Għajnuna pedagoġika

Il-klassijiet virtwali huma vidjokonferenzi fejn interpreti tal-esperjenza, kemm mill-Parlament Ewropew kif ukoll mill-Kummissjoni, josservaw u jivvalutaw ir-rendiment tal-istudenti tal-interpretazzjoni. Dawn jippermettu lill-istudenti li jipprattikaw l-interpretazzjoni ta' diskorsi simili għal dawk meħtieġa fit-testijiet tal-akkreditazzjoni tal-UE u jirċievu rispons u pariri diretti minn interpreti tal-esperjenza tal-Istituzzjonijiet Ewropej.

Hemm żewġ tipi ta' klassijiet virtwali:

• Il-Klassijiet Virtwali Multilaterali huma vidjokonferenzi u/jew klassijiet li jixxandru permezz tal-internet, organizzati mill-Parlament Ewropew f'kooperazzjoni ma' numru massimu ta' tliet universitajiet. Ir-rendiment huwa vvalutat fi Brussell mill-interpreti funzjonarji mill-Parlament Ewropew, mill-Kummissjoni Ewropea u mill-organizzazzjonijiet internazzjonali oħra.
• Il-Klassijiet Virtwali Bilaterali huma vidjokonferenzi ma'università waħda fejn l-istudenti jiġu vvalutati mill-interpreti funzjonarji tal-PE li joffru input espert. Is-soltu jkun hemm osservatur wieħed mill-Kummissjoni Ewropea.

L-universitajiet iridu jkunu mgħammra b'sistema għall-vidjokonferenzi biex jipparteċipaw f'dan it-tip ta' taħriġ.

Il-klassijiet virtwali jeħtieġu ppjanar dettaljat ta' xenarji u kooperazzjoni mill-qrib bejn l-Istituzzjonijiet u l-universitajiet li jkunu qed jipparteċipaw. L-istudenti li jkunu qed jipparteċipaw għandhom jintgħażlu skont il-potenzjal u l-kombinazzjoni tal-lingwi tagħhom.

Fejn ikun possibbli, interpretu funzjonarju tal-PE ikun preżenti bħala membru sħiħ tal-ġurija matul l-eżamijiet finali għall-interpretazzjoni tal-konferenzi. Din il-preżenza u esperjenza jsaħħu il-panel tal-ġurija u dan jista' jkollu effetti pożitivi għall-università f'termini ta' benchmarking u ffissar ta' standards. Dan juri lill-istudenti u l-awtoritajiet tal-università li entitajiet ewlenin li jimpjegaw huma involuti fil-proċess tal-valutazzjoni u għandhom  interess fil-persuni gradwati.

Dan jippermetti wkoll li jinżammu rabtiet u li jkun hemm monitoraġġ tal-iżviluppi fil-korsijiet differenti.

Meta l-universitajiet jippjanaw l-eżamijiet, għandhom iqisu l-kalendarju tal-laqgħat tal-PE u jevitaw is-sessjonijiet plenarji meta l-persunal ġeneralment ma jkunx disponibbli għal ħidmiet barra mill-Parlament.

Il-Programm Seminarium huwa parti mill-isforzi li qed isiru biex titnaqqas id-differenza bejn il-ħajja universitarja u dik professjonali għall-interpreti tal-konferenzi gradwati.

L-għanijiet tal-programm huma:

• li tiżdied ir-rata ta' nies li jgħaddu mit-testijiet tal-akkreditazzjoni u jgħin biex jiżgura li l-gradwati bil-kombinazzjonijiet tal-lingwi li aħna l-aktar interessati fihom ikollhom l-aħjar ċans possibbli li jirnexxu,
• li jittejjeb il-profil tal-PE bħala post tax-xogħol attraenti,
• li jippruvaw jiżguraw li l-aktar individwi li juru talent ma jintilfux għall-PE u l-professjoni għax jeħlu mill-ewwel test tagħhom u sussegwentement isibu impjieg xi mkien ieħor.

Il-kriterji ta' selezzjoni għall-parteċipanti:

• il-kombinazzjoni tal-lingwi li trid taqbel mal-profil mixtieq,
• ir-rendiment fl-eżamijiet finali tagħhom kif dokumentat mill-eżaminatur estern tagħna.

Il-parteċipanti huma mħarrġa fuq perjodu ta' tliet ġimgħat fi Brussell mill-interpreti funzjonarji u/jew persuni esterni li jħarrġu qabel l-ewwel test ta' akkreditazzjoni tagħhom.

Il-programm isir biss jekk jiġi stabbilit li hemm bżonn reali għalih. Ladarba l-bżonn ikun ġie identifikat, isir kuntatt mal-universitajiet li joffru l-kombinazzjonijiet tal-lingwi li qed infittxu.

Il-servizz tal-interpretazzjoni tal-PE ħerqan li jrawwem rabtiet mal-universitajiet li jħarrġu l-interpreti tal-konferenzi għall-istandards li neħtieġu.

Is-Seminars u l-workshops iġibu flimkien lil kapijiet u lil dawk li jħarrġu fil-korsijiet fl-universitajiet mal-persunal tal-PE u organizzazzjonijiet internazzjonali oħra. Huma jiddiskutu kwistjonijiet ta' interess reċiproku bħal metodi ta' eżaminazzjoni u l-proċeduri ta' selezzjoni, kif iż-żgħażagħ b'talent jistgħu jinġibdu lejn il-professjoni, l-użu ta' teknoloġiji ġodda għat-taħriġ eċċ.

L-għan huwa li jiġu żviluppati l-aħjar prattiki u jiġi żgurat li jkun hemm fluss benefiku reċiproku bejn l-universitajiet u l-istituzzjonijiet li jimpjegaw lill-gradwati tagħhom.

Il-parteċipanti huma interpreti li dan l-aħħar għaddew test ta' akkreditazzjoni. Jiġu ssuġġeriti mill-Kap tal-Unità tagħhom abbażi tal-kombinazzjoni tal-lingwi tagħhom u l-kwalità ta' xogħolhom.

Il-programm isir fi Brussell matul perjodu ta'ġimgħatejn b'persunal li jkunu ta' gwida u jaġixxu ta' mentors. Il-programm jiġi mfassal skont il-ħtiġijiet.

Il-programm Passerelle huwa mfassal biex jilħaq l-għanijiet li ġejjin:

• li jtaffi t-tranżizzjoni f'post tax-xogħol kumpless
• li jiżgura li l-kollegi l-ġodda jsiru operattivi għal kollox f'perjodu iqsar ta' żmien
• li jiggarantixxi standards ta' kwalità billi jipprovdi appoġġ addizzjonali
• li jittejjeb il-profil tal-PE bħala post tax-xogħol attraenti.