Żjarat fi gruppi u individwali fil-Parlament Ewropew
Żjara fil-Parlament Ewropew hija opportunità unika biex iċ-ċittadini jitgħallmu kif taħdem id-demokrazija parlamentari tal-UE u kif id-deċiżjonijiet meħuda mill-Parlament Ewropew huma rilevanti għall-ħajja ta’ kuljum tagħhom. Il-Parlament joffri firxa wiesgħa ta’ possibbiltajiet biex il-viżitaturi jsiru midħla tal-ħidma, tal-istorja u tal-mod kif taħdem l-istituzzjoni u l-Unjoni Ewropea. Il-Parlament Ewropew jilqa’ għadd kbir ta’ viżitaturi f’diversi postijiet, ċentri parlamentari tal-viżitaturi u mużewijiet.
L-offerta tal-PE għall-viżitaturi hija varjata u indirizzata lil gruppi u viżitaturi individwali.
Kull sena, madwar nofs miljun persuna mill-UE u lil hinn minnha jżuru l-Kamra tal-plenarja (l-Emiċiklu) tal-Parlament Ewropew fi Brussell u Strażburgu. Ħafna minn dawn il-viżitaturi jiġu bħala parti minn grupp (fuq stedina ta’ Membru tal-Parlament Ewropew jew waħedhom), iżda l-għadd ta’ viżitaturi individwali qiegħed jiżdied f’dawn l-aħħar snin. Il-gruppi jintlaqgħu mill-membri tal-persunal tal-Parlament, li jkellmuhom dwar il-ħidma u r-rwol tal-Parlament Ewropew. Il-gruppi jistgħu jiltaqgħu mal-Membri tal-Parlament Ewropew u jżuru l-Emiċiklu. Il-viżitaturi individwali jistgħu jżuru l-Emiċiklu bi gwida multimedjali interattiva b’24 lingwa, isegwu sessjoni plenarja jew jibbukkjaw taħdita fl-Emiċiklu ma’ wieħed mill-kelliema tal-Parlament.
Il-Parlament Ewropew jemmen li l-pubbliku għandu jkollu aċċess faċli għax-xogħlijiet u għall-bini tiegħu, għax iqis li t-trasparenza hija importanti għall-eżerċizzju tad-drittijiet demokratiċi fl-Unjoni Ewropea. Peress li għal ħafna ċittadini tal-UE, l-ispiża tal-ivvjaġġar lejn Brussell u Strażburgu tista’ tkun diffiċli minħabba d-distanzi twal involuti, f’xi każijiet il-Parlament jgħin billi jkopri parti mill-ispejjeż tal-gruppi.
Il-viżitaturi li jiġu Brussell jistgħu jżuru wkoll il-Parlamentarium u Dar l-Istorja Ewropea, li huma barra l-bini tal-Parlament Ewropew u jkunu miftuħin nhar ta’ Sibt u nhar ta’ Ħadd. Fil-Parlamentarium issir ukoll logħba tar-rwoli popolari għall-istudenti tal-iskejjel sekondarji, li hija mfassla fuq il-mod kif jaħdem il-Parlament Ewropew u li fiha l-parteċipanti jagħmluha ta’ Membri tal-Parlament Ewropew u jinnegozjaw leġiżlazzjoni li taffettwa l-ħajja ta’ kuljum tal-Ewropej.
Fi Strażburgu hemm spazju għall-wirjiet magħruf bħala l-Parlamentarium Simone Veil, li fih ċinema ta’ 360 grad u għodod interattivi. Il-bini tal-Parlament ta’ Strażburgu jilqa’ fih ukoll il-programm tal-istudenti Euroscola, li joffri lil eluf ta’ studenti bejn is-16 u t-18-il sena l-esperjenza li jsiru Membri tal-Parlament Ewropew għal ġurnata.
Il-Parlament Ewropew fetaħ ċentri tal-viżitaturi oħrajn iżgħar fl-Istati Membri biex ikompli joqrob lejn iċ-ċittadini. Huwa ppjanat li jkun hemm ċentru f’kull Stat Membru. L-għan ta’ dawn l-Europa Experiences hu li jġibu l-Ewropa qrib in-nies, joffrulhom informazzjoni u jħeġġuhom jinvolvu ruħhom.
L-offertà għall-viżitaturi mhix limitata biss għal żjarat fiżiċi. Il-Parlament Ewropew żied l-offerta online/diġitali tiegħu u issa qed joffri, pereżempju, Taħditiet Online tal-PE u Seminars għaż-Żgħażagħ Ewropej u Vjaġġ Diġitali ġdid.
Waqt it-Taħditiet Online mal-PE, il-viżitaturi jistgħu jwessgħu l-għarfien tagħhom dwar is-setgħa, ir-rwol u l-attivitajiet ta’ din l-istituzzjoni bi preżentazzjoni online u sessjoni ta’ mistoqsijiet u tweġibiet adattati għall-interessi tal-grupp. Taħdita Online mal-PE tkun disponibbli b’waħda mill-24 lingwa uffiċjali tal-Unjoni Ewropea.
Kull sena, fil-bidu ta’ Mejju, il-Parlament jiċċelebra Jum l-Ewropa b’diversi attivitajiet fi Strażburgu u Brussell organizzati mis-servizzi u l-gruppi politiċi differenti tal-Parlament.
Il-Vjaġġ Diġitali huwa ġabra ta’ esperjenzi online ġodda. Għandu l-għan li jagħti l-possibbiltà liċ-ċittadini biex jiltaqgħu, jiskopru u jesperjenzaw il-Parlament, ikunu fejn ikunu. Dan jikkonsisti f’erba’ pjattaformi ġodda immersivi u interattivi bbażati fuq l-internet: Esperjenza l-Parlament f’360° (EP360), Kun Membru tal-PE - Esperjenza ta’ Realtà Virtwali, Agħmel żjara f’Dar l-Istorja Ewropea u Logħba tar-Rwoli Virtwali.