RAPPORT dwar il-proposta għal deċiżjoni tal-Parlament Ewropew u tal-Kunsill dwar il-mobilizzazzjoni tal-Fond Ewropew ta' Aġġustament għall-Globalizzazzjoni wara applikazzjoni mill-Ġermanja – EGF/2020/003 DE/GMH Guss

ANNESS: DEĊIŻJONI TAL-PARLAMENT EWROPEW U TAL-KUNSILL

dwar il-mobilizzazzjoni tal-Fond Ewropew ta' Aġġustament għall-Globalizzazzjoni wara applikazzjoni mill-Ġermanja – EGF/2020/003 DE/Germany GMH Guss

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea,

 

Wara li kkunsidraw ir-Regolament (UE) Nru 1309/2013 tal-Parlament Ewropew u tal-Kunsill tas-17 ta' Diċembru 2013 dwar il-Fond Ewropew ta' Aġġustament għall-Globalizzazzjoni (2014-2020) u li jħassar ir-Regolament (KE) Nru 1927/2006[9], u b'mod partikolari l-Artikolu 15(4) tiegħu,

 

Wara li kkunsidraw il-Ftehim Interistituzzjonali tas-16 ta' Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f'materji ta' baġit u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta' riżorsi proprji ġodda[10], u b'mod partikolari l-punt 9 tiegħu,

 

Wara li kkunsidraw il-proposta mill-Kummissjoni Ewropea,

 

Billi:

(1) Il-Fond Ewropew ta' Aġġustament għall-Globalizzazzjoni (FEG) għandu l-iskop li jagħti appoġġ lill-ħaddiema li jkunu ngħataw is-sensja u lill-persuni li kienu jaħdmu għal rashom u kellhom iwaqqfu l-attività tagħhom minħabba bidliet strutturali kbar fl-andament kummerċjali dinji bħala riżultat tal-globalizzazzjoni, bħala riżultat tal-kontinwazzjoni tal-kriżi finanzjarja u ekonomika globali, jew bħala riżultat ta' kriżi finanzjarja u ekonomika globali ġdida, u li jassistihom fl-integrazzjoni mill-ġdid tagħhom fis-suq tax-xogħol.

(2) Il-FEG ma għandux jaqbeż l-ammont massimu annwali ta' EUR 186 miljun (il-prezzijiet tal-2018), kif stabbilit fl-Artikolu 8(1) tar-Regolament tal-Kunsill (UE, Euratom) 2020/2093[11].

(3) Fil-15 ta' Diċembru 2020, il-Ġermanja ppreżentat applikazzjoni biex timmobilizza l-FEG, fir-rigward tas-sensji minn GMH Guss GmbH fil-Ġermanja. Din l-applikazzjoni ġiet issupplimentata b'informazzjoni addizzjonali mogħtija f'konformità mal-Artikolu 8(3) tar-Regolament (UE) Nru 1309/2013. Dik l-applikazzjoni tikkonforma mar-rekwiżiti għad-determinazzjoni ta' kontribuzzjoni finanzjarja mill-FEG, kif stabbilit fl-Artikolu 13 tar-Regolament (UE) Nru 1309/2013.

(4) Għalhekk, jenħtieġ li l-FEG jiġi mmobilizzat sabiex jipprovdi kontribuzzjoni finanzjarja ta' EUR 1 081 706 fir-rigward tal-applikazzjoni ppreżentata mill-Ġermanja.

(5) Biex jittieħed l-inqas żmien possibbli għall-mobilizzazzjoni tal-FEG, din id-deċiżjoni jenħtieġ li tapplika mid-data tal-adozzjoni tagħha,

ADOTTAW DIN ID-DEĊIŻJONI:

Artikolu 1

Għall-baġit ġenerali tal-Unjoni għas-sena finanzjarja 2021, il-Fond Ewropew ta' Aġġustament għall-Globalizzazzjoni għandu jiġi mmobilizzat biex jipprovdi l-ammont ta' EUR  f'approprjazzjonijiet ta' impenn u ta' pagament.

Artikolu 2

Din id-Deċiżjoni għandha tidħol fis-seħħ fil-jum tal-pubblikazzjoni tagħha f'Il-Ġurnal Uffiċjali tal-Unjoni Ewropea. Għandha tapplika mill-[data tal-adozzjoni tagħha].

Magħmul fi Brussell,

Għall-Parlament Ewropew F'isem il-Kunsill

Il-President Il-President

NOTA SPJEGATTIVA

I. Kuntest

Il-Fond Ewropew ta' Aġġustament għall-Globalizzazzjoni nħoloq biex tingħata assistenza addizzjonali lill-ħaddiema li jkunu qed ibatu l-konsegwenzi ta' bidliet strutturali kbar fl-andament tal-kummerċ dinji.

Skont id-dispożizzjonijiet tal-Artikolu (8)(1) tar-Regolament tal-Kunsill (UE, Euratom) Nru 2020/2093 li jistabbilixxi l-qafas finanzjarju pluriennali għas-snin 2021-2027[12] u tal-Artikolu 15 tar-Regolament (UE) Nru 1309/2013[13], il-Fond ma jistax jaqbeż ammont annwali massimu ta' EUR 186 miljun (prezzijiet tal-2018).

Fir-rigward tal-proċedura, skont il-punt 9 tal-Ftehim Interistituzzjonali tas-16 ta' Diċembru 2020 bejn il-Parlament Ewropew, il-Kunsill u l-Kummissjoni dwar dixxiplina baġitarja, dwar kooperazzjoni f'materji ta' baġit u dwar ġestjoni finanzjarja tajba kif ukoll dwar riżorsi proprji ġodda, inkluż pjan direzzjonali lejn l-introduzzjoni ta' riżorsi proprji ġodda[14], sabiex jiġi attivat il-Fond, il-Kummissjoni, f'każ ta' valutazzjoni pożittiva ta' applikazzjoni, tippreżenta lill-awtorità baġitarja proposta għall-mobilizzazzjoni tal-Fond u, fl-istess waqt, talba korrispondenti għat-trasferiment.

II. L-applikazzjoni tal-Ġermanja u l-proposta tal-Kummissjoni

Fil-15 ta' Diċembru 2020, il-Ġermanja ppreżentat l-applikazzjoni EGF/2020/003 DE/GMH Guss għal kontribuzzjoni finanzjarja mill-FEG, wara 585 sensja[15] f'erba' sussidjarji tal-kumpanija GMH Guss GmbH, li jinsabu fir-reġjuni ta' livell NUTS 2 ta' Düsseldorf (DEA1)[16] u Arnsberg (DEA5)[17].

Wara li vvalutat din l-applikazzjoni, il-Kummissjoni kkonkludiet li, f'konformità mad-dispożizzjonijiet kollha applikabbli tar-Regolament tal-FEG, il-kundizzjonijiet għall-għoti ta' kontribuzzjoni finanzjarja mill-FEG ġew sodisfatti.

Fis-27 ta' April 2021, il-Kummissjoni adottat proposta għal deċiżjoni dwar il-mobilizzazzjoni tal-FEG favur il-Ġermanja bħala appoġġ għar-reintegrazzjoni fis-suq tax-xogħol ta' 476 benefiċjarju fil-mira, jiġifieri ħaddiema li ngħataw is-sensja fis-settur ekonomiku kklassifikat taħt NACE Reviżjoni 2, jiġifieri d-Diviżjoni 24 (Manifattura ta' metalliċi bażiċi).

Il-Kummissjoni qieset l-applikazzjoni ammissibbli skont il-kriterji ta' intervent tal-Artikolu 4(1)(a) tar-Regolament tal-FEG, li jirrikjedi li tkun ingħatat is-sensja lil tal-inqas 500 ħaddiem matul perjodu ta' referenza ta' erba' xhur f'intrapriża fi Stat Membru, inklużi ħaddiema li jkunu ngħataw is-sensja minn fornituri u produtturi downstream u/jew persuni li jaħdmu għal rashom u li l-attività tagħhom intemmet.

Din hija r-raba' applikazzjoni tal-2020 u t-tielet waħda li għandha tiġi eżaminata fl-ambitu tal-baġit tal-2021, inkluż il-QFP il-ġdid (għar-Regolament tal-Kunsill (UE, Euratom) Nru 2020/2093 tas-17 ta' Diċembru 2020 li jistabbilixxi l-qafas finanzjarju pluriennali għas-snin 2021 sa 2027[18] u l-FII tas-16 ta' Diċembru 2020. Il-Baġit tal-2021 għandu linji baġitarji ta' riżerva għall-pagamenti tal-FEG (qabel l-2021) li se jintużaw għall-pagamenti mobilizzati fl-ambitu tar-regolament tal-FEG tal-2014-2020. Ir-regolament suċċessur tal-FEG għall-2021-2027 (2018/0202(COD)) ġie adottat mill-plenarja tal-Parlament Ewropew fit-28 ta' April 2021, iżda la se jkollu impatt fuq din il-proċedura u lanqas fuq kwalunkwe proċedura li ġejja għall-mobilizzazzjoni fl-ambitu tal-programm l-antik tal-2014-2020.

In-numru ta' 585 ħaddiem li ngħataw is-sensja ġie kkalkulat mid-data li fiha l-impjegatur, f'konformità mal-Artikolu 3(1) tad-Direttiva tal-Kunsill 98/59/KE[19], innotifika bil-miktub lill-awtorità pubblika kompetenti bis-sensji kollettivi ppjanati. Il-Ġermanja kkonfermat li dawn il-585 sensja realment saru.

L-applikazzjoni tikkonċerna 476 ħaddiem fil-mira li ngħataw is-sensja u tirreferi għall-mobilizzazzjoni ta' ammont totali ta' EUR  mill-FEG għall-Ġermanja, li jirrappreżenta 60 % tal-ispejjeż totali tal-azzjonijiet proposti.

Sabiex tiġi stabbilita r-rabta bejn is-sensji u l-bidliet strutturali ewlenin fl-andament tal-kummerċ dinji minħabba l-globalizzazzjoni, il-Ġermanja bbażat l-applikazzjoni fuq l-argument li l-industrija tal-fonderiji fil-Ġermanja qed tħabbat wiċċha ma' sfidi kbar bħal bidliet fil-kummerċ internazzjonali ta' oġġetti u servizzi, kif ukoll ir-rilokalizzazzjoni ta' attivitajiet lejn pajjiżi terzi.

Fil-Ġermanja, il-klijenti ewlenin tal-fonderiji għall-ikkastjar tal-metall huma l-industrija awtomobilistika (60 %) u l-industrija tal-magni (26 %)[20]. Peress li l-fonderiji huma speċjalizzati ħafna u jipprovdu prodotti magħmulin apposta għall-klijenti tagħhom, l-attivitajiet tal-fonderiji jiddependu ħafna mid-domanda ta' klijenti ewlenin speċifiċi. Fir-rigward tal-industrija awtomobilistika, minħabba ż-żieda fid-domanda fir-reġjun, l-Asja issa tiddomina sew fil-produzzjoni globali tal-karozzi, b'sehem mis-suq dinji ta' 54 % tal-produzzjoni globali tal-karozzi fl-2019. F'numri totali, fl-2019, il-produzzjoni tal-karozzi fil-Ġermanja naqset għall-aktar livell baxx mill-1996[21]. Fir-rigward tal-produtturi ta' trakkijiet tqal, il-produzzjoni ta' trakkijiet tqal li jiżnu aktar minn 3,5 tunnellata naqset kważi bin-nofs fil-Ġermanja, minn 256 131 vettura fl-2008 għal 133 997 fl-2019. Barra minn hekk, fis-suq Ewropew żviluppat xejra fl-industrija awtomobilistika kollha lejn id-delokalizzazzjoni tal-produzzjoni jew ta' partijiet mill-katina tal-provvista għall-Ewropa tal-Lvant, inklużi pajjiżi terzi. L-istandards ambjentali aktar baxxi, b'mod partikolari f'pajjiżi terzi, huma raġuni oħra biex il-prodotti tal-ikkastjar tal-metall jiġu delokalizzati[22]. Fir-rigward tal-industrija tal-bini tal-bastimenti, il-bini tal-bastimenti annwali medju fl-Ewropa naqas bin-nofs bejn l-2011-2019 meta mqabbel mal-2002-2010[23]. Dawn l-isfidi relatati mal-globalizzazzjoni poġġew pressjoni qawwija fuq l-industrija tal-ikkastjar tal-metall, li wasslet għal tnaqqis ta' 8,9 % fil-produzzjoni ġenerali tal-ikkastjar tal-metall fil-Ġermanja bejn l-2018 u l-2019[24].

It-tmien tipi ta' azzjonijiet li għandhom jiġu pprovduti lill-ħaddiema li ngħataw is-sensja u li għalihom qed jintalab kofinanzjament mill-FEG jikkonsistu fi:

a. Miżuri għat-titjib tal-ħiliet: Dawn huma offruti wara intervisti ta' tfassil ta' profili u ta' gwida għall-karriera. Il-korsijiet jistgħu jiġu pprovduti individwalment jew fi gruppi. Meta wieħed iqis l-għadd kbir ta' parteċipanti bi sfond migratorju, se jiġu offruti korsijiet tal-Ġermaniż lill-parteċipanti b'għarfien dgħajjef tal-Ġermaniż.

b. Gruppi ta' pari / gruppi ta' ħidma: Dawn se jkunu fora ta' gruppi assistiti minn faċilitatur, li se jgħin lill-parteċipanti jaqsmu ideat u jirriflettu dwar l-esperjenzi tagħhom. Xi gruppi ta' pari jiffukaw fuq sfond komuni tal-parteċipanti – bħal parteċipanti bi sfond migratorju, jew parteċipanti akbar fl-età.

c. Servizz ta' pariri dwar il-bidu ta' negozju: Dan se jinkludi pakkett ta' servizzi ta' konsulenza għal dawk interessati li jibdew in-negozji tagħhom stess. Dawn is-servizzi se jinkludu miżuri ta' kkowċjar individwalizzati mfassla apposta, kif ukoll il-parteċipazzjoni f'sessjonijiet ta' kkowċjar fi gruppi.

d. Għajnuna għat-tfittix ta' impjieg: Job scouts professjonali se jgħinu biex jidentifikaw postijiet tax-xogħol vakanti potenzjali li għadhom ma ġewx ippubblikati, u li jistgħu jissodisfaw xi ħaddiema eliġibbli.

e. Konsulenza ta' gwida u orjentazzjoni vokazzjonali: Abbażi tal-intervisti ta' tfassil ta' profili inizjali, il-konsulenti ta' gwida mhux biss se jagħtu informazzjoni dwar l-iżviluppi fis-suq tax-xogħol u l-perkorsi tal-karrieri possibbli, iżda jipprovdu wkoll lill-applikanti b'għajnuna u appoġġ motivazzjonali u ta' ispirazzjoni. Il-ħaddiema għandhom jiġu mħeġġa jtejbu l-ħiliet tagħhom jew jitgħallmu ħiliet ġodda, u jipparteċipaw f'miżuri ta' edukazzjoni u taħriġ immirati biex isibu impjieg ġdid, possibbilment f'settur differenti.

f. Konsulenza dwar l-impjiegi internazzjonali: Għal dawk li qed ifittxu impjieg li jixtiequ jaċċettaw pożizzjoni fi Stat Membru ieħor tal-UE, konsulenti speċjali se jassistu fit-tfittxija għal impjieg, jinformaw dwar il-kundizzjonijiet tax-xogħol fl-Istat Membru rispettiv, u jgħinu biex il-kwalifiki jiġu tradotti u rikonoxxuti.

g. Mentoring ta' segwitu: Il-ħaddiema jistgħu jibbenefikaw minn servizzi oħrajn ta' konsulenza wara li jibdew jaħdmu fl-impjieg il-ġdid biex tiġi ffaċilitata t-tranżizzjoni fl-impjieg il-ġdid u biex jitnaqqas ir-riskju ta' telf ta' impjiegi.

h. Allowance tat-taħriġ: Il-ħlas jibda mid-data li fiha l-ħaddiem jidħol fil-kumpanija ta' trasferiment, u jintemm hekk kif il-persuna titlaq minn mal-kumpanija ta' trasferiment. Il-parteċipazzjoni f'miżuri attivi tas-suq tax-xogħol hija prerekwiżit biex wieħed jirċievi allowance.

 

Minħabba li sehem kbir mill-benefiċjarji għandhom livell baxx ta' kwalifiki, u f'ħafna każijiet għandhom għarfien dgħajjef tal-lingwa Ġermaniża, l-iffinanzjar tal-klassijiet tal-Ġermaniż huwa meqjus importanti għall-impjieg futur tagħhom.

Skont il-Kummissjoni, il-miżuri deskritti jikkostitwixxu miżuri attivi fis-suq tax-xogħol fl-azzjonijiet eliġibbli stabbiliti fl-Artikolu 7 tar-Regolament dwar il-FEG u ma jissostitwux miżuri passivi ta' protezzjoni soċjali.

Il-Ġermanja pprovdiet l-informazzjoni meħtieġa dwar azzjonijiet li huma obbligatorji għall-intrapriżi kkonċernati permezz tal-leġiżlazzjoni nazzjonali jew skont ftehimiet kollettivi. L-awtoritajiet Ġermaniżi kkonfermaw li kontribuzzjoni finanzjarja mill-FEG mhijiex se tissostitwixxi tali azzjonijiet.

Proċedura

Sabiex timmobilizza l-Fond, il-Kummissjoni ressqet talba quddiem l-Awtorità Baġitarja għal trasferiment ta' ammont globali ta' EUR 1 081 706 mir-riżerva tal-FEG (30 04 02) għal-linja baġitarja (16 02 99 01) tal-FEG (qabel l-2021). F'każ ta' nuqqas ta' qbil għandha tinbeda l-proċedura ta' trilogu, kif previst fl-Artikolu 15(4) tar-Regolament dwar il-FEG.

Skont ftehim intern, il-Kumitat għall-Impjiegi u l-Affarijiet Soċjali għandu jiġi assoċjat fil-proċess sabiex jagħti appoġġ kostruttiv u jikkontribwixxi għall-valutazzjoni tal-applikazzjonijiet mill-Fond.

 

ITTRA TAL-KUMITAT GĦALL-IMPJIEGI U L-AFFARIJIET SOĊJALI

Is-Sur Johan Van Overtveldt

President

Kumitat għall-Baġits

BRUSSELL

Suġġett: Opinjoni dwar il-mobilizzazzjoni tal-Fond Ewropew ta' Aġġustament għall-Globalizzazzjoni – EGF/2020/003 DE/GMH Guss - Ġermanja (2021/0107(BUD))

Sur President,

Skont il-proċedura inkwistjoni, il-Kumitat għall-Impjiegi u l-Affarijiet Soċjali ngħata l-istruzzjoni li jippreżenta opinjoni lill-Kumitat tiegħek. Fil-laqgħa tiegħu tat-18 ta' Mejju 2021, iddeċieda li jibgħat din l-opinjoni fil-forma ta' ittra.

Il-Kumitat għall-Impjiegi u l-Affarijiet Soċjali eżamina l-kwistjoni matul il-laqgħa tiegħu tas-27 ta' Mejju 2021. Matul din il-laqgħa, iddeċieda li jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu ta' hawn taħt.

Dejjem tiegħek,

Lucia Ďuriš Nicholsonová

 

SUĠĠERIMENTI

Id-deliberazzjonijiet tal-Kumitat EMPL huma msejsa fuq il-kunsiderazzjonijiet li ġejjin:

 

A. billi fil-15 ta' Diċembru 2020, il-Ġermanja ressqet l-applikazzjoni EGF/2020/003 DE/GMH Guss għal kontribuzzjoni finanzjarja mill-FEG, wara s-sensji li ngħataw minn GMH Guss GmbH fil-Ġermanja; billi l-applikazzjoni tressqet fi żmien 12-il ġimgħa mid-data li fiha ġew issodisfati l-kriterji ta' intervent stabbiliti fl-Artikolu 4 tar-Regolament tal-FEG;

B. billi l-Ġermanja ressqet l-applikazzjoni skont il-kriterji ta' intervent tal-Artikolu 4(1)(a) tar-Regolament tal-FEG, li jitlob li tal-anqas 500 ħaddiem ikunu ngħataw is-sensja matul perjodu ta' referenza ta' erba' xhur f'intrapriża ta' Stat Membru;

C. billi l-applikazzjoni tikkonċerna 585 ħaddiem li ngħataw is-sensja minn erba' sussidjarji ta' GMH Guss GmbH wara proċeduri ta' insolvenza; billi din l-intrapriża topera fis-settur ekonomiku kklassifikat taħt id-Diviżjoni 24 tan-NACE Reviżjoni 2 (Manifattura ta' metalliċi bażiċi); billi dawn is-siti jinsabu fiż-żona tar-Ruhr, ir-reġjun tradizzjonalment industrijali tan-Nordrhein-Westfalen;

D. billi l-applikazzjoni tikkonċerna 476 ħaddiem li ngħataw is-sensja u tirreferi għall-mobilizzazzjoni ta' ammont totali ta' EUR 1 081 706 mill-FEG għall-Ġermanja, li jirrappreżenta 60 % tal-ispejjeż totali tal-azzjonijiet proposti;

E. billi l-industrija tal-fonderiji fil-Ġermanja qed tħabbat wiċċha ma' sfidi kbar bħal bidliet fil-kummerċ internazzjonali ta' prodotti u servizzi, pereżempju fl-industrija awtomobilistika, li s-settur jiddependi partikolarment fuqha, kif ukoll ir-rilokazzjoni ta' attivitajiet lejn pajjiżi terzi – inklużi pajjiżi kandidati għas-sħubija fl-UE – xi drabi kkaratterizzati minn standards ambjentali aktar baxxi u industriji ssussidjati ħafna; billi, għall-ewwel darba fl-istorja, il-manifatturi tal-karozzi Ġermaniżi kienu qed jipproduċu aktar karozzi fiċ-Ċina milli fil-Ġermanja;

F. billi, bejn l-2018 u l-2019, il-produzzjoni globali tal-ikkastjar tal-metall fil-Ġermanja naqset bi 8,9 % minħabba dawn l-isfidi relatati mal-globalizzazzjoni, u affettwat b'mod partikolari lin-Nordrhein-Westfalen, fejn jinħadmu 25 % tal-metalli kkastjati fil-Ġermanja;

Għalhekk, il-Kumitat għall-Impjiegi u l-Affarijiet Soċjali jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

 

1.  Jaqbel mal-Kummissjoni li l-kundizzjonijiet stabbiliti fl-Artikolu 4(1)(a) tar-Regolament tal-FEG huma ssodisfati, u li l-Ġermanja hija intitolata għal kontribuzzjoni finanzjarja ta' EUR 1 081 706 skont dan ir-Regolament, ammont li jirrappreżenta 60 % tal-ispiża totali ta' EUR 1 802 845;

2.  Jinnota li r-rekwiżiti proċedurali kollha ġew issodisfati;

3.  Jinnota li ħafna mill-ħaddiema li ngħataw is-sensja huma rġiel li qegħdin fit-tieni nofs tal-karriera professjonali tagħhom, għandhom livell baxx ta' kwalifiki formali, u f'ħafna każijiet għandhom għarfien dgħajjef tal-lingwa Ġermaniża, billi għadd kbir ta' benefiċjarji ġejjin minn sfond migratorju; jenfasizza li l-profil ta' dawn il-ħaddiema u l-ħtiġijiet speċifiċi tagħhom iridu jiġu indirizzati mill-pakkett personalizzat ta' servizzi pprovduti fl-ambitu tal-FEG u jilqa', f'dan ir-rigward, l-inklużjoni ta' miżuri ta' titjib tal-ħiliet, workshops fi gruppi bejn il-pari u mentoraġġ ta' segwitu;

4.  Jissottolinja li dawn is-sensji huma mistennija jkollhom impatt konsiderevoli fuq iż-żona tar-Ruhr, ir-reġjun tradizzjonalment industrijali tan-Nordrhein-Westfalen, minħabba sfidi strutturali li ilhom jeżistu mis-sittinijiet u li ġew aggravati mill-pandemija tal-COVID-19 li għaddejja bħalissa;

5.  Ifakkar li l-għajnuna mill-FEG u minn fondi oħra tal-Unjoni m'għandhiex tissostitwixxi azzjonijiet li huma responsabbiltà ta' min iħaddem, sija skont il-leġiżlazzjoni nazzjonali u sija bis-saħħa ta' ftehimiet kollettivi.

 

 

 

ITTRA TAL-KUMITAT GĦALL-IŻVILUPP REĠJONALI

L-Onor. Johan VAN OVERTVELDT

President tal-Kumitat għall-Baġits

WIE 05U012

 

 

Suġġett: Mobilizzazzjoni tal-Fond Ewropew ta' Aġġustament għall-Globalizzazzjoni wara applikazzjoni mill-Ġermanja – EGF/2020/003 DE/GMBH

 

 

Onor. Van Overtveldt,

 

 

Il-Kummissjoni Ewropea bagħtet lill-Parlament Ewropew il-proposta tagħha għal deċiżjoni tal-Parlament Ewropew u tal-Kunsill dwar il-mobilizzazzjoni tal-Fond Ewropew ta' Aġġustament għall-Globalizzazzjoni wara applikazzjoni mill-Ġermanja (COM(2021)0207), wara s-sensji li ngħataw minn GMH Guss GmbH fil-Ġermanja.

Nifhem li hemm il-ħsieb li dalwaqt jiġi adottat rapport dwar din il-proposta fil-Kumitat għall-Baġits.

 

L-applikazzjoni tikkonċerna 585 ħaddiem li ngħataw is-sensja minn erba' sussidjarji ta' GMH Guss GmbH. L-għadd stmat ta' ħaddiema ssensjati li huma mistennija jipparteċipaw fil-miżuri huwa ta' 476. Is-sensji saru fir-reġjuni tal-livell NUTS 2 ta' Düsseldorf (DEA1) u Arnsberg (DEA5).

 

Is-servizzi personalizzati li għandhom ikunu pprovduti lill-ħaddiema ssensjati jikkonsistu f'dawn l-azzjonijiet li ġejjin, li jikkostitwixxu miżuri attivi fis-suq tax-xogħol fl-azzjonijiet eliġibbli stabbiliti fl-Artikolu 7 tar-Regolament dwar il-FEG: Miżuri għat-titjib tal-ħiliet, Gruppi ta' pari/Gruppi ta' ħidma, Servizz ta' pariri dwar il-bidu ta' negozju, Għajnuna għat-tfittix ta' impjieg, Konsulenza ta' gwida u orjentazzjoni vokazzjonali, Konsulenza dwar l-impjiegi internazzjonali, Mentoring ta' segwitu u Allowance tat-taħriġ.

 

L-ispejjeż totali stmati huma ta' EUR 1 802 845, li huma magħmula min-nefqa għal servizzi personalizzati ta' EUR 1 730 731 u n-nefqa għal attivitajiet ta' tħejjija, ta' ġestjoni, informazzjoni u pubbliċità, ta' kontroll u ta' rapportar ta' EUR 72 114. Il-kontribuzzjoni finanzjarja totali mitluba mill-FEG hija ta' EUR 1 081 706 (60 % tal-ispejjeż totali).

 

Din it-tielet mobilizzazzjoni tar-riżerva tal-FEG tirrappreżenta 2 % tal-approprjazzjonijiet disponibbli għall-2021 (mobilizzazzjonijiet kumulattivi 1-3 = 4,7 %) u tħalli disponibbli EUR 188 miljun f'approprjazzjonijiet ta' impenn.

 

Ir-regoli applikabbli għall-kontribuzzjonijiet finanzjarji mill-Fond Ewropew ta' Aġġustament għall-Globalizzazzjoni (il-FEG) huma stabbiliti fir-Regolament (UE) Nru 1309/2013 tal-Parlament Ewropew u tal-Kunsill tas-17 ta' Diċembru 2013 dwar il-Fond Ewropew ta' Aġġustament għall-Globalizzazzjoni (2014-2020) u li jħassar ir-Regolament (KE) Nru 1927/20061 (ir-"Regolament tal-FEG").

 

Il-koordinaturi tal-kumitat ivvalutaw din il-proposta u talbuni niktiblek biex ninfurmak li l-maġġoranza ta' dan il-kumitat m'għandha l-ebda oġġezzjoni għal din il-mobilizzazzjoni tal-FEG biex jiġi allokat l-ammont imsemmi hawn fuq kif propost mill-Kummissjoni.

 

 

Dejjem tiegħek,

 

 

 

Younous OMARJEE

INFORMAZZJONI DWAR L-ADOZZJONI FIL-KUMITAT RESPONSABBLI

 

VOTAZZJONI FINALI B'SEJĦA TAL-ISMIJIET FIL-KUMITAT RESPONSABBLI

 

 

 

Tifsira tas-simboli użati:

+ : favur

- : kontra

0 : astensjoni