MOZZJONI GĦAL RIŻOLUZZJONI dwar ir-repressjoni sistematika fil-Belarussja u l-konsegwenzi tagħha għas-sigurtà Ewropea wara l-każijiet ta' ħtif minn ajruplan ċivili tal-UE interċettat mill-awtoritajiet Belarussi

B9‑0328/2021

Riżoluzzjoni tal-Parlament Ewropew dwar ir-repressjoni sistematika fil-Belarussja u l-konsegwenzi tagħha għas-sigurtà Ewropea wara l-każijiet ta' ħtif minn ajruplan ċivili tal-UE interċettat mill-awtoritajiet Belarussi

(2021/2741(RSP))

Il-Parlament Ewropew,

– wara li kkunsidra r-riżoluzzjonijiet preċedenti tiegħu dwar il-Belarussja,

– wara li kkunsidra l-konklużjonijiet tal-Kunsill tat-12 ta' Ottubru 2020 dwar il-Belarussja,

– wara li kkunsidra d-dikjarazzjoni magħmula mir-Rappreżentant Għoli tal-Unjoni għall-Affarijiet Barranin u l-Politika ta' Sigurtà f'isem l-UE tal-24 ta' Mejju 2021 dwar id-devjazzjoni furzata tat-titjira ta' Ryanair FR4978 lejn Minsk fit-23 ta' Mejju 2021,

– wara li kkunsidra l-konklużjonijiet tal-Kunsill Ewropew tal-24 ta' Mejju 2021 dwar il-Belarussja,

– wara li kkunsidra d-dikjarazzjoni konġunta mill-ministri barranin tal-G7 u r-Rappreżentant Għoli tal-Unjoni għall-Affarijiet Barranin u l-Politika ta' Sigurtà tas-27 ta' Mejju 2021 dwar il-Belarussja,

– wara li kkunsidra d-Deċiżjoni tal-Kunsill (PESK) 2021/908 tal-4 ta' Ġunju 2021 li temenda d-Deċiżjoni 2012/642/PESK dwar miżuri restrittivi fid-dawl tas-sitwazzjoni fil-Belarussja[1], li introduċiet projbizzjoni fuq it-titjiriet li jgħaddu minn fuq l-ispazju tal-ajru tal-UE u dwar l-aċċess għall-ajruporti tal-UE minn trasportaturi Belarussi ta' kull tip,

– wara li kkunsidra l-Artikolu 132(2) tar-Regoli ta' Proċedura tiegħu,

A. billi nhar il-Ħadd 23 ta' Mejju 2021, l-awtoritajiet Belarussi, bl-iskuża falza ta' theddida ta' bomba, interċettaw it-titjira ta' Ryanair FR4978 bl-involviment ta' ajruplan tal-ġlied Belarussu Air Force MiG-29 u ddevjawha biex iġieġħlu l-ajruplan jagħmel inżul ta' emerġenza;

B. billi l-awtoritajiet Belarussi ma skoprew l-ebda apparat splussiv, iżda arrestaw żewġ passiġġieri – Raman Pratasevich, ċittadin Belarussu, u t-tfajla tiegħu Sofia Sapega, ċittadina Russa u studenta tal-Università Ewropea tal-Istudji Umanistiċi f'Vilnius;

C. billi Raman Pratasevich huwa ġurnalist u blogger Belarussu u wieħed mill-fundaturi tal-istazzjon Nexta Telegram, li kellu rwol ċentrali fil-mobilizzazzjoni tal-protesti fil-Belarussja wara l-elezzjonijiet presidenzjali ffalsifikati tad-9 ta' Awwissu 2020; billi Raman Pratasevich kien qed jirrisjedi b'mod permanenti f'eżilju fil-Polonja u fil-Litwanja sabiex jevita li jiġi arrestat fil-Belarussja abbażi ta' akkużi fabbrikati fil-konfront tiegħu; billi Raman Pratasevich tqiegħed fuq il-lista ta' sorveljanza tat-terroristi mill-awtoritajiet Belarussi u issa jista' jiffaċċja l-piena kapitali, peress li l-Belarussja tibqa' l-uniku pajjiż fl-Ewropa li jinforza l-piena tal-mewt;

D. billi tliet passiġġieri oħra ma telgħux fuq l-ajruplan tat-titjira FR4978 wara l-inżul ta' emerġenza f'Minsk;

E. billi kemm Raman Pratasevich kif ukoll Sofia Sapega ġew murija fuq il-media tal-massa Belarussa nhar it-Tnejn 24 ta' Mejju; billi Raman Pratasevich iddikjara li kien f'saħħtu u li kien qed jiġi ttrattat tajjeb u ammetta li s-sena l-oħra kellu rwol fl-organizzazzjoni ta' protesti tal-massa f'Minsk; billi Raman Pratasevich kellu ħafna make-up fuqu possibbilment biex jitgħattielu t-tbenġil li għamlulu r-rappreżentanti tas-servizzi tas-sigurtà Belarussi wara l-arrest tiegħu; billi Raman Pratasevich ta intervista fuq l-istazzjon tal-Istat ONT nhar l-Erbgħa 2 ta' Ġunju li fiha għamel aktar "konfessjonijiet"; billi bħal fid-dehra preċedenti tiegħu fuq il-media, Raman Pratasevich ma kienx jidher bħala persuna li kienet qed tagħmel konfessjoni mir-rieda libera tagħha; billi l-avukati tiegħu għadhom ma jistgħux jarawh;

F. billi l-inżul ta' emerġenza tat-titjira FR4978 poġġa f'periklu l-ħajja ta' 171 passiġġier u membru ieħor tal-ekwipaġġ, li ħafna minnhom kienu ċittadini tal-UE;

G. billi l-inżul furzat tat-titjira FR4978 kien qed jikser ħafna standards legali internazzjonali, inkluża l-Konvenzjoni ta' Chicago dwar l-Avjazzjoni Ċivili Internazzjonali u l-Konvenzjoni ta' Montreal għas-Suppressjoni ta' Atti Illeċiti kontra s-Sikurezza tal-Avjazzjoni Ċivili;

H. billi hemm aktar minn 400 detentut politiku rikonoxxut fil-Belarussja, inklużi seba' minorenni; billi mill-protesti wara l-elezzjonijiet presidenzjali misruqa tad-9 ta' Awwissu 2020, intbagħtu l-ħabs 35 000 persuna, inbdew madwar 3 000 każ kriminali motivati minn raġunijiet politiċi kontra d-dimostranti, u rriżultaw aktar minn 4 600 dikjarazzjoni ta' tortura, vjolenza u trattament ħażin;

I. billi r-reġim Belarussu jikser b'mod sistematiku d-drittijiet u l-libertajiet tal-bniedem tal-poplu tiegħu; billi s-sitwazzjoni ġenerali tad-demokrazija u tal-istat tad-dritt fil-pajjiż marru għall-agħar b'mod sinifikanti mit-tħejjija għall-elezzjonijiet presidenzjali tad-9 ta' Awwissu 2020 u l-organizzazzjoni tagħhom u warajhom;

J. billi l-għeluq ta' mezzi tal-media indipendenti fil-Belarussja, l-arresti intensifikati ta' ġurnalisti, studenti, ħaddiema tat-trade unions, attivisti tas-soċjetà ċivili u tal-partiti politiċi, il-fabbrikazzjoni tal-każijiet tagħhom fl-hekk imsejħa "qrati", l-intimidazzjoni, it-tortura u t-tikkettar ta' detenuti politiċi b'badges sofor, u l-attakki fuq ċittadini innoċenti fit-triq u fi djarhom jikkwalifikaw bħala terroriżmu sistemiku mill-Istat;

K. billi l-għadd ta' vittmi li jisfaw mejta taħt ir-reġim Belarussu qed jiżdied b'rata allarmanti, bit-tentattivi reċenti ta' persuni detenuti li jwettqu suwiċidju wara li jesperjenzaw tortura fiżika u mentali waqt li jkunu l-ħabs;

L. billi l-inżul furzat tat-titjira FR4978 u l-arrest ta' għadu tar-reġim Belarussu kellhom l-għan li jibagħtu sinjal ta' tkexkix lill-avversarji kollha tiegħu, b'mod partikolari lil dawk li jgħixu barra mill-pajjiż, li r-reġim huwa determinat li jsibhom u jaqbadhom u li mhumiex sikuri barra mill-pajjiż;

1. Jikkundanna l-ħtif u l-inżul furzat tat-titjira FR4978 mill-awtoritajiet Belarussi; iqis li dan l-att orribbli jikkostitwixxi ksur tad-dritt internazzjonali li jikkostitwixxi att ta' terroriżmu tal-Istat;

2. Jitlob il-ħelsien immedjat u mingħajr kundizzjonijiet ta' Raman Pratasevich u Sofia Sapega; itenni t-talbiet preċedenti tiegħu għall-ħelsien tad-detenuti politiċi l-oħra kollha miżmuma mill-awtoritajiet Belarussi;

3. Jiddeplora s-sentenza ta' Pavel Sevyarynets, Yauhen Afnahel, Andrei Voynich, Pavel Yukhnevich, Zmitser Kazlou, Maksim Vinyarski u Iryna Shchasnaya fi proċess magħluq fil-belt ta' Mahilyou;

4. Iħeġġeġ lill-awtoritajiet Belarussi jwaqqfu kull forma ta' trattament ħażin u tortura kontra d-detenuti u d-detenuti politiċi u jippermettulhom jaċċessaw trattament mediku u pariri legali;

5. Itenni n-nuqqas ta' rikonoxximent tiegħu tal-elezzjoni ta' Alexander Lukashenko għall-kariga ta' President tal-Belarussja; iqis ir-reġim attwali fil-Belarussja bħala illeġittimu, illegali u kriminali; jikkundanna r-repressjoni tal-eluf ta' Belarussi li pprotestaw b'mod paċifiku għad-difiża tad-dritt tagħhom għal-libertà, għad-demokrazija u għad-dinjità;

6. Jikkundanna l-attakki sistemiċi tar-reġim kontra l-popolazzjoni ċivili, li mill-elezzjonijiet misruqa f'Awwissu 2020 ġiegħel lil 14 000 Belarussu jaħarbu mill-pajjiż, permezz tal-vjolenza, tal-intimidazzjoni u ta' forom oħra ta' koerċizzjoni; itenni li din il-kampanja ta' repressjoni li għaddejja bħalissa u l-ispostament furzat taċ-ċittadini jirrappreżentaw ksur serju tad-drittijiet tal-bniedem;

7. Jissottolinja li s-sitwazzjoni attwali hija prova tal-kredibbiltà tal-Unjoni Ewropea u tal-effettività tat-tfassil tal-politika barranija tagħna; ifakkar li s-sitwazzjoni fil-Belarussja, pajjiż ġar u membru tas-Sħubija tal-Lvant, għandha impatt dirett fuq l-UE u li din tal-aħħar għandha turi biżżejjed determinazzjoni biex toffri appoġġ tanġibbli u fit‑tul lill-forzi demokratiċi li jagħmlu ħilithom biex iġibu l-libertà u d-demokrazija fil-Belarussja;

8. Itenni li l-UE għandha tkompli tindirizza s-sitwazzjoni tad-drittijiet tal-bniedem fil-Belarussja billi timmobilizza l-komunità internazzjonali b'appoġġ għall-poplu Belarussu, inkluż permezz tal-Kunsill tad-Drittijiet tal-Bniedem tan-NU, l-OSKE u l-Kunsill tal-Ewropa;

9. Jisħaq li l-libertà tal-kelma u l-libertà għal protesta, l-indipendenza tal-media tal-massa, id-dritt għal proċess ġust, u r-rispett għad-drittijiet tal-bniedem b'mod ġenerali huma valuri komprensivi li jinsabu fil-bażi proprja tas-soċjetajiet demokratiċi u tal-Unjoni Ewropea; jiddeplora l-fatt li l-Belarussja bħalissa hija l-uniku pajjiż fl-Ewropa li għadu jinforza l-piena tal-mewt;

10. Jisħaq li sabiex jingħelbu r-reġimi awtoritarji bħall-Belarussja ta' Lukashenko u r-Russja ta' Putin u jiġu promossi l-valuri demokratiċi fir-reġjun, l-Unjoni Ewropea u l-Istati Membri tagħha għandhom jappoġġjaw bis-sħiħ il-kooperazzjoni msaħħa mal-pajjiżi assoċjati mis-Sħubija tal-Lvant (il-Georgia, il-Moldova u l-Ukrajna); jenfasizza li l-ħolqien ta' spazju demokratiku b'saħħtu fil-fruntiera tal-Ewropa tal-Lvant u eżempji konkreti ta' trasformazzjoni demokratika ta' suċċess jistgħu jkunu ta' benefiċċju kemm għas-sigurtà kif ukoll għall-prosperità taċ-ċittadini tagħna kif ukoll għad-demokratizzazzjoni tal-Belarussja u tal-Federazzjoni Russa;

11. Jappoġġja bil-qawwa l-idea li titnieda konferenza politika ta' livell għoli dwar ir-riżoluzzjoni tal-kriżi fil-Belarussja, li għandha ssir mingħajr dewmien; itenni t-talba preċedenti tiegħu, appoġġjata mill-maġġoranza l-kbira tal-Membri u l-gruppi politiċi tiegħu, filwaqt li jħeġġeġ lill-President u lill-Konferenza tal-Presidenti tal-Parlament Ewropew jibdew missjoni ta' livell għoli li tinvolvi lill-eks uffiċjali Ewropej ta' livell għoli biex jesploraw kull mezz possibbli ħalli jitwaqqfu l-vjolenza u jiġu liberati d-detenuti politiċi, li jista' jgħin biex jinħoloq ambjent li jwassal għal djalogu politiku domestiku inklużiv fil-Belarussja;

12. Jistieden lill-Aġenzija tas-Sikurezza tal-Avjazzjoni tal-Unjoni Ewropea u lill-Organizzazzjoni tal-Avjazzjoni Ċivili Internazzjonali jwettqu investigazzjoni urġenti dwar dan l-att bla preċedent ta' terroriżmu sponsorizzat mill-istat kontra inġenju tal-ajru ċivili rreġistrat fl-UE sabiex jiġi vvalutat jekk it-trasport bl-ajru u s-sikurezza tal-passiġġieri tpoġġewx fil-periklu; jenfasizza li dan l-inċident gravi kiser b'mod sinifikanti l-fiduċja u li kull stat jaġixxi b'mod responsabbli fit-twettiq tal-obbligi tiegħu skont il-Konvenzjoni ta' Chicago sabiex l-inġenji tal-ajru jkunu jistgħu joperaw b'mod sikur u sigur; jisħaq li investigazzjoni bħal din għandha tesplora l-possibbiltà li ċ-ċittadini Russi kellhom sehem fl-atti terroristiċi mwettqa mir-reġim Belarussu; jissottolinja li jekk dan jitqies li kien il-każ, kwalunkwe ċittadin Russu involut direttament jew indirettament fl-operazzjoni għandu jiġi sanzjonat skont ir-Reġim Globali ta' Sanzjonijiet tal-UE b'rabta mad-Drittijiet tal-Bniedem (l-Att Magnitsky tal-UE);

13. Jenfasizza l-importanza tal-kontribut tal-UE fl-investigazzjoni, inkluż permezz tal-involviment ta' korpi tal-UE bħall-Europol, il-Eurojust jew l-Uffiċċju tal-Prosekutur Pubbliku Ewropew fil-ħidma ta' skwadri ta' investigazzjoni u operazzjonijiet konġunti;

14. Jistieden lill-Interpol tirrieżamina bir-reqqa t-talbiet għal Avviżi Ħomor li saru mill-Belarussja u tieħu miżuri xierqa biex tipprevjeni lill-Belarussja milli tuża ħażin l-Interpol għal skopijiet politiċi;

15. Jilqa' r-rispons pożittiv ħafna tat-trasportaturi tal-ajru tal-UE biex jevitaw jew jippruvaw jevitaw it-titjir fuq l-ispazju tal-ajru Belarussu; jiddeplora l-fatt li f'xi każijiet huma mxekkla li jagħmlu dan mill-kontroll tat-traffiku tal-ajru Russu; jilqa' l-għeluq tal-ispazju tal-ajru tal-UE għat-trasportaturi tal-ajru Belarussi; jisħaq li l-projbizzjoni tal-UE milli jintuża l-ispazju tal-ajru tal-UE mit-trasportaturi tal-ajru Belarussi għandha tibqa' fis-seħħ sakemm ikunu nħelsu d-detenuti politiċi kollha, inklużi Raman Pratasevich u Sofia Sapega; jissottolinja l-ħtieġa li l-UE tintroduċi r-raba' pakkett antiċipat tagħha ta' sanzjonijiet, li għandu jkun aktar ambizzjuż u mmirat; jirrakkomanda li għandhom jiġu introdotti sanzjonijiet settorjali u jinkludu projbizzjoni fuq l-importazzjonijiet ta' prodotti taż-żejt, fertilizzanti tal-potassa, prodotti tal-metall, injam u prodotti tal-injam; jissottolinja l-ħtieġa urġenti li jiġu sanzjonati l-intrapriżi rilevanti kollha mmexxija mill-Istat li jikkontribwixxu għall-appoġġ tar-reġim permezz tad-dħul mill-kambju; jenfasizza l-importanza li tiżdied il-ġlieda kontra n-negozju tal-kuntrabandu tas-sigaretti mill-Belarussja, li saret sors serju ħafna ta' dħul għar-reġim Belarussu;

16. Iqis li l-lista ta' individwi sanzjonati li ġew ipprojbiti milli jidħlu fl-UE u li l-assi tagħhom ġew iffriżati jeħtieġ li titkabbar b'mod sostanzjali u tinkludi dawk kollha marbuta mar-repressjoni tal-Istat, iżda wkoll dawk li qed iħeġġu r-reġim u jagħtuh appoġġ ekonomiku jew kwalunkwe tip ieħor ta' assistenza, bħall-ġurnalist tar-reġim Marat Markov, li intervista lil Raman Pratasevich fuq l-istazzjon tal-Istat ONT fit-2 ta' Ġunju 2021; ifakkar, f'dan ir-rigward, fil-ħtieġa li jittieħed vantaġġ sħiħ mill-għażliet għal miżuri restrittivi fl-ambitu tar-Reġim Globali ta' Sanzjonijiet tal-UE b'rabta mad-Drittijiet tal-Bniedem (l-Att Magnitsky tal-UE); jagħti parir lill-Istati Membri jikkunsidraw it-tkeċċija tal-persunal diplomatiku tal-Belarussja, li huwa magħruf li jaħdmu mas-servizzi sigrieti tal-Belarussja;

17. Jissottolinja li l-miżuri punittivi kollha kontra l-Belarussja għandhom jiġu kkoordinati u introdotti flimkien mas-sħab mill-G7 u sħab oħra li jaħsbuha bl-istess mod; jilqa' s-summits li jmiss bejn l-UE u l-Istati Uniti u l-Istati Uniti u r-Russja u jqishom opportunitajiet importanti biex jiġu kkoordinati l-pożizzjonijiet bejn l-UE u s-sħab tagħha; ifakkar lill-President Putin dwar il-konsegwenzi ta' appoġġ ulterjuri għar-reġim ta' Alexander Lukashenko; jenfasizza, f'dan il-kuntest, l-importanza li jiġu introdotti aktar sanzjonijiet kontra l-Federazzjoni Russa għar-rwol tagħha fl-appoġġ tar-reġim Belarussu;

18. Jirrimarka r-responsabbiltà morali u politika tal-partiti politiċi fl-UE li volontarjament jibbenefikaw minn riżorsi finanzjarji mogħtija mill-Federazzjoni Russa bi skambju għal appoġġ politiku u ta' xorta oħra offrut fil-Parlament Ewropew u bnadi oħra għall-politiki Russi u li għandu l-għan li jagħmel ħsara lill-interessi u l-valuri tal-UE;

19. Jitlob l-istabbiliment ta' tribunal internazzjonali biex jipproċedi kontra r-reati tar-reġim Belarussu u kontra Alexander Lukashenko b'mod partikolari talli wettaq gwerra fuq iċ-ċittadini tal-Belarussja; jistieden lill-UE tieħu l-azzjoni meħtieġa, inkluż billi tuża l-pjattaformi tal-UE biex tfittex ġustizzja u tiġġieled l-impunità, bħall-Pjattaforma tal-Impunità tal-Parlament Ewropew, iċ-Ċentru tal-Ġustizzja tal-UE u n-networks ta' ġuriżdizzjoni universali;

20. Jissottolinja l-impenn kontinwu tal-UE għal Belarussja demokratika; jilqa' l-abbozz tal-Kummissjoni tal-pakkett ta' appoġġ ekonomiku tagħha ta' EUR 3 biljun għal Belarussja demokratika futura; jinnota li l-UE jeħtieġ li tipproponi sett komprensiv ta' azzjonijiet biex tħejji l-forzi demokratiċi tal-Belarussja għall-implimentazzjoni ta' dan il-pakkett; jenfasizza li dan il-pakkett jagħti l-messaġġ importanti li l-UE se tkun lesta li tipprovdi assistenza tanġibbli u multidimensjonali lil Belarussja demokratika, u li tpoġġi lill-pajjiż fit-triq tar-riforma u l-modernizzazzjoni; jenfasizza l-importanza li l-UE tħejji għal ftehim bilaterali ambizzjuż biex tħaddan bidla demokratika fil-Belarussja;

21. Itenni l-importanza tal-media u l-ġurnalisti Belarussi indipendenti u r-rwol importanti li jaqdu fis-soċjetà Belarussa; jistieden, f'dan ir-rigward, lill-UE u lil organizzazzjonijiet internazzjonali oħra jipprovdu appoġġ finanzjarju u tekniku lill-mezzi tal-media u l-ġurnalisti indipendenti kollha biex ikunu jistgħu jwettqu dmirijiethom li jinfurmaw lis-soċjetà dwar l-iżviluppi li għaddejjin fil-Belarussja; itenni, f'dan ir-rigward, l-appell tiegħu għal aktar assistenza għall-istazzjon tat-televiżjoni Bielsat;

22. Itenni t-talbiet preċedenti tiegħu biex tiġi estiża l-assistenza lis-soċjetà ċivili Belarussa, b'enfasi partikolari fuq dawk li jsibu kenn fl-UE u jkomplu l-ġlieda tagħhom minn hemm; jistieden lill-Istati Membri jipprovdu lil dawn l-individwi bi protezzjoni personali u opportunitajiet biex jiffukaw fuq il-ħidma ċivika tagħhom billi jiffaċilitaw il-kisba ta' viżi u jissimplifikaw ir-regoli ta' residenza, u joffru appoġġ, inkluż appoġġ finanzjarju, lil istituzzjonijiet eżiljati, bħall-Università Ewropea tal-Istudji Umanistiċi f'Vilnius, li qed irawmu ġenerazzjoni ġdida ta' Belarussi li jikkontestaw is-sistema korrotta u illeġittima tagħhom;

23. Jitlob li l-Belarussja titneħħa minn korpi sportivi internazzjonali, inkluż il-Kumitat Olimpiku Internazzjonali; iħeġġeġ lill-Unjoni tal-Assoċjazzjonijiet Ewropej tal-Futbol (UEFA) tneħħi d-drittijiet tax-xandir għat-turnew tal-futbol EURO 2020 mit-televiżjoni tal-Istat Belarussu TVR u tassenjahom lill-istazzjon tat-televiżjoni indipendenti Bielsat TV mingħajr ħlas;

24. Itenni l-ħtieġa li l-Istati Membri kollha jieħdu pożizzjoni unifikata fir-rispons għat-terroriżmu sponsorizzat mill-Istat orkestrat mir-reġim ta' Alexander Lukashenko u appoġġjat mill-Kremlin; jesprimi t-tħassib tiegħu dwar l-azzjonijiet tal-gvern proviżorju fil-Bulgarija maħtur mill-President fir-rigward tat-tkeċċija ta' uffiċjali tas-sigurtà ta' livell għoli involuti fl-iskoperta tan-networks tal-ispjunaġġ Russi li jaġixxu fl-UE;

25. Jissottolinja l-importanza li l-UE tiġġieled kontra d-diżinformazzjoni dwar is-sitwazzjoni fil-Belarussja fi ħdan l-UE, kif ukoll forom oħra ta' theddid ibridu mwettqa minn partijiet terzi f'dan ir-rigward;

26. Jesprimi solidarjetà mal-Latvja wara t-tkeċċija mhux ġustifikata tad-diplomatiċi tagħha mill-Belarussja; jikkundanna t-tnedija ta' investigazzjoni kriminali mill-Prosekutur Ġenerali tal-Belarussja kontra l-Ministru għall-Affarijiet Barranin tal-Latvja, kif ukoll is-Sindku tal-belt kapitali Riga;

27. Jikkundanna bil-qawwa l-atti ta' repressjoni u l-azzjonijiet ostili mwettqa mill-awtoritajiet kontra r-rappreżentanti tal-minoranza Pollakka u kontra s-sistema tal-iskola Pollakka fil-Belarussja; jappella, f'dan ir-rigward, għall-ħelsien mingħajr kundizzjonijiet ta' Andżelika Borys, Andrzej Poczobut u detenuti politiċi oħra;

28. Jagħti istruzzjonijiet lill-President tiegħu biex jgħaddi din ir-rakkomandazzjoni lill-Kunsill, lill-Kummissjoni, lill-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta' Sigurtà, kif ukoll lill-awtoritajiet tar-Repubblika tal-Belarussja.