RAPPORT dwar strateġija UE-Ċina ġdida

MOZZJONI GĦAL RIŻOLUZZJONI TAL-PARLAMENT EWROPEW

dwar strateġija UE-Ċina ġdida

(2021/2037(INI))

Il-Parlament Ewropew,

– wara li kkunsidra l-komunikazzjoni konġunta tal-Kummissjoni u r-Rappreżentant Għoli tal-Unjoni għall-Affarijiet Barranin u l-Politika ta' Sigurtà tat-12 ta' Marzu 2019 bit-titolu "UE-Ċina: Perspettiva strateġika" (JOIN(2019)0005),

– wara li kkunsidra d-djalogu bejn l-UE u ċ-Ċina dwar id-drittijiet tal-bniedem, imniedi fl-1995, u s-37 sessjoni tiegħu, li saret fi Brussell fl-1 u t-2 ta' April 2019,

– wara li kkunsidra s-Sħubija Strateġika bejn l-UE u ċ-Ċina varata fl-2003,

– wara li kkunsidra l-Aġenda Strateġika għall-Kooperazzjoni UE-Ċina 2020,

– wara li kkunsidra l-Istrateġija Globali għall-Politika Estera u ta' Sigurtà tal-Unjoni Ewropea ta' Ġunju 2016,

– wara li kkunsidra r-Regolament tal-Kunsill (UE) 2020/1998[1] u d-Deċiżjoni tal-Kunsill (PESK) 2020/1999[2] tas-7 ta' Diċembru 2020 li tikkonċerna miżuri restrittivi kontra l-ksur u l-abbużi serji tad-drittijiet tal-bniedem,

– wara li kkunsidra l-konklużjonijiet tal-Kunsill dwar Hong Kong tat-28 ta' Lulju 2020,

– wara li kkunsidra r-riżoluzzjonijiet preċedenti tiegħu dwar is-sitwazzjoni tad-drittijiet tal-bniedem fiċ-Ċina, b'mod partikolari dawk tas-17 ta' Diċembru 2020 dwar ix-xogħol furzat u s-sitwazzjoni tal-Ujguri fir-Reġjun Awtonomu Ujgur tax-Xinjiang[3], tat-18 ta' April 2019 dwar iċ-Ċina, b'mod partikolari s-sitwazzjoni tal-minoranzi reliġjużi u etniċi[4], tal-4 ta' Ottubru 2018 dwar id-detenzjoni arbitrarja tal-massa tal-Ujguri u l-Każaki fir-Reġjun Awtonomu Ujgur ta' Xinjiang[5], tat-12 ta' Settembru 2018 dwar il-qagħda tar-relazzjonijiet UE-Ċina[6], u tal-15 ta' Diċembru 2016 dwar il-każijiet tal-Akkademja Buddista Tibetana ta' Larung Gar u Ilham Tohti[7],

– wara li kkunsidra r-riżoluzzjonijiet u r-rakkomandazzjonijiet preċedenti tiegħu dwar Hong Kong, b'mod partikolari dawk tad-19 ta' Ġunju 2020 dwar il-liġi tal-PRC dwar is-sigurtà nazzjonali għal Hong Kong u l-ħtieġa li l-UE tiddefendi l-livell għoli ta' awtonomija ta' Hong Kong[8], tal-21 ta' Jannar 2021 dwar ir-repressjoni tal-oppożizzjoni demokratika f'Hong Kong[9], u tat-13 ta' Diċembru 2017 lill-Kunsill, lill-Kummissjoni u lill-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta' Sigurtà f'Hong Kong, 20 sena wara t-trasferiment[10],

– wara li kkunsidra r-riżoluzzjoni tiegħu tas-26 ta' Novembru 2020 dwar ir-Rieżami tal-Politika Kummerċjali tal-UE[11],

– wara li kkunsidra r-riżoluzzjoni tiegħu dwar il-kontrosanzjonijiet Ċiniżi fuq entitajiet tal-UE, Membri tal-PE u Deputati nazzjonali[12],

– wara li kkunsidra r-riżoluzzjoni tiegħu tal-21 ta' Jannar 2021 dwar il-konnettività u r-relazzjonijiet bejn l-UE u l-Asja[13],

– wara li kkunsidra d-Dikjarazzjoni Universali tad-Drittijiet tal-Bniedem (UDHR) u trattati u strumenti oħra tan-Nazzjonijiet Uniti dwar id-drittijiet tal-bniedem,

– wara li kkunsidra l-Konvenzjoni tan-NU tal-1948 dwar il-Prevenzjoni u l-Kastig tad-Delitt ta' Ġenoċidju,

– wara li kkunsidra l-Protokoll tal-2014 għall-Konvenzjoni tal-Organizzazzjoni Internazzjonali tax-Xogħol tal-1930 dwar ix-Xogħol Furzat, li ma ġiex iffirmat miċ-Ċina,

– wara li kkunsidra l-Konvenzjoni Qafas tan-Nazzjonijiet Uniti dwar it-Tibdil fil-Klima (UNFCCC) u l-Ftehim ta' Pariġi, li daħal fis-seħħ fl-4 ta' Novembru 2016,

– wara li kkunsidra l-Konvenzjoni tan-NU dwar id-Dritt tal-Baħar (UNCLOS) konkluża fl-10 ta' Diċembru 1982 u li ilha fis-seħħ mis-16 ta' Novembru 1994,

– wara li kkunsidra r-rapport tal-Grupp ta' Riflessjoni Maħtur mis-Segretarju Ġenerali tan-NATO tal-25 ta' Novembru 2020 bit-titolu "NATO 2030: United for a New Era" (NATO 2030: Magħquda għal Era Ġdida),

– wara li kkunsidra l-14-il Pjan ta' Ħames Snin taċ-Ċina u l-prinċipji ta' "ċirkolazzjoni doppja" u "ktajjen tal-provvista sikuri",

– wara li kkunsidra l-Artikolu 36 tal-Kostituzzjoni tar-Repubblika tal-Poplu taċ-Ċina, li jiggarantixxi liċ-ċittadini kollha d-dritt għal-libertà tat-twemmin reliġjuż, u l-Artikolu 4 tagħha, li jiddefendi d-drittijiet tan-"nazzjonalitajiet f'minoranza",

– wara li kkunsidra l-Artikolu 54 tar-Regoli ta' Proċedura tiegħu,

– wara li kkunsidra l-opinjoni tal-Kumitat għall-Kummerċ Internazzjonali,

– wara li kkunsidra r-rapport tal-Kumitat għall-Affarijiet Barranin (A9-0252/2021),

A. billi, fil-qafas strateġiku tagħha dwar id-drittijiet tal-bniedem u d-demokrazija, l-UE twiegħed li se tippromwovi d-drittijiet tal-bniedem, id-demokrazija, u l-istat tad-dritt "fl-oqsma kollha tal-azzjoni esterna tagħha, mingħajr eċċezzjoni" u li se "tqiegħed id-drittijiet tal-bniedem fil-qalba tar-relazzjonijiet tagħha mal-pajjiżi terzi kollha, inklużi s-sħab strateġiċi tagħha";

B. billi permezz tat-tkabbir ekonomiku qawwi u l-aġenda assertiva tal-politika barranija tagħha, b'mod partikolari l-istrateġija ta' investiment tagħha, il-politiki "Going Global" u "Made in China 2025", u l-Inizjattiva "Belt and Road" (BRI), iċ-Ċina qed timplimenta rwol globali aktar b'saħħtu kemm bħala setgħa ekonomika kif ukoll bħala attur fil-politika barranija, li jippreżenta sfidi politiċi, ekonomiċi, ta' sigurtà u teknoloġiċi serji għall-UE, li mbagħad joħloq konsegwenzi sinifikanti u fit-tul għall-ordni dinji u jhedded serjament il-multilateraliżmu bbażat fuq ir-regoli u l-valuri demokratiċi ewlenin;

C. billi r-Repubblika tal-Poplu taċ-Ċina hija Stat unitarju, komunista b'partit wieħed, irregolat mill-Partit Komunista taċ-Ċina (CPC), li huwa impenjat favur il-Marxiżmu-Leniniżmu; billi ma taqsam l-ebda valur demokratiku bħal-libertà individwali, il-libertà tal-kelma u l-libertà tar-reliġjon;

D. billi ċ-Ċina qed taspira dejjem aktar għal rwol aktar globali, hekk kif il-President Ċiniż Xi Jinping pubblikament wiegħed fir-rapport tiegħu li sar fid-19-il Kungress tal-Partit Komunista fl-2017 li sal-2049 iċ-Ċina se ssir protagonista globali f'termini ta' saħħa nazzjonali komposta u influwenza internazzjonali;

E. billi t-tradizzjoni fit-tul tad-demokrazija f'Hong Kong u fit-Tajwan turi li d-demokrazija hija apprezzata mill-poplu Ċiniż;

F. billi ċ-Ċina għandha rekord ta' ksur tad-drittijiet tal-bniedem li jevita l-impenji bilaterali u multilaterali tal-pajjiż f'dawn l-oqsma; billi ċ-Ċina ppreżentat regolarment riżoluzzjonijiet lill-Kunsill tad-Drittijiet tal-Bniedem tan-NU bil-għan li l-prinċipji tas-"sovranità, in-nuqqas ta' indħil u r-rispett reċiproku" isiru prinċipji fundamentali mhux negozjabbli li jiġu qabel il-promozzjoni u l-protezzjoni tad-drittijiet tal-bniedem tal-individwi; billi ċ-Ċina qed twettaq il-persekuzzjoni sistemika tal-poplu Ujgur, it-Tibetani, il-Mongoli u minoranzi etniċi oħra, id-difensuri tad-drittijiet tal-bniedem, l-attivisti soċjali, il-gruppi reliġjużi, il-ġurnalisti, u l-petizzjonanti u d-dimostranti kontra l-inġustizzji, kif ukoll ir-repressjoni dejjem tikber tal-ilħna kollha li ma jaqblux u ta' oppożizzjoni, speċjalment f'Hong Kong; billi l-miżuri ta' avvjament u l-impenji mhux vinkolanti ma kinux biżżejjed biex iżidu l-impenn taċ-Ċina għal valuri li huma fundamentali għall-UE;

G. billi t-tluq reċenti ta' korrispondenti barranin miċ-Ċina u t-tikkettar mill-awtoritajiet Ċiniżi tal-Klabb tal-Korrispondenti Barranin bħala "organizzazzjoni illegali" huma l-aħħar f'serje twila u li qed tiżdied ta' każijiet ta' fastidju u ta' tfixkil kontra ġurnalisti barranin, li fl-aħħar mill-aħħar qed jitilqu miċ-Ċina; billi dan huwa parti minn sforz biex fid-dinja kollha jiġi kkontrollat id-diskors dwar iċ-Ċina u biex jiġi ddeterminat x'tip ta' diskors u diskussjonijiet jistgħu jsiru b'mod globali, u jqis dan l-isforz bħala parti minn theddida totalitarja;

H. billi l-istrateġija eżistenti tal-UE dwar iċ-Ċina żvelat il-limitazzjonijiet tagħha fid-dawl tal-iżviluppi reċenti u tal-isfidi globali maħluqa miċ-Ċina u jeħtieġ li tiġi aġġornata;

I. billi l-Parlament appella lill-Kummissjoni għal eżerċizzju esplorattiv u valutazzjoni tal-impatt sabiex tibda formalment in-negozjati mat-Tajwan mill-aktar fis possibbli;

J. billi mit-tnedija tal-kampanja tal-Gvern Ċiniż fl-2014 bl-isem "Strike hard against violent terrorism" (Niġġieldu sew kontra t-terroriżmu vjolenti), is-sitwazzjoni tal-Ujguri u minoranzi etniċi primarjament Musulmani oħra fir-Reġjun Awtonomu ta' Xinjiang Uyghur marret għall-agħar malajr; billi aktar minn miljun persuna jinsabu l-ħabs f'kampijiet ta' detenzjoni, imsejħa ċentri ta' "edukazzjoni politika mill-ġdid" jew ta' "taħriġ", li fihom l-Ujguri huma soġġetti għal xogħol sistemiku furzat, tortura, għajbien furzat, sorveljanza tal-massa, tħassir kulturali u reliġjuż, l-isterilizzazzjoni furzata tan-nisa, vjolenza sesswali, ksur tad-drittijiet riproduttivi u separazzjoni tal-familja; billi l-analiżi legali kkonkludiet li dawn ir-reati jikkostitwixxu reati kontra l-umanità, anki allegat ġenoċidju, fi ħdan il-qafas legali internazzjonali; billi diversi parlamenti nazzjonali adottaw pożizzjonijiet ta' dan it-tip;

K. billi r-Reġim Globali ta' Sanzjonijiet tal-UE b'rabta mad-Drittijiet tal-Bniedem jippermetti lill-UE timponi miżuri restrittivi fuq individwi, entitajiet u korpi fil-mira, inklużi stati u atturi mhux statali, li jkunu responsabbli għal, involuti fi jew assoċjati ma' ksur serju tad-drittijiet tal-bniedem u abbużi; billi fit-22 ta' Marzu 2021 ġew inklużi erba' individwi Ċiniżi u entità waħda direttament responsabbli għal ksur serju tad-drittijiet tal-bniedem fir-Reġjun Awtonomu ta' Xinjiang Uyghur fil-lista ta' persuni fiżiċi u entitajiet soġġetti għal dawn il-miżuri restrittivi; billi b'reazzjoni għal dawn il-miżuri, iċ-Ċina imponiet kontrosanzjonijiet fuq għaxar individwi Ewropej u erba' entitajiet, inklużi ħames Membri tal-Parlament Ewropew u żewġ korpi istituzzjonali tal-UE, is-Sottokumitat għad-Drittijiet tal-Bniedem tal-Parlament Ewropew u l-Kumitat Politiku u ta' Sigurtà tal-Kunsill tal-Unjoni Ewropea, kif ukoll żewġ akkademiċi Ewropej, żewġ gruppi ta' riflessjoni fil-Ġermanja u l-Fondazzjoni tal-Alleanza tad-Demokraziji fid-Danimarka; billi s-sanzjonijiet Ċiniżi ma kellhomx ġustifikazzjoni legali u bażi legali u kienu mmirati direttament mhux biss lejn l-individwi u l-entitajiet ikkonċernati iżda wkoll lejn l-Unjoni Ewropea kollha kemm hi; billi s-sanzjonijiet huma tentattiv ċar biex jiskoraġġixxu lill-UE milli tkompli bil-ħidma u l-azzjoni tagħha kontra l-abbużi tad-drittijiet tal-bniedem fiċ-Ċina;

1. Jirrakkomanda li l-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta' Sigurtà (VP/RGħ) u l-Kunsill:

(a) jiżviluppa strateġija UE-Ċina aktar assertiva, komprensiva u konsistenti li tgħaqqad l-Istati Membri kollha u tifforma relazzjonijiet ma' Beijing fl-interess tal-UE kollha kemm hi, bid-difiża tal-valuri tagħna fil-qalba tagħha u tippromwovi ordni multilaterali bbażat fuq ir-regoli; jissottolinja li l-istrateġija jeħtieġ li tqis in-natura multidimensjonali tar-relazzjoni tal-UE maċ-Ċina; jenfasizza li ċ-Ċina hija sieħeb ta' kooperazzjoni u negozjar għall-UE, iżda hija wkoll kompetitur ekonomiku u rivali sistemiku f'għadd dejjem akbar ta' oqsma;

(b) jipproponi li din l-istrateġija tkun ibbażata fuq sitt pilastri:

1) Djalogu miftuħ u kooperazzjoni dwar l-isfidi globali;

2) Involviment imsaħħaħ dwar il-valuri universali, in-normi internazzjonali u d-drittijiet tal-bniedem;

3) L-analiżi u l-identifikazzjoni tar-riskji, il-vulnerabbiltajiet u l-isfidi;

4) Il-bini ta' sħubijiet ma' sħab tal-istess fehma;

5) It-trawwim ta' awtonomija strateġika miftuħa, inkluż fir-relazzjonijiet kummerċjali u ta' investiment;

6) Difiża u promozzjoni tal-interessi u l-valuri Ewropej ewlenin billi l-UE tinbidel f'attur ġeopolitiku aktar effettiv;

Djalogu miftuħ u kooperazzjoni dwar l-isfidi globali

2. Jistieden lill-VP/RGħ biex jiżgura li l-istrateġija UE-Ċina l-ġdida tinvolvi liċ-Ċina fi djalogu bbażat fuq il-prinċipji u orjentat lejn l-interessi dwar l-isfidi globali, bħad-drittijiet tal-bniedem, billi jiżviluppa strateġija tal-UE ambizzjuża, olistika u orjentata lejn ir-riżultati għad-drittijiet tal-bniedem fiċ-Ċina bħala parti minn din l-istrateġija UE-Ċina l-ġdida, l-ambjent u t-tibdil fil-klima, id-diżarm nukleari, il-promozzjoni tal-irkupru ekonomiku mill-COVID-19, il-ġlieda kontra l-kriżijiet tas-saħħa globali, u r-riforma ta' organizzazzjonijiet multilaterali speċifiċi; jappella li dan id-djalogu jkun xprunat mill-prinċipji u l-interessi fundamentali tal-UE u li jsegwi l-objettivi ewlenin tal-involviment estern tal-UE; jisħaq li hija meħtieġa kooperazzjoni tajba bejn iż-żewġ sħab biex jiġu indirizzati l-problemi globali; itenni li ċ-Ċina tibqa' sieħeb importanti għall-UE;

3. Jappoġġja djalogu u kooperazzjoni akbar maċ-Ċina dwar il-paċi u s-sigurtà; jirrikonoxxi l-importanza tal-kooperazzjoni maċ-Ċina biex tappoġġja l-proċess ta' paċi fl-Afganistan u tiskoraġġixxi lill-Korea ta' fuq milli tkompli l-programm nukleari tagħha; japprova t-tiftix ta' kooperazzjoni dwar l-iżvilupp sostenibbli, il-kontributi għall-assistenza umanitarja u l-għajnuna għad-diżastri, il-kwistjonijiet ambjentali, spazjali u ajruspazjali, ix-xjenza, it-teknoloġija u l-innovazzjoni, filwaqt li jinsisti bis-sħiħ fuq il-libertà tar-riċerka; jisħaq li dawn id-djalogi u l-kooperazzjoni jridu jkunu bbażati fuq impenn kondiviż għall-ftuħ u l-ħidma flimkien b'mod trasparenti, ġust u ekwu bħala parti minn sistema internazzjonali bbażata fuq ir-regoli, filwaqt li jiġi żgurat is-salvagwardjar tal-interessi u l-valuri Ewropej u l-iżvilupp tal-kapaċità tal-Ewropa li tikkompeti maċ-Ċina kull fejn ikun meħtieġ;

4. Jindika li xi oqsma ta' kooperazzjoni bħall-ICT, l-ispazju u l-ajruspazju jista' jkollhom applikazzjoni b'użu doppju u jistgħu jintużaw kontra ċ-ċittadini Ċiniżi u l-Punent;

5. Jissottolinja l-importanza li jiġi mħeġġeġ l-impenn taċ-Ċina biex tindirizza t-tibdil fil-klima u kwistjonijiet ambjentali oħra billi ssaħħaħ sħubija bejn l-UE u ċ-Ċina f'dan il-qasam u jenfasizza l-ħtieġa li jiġi żgurat li kemm l-UE kif ukoll iċ-Ċina jaderixxu mal-impenji rispettivi tagħhom fl-ambitu tal-Ftehim ta' Pariġi; jisħaq fuq l-importanza li l-UE timplimenta mekkaniżmu ta' aġġustament tal-karbonju fil-fruntieri; jinnota li matul l-aħħar tliet deċennji ċ-Ċina ttriplat l-emissjonijiet tal-karbonju tagħha u issa qed tarmi 27 % tal-gassijiet serra tad-dinja; jisħaq fuq il-ħtieġa li tiġi żgurata l-koerenza bejn l-ambizzjonijiet globali mħabbra miċ-Ċina fil-ġlieda kontra t-tibdil fil-klima u l-impatti ambjentali tal-istrateġiji ta' investiment tagħha fuq livell lokali u barra mill-pajjiż; jistieden lill-Gvern Ċiniż iżomm lura milli jesporta l-kapaċità tal-faħam tiegħu lejn pajjiżi terzi, b'mod partikolari fil-qafas tal-BRI;

6. Jappella li d-Djalogi dwar id-Drittijiet tal-Bniedem orjentati lejn ir-riżultati jsiru fuq bażi annwali u jiġu evalwati regolarment u jitlob li jsir parametraġġ referenzjarju solidu tal-progress li sar fid-djalogi bilaterali b'mod aktar ġenerali biex jiġi żgurat li dawn l-iskambji jipproduċu eżiti pożittivi ġenwini għad-drittijiet tal-bniedem u għad-difensuri tad-drittijiet tal-bniedem fiċ-Ċina; jitlob li r-riżultati tal-valutazzjoni komparattiva u kwalunkwe progress, staġnar jew deterjorament jiġu diskussi b'mod trasparenti; jitlob li d-drittijiet tal-bniedem jitqajmu b'mod regolari fl-ogħla livell politiku, kemm fis-Summits bejn l-UE u ċ-Ċina kif ukoll fil-livell tal-Istati Membri; jappella, barra minn hekk, għal djalogu parallel dwar id-drittijiet tal-bniedem, li jinvolvi d-diplomatiċi tal-UE u tal-Istati Membri, id-dijaspora Ċiniża, l-NGOs, l-akkademiċi u l-leġiżlaturi liberi u indipendenti, immirati lejn il-ħolqien ta' fehim aħjar tas-sistema Ċiniża u t-tfassil ta' strateġiji aħjar biex jiġi influwenzat il-progress tad-drittijiet tal-bniedem fiċ-Ċina; jissottolinja li dawn id-Djalogi dwar id-Drittijiet tal-Bniedem jeħtieġ li jinkludu, iżda ma jridux ikunu limitati għal, il-kwistjonijiet li ġejjin: il-libertà tal-media u l-libertà tal-istampa, id-drittijiet tal-minoranzi, inkluż fir-reġjuni ta' Xinjiang, il-Mongolja Interna u t-Tibet, u aċċess liberu għal dawn ir-reġjuni inkluż għad-diplomatiċi u l-ġurnalisti, is-sitwazzjoni ta' Hong Kong, il-libertà tal-kelma, id-drittijiet tax-xogħol, id-dritt ta' għaqda, il-libertà tar-reliġjon jew tat-twemmin, u l-istat tad-dritt fiċ-Ċina b'mod ġenerali; jilqa' l-ħatra ta' Mibgħut Speċjali ġdid tal-UE għall-Promozzjoni tal-Libertà ta' Reliġjon jew ta' Twemmin Barra mill-Unjoni, u jitlob li l-Mibgħut Speċjali l-ġdid ikun involut b'mod attiv fl-appoġġ tas-sitwazzjoni tal-gruppi u l-entitajiet reliġjużi kollha, inklużi l-Musulmani, l-Insara u l-Buddisti, li jiffaċċjaw persekuzzjoni fiċ-Ċina kontinentali u f'Hong Kong; jitlob lill-istituzzjonijiet rilevanti tal-UE biex jużaw dawn id-Djalogi dwar id-Drittijiet tal-Bniedem ħalli jressqu każijiet individwali; għadu mħasseb ħafna dwar id-detenzjoni kontinwa taċ-ċittadin u pubblikatur Żvediż Gui Minhai; iħeġġeġ intervent mill-UE u mill-Istati Membri fl-ogħla livell biex jiġi żgurat il-ħelsien immedjat u mingħajr kundizzjonijiet tal-priġunieri politiċi kollha; jesprimi tħassib dwar il-ksur sistemiku tad-drittijiet tal-bniedem fiċ-Ċina u jikkundanna l-każijiet kollha ta' arresti arbitrarji u soppressjoni tal-fluss liberu tal-informazzjoni u l-libertà tal-espressjoni;

7. Jitlob lill-UE tinvolvi ruħha fi djalogu maċ-Ċina dwar modi possibbli biex ittejjeb, b'mod trasparenti, il-kapaċitajiet ta' rispons inizjali għall-mard infettiv li għandhom il-potenzjal li jiżviluppaw f'epidemiji jew pandemiji, inkluż ir-rikonoxximent, l-immappjar tar-riskji u s-sistemi ta' twissija bikrija biex tiġi żgurata tħejjija globali aħjar għar-rispons għall-pandemiji; jistieden ukoll liċ-Ċina tikkoopera bis-sħiħ f'investigazzjoni indipendenti dwar l-oriġini tas-SARS-COV-2;

8. Jappoġġja l-espansjoni tal-kuntatti bejn il-popli fuq iż-żewġ naħat kif ukoll iż-żjarat reċiproċi ta' skambju tal-istudenti, iżda jħeġġeġ lill-Istati Membri jimmonitorjaw aħjar l-impatt tal-interferenza tal-Gvern Ċiniż fil-libertà akkademika;

Involviment imsaħħaħ dwar il-valuri universali, in-normi internazzjonali u d-drittijiet tal-bniedem

9. Jikkundanna bl-aktar mod qawwi possibbli s-sanzjonijiet bla bażi u arbitrarji imposti mill-awtoritajiet Ċiniżi, li huma ekwivalenti għal attakk fuq il-libertà tal-kelma, fuq il-libertà akkademika u fuq l-impenn internazzjonali favur id-drittijiet universali tal-bniedem u l-fehim tagħhom; iħeġġeġ lill-awtoritajiet Ċiniżi jneħħu dawn il-miżuri mhux ġustifikati; iqis li s-sanzjonijiet imposti mill-awtoritajiet Ċiniżi jkomplu jnaqqsu l-fiduċja u jxekklu l-kooperazzjoni bilaterali;

10. Jissottolinja li l-proċess ta' kunsiderazzjoni u ta' ratifika għall-Ftehim Komprensiv dwar l-Investiment (CAI) bejn l-UE u ċ-Ċina ma jistax jibda qabel ma jitneħħew is-sanzjonijiet Ċiniżi kontra l-Membri tal-Parlament Ewropew u l-istituzzjonijiet tal-UE;

11. Jenfasizza, f'dan il-kuntest, ir-riżoluzzjoni tiegħu tal-20 ta' Mejju 2021 dwar il-kontrosanzjonijiet Ċiniżi; jistieden lill-Kummissjoni, f'konformità mar-riżoluzzjoni tal-Parlament tal-20 ta' Mejju 2021 dwar il-kontrasanzjonijiet Ċiniżi u mal-Artikolu 21(1) tat-Trattat dwar l-Unjoni Ewropea, biex tuża l-istrumenti kollha għad-dispożizzjoni tagħha kif ukoll id-dibattitu dwar is-CAI bħala lieva biex ittejjeb il-protezzjoni tad-drittijiet tal-bniedem u ssostni s-soċjetà ċivili fiċ-Ċina; iħeġġeġ liċ-Ċina tieħu miżuri konkreti biex ittemm ksur ieħor tad-drittijiet tal-bniedem fiċ-Ċina, bħal xogħol furzat u l-persekuzzjoni sistematika tal-Ujguri u ta' gruppi oħra ta' minoranzi Musulmani Turkiċi, Tibetani, Insara u ta' komunitajiet u ta' knejjes reliġjużi oħra, u li tirrispetta l-impenji internazzjonali tagħha fil-konfront ta' Hong Kong fl-ambitu tad-Dikjarazzjoni Konġunta Sino-Brittanika u l-Liġi Bażika ta' Hong Kong permezz tas-sospensjoni tar-riformi ppjanati għas-sistema elettorali tal-belt u r-rilaxx ta' leġiżlaturi u attivisti favur id-demokrazija;

12. Jissottolinja li l-Parlament iqis is-sitwazzjoni tad-drittijiet tal-bniedem fiċ-Ċina, inkluż f'Hong Kong, qabel ma jiddetermina l-pożizzjoni tiegħu; itenni t-tħassib serju ħafna tiegħu rigward d-diversi abbużi tad-drittijiet tal-bniedem fiċ-Ċina u jfakkar li huwa essenzjali r-rispett sħiħ tal-valuri universali, indipendentement mid-differenzi bejn iż-żewġ sistemi;

13. Jistieden liċ-Ċina tosserva l-istandards internazzjonali, inkluż fir-rigward tal-impatt tagħha fuq il-klima, l-ambjent, il-bijodiversità, il-faqar, is-saħħa, id-drittijiet relatati max-xogħol u d-drittijiet tal-bniedem; iħeġġeġ liċ-Ċina, fil-kuntest tal-promozzjoni tal-kummerċ u tal-iżvilupp sostenibbli, tieħu azzjoni konkreta favur ir-ratifika u l-implimentazzjoni tal-erba' Konvenzjonijiet fundamentali pendenti tal-Organizzazzjoni Dinjija tax-Xogħol (ILO) u tal-Patt Internazzjonali dwar id-Drittijiet Ċivili u Politiċi; jesprimi dispjaċir għall-fatt li diversi kumpaniji internazzjonali, b'mod partikolari fis-settur tal-ħwejjeġ u tat-tessuti, kienu suġġetti għal bojkott estensiv u mifrux wara li esprimew tħassib dwar ir-rapporti ta' xogħol furzat fix-Xinjiang u ħadu d-deċiżjoni li jaqtgħu r-rabtiet tal-ktajjen ta' provvista max-Xinjiang, u jikkundanna bil-qawwa l-koerċizzjoni politika eżerċitata kontrihom mill-Gvern Ċiniż; itenni t-talba tiegħu li l-Kummissjoni u s-Servizz Ewropew għall-Azzjoni Esterna (EEAS) jiffinalizzaw malajr gwida dwar il-ktajjen ta' provvista indirizzata lill-kumpaniji li tagħtihom konsulenza dwar l-espożizzjoni għar-riskji li jisfruttaw ix-xogħol furzat tal-Ujguri u li tipprovdi appoġġ fl-identifikazzjoni urġenti ta' sorsi ta' provvista alternattivi;

14. Jissottolinja l-ħtieġa li jiġi żgurat li l-leġiżlazzjoni tas-suq intern, kif ukoll kwalunkwe qafas ta' diliġenza dovuta jew projbizzjoni furzata fuq l-importazzjoni tax-xogħol, jintużaw b'mod effiċjenti u effettiv sabiex jiġu esklużi entitajiet li joperaw fis-suq intern tal-UE li huma direttament jew indirettament involuti f'abbużi tad-drittijiet tal-bniedem f'Xinjiang; jistieden ukoll lill-kumpaniji Ewropej fiċ-Ċina, bħala parti mir-responsabbiltà korporattiva tagħhom, iwettqu investigazzjoni bir-reqqa dwar l-użu tax-xogħol furzat fil-ktajjen tal-provvista tagħhom;

15. Iħeġġeġ lill-Kummissarju Għoli tan-NU għad-Drittijiet tal-Bniedem biex tniedi investigazzjonijiet legali indipendenti dwar allegat ġenoċidju, allegati reati kontra l-umanità u ksur tad-drittijiet tal-bniedem, inklużi programmi ta' xogħol furzat li jseħħu f'diversi reġjuni fiċ-Ċina, u jitlob lill-UE u lill-Istati Membri tagħha jipprovdu l-appoġġ politiku tagħhom u jagħtu appoġġ internazzjonali lil din l-investigazzjoni; jistieden lill-awtoritajiet Ċiniżi jippermettu aċċess liberu, sinifikanti u mingħajr xkiel għar-reġjun; huwa mħasseb ħafna dwar ir-rapporti tal-programmi tax-xogħol fit-Tibet, li qed jiġu ttikkettati wkoll "kampijiet ta' taħriġ vokazzjonali" mill-awtoritajiet Ċiniżi; jistieden liċ-Ċina tikkonforma mal-obbligi tagħha fl-ambitu tad-dritt nazzjonali u internazzjonali għar-rispett tad-drittijiet tal-bniedem, inklużi d-drittijiet tal-minoranzi f'Xinjiang, fit-Tibet u fil-Mongolja Interna;

16. Jikkundanna l-fatt li l-libertà tal-espressjoni, il-libertà ta' assoċjazzjoni u l-libertà tal-istampa huma ristretti ħafna fiċ-Ċina; jiddeplora l-persekuzzjoni politika li għaliha ġew soġġetti ħafna ġurnalisti, li issa jinsabu f'eżilju; jistieden liċ-Ċina tiżgura li l-ġurnalisti kollha jkunu jistgħu jwettqu xogħolhom b'mod liberu, mingħajr kiel u biża' ta' ritaljazzjoni; jisħaq li għandha tiġi żgurata l-libertà tal-istampa u tal-media; jitlob li l-UE tappoġġja l-libertà tal-kelma u l-media ħielsa fiċ-Ċina billi tistabbilixxi Fond Ewropew għall-Media Demokratika biex jappoġġja l-ġurnaliżmu indipendenti;

17. Jistieden lill-Kummissjoni tressaq 'il quddiem il-Qafas ta' Diliġenza Dovuta Obbligatorju propost għad-Drittijiet tal-Bniedem bħala kwistjoni ta' urġenza u tappoġġja l-isforzi biex tinkiseb l-adozzjoni ta' strument simili fil-qafas tan-Nazzjonijiet Uniti;

18. Jistieden lill-Kummissjoni tesprimi t-tħassib tagħha dwar l-Ordni 15 il-ġdida, li tkompli tirrestrinġi n-nies reliġjużi u l-mexxejja tagħhom, lill-awtoritajiet Ċiniżi;

19. Jistieden lill-Istati Membri jimplimentaw bis-sħiħ il-pakkett ta' miżuri li ntlaħaq qbil dwaru wara l-introduzzjoni tal-Liġi Nazzjonali dwar is-Sigurtà għal Hong Kong f'Lulju 2020 u jirrieżaminaw il-politiki tagħhom dwar l-ażil, il-migrazzjoni, il-viża u r-residenza għan-nies ta' Hong Kong; iħeġġeġ lill-VP/RGħ u lill-Kunsill jipproponu u jadottaw konklużjonijiet dwar Hong Kong; jappella għal miżuri mmirati fl-ambitu tar-Reġim Globali tal-UE dwar is-Sanzjonijiet fuq id-Drittijiet tal-Bniedem, kif meħtieġ, sabiex tiġi indirizzata r-repressjoni f'Hong Kong; jappella wkoll għat-tħassir miċ-Ċina tal-Liġi Nazzjonali dwar is-Sigurtà imposta fuq Hong Kong f'Ġunju 2020; jistieden lil dawk l-Istati Membri li għad għandhom fis-seħħ trattati ta' estradizzjoni maċ-Ċina u Hong Kong jissospendu l-estradizzjoni individwali kull meta l-estradizzjoni ta' individwu tpoġġihom f'riskju ta' tortura jew ta' trattament jew pieni krudili, inumani jew degradanti, fejn dak l-individwu jkun qed jiffaċċja akkużi għal raġunijiet politikament motivati, f'sitwazzjonijiet oħra fejn il-minoranzi etniċi, ir-rappreżentanti tal-oppożizzjoni favur id-demokratika f'Hong Kong u d-dissidenti b'mod ġenerali jkunu mmirati, u kull meta dan ikun qed jikser l-obbligi tal-UE fl-ambitu tal-Konvenzjoni Ewropea dwar id-Drittijiet tal-Bniedem;

20. Jirrakkomanda li t-tmexxija tal-UE u tal-Istati Membri tirrifjuta l-istediniet għall-Olimpijadi tax-Xitwa ta' Beijing f'każ li s-sitwazzjoni tad-drittijiet tal-bniedem fiċ-Ċina u f'Hong Kong ma titjiebx u ma jseħħ l-ebda Summit/Djalogu ta' livell għoli bejn l-UE u ċ-Ċina dwar id-Drittijiet tal-Bniedem b'eżitu tanġibbli qabel l-avveniment;

21. Jesprimi dispjaċir għall-appoġġ taċ-Ċina għar-reġimi l-aktar oppressivi fid-dinja, b'mod partikolari fis-Sirja, fl-Iran u fil-Korea ta' Fuq, iżda wkoll fil-Venezwela u f'Kuba;

L-analiżi u l-identifikazzjoni tar-riskji, il-vulnerabbiltajiet u l-isfidi

22. Jemmen li l-istrateġija futura tal-UE dwar iċ-Ċina għandha tipprovdi l-għodod u d-data meħtieġa biex jiġu indirizzati t-theddidiet politiċi, ekonomiċi, soċjali u teknoloġiċi li jirriżultaw miċ-Ċina, inkluż permezz tal-BRI tagħha, l-Istrateġija ta' Ċirkolazzjoni Doppja, l-14-il Pjan ta' Ħames Snin, u Made in China 2025, China Standards 2035 u l-politiki 16+1, inklużi l-modernizzazzjoni militari tagħha u l-bini tal-kapaċitajiet, u l-implikazzjonijiet ta' dan għall-awtonomija strateġika miftuħa tal-Unjoni u għall-ordni multilaterali bbażata fuq ir-regoli; jinnota li hemm ħtieġa urġenti li jiġu żgurati r-rieda politika u r-riżorsi għall-implimentazzjoni tal-Istrateġija ta' Konnettività tal-UE; jappella għal koordinazzjoni akbar bejn l-Istrateġija ta' Konnettività tal-UE u n-Network Blue Dot sabiex tiġi pprovduta alternattiva sostenibbli għall-BRI; jilqa' l-ftehim tal-mexxejja tal-G7 biex tiġi żviluppata sħubija għal bini mill-ġdid aħjar għad-dinja – l-inizjattiva "Build Back Better World" (B3W) – bħala alternattiva għall-BRI taċ-Ċina; jistieden lill-Istati Membri u lill-istituzzjonijiet tal-UE jħaddnu l-inizjattiva u jikkontribwixxu għaliha;

23. Jistieden lill-Kummissjoni tikkummissjona awditu madwar l-UE kollha, imqassam skont l-Istat Membru, tad-dipendenza tal-UE miċ-Ċina f'ċerti setturi strateġikament importanti u kritiċi, inklużi l-provvisti farmaċewtiċi, jekk possibbli kemm fil-livell nazzjonali kif ukoll f'dak sottonazzjonali, filwaqt li tibni fuq l-analiżi komprensiva reċenti tagħha bit-titolu "Strategic dependencies and capacities" (Dipendenzi u kapaċitajiet strateġiċi) (SWD(2021)0352), li tistabbilixxi pjanijiet biex jitnaqqsu r-riskji relatati ma' dipendenzi mhux mixtieqa, filwaqt li jinżammu r-relazzjonijiet ġenerali maċ-Ċina, li għandhom ikunu kemm jista' jkun reċiproċi u bbilanċjati u allinjati mal-valuri u l-prijoritajiet strateġiċi tal-UE;

24. Jistieden lill-Kummissjoni u lill-Kunsill jelaboraw mekkaniżmi biex jindirizzaw dan it-theddid b'mod koerenti, b'mod partikolari permezz ta':

(a) l-iżgurar tal-unità tal-UE fil-livell tal-Istati Membri, li hija meħtieġa biex tkun tista' timplimenta kif xieraq l-istrateġija UE-Ċina l-ġdida; l-appell lill-Istati Membri kollha biex iżommu l-valuri ewlenin tal-UE;

(b) il-bini fuq is-sett ta' għodod tal-UE għall-miżuri ta' mitigazzjoni tar-riskju nazzjonali, reġjonali u lokali biex jiġu żviluppati standards globali bi sħubija ma' sħab tal-istess fehma għall-ġenerazzjoni l-ġdida ta' teknoloġiji f'konformità mal-valuri demokratiċi, bħan-networks 5G u 6G, u l-iżgurar li l-kumpaniji li ma jissodisfawx l-istandards tas-sigurtà jiġu esklużi mill-iżvilupp tan-network 5G u 6G;

(c) it-tisħiħ tal-kapaċitajiet tal-UE biex tikseb tmexxija globali, inkluż permezz ta' kooperazzjoni ma' sħab tal-istess fehma;

(d) l-iżgurar ta' koordinazzjoni istituzzjonali bejn il-Kummissjoni, il-Kunsill u s-SEAE qabel avvenimenti relatati mal-BRI, u l-kooperazzjoni mal-Istati Membri biex jiġi żgurat li d-deċiżjonijiet meħuda minn dawk involuti fl-inizjattiva jkunu konformi mal-politiki u l-interessi tal-UE u jirrispettaw il-valuri fundamentali tal-UE; jisħaq li l-konsultazzjonijiet iridu jsiru fil-livell tal-UE, pereżempju permezz ta' laqgħa konġunta bejn il-Kumitat Politiku u ta' Sigurtà u l-Kumitat tal-Politika Kummerċjali fil-livell tal-Kunsill, qabel avvenimenti relatati mal-BRI sabiex jiġi żgurat li l-Istati Membri jitkellmu b'vuċi waħda; jisħaq li l-BRI jeħtieġlu jissodisfa l-istandards internazzjonali; jissottolinja li l-proġetti tal-BRI jridu jiġu mmonitorjati mill-qrib, inkluż fir-rigward tal-effetti politiċi negattivi tagħhom fl-UE;

(e) il-monitoraġġ ta' kuntratti infrastrutturali ewlenin fl-Istati Membri u fil-pajjiżi tal-adeżjoni biex tiġi żgurata l-konformità tagħhom mal-leġiżlazzjoni tal-UE, kif ukoll l-allinjament tagħhom mal-interessi strateġiċi tal-UE, kif definiti mill-istrateġija UE-Ċina; il-protezzjoni tal-infrastruttura kritika mill-influwenza ta' pajjiżi terzi, li tista' tkun ta' detriment għall-UE u għall-interessi ekonomiċi u ta' sigurtà tal-Istati Membri tagħha;

25. Jissottolinja li l-involviment bilaterali u mhux koordinat ta' xi Stati Membri maċ-Ċina, u n-nuqqas ta' informazzjoni lill-Kummissjoni meta tiffirma Memoranda ta' Qbil ma' pajjiżi terzi, ikun kontroproduttiv u ta' ħsara għall-pożizzjoni globali tal-UE u għall-vantaġġ li l-Istati Membri tagħha għandhom fin-negozjati meta jaġixxu bħala Unjoni aktar milli atturi indipendenti tal-Istat; jitlob lill-Istati Membri jżommu lura milli jiffirmaw kwalunkwe memorandum bħal dan mingħajr ma jikkonsultaw lill-Kunsill u lill-Kummissjoni; jappella għall-istabbiliment ta' mekkaniżmu ta' koordinazzjoni fil-livell tal-UE biex jittratta kwistjonijiet bħal dawn; ifakkar fl-Artikolu 24 tat-Trattat dwar l-Unjoni Ewropea, li jgħid li "l-Istati Membri għandhom isostnu l-politika esterna u ta' sigurtà tal-Unjoni attivament u mingħajr riserva fi spirtu ta' lealtà u solidarjetà reċiproka" u li "għandhom joqgħodu lura minn kull azzjoni li tkun kontra l-interessi tal-Unjoni jew li x'aktarx tagħmel ħsara għall-effettività tagħha bħala forza b'koeżjoni fir-relazzjonijiet internazzjonali";

26. Jisħaq li l-implimentazzjoni tal-istrateġija UE-Ċina u tal-istrateġiji u l-politiki nazzjonali fil-konfront taċ-Ċina għandha tiġi kkoordinata regolarment bejn l-istituzzjonijiet tal-UE, l-Istati Membri, id-Direttorati Ġenerali differenti tal-Kummissjoni u l-Parlament Ewropew, sabiex tiġi żgurata politika komprensiva u konsistenti li tevita l-kompartimentalizzazzjoni ta' oqsma ta' politika separati; jemmen li l-politiki għandhom jiġu kkoordinati wkoll ma' atturi reġjonali u lokali li jiżviluppaw u jżommu rabtiet maċ-Ċina;

27. Jesprimi tħassib dwar l-inċidenza dejjem akbar ta' attakki ibridi, spjunaġġ industrijali miċ-Ċina u serq ċibernetiku kontra kumpaniji Ewropej; jisħaq fuq l-importanza tat-tisħiħ tal-kapaċitajiet ċibernetiċi privati u pubbliċi; jappella għal kooperazzjoni aktar b'saħħitha u l-istabbiliment ta' sistema mmirata lejn it-tmiem ta' atti malizzjużi fl-ispazju ċibernetiku min-naħa taċ-Ċina, inklużi attakki ċibernetiċi, trasferimenti teknoloġiċi furzati, spjunaġġ ċibernetiku u serq ta' proprjetà intellettwali ffaċilitat miċ-ċibernetika; jissottolinja l-ħtieġa li titrawwem kooperazzjoni aktar mill-qrib mal-pajjiżi tan-NATO u tal-G7 fil-ġlieda kontra t-theddid ibridu, inklużi l-attakki ċibernetiċi, u l-kampanji ta' diżinformazzjoni li jirriżultaw miċ-Ċina, inkluż billi l-Istati Membri jitħallew jimponu kontromiżuri kollettivi fuq bażi volontarja, anki jekk in-natura tal-attakki ma tkunx serja biżżejjed biex tiskatta l-Artikolu 5 tat-Trattat tan-NATO jew l-Artikolu 42(7) tat-Trattat dwar l-Unjoni Ewropea;

28. Jistieden lill-Kummissjoni tħeġġeġ u tikkoordina azzjonijiet immirati lejn il-ġlieda kontra l-finanzjament barrani tal-proċessi demokratiċi tagħna min-naħa taċ-Ċina, inkluża l-istrateġija ta' distribuzzjoni inġusta tal-benefiċċji tal-ġestjoni konġunta u t-teknika ta' co-opting ta' ħaddiema taċ-ċivil tal-ogħla livell u eks politiċi tal-UE;

29. Jinsab imħasseb dwar il-pressjoni diplomatika assertiva u, xi drabi, aggressiva mill-awtoritajiet Ċiniżi, pereżempju fil-konfront tal-President tas-Senat Ċiniż; jisħaq li l-istituzzjonijiet tal-UE ma jistgħu bl-ebda mod iċedu għal pressjoni jew ċensura mill-mezzi Ċiniżi; jinsab imħasseb dwar pressjoni żejda mill-uffiċjali Ċiniżi fuq ir-riċerkaturi u l-akkademiċi li jaħdmu fuq suġġetti relatati maċ-Ċina madwar l-UE, inklużi l-attivitajiet tal-istituti Confucius fl-UE;

Il-bini ta' sħubijiet ma' sħab tal-istess fehma

30. Jistieden lill-VP/RGħ jikkoordina l-azzjonijiet tal-Unjoni ma' sħab tal-istess fehma dwar il-protezzjoni tad-drittijiet tal-bniedem u l-appoġġ għan-nies fiċ-Ċina u Hong Kong u għad-dijaspora Ċiniża madwar id-dinja, kif ukoll id-difiża tad-demokrazija liberali fid-dinja, b'mod partikolari f'Hong Kong u t-Tajwan, u bil-ħsieb li ċ-Ċina timpenja ruħha li tirrispetta d-dritt internazzjonali, id-dritt għal dimostrazzjonijiet pubbliċi bħala eżerċizzju tal-libertà tal-espressjoni u l-libertà ta' għaqda, il-libertà ta' navigazzjoni, inkluż fl-Ibħra taċ-Ċina tan-Nofsinhar u taċ-Ċina tal-Lvant, it-titjiriet li jgħaddu minn fuq iċ-Ċina u s-soluzzjoni paċifika għat-tilwim; jissottolinja, barra minn hekk, li tali sħubijiet u kooperazzjoni multilaterali ma' sħab tal-istess fehma għandhom jinkludu l-elementi u l-miżuri kollha deskritti fl-istrateġija UE-Ċina l-ġdida;

31. Jesprimi tħassib serju dwar il-politiki assertivi u espansjonisti taċ-Ċina fil-Baħar taċ-Ċina tan-Nofsinhar, fil-Baħar taċ-Ċina tal-Lvant u fl-Istrett tat-Tajwan, speċjalment il-provokazzjoni militari kontinwa taċ-Ċina mmirata lejn it-Tajwan; jissottolinja li l-istatus quo fl-Istrett tat-Tajwan u l-libertà tan-navigazzjoni fir-reġjun Indo-Paċifiku huma ta' importanza kritika għall-UE u għall-Istati Membri tagħha; itenni l-oppożizzjoni tiegħu għal kwalunkwe azzjoni unilaterali li tista' żżid it-tensjonijiet u ddgħajjef l-istatus quo; jinkoraġġixxi l-iżvilupp kostruttiv tar-relazzjonijiet bejn l-istretti u jisħaq fuq kwalunkwe bidla fir-relazzjonijiet bejn l-istretti ma tridx issir kontra r-rieda taċ-ċittadini tat-Tajwan; jesprimi t-tħassib espress mill-Ġappun u mill-Istati Uniti dwar liġi ġdida fiċ-Ċina li tawtorizza lill-bastimenti tal-gwardja tal-kosta Ċiniżi jużaw armi kontra bastimenti barranin li jiksru dak li ċ-Ċina tikkunsidra li huwa t-territorju tagħha; jitlob lill-UE tindirizza dawn il-kwistjonijiet kemm fl-istrateġija UE-Ċina l-ġdida kif ukoll fl-istrateġija tal-UE għall-kooperazzjoni fl-Indo-Paċifiku, u żżid l-iskambji diplomatiċi multilaterali sabiex tinkiseb is-soluzzjoni paċifika tat-tilwim u l-kontroversji f'konformità mad-dritt internazzjonali, inkluża l-UNCLOS;

32. Jitlob lill-Istati Membri jinvestu f'kooperazzjoni aktar b'saħħitha ma' sħab demokratiċi u tal-istess fehma bħall-Istati Uniti, il-Kanada, ir-Renju Unit, il-Ġappun, l-Indja, il-Korea t'Isfel, l-Awstralja, New Zealand u t-Tajwan, u jistieden lis-SEAE u lill-Istati Membri jagħtu prijorità u jsaħħu s-Sħubijiet Strateġiċi mal-ASEAN u mal-Unjoni Afrikana;

33. Jikkunsidra li huwa ta' importanza primarja li l-UE tiżviluppa u tippromwovi relazzjoni transatlantika ambizzjuża u dinamika mal-Gvern tal-Istati Uniti, ibbażata fuq l-istorja, il-valuri u l-interessi kondiviżi tagħna, fil-qafas ta' djalogu Trans-Atlantiku dwar iċ-Ċina, inkluża dimensjoni parlamentari; jissottolinja l-importanza tas-sħubija bejn l-UE u l-Istati Uniti fiż-żamma u fid-dimostrazzjoni tas-saħħa magħquda tad-demokraziji liberi globali, inkluż permezz tal-ħidma tagħna f'organizzazzjonijiet multilaterali; jenfasizza f'dan ir-rigward li d-djalogu l-ġdid bejn l-UE u l-Istati Uniti dwar iċ-Ċina għandu jkun wieħed mill-mekkaniżmi għall-avvanz tal-interessi kondiviżi tagħna u għall-ġestjoni tad-differenzi tagħna, u għar-riforma tal-organizzazzjonijiet multilaterali fil-qafas tal-ordni bbażata fuq ir-regoli; jemmen li l-UE għandha tkompli ssaħħaħ l-awtonomija operazzjonali u r-reżiljenza tal-Unjoni lejn it-theddid estern;

34. Jissottolinja l-importanza li l-UE tibqa' attenta fir-rigward tar-rwol li qiegħed jinbidel taċ-Ċina u l-influwenza dejjem tikber tagħha fl-organizzazzjonijiet multilaterali, inkluż fin-NU, li għalihom iċ-Ċina hija t-tieni l-akbar kontributur finanzjarju, u tiżgura koordinazzjoni aħjar fost l-Istati Membri u sħab bl-istess tal-istess fehma lejn il-punt li s-saħħa tad-demokraziji liberali globali tingħaqad flimkien sabiex ikun hemm rispons għal dan l-iżvilupp; jinnota li l-involviment akbar tal-Gvern Ċiniż ma' istituzzjonijiet internazzjonali u multilaterali, bħan-NU, l-Organizzazzjoni Dinjija tal-Kummerċ (WTO), l-Organizzazzjoni Dinjija tas-Saħħa (WHO), l-Interpol, l-Organizzazzjoni tal-Ikel u l-Agrikoltura, l-Unjoni Internazzjonali tat-Telekomunikazzjoni u l-Organizzazzjoni Internazzjonali tal-Avjazzjoni Ċivili (ICAO), inklużi korpi li jistabbilixxu l-istandards, għandu l-għan li jfassal mill-ġdid in-normi, l-istandards u l-prattiki fuq livell globali sabiex titrawwem l-istrateġija ġeopolitika fit-tul u l-interessi ekonomiċi taċ-Ċina; jesprimi dispjaċir li ċ-ċensura domestika Ċiniża, li issa qed tiġi eżerċitata, fost l-oħrajn, fin-NU, għandha l-għan li timmanipula l-proċeduri biex jiġi mminimizzat l-iskrutinju tal-imġiba taċ-Ċina, b'mod partikolari fil-każ tas-sitwazzjoni tal-minoranzi tal-Musulmani Ujguri u ta' Musulmani Turkiċi etniċi oħra; jistieden lill-UE taħdem ma' sħab tal-istess fehma biex tiġġieled dawn l-iżviluppi;

35. Jisħaq li ċ-Ċina hija l-akbar fornitur ta' gwardjani tal-paċi fost il-ħames membri permanenti tal-Kunsill tas-Sigurtà tan-NU, iżda rrifjutat li tadotta taqsimiet mill-Kapitolu VII tal-Karta tan-NU u l-pilastru tar-Responsabbiltà għall-Protezzjoni (R2P); jissottolinja li l-UE integrat l-R2P fl-azzjoni esterna tagħha;

36. Jitlob li jkun hemm kooperazzjoni aktar b'saħħitha tal-UE man-NATO dwar l-isfidi tas-sigurtà taċ-Ċina; jappoġġja l-proposta tan-NATO li tiġi żviluppata strateġija politika biex tiġi indirizzata dinja li fiha ċ-Ċina se tkun superpotenza globali; jitlob li din l-istrateġija tkun ibbażata fuq xenarji differenti għall-iżvilupp tar-relazzjonijiet maċ-Ċina, inkluża l-possibbiltà ta' aktar deterjorament tas-sigurtà fil-Baħar taċ-Ċina tan-Nofsinhar, u jappella għal djalogu u koordinazzjoni mal-pajjiżi tad-Djalogu dwar is-Sigurtà Kwadrilaterali; jilqa' l-isforzi tan-NATO biex timmonitorja bir-reqqa l-implikazzjonijiet tas-sigurtà taż-żieda fil-preżenza fiżika taċ-Ċina fl-Artiku, kif ukoll fl-Afrika; jirrakkomanda li l-kooperazzjoni bejn l-UE u n-NATO dwar l-isfidi ta' sigurtà relatati maċ-Ċina titqies b'mod suffiċjenti filwaqt li jiġi elaborat il-Forum Strateġiku tal-UE u jiġi rieżaminat il-kunċett Strateġiku tan-NATO;

37. Jilqa' l-intenzjoni tal-Kunsill li jsaħħaħ l-enfasi strateġika, il-preżenza u l-azzjoni tal-UE fir-reġjun Indo-Paċifiku billi jniedi strateġija ġdida tal-UE għall-kooperazzjoni fir-reġjun Indo-Paċifiku, kif ukoll strateġija ġdida għall-konnettività; jinnota li kwalunkwe strateġija ġdida bħal din għandha tkun konformi mal-istrateġija UE-Ċina;

38. Jidhirlu pertinenti li l-Kummissjoni tforni rapporti puntwali u komprensivi dwar is-Sħubija Ekonomika Reġjonali Komprensiva (RCEP) – l-akbar ftehim ta' kummerċ ħieles fid-dinja – bil-għan li tivvaluta l-iżviluppi fil-post; huwa partikolarment interessat fl-implikazzjonijiet għall-interessi strateġiċi tal-UE ta' temi bħall-iffissar ta' standards fir-reġjun Asja-Paċifiku kif ukoll dispożizzjonijiet dwar ir-regoli tal-oriġini; josserva li għad li l-UE mhijiex parti tal-RCEP, il-ftehim se jkollu implikazzjonijiet għall-UE; jenfasizza l-assenza ta' dispożizzjonijiet fl-RCEP dwar il-kummerċ u s-sostenibbiltà, inklużi l-istandards fil-qasam soċjali u tax-xogħol kif ukoll l-objettivi klimatiċi u ambjentali;

39. Ifakkar, fil-kuntest tad-dinamika reġjonali, fl-importanza tal-kummerċ u tar-relazzjonijiet ekonomiċi bejn l-UE u t-Tajwan, anki dwar aspetti relatati mal-multilateraliżmu u mad-WTO, mat-teknoloġija u mas-saħħa pubblika, kif ukoll mal-kooperazzjoni essenzjali f'dawk li huma provvisti kritiċi bħas-semikondutturi; josserva li t-Tajwan huwa membru sħiħ tad-WTO; itenni l-appell tiegħu lill-Kummissjoni u lill-Kunsill favur ftehim bilaterali ta' investiment mat-Tajwan u jħeġġiġhom jagħmlu passi 'l quddiem f'dan is-sens, kif ukoll jibdew, b'urġenza, il-valutazzjoni tal-impatt, il-konsultazzjoni pubblika u l-eżerċizzju esplorattiv mal-awtoritajiet tat-Tajwan;

40. Iħeġġeġ lill-Kummissjoni tressaq proposti u azzjonijiet konkreti biex tiffaċilita l-parteċipazzjoni sħiħa tat-Tajwan bħala osservatur fil-laqgħat, fil-mekkaniżmu u fl-attivitajiet tad-WHO, tal-ICAO u tal-UNFCCC;

It-trawwim ta' awtonomija strateġika miftuħa, inkluż fir-relazzjonijiet kummerċjali u ta' investiment

41. Jissottolinja li l-kundizzjonalità tal-investiment u tal-kummerċ fiha nnifisha mhijiex biżżejjed biex tilqa' għall-assertività Ċiniża; isib li l-UE għandha żżid l-awtonomija strateġika billi tindirizza dimensjonijiet oħra tar-relazzjoni bejn l-UE u ċ-Ċina, b'mod partikolari s-sovranità diġitali u teknoloġika; jissottolinja, f'dan il-kuntest, il-ħtieġa li jsir investiment fl-innovazzjoni u fir-riċerka u li tiġi żviluppata strateġija industrijali kompetittiva u sovrana f'oqsma li jinkludu, iżda li mhumiex limitati għal, il-produzzjoni tal-mikroċipep u s-semikondutturi, l-estrazzjoni tal-materjali tal-art rari, il-cloud computing u t-teknoloġija tat-telekomunikazzjoni, sabiex titnaqqas id-dipendenza tal-UE miċ-Ċina, dejjem bil-ħsieb li tiġi żgurata koordinazzjoni aħjar ta' dawk il-politiki ma' dawk ta' demokraziji liberi oħra tal-istess fehma, filwaqt li jiġi esplorat il-potenzjal li r-riżorsi jinġabru flimkien u jinħolqu sinerġiji ġodda;

42. Josserva li, fl-2020, fil-kuntest tal-COVID-19, iċ-Ċina għall-ewwel darba kklassifikat ruħha bħala l-akbar sieħeb tal-UE fil-kummerċ ta' merkanzija, b'bilanċ kummerċjali dejjem aktar negattiv għall-UE; ifakkar, madankollu, li l-Istati Uniti għadhom l-ewwel sieħeb tal-UE f'termini ta' kummerċ fil-merkanzija u s-servizzi meqjusin flimkien; jemmen li l-qawmien ekonomiku taċ-Ċina u t-tkabbir imbassar se jħallu impatt notevoli fuq l-iżviluppi ekonomiċi globali fl-għaxar snin li ġejjin; jiġbed l-attenzjoni għall-fatt li, għal raġunijiet differenti, il-livelli ta' investiment reċiproku għadhom taħt il-potenzjal tagħhom u jirrikonoxxi l-opportunitajiet ekonomiċi li jikkaratterizzaw ir-reġjun f'sens usa'; iqis li l-volum kummerċjali bejn iċ-Ċina u l-UE se jirrikjedi qafas ibbażat fuq regoli u mmexxi mill-valuri li jeħtieġ ikun radikat fin-normi internazzjonali; jisħaq fuq il-fatt li r-rispett tad-drittijiet tal-bniedem huwa rekwiżit preliminari għall-impenn fir-relazzjonijiet fil-qasam tal-kummerċ u tal-investimenti mal-UE u jħeġġeġ liċ-Ċina tikkonforma mal-obbligi internazzjonali tagħha u timpenja ruħha tirrispetta d-drittijiet tal-bniedem;

43. Jissottolinja r-rwol fundamentali li jiżvolġi l-Parlament Ewropew fil-politika kummerċjali komuni tal-UE, fin-negozjati internazzjonali kif ukoll fis-sorveljanza, fl-iskrutinju, fir-ratifika u fil-monitoraġġ tal-implimentazzjoni tal-ftehimiet ta' kummerċ u investiment; jenfasizza l-bżonn li l-Kumitat għall-Kummerċ Internazzjonali jiġi kkonsultat fil-pront u b'mod adegwat u jħeġġeġ lill-Kummissjoni u lill-Kunsill iżommu djalogu frekwenti u jirrapportaw b'mod komprensiv, bil-għan li l-iżviluppi jiġu riflessi fl-aġenda fil-qasam tal-kummerċ u tal-investimenti bilaterali bejn l-UE u ċ-Ċina;

44. Jissottolinja l-importanza tar-relazzjoni strateġika tal-UE fil-qasam tal-kummerċ u tal-investimenti maċ-Ċina u jitlob lill-Istati Membri u lill-istituzzjonijiet tal-UE jindirizzaw ruħhom liċ-Ċina b'vuċi waħda u b'mod koordinat; iqis li l-inizjattivi ta' investiment fl-ambitu tal-format 16+1 la jridu jikkompromettu l-għaqda tal-UE u lanqas ikunu kontroproduċenti għall-isforzi tal-UE biex titkellem b'vuċi waħda;

45. Jistieden lill-Kummissjoni tanalizza d-dipendenzi ekonomiċi tal-UE fis-setturi strateġiċi, bħall-materja prima kritika, uħud minnhom jinsabu esklużivament fiċ-Ċina, u jenfasizza l-bżonn urġenti li titqawwa r-reżiljenza tal-ktajjen ta' provvista Ewropej; jappella għal sforzi għal diversifikazzjoni u konsolidament tal-aċċess tal-UE għar-riżorsi strateġiċi kruċjali neċessarji biex iħaddmu ż-żewġ magni tat-tkabbir, b'enfasi partikolari fuq it-30 element li huma inklużi fir-raba' lista aġġornata ta' materja prima kritika fl-2020; ifakkar fl-objettiv ġenerali tal-UE biex tinbena l-awtonomija strateġika miftuħa tagħha fl-ambitu tal-politika kummerċjali komuni; itenni l-importanza dejjem akbar tar-rabta bejn il-kummerċ u s-sigurtà fil-politika kummerċjali internazzjonali tal-UE;

46. Jappella għal iżjed trasparenza, koerenza u koordinament bejn l-Istati Membri dwar kwistjonijiet relatati ma' proġetti u ftehimiet ta' investiment bilaterali, b'mod partikolari dwar l-investiment dirett barrani fl-assi strateġiċi u fl-infrastrutturi kritiċi; jiġbed l-attenzjoni għar-rabtiet bejn id-dipendenzi ekonomiċi u l-influwenza politika esterna fil-livell tal-Istati Membri; ifakkar fl-importanza li jissaħħaħ ir-Regolament tal-UE dwar l-iskrinjar tal-investimenti diretti barranin fil-futur sabiex ikun żgurat li jiġi mblukkat kwalunkwe investiment potenzjali li jista' joħloq theddida għas-sigurtà u għall-ordni pubbliku tal-UE, b'mod partikolari mill-impriżi kkontrollati mill-Istat; jistieden lill-Istati Membri jadottaw b'urġenza mekkaniżmu ta' skrinjar nazzjonali jekk għadhom ma għandhomx, bi qbil mal-gwida tal-Kummissjoni minn Marzu 2020;

47. Jinsab konvint li r-relazzjoni bilaterali bejn l-UE u ċ-Ċina fil-qasam tal-kummerċ u tal-investimenti hija strateġikament importanti u għandha tkun ibbażata fuq ir-regoli, u fil-qalba tagħha għandu jkun hemm sistema kummerċjali multilaterali u l-prinċipju ta' reċiproċità; itenni li filwaqt li hemm tendenzi preokkupanti lejn diżakkoppjament ekonomiku, infurzar u rispett aktar assertivi tal-impenji huma neċessarji fil-qafas tar-relazzjoni globali fil-qasam tal-kummerċ u tal-investimenti; jappella liċ-Ċina tiżvolġi parti aktar attiva u responsabbli fid-WTO u f'inizjattivi multilaterali oħra, biex is-saħħa ekonomika tagħha tikkorrispondi għal-livell ta' żvilupp tagħha, u tirrispetta bis-sħiħ l-obbligi kollha tagħha bl-ambitu internazzjonali u tad-WTO; jistieden lill-Kummissjoni u lill-awtoritajiet Ċiniżi jikkooperaw mill-qrib favur ir-riforma tal-ġabra ta' regoli tad-WTO biex jitrawwem żvilupp aktar sostenibbli, jiġu promossi t-tranżizzjoni ekoloġika u r-rivoluzzjoni diġitali kif ukoll jinġiebu l-istabbiltà u ċ-ċertezza tad-dritt fix-xenarju tal-kummerċ internazzjonali;

48. Jesprimi tħassib bir-relazzjoni kummerċjali u ekonomika bilaterali bejn l-UE u ċ-Ċina dejjem aktar żbilanċjata; jisħaq fuq il-fatt li r-riekwilibriju u aktar parità fil-kundizzjonijiet huma fundamentali għall-interessi tal-UE; jemmen li ċ-Ċina u l-UE jeħtiġilhom jiżviluppaw parità fil-kundizzjonijiet u jsawru relazzjoni produttiva minkejja d-differenzi bejn is-sistemi ekonomiċi rispettivi tagħhom; jissottolinja, f'dan ir-rigward, il-ħidma ma taqta' qatt tal-UE fit-tisħiħ tal-pakkett ta' strumenti kummerċjali tagħha, filwaqt li tirrikonoxxi l-bżonn li żżomm djalogu miftuħ dwar l-isfidi komuni, ngħidu aħna l-ġlieda globali kontra t-tibdil fil-klima; jisħaq fuq il-bżonn urġenti li l-UE tlesti l-firxa tagħha ta' miżuri awtonomi, inkluż Regolament tal-UE dwar l-iskrinjar tal-investimenti diretti barranin li jkun aktar rigoruż, leġiżlazzjoni dwar il-sussidji barranin li jgħawġu s-suq intern, l-adozzjoni rapida ta' strument ta' akkwist internazzjonali assertiv u effikaċi, miżuri dwar l-esportazzjoni tat-teknoloġija b'użu doppju, strument effikaċi kontra l-koerċizzjoni, pakkett leġiżlattiv dwar il-governanza korporattiva sostenibbli u leġiżlazzjoni dwar il-ktajjen ta' provvista b'rekwiżiti relatati mad-diliġenza dovuta, li għandhom ukoll jipprevedu projbizzjoni fuq l-importazzjonijiet ta' prodotti magħmulin minn xogħol furzat; jemmen li miżuri mmirati oħra fl-ambitu tar-reġim globali tas-Sanzjonijiet fuq id-Drittijiet tal-Bniedem tal-UE għandhom jiġu kkunsidrati bħala meħtieġa;

49. Itenni t-tħassib kbir tiegħu dwar il-ħafna ostakli li l-impriżi Ewropej isibu quddiemhom huma u jaċċedu għas-suq Ċiniż u joperaw fih; jesprimi tħassib li l-"istrateġija taċ-ċirkolazzjoni doppja" taċ-Ċina msemmija fl-Erbatax-il Pjan Kwinkwennali tagħha se tikkawża deterjorament ulterjuri tal-ambjent tan-negozju lill-kumpaniji tal-UE; jenfasizza għal darb'oħra t-tħassib partikolari tiegħu dwar il-prattiki ta' distorsjoni tas-suq bħal, iżda mhux biss, is-sussidji industrijali lill-impriżi statali Ċiniżi u t-trattament privileġġjat mogħti lilhom, is-serq ta' proprjetà intellettwali, trasferimenti furzati tat-teknoloġiji u l-lokalizzazzjoni tad-data, l-eċċess fil-kapaċità industrijali f'setturi bħall-azzar u d-dumping relatat tal-esportazzjonijiet kif ukoll prattiki kummerċjali żleali oħrajn u l-indħil politiku ġenerali dejjem akbar fl-ambjent tan-negozju, anki fis-settur privat; jistieden lill-Kummissjoni u lill-Istati Membri jintensifikaw il-kooperazzjoni tagħhom mas-sħab tal-istess fehma fid-WTO, bil-għan li jiżviluppaw approċċ konġunt biex jindirizzaw dawn il-prattiki kummerċjali żleali taċ-Ċina; jilqa' pożittivament id-djalogu bejn l-UE u l-Istati Uniti dwar iċ-Ċina bħala mezz ta' kooperazzjoni dwar temi bħar-reċiproċità, il-multilateraliżmu, il-prattiki ta' distorsjoni tas-suq u l-ekonomija kif ukoll ta' kwistjonijiet strutturali oħra li fihom il-koordinament bejn l-UE u l-Istati Uniti jista' jwassal għal valur miżjud; jinsab konvint dwar l-importanza vitali ta' informazzjoni adegwata dwar l-iżviluppi leġiżlattivi u regolatorji fis-suq Ċiniż, fid-dawl tan-natura ftit li xejn trasparenti tagħha u mmexxija mill-Istat; ifakkar, f'dan il-kuntest, fl-importanza ta' diskussjonijiet frekwenti u skjetti mal-istituzzjonijiet tal-UE, mal-Kamra tal-Kummerċ tal-Unjoni Ewropea fiċ-Ċina u mas-sħab kollha tagħna fil-post;

50. Iqis li huwa pertinenti li jsiru diskussjonijiet speċifiċi dwar l-effetti negattivi relatati mal-kummerċ tad-distorsjonijiet ikkawżati mill-kapaċità eċċessiva fl-azzar u fl-aluminju, kif ukoll dwar ir-rimedji possibbli għalihom, flimkien mal-importanza li jiġu indirizzati s-sussidji industrijali fid-WTO; iħeġġeġ liċ-Ċina terġa' timpenja ruħha fil-ħidma tal-Forum Globali dwar il-Kapaċità Eċċessiva tal-Azzar ħalli telimina l-kapaċità eċċessiva u terġa' tinġieb il-parità fil-kundizzjonijiet; josserva li, minkejja l-pjanijiet taċ-Ċina li tagħlaq is-siti ta' produzzjoni skaduti u timmodernizza l-produzzjoni, il-produzzjoni annwali tagħha f'termini ta' azzar grezz stabbiliet rekord għal erba' snin infila; jinkoraġġixxi lill-awtoritajiet Ċiniżi jagħtu segwitu lill-wegħdiet tagħhom biex inaqqsu l-produzzjoni tal-azzar grezz;

51. Ifakkar, f'dan ir-rigward, fir-rabtiet bejn il-kummerċ, il-privattivi u l-istandards; jemmen li l-istandardizzazzjoni u l-elementi normattivi tal-kompetizzjoni internazzjonali dejjem akbar huma essenzjali għall-politika kummerċjali tal-UE u għandhom ikunu wieħed mill-pilastri fundamentali tal-politika industrijali strateġika tagħha; ifakkar li r-rapporti dwar l-istandardizzazzjoni qegħdin jirreferu għal din tal-aħħar bħala qasam ta' riskju li fih iċ-Ċina tista' twettaq diverġenza u diżakkoppjament; jenfasizza li l-kontrafazzjoni hija prijorità assoluta tal-isforzi tal-UE fl-aspetti kummerċjali tal-protezzjoni tal-proprjetà intellettwali; jinsab imħasseb dwar il-fatt li ċ-Ċina għadha l-għajn ta' parti dominanti ta' prodotti kontrafatti u piratati li jaslu fl-UE f'termini kemm ta' valur kif ukoll ta' volum; jissottolinja l-mod kif l-Ftehim bejn l-UE u ċ-Ċina dwar l-Indikazzjonijiet Ġeografiċi (IĠ) jirrappreżenta l-ewwel pass fil-ġlieda kontra l-kontrafazzjoni u jħeġġeġ lill-Kummissjoni tintensifika l-isforzi tagħha biex tipproteġi l-proprjetà intellettwali tal-UE, inklużi l-privattivi; jinsab imħasseb dwar il-prattika emerġenti li qegħdin iħaddnu l-qrati Ċiniżi, li jirrivendikaw il-ġuriżdizzjoni dinjija għad-definizzjoni ta' kundizzjonijiet għall-ħruġ tal-liċenzji ġusti, raġonevoli u mhux diskriminatorji għall-privattivi essenzjali u li jimpedixxu lill-kumpaniji milli jikkontestaw id-deċiżjonijiet tagħhom; jissottolinja li din il-prattika hija ekwivalenti għall-fatt li l-kumpaniji Ċiniżi jitħallew ma jħallsux prezz ġust għall-użu ta' privattivi essenzjali, barra milli tpoġġi f'riskju r-riċerka Ewropea; jitlob lill-Kummissjoni tqajjem il-kwistjoni mal-awtoritajiet Ċiniżi; jitlob li tingħata attenzjoni aktar mill-qrib lill-ksur fl-oqsma tad-diġitalizzazzjoni u tal-komunikazzjonijiet fi ħdan l-organi rilevanti kollha, fosthom l-Unjoni Internazzjonali tat-Telekomunikazzjoni tan-Nazzjonijiet Uniti, flimkien mas-sħab li jaħsbuha bħall-UE, b'mod partikolari l-Istati Uniti; jitlob li jsiru aktar diskussjonijiet politiċi dwar l-implikazzjonijiet tal-inizjattivi Ċiniżi bħal "Made in China 2025" jew ta' "China Standards 2035" b'pertinenza dejjem akbar; huwa mħasseb, f'dan il-kuntest, bl-awtoritariżmu diġitali dejjem akbar min-naħa taċ-Ċina u bl-isforzi tagħha bit-tir li tippromwovi mad-dinja kollha l-mudell ta' governanza diġitali tagħha; jenfasizza fuq il-bżonn li jiġi konkluż il-Ftehim tad-WTO dwar il-Kummerċ Elettroniku fl-ambitu tal-Inizjattiva tad-Dikjarazzjoni Konġunta bil-għan li jiġu promossi livell bażiku ta' ftuħ u parità fil-kundizzjonijiet maċ-Ċina;

52. Jitlob li tingħata attenzjoni akbar lill-SMEs Ewropej li jidħlu f'relazzjonijiet kummerċjali u ta' investiment maċ-Ċina u jilqa' pożittivament is-sostenn taċ-Ċina għall-inizjattivi favur l-SMEs, bħall-portal Access2Markets, l-għodda ta' Awtovalutazzjoni tar-Regoli tal-Oriġini (Rules of Origin Self-Assessment – ROSA) jew il-helpdesk tal-SMEs dwar id-drittijiet ta' proprjetà intellettwali (DPI) fiċ-Ċina;

53. Jieħu nota tal-konklużjoni fil-prinċipju, fil-livell politiku, tas-CAI bejn l-UE u ċ-Ċina, filwaqt li jirrikonoxxi l-isforzi li għamlet il-Kummissjoni biex tindirizza n-nuqqasijiet marbuta mal-asimmetriji fl-aċċess għas-suq, mal-parità fil-kundizzjonijiet u mal-iżvilupp sostenibbli permezz ta' impenn ibbażat fuq ir-regoli; ifakkar, iżda, li r-relazzjonijiet kummerċjali ma jsirux b'mod iżolat mill-kuntest ġenerali;

54. Jistieden lill-Kummissjoni tikkonsulta lill-Parlament qabel ma tieħu kwalunkwe azzjoni favur il-konklużjoni u l-iffirmar tal-Ftehim Komprensiv dwar l-Investiment (CAI); iħeġġeġ liċ-Ċina tieħu azzjonijiet konkreti favur ir-ratifika u l-implimentazzjoni tal-Konvenzjonijiet fundamentali Nri 29 u 105 tal-ILO dwar ix-xogħol furzat; jenfasizza li ċ-Ċina impenjat ruħha timplimenta b'mod effettiv il-Konvenzjonijiet tal-ILO ratifikati u taħdem biex tirratifika l-Konvenzjonijiet fundamentali tal-ILO "aġġornati" l-oħra;

55. Josserva li s-26 Stat Membru tal-UE għandhom trattati bilaterali ta' investiment qodma maċ-Ċina; 56.  Ifakkar, madankollu, li s-CAI waħdu ma jistax isolvi l-problemi kollha li jolqtu r-relazzjoni ekonomika u politika tagħna, u għaldaqstant irid jiġi kkunsidrat fil-kuntest ta' pakkett imsaħħaħ u aktar assertiv ta' miżuri unilaterali tal-UE; jissottolinja li l-Parlament Ewropew jiskrutinizza l-ftehim bir-reqqa, inkluża t-taqsima dwar l-iżvilupp sostenibbli;

57. Jisħaq li l-implimentazzjoni adegwata u l-infurzar effikaċi jkunu fatturi determinanti fundamentali tal-utilità u tas-suċċess tal-ftehim biex jikkoreġi l-asimmetriji strutturali fir-relazzjoni kummerċjali u ta' investiment; jenfasizza r-rwol u r-rilevanza tal-iskambji strutturati u frekwenti mal-uffiċċju tal-Uffiċjal Kap tal-Infurzar għall-Kummerċ (CTEO) tal-Kummissjoni fl-isforzi biex issir evalwazzjoni tal-implimentazzjoni futura tal-Ftehim Komprensiv dwar l-Investiment (CAI) kemm-il darba jiġi adottat; ifakkar u jsaħħaħ, f'dan il-kuntest, l-importanza tad-diplomazija parlamentari biex jiġu aġevolati l-fehim reċiproku, il-komunikazzjoni trasparenti u d-djalogu sinċier;

58. Jilqa' b'sodisfazzjon id-dħul fis-seħħ tal-Ftehim dwar l-IĠ bejn l-UE u ċ-Ċina, u jtenni l-importanza tal-implimentazzjoni effettiva tiegħu u l-infurzar fis-swieq taż-żewġ partijiet; jilqa' l-espansjoni antiċipata tal-ftehim attwali biex jiżdiedu 350 denominazzjoni IĠ oħrajn miż-żewġ naħat; jissottolinja li dan il-ftehim limitat dwar l-IĠ jista' jservi ta' mudell u bażi għal ftehimiet dwar l-IĠ futuri; jenfasizza r-rwol kruċjali li se jiżvolġi s-CTEO fil-monitoraġġ u fit-titjib tal-konformità mal-ftehim; jistieden lis-CTEO jirreaġixxi minnufih jekk il-ftehim ma jkunx implimentat korrettament;

59. Jenfasizza li ċ-Ċina għad għandha triq twila qabel ma ssir ekonomija orjentata lejn is-suq, minħabba l-influwenza estrema li l-Istat għandu fuq l-ekonomija u fuq id-deċiżjonijiet tan-negozji relatati mal-prezzijiet, mal-ispejjeż, mal-produzzjoni u mal-inputs; jistieden, għalhekk, liċ-Ċina tieħu miżuri aktar miftuħa fir-rigward tad-ditti tagħha stess u ta' ditti barranin li joperaw fil-pajjiż;

60. Jappella għal aktar finanzjament għall-proġetti tal-introduzzjoni tal-5G u għar-riċerka dwar is-6G, l-intelliġenza artifiċjali (AI) u t-teknoloġija tal-big data, sabiex tiġi żgurata s-sigurtà futura tan-network u ż-żieda fis-sovranità diġitali li se jkunu vitali għad-diġitalizzazzjoni u għat-tkabbir ekonomiku, iżda wkoll biex jingħalaq id-distakk teknoloġiku maċ-Ċina u jiġu eliminati r-riskji li l-membri tan-NATO u s-sħab tagħha jistgħu jkunu esposti għalihom bl-integrazzjoni tat-teknoloġija 5G taċ-Ċina fin-networks tat-telekomunikazzjoni, peress li tali azzjoni tista' tnaqqar mill-futur tal-governanza demokratika; jappella wkoll għal strateġija kkoordinata tal-UE dwar iċ-ċibersigurtà u għal żieda fil-kapaċitajiet tal-Istati Membri f'dan il-qasam, sabiex, fost l-oħrajn, tissaħħaħ il-protezzjoni kontra t-theddid għall-infrastruttura kritika tal-UE li toħroġ minn pajjiżi terzi, inkluża ċ-Ċina;

61. Jissottolinja l-importanza tal-ħidma fuq ir-regolamentazzjoni tal-IA u fuq qafas ta' responsabbiltà etika u ċivili għas-sistemi tal-IA u t-teknoloġiji affiljati li jagħtu spinta lill-innovazzjoni ċċentrata fuq il-bniedem u li tkun sensittiva għall-privatezza, bi sħubija ma' sħab strateġiċi ewlenin li jaqsmu l-valuri liberali u demokratiċi tal-UE; jissottolinja li s-sistemi ta' punteġġ soċjali mhumiex konformi mal-valuri fundamentali tal-UE; jisħaq fuq il-ħtieġa li l-UE tippreserva d-drittijiet tal-individwu; jisħaq, għalhekk, li politiki u għodod ta' sorveljanza bħal dawn ma għandhom fl-ebda ċirkostanza jintużaw fl-UE; jissottolinja, għalhekk, li l-UE jeħtiġilha taħdem biex tillimita u tiġġieled il-firxa transnazzjonali tar-repressjoni diġitali;

Difiża u promozzjoni tal-interessi u l-valuri Ewropej ewlenin billi l-UE tinbidel f'attur ġeopolitiku aktar effettiv

62. Jemmen li l-UE għandha tkompli taħdem lejn it-trasformazzjoni tagħha f'attur ġeopolitiku aktar effettiv billi tiżgura approċċ ġeopolitiku aktar magħqud tal-Istati Membri tagħha, kif ukoll billi trawwem l-awtonomija u l-kapaċità strateġika tagħha, billi taħdem flimkien mal-Istati Uniti u sħab oħra tal-istess fehma;

63. Jenfasizza li s-suċċess tal-politika Ewropea tal-viċinat jiddetermina l-kapaċità tal-UE li tassumi r-rwol tal-attur globali; iwissi dwar ir-rwol dejjem akbar taċ-Ċina fil-viċinat immedjat tal-UE, inklużi l-pajjiżi kandidati; jappella għal approċċ strateġiku fil-livell tal-UE biex jiġu miġġielda l-azzjonijiet Ċiniżi permezz ta' investimenti, self u attivitajiet ta' negozju fil-pajjiżi ġirien, b'mod partikolari fil-Balkani tal-Punent; jitlob b'mod partikolari impenn attiv tal-UE biex dawn il-pajjiżi jiġu pprovduti b'alternattiva vijabbli għall-investimenti Ċiniżi;

64. Jiġbed l-attenzjoni għall-ħtieġa li jissaħħu l-għodod tal-UE biex tiddefendi lilha nnifisha, iżżid il-kapaċità tagħha li tipproteġi l-interessi tagħha lil hinn minn xtutha, taqdi rwol aktar proattiv, konsistenti u strateġiku fil-viċinat dirett tagħha u tiżgura li l-Istati Membri jkunu magħquda fl-approċċ ġeopolitiku tagħhom;

65. Jemmen li l-Konferenza dwar il-Futur tal-Ewropa għandha tipprovdi forum għal dibattitu dwar l-azzjoni esterna tal-UE, bħal dwar kwistjonijiet relatati mal-protezzjoni tad-drittijiet tal-bniedem, u li tiddiskuti kif tista' tinkiseb awtonomija strateġika miftuħa; jissottolinja l-importanza li jiġu diskussi kwistjonijiet marbuta mat-titjib u t-tisħiħ tal-politika barranija u ta' sigurtà komuni tal-UE, pereżempju billi l-VP/RGħ jingħata mandat aktar b'saħħtu biex jaġixxi f'isem l-UE fi kwistjonijiet ta' politika barranija u jieħu l-passi meħtieġa biex jintroduċi votazzjoni b'maġġoranza kwalifikata f'ċerti oqsma tal-affarijiet barranin; jappella għat-tisħiħ tal-kooperazzjoni fil-qasam tad-difiża fost l-Istati Membri, bil-għan li jissaħħu l-kapaċitajiet strateġiċi Ewropej tad-difiża, kif ukoll li tinħoloq Unjoni Ewropea tad-Difiża żviluppata bis-sħiħ, li tkun tinkludi l-kapaċitajiet militari Ewropej;

66. Jindika l-ħtieġa li s-SEAE jiġi mgħammar b'mandat u bir-riżorsi meħtieġa għall-monitoraġġ u għall-indirizzar tal-operazzjonijiet ta' diżinformazzjoni Ċiniżi, inkluż il-ħolqien ta' Task Force StratCom għal-Lvant Imbiegħed li tiffoka fuq id-diżinformazzjoni li toriġina miċ-Ċina; jistieden liċ-Ċina toqgħod lura milli tuża mezzi moħbija ta' manipulazzjoni tad-diskors pubbliku fl-UE; iħeġġeġ lill-Kummissjoni tiżviluppa sistema regolatorja madwar l-UE kollha biex tipprevjeni lill-kumpaniji tal-media ffinanzjati jew ikkontrollati minn gvernijiet ta' pajjiżi terzi milli jakkwistaw kumpaniji tal-media Ewropej, sabiex jinżamm rapportar indipendenti u liberu dwar il-media fl-UE; jissuġġerixxi d-diversifikazzjoni tal-media tal-lingwa Ċiniża fl-Ewropa billi tiġi mħeġġa l-kooperazzjoni bejn il-media Ewropea u s-sħab internazzjonali, bħat-Tajwan; jisħaq ukoll fuq il-ħtieġa urġenti li tingħata spinta sinifikanti lill-kapaċità tal-esperti fiċ-Ċina fis-SEAE u fil-Kummissjoni b'mod ġenerali;

67. Jindika l-importanza ta' studji u riċerka indipendenti dwar iċ-Ċina fl-universitajiet, fil-gruppi ta' riflessjoni, fl-istituzzjonijiet ta' riċerka u fl-iskejjel madwar l-UE, mingħajr appoġġ jew influwenza finanzjarja Ċiniża, filwaqt li jiġu żgurati l-integrità akkademika u l-libertà tal-kelma; jistieden lill-UE, għalhekk, tiżviluppa programm biex tiffinanzja r-riċerka relatata maċ-Ċina u t-taħriġ fil-lingwi fl-UE;

68. Jindika l-ħtieġa li jiġu introdotti, indipendentement mill-influwenza tas-CPC, programmi għall-istudju tal-kultura, il-lingwa u l-politika Ċiniżi, pereżempju permezz ta' kuntatti aktar mill-qrib mal-akkademja u s-soċjetà tat-Tajwan;

69. Jistieden lill-Kummissjoni tqis u tinkludi fl-istrateġija tagħha l-interess u l-involviment taċ-Ċina li qed jikbru malajr fl-Artiku; jappella li jkun hemm tħejjija biex tiġi żgurata l-libertà tan-navigazzjoni fir-Rotta tal-Baħar tat-Tramuntana tal-Artiku; jieħu nota tal-investimenti taċ-Ċina fir-riċerka u fl-infrastruttura strateġika fl-Artiku u jinnota li l-UE ma għandhiex taqa' lura f'dan ir-reġjun importanti;

°

° °

70. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni u lill-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta' Sigurtà, u għal skopijiet ta' informazzjoni, lill-Gvern tar-Repubblika tal-Poplu taċ-Ċina.