MOZZJONI GĦAL RIŻOLUZZJONI

Il-Parlament Ewropew,

–  wara li kkunsidra l-Artikoli 71, 80 u 251 tat-Trattat KE,

–  wara li kkunsidra l-Artikolu 103(2) tar-Regoli ta’ Proċedura tiegħu,

–  wara li kkunsidra l-pakketti Erika I, II u III,

–  wara li kkunsidra r-riżoluzzjonijiet preċedenti tiegħu dwar is-sikurezza marittima, b’mod partikulari ir-riżoluzzjoni tiegħu tal-21 ta’ Novembru 2002 dwar id-diżastru tat-tanker taż-żejt Prestige u r-riżoluzzjoni tiegħu tat-23 ta’ Settembru 2003 dwar it-titjib tas-sikurezza marittima b’rispons għall-inċident Prestige;

–  wara li kkunsidra s-seba’ proposti leġiżlattivi dwar is-sikurezza marittima (it-tielet pakkett marittimu) imressaq lill-Parlament mill-Kummissjoni f’Novembru 2005,

–  wara li kkunsidra l-pożizzjoni tiegħu adottata fl-ewwel qari f’April 2007 dwar it-tielet pakkett marittimu,

–  wara li kkunsidra d-diżastru navali riċenti fl-Istrett ta’ Kerch fil-Baħar l-Iswed, fil-11 ta’ Novembru 2007,

A.  billi għaxar bastimenti (tankers u bastimenti tal-merkanzija) għerqu jew inkaljaw fl-istrett u fit-Tramuntana tal-Baħar l-Iswed waqt maltempata kbira, incluż il-Volganeft-139, li ma kienx maħsub biex jiflaħ għal maltemp kbir fuq il-baħar,

B.  billi, skond informazzjoni proviżorja, sitt baħħara mietu u aktar minn 2000 tunnellata ta’ żejt karburanti u kubrit spiċċaw fil-baħar, filwaqt li kkawżaw diżastru ambjentali u l-mewt ta’ aktar minn 15 000 tajra,

C.  billi maltempati vjolenti ferrxu s-sustanza niġġiesa taż-żejt li affettwaw lill-komunitajiet tar-reġjun kif ukoll l-ambjent, u t-tniġġis taż-żejt u l-kubrit, flimkien ma’ l-imwiet tal-bnedmin, affettwa wkoll b’mod dirett lill-fawna u lill-flora, b'impatti potenzjali fuq medda twila ta' żmien fuq il-kwalità ekoloġika ta' l-ambjenti naturali affettwati,

D.  billi l-Baħar l-Iswed qed isir wieħed mir-rotot prinċipali għal aktar esportazzjonijiet taż-żejt fir-reġjun,

E.  billi din it-telfa umana u diżastru ekoloġiku fil-Baħar l-Iswed jenfasizza l-ħtieġa li jitħaffu d-deliberazzjonijiet tal-Kunsill dwar l-atti leġiżlattivi li baqgħu dwar ‘it-tielet pakkett marittimu’ dwar is-sikurezza marittima,

1.  Jesprimi s-solidarjetà tiegħu u jtenni l-appoġġ tiegħu għall-vittmi ta’ dan id-diżastru;

2.  Jistieden lill-Kunsill u lill-Kummissjoni sabiex jimmonitorjaw mill-qrib is-sitwazzjoni fil-Baħar l-Iswed u jieħdu azzjoni konkreta sabiex jgħinu ħalli jonqos l-impatt ekoloġiku tad-diżastru;

3.  Jistieden lill-Istati Membri sabiex jiżguraw l-applikazzjoni rigoruża ta’ leġiżlazzjoni Komunitarja eżistenti, b’mod speċjali dik li t irrigwarda l-istandards tal-bastimenti, pereżempju dwar il-Kontroll ta’ l-Istat tal-Port;

4.  Jinnota li diversi miżuri, bħal projbizzjoni temporanja tal-bastimenti tax-xmajjar għall-ibħra (river-to-sea vessels) mill-ibħra internazzjonali, ittieħdu mill-awtoritajiet Russi b’riżultat tas-sensiela ta’ nawfraġji riċenti fl-Istrett ta’ Kerch, u jenfasizza l-fatt li dawn il-miżuri m’għandhomx jitneħħew ħlief wara li jsiru investigazzjonijiet dettaljati u tkun tlestiet evalwazzjoni tas-sitwazzjoni;

5.  Jenfasizza li l-aktar osservanza stretta tar-regoli tan-navegazzjoni marittima hija fattur essenzjali tas-sikurezza marittima u jħeġġeġ lill-Istati Membri u lill-pajjiżi ġirien ta’ l-UE sabiex jiżguraw li l-baħħara u l-amministrazzjoni marittima f’ebda ċirkustanza ma tinjora l-avviżi jew it-twissijiet ta’ maltempati;

6.  Jenfasizza l-fatt li d-diżastru fil-Baħar l-Iswed għandu jiġbed l-attenzjoni tal-pajjiżi ġirien ta’ l-UE - b’mod ewlieni r-Russja, li ddikjarat pjanijiet li tkabbar għal ħafna drabi l-kapaċitajiet tagħha ta’ trażbord u esportazzjoni taż-żejt fix-xatt tal-Baħar l-Iswed - dwar il-kwistjoni tal-immodernizzar tal-flotta marittima u l-projbizzjoni ta’ l-użu ta’ tankers antiki li għandhom buq wieħed.

7.  Jirrikonoxxi l-irwol pro-attiv tal-Kummissjoni sa minn Novembru 2005, meta preżentat sett ta’ seba’ proposti leġiżlattivi (magħrufa bħala t-tielet pakkett marittimu) sabiex issaħħaħ il-leġiżlazzjoni Ewropea tas-sikurezza marittima, mingħajr ma tistenna li jseħħ inċident marittimu ieħor, u jkun evitati aktar diżastri ambjentali u tniġġis marittimu;

8.  Isemmi li l-Parlament Ewropew lesta l-ewwel qari tiegħu tas-seba' proposti dwar it-tielet pakkett marittimu sa April 2007, u jqis li s-seba’ proposti leġiżlattivi huma marbuta ħafna ma’ xulxin u għaldaqstant jeħtieġ li jiġu adottati bħala pakkett;

9.  Jenfasizza li inċidenti bħal dak li seħħ fir-reġjun tal-Baħar l-Iswed għandu jħaffef ir-ritmu tad-deliberazzjonijiet tal-Kunsill, u jistieden lill-Kunsill sabiex b’mod immedjat jadotta pożizzjonijiet komuni dwar kull waħda mis-seba’ proposti leġiżlattivi;

10.  Jistieden lill-Kunsill u lill-Kummissjoni sabiex iżżid il-koperazzjoni ma’ stati tax-xatt li mhumiex parti mill-UE dwar l-implimentazzjoni ta’ miżuri li jnaqqsu t-theddida ta' tniġġis ambjentali minn inċidenti marittimi, fosthom permezz ta’ azzjoni meħuda fil-kuntest ta’ l-Organizzazzjoni Marittima Internazzjonali u l-Memorandum ta’ Ftehim ta’ Pariġi;

11.  Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.