeches/2013/health_promotion_20130610/en/
• [45]             http://www.healthpolicyjrnl.com/article/S0168-8510(14)00203-6/abstract
• [46]              C(2014)9052 finali.
• [47]             http://www.ombudsman.europa.eu/en/cases/correspondence.faces/en/58643/html.bookmark
• [48]             Ara d-diskors tal-Kummissarju tal-Kummerċ tal-UE Cecilia Malmström tal-11 ta' Diċembru 2014.
• [49]  Testi Adottati, P7_TA(2013)0227.
• [50]  Testi adottati, P7_TA(2014)0230.
• [51]  Kawża C-658/11 il-Parlament v il-Kunsill, sentenza tal-24 ta' Ġunju 2014.
• [52]  ĠU L 145, 31.5.2001, p. 43.
• [53]  il-Kawża C-350/12, Kunsill tal-Unjoni Ewropea vs Sophie In’ t Veld.
• [54]  L-Opinjoni 2/13, Adeżjoni tal-Unjoni Ewropea għall-Konvenzjoni Ewropea għall-protezzjoni tad-drittijiet tal-bniedem u l-libertajiet fundamentali — kompatibilità tal-abbozz ta' ftehim mat-Trattat tal-UE u t-Trattat dwar il-Funzjonament tal-Unjoni Ewropea.
• [55]  L-Opinjoni 1/09, abbozz ta' ftehim — il-Ħolqien ta' Sistema Unifikata ta' Litigazzjoni dwar il-Privattivi — Qorti għal Privattivi Ewropej u Komunitarji — kompatibilità tal-abbozz ta' ftehim mat-Trattati.
• [56]  ĠU C 68 E, 7.3.2014, p. 53.
• [57]  Test adottati, P7_TA(2013)0227.
• [58]  Testi adottati, P7_TA(2014)0230.