RAKKOMANDAZZJONI GĦAT-TIENI QARI dwar il-pożizzjoni tal-Kunsill fl-ewwel qari għall-adozzjoni tar-regolament tal-Parlament Ewropew u tal-Kunsill li jistabbilixxi l-Istrument għall-Assistenza ta' Qabel l-Adeżjoni (IPA III)

 

ANNESS GĦAR-RIŻOLUZZJONI LEĠIŻLATTIVA 

Dikjarazzjoni mill-Kummissjoni Ewropea dwar is-sospensjoni tal-assistenza mogħtija taħt l-Istrument għall-Assistenza ta' Qabel l-Adeżjoni (IPA III)

 

Il-Parlament Ewropew jinnota li r-Regolament (UE) 2021/... li jistabbilixxi l-Istrument għall-Assistenza ta' Qabel l-Adeżjoni (IPA III) fih referenza ġenerali dwar il-possibbiltà ta' sospensjoni tal-assistenza mingħajr ma tiġi speċifikata l-bażi konkreta għal tali deċiżjoni. Tali sospensjoni tal-assistenza għandha tiġi implimentata f'każ ta' degradazzjoni fid-demokrazija, id-drittijiet tal-bniedem u l-istat tad-dritt minn benefiċjarju elenkat fl-Anness I.

 

Il-Parlament Ewropew iqis li kwalunkwe sospensjoni ta' assistenza taħt dan l-istrument timmodifika l-iskema finanzjarja ġenerali miftiehma skont il-proċedura leġiżlattiva ordinarja. Bħala koleġiżlatur u fergħa msieħba tal-awtorità baġitarja, il-Parlament Ewropew huwa għalhekk intitolat li jeżerċita bis-sħiħ il-prerogattiva tiegħu f'dak ir-rigward, jekk ikollha tittieħed deċiżjoni bħal din.

 

 

Dikjarazzjoni mill-Parlament Ewropew dwar id-Deċiżjoni tal-Kunsill 2010/427/UE u koordinazzjoni strateġika

 

Il-Parlament Ewropew jinnota li r-referenzi għall-istrumenti ta' azzjoni esterna tal-Unjoni fl-Artikolu 9 tad-Deċiżjoni tal-Kunsill 2010/427/UE ma għadhomx validi, u għalhekk iqis li, għal raġunijiet ta' ċarezza tad-dritt, dak l-Artikolu għandu jiġi aġġornat, f'konformità mal-proċedura stabbilita fl-Artikolu 27(3) tat-Trattat dwar l-Unjoni Ewropea, sabiex jitqiesu l-istrumenti ta' assistenza esterna tal-Unjoni applikabbli fil-perjodu tal-QFP 2021-2027, jiġifieri l-Istrument ta' Viċinat, ta' Kooperazzjoni għall-Iżvilupp u ta' Kooperazzjoni Internazzjonali – Ewropa Globali , l-Istrument għall-Assistenza ta' Qabel l-Adeżjoni, l-Istrument Ewropew għal Kooperazzjoni Internazzjonali fil-qasam tas-Sikurezza Nukleari u d-Deċiżjoni dwar l-Assoċjazzjoni Ekstra-Ewropea, inkluża Greenland.

 

Il-Parlament Ewropew jistieden lill-Kummissjoni u lis-Servizz Ewropew għall-Azzjoni Esterna (SEAE) jistabbilixxu struttura ta' koordinazzjoni strateġika magħmula mis-servizzi rilevanti kollha tal-Kummissjoni u tas-SEAE sabiex jiġu żgurati l-koerenza, is-sinerġija, it-trasparenza u r-responsabbiltà f'konformità mal-Artikolu 5 tar-Regolament (UE) 2021/947 li jistabbilixxi l-Istrument ta' Viċinat, ta' Kooperazzjoni għall-Iżvilupp u ta' Kooperazzjoni Internazzjonali – Ewropa Globali[4].

 

 

Dikjarazzjoni mill-Parlament Ewropew dwar l-ismijiet tal-benefiċjarji

 

Il-Parlament Ewropew jinnota li l-Anness I tar-Regolament (UE) 2021/... li jistabbilixxi l-Istrument għall-Assistenza ta' Qabel l-Adeżjoni (IPA III) jirreferi għall-benefiċjarji eliġibbli għal finanzjament taħt dan l-Istrument. Il-Parlament Ewropew iqis li l-ismijiet kostituzzjonali għandhom jintużaw għall-benefiċjarji elenkati, u l-Kosovo għandu jissejjaħ ir-Repubblika tal-Kosovo.

 

 

Dikjarazzjoni mill-Kummissjoni Ewropea dwar djalogu ġeopolitiku mal-Parlament Ewropew dwar l-Istrument għall-Assistenza ta' Qabel l-Adeżjoni (IPA III)

 

Il-Kummissjoni Ewropea, filwaqt li tqis il-funzjonijiet ta' kontroll politiku tal-Parlament Ewropew stabbiliti fl-Artikolu 14 tat-Trattat dwar l-Unjoni Ewropea, timpenja ruħha li twettaq djalogu ġeopolitiku ta' livell għoli bejn iż-żewġ istituzzjonijiet dwar l-implimentazzjoni tar-Regolament (UE) Nru 2021/XXX tal-Parlament Ewropew u tal-Kunsill li jistabbilixxi l-Istrument għall-Assistenza ta' Qabel l-Adeżjoni (IPA III). Dan id-djalogu għandu jippermetti skambji mal-Parlament Ewropew, li l-pożizzjonijiet tiegħu dwar l-implimentazzjoni tal-IPA III ser jitqiesu bis-sħiħ, b'rispett sħiħ għall-kapaċità tal-Kummissjoni li timplimenta l-istrument, f'konformità mar-responsabbiltajiet istituzzjonali tagħha.

 

Id-djalogu ġeopolitiku ser jiddiskuti orjentazzjonijiet ġenerali dwar l-implimentazzjoni tal-IPA III, inkluż dwar l-ipprogrammar qabel l-adozzjoni tal-qafas ta' programmazzjoni tal-IPA III u d-dokumenti ta' programmazzjoni, u rigward suġġetti speċifiċi bħas-sospensjoni tal-assistenza lil benefiċjarju meta dan jonqos b'mod persistenti milli josserva l-prinċipji tad-demokrazija, l-istat tad-dritt, il-governanza tajba, ir-rispett lejn id-drittijiet tal-bniedem u l-libertajiet fundamentali.

 

Id-djalogu ġeopolitiku se jkun strutturat kif ġej:

 

i) Djalogu ta' livell għoli bejn il-Kummissarju inkarigat mill-Viċinat u t-Tkabbir, f'isem il-Kummissjoni, u l-Parlament Ewropew.

 

ii) Djalogu permanenti fil-livell ta' uffiċjali għolja mal-gruppi ta' ħidma tal-Kumitat AFET biex jiġu ggarantiti tħejjija u segwitu adegwati għad-djalogu ta' livell għoli.

 

Id-djalogu ta' livell għoli se jsir mill-inqas darbtejn fis-sena. Waħda mil-laqgħat tista' tikkoinċidi mal-preżentazzjoni mill-Kummissjoni tal-abbozz ta' baġit annwali.

 

 

Dikjarazzjoni mill-Kummissjoni Ewropea dwar il-modulazzjoni/is-sospensjoni tal-assistenza fl-Artikolu 8, paragrafu 5 tar-Regolament Nru 2021/XXX tal-Parlament Ewropew u tal-Kunsill ta' XX/XX 2021 li jistabbilixxi l-Istrument għall-Assistenza ta' Qabel l-Adeżjoni (IPA III)

 

Il-Kummissjoni Ewropea tqis li d-dispożizzjoni fl-Artikolu 8(5) tirrispetta s-setgħat tal-Kummissjoni fl-implimentazzjoni tal-programmi tal-Unjoni, u l-baġit tal-Unjoni b'mod ġenerali, dment li tkun mingħajr preġudizzju għas-setgħat fdati lill-Kummissjoni mit-Trattati u mir-Regolament Finanzjarju biex tissospendi l-assistenza tal-Unjoni pprovduta lil pajjiżi terzi.

 

 

Dikjarazzjoni tal-Kummissjoni Ewropea dwar in-natura konsultattiva tal-bordijiet strateġiċi bħal fl-Artikolu 12 tar-Regolament Nru 2021/XXX tal-Parlament Ewropew u tal-Kunsill ta' XX/XX 2021 li jistabbilixxi l-Istrument għall-Assistenza ta' Qabel l-Adeżjoni (IPA III)

 

Il-Kummissjoni Ewropea tfakkar li kif stabbilit fl-Artikolu 12 tar-Regolament IPA III, il-bord strateġiku tal-Qafas ta' Investiment għall-Balkani tal-Punent (WBIF) huwa korp konsultattiv għall-Kummissjoni. Dan huwa allinjat mal-Artikolu 33 tar-Regolament (UE) 2021/947 tal-Parlament Ewropew u tal-Kunsill tad-9 ta' Ġunju 2021 dwar l-NDICI – Ewropa Globali, li jirreferi għall-bordijiet strateġiċi tad-WBIF u tal-EFSD+. Dawn il-bordijiet strateġiċi ma għandhomx setgħat ta' teħid ta' deċiżjonijiet fil-kuntest tal-implimentazzjoni tal-baġit tal-UE. Ir-Regoli ta' Proċedura għall-bord strateġiku tad-WBIF ser jiġu stabbiliti fuq din il-bażi.

ĠUSTIFIKAZZJONI QASIRA

L-Istrument għall-Assistenza ta' Qabel l-Adeżjoni (IPA) ilu mill-2007 l-istrument finanzjarju ewlieni li jappoġġja r-riformi relatati mal-UE fil-pajjiżi kandidati u kandidati potenzjali, jiġifieri s-sitt pajjiżi tal-Balkani tal-Punent u t-Turkija.

 

It-tielet ġenerazzjoni tal-IPA ssaħħaħ l-appoġġ għall-proċess tal-adeżjoni, filwaqt li tħejji lill-benefiċjarji għall-obbligi tas-sħubija fl-UE. Dan se jgħin biex ikomplu jinbnew il-ħiliet u jiġu ttrasformati l-pajjiżi, bl-għan li jsiru membri futuri tal-UE. L-assistenza se tkun ipprogrammata taħt ħames setturi tematiċi prijoritarji li jkopru 1) l-istat tad-dritt, id-drittijiet fundamentali u d-demokrazija; 2) il-governanza tajba, l-allinjament normattiv, ir-relazzjonijiet tajbin ta' viċinat u l-komunikazzjoni strateġika; 3) l-aġenda ekoloġika u l-konnettività sostenibbli 4) il-kompetittività u t-tkabbir inklużiv 5) il-kooperazzjoni territorjali u transfruntiera.

 

L-istrument jipprevedi mira miżjuda ta' 30 % għall-azzjoni klimatika, flimkien ma' mira addizzjonali tal-bijodiversità biex tikkontribwixxi għall-objettivi ġenerali tal-QFP dwar il-bijodiversità. Huwa għandu jikkontribwixxi wkoll għall-għanijiet orizzontali tad-drittijiet tal-bniedem u l-ugwaljanza bejn il-ġeneri, filwaqt li jżid ukoll l-isforzi fil-viżibbiltà u l-komunikazzjoni strateġika. L-IPA III jipprevedi koordinazzjoni mtejba tad-donaturi u konsultazzjonijiet imsaħħa mal-organizzazzjonijiet tas-soċjetà ċivili u l-awtoritajiet lokali u reġjonali.

 

Waħda mill-kisbiet ewlenin tan-negozjati interistituzzjonali hija governanza mtejba u żieda fl-iskrutinju tal-Istrument, min-naħa tal-Parlament. Il-Kummissjoni se tadotta att delegat ta' qabel l-ipprogrammar li jiddetermina l-objettivi speċifiċi u l-prijoritajiet tematiċi għall-assistenza fl-oqsma tal-istat tad-dritt, id-drittijiet tal-bniedem u d-demokrazija, l-edukazzjoni, l-impjiegi, l-ambjent u t-tibdil fil-klima, ir-riċerka u l-innovazzjoni. Il-ftehim politiku milħuq fin-negozjati kien jinkludi wkoll dikjarazzjoni tal-Kummissjoni li tistabbilixxi djalogu ġeopolitiku ta' livell għoli bejn il-Kummissarju u l-Parlament Ewropew, mill-anqas darbtejn fis-sena, li jipprovdi lill-Parlament b'saff addizzjonali ta' orjentazzjonijiet strateġiċi dwar l-implimentazzjoni tal-Istrument.

 

Il-pakkett finanzjarju għall-implimentazzjoni tal-IPA III għall-perjodu 2021-2027 jammonta għal EUR 14,162 biljun fi prezzijiet kurrenti. Finanzjament addizzjonali se jiġi mmobilizzat permezz ta' garanziji tal-IPA. L-Istrument għall-Assistenza ta' Qabel l-Adeżjoni mtejjeb jipprevedi modulazzjoni u sospensjoni tal-assistenza f'każijiet ta' rigress fid-demokrazija, id-drittijiet tal-bniedem u l-istat tad-dritt, it-tisħiħ tal-approċċ tal-''prijorità tal-kwistjonijiet fundamentali'' u l-kundizzjonalità tal-politika tat-tkabbir. Indikaturi msaħħa tal-prestazzjoni se jiżguraw valutazzjoni aħjar tal-progress fl-implimentazzjoni tar-regoli u l-obbligi tal-UE.

 

In-negozjati interistituzzjonali ġew konklużi fil-livell politiku fit-2 ta' Ġunju 2021. L-eżitu tagħhom ġie approvat mill-Kunsill fil-livell tal-Kumitat tar-Rappreżentanti Permanenti (COREPER II) fit-28 ta' Ġunju 2021 u approvat mill-Parlament f'laqgħa tal-Kumitat għall-Affarijiet Barranin fl-1 ta' Lulju 2021. Peress li l-pożizzjoni tal-Kunsill fl-ewwel qari adottata fis-7 ta' Settembru 2021 tirrifletti bis-sħiħ il-qbil milħuq kmieni fit-tieni qari, ir-rakkomandazzjoni għat-tieni qari hi li tiġi approvata l-pożizzjoni tal-Kunsill.

 

 

PROĊEDURA TAL-KUMITAT RESPONSABBLI

 

VOTAZZJONI FINALI B'SEJĦA TAL-ISMIJIET FIL-KUMITAT RESPONSABBLI

 

 

 

Tifsira tas-simboli użati:

+ : favur

- : kontra

0 : astensjoni