Il-Parlament Ewropew,

–  wara li kkunsidra l-Artikoli 2 u 3(3) tat-Trattat dwar l-Unjoni Ewropea u l-Artikolu 8 tat-Trattat dwar il-Funzjonament tal-Unjoni Ewropea,

–  wara li kkunsidra l-Artikolu 23 tal-Karta tad-Drittijiet Fundamentali tal-Unjoni Ewropea,

—  wara li kkunsidra l-komunikazzjoni tal-Kummissjoni tal-10 ta' Ġunju 2016 bit-titolu "Aġenda ġdida għall-Ħiliet għall-Ewropa: Naħdmu flimkien biex insaħħu l-kapital uman, l-impjegabbiltà u l-kompetittività" (COM(2016)0381),

–  wara li kkunsidra l-komunikazzjoni tal-Kummissjoni tal-5 ta' Marzu 2020 bit-titolu "Unjoni ta' Ugwaljanza: Strateġija dwar l-Ugwaljanza Bejn il-Ġeneri għall-2020-2025"(COM(2020)0152),

–  wara li kkunsidra l-komunikazzjoni tal-Kummissjoni tal-1 ta' Lulju 2020 bit-titolu "Aġenda għall-Ħiliet għall-Ewropa għall-kompetittività sostenibbli, il-ġustizzja soċjali u r-reżiljenza" (COM(2020)0274),

–  wara li kkunsidra l-komunikazzjoni tal-Kummissjoni tat-30 ta' Settembru 2020 bit-titolu "Pjan ta' Azzjoni dwar l-Edukazzjoni Diġitali 2021-2027 – Tfassil mill-ġdid tal-edukazzjoni u t-taħriġ għall-era diġitali" (COM(2020)0624),

—  wara li kkunsidra l-istudju tal-Istitut Ewropew għall-Ugwaljanza bejn is-Sessi tal-10 ta' Awwissu 2017 bit-titolu "Economic benefits of gender equality in the EU: How gender equality in STEM education leads to economic growth",

–  wara li kkunsidra r-riżoluzzjoni tiegħu tad-9 ta' Settembru 2015 dwar il-karrieri tan-nisa fix-Xjenza u l-Università u s-soqfa tal-ħġieġ li jiltaqgħu magħhom(1),

—  wara li kkunsidra l-qafas strateġiku għall-kooperazzjoni tal-politika Ewropea fl-edukazzjoni u t-taħriġ għall-2020,

—  wara li kkunsidra r-riżoluzzjoni tiegħu tat-8 ta' Ottubru 2015 dwar l-applikazzjoni tad-Direttiva 2006/54/KE tal-Parlament Ewropew u tal-Kunsill tal-5 ta' Lulju 2006 dwar l-implimentazzjoni tal-prinċipju ta' opportunitajiet indaqs u ta' trattament ugwali tal-irġiel u n-nisa fi kwistjonijiet ta' impjiegi u xogħol(2),

–  wara li kkunsidra r-riżoluzzjoni tiegħu tat-28 ta' April 2016 dwar l-ugwaljanza bejn is-sessi u l-għoti ta' setgħa lin-nisa fl-era diġitali(3),

–  wara li kkunsidra r-riżoluzzjoni tiegħu tas-17 ta' April 2018 dwar l-emanċipazzjoni tan-nisa u tat-tfajliet permezz tas-settur diġitali(4),

—  wara li kkunsidra r-riżoluzzjoni tiegħu tal-21 ta' Jannar 2021 dwar tnaqqis tad-disparità bejn il-ġeneri fil-qasam diġitali: il-parteċipazzjoni tan-nisa fl-ekonomija diġitali(5),

—  wara li kkunsidra l-konklużjonijiet tal-Kunsill tas-6 ta' Diċembru 2018 dwar l-ugwaljanza bejn il-ġeneri, iż-żgħażagħ u d-diġitalizzazzjoni,

–  wara li kkunsidra l-istudju bit-titolu "Education and employment of women in science, technology and the digital economy, including AI and its influence on gender equality" ippubblikat mid-Direttorat Ġenerali għall-Politiki Interni tiegħu fil-15 ta' April 2020(6),

–  wara li kkunsidra l-istudju bit-titolu "Women in the Digital Age"(7),

—  wara li kkunsidra l-Jum Internazzjonali tan-NU tan-Nisa u l-Bniet fix-Xjenza, li jitfakkar fil-11 ta' Frar ta' kull sena, li jfittex li jikseb aċċess sħiħ u ugwali għax-xjenza u l-parteċipazzjoni fiha għan-nisa u l-bniet, u jikseb aktar ugwaljanza bejn il-ġenerazzjoni u l-emanċipazzjoni tan-nisa u l-bniet,

—  wara li kkunsidra l-Aġenda 2030 għall-Iżvilupp Sostenibbli, li daħlet fis-seħħ fl-2016, u b'mod partikolari, l-Għan ta' Żvilupp Sostenibbli 5 dwar l-ugwaljanza bejn il-ġeneri,

—  wara li kkunsidra t-Tabella ta' valutazzjoni tal-Kummissjoni tal-2020 dwar "In-Nisa fid-Dinja Diġitali",

—  wara li kkunsidra r-rapport tal-Istitut Ewropew għall-Ugwaljanza bejn is-Sessi dwar l-Indiċi tal-Ugwaljanza bejn il-Ġeneri 2020,

—  wara li kkunsidra l-Konvenzjoni tan-NU dwar l-Eliminazzjoni ta' Kull Forma ta' Diskriminazzjoni kontra n-Nisa tal-1979, b'mod partikolari l-Artikolu 11 tagħha,

–  wara li kkunsidra l-Artikolu 54 tar-Regoli ta' Proċedura tiegħu,

–  wara li kkunsidra r-rapport tal-Kumitat għad-Drittijiet tan-Nisa u l-Ugwaljanza bejn is-Sessi (A9-0163/2021),

A.  billi l-ugwaljanza bejn il-ġeneri hija valur fundamentali u objettiv ewlieni tal-UE u prekundizzjoni bażika għat-tgawdija sħiħa tad-drittijiet tal-bniedem min-nisa u l-bniet li hija essenzjali għall-emanċipazzjoni tagħhom, l-iżvilupp tal-potenzjal sħiħ tagħhom u l-kisba ta' soċjetà sostenibbli u inklużiva; billi d-diskriminazzjoni li jħabbtu wiċċhom magħha n-nisa b'rabta mal-ġeneru, l-istereotipi u l-inugwaljanzi, flimkien mad-diskriminazzjoni intersezzjonali, għandha għadd kbir ta' konsegwenzi soċjali u ekonomiċi dannużi, inkluż it-tnaqqis ta' vantaġġi potenzjali għas-settur pubbliku u n-negozji fir-riċerka u l-innovazzjoni u għall-iżvilupp ekonomiku ġenerali; billi ż-żieda fil-profil tan-nisa fix-xjenza, it-teknoloġija, l-inġinerija u l-matematika (STEM) u l-kontributi professjonali tan-nisa jistgħu jistabbilixxu xejriet ta' suċċess li għandhom jiġu segwiti u fl-aħħar mill-aħħar iwasslu għal aktar inklużjoni, kif ukoll isaħħu t-trasformazzjoni u l-innovazzjoni fis-soċjetajiet tagħna, għall-benefiċċju tal-pubbliku ġenerali; billi l-eliminazzjoni tax-xejriet il-qodma tippromwovi l-ugwaljanza bejn il-ġeneri; billi n-nisa jista' jkollhom rwol vitali biex jimlew in-nuqqasijiet fis-suq tax-xogħol tal-UE;

B.  billi l-UE qed tiffaċċja nuqqas bla preċedent ta' nisa fil-karrieri u l-edukazzjoni STEM, b'mod partikolari minħabba li n-nisa jirrappreżentaw 52 % tal-popolazzjoni Ewropea u 57,7 % tal-gradwati terzjarji fl-UE(8), iżda jirrappreżentaw biss 2 minn kull 5 xjenzati u inġiniera(9); billi n-nisa huma sottorappreżentati fil-livelli kollha fis-settur diġitali fl-Ewropa, minn studenti (32 % f'livell ta' baċellerat, master's jew ekwivalenti) sal-ogħla pożizzjonijiet akkademiċi (15 %) fil-biċċa l-kbira tal-oqsma xjentifiċi, tal-inġinerija u tal-maniġment u f'livelli ġerarkiċi ogħla, anke f'setturi fejn jinsabu f'maġġoranza, bħall-edukazzjoni; billi l-istereotipi tal-ġeneru jikkostitwixxu ostaklu sinifikanti għall-ugwaljanza bejn l-istudenti maskili u femminili sa mill-edukazzjoni u jkomplu jwessgħu d-differenza bejn il-ġeneri fis-settur tal-impjiegi STEM, li tirrappreżenta ostaklu sinifikanti għall-ugwaljanza bejn in-nisa u l-irġiel; billi d-differenza hija l-akbar fil-ħiliet speċjalizzati u fl-impjiegi fl-ICT fl-UE, fejn 18 % biss huma nisa(10), fost il-gradwati STEM, li minnhom 36 % biss huma nisa, u fis-settur diġitali, fejn hemm aktar minn tliet darbiet aktar irġiel milli nisa; billi livelli sinifikanti ta' segregazzjoni tal-ġeneri fost l-istudenti u l-gradwati STEM iwittu t-triq għas-segregazzjoni futura tal-ġeneri fil-karrieri relatati mal-iSTEM; billi huma ftit ħafna t-tfajliet adolexxenti fl-Istati Membri (inqas minn 3 %) li jesprimu interess li jaħdmu bħala professjonisti tal-ICT meta jkollhom 30 sena(11); billi huwa partikolarment diffiċli għan-nisa minn kuntesti soċjoekonomiċi żvantaġġati biex jidħlu fis-settur STEM; billi għalkemm kien hemm xejra pożittiva fl-involviment u l-interess tal-bniet fl-edukazzjoni STEM, il-perċentwali għadhom insuffiċjenti; billi l-attitudnijiet lejn l-iSTEM ma jvarjawx bejn is-subien u l-bniet matul l-edukazzjoni primarja, u f'ħafna każijiet il-bniet spiss imorru aħjar mis-subien f'kompiti relatati mal-iSTEM u mal-ICT(12); billi d-differenzi bejn il-ġeneri fis-suġġetti STEM fl-edukazzjoni ogħla mhumiex ġustifikati mill-prestazzjoni akkademika, peress li l-bniet u s-subien juru livelli simili ta' kisba fix-xjenza u l-matematika fl-edukazzjoni sekondarja; billi, madankollu, il-bniet jibżgħu li jkollhom inqas suċċess mis-subien f'karrieri relatati mal-iSTEM u, b'riżultat ta' dan, in-nisa huma inqas kunfidenti fil-ħiliet diġitali tagħhom stess; billi n-normi soċjali u l-aspettattivi b'rabta mal-ġeneru dwar l-għażliet tal-karrieri, li spiss jissaħħu permezz tal-kontenut u l-kurrikuli edukattivi, huma tnejn mill-ixpruni tas-segregazzjoni tal-ġeneri fl-edukazzjoni ogħla;

C.  billi n-nisa li jispeċjalizzaw fl-oqsma STEM jistgħu jitħabtu biex isibu posthom fis-settur tal-impjiegi STEM u huma inqas probabbli mill-kontropartijiet maskili tagħhom li jidħlu f'impjiegi STEM jew li jibqgħu fihom minħabba d-diversi ostakli li jeżistu, bħall-istereotipi marbuta mal-ġeneru, il-postijiet tax-xogħol iddominati mill-irġiel, id-diskriminazzjoni u l-preġudizzju, il-preġudizzju konsapevoli u inkonsapevoli, il-fastidju sesswali, ambjent tax-xogħol negattiv, u nuqqas ta' mudelli eżemplari u mentors femminili; billi t-tnaqqis tad-differenza bejn il-ġeneri fl-oqsma tal-edukazzjoni STEM jista' jnaqqas id-diskrepanza fil-ħiliet, iżid l-impjiegi u l-produttività tan-nisa u jnaqqas is-segregazzjoni professjonali, li fl-aħħar mill-aħħar irawmu t-tkabbir ekonomiku permezz ta' produttività ogħla u żieda fix-xogħol; billi t-tnaqqis tad-differenza bejn il-ġeneri fil-karrieri STEM jikkontribwixxi għal żieda fil-PDG per capita tal-UE b'bejn 2,2 u 3,0 % sal-2050(13); billi l-eliminazzjoni tad-differenza bejn il-ġeneri fil-karrieri STEM tikkostitwixxi pass lejn l-ugwaljanza bejn il-ġeneri u t-twettiq tad-drittijiet tal-bniedem tan-nisa u l-bniet, u jkollha impatt pożittiv fit-tnaqqis tad-differenzi bejn il-ġeneri fil-pagi u fil-pensjonijiet;

D.  billi skont stħarriġ tal-Aġenzija tal-UE għad-Drittijiet Fundamentali(14), madwar 55 % tan-nisa fl-UE ffaċċjaw fastidju sesswali mill-età ta' 15-il sena u 14 % tan-nisa esperjenzaw fastidju ċibernetiku mill-età ta' 15-il sena; billi ħafna nisa sfaw vittmi ta' forom ġodda ta' vjolenza ċibernetika matul il-pandemija tal-COVID-19, bħall-fastidju sesswali u psikoloġiku online; billi teżisti l-ħtieġa urġenti ta' miżuri biex jiġu indirizzati dawn il-forom ġodda ta' fastidju sesswali u psikoloġiku; billi ġew rappurtati inċidenzi għolja ta' fastidju sesswali f'faċilitajiet tal-edukazzjoni STEM, inklużi l-iskejjel, l-universitajiet u l-postijiet tax-xogħol, li jkomplu jeskludu lin-nisa mis-settur;

E.  billi s-sottorappreżentanza tan-nisa li jaħdmu fil-qasam tat-teknoloġiji innovattivi, bħall-intelliġenza artifiċjali (IA), hija kwistjoni ta' tħassib, peress li jista' jkollha effett negattiv fuq id-disinn, l-iżvilupp u l-implimentazzjoni ta' dawn it-teknoloġiji, u dan jikkawża r-replikazzjoni ta' prattiki diskriminatorji u stereotipi eżistenti u l-iżvilupp ta' "algoritmi bi preġudizzji fir-rigward tal-ġeneru"; billi l-isforzi biex jiġu indirizzati l-preġudizzju, l-istereotipi u l-inugwaljanza relatati mal-ġeneru fis-settur diġitali mhumiex biżżejjed; billi d-differenza bejn il-ġeneri tippersisti fl-isferi kollha tat-teknoloġija diġitali, b'mod partikolari fir-rigward tal-IA u s-sigurtà ċibernetika, u b'hekk tirrinforza trajettorja bi preġudizzju favur l-irġiel għas-settur diġitali fil-futur prevedibbli; billi l-indirizzar ta' dawn il-preġudizzji jirrikjedi l-iżvilupp ta' rekwiżiti etiċi u ta' trasparenza ċari; billi settijiet tad-data mhux kompleti u mhux eżatti u n-nuqqas ta' data diżaggregata skont il-ġeneru jistgħu jfixklu l-ipproċessar u l-loġika tas-sistemi tal-IA u jikkomprometti aktar il-kisba tal-ugwaljanza bejn il-ġeneri fis-soċjetà; billi għandha tingħata kunsiderazzjoni xierqa wkoll liċ-ċirkostanzi uniċi tal-intrapriżi żgħar u medji (SMEs) tal-Ewropa b'attenzjoni partikolari għad-daqs tagħhom, il-kapaċità tagħhom li jimplimentaw rekwiżiti ġodda, u l-potenzjal tagħhom bħala sors u kontributur siewi biex il-bniet, in-nisa u l-mexxejja nisa jkunu jistgħu jippromwovu l-ugwaljanza bejn il-ġeneri fl-edukazzjoni u l-karrieri STEM;

F.  billi t-teknoloġiji l-ġodda li jkunu preġudikati f'termini ta' ġeneru, etniċità, razza, kulur, lingwa, reliġjon jew oriġini nazzjonali jew soċjali huma prinċipalment ikkawżati minn data mhux diżaggregata, nuqqas ta' għarfien kuntestwalizzat u n-nuqqas ta' applikazzjoni ta' perspettiva tal-ġeneru fir-riċerka, li jista' jkollhom konsegwenzi ta' ħsara għas-saħħa u l-benesseri tan-nisa, speċjalment dawk li jiffaċċjaw diskriminazzjoni intersezzjonali, u għas-sikurezza tal-prodotti, u jista' jkollhom impatt negattiv fuq l-iżvilupp personali u professjonali tan-nisa(15);

G.  billi l-għalliema u l-ġenituri jistgħu jirrinforzaw l-istereotipi tal-ġeneru billi jiskoraġġixxu lill-bniet milli jagħżlu u jsegwu studji u karrieri STEM; billi l-istereotipi tal-ġeneru jinfluwenzaw ħafna l-għażliet tas-suġġetti; billi l-iskoraġġiment kulturali u n-nuqqas ta' għarfien ta' mudelli eżemplari femminili u n-nuqqas li jiġu promossi jfixklu u jaffettwaw b'mod negattiv l-opportunitajiet tal-bniet u tan-nisa fl-istudji STEM, fil-karrieri relatati u fl-intraprenditorija diġitali, u jwasslu għal diskriminazzjoni u inqas opportunitajiet għan-nisa fis-suq tax-xogħol; billi għandha ssir enfasi fuq il-fatturi li jimmotivaw lill-bniet u jkebbsu l-interess tagħhom fl-istudji STEM, il-karrieri relatati u l-intraprenditorija diġitali, bħall-promozzjoni ta' mudelli eżemplari femminili, l-għalliema mentors u l-approvazzjoni minn gruppi ta' pari u l-iżvilupp tal-kreattività u l-esperjenza prattika;

H.  billi l-kriżi tal-COVID-19 x'aktarx li twassal għal bidliet permanenti fil-ħajja fl-Ewropa u taffettwa l-biċċa l-kbira tal-aspetti tal-ħajja tan-nies, il-mod kif inwettqu l-ħidma tagħna u l-mod kif nistudjaw u nitgħallmu, fejn id-diġitalizzazzjoni se jkollha rwol ewlieni; billi l-COVID-19 qed twessa' wkoll id-differenza diġitali bejn il-ġeneri(16) fi żmien meta l-ħiliet diġitali huma meħtieġa aktar minn qatt qabel biex naħdmu, nistudjaw jew nibqgħu konnessi; billi t-trasformazzjoni diġitali rapida toffri ħafna opportunitajiet biex jinbidlu x-xejriet ta' impjieg skont il-ġeneru, iżda tista' wkoll taffettwa b'mod sproporzjonat l-impjieg tan-nisa f'diversi oqsma; billi n-nisa huma mġiegħla jieħdu sehem akbar ta' obbligi relatati mat-trobbija jew mal-familji tagħhom mill-kontropartijiet maskili tagħhom u, bħala tali, il-miżuri kollha proposti għandhom iqisu l-possibbiltà ta' rikonċiljazzjoni b'suċċess tax-xogħol mal-ħajja tal-familja għan-nisa sabiex jinkludu l-irġiel f'dawn l-oqsma; billi l-konfini bejn ix-xogħol u l-ħajja tal-familja se jsiru inqas distinti minħabba t-telexogħol u n-nisa jista' jkollhom iġorru l-akbar piż biex jibbilanċjaw karriera mad-dmirijiet ta' indukrar tal-familja;

I.  billi hemm bżonn li jiġu promossi aktar il-politiki bl-għan li jżidu l-parteċipazzjoni tan-nisa f'oqsma relatati mal-iSTEM u l-IA u li jiġi adottat approċċ f'diversi livelli biex tiġi indirizzata d-differenza bejn il-ġeneri fil-livelli kollha tal-edukazzjoni u l-impjiegi fis-settur diġitali; billi ftit Stati Membri inkludew dispożizzjonijiet dwar l-ugwaljanza bejn il-ġeneri fil-qasam tar-riċerka u l-innovazzjoni u l-progress biex il-ġeneru jiġi integrat fil-programmi nazzjonali ta' riċerka mexa bil-mod;

J.  billi hemm bżonn li tiġi promossa u appoġġjata intraprenditorija akbar fost in-nisa u li jiġi żviluppat ambjent favorevoli li fih l-intraprendituri nisa jistgħu jirnexxu u l-ispirtu intraprenditorjali jiġi mħeġġeġ; billi d-data dwar l-intraprenditorija fis-settur STEM u tal-ICT tindika emarġinazzjoni saħansitra akbar tan-nisa; billi d-differenza bejn il-ġeneri fl-istart-ups u l-investiment fil-kapital ta' riskju hija ugwalment evidenti; billi peress li l-bniet għandhom it-tendenza li jistudjaw inqas suġġetti tal-ICT u STEM matul l-iskola sekondarja u l-università, ħafna inqas nisa jispiċċaw jaħdmu f'dawn l-oqsma u jsiru fundaturi u sidien ta' kumpaniji privati u start-ups; billi 17 % biss tal-fundaturi ta' start-ups huma nisa; billi, bħala medja, l-istart-ups li huma proprjetà ta' nisa jirċievu 23 % inqas finanzjament minn dawk immexxija minn irġiel; billi għalkemm in-nisa jirrappreżentaw 30 % tal-intraprendituri kollha fl-Ewropa, jirċievu biss 2 % tal-finanzjament mhux bankarju disponibbli(17); billi din iċ-ċifra jidher li niżlet għal 1 % fid-dawl tal-pandemija;

Kummenti ġenerali

1.  Iqis li, fid-dawl tad-differenza konsiderevoli bejn il-ġeneri fil-pagi fl-UE, il-fatt li huwa aktar probabbli li n-nisa jkollhom impjiegi b'paga baxxa, part-time u altrimenti prekarji, id-domanda tikber għal professjonisti STEM, u l-importanza tal-karrieri relatati mal-iSTEM għall-futur tal-ekonomija Ewropea, iż-żieda fis-sehem tan-nisa fis-settur STEM hija kruċjali biex jiġu ssodisfati d-drittijiet u l-potenzjal tan-nisa u għall-bini ta' ekonomija u soċjetà aktar sostenibbli u inklużivi permezz tal-innovazzjoni xjentifika, diġitali u teknoloġika; jenfasizza li l-ħiliet STEM ta' livell għoli huma kritiċi għall-proċess ta' innovazzjoni f'oqsma avvanzati tal-ICT bħall-IA jew is-sigurtà ċibernetika u se jkunu dejjem aktar importanti għall-kompetittività tal-UE fis-swieq globali; jissottolinja, għalhekk, li l-potenzjal sħiħ tal-ħiliet, l-għarfien u l-kwalifiki tan-nisa f'dawn l-oqsma jista' jgħin biex tingħata spinta lill-ekonomija Ewropea u jappoġġja l-għanijiet definiti f'diversi politiki tal-UE, fuq kollox il-Patt Ekoloġiku Ewropew u l-Aġenda Diġitali;

2.  Itenni li l-għan ewlieni għandu jkun li jitneħħew l-ostakli kollha, b'mod partikolari l-ostakli soċjokulturali, psikoloġiċi u pedagoġiċi li jirrestrinġu l-interessi, il-preferenzi u l-għażliet tan-nisa u l-bniet, inklużi l-istereotipi tal-ġeneru, id-diskriminazzjoni bbażata fuq il-ġeneru u kombinazzjoni ta' fatturi bijoloġiċi u soċjali, b'mod partikolari l-fatt li l-maternità tikkoinċidi mal-aktar perjodi deċiżivi fil-karrieri tan-nisa, mingħajr ma tiġi kompromessa l-libertà tan-nisa li jieħdu deċiżjonijiet; iħeġġeġ lill-Istati Membri jippromwovu l-parteċipazzjoni tan-nisa u tal-bniet fl-istudji u l-karrieri STEM fil-pjanijiet ta' azzjoni jew l-istrateġiji nazzjonali jew reġjonali rilevanti tagħhom rigward il-ġeneru billi jipprovdu inċentivi adegwati; iqis li dawn il-pjanijiet ta' azzjoni jew l-istrateġiji, fost inizjattivi oħra, għandu jkollhom l-għan li jżidu l-ugwaljanza bejn il-ġeneri billi jiffokaw fuq il-qerda tal-istereotipi tal-ġeneru, il-faċilitazzjoni tal-aċċess għall-edukazzjoni u l-kwalifiki, bilanċ aħjar bejn ix-xogħol u l-ħajja privata, opportunitajiet indaqs, l-iżgurar ta' ambjenti tax-xogħol u studju sani u sikuri għan-nisa, in-nondiskriminazzjoni fis-suq tax-xogħol, is-sensibilizzazzjoni dwar il-preġudizzju u l-istereotipi tal-ġeneru fis-setturi kollha rilevanti għall-iSTEM, l-istabbiliment ta' politiki obbligatorji dwar it-trasparenza fil-pagi, l-implimentazzjoni ta' tolleranza żero għall-fastidju sesswali, u ż-żieda tal-viżibbiltà tal-mudelli eżemplari femminili;

3.  Itenni li l-istereotipizzazzjoni tal-ġeneru, l-iskoraġġiment kulturali u nuqqas ta' għarfien u ta' promozzjoni ta' mudelli eżemplari femminili jfixklu u jaffettwaw b'mod negattiv l-opportunitajiet tal-bniet u tan-nisa fl-istudji STEM, fil-karrieri relatati u fl-intraprenditorija diġitali, u jistgħu jwasslu għal diskriminazzjoni u inqas opportunitajiet għan-nisa fis-suq tax-xogħol;

4.  Jafferma mill-ġdid l-importanza tal-integrazzjoni tas-sensibilizzazzjoni dwar il-preġudizzju relatat mal-ġeneru fis-setturi rilevanti kollha, inkluż fit-taħriġ inizjali u kontinwu tal-għalliema; jenfasizza l-ħtieġa li jiġu indirizzati l-ostakli strutturali, bħall-iżvantaġġi soċjoekonomiċi u ambjenti tax-xogħol u kundizzjonijiet tax-xogħol ostili għan-nisa, li jimpedixxu lill-bniet u lin-nisa milli jidħlu f'qasam dominat l-aktar mill-irġiel, u l-ħtieġa li tiżdied il-viżibbiltà ta' mudelli eżemplari li sal-lum kienu sottovalutati bħala ispirazzjoni għan-nisa u l-bniet; jistieden lill-Kummissjoni tintroduċi u tappoġġja kampanji ta' sensibilizzazzjoni u programmi u inizjattivi oħra biex jitnaqqsu dawn l-ostakli fid-dinja akkademika; jisħaq li miżuri għall-ugwaljanza bejn il-ġeneri bħat-tneħħija tal-istereotipi tal-ġeneru fl-edukazzjoni, is-sensibilizzazzjoni, il-promozzjoni tas-suġġetti STEM għall-bniet u n-nisa u l-gwida dwar il-karrieri biex il-bniet jiġu mħeġġa jikkunsidraw li jistudjaw f'oqsma dominati mill-irġiel iwasslu għal għadd akbar ta' nisa li jiggradwaw fis-suġġetti STEM;

5.  Jistieden lill-Istati Membri jikkumbattu s-segmentazzjoni skont il-ġeneru fis-suq tax-xogħol fil-karrieri STEM billi jinvestu fl-edukazzjoni formali, informali u mhux formali, fit-tagħlim tul il-ħajja u fit-taħriġ vokazzjonali għan-nisa biex jiżguraw li jkollhom aċċess għal impjiegi ta' kwalità għolja u għal opportunitajiet biex jitħarrġu mill-ġdid u jtejbu l-ħiliet għad-domanda futura tas-suq tax-xogħol u jipprevjenu ċirku vizzjuż ta' segregazzjoni skont il-ġeneru fis-suq tax-xogħol; jistieden lill-Kummissjoni u lill-Istati Membri jfasslu miżuri ta' politika li jinkorporaw bis-sħiħ id-dimensjoni tal-ġeneru permezz ta' kampanji ta' sensibilizzazzjoni, taħriġ, kurrikuli tal-iskejjel u, b'mod partikolari, gwida dwar il-karrieri, sabiex jippromwovu l-intraprenditorija, is-suġġetti STEM u l-edukazzjoni diġitali għall-bniet minn età bikrija bl-għan li jiġu miġġielda l-istereotipi edukattivi eżistenti u li jiġi żgurat li aktar nisa jidħlu f'setturi li qed jiżviluppaw u mħallsa tajjeb; jenfasizza l-ħtieġa li tiġi involuta l-midja, inkluża l-midja soċjali, biex jitħeġġeġ l-użu ta' lingwaġġ inklużiv u biex jiġu evitati stereotipi li jwasslu għall-formazzjoni ta' opinjonijiet kontra l-parteċipazzjoni u l-interess tal-bniet fl-edukazzjoni STEM; jitlob li l-faċilitajiet STEM jittejbu u li jiġi garantit aċċess ugwali għalihom; jappella għal boroż ta' studju speċifiċi għall-bniet u n-nisa li jixtiequ jsegwu karriera fis-settur STEM;

6.  Jistieden lill-Kummissjoni u lill-Istati Membri jqisu b'mod speċifiku s-sitwazzjoni tan-nisa u l-bniet minn kuntesti soċjoekonomiċi żvantaġġati, bħal dawk b'diżabilità jew dawk li jgħixu f'reġjuni ultraperiferiċi jew żoni rurali, in-nisa fil-faqar, l-ommijiet waħedhom, l-istudenti f'sitwazzjonijiet prekarji, in-nisa migranti u n-nisa Rom, u jiżguraw l-aċċess sħiħ tagħhom għall-edukazzjoni diġitali u l-inklużjoni tagħhom fl-edukazzjoni diġitali u l-karrieri STEM sabiex jiġi evitat li d-distakk diġitali jitwessa'; jistieden lill-Kummissjoni u lill-Istati Membri jagħtu attenzjoni partikolari lid-diskriminazzjoni intersezzjonali u lill-preġudizzju minħabba l-etniċità, ir-reliġjon, l-orjentazzjoni sesswali, l-età jew id-diżabilità meta jfasslu l-pjanijiet ta' azzjoni tagħhom; jistieden lill-Kummissjoni u lill-Istati Membri jiġbru data komparabbli u armonizzata biex isegwu l-progress tan-nisa minn kuntesti soċjoekonomiċi jew oriġini razzjali u etnika differenti fil-livelli edukattivi kollha, inkluż fir-rigward tal-għażliet u l-iżvilupp tal-karriera tagħhom, b'enfasi fuq l-inugwaljanzi fis-setturi STEM u diġitali, li se jgħinu fil-monitoraġġ tal-impatt tal-politiki u jippermettu lill-partijiet ikkonċernati jidentifikaw in-nuqqasijiet u l-kawżi ewlenin tagħhom; jistieden lill-Kummissjoni tikkoopera mal-Istati Membri biex twessa' l-indikaturi użati għat-Tabella ta' valutazzjoni dwar "In-Nisa fid-Dinja Diġitali" sabiex jinkludu informazzjoni u data dwar in-nisa fl-edukazzjoni u fil-karrieri STEM u biex tiżviluppa sett ta' għodod li jinkludi metodoloġiji, indikaturi u oqfsa biex tiġi prodotta data aktar preċiża u jittejjeb l-użu ta' informazzjoni eżistenti;

7.  Jistieden lill-Istati Membri joffru l-appoġġ sħiħ tagħhom għall-inizjattivi tal-Kummissjoni ta' sensibilizzazzjoni dwar l-opportunitajiet diġitali bħall-approċċ "no women, no panel", il-Ġimgħa Ewropea tal-Ikkowdjar, il-Koalizzjonijiet għall-Ħiliet u l-Impjiegi Diġitali, il-Premju tal-UE għall-Innovaturi Nisa, l-inizjattivi #SaferInternet4EU madwar l-Ewropa u l-Aġenda għall-Ħiliet għall-Ewropa;

Edukazzjoni

8.  Jilqa' l-Pjan ta' Azzjoni għall-Edukazzjoni Diġitali 2021-2027 u l-azzjoni tiegħu biex "Titħeġġeġ il-parteċipazzjoni tan-nisa fl-iSTEM", u jittama li dan jgħin biex jiġu żviluppati modi aktar attraenti u kreattivi biex il-bniet jiġu mħeġġa jsegwu l-istudji STEM, kif ukoll biex tissaħħaħ il-fiduċja tan-nisa fil-ħiliet diġitali tagħhom; jisħaq li l-bniet jirrappreżentaw biss 36 % tal-gradwati STEM(18) minkejja prestazzjoni aħjar mis-subien fil-litteriżmu diġitali(19); jenfasizza li l-bniet li jassimilaw l-istereotipi tal-ġeneru għandhom livelli aktar baxxi ta' awtoeffikaċja u inqas fiduċja fil-kapaċità tagħhom mis-subien u li l-awtoeffikaċja għandha impatt konsiderevoli kemm fuq l-eżiti tal-edukazzjoni STEM kif ukoll fuq l-aspirazzjonijiet għall-karrieri STEM; jisħaq li jidher li l-bniet aktar ma jikbru aktar jitilfu l-interess fis-suġġetti STEM, u dan juri li huma meħtieġa interventi fi stadju bikri, jiġifieri fl-edukazzjoni preprimarja u fl-iskola primarja sabiex jinżamm l-interess tal-bniet f'dawn l-oqsma u jiġu miġġielda l-istereotipi ta' ħsara dwar ir-rwoli tal-ġeneri kemm għall-bniet kif ukoll għas-subien; jistieden lill-Kummissjoni u lill-Istati Membri joħolqu mezzi ġodda biex ikollhom kuntatt mal-bniet u jiżguraw li l-edukazzjoni diġitali tilħaqhom kollha, u jirrikonoxxu u jinvestu fl-għalliema bħala l-ixpruni tal-bidla kulturali minħabba l-potenzjal tagħhom li jagħtu spinta lill-parteċipazzjoni kontinwa tal-bniet fix-xjenza fl-iskola; jissuġġerixxi li dawn l-isforzi għandhom jiżdiedu bl-iżvilupp ta' linji gwida komuni għall-Istati Membri bl-għan li jittejbu l-għarfien u l-ħiliet ta' dawk li jibdew l-edukazzjoni sekondarja; jappella għall-użu effiċjenti tal-fondi, il-programmi u l-istrateġiji tal-UE inklużi Erasmus+, il-Fond Soċjali Ewropew Plus (FSE+) u l-Programm Ewropa Diġitali sabiex il-bniet jiġu mħeġġa b'mod attiv jistudjaw is-suġġetti tal-ICT u l-iSTEM u biex jiġi pprovdut appoġġ effettiv għat-tagħlim u t-taħriġ tul il-ħajja fis-setturi STEM; jitlob li l-ugwaljanza bejn il-ġeneri tiġi inkorporata kif xieraq fl-istrateġija u l-politiki futuri tal-UE dwar iż-żgħażagħ;

9.  Jisħaq li edukazzjoni diġitali ta' kwalità għolja, inklużiva u nondiskriminatorja trid tiżvolġi rwol sostanzjali fiż-żieda tal-parteċipazzjoni tal-bniet u n-nisa fl-ICT u f'oqsma relatati mal-iSTEM u l-eliminazzjoni tad-differenza diġitali bejn il-ġeneri; jenfasizza li l-edukazzjoni diġitali trid toħloq inklużjoni diġitali u litteriżmu diġitali aħjar u tiżgura l-parteċipazzjoni ugwali tal-bniet u n-nisa fl-era diġitali; jissottolinja l-importanza li tiġi żgurata l-integrazzjoni tal-perspettiva tal-ġeneri fl-edukazzjoni STEM fil-livelli kollha, inkluża l-edukazzjoni ekstrakurrikulari, informali u mhux formali, anke għall-għalliema; jappella, għalhekk, għal strateġiji speċifiċi skont l-età; iħeġġeġ lill-Istati Membri jippromwovu l-edukazzjoni dwar ix-xjenza tal-kompjuter fil-kurrikuli nazzjonali u jistieden lill-korpi edukattivi jintegraw is-suġġetti tar-robotika, l-ikkowdjar, l-ICT u l-ipprogrammar fi stadju aktar bikri tal-edukazzjoni preprimarja u primarja sabiex jinkoraġġixxu lill-bniet u lill-istudenti nisa biex jagħżlu l-matematika, l-ikkowdjar, il-klassijiet tal-ICT u s-suġġetti tax-xjenza fl-iskola;

10.  Jirrikonoxxi r-rwol tal-iskejjel u tal-għalliema fl-eliminazzjoni tad-differenza bejn il-ġeneri fl-edukazzjoni STEM, u jenfasizza r-rwol tal-edukazzjoni fil-promozzjoni tal-preżenza tal-bniet f'korsijiet relatati mal-iSTEM u fl-istabbiliment ta' punti ta' riferiment għall-monitoraġġ tar-reklutaġġ u ż-żamma tan-nisa; jistieden lill-Istati Membri jinvestu fl-iżvilupp tal-ħiliet tal-għalliema STEM fil-livell primarju u sekondarju biex jgħinuhom jifhmu u jindirizzaw prekunċetti mhux konxji fil-prattiki u l-valutazzjonijiet tat-tagħlim tagħhom u jinvolvu lill-istudenti kollha b'mod ugwali; jenfasizza l-ħtieġa li l-Istati Membri jinvolvu l-professjoni kollha tat-tagħlim fil-movimenti STEM u jinvolvu lill-għalliema bħala aġenti tal-bidla; jipproponi li l-pjanijiet ta' ugwaljanza jitfasslu mill-istabbilimenti edukattivi biex jippromwovu l-bilanċ bejn il-ġeneri fost l-għalliema; jitlob li l-kurrikuli u l-materjal edukattiv STEM jissaħħu sabiex tiġi promossa aħjar il-parteċipazzjoni ugwali fl-iSTEM; jitlob li jkun hemm gwida aħjar għall-karrieri u għal modi ġodda u kreattivi biex jispiraw lill-istudenti nisa biex jikkunsidraw karriera STEM; jenfasizza l-ħtieġa, f'dan ir-rigward, li tissaħħaħ il-kapaċità tal-għalliema u tal-konsulenti tal-karrieri biex iħeġġu lill-bniet li juru interess fl-iSTEM biex isegwu karriera f'dan il-qasam, peress li għarfien aħjar tal-istereotipi u tad-differenzi bejn il-ġeneri fl-iSTEM jippermetti lill-edukaturi u l-konsulenti tal-karrieri jifhmu l-ostakli li jiffaċċjaw l-istudenti tagħhom, jiżguraw parteċipazzjoni ugwali fil-klassijiet STEM u jippromwovu l-karrieri STEM għall-istudenti nisa;

11.  Jenfasizza l-fatt li l-għalliema rġiel u persunal maskili ieħor jiddominaw l-istudji relatati mal-iSTEM fl-iskejjel, fl-universitajiet u fil-postijiet tax-xogħol, u dan iwassal għal nuqqas ta' mudelli eżemplari femminili u opportunitajiet limitati ta' gwida u mentoraġġ; iħeġġeġ l-integrazzjoni tal-perspettiva tal-ġeneri fl-edukazzjoni primarja, sekondarja u terzjarja permezz ta' kontenut edukattiv, taħriġ għall-għalliema u kurrikuli sensittivi għal kwistjonijiet ta' ġeneru, u jħeġġeġ lill-kumitati u lill-istituzzjonijiet involuti fir-reklutaġġ jippromwovu l-bilanċ bejn il-ġeneri biex jiġi evitat l-effett ta' nuqqas ta' appartenenza ("outsider effect"); jenfasizza l-ħtieġa għal investiment fl-edukazzjoni u t-taħriġ bi proċessi ta' reklutaġġ u għażla sensittivi għal kwistjonijiet ta' ġeneru fis-setturi edukattivi kollha, speċjalment fl-iSTEM u f'setturi diġitali emerġenti, fejn in-nisa huma sottorappreżentati; jistieden lill-Kummissjoni u lill-Istati Membri jsibu modi aktar attraenti u kreattivi biex juru mudelli eżemplari femminili b'karrieri ta' suċċess fl-ICT u l-iSTEM sabiex tissaħħaħ il-fiduċja tal-bniet fil-ħiliet diġitali u jiġu mħeġġa jsegwu studji relatati mal-ICT u l-iSTEM;

12.  Jisħaq fuq il-ħtieġa li tiġi indirizzata l-edukazzjoni finanzjarja, inklużi simulazzjonijiet ta' prattiki finanzjarji, u r-relazzjoni tagħha mad-differenza bejn il-ġeneri fil-pensjonijiet; jenfasizza li l-fatt li n-nisa żgħażagħ jitgħallmu dwar suġġetti bħad-differenza bejn il-ġeneri fil-pagi se jwitti t-triq mimli b'nisa finanzjarjament sikuri;

13.  Jinnota li l-bniet kollha għandhom ikunu jistgħu jieħdu vantaġġ minn aċċess akbar għal soluzzjonijiet ta' tagħlim diġitali mill-aqwa u għandu jkollhom l-għodod u l-motivazzjonijiet biex jinvolvu ruħhom fit-teknoloġiji diġitali bħala utenti u kreaturi; jistieden lill-Istati Membri jqisu t-tħassib kontinwu dwar ir-riskju ta' tixrid ulterjuri tal-COVID-19 u jindirizzaw in-nuqqas ta' tagħmir tal-ICT u konnettività għal studenti vulnerabbli minn kuntesti soċjoekonomikament żvantaġġati, bħal bniet f'żoni rurali jew f'żoni li diffiċli jintlaħqu, u jiżviluppaw għodod li jiżguraw aċċess sħiħ għall-edukazzjoni diġitali u l-funzjonament bla xkiel tagħha; jenfasizza l-ħtieġa ta' programmi ta' finanzjament speċjali għall-iskejjel f'żoni rurali, li qed isibu ruħhom dejjem aktar mingħajr il-finanzjament għal teknoloġiji avvanzati li ħafna distretti tal-iskejjel urbani jieħdu bħala fatt; jitlob, barra minn hekk, appoġġ aħjar għall-edukaturi fis-sistemi tal-iskejjel rurali biex jgħinhom jgħallmu l-kurrikuli STEM, b'mod partikolari fir-rigward tat-taħriġ, l-għodod u l-infrastruttura;

14.  Jissottolinja l-importanza li jiġu żviluppati networks għan-nisa professjonisti STEM għal kampanji ta' komunikazzjoni fuq skala kbira biex jgħinu jittrasformaw il-perċezzjonijiet tan-nisa tal-iSTEM u għan-nisa fl-iSTEM biex jikkomunikaw mal-bniet permezz ta' appoġġ għall-karrieri, taħriġ fil-ħiliet u networking; ifaħħar id-diversi inizjattivi edukattivi mfassla biex jappoġġjaw lill-bniet u jippromwovu lin-nisa fl-ekonomija diġitali, inkluż l-użu ta' stejjer virali fuq il-midja soċjali, networks professjonali organizzati min-nisa, għan-nisa, u inizjattivi minn kumpaniji tat-teknoloġija; jistieden lill-Kummissjoni u lill-Istati Membri jistabbilixxu skemi ta' mentoraġġ li jkollhom mudelli eżemplari femminili fl-iSTEM fil-livelli kollha tal-edukazzjoni; jistieden lill-Kummissjoni tadotta approċċ immirat fir-rigward tal-ġeneri fil-qafas tat-traineeships għal opportunitajiet diġitali biex tagħti lin-nisa żgħażagħ minn kuntesti differenti l-opportunità li jiksbu esperjenza prattika diġitali, tal-ICT u l-iSTEM f'oqsma li huma mitluba fis-suq tax-xogħol, u jħeġġeġ bil-qawwa l-promozzjoni ta' internships f'negozji STEM matul l-edukazzjoni; iħeġġeġ lill-Istati Membri joħolqu inizjattivi li jappoġġjaw it-tranżizzjoni mill-iskola għax-xogħol tal-bniet, bħal gwida dwar il-karrieri fl-iskejjel, apprendistati u programmi ta' esperjenza ta' xogħol, bil-ħsieb li jiġu appoġġjati l-aspirazzjonijiet futuri tal-bniet u jinħolqu mogħdijiet għalihom għat-tranżizzjoni lejn il-forza tax-xogħol STEM;

15.  Jinnota li fil-konklużjonijiet tiegħu ta' Mejju 2015 dwar il-Pjan Direzzjonali 2015-2020 għaż-Żona Ewropea tar-Riċerka, il-Kunsill stieden – għalxejn – lill-Kummissjoni u lill-Istati Membri biex jibdew isarrfu l-leġiżlazzjoni nazzjonali dwar l-ugwaljanza f'azzjoni effettiva sabiex jiġġieldu kontra l-iżbilanċi bejn il-ġeneri fl-istituzzjonijiet tar-riċerka u l-korpi deċiżjonali u jintegraw aħjar id-dimensjoni tal-ġeneru fil-politiki, il-programmi u l-proġetti tar-riċerka u l-iżvilupp; jirrikonoxxi l-objettiv tal-Kummissjoni li tħeġġeġ il-parteċipazzjoni tan-nisa fl-iSTEM mal-Istitut Ewropew tal-Innovazzjoni u t-Teknoloġija u tappoġġja l-Koalizzjoni STEM tal-UE biex tiżviluppa kurrikuli tal-edukazzjoni għolja li jattiraw lin-nisa lejn l-inġinerija u l-ICT; jiddispjaċih għall-fatt li l-aċċess inugwali għan-nisa għall-pożizzjonijiet ta' riċerka, għall-finanzjament u l-ippubblikar għadu jippersisti, inkluża differenza mhux aġġustata bejn il-ġeneri fil-pagi fix-xjenza u l-akkademja, minkejja d-dispożizzjonijiet legali għal trattament ugwali u n-nondiskriminazzjoni fis-suq tax-xogħol, inkluż dwar il-paga ugwali, fis-seħħ fl-UE u fl-Istati Membri;

16.  Jenfasizza l-għadd ta' każijiet ta' fastidju sesswali mġarrab minn studenti nisa fl-oqsma STEM fl-edukazzjoni terzjarja, u jistieden lill-Istati Membri u lill-istituzzjonijiet edukattivi jistabbilixxu politiki ta' tolleranza żero għall-fastidju sesswali, jaqblu dwar kodiċijiet ta' kondotta u protokolli stretti, joħolqu kanali sikuri u privati ta' rapportar għan-nisa u l-bniet, u jirrapportaw il-każijiet kollha ta' fastidju sesswali lill-awtoritajiet rilevanti; jistieden lill-Kummissjoni, lill-Istati Membri u lill-istituzzjonijiet edukattivi jadottaw miżuri preventivi u sanzjonijiet adegwati għal min iwettaq fastidju sesswali sabiex jiġi indirizzat il-fastidju sesswali fl-iskejjel u fil-faċilitajiet edukattivi STEM;

17.  Jenfasizza l-ħtieġa li fil-pjanijiet ta' żvilupp nazzjonali u fil-politiki tas-settur tal-edukazzjoni, l-ICT u x-xjenza jiġu inklużi opportunitajiet ta' tagħlim u karrieri fl-iSTEM reattivi għal kwistjonijiet ta' ġeneru;

Karrieri

18.  Jiddispjaċih għall-fatt li n-nisa jiffaċċjaw ostakli sproporzjonatament akbar mill-irġiel fil-karrieri tagħhom, minħabba n-nuqqas ta' bilanċ xieraq bejn ix-xogħol u l-ħajja privata u żieda fix-xogħol ta' indukrar mhux imħallas fil-biċċa l-kbira tal-unitajiet domestiċi; jinnota li l-pandemija tal-COVID-19 kompliet tiggrava s-sitwazzjoni tan-nisa, li kellhom jibbilanċjaw is-sahra tax-xogħol mill-bogħod filwaqt li jieħdu ħsieb it-tfal u jagħmlu xogħol ta' indukrar bla ħlas; jilmenta dwar l-impatt partikolarment negattiv tal-kultura "dejjem disponibbli" fuq il-bilanċ bejn ix-xogħol u l-ħajja privata tal-ħaddiema b'responsabbiltajiet ta' indukrar, li għandhom tendenza li jkunu nisa; iħeġġeġ lill-istituzzjonijiet pubbliċi u privati jiżguraw li t-telexogħol iqis l-ostakli għaż-żamma ta' bilanċ aħjar bejn ix-xogħol u l-ħajja privata u jirrispetta d-dritt għall-iskonnessjoni, u jadottaw politiki favur il-familja; iħeġġeġ lill-Istati Membri jistabbilixxu miżuri adegwati biex jiggarantixxu politiki ta' tolleranza żero għall-fastidju sesswali, liv tal-maternità aħjar, ferm iżjed liv tal-paternità, u liv tal-ġenituri mħallas u mhux trasferibbli li jippermettu lin-nisa u l-irġiel jieħdu ħin frank biex jieħdu ħsieb lil uliedhom, u li jiġġieldu kontra n-norma li l-mara tkun il-ġenitur li tieħu pawża fil-karriera sabiex jingħeleb ostaklu enormi għan-nisa li javvanzaw fil-karrieri tagħhom filwaqt li jiġu żgurati ħinijiet tax-xogħol flessibbli, faċilitajiet tal-kura tat-tfal fuq il-post u telexogħol; iħeġġeġ lill-Istati Membri jittrasponu u jimplimentaw bis-sħiħ id-Direttiva dwar il-Bilanċ bejn ix-Xogħol u l-Ħajja Privata(20) u jistieden lill-Kummissjoni tiżgura li jkun hemm segwitu effettiv; jistieden lill-Kummissjoni u lill-Istati Membri jivvalutaw bis-sħiħ il-kawżi u l-fatturi li jwasslu għal rata għolja fost in-nisa li jitilqu minn karrieri STEM, jifformulaw rakkomandazzjonijiet għal azzjoni biex jipprevjenu dan, jekk ikun meħtieġ, u jiżviluppaw mekkaniżmi u programmi li jinvolvu lin-nisa u l-bniet f'inizjattivi ta' edukazzjoni, taħriġ u impjieg u jadottaw politiki u miżuri adegwati għal dan il-għan; jenfasizza li l-COVID-19 qed tiftaħ kapitlu ġdid fid-dinja tax-xogħol, l-edukazzjoni, il-governanza u l-ħajja ta' kuljum u enfasizzat l-importanza partikolari tal-litteriżmu u l-ħiliet diġitali u l-ħtieġa għal kundizzjonijiet ġodda dwar it-telexogħol, li wrew distakk sinifikanti bejn il-ġeneri matul il-pandemija u l-lockdowns konsegwenti; jenfasizza l-ħtieġa urġenti li jiġi promoss il-bilanċ bejn il-ġeneri fis-settur diġitali meta wieħed iqis kif in-nies u l-kumpaniji jużaw l-ICT u teknoloġiji diġitali oħra biex jaħdmu u jinteraġixxu fis-soċjetà diġitali l-ġdida;

19.  Iqis li hija tal-akbar importanza li jkun hemm aktar mudelli eżemplari femminili u li jiżdied in-numru ta' nisa f'pożizzjonijiet ta' tmexxija fis-settur STEM; jisħaq li l-perċentwal li qed jonqos ta' nisa f'pożizzjonijiet ogħla għandu effett negattiv fuq ir-reklutaġġ tan-nisa, li jkompli jnaqqas il-probabbiltà li n-nisa jinħatru f'pożizzjonijiet ogħla; jiddispjaċih għall-fatt li n-nisa huma sottorappreżentati f'pożizzjonijiet ta' tmexxija fil-karrieri STEM, u jenfasizza l-ħtieġa urġenti li tiġi promossa l-ugwaljanza bejn il-ġeneri fil-livelli kollha tal-proċess deċiżjonali fl-oqsma tan-negozju u tal-maniġment; jissottolinja li d-diversità tal-ġeneru fil-bordijiet u f'pożizzjonijiet deċiżjonali ttejjeb il-prestazzjoni tan-negozji b'riżultat ta' spettru usa' ta' għarfien, attitudnijiet u esperjenza; jiddeplora l-eżistenza kemm tas-segregazzjoni orizzontali kif ukoll vertikali tal-ġeneri fil-ġerarkiji tal-universitajiet u l-iskejjel fl-Ewropa; jiġbed l-attenzjoni għall-fatt li n-nisa huma partikolarment sottorappreżentati fl-ogħla pożizzjonijiet akkademiċi u f'dawk tal-proċess deċiżjonali fl-istituzzjonijiet akkademiċi u fl-universitajiet u dan jindika l-eżistenza ta' saqaf tal-ħġieġ, jiġifieri ostakli inviżibbli ta' preġudizzju li jipprevjenu lin-nisa milli jilħqu pożizzjonijiet ta' responsabbiltà; iħeġġeġ lill-Kunsill u lill-Istati Membri jadottaw id-Direttiva proposta dwar in-Nisa fuq il-Bordijiet u jistabbilixxu miri għall-bilanċ bejn il-ġeneri fil-korpi deċiżjonali;

20.  Jiddispjaċih għall-fatt li d-differenza bejn il-ġeneri fil-pagi għadha realtà u hija saħansitra aktar evidenti fis-setturi ddominati mill-irġiel, bħall-ICT u l-kumpaniji teknoloġiċi(21); jistieden lill-atturi kollha jipprattikaw it-trasparenza fil-pagi; iħeġġeġ lill-Kunsill jiżblokka d-direttiva proposta dwar l-implimentazzjoni tal-prinċipju ta' trattament ugwali bejn il-persuni irrispettivament mir-reliġjon jew it-twemmin, id-diżabilità, l-età jew l-orjentazzjoni sesswali, li għandha l-għan li testendi l-protezzjoni kontra d-diskriminazzjoni permezz ta' approċċ orizzontali;

21.  Jistieden lill-partijiet ikkonċernati rilevanti kollha jindirizzaw id-diskriminazzjoni fil-prattiki ta' reklutaġġ tagħhom u jintroduċu kwoti biex jippromwovu l-inklużjoni tan-nisa, speċjalment nisa minn kuntesti razzjali u etniċi differenti, nisa b'diżabilità u persuni LGBTI+;

22.  Jinkoraġġixxi l-istabbiliment ta' djalogu inklużiv mal-partijiet ikkonċernati rilevanti, bħall-kumpaniji privati, l-organizzazzjonijiet mhux governattivi, l-ordnijiet u l-istituti professjonali, l-istituzzjonijiet statali, l-awtoritajiet reġjonali u lokali, dawk li jfasslu l-politika u r-rappreżentanti tas-soċjetà ċivili sabiex jikkoordinaw u jindirizzaw il-konnessjonijiet neqsin biex jippromwovu n-nisa fl-iSTEM; jisħaq li fid-dawl tal-importanza assoluta tal-ġlieda kontra l-istereotipi kulturali u soċjali kontra l-kapaċitajiet u r-rwoli tan-nisa fis-settur STEM, għandhom jiġu adottati miżuri mmirati biex jippromwovu l-ugwaljanza bejn il-ġeneri bħal leġiżlazzjoni dwar l-integrazzjoni tal-perspettiva tal-ġeneri jew politiki bħal inċentivi finanzjarji jew miżuri oħra sabiex tiżdied il-parteċipazzjoni tal-bniet fl-edukazzjoni u l-karrieri STEM; jitlob li jiġu pprovduti inċentivi lill-kumpaniji li jappoġġjaw mudelli eżemplari femminili, programmi ta' mentoraġġ u perkorsi tal-karriera, u li tiżdied il-viżibbiltà tan-nisa; jirrikonoxxi r-rwol essenzjali li għandhom ċerti CEOs u persuni maniġerjali superjuri biex jeliminaw id-differenza diġitali bejn il-ġeneri billi jiżviluppaw politiki korporattivi mmirati lejn il-ġlieda kontra l-istereotipi diġitali relatati mal-ġeneru, jippromwovu mudelli eżemplari, jimmotivaw lin-nisa biex jesploraw l-istudji STEM, jistimulaw it-taħriġ mill-ġdid jew it-titjib tal-ħiliet tan-nisa, jippromwovu skemi ta' mentoraġġ, u jtejbu l-immaġni tal-impjiegi tal-ICT; jistieden lill-Kummissjoni u lill-Istati Membri jkomplu jimpenjaw ruħhom mas-sħab kummerċjali fl-oqsma tal-ICT, tat-telekomunikazzjoni, tal-midja, u f'dawk diġitali, awdjoviżivi u teknoloġiċi kollha biex jippromwovu kultura u ambjent tax-xogħol inklużivi u bbilanċjati bejn il-ġeneri, inkluż billi jintroduċu miżuri bħal kampanji ta' sensibilizzazzjoni biex tiġi promossa l-ugwaljanza bejn il-ġeneri fis-setturi privati STEM u sħubijiet pubbliċi-privati biex jiġi ffaċilitat l-aċċess għas-suq tax-xogħol STEM għal studenti li għadhom kemm gradwaw, bil-promozzjoni ta' skemi ta' apprendistat u ta' internships għal bniet u nisa żgħażagħ biex tissaħħaħ it-tranżizzjoni tagħhom għas-suq tax-xogħol, permezz ta' tali inizjattivi bħal mentoraġġ u boroż ta' studju u sħubijiet pubbliċi-privati bejn sistemi tal-edukazzjoni, gvernijiet u kumpaniji li jaħdmu fil-qasam tat-teknoloġiji emerġenti, bħat-teknoloġiji 3D, l-IA, in-nanoteknoloġija, ir-robotika u t-terapija ġenetika, u jaqsmu l-informazzjoni u l-prattiki tajbin fl-Istati Membri kollha għal dan il-għan;

23.  Jenfasizza r-relazzjoni bejn id-differenza bejn il-ġeneri u d-differenza bejn il-pensjonijiet; jistieden lill-Istati Membri, għalhekk, jindirizzaw u jnaqqsu dawn id-differenzi u jieħdu passi ulterjuri biex jiżguraw li n-nisa jkunu jistgħu jiksbu aċċess adegwat għall-edukazzjoni, l-opportunità li jiksbu indipendenza ekonomika u opportunitajiet ta' progress fil-karriera;

Settur diġitali

24.  Jiddispjaċih għall-fatt li d-differenza bejn il-ġeneri teżisti fl-oqsma kollha tat-teknoloġija diġitali, iżda huwa partikolarment imħasseb dwar id-differenza bejn il-ġeneri fit-teknoloġiji innovattivi, bħall-oqsma tal-IA u taċ-ċibersigurtà, fejn il-preżenza femminili medja madwar id-dinja hija ta' 12 % u 20 % rispettivament(22); jipproponi li għandhom jingħataw aktar attenzjoni u appoġġ liż-żoni skarsament popolati u b'mod partikolari lil żoni rurali, fejn din is-sitwazzjoni qed tiggrava;

25.  Jisħaq li l-kwalità tas-settijiet ta' data użati hija ta' importanza kbira għall-prestazzjoni tat-teknoloġiji tal-IA, li l-IA ma tridx issaħħaħ l-inugwaljanzi u l-istereotipi tal-ġeneru billi tittrasforma l-preġudizzju mill-isfera analoga għal dik diġitali abbażi tal-algoritmi, u li l-IA tista' tikkontribwixxi b'mod sinifikanti għall-promozzjoni tal-ugwaljanza bejn il-ġeneri, dment li jiġi żviluppat qafas legali xieraq u jiġu eliminati preġudizzji konxji u mhux konxji; jenfasizza li waħda mill-aktar dgħufijiet kritiċi tal-IA hija relatata ma' ċerti tipi ta' preġudizzji bħall-ġeneru, l-età, id-diżabilità, ir-reliġjon jew l-oriġini etnika, l-isfond soċjali jew l-orjentazzjoni sesswali bħala riżultat ta' forza tax-xogħol omoġena; jinnota li t-tipi intersezzjonali ta' diskriminazzjoni jħallu lin-nisa marġinalizzati mit-teknoloġiji emerġenti, bħan-nisa ta' kulur li huma esklużi minħabba żbalji fit-teknoloġija tar-rikonoxximent tal-wiċċ; jenfasizza l-ħtieġa li jkun hemm diversi timijiet ta' żviluppaturi u inġiniera li jaħdmu flimkien mal-atturi ewlenin tas-soċjetà biex jiġi evitat li l-preġudizzji bbażati fuq il-ġeneru u l-kultura jiġu inklużi fl-algoritmi, fis-sistemi u fl-applikazzjonijiet tal-IA minħabba nuqqas ta' attenzjoni; jappoġġja l-ħolqien ta' kurrikuli edukattivi u attivitajiet ta' sensibilizzazzjoni pubblika li jikkonċernaw l-impatt soċjetali, legali u etiku tal-IA; jistieden lill-Kummissjoni u lill-Istati Membri jieħdu l-miżuri possibbli kollha biex jevitaw tali preġudizzji u jiżguraw il-protezzjoni sħiħa tad-drittijiet fundamentali; jisħaq li l-infrastruttura ta' sorveljanza mill-bniedem trid tiġi żviluppata qabel ma jiġu introdotti teknoloġiji tal-IA f'setturi b'riskju għoli, b'mod partikolari s-saħħa, u trid tinkludi esperti dwar l-ugwaljanza bejn il-ġeneri;

26.  Jirrikonoxxi li l-IA, jekk tkun ħielsa minn preġudizzji sottostanti, tista' tkun għodda b'saħħitha biex jingħelbu l-inugwaljanzi u l-istereotipi tal-ġeneru permezz tal-iżvilupp ta' algoritmi imparzjali u etiċi mid-disinn li jikkontribwixxu għall-ekwità u l-benesseri ġenerali; jisħaq fuq l-importanza ta' approċċ komuni Ewropew fir-rigward tal-aspetti etiċi tal-IA; jisħaq, barra minn hekk, li l-politika u l-leġiżlazzjoni tal-UE dwar l-IA jridu jirrispettaw il-valuri Ewropej, it-Trattati u l-liġijiet tal-UE, u l-prinċipji tal-Pilastru Ewropew tad-Drittijiet Soċjali;

27.  Jitlob li l-IA u l-awtomatizzazzjoni jkunu soċjalment responsabbli u jitfasslu b'tali mod li jippermettulna negħlbu l-inugwaljanzi inkluża d-diskriminazzjoni abbażi tal-ġeneru u nindirizzaw l-isfidi li jħabbtu wiċċhom magħhom in-nisa bħax-xogħol ta' indukrar bla ħlas, id-differenza bejn il-ġeneri fil-pagi, il-bullying ċibernetiku, il-vjolenza abbażi tal-ġeneru u l-fastidju sesswali, it-traffikar, il-ksur tad-drittijiet sesswali u riproduttivi, u s-sottorappreżentanza f'pożizzjonijiet ta' tmexxija; jitlob li l-IA u l-awtomatizzazzjoni jikkontribwixxu għat-tisħiħ tas-saħħa u l-prosperità ekonomika tan-nisa, l-ugwaljanza tal-opportunitajiet, id-drittijiet tal-ħaddiema u dawk soċjali, l-edukazzjoni ta' kwalità, il-protezzjoni tat-tfal, id-diversità kulturali u lingwistika, l-ugwaljanza bejn il-ġeneri, il-litteriżmu diġitali, l-innovazzjoni u l-kreattività, inkluż l-aċċess għall-finanzi, l-edukazzjoni għolja u opportunitajiet ta' xogħol flessibbli; jistieden lill-Kummissjoni tgħin lill-awtoritajiet kompetenti tal-Istati Membri jagħtu attenzjoni partikolari lil forom ġodda ta' vjolenza abbażi tal-ġeneru bħall-fastidju ċibernetiku u s-cyberstalking(23) u jwettqu evalwazzjonijiet kontinwi u jindirizzaw dawn il-kwistjonijiet b'mod aktar effettiv;

Intraprenditorija u aċċess għall-finanzjament

28.  Jiddispjaċih għall-fatt li n-nisa huma sottorappreżentati f'negozji ġodda mmexxija mill-innovazzjoni u jenfasizza l-preġudizzji tal-ġeneru u l-iżvantaġġi sistemiċi li jeżistu fl-istrutturi soċjali, b'mod partikolari f'dawk li jinsabu fl-intersezzjoni tal-iSTEM u l-intraprenditorija; iqis li hija tal-akbar importanza li jkun hemm aktar mudelli eżemplari femminili u li jiżdied in-numru ta' nisa f'pożizzjonijiet ta' tmexxija fis-settur STEM; jistieden lill-Kummissjoni u lill-Istati Membri jadottaw politiki li jappoġġjaw u jisfruttaw il-potenzjal intraprenditorjali tan-nisa, li jibqgħu sors mhux sfruttat ta' tkabbir ekonomiku, innovazzjoni u ħolqien tal-impjiegi, jipprovdu aktar informazzjoni u informazzjoni aħjar dwar l-intraprenditorija bħala għażla ta' karriera attraenti, speċjalment għan-nisa żgħażagħ fl-iskola, u jimplimentaw politiki pubbliċi li jippromwovu l-intraprenditorija femminili; iqis li l-irkupru mill-COVID-19 jirrappreżenta opportunità sinifikanti biex l-intraprendituri nisa javvanzaw, biex ikunu jistgħu jibnu mill-ġdid l-ekonomiji u s-soċjetajiet tagħna; jissottolinja li rkupru ġenwin mill-COVID-19 se jkun suċċess biss jekk tinkiseb Ewropa aktar ekoloġika, aktar ġusta u aktar ugwali mil-lat tal-ġeneri u tiġi żgurata l-integrazzjoni adegwata tal-perspettiva tal-ġeneri tal-fondi ta' rkupru tal-UE, filwaqt li jiġi żgurat ukoll li n-nisa jgawdu l-benefiċċji sħaħ f'termini ta' impjiegi u intraprenditorija f'setturi fejn tradizzjonalment kienu u għadhom sottorappreżentati b'mod sinifikanti, inklużi s-settur diġitali u dawk tal-IA, l-ICT u l-iSTEM;

29.  Iqis li s-sottorappreżentanza tan-nisa inkarigati minn deċiżjonijiet ta' investiment fid-ditti ta' kapital ta' riskju tikkostitwixxi sors ewlieni tad-diskrepanza persistenti fil-finanzjament għan-negozji l-ġodda u l-intrapriżi mmexxija min-nisa;

30.  Jistieden lill-Kummissjoni u lill-Istati Membri jżidu l-opportunitajiet ta' finanzjament għal self u finanzjament mill-bejgħ ta' ishma għall-imprendituri nisa li jibdew negozji ġodda u għall-innovaturi nisa permezz ta' fondi u programmi tal-UE, jiffaċilitaw l-aċċess tan-nisa għall-fondi eżistenti, joħolqu fondi speċjali u jfittxu modi ġodda u innovattivi biex jappoġġjaw finanzjarjament lin-nisa u jgħinuhom jegħlbu l-ostakli li jiffaċċjaw; jitlob li l-Bank Ewropew tal-Investiment jiġi inkluż ukoll fir-rigward tal-aċċess għall-mikrofinanzjament; jirrikonoxxi l-ħtieġa għal kampanji ta' sensibilizzazzjoni u ta' informazzjoni dwar il-possibbiltajiet ta' finanzjament tal-UE biex jiġi pprovdut appoġġ imfassal apposta għal sidien ta' negozji nisa u intraprendituri nisa; jitlob li n-Network Ewropew tal-Investituri Informali u n-Network Ewropew ta' Mentors għall-Imprendituri Nisa jiġu estiżi aktar, inkluż billi jiġu promossi laqgħat ta' innovaturi nisa, professjonisti tat-teknoloġija u investituri biex jistimulaw u jagħtu spinta lill-innovazzjoni u l-finanzjament għal impriżi mmexxija min-nisa;

31.  Jilqa' l-inizjattiva tal-Kummissjoni li tistabbilixxi l-Premju tal-UE għall-Innovaturi Nisa, li jingħata kull sena lil nisa Ewropej li jkunu waqqfu kumpanija ta' suċċess u li jkunu ġabu innovazzjoni fis-suq; jistieden lill-Kummissjoni u lill-Istati Membri jsibu modi addizzjonali biex iħeġġu lil aktar nisa jibdew il-kumpaniji tagħhom stess u jagħtu ġieħ lill-mexxejja nisa ta' ispirazzjoni fil-qasam tal-innovazzjoni;

32.  Jistieden lill-Kummissjoni u lill-Istati Membri jimplimentaw id-Dikjarazzjoni ta' Impenn dwar in-Nisa fid-Dinja Diġitali adottata f'April 2019 u jiżviluppaw azzjonijiet konkreti biex jippromwovu l-ugwaljanza bejn il-ġeneri fis-settur STEM, inkluż il-ħolqien ta' Jum Ewropew tal-Bniet fl-ICT u l-iSTEM; jistieden lill-Kummissjoni timmonitorja u tirrapporta dwar l-isforzi u l-azzjonijiet tal-Istati Membri u tiżgura l-iskambju ta' informazzjoni u prattiki tajba;

o
o   o

33.  Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

(1) ĠU C 316, 22.9.2017, p. 173. (2) ĠU C 349, 17.10.2017, p. 56. (3) ĠU C 66, 21.2.2018, p. 44. (4) ĠU C 390, 18.11.2019, p. 28. (5) Testi adottati, P9_TA(2021)0026. (6) Studju – "Education and employment of women in science, technology and the digital economy, including AI and its influence on gender equality", il-Parlament Ewropew, Direttorat Ġenerali għall-Politiki Interni, Dipartiment Tematiku C – Id-Drittijiet taċ-Ċittadini u l-Affarijiet Kostituzzjonali, 15 ta April 2020. (7) Studju mħejji minn iclaves għad-Direttorat Ġenerali għan-Networks tal-Komunikazzjonijiet, il-Kontenut u t-Teknoloġija, Kummissjoni Ewropea. (8) Eurostat, Statistika tal-edukazzjoni terzjarja, data estratta f'Settembru 2020. (9) Eurostat, Riżorsi umani fix-xjenza u t-teknoloġija, data medja annwali 2016-2020. (10) Kummissjoni Ewropea, Tabella ta' valutazzjoni dwar in-Nisa fid-Dinja Diġitali 2020. (11) International Association for the Evaluation of Educational Achievement (IEA), International Computer and Information Literacy Study (ICILS) 2018. (12) O'Dea, R. E., Lagisz, M., Jennions, M. D. et al., "Gender differences in individual variation in academic grades fail to fit expected patterns for STEM", Nature Communications 9, 3777, 2018. (13) Istitut Ewropew għall-Ugwaljanza bejn is-Sessi, Economic benefits of gender equality in the EU: How gender equality in STEM education leads to economic growth, 2017. (14) Aġenzija tal-UE għad-Drittijiet Fundamentali, Violence against women: an EU-wide survey, 2014. (15) Rapport tal-Grupp ta' Esperti "Innovation through Gender", Gendered Innovations: How Gender Analysis Contributes to Research, Direttorat Ġenerali għar-Riċerka u l-Innovazzjoni, Kummissjoni Ewropea, 2013. (16) Organizzazzjoni għall-Kooperazzjoni u l-Iżvilupp Ekonomiċi (OECD), Bridging the digital gender divide: include, upskill, innovate, 2018. (17) Kummissjoni Ewropea u Bank Ewropew tal-Investiment, Funding women entrepreneurs: How to empower growth, 2018. (18) Kummissjoni Ewropea, She Figures 2018. (19) International Computer and Information Literacy Study (ICILS) 2018. (20) Direttiva (UE) 2019/1158 tal-Parlament Ewropew u tal-Kunsill tal-20 ta' Ġunju 2019 dwar il-bilanċ bejn ix-xogħol u l-ħajja privata għall-ġenituri u għall-persuni li jindukraw u li tħassar id-Direttiva tal-Kunsill 2010/18/UE (ĠU L 188, 12.7.2019, p. 79). (21) Lambrecht, A. u Tucker, C. E., "Algorithmic bias? An empirical study into apparent gender-based discrimination in the display of STEM career ads", Management Science, Vol. 65, No 7, 2019, p. 2970. (22) Sax, L. J., Kanny, M. A., Jacobs, J. A. et al., "Understanding the Changing Dynamics of the Gender Gap in Undergraduate Engineering Majors: 1971-2011", Research in Higher Education, Vol. 57, No 5, 2016; Shade, L. R., "Missing in action: Gender in Canada's digital economy agenda" (Nieqsa fl-azzjoni: Il-ġeneru fl-aġenda tal-ekonomija diġitali tal-Kanada), Signs: Journal of Women in Culture and Society, Vol. 39, No 4, 2014, pp. 887-896. (23) Aġenzija tal-UE għad-Drittijiet Fundamentali, Violence against Women: an EU-wide survery (Vjolenza kontra n-nisa: stħarriġ madwar l-UE kollha), 2014, p. 87.