Pagamenti istantanji: il-benefiċċji għall-klijenti u n-negozju
Il-pagamenti istantanji jippermettu li l-flus jiġu ttrasferiti f'sekondi. Skopri kif dan jgħin lill-klijenti, in-negozju u l-ekonomija b’mod ġenerali.
Tiddejjaq li trid tistenna jiem sħaħ biex jidħlu l-pagamenti bankarji? Għandna aħbar tajba: issa hemm alternattivi aktar mgħaġġla li jippermettulek tibgħat u tirċievi l-flus f’ħakka ta’ għajn.
Il-benefiċċji ta’ pagamenti istantanji
Il-pagamenti istantanji jippermettu lin-nies u lin-negozji jħallsu u jirċievu pagamenti b’mod aktar konvenjenti u effiċjenti.
Bil-pagamenti istantanji, in-nies jistgħu faċilment jaqsmu kont restorant mal-ħbieb u jirċievu l-fondi immedjatament.
In-negozji, speċjalment l-SMEs, jistgħu jkunu aktar fil-kontroll tal-fluss tal-flus tagħhom. Barra minn hekk, bl-użu ta’ pagamenti istantanji, in-negozjanti jnaqqsu l-ispejjeż operattivi tagħhom u jistgħu jipprovdu servizz aħjar (eż. joffru rifużjonijiet istantanji).
L-istituzzjonijiet pubbliċi jistgħu jibbenefikaw minn ġestjoni mtejba tal-fluss tal-flus b’mod simili għan-negozji. B’pagamenti istantanji, il-NGOs u l-organizzazzjonijiet tal-karità jistgħu jagħmlu użu mill-kontribuzzjonijiet aktar malajr. Il-banek jistgħu jużaw pagamenti istantanji bħala xprun biex jiżviluppaw servizzi finanzjarji innovattivi u jsaħħu l-pożizzjoni kompetittiva tagħhom.
Is-sitwazzjoni fl-UE
Fil-bidu tal-2022, 11 % biss tat-trasferimenti ta’ kreditu kollha tal-euro fl-UE saru fi ftit sekondi. Hemm kważi €200 biljun marbuta fi tranżitu fis-sistema finanzjarja kuljum.
Fl-istess ħin, id-disponibbiltà ta’ pagamenti istantanji u tariffi relatati jvarjaw ħafna bejn il-pajjiżi tal-UE.
Ftehim dwar pagamenti istantanji
F’Ottubru 2022, il-Kummissjoni ħarġet bi proposta leġiżlattiva biex tagħmel pagamenti istantanji f’euro, disponibbli għaċ-ċittadini u n-negozji kollha li għandhom kont bankarju fl-UE kif ukoll fl-Iżlanda, in-Norveġja u l-Liechtenstein. F’Novembru 2023, in-negozjaturi tal-Parlament Ewropew laħqu ftehim mal-Kunsill dwar it-test leġiżlattiv finali.
Fi Frar 2024, il-Parlament u l-Kunsill it-tnejn qablu dwar it-test finali.
Skont il-leġiżlazzjoni:
- It-trasferiment ta' kreditu istantanju għandu jsir irrispettivament mill-jum jew is-siegħa u jiġi pproċessat immedjatament, fi żmien 10 sekondi, u min iħallas għandu jirċievi rċevuta malajr kemm jista’ jkun.
- Fornitur ta’ servizzi ta’ pagament għandu immedjatament jikkonverti l-ammont ta’ tranżazzjoni f’euro, jekk il-pagament jiġi sottomess minn kont li mhuwiex denominat f’euro.
- Il-fornituri ta’ servizzi ta’ pagament għandu jkollhom detezzjoni tal-frodi robusta u aġġornata u għandhom jieħdu miżuri li jipprevjenu li trasferiment jintbagħat lil benefiċjarju mhux intenzjonat.
- Il-fornituri ta’ servizzi ta’ pagament iridu jintroduċu wkoll miżuri addizzjonali biex jipprevjenu attivitajiet kriminali (eż. ħasil tal-flus jew finanzjament tat-terroriżmu).
- L-ebda ħlas żejjed ma għandu jiġi applikat għall-ħlas istantanju meta mqabbel mat-tranżazzjonijiet tradizzjonali bl-euro.
- L-Istati Membri li l-munita tagħhom mhijiex l-euro se jkollhom japplikaw ukoll ir-regoli, iżda wara perjodu itwal ta’ tranżizzjoni.
Il-leġiżlazzjoni se tkun operattiva għalkollox mill-2025. Hija marbuta ma’ firxa ta’ inizjattivi oħra fil-qasam ekonomiku li għandhom l-għan li jiżguraw li l-UE timxi id f'id mal-avvanzi teknoloġiċi: dan ifisser li sservi liċ-ċittadini u n-negozji, u tipproteġi s-sistema finanzjarja u l-ekonomiji tagħna mill-kriminalità organizzata. Dawn l-inizjattivi jkopru ħlasijiet immedjati, servizzi ta’ ħlas, kriptoassi, u regoli kontra l-ħasil tal-flus.
