10 mbealach a d’fheabhsaigh Parlaimint na hEorpa do shaol le cúig bliana anuas
Foghlaim faoin méid atá bainte amach ag Parlaimint na hEorpa le linn téarma reachtach 2019-2024.
Achoimre
- Agus na milliúin daoine ag ullmhú do na toghcháin Eorpacha, a reáchtálfar ón 6-9 Meitheamh, is fiú go mór breathnú siar ar an méid atá bainte amach ag Parlaimint le linn an théarma reachtaigh atá díreach tagtha chun clabhsúir.
Ón athrú aeráide a chomhrac go coinníollacha oibre a fheabhsú, caith súil ar an léargas seo ar na príomhthionscnaimh atá tar éis tionchar a imirt ar do shaol.
1. Téarnamh geilleagrach
Thug feisirí a gcuid tacaíochta do rialacha nua chun Saoráid Téarnaimh agus Athléimneachta, plean téarnaimh COVID-19 dar luach €750 billiún, a bhunú. Cuirtear tacaíocht ar fáil do thíortha an Aontais ar mórscála i bhfoirm infheistíochtaí agus leasuithe chun tionchar geilleagrach agus sóisialta na paindéime a laghdú. Is fusa ullmhú do thodhchaí níos digití agus níos inbhuanaithe dá bharr.
2. Tacaíocht don Úcráin
Tá Parlaimint tiomanta do thacaíocht a thaispeáint don Úcráin ó thosaigh ionradh iomlán na Rúise uirthi. I measc na n-athruithe, rinneadh buiséad fadtéarmach an Aontais a leasú chun níos mó airgid a lonnú don Úcráin. Mar chuid den Saoráid don Úcráin, cuirfear €50 billiún ar fáil don Úcráin i bhfoirm iasachtaí (€33 billiún) agus deontas (€17 billiún).
3. Athrú aeráide
Ghlac Parlaimint Dlí Aeráide an Aontais ina leagtar síos spriocanna chun laghdú de 55% a dhéanamh ar líon na n-astaíochtaí gás ceaptha teasa faoin mbliain 2030. Ina theannta sin, cuirtear ceangal dlí ar an Aontas glanastaíochtaí a laghdú go nialas faoin mbliain 2050.
Ón bpointe sin amach, thug feisirí a gcuid tacaíochta do mholtaí chun cinnte a dhéanamh de go mbaineann an tAontas Eorpach a spriocanna aeráide amach.
4. Gluaisteáin níos inbhuanaithe
Thug feisirí a gcuid tacaíochta do rialacha a deir nach mór do gach gluaisteán nua a dhíoltar ar mhargadh an Aontais astaíocht CO2 ar bith a ghiniúint faoin mbliain 2035.
5. Imirce
Ghlac Parlaimint leasú ar bhearta an Aontais maidir le himirce agus tearmann in 2024.
Faoi na rialacha seo, ní mór do gach tír san Aontas cabhair a thabhairt dá chéile i gcás mórphlódú imirceach. Is féidir leis na ballstáit cabhair a thabhairt tríd iarrthóirí tearmainn nó daoine a fhaigheann cosaint idirnáisiúnta a athlonnú, ranníocaíochtaí airgeadais a dhéanamh nó trí thacaíocht oibríochtúil agus teicniúil a chur ar fáil.
6. Geilleagar digiteach
Ghlac feisirí rialacha digiteacha nua chun timpeallacht a chothú ar líne atá níos sábháilte, níos trédhearcaí agus níos cothroime.
Is é is aidhm don Ionstraim um Margaí Digiteacha cothrom na féinne a chinntiú do gach comhlacht digiteach, is cuma cé chomh mór agus atá sé. Faoin rialachán seo, leagtar síos rialacha soiléire d’ardáin mhóra chun cosc a chur leo coinníollacha éagothroma a leagadh síos do ghnólachtaí agus tomhaltóirí.
Faoin Ionstraim um Margaí Digiteacha, tugtar níos mó smachta do dhaoine ar an méid a fheiceann siad ar líne: beidh eolas níos fearr ag daoine maidir le cén fáth a mholtar ábhar faoi leith dóibh. Beidh ar na meáin shóisialta aghaidh a thabhairt ar bhréagaisnéis agus ábhar mídhleathach a chomhrac.
7. Intleacht shaorga
D’fhormheas Parlaimint an Gníomh um an Intleacht Shaorga, a bhfuil sé mar aidhm aige sábháilteacht a chinntiú agus deimhin a dhéanamh de go gcloínn uirlisí AI le cearta bunúsacha. Ag an am céanna, leagtar béim ar inniúlacht a chur chun cinn san earnáil. Faoin rialachán seo, bíonn dualgaisí faoi leith ar chórais AI maidir leis na rioscaí agus an tionchar féideartha a bhaineann leis.
8. Luchtaire uilíoch
Ghlac Parlaimint bearta éagsúla chun dramhaíl a laghdú agus chun geilleagar ciorclach a chothú ina dhéantar amhábhair a athúsáid agus a athchúrsáil. I measc na mbearta seo, tá an port luchtaithe USB-C a dhéanamh ina chaighdeán nua do ghléasanna soghluaiste faoi dheireadh 2024. Rachaidh sé seo chun tairbhe tomhaltóirí agus déanfar costais a laghdú ag an am céanna.
9. Ceart chun deisiúcháin
D’fhormheas Parlaimint rialacha nua maidir leis an gceart chun deisiúcháin a bhfuil sé mar aidhm acu tomhaltas níos inbhuanaithe a spreagadh, trína dhéanamh níos éasca earraí lochtacha a dheisiú, dramhaíl a laghdú agus tacú le hearnáil an deisiúcháin.
10. Comhionannas pá
Tá sé de dhualgas ar chuideachtaí an Aontais eolas a nochtadh a chabhraíonn le fostaithe comparáid a dhéanamh idir thuarastail agus bearnaí pá idir na hinscní a thabhairt chun solais, faoi reachtaíocht a d’fhormheas Parlaimint.
