MOZZJONI GĦAL RIŻOLUZZJONI dwar is-sitwazzjoni fin-Niġerja (2012/2550(RSP))

Il-Parlament Ewropew,

–   wara li kkunsidra l-pożizzjoni komuni 95/544/PESK tal-4 ta' Diċembru 1995, definita mill-Kunsill fuq il-bażi tal-Artikolu J.2 tat-Trattat tal-UE, dwar in-Niġerja (ĠU L 309, 21.12.1995, p. 1),

–   wara li kkunsidra d-Deċiżjonijiet tal-Kunsill tat-28 ta' Novembru 1997 dwar l-estensjoni tal-validità tal-pożizzjoni komuni msemmija hawn fuq (ĠU L 338, 9.12.1997, p. 8), u dwar l-implimentazzjoni tagħha (OJ L 338, 9.12.1997, p. 7),

–   wara li kkunsidra r-riżoluzzjonijiet preċedenti tiegħu dwar in-Niġerja,

–   wara li kkunsidra r-riżoluzzjonijiet preċedenti tiegħu dwar il-ksur tad-drittijiet tal-bniedem fin-Niġerja,

–   wara li kkunsidra l-Patt Internazzjonali dwar id-Drittijiet Ċivili u Politiċi tal-1966, irratifikat min-Niġerja fid-29 ta' Ottubru 1993,

–   wara li kkunsidra l-Karta Afrikana għad-Drittijiet tal-Bniedem u tal-Popli tal-1981, irratifikata minn Niġerja fit-22 ta' Ġunju 1983,

–   wara li kkunsidra l-Kostituzzjoni tar-Repubblika Federali tan-Niġerja u b'mod partikolari d-dispożizzjonijiet tagħha dwar il-protezzjoni tal-libertà reliġjuża fil-Kapitolu IV tagħha – Id-dritt għal-libertà tal-ħsieb, tal-kuxjenza u tar-reliġjon,

–   wara li kkunsidra l-Artikolu 110(2) tar-Regoli ta’ Proċedura tiegħu,

A. jinsab imnikket bl-irvellijiet riċenti kontra ż-żieda fil-prezz tal-fjuwil u t-telf ta' ħajja li seħħ insegwitu tat-tmiem is-sussidji tal-fjuwil fl-1 ta' Jannar taħt ir-riformi ekonomiċi kbar li fit-teorija kienu intiżi li jtejbu d-dixxiplina fiskali fl-istat li jipproduċi l-aktar żejt fl-Afrika; billi l-"falliment tas-sussidju tal-petrol", skont l-informazzjoni mogħtija, huwa fil-biċċa l-kbira dovut għall-ineffiċjenza u l-korruzzjoni tal-gvern;

B.  billi din il-miżura xejn popolari turi d-distakk kbir bejn, minn naħa, il-gvern u xi persuni privileġġati u, min-naħa l-oħra, in-nies komuni fit-toroq, li qed jgħixu b'inqas minn $2 fil-ġurnata,

C. jinsab maħsud bl-inċidenti riċenti ta' vjolenza li seħħew f'diversi reġjuni tan-Niġerja, inklużi l-attakki kodardi fuq simboli reliġjużi u Knejjes, kif ukoll il-qtil u l-feriment ta' Kristjani matul il-perjodu tal-Milied, b'telf terribbli ta' ħajja umana;

D. billi l-Gvern għadu ma jistax jikkontrolla s-sitwazzjoni;

E.  jinsab ixxukkjat bl-aħħar mewġa ta' attakki permezz ta’ armi tan-nar u bombi mis-setta Iżlamista Boko Haram, li qatlet tal-anqas 185 persuna f'Kano, u li fil-biċċa l-kbira kienu indirizzati kontra l-pulizija; billi Boko Haram wissiet lir-residenti f'Kano li l-attakki tagħhom kontra s-servizzi ta' sigurtà se jitkomplu u ħeġġet il-perseveranza waqt li l-grupp jiġġieled sabiex tiġi stabbilita "Sistema Iżlamika", f'fuljett imqassam madwar il-belt matul il-lejl;

F.  billi Boko Haram kellha fil-mira l-Kristjani, b'mod partikolari fil-Milied meta nqatlu numru kbir f'għadd ta' attakki bil-bombi - li l-għar attakk li rriżulta fil-tqil ta' 44 ruħ barra knisja Katolika ħdejn il-belt kapitali ta' Abuja, u ħalfet li se tibda gwerra reliġjuża fuq il-Kristjani u tkeċċihom mit-Tramuntana tal-pajjiż fejn il-maġġoranza hija Musulmana;

G. billi fit-3 ta' Jannar Boko Haram tat ultimatum u tat lill-Kristjani fit-Tramuntana tan-Niġerja tlett ijiem biex jitilqu; billi l-qtil ta' mill-anqas 8 Kristjani li kienu qed jattendu servizz ta' talb fil-5 ta' Jannar f'Gombe u ta' 20 Kristjani matul servizz funebri fis-6 ta' Jannar f'Mubi juri li t-tensjoni qed tiżdied minħabba l-bumbardamenti letali fuq knisja l-ġurnata tal-Milied segwiti, ftit wara, bil-bumbardament ta' skola Iżlamika fin-Nofsinhar tan-Niġerja;

H. jinsab maħsud bl-aħħar attakk suwiċida permezz ta' karozza bomba fis-26 ta' Frar li qatel tal-anqas tliet nies u fera' tal-anqas 38 matul it-talb funebri fi knisja Katolika fil-belt problematika ta' Jos fiċ-ċentrali tan-Niġerja, li rriżulta f'ritaljazzjonijiet min-naħa taż-żgħażagħ Kristjani li matulhom, skont rapporti, inqatlu żewġ Musulmani fil-vjolenza u nħarqu ringiela ta' ħwienet b'sidien Musulmani wkoll; billi Boko Haram iddikjarat ir-responsabbiltà tagħha għal dan l-aħħar attakk;

I.   billi l-Iżlamisti, li l-isem tagħhom ifisser "It-Tagħlim Oċċidentali Huwa Dnub" huma ħatja tal-mewt ta' aktar minn 900 ruħ f'madwar 160 attakk separat minn Lulju 2009; billi, skont diversi rapport riċenti, hemm konnessjoni possibbli bejn Boko Haram u AQMI (Al Qaeda au Maghreb Islamique) u din tista' tikkostitwixxi theddida serja għall-paċi u s-sigurtà fir-reġjun ta' Saħel;

J.   billi eluf mietu fi vjolenza reliġjuża u etnika fl-istati ċentrali tan-Niġerja tul dawn l-aħħar għaxar snin hekk kif sikwit inħolqu t-tensjonijiet reliġjużi u etniċi f'dan ir-reġjun,

K. billi mhuwiex possibbli li tqiegħed lill-Musulmani jew il-Kristjani fir-rwol tal-aggressur jew il-vittma peress li storikament dawn kienu t-tnejn;

L.  billi l-instabilità attwali tenfasizza l-fraġilità tal-pajjiż bl-ikbar popolazzjoni fl-Afrika;

M. billi l-istabilità u d-demokrazija tan-Niġerja għandhom sinifikat kbir li jmur lil hinn mill-fruntieri immedjati tagħha, minħabba r-rwol mexxej tal-pajjiż fir-reġjun u fl-Afrika sub-Saħarjana;

N. billi, skont l-Artikolu 8 tal-Ftehim rivedut ta' Cotonou, l-UE tipparteċipa fi djalogu politiku regolari man-Niġerja dwar id-drittijiet tal-bniedem u l-prinċipji demokratiċi, inkluża d-diskriminazzjoni etnika, reliġjuża u razzjali;

1.  Jistieden lill-Gvern Federali jsolvi l-problemi ekonomiċi u soċjali li qed jaffettwaw lill-pajjiż billi jieħu diversi miżuri, bħall-indirizzar tal-ineffiċjenza u l-korruzzjoni tal-gvern;

2.  Jikkundanna bis-sħiħ il-vjolenza riċenti, b'mod partikolari l-attakki terroristiċi mwettqa mis-setta Iżlamista Boko Haram, u t-telf traġiku ta' ħajja fir-reġjuni milquta tan-Niġerja u jestendi l-kondoljanzi u s-solidarjetà tiegħu lill-familji ta' dawk li mietu u lill-persuni feruti.

3.  Iħeġġeġ lill-komunitajiet kollha joqogħdu lura u jfittxu soluzzjonijiet paċifiċi biex isolvu d-differenzi ta' bejn il-gruppi reliġjużi u etniċi fin-Niġerja;

4.  Jistieden lill-Gvern Federali jiżgura investigazzjoni tal-kważi tal-vjolenza l-aktar riċenti kif ukoll jiżgura li dawk li wettqu atti ta' vjolenza jingħataw f'idejn il-ġustizzja; jistieden, b'mod partikolari, lill-Gvern Federali jieħdu azzjoni ħarxa kontra Boko Haram li qed tkompli tissaħħaħ billi tisfrutta t-tensjoni reliġjuża profonda fin-Niġerja;

5.  Jistieden lill-Gvern Federali jieħu miżuri konkreti u urġenti biex jappoġġa djalogu interetniku u interreliġjuż;

6.  Jitlob eżami usa' tal-kawżi li jinsabu fl-għeruq ta' dan il-kunflitt inklużi t-tensjonijiet soċjali, ekonomiċi u etniċi, u li jiġu evitati spjegazzjonijiet wiesgħa u superfiċjali bbażati fuq ir-reliġjon biss li mhux se jipprovdu l-bażi għal soluzzjoni fit-tul u dewwiema għall-problemi ta' dan ir-reġjun;

7.  Jistieden lill-Gvern Federali jipproteġi l-popolazzjoni tiegħu u jindirizza l-kawżi li jinsabu fl-għeruq ta' din il-vjolenza billi jiżgura drittijiet ugwali għaċ-ċittadini kollha u billi jindirizza l-problemi dwar l-art agrikola għammiela, il-qgħad u l-faqar;

8.  Iħeġġeġ lill-UE tkompli d-djalogu politiku tagħha man-Niġerja skont l-Artikolu 8 tal-Ftehim rivedut ta' Cotonou, u biex tindirizza b'mod urġenti kwistjonijiet relatati mal-libertà tal-ħsieb, il-kuxjenza, ir-reliġjon jew it-twemmin, li jinsabu fi strumenti universali, reġjonali u nazzjonali tad-drittijiet tal-bniedem;

9.  Jenfasizza l-importanza ta' kooperazzjoni reġjonali għall-iffaċċjar tat-theddida kkawżata minħabba konnessjoni possibbli bejn Boko Haram u AQMI (Al Qaeda au Maghreb Islamique); jinkoraġġixxi l-pajjiżi fir-reġjun isaħħu l-kooperazzjoni tagħhom, inkluż permezz l-organizzazzjonijiet reġjonali rilevanti, sabiex jiġu pprevenuti s-sinerġiji bejn Boko Haram u AQMI; jistieden lill-istituzzjonijiet tal-UE u l-Istati Membri jagħtu l-appoġġ tagħhom lil dawn l-isforzi reġjonali;

10. Itenni t-tħassib tiegħu dwar ir-rispett sħiħ u effettiv tad-dritt għal-libertà reliġjuża għall-minoranzi reliġjużi f'għadd ta' pajjiż terzi; f'dan il-kuntest jenfasizza li l-libertà tal-qima hija aspett wieħed biss tad-dritt għal-libertà reliġjuża, peress li din tal-aħħar tinkludi l-libertà li wieħed ibiddel ir-reliġjon tiegħu u li jimmanifesta u jxerred ir-reliġjon tiegħu fit-tagħlim, il-prattika u l-osservanza fuq livell individwali, kollettiv, privat, pubbliku u istituzzjonali; f'dan il-kuntest huwa jenfasizza li l-element pubbliku huwa essenzjali għal-libertà reliġjuża, u li l-Kristjani jiġu mċaħħda milli esprimu t-twemmin tagħhom pubblikament, filwaqt li r-reliġjon tagħhom tiġi limitata għal fenomenu privat jikser b'mod serju d-dritt tagħhom għal-libertà reliġjuża;

11. Jenfasizza li għad hemm ostakoli f'diversi partijiet tad-dinja li jimpedixxxu l-manifestazzjoni tat-twemmin u jistieden lill-VP/RGħ Ashton u lill-Kummissjoni Ewropea jinsistu dwar kwistjonijiet bħal dawn fil-kuntest tal-inizjattivi rilevanti tagħha relatati mad-drittijiet tal-bniedem;

12. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill tal-UE u lill-Kummissjoni, lir-Rappreżentant Għoli tal-Unjoni għall-Affarijiet Barranin u l-Politika ta' Sigurtà, lill-gvernijiet u lill-parlamenti tal-Istati Membri, lill-Gvern Federali tan-Niġerja, lill-istituzzjonijiet tal-Unjoni Afrikana u lill-Komunità Ekonomika tal-Istati tal-Afrika tal-Punent, lis-Segretarju Ġenerali tan-Nazzjonijiet Uniti, lill-Assemblea Ġenerali tan-Nazzjonijiet Uniti, lill-Ko-Presidenti tal-Assemblea Parlamentari Konġunta tal-AKP-UE u lill-Parlament PAN-Afrikan (PAP).