MOZZJONI GĦAL RIŻOLUZZJONI dwar il-Programm ta' Ħidma tal-Kummissjoni għall-2016

Il-Parlament Ewropew,

–       wara li kkunsidra l-komunikazzjoni tal-Kummissjoni bit-titolu ‘Programm ta' Ħidma tal-Kummissjoni 2015 – Bidu Ġdid’ (COM(2014)0910) u l-Annessi 1 sa 4 tagħha,

–       wara li kkunsidra l-Artikolu 37(3) tar-Regoli ta' Proċedura tiegħu,

A.     billi l-prijoritajiet politiċi għandhom jitqabblu mar-riżorsi finanzjarji disponibbli;

B.     billi l-politika u l-azzjoni tal-UE, imwettqa id f'id mal-Istati Membri skont il-prinċipji tas-sussidjarjetà u tal-proporzjonalità, jistgħu u jridu jkollhom influwenza reali biex jgħinu liċ-ċittadini jantiċipaw u jirreaġixxu għal soċjetà li qed tinbidel malajr;

C.     billi l-Ewropa trid issegwi l-mudell tal-ekonomija soċjali tas-suq, u tiggarantixxi tkabbir sostenibbli bil-għan li lill-ġenerazzjoni li jmiss toffrilha impjiegi minflok dejn;

TAQSIMA 1

1.      Jenfasizza l-fatt li tnaqqis sinifikanti fil-piż amministrattiv fuq iċ-ċittadini u l-kumpaniji jista’ jinkiseb biss billi jitnaqqas l-għadd ta’ proposti leġiżlattivi u billi, minflok, issir enfasi fuq il-prijoritajiet ewlenin;

2.      Ifakkar l-obbligu tal-UE li tilleġiżla biss meta u sal-punt meħtieġ, b’konformità mal-Artikolu 5 tat-Trattat dwar il-Funzjonament tal-Unjoni Ewropea dwar l-applikazzjoni tal-prinċipji tas-sussidjarjetà u tal-proporzjonalità; jemmen bil-qawwa, għalhekk, li l-isforzi jridu jiġu kkonċentrati fuq ftit prijoritajiet ewlenin u jitlob lill-Kummissjoni biex ma tiħux inizjattivi mhux essenzjali, b’tali mod li l-azzjoni tal-UE tkun dejjem iffokat fuq il-prijoritajiet ewlenin għall-benefiċċju dirett taċ-ċittadini tagħha;

3.      Itenni mill-ġdid l-importanza li huwa jagħti lill-"Metodu komunitarju", it-trasparenza tal-proċess leġiżlattiv, il-leġittimità demokratika, u r-rwol u r-responsabbiltà tal-parlamenti nazzjonali;

4.      Jappoġġa l-bidla fil-metodu li għandha l-għan li ssir tindifa biex tiġi evitata l-ħela tar-riżorsi fuq proposti leġiżlattivi li m'għadhomx jintużaw jew li mhumiex adegwati u li m'għadhomx jissodisfaw il-prijoritajiet u t-tħassib taċ-ċittadini tal-UE;

5.      Jitlob, għalhekk, li l-ispejjeż tal-piżijiet burokratiċi jitnaqqsu b’25 %, u l-istabbilment ta' korp indipendenti ta' skrutinju regolatorju indipendenti estern li jinvolvi esperti indipendenti u komuni għat-tliet istituzzjonijiet għaċ-ċiklu sħiħ ta’ politika biex jissorvelja l-evalwazzjonijiet tal-impatt rispettivi tagħhom sabiex jitkejjel il-piż amministrattiv u l-ispejjeż relatati ta’ proposti ġodda, inkluż test obbligatorju għall-SMEs, dawn iż-żewġ miżuri intiżi biex jeliminaw il-burokrazija żejda fil-livelli kollha — dak Ewropew, nazzjonali u reġjonali — u għall-atturi ekonomiċi u ċ-ċittadini kollha fil-ħajja tagħhom ta’ kuljum, u biex b'hekk jgħin biex jitrawwem il-ħolqien tal-impjiegi;

6.      Jinsisti fuq il-ħtieġa li tiġi implimentata u applikata b’mod sħiħ, imħaffef u effikaċi l-leġiżlazzjoni eżistenti f’oqsma bħas-suq uniku, id-dritt ambjentali, il-politika agrikola komuni (PAK) riveduta, il-politika komuni tas-sajd (PKS) u l-politika ta’ koeżjoni u s-setturi finanzjarji u bankarji; jistieden lill-Kummissjoni timmonitorja aħjar il-progress tal-Istati Membri fl-implimentazzjoni;

7.      Iqis li kwalunkwe żvilupp ulterjuri tal-Unjoni Ekonomika u Monetarja għandu jissejjes, u jkompli jibni fuq il-leġiżlazzjoni eżistenti bħas-Six Pack, it-Two Pack u l-Unjoni Bankarja sabiex ikun jista’ jiġi applikat bis-sħiħ u b’mod koerenti mill-Istati Membri kollha, li hemm bżonn li s-sjieda u l-leġittimità demokratika tal-governanza ekonomika u s-semestru Ewropew tiġi mtejba aktar, u li l-kontroll parlamentari għandu jiġi eżerċitat fil-livell fejn jittieħdu jew jiġu implimentati d-deċiżjonijiet, flimkien mal-parlamenti nazzjonali li jiissorveljaw il-gvernijiet nazzjonali;

8.      Jitlob l-adozzjoni ta’ Kodiċi ta’ Konverġenza li jistabbilixxi miri ewlenin ta’ riforma strutturali fuq perjodu ta’ ħames snin, li għandhom jiġu adottati skont il-proċedura leġislattiva ordinarja, li flimkien mal-Istħarriġ Annwali dwar it-Tkabbir għandhom jifformaw il-bażi għal rakkomandazzjonijiet speċifiċi għall-pajjiżi;

9.      Jemmen li r-reviżjoni tal-politika fiskali għandha titqies bħala parti integrali tar-riformi strutturali tal-Istati Membri, u li l-politika fiskali u ta' kompetizzjoni għandhom jitqiesu bħala żewġ naħat tal-istess munita, għall-benefiċċju tal-konsumaturi kollha tal-UE u ċ-ċittadini, bil-għan li jkomplu jikkontribwixxu għall-ħolqien tal-impjiegi; jappoġġja ċ-ċaqlieq tal-piż tat-taxxa minn fuq il-ħaddiema lejn forom oħra ta’ tassazzjoni sostenibbli;

10.    Iqis il-kontroll tal-għajnuna Statali tal-UE huwa għodda importanti għall-ġlieda kontra prattiki ta’ taxxa li jikkawżaw tgħawwiġ tas-suq uniku;

11.    Jilqa’ b’sodisfazzjon id-deċiżjonijiet fil-qasam tat-taxxa u jenfasizza li, meta wżati għal skopijiet leġittimi sabiex ikun iffaċilitat il-ħlas tat-taxxi f’dawk l-Istati Membri fejn effettivament isseħħ attività ekonomika u l-ħolqien ta' valur, deċiżjonijiet tat-taxxa huma għodda importanti għall-iżgurar taċ-ċertezza legali għall-atturi ekonomiċi u negozji, iżda jenfasizza wkoll li l-użu ħażin ta’ deċiżjonijiet tat-taxxa bħala għodda ta' negozjar mhuwiex aċċettabbli;

12.    Jappoġġa bis-saħħa l-miżuri għall-ġlieda kontra l-frodi fiskali u l-evażjoni tat-taxxa u jenfasizza l-bżonn ta' użu aħjar u aktar effiċjenti tal-flus tal-kontribwenti, u li jittieħdu iktar passi favur il-ħarsien tal-interessi finanzjarji tal-Unjoni, li għandha tkun prijorità ewlenija, sabiex tiġi żgurata l-leġittimità tal-infiq tal-UE; huwa tal-fehma, għalhekk, li l-miżuri kontra l-frodi għandhom jiġu enfasizzati fil-ħidma tal-Kummissjoni;

13.    Jistenna bil-ħerqa r-riżultati tal-ħidma tal-Grupp ta’ Livell Għoli dwar ir-Riżorsi Proprji, li huma mistennija jiġu ppreżentati f’konferenza interistituzzjonali fl-2016; jenfasizza li l-Kummissjoni impenjat ruħha li tivvaluta, abbażi ta’ dawn ir-riżultati, jekk humiex xierqa riżorsi proprji ġodda, u li din il-valutazzjoni għandha titwettaq b’mod parallel mar-rieżami jew ir-reviżjoni tal-qafas finanzjarju multiannwali fl-2016; itenni l-impenn tiegħu favur riforma tas-sistema tar-riżorsi proprji tal-UE qabel it-tnedija tal-QFP li jmiss sabiex is-sistema ssir aktar sempliċi, ġusta u trasparenti;

14.    Jenfasizza l-ħtieġa li tissolva b’mod ċert u inekwivoku, il-problema rikorrenti ta’ fatturi mhux imħallsa fi tmiem is-sena, li jdgħajfu l-kredibilità tal-UE; jistenna li tali kontijiet jitnaqqsu għal livell sostenibbli sal-aħħar tal-2016, grazzi għall-implimentazzjoni ta’ pjan ta’ pagament 2015-2016; jistieden lill-Kummissjoni tissorvelja mill-qrib l-implimentazzjoni ta’ dan il-pjan ta' pagament u tipproponi mingħajr dewmien baġits emendatorji, jekk il-livell ta’ pagamenti awtorizzati fl-2016 ma jkunx biżżejjed;

15.    Ifakkar lill-Kummissjoni dwar l-impenn tagħha li tindirizza l-pressjoni dejjem tikber fuq il-fruntieri esterni tal-UE, inklużi miżuri sodi kontra l-migrazzjoni irregolari u t-traffikar tal-bnedmin u l-kuntrabandu, u jirrimarka li t-titjib tal-ġestjoni tal-migrazzjoni tfisser rabta aħjar bejn il-politika ta’ migrazzjoni tal-UE mal-politika esterna tagħha;

16.    Jappoġġa r-reviżjoni tal-Ftehim Interistituzzjonali dwar Tfassil Aħjar tal-Liġijiet, u l-proposta għall-ipprogrammar konġunt mal-Kummissjoni u l-Kunsill bil-għan li titjieb l-effiċjenza tal-proċess leġiżlattiv;

17.    Ifakkar li l-Kummissjoni għandha sa mhux aktar tard minn tmiem l-2016 tippreżenta rieżami tal-funzjonament tal-Qafas Finanzjarju Pluriennali (QFP) 2014-2020, flimkien ma’ proposta leġiżlattiva biex jiġi emendat ir-Regolament dwar il-QFP; jenfasizza li reviżjoni leġiżlattiva obbligatorja tal-QFP kienet waħda mit-talbiet ewlenin tal-Parlament fin-negozjati tal-QFP; jagħti, għaldaqstant, l-ogħla importanza lil dan il-proċess u jesprimi r-rieda tiegħu li jaħdem b’mod kostruttiv lejn is-sejba ta’ soluzzjonijiet għal numru ta’ kwistjonijiet pendenti, inklużi dawk relatati mal-finanzjament ta’ Fond ta' Garanzija tal-Fond Ewropew għal Investimenti Strateġiċi;

TAQSIMA 2

Spinta Ġdida għall-impjiegi, it-tkabbir u l-investiment

18.    Iħeġġeġ lill-Kummissjoni tiffinalizza pakkett ta’ mobbiltà tax-xogħol u tieħu azzjoni sabiex tippromwovi l-integrazzjoni u l-impjegabbiltà tal-ħaddiema Ewropej u tindirizza l-problemi ta’ dawk li ilhom qiegħda għal żmien twil; jirrifjuta kull inizjattiva li tmur kontra l-prinċipju tas-sussidjarjetà, bħal skemi Ewropej ta’ benefiċċji għall-qgħad, indikaturi soċjali vinkolanti għall-Istati Membri u paga minima jew dħul minimu Ewropew;

19.    Jilqa’ b’sodisfazzjon il-proposta tal-Kummissjoni li tgħaqqad l-ispinta l-ġdida għall-impjiegi, mat-tkabbir u l-investiment; ifakkar li għandu jiġi garantit bilanċ xieraq bejn il-flessibilità u s-sigurtà għal min iħaddem, fuq naħa, u l-impjegati, min-naħa l-oħra, fi kwalunkwe proposta leġiżlattiva ġdida;

20.    Jitlob li jkun hemm azzjoni konkreta li telimina d-deskriminazzjoni persistenti fis-suq tax-xogħol, b’mod speċjali fir-rigward ta’ ħaddiema anzjani, nisa, ħaddiema b’diżabilità u ż-żgħażagħ;

21.    Jitlob lill-Kummissjoni tikkonsolida u ttejjeb il-kwalità, l-effikaċja u l-aċċessibilità tas-sistemi tal-edukazzjoni u tat-taħriġ fl-UE; huwa tal-fehma li għandha tingħata attenzjoni partikolari għat-tagħlim tul il-ħajja, sistemi doppji, ir-rikonoxximent ta’ diplomi u l-appoġġ għal miżuri biex jitnaqqsu r-rati ta’ tluq bikri mill-iskola sabiex ikun żgurat li l-istudenti jakkwistaw il-ħiliet ta' litteriżmu bażiċi, kif definit skont il-Programm tal-OECD għall-Valutazzjoni Internazzjonali tal-Istudenti (PISA);

22.    Jitlob lill-Kummissjoni, bħala parti mill-istrateġija Ewropa 2020 għal tkabbir intelliġenti, sostenibbli u inklużiv, tkompli bl-isforzi tagħha biex toħloq l-impjiegi billi tapplika l-kunċett ta’ ekonomija ċirkolari u tistabbilixxi sinerġiji fis-setturi tal-baħar u marittimi kollha kemm hi (tkabbir blu);

23.    Iħeġġeġ lill-Kummissjoni tressaq pjanijiet ta’ ġestjoni multiannwali, li huma wieħed mill-għodod ewlenin għall-implimentazzjoni tal-PKS riformata bil-għan li jkun hemm l-isfruttar sostenibbli tar-riżorsi tas-sajd, kif ukoll il-qafas leġiżlattiv dwar miżuri tekniċi, li huwa diġà mistenni fl- 2015, skont il-proċedura leġiżlattiva ordinarja;

24.    Jenfasizza li l-objettiv ta' ekotikketta unika Ewropea għall-prodotti tas-sajd u tal-akkwakultura, previst fl-Organizzazzjoni Komuni tas-Swieq, għandu jiġi mwettaq permezz ta’ rapport u proposta mill-Kummissjoni;

25.    Ifakkar l-impenn tal-Kummissjoni li tuża l-għodda kollha disponibbli, inkluż il-baġit tal-UE, biex tmexxi 'l quddiem l-impjiegi u t-tkabbir permezz tal-investiment intelliġenti fi sħubija eqreb mal-Istati Membri, il-parlamenti nazzjonali, ir-reġjuni u l-bliet għal implimentazzjoni aħjar tal-politiki eżistenti u biex titjieb l-effikaċja ta’ azzjoni fuq il-post, speċifikament fl-użu tal-Fondi Strutturali u ta’ Investiment Ewropej; jenfasizza li l-perjodu ta’ programmazzjoni l-ġdid għall-Politika ta’ Koeżjoni, li huwa ankrat ferm fis-Semestru Ewropew u l-proċess ta’ governanza ekonomika, jibqa’ s-sors ewlieni ta’ tali investiment pubbliku;

26.    Jilqa’ l-impenn tal-Kummissjoni għal “Regolamentazzjoni Aħjar” u l-kontroll tal-idoneità propost u l-evalwazzjoni tal-PAK bil-għan li titnaqqas il-burokrazija u li jitneħħew il-piżijiet regolatorji; jitlob għal proposta li tiffaċilita l-implimentazzjoni tar-riforma sabiex jiġi garantit li l-piż amministrattiv għall-bdiewa u l-awtoritajiet tal-Istati Membri jinżamm għal minimu assolut, u li jinżamm ir-rwol ewlieni tal-PAK fil-garanzija tas-sigurtà tal-ikel;

27.    Jitlob l-użu effikaċi tal-baġit tal-UE permezz ta’ konċentrazzjoni fuq implimentazzjoni aħjar ta’ kontrolli eżistenti, l-evalwazzjoni ta’ kontrolli, miżuri biex jitnaqqas il-piż burokratiku fejn possibbli u modi biex jiżguraw il-prestazzjoni u valur miżjud tal-użu tal-flus tal-kontribwenti tal-UE, u jenfasizza li r-rendiment jeħtieġ li jiġi vvalutat 'il fuq mill-immassimmizzar tal-użu tal-approprjazzjonijiet ibbaġittjati;

28.    Jappoġġja l-isforzi tal-Kummissjoni fin-negozjati kummerċjali multilaterali u bilaterali kollha li għaddejjin sabiexjintlaħaq eżitu pożittiv fir-rigward tal-ftehimiet kummerċjali komprensivi u ta’ benefiċċju reċiproku fl-2016, li jsaħħaħ b’mod sinifikanti l-prospettivi kummerċjali tal-UE u l-opportunitajiet għall-kumpaniji tal-UE fid-dinja kollha; iqis, madankollu, li hemm bżonn ta' sforzi sostnuti tal-UE sabiex jittieħed vantaġġ mill-proċess miftuħ fl-2013 permezz tal-pakkett ta’ Bali maqbul bħala parti min-negozjati multilaterali taċ-Ċiklu ta’ Doha li għandhom iwittu t-triq għal stabilità ekonomika dinjija;

29.    Iqis li t-tneħħija tal-ostakli għall-kummerċ u l-investiment fid-dinja kollha tibqa prijorità ewlenija tal-istrateġija kummerċjali tal-UE; jinnota, f’dan ir-rigward, li r- rapport tal-2014 tal-Kummissjoni dwar l-Ostakli għall-Kummerċ u l-Investiment jindika ostakli sinifikanti u mhux ġustifikati fir-relazzjonijiet kummerċjali tal-UE ma’ pajjiżi terzi ewlenin; itenni, għalhekk, it-talba tiegħu lill-Kummissjoni biex tkomli b'din l-aġenda u biex tkompli tiġġieled kontra l-miżuri protezzjonisti mhux ġustifikati;

Suq Uniku Diġitali konness

30.    Jenfasizza li proposta l-ġdida tal-Kummissjoni li tieħu post il-proposta għal liġi Komuni Ewropea dwar il-Bejgħ — kif ġie mħabbar fil-Komunikazzjoni dwar is-Suq Uniku Diġitali — għandha tkun ibbażata fuq il-pożizzjoni tal-Parlament fl-ewwel qari;

31.    Jitlob lill-Kummissjoni tqis il-konverġenza kontinwa tat-teknoloġija fir-reviżjoni tad-Direttiva dwar is-Servizzi tal-Midja Awdjoviżiva (AVMS) billi tagħmel rakkomandazzjonijiet xierqa biex jitranġa u tivvalida għall-futur il-qafas regolatorju;

32.    Jittama li jkun hemm reviżjoni ambizzjuża tad-Direttiva Servizz Universali biex taġġorna d-drittijiet tal-utenti finali;

Unjoni tal-Enerġija reżiljenti li tħares 'il quddiem fil-politika dwar it-tibdil fil-klima

33.    Jitlob reviżjoni f’waqtha tar-Regolament dwar is-Sigurtà tal-Provvista tal-Gass u tad-deċiżjoni li tistabbilixxi mekkaniżmu ta’ skambju ta’ informazzjoni fir-rigward tal-ftehimiet intergovernattivi fil-qasam tal-enerġija;

34.    Jistieden lill-Kummissjoni biex tippreżenta għadd ta’ inizjattivi leġiżlattivi u mhux leġiżlattivi sabiex jiġi stabbilit qafas ambizzjuż għall-klima u l-enerġija għall-2030 bħala l-kontribut tal-UE għall-konklużjoni ta’ ftehim globali dwar il-klima qabel is-summit f’Pariġi dwar il-Konvenzjoni Qafas tan-NU dwar it-Tibdil fil-Klima;

35.    Jistieden lill-Kummissjoni biex tinvolvi lill-Parlament bis-sħiħ fi sforzi komuni għall-ġlieda kontra t-tisħin globali, filwaqt li jiġi żgurat li titqies l-azzjoni klimatika fil-politiki kollha tal-UE billi jiġu adattati għar-realtajiet tat-tibdil fil-klima, u jitlob għal proposti leġislattivi sabiex jiġi impliment il-pakkett tal-klima u l-enerġija 2030 skont il-proċedura leġiżlattiva ordinarja;

36.    Jitlob li jkun hemm riforma strutturali komprensiva wara l-2020 tas-sistema tal-UE għan-Negozjar ta’ Emissjonijiet (ETS), li għandha tinkludi miżuri tanġibbli u armonizzati fir-rigward tar-rilokazzjoni tal-emissjonijiet tal-karbonju sabiex tipproteġi lill-industrija tal-UE billi tiżgura li dawk bl-aqwa prestazzjoni ma jkollhomx spejjeż diretti jew indiretti tal-ETS u jikkunsidraw il-livelli ta’ produzzjoni li qed jinbidlu;

37.    Jitlob proposta leġiżlattiva dwar it-tqassim ta’ miri ta’ emissjonijiet ta’ gassijiet b’effett ta’ serra tal-2030 fis-settur li mhux tal-ETS, u għal rieżami tal-qafas leġiżlattiv għall-effiċjenza fl-użu tal-enerġija, inkluż ir-rendiment tal-bini fl-użu tal-enerġija, id-Direttiva dwar l-Effiċjenza fl-Enerġija u aspetti relatati mal-governanza tal-qafas tal-2030, u għal reviżjoni tad-Direttiva dwar l-Enerġija Rinnovabbli, sabiex tkun stabbilita sistema ta’ appoġġ tal-UE għal sorsi ta’ enerġija rinnovabbli biex tiġi rrimedjata s-sitwazzjoni attwali kkaratterizzata minn għadd kbir ta’ skemi ta’ appoġġ nazzjonali, li wrew li huma għaljin u ineffettivi f’termini ta’ suq intern tal-enerġija;

38.    Jitlob prezzijiet ġusti u effiċjenti għal trasport sostenibbli permezz ta’ reviżjoni tad-Direttiva dwar l-Eurovignette u l-qafas għall-promozzjoni tas-Servizz Ewropew ta’ Pedaġġ Elettroniku, u t-tfassil ta’ pjan direttur biex jiġi mniedi l-użu ta' Sistemi Intelliġenti tat-Trasport;

39.    Jitlob rieżami tad-Direttiva dwar il-Promozzjoni ta’ Vetturi ta’ Trasport bit-Triq Nodfa u Effiċjenti fl-Enerġija u rieżami tar-regoli ta’ aċċess għas-suq tat-trasport bit-triq bil-għan li tittejjeb l-effiċjenza tal-enerġija;

40.    Jilqa’ l-proposta tal-Kummissjoni dwar il-Pakkett dwar il-Kwalità tal-Arja Nadifa u l-implimentazzjoni tar-Regolament REACH;

41.    Jitlob approċċ aktar bir-reqqa u aktar bilanċjat biex il-miżuri għall-ekodisinn, li fil-passat ikkontribwew għal żieda tax-xettiċiżmu pubbliku lejn regolamentazzjoni fil-livell Ewropew, u huwa tal-fehma li din l-istrateġija għandha tkun ibbażata fuq il-potenzjal għall-konservazzjoni tal-enerġija u r-rilevanza ta’ tali miżuri għas-suq, mingħajr ma jkun hemm interferenza fid-drawwiet fl-imġiba taċ-ċittadini; jappoġġja bil-qawwa tikkettar tal-enerġija ċar bil-għan li jagħti lill-konsumaturi għażla, u jħeġġeġ proposta ġdida dwar il-Pakkett tal-Ekonomija Ċirkolari;

42.    Jenfasizza l-ħtieġa għal rieżami urġenti tad-Direttiva dwar it-Tessuti u ċ-Ċelloli sabiex tinġieb f’konformità mal-Karta tad-Drittijiet Fundamentali, b’mod partikolari fir-rigward tal-prinċipju ta’ donazzjoni mhux imħallsa; huwa tal-fehma li l-istess jgħodd għar-Regolament dwar Terapiji Avvanzati, li jeħtieġ li jsir aktar applikabbli għall-SMEs; jenfasizza lill-Kummissjoni l-ħtieġa għat-tressieq ta’ proposta għal approċċ aktar komuni għall-valutazzjoni tat-teknoloġija tas-saħħa (HTA) għal prodotti farmaċewtiċi li ma għandhiex toħloq piż amministrattiv addizzjonali, iżda minflok tnaqqas il-piż għall-kumpaniji u l-awtoritajiet tal-Istati Membri billi tirrikjedi li jwettqu tali valutazzjoni darba biss, fuq livell Ewropew, minflok fit-28 Stat Membru; jistenna l-adozzjoni f’waqtha ta’ leġislazzjoni sekondarja prevista taħt id-Direttiva dwar il-Prodotti tat-Tabakk; jenfasizza li l-Kummissjoni għandha tagħmel prijorità l-ġlieda kontra r-reżistenza għall-antimikrobiċi, u jitlob proposti leġiżlattivi konkreti biex jindirizzaw dawn il-problemi serji, minbarra l-proposti eżistenti fil-qasam veterinarju; jitlob ukoll li tingħata attenzjoni akbar lill-mediċina umana, pereżempju fil-forma ta’ strument li jirregola l-użu tal-antibijotiċi għall-użu mill-bniedem simili għal dak li diġà ġie propost għall-antibijotiċi fil-kamp veterinarju;

43.    Jistieden lill-Kummissjoni, fid-dawl tal-problemi serji u persistenti li jirriżultaw mill-implimentazzjoni tar-Regolament (KE) Nru 1924/2006 dwar indikazzjonijiet dwar in-nutrizzjoni u s-saħħa mogħtija dwar l-ikel, inklużi problemi ta’ distorsjoni tal-kompetizzjoni, biex tirrieżamina l-bażi xjentifika ta’ dan ir-regolament, u jekk ikun xieraq, telimina l-kunċett ta’ profili ta’ nutrijenti jew tħassar ir-regolament kollu; iqis li l-għanijiet ta’ dan ir-regolament, bħal pereżempju l-iżgurar li l-informazzjoni li tingħata dwar l-ikel tkun vera u li jingħataw indikazzjonijiet speċifiċi rigward il-kontenut ta’ xaħam, zokkor u melħ, issa ntlaħqu mir-Regolament (UE) Nru 1169/2011 dwar l-għoti ta’ informazzjoni dwar l-ikel lill-konsumaturi;

44.    Jistenna l-adozzjoni finali ta’ proposti leġiżlattivi dwar is-saħħa tal-annimali, is-saħħa tal-pjanti, il-kontrolli uffiċjali, l-ikel ġdid, il-klonazzjoni, il-prodotti mediċinali veterinarji u l-għalf medikat;

Suq intern aktar profond u ġust b’bażi industrijali msaħħa

45.    Jitlob analiżi fil-fond tas-swieq, inklużi l-iżviluppi attwali, bil-ħsieb li jiġi aċċertat jekk, u f’liema forma, dawn is-servizzi jistgħu jeħtieġu li jiġu indirizzati, jew jekk l-applikazzjoni u l-interpretazzjoni mill-ġdid tal-liġi eżistenti (inkluża d-Direttiva dwar is-Servizzi u d-Direttiva dwar il-Konċessjonijiet) huma fil-fatt proporzjonali;

46.    Jitlob rieżami tad-Direttiva dwar il-Prospett, proposta dwar titolizzazzjoni ta’ kwalità għolja u proposta dwar l-irkupru u r-riżoluzzjoni tal-infrastrutturi tas-swieq finanzjarji;

Ftehim ta’ kummerċ ħieles raġonevoli u bilanċjat mal-Istati Uniti

47.    Jenfasizza l-importanza ġeopolitika u strateġika tas-Sħubija Transatlantika tal-Kummerċ u l-Investiment, li huwa l-aktar proġett riċenti sinifikanti bejn l-Istati Uniti u l-UE u li, jekk jiġi konkluż b’suċċess, lil hinn mill-aspetti kummerċjali tiegħu, se jsaħħaħ is-sħubija transatlantika kollha kemm hi, li jippermettilu li jsir punt ta’ riferiment għal sħubija aktar b’saħħitha fid-dinja istituzzjonalizzata permezz tal-istabbiliment ta’ regoli kummerċjali globali għall-futur mill-ġdid ta’ proċess ta’ liberalizzazzjoni multilaterali effikaċi; jappoġġja, f’dan il-kuntest, l-isforzi ta’ negozjatur tal-UE għal ftehim ambizzjuż ta’ gwadann reċiproku li se jnaqqas b’mod sostanzjali l-ostakli tariffarji u mhux tariffarji tal-UE filwaqt li jirrispetta bis-sħiħ l-istandards soċjali, tas-sikurezza tal-konsumatur u dawk ambjentali;

Żona ta’ ġustizzja u drittijiet fundamentali ibbażata fuq il-fiduċja reċiproka

48.    Jenfasizza l-ħtieġa għal proposta tal-Kummissjoni dwar standards minimi komuni għall-proċeduri ċivili u għal reviżjoni tar-Regolament Brussell II, b’enfasi partikolari fuq ir-responsabilità transkonfinali tal-ġenituri;

49.    Jinnota, f’dan ir-rigward, l-għadd konsiderevoli ta’ petizzjonijiet li jallegaw ksur tar-Regolament Brussell II; iħeġġeġ lill-Kummissjoni, għaldaqstant, tipprevjeni s-"sekwestru ta’ minuri" permezz ta’ skema ta’ medjazzjoni u tippromwovi taħriġ speċifiku għal medjaturi u mħallfin li jittrattaw proċedimenti transnazzjonali li jinvolvu t-tfal, u jinkoraġġixxi lill-Istati Membri jiċċentralizzaw il-każijiet ta’ sekwestru ta’ minuri fi qrati speċjalizzati;

50.    Jitlob li l-Att Ewropew dwar l-Aċċessibilità jiġi ffinalizzat;

51.    Itenni li l-Kummissjoni għandha tiżgura li jkun hemm implimentazzjoni sħiħa tal-leġiżlazzjoni tal-UE fi żmien l-iskadenzi tat-traspożizzjoni, u jistieden lill-Kummissjoni biex tieħu miżuri xierqa kontra dawk l-Istati Membri li naqsu milli jittrasponu kif suppost id-direttiva dwar l-abbuż sesswali tat-tfal; jistieden lill-Kummissjoni tieħu passi leġislattivi ulterjuri dwar l-abbuż sesswali onlajn tat-tfal;

52.    Iħeġġeġ lill-Kummissjoni tkompli tiżgura l-implimentazzjoni tajba tal-leġiżlazzjoni tal-UE fil-qasam tal-ġustizzja u taħdem b’mod aktar sistematiku dwar il-kooperazzjoni ġudizzjarja f’materji ċivili u kriminali u l-iżvilupp ulterjuri ta’ żona ta’ ġustizzja Ewropea;

53.    Jistieden lill-Kummissjoni tindirizza kemm id-differenza fil-pagi li għad fadal bejn is-sessi u d-differenza fil-pensjonijiet bejn is-sessi li għadha qed tikber u li laħqet medja tal-UE ta’ 39 % fl-2014;

54.    Jistenna li l-Kummissjoni tagħmel l-2017 is-sena għall-eliminazzjoni tal-vjolenza kontra n-nisa u ssaħħaħ l-isforzi tagħha biex tipprevjeni u tiġġieled it-traffikar tal-bnedmin u l-protezzjoni tal-vittmi ta’ dan it-traffikar; jistieden lill-Kummissjoni, f’dan ir-rigward, biex tniedi l-proċedura għall-adeżjoni tal-UE għall-Konvenzjoni tal-Kunsill tal-Ewropa dwar il-Prevenzjoni u l-Ġlieda Kontra l-Vjolenza fuq in-Nisa u l-Vjolenza Domestika (il-Konvenzjoni ta’ Istanbul);

55.    Jinsisti fuq il-ħtieġa li l-bilanċ bejn is-sessi jiġi indirizzat ulterjorment f’termini ta’ impenn fi ħdan il-proċess tat-teħid ta’ deċiżjonijiet ekonomiċi; jistieden lill-Kummissjoni tindirizza l-fatturi li jiskoraġġixxu lin-nisa milli jidħlu fl-intraprenditorija, fil-promozzjoni ta’ aċċess għal finanzjament, taħriġ u servizzi ta’ appoġġ għall-intraprenditorija tan-nisa, u biex tinkoraġġixxi u tassisti lill-Kunsill bi ħsieb tal-adozzjoni ta’ pożizzjoni komuni dwar il-proposta għal hekk imsejħa “Direttiva dwar in-Nisa fuq Bordijiet”;

Lejn politika ġdida dwar il-migrazzjoni

56.    Itenni t-talba tiegħu lill-Kummissjoni biex tintroduċi proposta leġiżlattiva ġdida dwar il-pakkett fruntieri intelliġenti hekk kif jitlesta l-proġett pilota, bl-għan li jħaffef, jiffaċilita u jsaħħaħ il-proċeduri tal-kontroll fuq il-fruntieri għall-barranin li jivvjaġġaw lejn l-UE; jenfasizza li l-UE teħtieġ li timxi lejn ġestjoni tal-fruntieri aktar moderna u effiċjenti bl-użu tal-aħħar teknoloġija, filwaqt li tipprovdi salvagwardji adegwati liċ-ċittadini;

57.    Jissottolinja l-ħtieġa għal tisħiħ ulterjuri tal-azzjoni Ewropea fir-rigward tat-traġedji reċenti fil-Mediterran, inklużi miżuri aktar b’saħħithom għall-prevenzjoni tat-telf ta’ ħajjiet fuq il-baħar, l-appoġġ ta’ dawk li qed ifittxu protezzjoni internazzjonali, l-iżgurar tal-ħarsien tal-fruntieri tal-UE, l-indirizzar tal-problema tat-traffikanti tal-bnedmin, u t-tisħiħ tal-koperazzjoni ma’ pajjiżi terzi;

Attur globali aktar b’saħħtu

58.    Jitlob rieżami tal-Politika Ewropea tal-Viċinat, li fiha għandhom jiġu indirizzati dawn il-punti:

(a)  distinzjoni ċara bejn politiki ta’ tkabbir u ta’ viċinat,

(b)  divrenzjar u ‘aktar għal aktar’,

(c)  impenn lil hinn mill-viċinat,

(d)  appoġġ għad-demokrazija, ir-riforma ġudizzjarja, l-istat tad-dritt u l-bini tal-kapaċità istituzzjonali,

(e)  offerta diversifikata: is-setturi prijoritarji

(f)   id-dimensjoni tas-sigurtà

(g)  trawwim ta’ inizjattivi reġjonali;

59.    Jenfasizza l-importanza li tissejjes il-politika ta’ sigurtà u ta’ difiża komuni (PSDK) b’suq intern ġenwin għad-difiża u s-sigurtà, kooperazzjoni aktar mill-qrib fost l-industriji tad-difiża Ewropej u Bażi Industrijali u Teknoloġika tad-Difiża Ewropea kompetittiva u approċċ aktar kollaborattiv għas-sigurtà u għad-difiża R&Ż u l-akkwist; jenfasizza l-ħtieġa li l-Kummissjoni tressaq proposta biex tistabbilixxi reġim tas-sigurtà tal-provvista fl-Ewropa kollha, li hija essenzjali għall-iżvilupp, iż-żamma u t-trasferiment ta’ kapaċitajiet kritiċi tad-difiża kif ukoll bħala espressjoni ta’ solidarjetà u fiduċja bejn l-Istati Membri; jesprimi l-appoġġ sħiħ għat-tnedija tal-azzjoni ta’ tħejjija għar-riċerka tad-difiża relatata mal-PSDK u mal-proġett pilota propost mill-Parlament;

60.    Jitlob lill-Kummissjoni tiżgura l-implimentazzjoni xierqa tal-Pjan ta’ Azzjoni dwar id-Drittijiet tal-Bniedem u d-Demokrazija (2015-2019) bit-titolu "Iż-Żamma tad-drittijiet tal-bniedem fil-qalba tal-aġenda tal-UE";

61.    Jitlob enfasi akbar fuq id-djalogu interreliġjuż bl-għan tal-analiżi u l-fehim tal-iżviluppi reliġjużi għall-promozzjoni tat-tolleranza u l-impenn attiv fi ħdan il-politika barranija tal-UE kontra r-radikalizzazzjoni vjolenti u estremista;

62.    Jenfasizza l-importanza li jiġi garantit li l-appoġġ għad-demokrazija, l-istat tad-dritt u r-rispett lejn l-universalità u l-indiviżibilità tad-drittijiet tal-bniedem u l-libertajiet fundamentali jiġu promossi b’mod attiv permezz tad-delegazzjonijiet tal-UE kollha, filwaqt li tinżamm attenzjoni għall-istrateġiji speċifiċi għall-pajjiż dwar id-drittijiet tal-bniedem;

63.    Jenfasizza li, fir-rigward tal-pakkett tal-avjazzjoni, strateġija għall-kompetittività, reviżjoni tar-Regolament (KE) Nru 868/2004, li jikkonċerna prezzijiet inġusti fl-avjazzjoni, u reviżjoni tar-Regolament dwar l-Aġenzija Ewropea tas-Sikurezza tal-Avjazzjoni ((KE) Nru 216/2008), huma prijoritajiet ewlenin;

64.    Jenfasizza li r-regolament dwar il-ġlieda kontra s-sajd illegali, mhux rappurtat u mhux regolat (sajd IUU) kien suċċess u għandu jkompli jiġi implimentat fl-2016; jitlob lill-Kummissjoni tiżgura l-koerenza tal-politiki kollha tal-UE, fosthom il-PKS u l-politika kummerċjali;

65.    Jinnota li l-flussi illegali ta’ kapital mill-pajjiżi li qed jiżviluppaw jammontaw għal USD 1 triljun fis-sena, li huwa madwar 10 darbiet it-total ta’ għajnuna uffiċjali għall-iżvilupp allokata; huwa tal-fehma li l-għajnuna għall-iżvilupp għandha konsegwentement tkun iffokata fuq l-isforzi għall-promozzjoni ta’ governanza tajba, l-istabbiliment tal-istat tad-dritt, il-ġlieda kontra l-korruzzjoni u ż-żieda tat-trasparenza u r-responsabilità tal-partijiet ikkonċernati kollha, inklużi l-gvernijiet nazzjonali tal-pajjiżi li qed jiżviluppaw u s-settur privat; jitlob, għaldaqstant, lill-Kummissjoni tiżviluppa strateġija u pjan ta’ azzjoni komprensivi li jindirizzaw din il-kwistjoni f’pajjiżi li qed jiżviluppaw;

66.    Jitlob lill-Kummissjoni twettaq l-ewwel valutazzjoni ta’ sett ta’ għodod ibbażat fuq id-drittijiet fil-kooperazzjoni għall-iżvilupp, inkluża l-implimentazzjoni tiegħu, l-azzjoni konkreta meħuda f’dan il-qasam, u l-impatt tal-użu tal-approċċ ibbażat fuq id-drittijiet; ifakkar li l-għan ta’ dan l-approċċ huwa li jiġu integrati l-prinċipji dwar id-drittijiet tal-bniedem fl-attivitajiet operattivi tal-UE għall-iżvilupp, waqt li jiġu koperti l-arranġamenti kemm fil-kwartieri ġenerali kif ukoll fil-qasam għas-sinkronizzazzjoni tad-drittijiet tal-bniedem u l-attivitajiet tal-kooperazzjoni tal-iżvilupp, u l-użu ta’ djalogi dwar id-drittijiet tal-bniedem u l-kundizzjonalità bħala lieva, kemm jekk tkun pożittiva jew negattiva (inċentiv jew disinċentiv), biex tħeġġeġ il-konformità mal-prinċipji tad-drittijiet tal-bniedem u l-istandards billi torbot l-għoti ta’ għajnuna ma’ din il-konformità;

67.    Jiddeplora l-fatt li l-edukazzjoni, li huwa mezz ta’ protezzjoni tat-tfal f’emerġenzi u f’sitwazzjonijiet ta’ kriżi, inklużi d-diżastri naturali, tibqa’ l-anqas settur finanzjat, minkejja li mill-madwar 101 miljun tifel u tifla tal-età li fiha jkunu fl-iskola primarja li ma jattendux l-iskola primarja, kważi 60 miljun minnhom jgħixu fi 33 pajjiż li bħalissa huma affettwati minn konflitti armati; jitlob, għaldaqstant, li l-ħtieġa għal koerenza aħjar bejn il-politiki tal-UE tiġi indirizzata, flimkien mal-ħtieġa li jimtela l-vojt bejn l-għajnuna umanitarja u l-għajnuna għall-iżvilupp, b’kollegament bejn l-għajnuna ta’ emerġenza, ir-riabilitazzjoni u l-iżvilupp;

68.    Jiġbed l-attenzjoni għall-fatt li l-SMEs huma l-mutur għall-ħolqien ta’ impjiegi u ta’ ġid f’pajjiżi li qed jiżviluppaw, li jiġġeneraw madwar 90 % tal-impjiegi; iħeġġeġ miżuri għall-eżenzjoni tal-SMEs f’pajjiżi li qed jiżviluppaw mill-piż regolatorju eċċessiv tagħhom, għall-promozzjoni tal-ispirtu intraprenditorjali u innovattiv f’dan il-kuntest, u t-tisħiħ ulterjuri ta' aċċess għall-mikrokreditu u l-mikrofinanzjament;

69.    Jiffavorixxi l-inklużjoni tad-diżabilità fil-koperazzjoni għall-iżvilupp, f’konformità mal-Konvenzjoni tan-NU dwar id-Drittijiet ta’ Persuni b’Diżabilità (CRPD) b’kont meħud tal-fatt li għadd sproporzjonat ta’ persuni b’diżabilità jgħixu f’pajjiżi li qed jiżviluppaw, li ħafna minnhom huma marġinalizzati, jgħixu f’faqar estrem u ma jkunux jistgħu jgawdu l-firxa sħiħa ta’ drittijiet tal-bniedem, u jenfasizza li s-Sena Ewropea għall-Iżvilupp hija opportunità ta’ darba f’ġenerazzjoni għall-ħarsien tad-drittijiet u l-ħtiġijiet ta’ kulħadd, inklużi dawk l-aktar vulnerabbli u marġinalizzati, u b’mod partikolari tal-persuni b’diżabilità, inklużi t-tfal, iż-żgħażagħ u n-nisa b’diżabilità;

Unjoni ta’ bidla demokratika

70.    Iħeġġeġ lill-Kummissjoni biex tallinja l-leġiżlazzjoni pendenti kollha tad-dossiers ta’ qabel it-Trattat ta’ Lisbona (taħt il-proċedura regolatorja bi skrutinju) mat-Trattat ta’ Lisbona fir-rigward tal-atti delegati u ta’ implimentazzjoni;

71.    Itenni t-talba tiegħu lill-Kummissjoni li tressaq, abbażi tal-Artikolu 298 tat-Trattat dwar il-Funzjonament tal-Unjoni Ewropea, proposta għal regolament dwar Liġi Ewropea ta’ proċedura amministrattiva;

72.    Jistieden lill-Kummissjoni biex tivvaluta l-perċentwal baxx ta’ suċċess tal-Inizjattivi taċ-Ċittadini Ewropej (ECIs), li għandu impatt negattiv fuq l-aċċettazzjoni taċ-ċittadini ta’ dan l-istrument ta’ demokrazija parteċipattiva transnazzjonali, u biex tiżgura li deċiżjonijiet dwar l-ammissibilità ta’ ECIs jikkorrispondu mal-kompetenza legali tal-UE, u jistenna li l-Kummissjoni tagħti segwitu xieraq għal kull inizjattiva taċ-ċittadini Ewropej li kienet ta’ suċċess meta hija impenjat ruħha li tagħmel dan, u b’mod aktar ġenerali biex tindirizza n-nuqqasijiet u l-limitazzjonijiet ta’ dan l-istrument permezz ta’ reviżjoni minnufih tar-Regolament ECI bl-għan li dan jiġi trasformat f’għodda li tistabbilixxi aġenda kredibbli;

73.    Jistieden lill-Kummissjoni tanalizza aktar fil-fond l-allegat ksur tal-liġi tal-UE nnotifikati mill-petizzjonanti, filwaqt li ssaħħaħ il-poter ta’ skrutinju komuni tal-Parlament u l-Kummissjoni fir-rigward tal-Istati Membri fit-traspożizzjoni u l-implimentazzjoni tal-liġi tal-UE, biex jikkollaboraw mill-qrib u fil-waqt fl-investigazzjonijiet rilevanti, u jekk jitqies meħtieġ, biex jingħata bidu għal proċeduri ta’ ksur filwaqt li jikkollaboraw mal-Parlament fi trasparenza sħiħa; iqis barra minn hekk, li l-Ftehim Interistituzzjonali għandu jpoġġi obbligu fuq l-awtoritajiet pubbliċi biex jirrispondu b’mod sħiħ u b’mod responsabbli, fi żmien tliet xhur, lill-investigazzjonijiet tal-Parlament dwar petizzjonijiet miċ-ċittadini tal-UE;

74.    Jitlob lill-Kummissjoni, fil-kuntest tal-Programm dwar l-Idoneità u l-Prestazzjoni tar-Regolamentazzjoni (REFIT), biex tippreżenta lista ambizzjuża ta’ leġislazzjoni u proposti biex jiġu riveduti jew mħassra fejn l-adegwatezza tagħhom jew il-valur miżjud tal-UE ma tidhirx li tkun mogħtija;

75.    Jinnota li l-impenn politiku tal-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta’ Sigurtà biex taħdem mill-qrib mal-Parlament, u b’mod partikulari mal-Kumitat għall-Affarijiet Barranin (eż. qabel u wara l-laqgħat tal-Kunsill Affarijiet Barranin), qed tiġi implimentata;

76.    Jagħti istruzzjonijiet lill-President tiegħu biex jgħaddi din ir-riżoluzzjoni lill-Kummissjoni.