Generaziun giuvna en Surselva
La generaziun giuvna ei in factur impurtont ed ina schanza da muntada pigl avegnir dalla Surselva. La regiun sedat breigia d'includer tuttas generaziuns, ella dat denton peisa speciala alla participaziun dalla giuventetgna. Lur collaboraziun activa ei decisiva pil svilup persistent dalla regiun e dallas vischnauncas.
Cun ideas frestgas e perspectivas novas sa la generaziun giuvna contribuir da dumignar sfidas actualas e futuras. Sche la giuventetgna ha la pusseivladad da s'integrar activamein ella concepziun da lur regiun-patria, rinforza quei ils ligioms cun quella, promova in svilup persistent e scaffescha perspectivas pigl avegnir. Quei augmenta la schanza, ch'ils giuvens e las giuvnas retuornan suenter lur formaziun professiunala ni ch'ellas ed els emigreschan gnac, quei che sa rinforzar a liunga vesta la regiun.
En Surselva dat ei differents instruments da participaziun per la generaziun giuvna:
- NextGen Surselva ei in'uniun che unescha persunalitads giuvnas dallas 15 vischnauncas sursilvanas. L'uniun NextGen Surselva ha ina rolla da ligiom e da coordinaziun denter la giuventetgna e persunas decisivas dalla politica. L'uniun promova il brat intercommunal en fatgs socials, economics e politics, quei cugl intent da saver effectuar in svilup persistent e positiv dalla Surselva. NextGen Surselva (nextgen-surselva.ch)
- Cumissiun da giuventetgna vischnaunca Val Stussavgia Gemeinde Safiental | Kommissionen
- Cumissiun da giuventetgna vischnaunca Ilanz/Glion Cumissiun da giuventetgna - Gemeinde Ilanz :: Vischnaunca Glion (ilanz-glion.ch)
Visiuns da svilup per giuvens carschi dalla Surselva
Culla visiun da svilup per giuvens carschi ei Lorena Berther da Segnas seconfruntada la primavera 2021 en connex cun sia lavur da bachelor. Ella ei s'approfundida intensivamein ella damonda daco che giuvens carstgauns dalla Surselva mondien naven (e retuornien buca pli suenter lur scolaziun). Questa lavur ha purtau entgins impuls interessants e captivonts da glieud giuvna dalla Surselva, impuls ch'ein era da muntada pil project SURSELVAvegnir.
Savevas gia quei?
Vitgs muntagnards attractivs per giuventetgna
Ils giuvenils dallas vischnauncas cul label „Vitgs muntagnards attractivs per giuventetgna“ gidan da concepir gl'avegnir els territoris da muntogna. Els portan e sustegnan il svilup da quels e san cheutras contribuir da frenar l'emigraziun.